ICU-a awm lai pawha fiamthu la thawh thei a ni: Mapuia (Zephyr)


-As told to Robert Zoliana

Zephyr Drama Club dintute zingami Lalrintluanga Pachuau (Apa Kungtea) thihna chuan a thawhpui leh thianțha ni bawk, H. Rotluanga (Mapuia) a țhawng na hle a. Hetiang hian a țhianpa chungchang a sawi:

'KA DAM VELEH MIN RAWN HRUAI DAWN NIA'
“A țhat reng laia kan inhmuh pawhin dam taka a chhuah rin lohna ka nei lian tawh. Nimin piah (Zirtawpni) khan a hmel en khan a hrisel lo tih ka hre tawh. Ka beisei lo, ka rilru a nuam thei lo. Dam lo chungin, ‘Ka inhuam a lawm,’ a ti a, shooting nei ang kan la ti a, 'Mapui, ka khua a sik a, a remchan veleh, ka dam chian veleh min rawn hruai dawn nia aw,' a ti a, chu chu kan inbiak hnuhnun ber a ni ta a ni.

FIAMTHU LUNGPHUM PHUMPUITU
“A pawi ka ti a, ka fiamthu bulțanna, mipui hmâa ka din ang chi ah te, min kaihruaitu leh fiamthu lungphum min phumpuitu a ni a, ani hnen atangin tam tak hi ka hriatphah, min zirtir a ni.

A THIH THU A HRIAT VELEH
“Kan nunhlui, ka chhuikir nasa hle a, tunhnai lawka programe nei dun leh tur kan nih avangin min nghawng na hle a, hrehawm ka ti a, rilru mumal put pawh a har khawp mai.

A MIZIA LEH ENTAWNTLAK A NIHNA
“Ka tluk lohna hi ka sawi duh a, ka tluk lohna key pawh ka sawi duh. Eng harsatna pawh tâwk se, thil reng rengah a ho (Light) leh hlim awmzâwng a la zel thei hi tluk lo ka inti ngawih ngawih. ICU-a a awm chanchin pawh hetiang hian min hrilh a, ‘ICU-ah ka țhat tawh hnu khan ka bula mite kha an boral a, Doctor-in chhuah a la phal si lova, ICU-a lungphu enna (Heart monitor) te kha ka chhaih nileng țhak mai a ni. A chângin ka'n thaw lo der vel a, a inrin te kha a kham pheiin a kal,’ te a ti a, mittui thlaphungin kan la nui. Chutiang khawpin ICU-a awm lai pawhin fiamthu thawh thei kha a ni. A ngaihsanawm ka ti hle. Comedian search-a lo tel tam tak te zingah khan a nê pawh pha leh tluk an awm lo. By-heart lovin chawplehchilha sawi tur nuihzatthlak deuh deuh hi a hria, tlachawpin a sawi nghal zung zung thei a, mibik a nih zia a hriat hle."

Mizo Comedian Ropui Chu

Pic: A nupui Rohmingsangi leh Mapuia te nen


Post a comment

Powered by Blogger.