PU LALDUHOM, KA DEM LO CHELPS Live Telecast-ah kum 2018-General Election-a hnehna i chanloh chuan i chawlh tur thu i sawi hian Mizoram mipui min thrawng na takzet a, hmuntinah i chanchin an sawi hat hat reng bawk a ni. I chawlh san tum nachhan erawh chiang takin i tarlang nghal a, tamtak chuan an dem ngei ang che, tamtak erawhin an ui takzet bawk ang che.

Kum 30 chuang zet i policy i vahvaih pui dan hi rual û zawk te chuan an hrechiang ngei ang. Mizo te hian taimâkna hnualsuata nawmsip bawlna kan thlakhlelh lutuk vang zawka tun dinhmuna kutdawh mék kan ni tih erawh kan inhrethiam si lo.

Mahni sum leh pai, thâ leh zung sénga Mizoram tana i fehchhuah ngat ngat ang hian nangmah demtu te hian kum 30 chhung han vakvai teh rêng se an tlin bik in ka ring lo a sin.

Kum 1986- a remna kan neih theihna tura i hna zahawm tak IPS hna i kalsan atang khan rinawm takin i policy i la vawngnung reng a, party lian zingah i policy i luhpui lahin beidawnna mai a ni si. An duháisâm mipui retheihna ruama hnuhluha an pumpui hnuna sum leh therhlo tawktarh hmanga hnuhkual leh hrui lova an hrawkhrawla chaihkual tihtawp i tumna chu tun thlengin i la hlawhchhampui mék si a. Chutihlaiin mipuite chuan reilo te chhunga an hmuia chithlum tâttu te chu an Pathian biak thung si a!

Kut hnathawktu te beidawnna ramah hian i policy Thawhrimna, taimakna, tawrhchhelna, dikna leh rinawmna hian hmun a chang thûk thlawt si lo hi i vânduai ka ti thin. Sum leh therhlo hmanga mirethei pumpui hnuna chaihkualtu te chuan arpa chan an chang zel si hi a pawi ber zawk chu a ni.

Tunah, i kum a lo upa ve ta a, i vânglai thahrui chak láia hnawltu che Mizoram mipui te hian engvanga dem che nge an nih ka hrethiam thei lo. Brig.T.Sailoa'n ram a kaihhruai dan kha a hun lai khan a thatzia hrethiam lo mahse a tar chakloh hnuah hrechhuakin lawmthu sawina atan kum 80 pelh daihah amah ngéi chu an vawrh tling leh a nih kha. Mahse sebo hnua se kawngkhar ang chauh a ni toh si!

Nang chuan i sum leh pái, i hun leh thahrui pawhin a tlin tawh loh tur thu sawiin chawlhsan i tum ta zawk a, i duhthlanna hi ngun taka ngaihtuah chuan thalai te hian kan zah ngawih ngawih che a, kan ui bawk che. Ram hruai tur meuh chuan taksa that vanglái hi duhthusâm ber a ni. Thalai te hnungzui tlak, an thachhang dâwl tlâk khawpa taksa vanglai nih hi duhthusam a ni. Mahse tunah poh an la hnawl che a nih a, kum 5 dang a kal leh meuh chuan chhîpsamah kelsam a lo to var fur toh ang a, he kutdawh ram Zoram hi hruaichhuak turin an iai toh ngei ang che tih i hmu tlang vek tih hi hai rual a ni lo. Hei vang hian thalai zawk te kuta hlan i pawitih loh zia i lantirna ah ka ngai bawk.

I policy tihhlawhtlin pui i duh vanga dinhmun duhawm tak tak i kalsan vàng leh i dinhmun phehthlûk tuma thapui thawha phiarru thintu te chuan 'zuanglawr' tiin an chhuah lêt hlauh si che a. Chutih lai chuan duhtawkin he ram hi suasamin an sahmîm hrâipuarin an inchhêkarawm hlauh thung a, kutdawh leh chawmhlawm ramah min chhuah mék thung si!

I duhthlanna ah hian ka dem lo che a, i kawng dâltu te bak hian an sêl lo che a, mipui hmaa ârpánchuktui lo rum rum khawpa chhuahtu te leh tawngkam feikibár nen lama beitu te vang erawh hi chuan beidawng lul suh la, he ramin a ko leh che a nih pohin hnungchhawn lo hram ang che.

Tunah hian chawl turin thuthlûkna siam tawh mah la, he Zoram riangtè hian i hmangaihna thlahlelin a lo au leh ngéi ang che tih hi ka hming tlukin ka hrechiang a ni.

*Ka ram tan thiltha engmah hnutchhiah lovin hnahthel ro angin ka liam mai dawn em ni*tia kum 30 chuang zet i lo vahvaihna hi a hrechiangtu ber ka ni ngèi ang. Nang ang hi mi sawm vel tal awm se he ram hi hetiang em em hian a vanduai lo tur. Zoram dinchhuah hun nghakhlel taka mittui nena thlir thintu te chuan he ramah hian rethei takin an hringnun an vûiliam mék a sin.

Mittui nen i vahvaihna leh i hmangaih Zoram chawlhsan i tum lai hian Zoram thalai te hian ding turin kan au che tih erawh min hriatsak la, ram tana tha leh zung i lo sènna zawng zawng hretu te hian zahna chibai kan bûk mawlh mawlh che tih min hriatsak hram bawk ang che..

He hnam hian chhantu a ngai tih i hria e. I ram hian hmangaihtu a mamawh tih poh i hria e. I ram leh hnam mangangin a koh hunah che erawh i hnuchhawn dawn lo tih kan hriat avangin keini Zoram thalai te hian lungmuang takin kan lo thlir reng che a sin.

Writer: Lalrinawma Awma

Post a comment

Powered by Blogger.