BOXING INFIAMNA KHAWVEL - MAYWEATHER-A HMUH LAIIN PACQUIAO-AN BRONER A AWPBET

MAYWEATHER-A HMUH LAIIN PACQUIAO-AN BRONER A AWPBET

BOXING INFIAMNA KHAWVEL"Kum 40 hi chu number mai mai a ni"

WBA welterweight champion Manny Pacquiao chuan 'kum 40 hi number mai a ni' tih a lo sawi tawh fiahna a lantir a, mittlung leh hmuhnawm taka a theihna a pho lan rualin hma lam hun a la neihzia a tar lang tel nghal.

Kum thum chuang hnuah a tlangnel ṭhinna leh boxing hmunpui MGM Grand Arena, Las Vegas-ah kir lehin, inrinni zan (keini huna chawlhni zing)-ah amah chotu Adrien Broner a thunun. He inhnek hi hruihrual bul lawk, hnai tak aṭangin Floyd Mayweather Junior chuan a en a ni.

Thla liam ta khan Pacquiao chuan kum 40 a tlin champhaphak a lawm a, Philippines President Rodrigo Duterte pawhin a hmanpui. Filipino icon hi a kum zat avangin rinhlelhna a chungah a awm phah a, mahse, Broner-a hmaah fiah takin a ṭuan ṭha tak leh a theihna chungchuang tak a hmuh theih.

Weight ṭhen hrang pariata world champion ni thei awm chhun Pacquiao hian unanimous decision-in hnehna a chang a, round 12 chhungin harsatna liantham tawk lovin Broner-a lakah kawnghren a humhim.

Kum 16 a nih atangin professional boxing a luhchilh a, vawi 70 a inhnekna niin a ṭum 61 nan a chak. Kum 24 chhung zin kawng hahthlak leh hautak zawh tawh mah se ropuina leh hmingthanna hmangin a chei mawi a, hmabak êng tak a la nei tih mipui a hmuhtir.

Broner a hneh hnuin amah ngeiin : " Manny Pacquiao hian a zin kawng a chhunzawm zel ang," a ti a, a duh ber chu 2015-a a hneh loh nena intawn nawn leh a ni a, chhanna pe theitu chu boxing chawlhsan tawh Mayweather a ni.

Judge pahnihin 116-112 ve vein Pacquiao an chaktir a, pakhatin 117-111 in dah sang bawk. Broner a hnek fuh apiangin mipui au thawm a ring hle zel a, a chak zawk tih chiang hle mah se a knockout zo bik lo.

Chuti chungin Pacquiao hian na tak takin a hnek hnem viau a, round sarihna leh kuanaah phei chuan a kuttum vei lam hlauhawm tak avangin Broner a talbuai. Weight ṭhen hrang palia world champion ni tawh American hian hnek let theihna remchang melh reng mah se a duh ang hun ṭha hmu lovin a bet zawkah a ṭang tluan.

Pacquiao chuan : "Kum 40 ka ni a, ka theihna ṭha ber ka la lantir thei. Hei aia hriam leh na zawka nawr ka duh a, mahse, ka team-ten fimkhur lo leh pawng ba sa ngam miah lo turin min ti a, min beih let thut a tum dawn a, chu hun ṭha chu a zawng a ni," a ti.

A hmunah mipui 13,025-in an en a, round hnuhnung pahnihah boxer pahnih an zuai ve ve viau mai. Khawlin a chhinchhiah danin Pacquiao chuan vawi 568 hnek chhuakin 112 a fuh a, Broner chuan 295 chhiah a kuttum a chhuah laiin ṭum 50 chauh a hnek fuh.

BOXING INFIAMNA KHAWVELChuti chungin Broner hian : "Ka hneh, inhnek entu tute pawhin an hria ang ka hneh chiang hle a, a tawp round sarihah ka chak vek," a ti a, round tinah vawi riat aia tam hnek fuh a neih loh bakah round hnuhnung berah phei chuan ṭum khat chiah a hnek fuh.

Mipui mit fukna lian tak pakhat chu hnai tak aṭanga inhnek entu Mayweather a ni. Inhnek an ṭan hmain Pacquiao nena innuai leh turin hruihrual chhungah a kir leh ang em tih zawhna pawh a dawng.

"Manny Pacquiao-a chungchang hi min zawt awl lo chu a ni ber e. Adrien Broner hi hneh phawt a mamawh. Kei erawh chuan hlim leh hrisel takin ka nun ka hmang mek," a ti.

Showtime announcer Jim Gray chuan inhnek a zawh hnuah Mayweather chu hruihrual chhunga lut ve turin a ko va, Pacquiao nena an chungchang sawipui duh mah se Mayweather chuan a ngaihna hre lo ni awm takin a hnawl. ~ Thang Khuma T-a

Post a Comment

0 Comments