Sap ṭawng hian kan duhthlanna ngeiin kan ṭawng kan hnuaichhiahtir chu ani ta der mai, thu kan ziak emaw, kan sawi dawn emaw a, ṭawng dang kan zep duh a nih pawhin, a ram neitute ṭawng ngei hi dah hmasak nachang hre rual chu kan ni tawhin ka hria!
WELCOME tam zawk hi CHIBAI tih mai theih a ni.
NOTICE aiah HRIATTIRNA ni mai se,
SUNDAY CLOSE aiah CHAWLHNI KHAR tih mai te.
NO ADMISSION tih aiah LUH PHAL LOH tih te hi lehkha thiam, sapṭawng ngaina tak tan pawh a fiah fé zawk!
STAFF ONLY tihte hi THAWKTUTE CHAUH tih mai tur.
BEWARE OF DOG tih ai chuan UI HLAU RAWH tih ngei hi a fiah nge nge.
COMMUNITY HALL zawng zawngte hi ZAWLBUK ti ila, kan hnam nuna Zawlbûk mual liam tawh chu, sum sèn belh lovin khaw tinah kan kaitho leh a ni mai.
INNAUGURAL FUNCTION tih teh duah ai chuan HAWNNA INKHAWM ti mai ṭhin hi a awl zawk.
ADVANCED CHRISTMAS nge ADVENT CHRISTMAS? tia mahni ṭawng ni lo hriat dik tuma buai buai ai chuan , KRISMAS URLÂWKNA ti mai ila hnam fing kan ni mai tur!
MIZOṬAWNGIN BORALNA KAWNG A ZAWH tih ka rawn ziah tawh ang khan, Hetiang thila kalphung fel kan neih loh lutuk avangin ṭhangtharte ngaihtuahna kan tichingpen tawh a.
Kawngkhara PULL/ PUSH tih târ hrethiam lo chu an zak. PAWH/NAM tiin târ ta zawk ila. Ṭhangthar zingah hrethiam lo an awm nual tawh ang a, hre thiam lotu aiin hriat thiam loha târtu chu an zahpui tawh zawk ang.
CHHUAHNA tih aia EXIT han tih kherte hi fiah riauvin kan hre ta ber niin a lang.
TOILET han tih ngei hian changkang riauvin kan hria a, INTHIARNA tih chu ṭawp deuh turah kan ngai a, mizote hian kan thumal hi kan zahpui ṭan chu a ni tain ka hria.
Vengchhung information mike aṭanga thu puan ka hriat pakhat chu ka lo ip chawih chawih a, Theibuhfai ti a Mizoṭawnga sawi mai kha a fiah tehlul nen pomgranate ti a autir an tuma, a au dik chiahlo e maw ni, sawifiah leh chawp ngaiin a han puang a, a ram neitu te aia kan hnena awm hnamdang hriatthiam dan ngaih pawimawh zawk tlat mai kha muangchanga kan ṭawng rêk hlum mektu chu a ni.
Ṭawng humhalhna chungchang sawi apiangin, mi tamtak chuan Mizo ṭawng upa te, grammar dik te, Bible thu ulh lai te hi ngaimawhin, a bawp lawka inhnialna namen lo an chawk chhuak ṭhin a, hetiang ti pawl hi awm mah se, a nawlpui nun nghawngtu leh kaihruaitu chu vantlang chhiar tura kaihhruaina thil târ vel hi a ni mah mah zawk, chuvangin, 'ZO' ngainatna beihpui kan chhuah thar a ngai ta hle mai.
~Saikunga