One in Christ Ngenna
Kan member Lalruatdiki Chhangte chu natna dang (Thluaka khawsik lut) in a tlakbuak leh avangin Synod Hospital, Durtlangah enkawl mek a ni a, ṭawngṭaipui kan mamawh hle mai.
Ruatdiki hi kumin January thla tir aṭang khan natnain a bawhbuai ṭan a, a natna tak hi Doctor te'n an hmuchhuak mai thei lo a, thla khat chuang damdawiinah enkawl a ni a, ṭhat lam a pan mawh hle.
February thla chawhnu lam khan tlêmin a rawn leikang deuh a, hmun danga refer an nih bawk avangin damdawiin chu an chhuahsan a, CKṬP General Conf. a zai tura an ruatna chu a han ti hlawhtling thei hram a, a rawn haw lehlam erawh a taksa a chau zui hle a, rei fe chu a tho leh peih meuh ta lo a ni.
Thla hmasa (March) khan NEIHGRIMS, Shillong-ah a natna tak endik turin an zuk kal a, mahse thla khat hnu-ah chauh test hi tih theih anih tur thu an lo hrilh a, a thisen biopsy lak te chu an hmabak a ni.
An rawn haw chhoh hnu hian amah pawh a pangngai chho viau a, mahse kar khat leh tlêm liam ta mai aṭang khan a mit lehlam hian khua a hmu ṭha thei ta lo a, Synod Hospital-ah han inentirin karkhat dâwn a mitah an lo chiu a, hma a sawn em em tak loh avang leh lu na tak mai a rawn neih tak fo avangin admit a ni ta a ni. Damdawiin an luh hnu-ah hian test hrang hrang an lo ti a, a thluaka khawsik lut a ni tih an hmuchhuak ta a ni.
One in Christ chuan in ṭawngṭainaah Ruatdiki hi lo hre ve reng turin kan han chah che u a, Pathian faka zaia thei tura a dam leh vat theihna turin Pathian hnenah min thlenpui turin kan han ngen a che u.
Post a Comment