Pawndum/Puandum tih a ni na a, a dum hlang a ni lo va.Pawndum hmasa ber nia lang chu a dum a khat tâwka zung hnih bawk vela a sena hmun ngaa țial a ni.Chumi hnuah a sen leh a dum inches 3 vela hlaiin a dungah an țial leh a ni.A tahba phelh lohnan a hmawrah an hruih (kuthruih) țhin. Pawndumah hian themthiam chuan zethlan 'mitmeng' antihte an thlang a, la engin an rawlh/zep țhin.Mizovin rawng thlakte kan thiam hnuah rawng chi hrang hrang a eng te, a hring te leh a pawl te pawh țial nan hman a ni ta a.Hetianga țial hi 1950 hnu niin a hriat.
He puan hian Mizo nunah pawimawhna deuh a nei a.Hmeichhe pasal nei thuam chhawm zinga tel ve a ni a.Pawn dum ken tur an neih loh chuan hmeichhe man chu tlâiin a kiam a, chu chu Rs.2/-a ni.A pasal vanduai thil thua a boral chuan he puan hi a ruang tuamna tur a ni.Chu chu Zawlpuan/Zawlkenpuan an ti.Laina hnai leh țhian țha tak an thihin pawndum in an khuh țhin a.Chutiang khuhtu chu thlaichhiah sa bawp an pe țhin.
Thlaichhiah hi tlem han sawi zau ila.Mi an thihin vawk te, sial te, ar te an neih dan a zirin an talh a.Chu chu chhungkhat leh thlan laitute ei tur a ni a.Thlan laitute chu an tlawmngai a, an ei duh lo va, an tlanchhe dawr dawr țhin.An ran talh thlarau khan mitthi khua a lut dawn a ni.Chhungkhat laina nei țhate chuan ran thlaichhiah an rawn keng a, khual khua ațangte pawhin.Hetiang hian ni tam tak, a neinung deuh chuan a thla a thla hialte pawh ran an talh țhin.
Pawndum hi ruang tuam nana hman a nih avangin a sei hle țhin.Lu ațanga ke ler khuh thei tur a ni.Hmeichhe chhawm pawndum hi a lo țet emaw a chhiat emaw chuan a dang a tah leh theih.Tunlai thlengin hmeichhiain pasal a neihin a chhawm țhin.Pawndum tih theih chi khat mai lo chi dang dang a awm.Pawndum hi mipa puan a ni a.Thingdîm dawna bah țhin a ni.Thil țha lo lam leh lungngaihna, lungawi lohna lam entir nan hman a ni ta bawk a.
Tunlai chuan mitthi vuinaah a pawl azawng pawhin sûn nan sin/bah an ching ta hle.Chutih rualin hnam lâmah te pawh hman a ni zêl tho bawk.Tun thlengin Khual lâmah bah a la ni.
(Puandum/Pawndum hi zo hnam hrang hrang Lusei, Paite, Ralte,Mate, Thado, Biate, Darlawng, Bawm, Zou, Gangte ten kan nei vek a, a design erawh tlem tlem a hrang , Pic ami hi Lusei pawndum)
Post a Comment