Pu Lal Hriatrenga Chhangte RTI chhanna hmuh behchhana Social Media-ah diklo taka thehdarh a nih thu thuchhuah siamin an sawifiah

ToMZ
28 May 2020, Thursday, May 28, 2020 IST
UD&PA Department-in an hmalakna PMAY: HFA(U) Mission chungchang Social Media-ah diklo taka thehdarh a nih thu thuchhuah siamin an sawifiah


timesofmizoramPu Lal Hriatrenga Chhangte-in SPIO, Directorate of UD&PA hnena PMAY:HFA(U) Mission chungchanga RTI zawhna chhanna 15th May 2020-a a hmuh behchhana Social Media-a a tarlan/puanzarnaah UD&PA Department chuan thil diklo, hriatthiam tawk loh leh sawifiah dan diklo a hmu a. Hemi chungchangah hian UD&PA Department chuan mipuiten thudik tak leh PMAY:HFA(U) Mission kalpui dan kan hriatthiam theihna turin a hnuaia mi ang hian thuchhuah a siam a ni.



“Pradhan Mantri Awas Yojana – Housing for All (Urban)” Mission hi 2015 atanga 2022 chhunga kalpui tura ruahman a ni a. He Mission hnuaiah hian verticals pali (4) a awm a: (i) In-situ Slum Redevelopment (ISSR); (ii) Affordable Housing through Credit Linked Subsidy (CLSS); (iii) Affordable Housing in Partnership (AHP); and (iv) Subsidy for Beneficiary-led Individual house construction or enhancement (BLC). Heng verticals pali (4) atangte hian State Level Sanctioning & Monitoring Committee (SLSMC) 5th October, 2015-a Chief Secretary’s Conference Room-a thukhawm chuan Mizoram State chhunga Urban Towns 23-ah heng vertical pahnih – Beneficiary-led Construction Scheme (BLC) leh Credit Linked Subsidy Scheme (CLSS)-te hi Mizoram dinhmun thlir chunga kalpui nise tiin a rel a. He SLSMC 1st Meeting thutlukna ang hian BLC leh CLSS vertical-te hi Mizoram-ah kalpui a ni.

PMAY:HFA(U) Mission Guidelines-in a sawi angin, Beneficiary-led Construction (BLC) Vertical hnuaiah hian Economically Weaker Section (EWS) chhungkua, ram nei In sakna tur sum neilote tan insak tanpuina Rs.1,50,000/- dawn theih a ni a, Demand Survey Application hmangin Eligible beneficiaries-te tan kum 2015, 2016 & 2017 khan In sak tanpuina dilna hun hi hawn a ni. Heng Demand Survey application lo lutte hi Department-in LC/VC leh NGO’s-te nen Door-to-door Verification neih leh vek thin a ni. Door-to-door verification report endik tur hian District tinah District Screening Committee (DSC) din a ni a. DSC-in BLC Scheme hnuai atana Eligible beneficiaries a enfiah zat beneficiaries 17,670 hmangin khaw 23 tan BLC Detailed Project Report (DPR) siam a ni a. Heng DPR 23-te hi Central Ministry-in a pawm vek tawh a. DPR 23-a beneficiaries 17,670 atang hian Document engkim tihfel tawh 15,666-te chu MIS Portal-ah thunluh (attached) fel tawh an ni a. Heta MIS attached zat atang hian Central Share (Central Assistance) Rs. 9,399.60 lakhs chu Department-ah hetiang hian sum dawn a ni:

1. Department-in sum a dawn ni : 16th June, 2016
Sum dawn zat : 818.40 (Rs.in lakh)

2. Department-in sum a dawn ni :
28th September, 2018
Sum dawn zat : 4,254.00 (Rs.in lakh)

3. Department-in sum a dawn ni :
28th September, 2018
Sum dawn zat : 1,494.00 (Rs.in lakh)

4. Department-in sum a dawn ni :
29th March, 2019
Sum dawn zat : 415.20 (Rs.in lakh)

5. Department-in sum a dawn ni :
30th January, 2020
Sum dawn zat : 204.60 (Rs.in lakh)

6. Department-in sum a dawn ni :
30th January, 2020
Sum dawn zat : 2,194.20 (Rs.in lakh)

7. Department-in sum a dawn ni :
30th January, 2020
Sum dawn zat : 19.20 (Rs.in lakh)

Total : 9,399.60
(Rs.in lakh)

Heng bakah hian Guidelines-in a phal angin Demand Survey kalpui chhunzawm mek zel a ni a. Demand Survey mil ang zelin DPR pawh siam chhoh zel a ni. Tichuan, Beneficiaries 11,691 tan 2nd DPR pariat siam leh tawh a ni a. Heng DPR pariatte hi ‘In-principle’ in Central Ministry-in a pawm tawh a. Heng bakah hian Central Ministry pawmpui turin ni 18th March, 2020 khan Beneficiaries 4,708 tan DPR 12 thehluh a ni tawh bawk. Tun dinhmunah chuan HFA scheme hnuaiah hian Beneficiary 34,069 tuam chhuak thei turin DPR 43 siam fel tawh a ni. Tin, heng DPR-te bakah hian District Headquarters pariat tan 3rd DPR leh Census Town dangte tan 2nd DPR pawh siam belh leh tura hmalak mek a ni bawk. Heng DPR thehluhte hi Central Sanctioning and Monitoring Committee (CSMC)-in an pawmpui hnua sum pekchhuah tur a ni a. Tun dinhmunah CSMC Meeting an koh theih rih loh avangin DPR siamsa sum la hmuh loh a la awm phah ta a ni.

C. He scheme hi chak zawk leh felfai zawka kalpui a nih theih nan Scheme Guidelines 14.7-a “He Scheme chak taka kalpui a nih theih nan leh hma la thaten a hun taka sum an dawn theih nan State Sawrkar-in ruahmanna a siam ang” tih a nih ang takin State Sawrkar chuan 29.12.2016 khan sum pekchhuah dan tur felfai tak a duang a. Hei hi Ministry lamah pawh hriattir niin sum pek chhuah dan leh pek tawh zatte hi thlatin MIS portal hmangin Ministry of Housing & Urban Affairs-ah Report (Physical & Financial) thehluh ziah a ni bawk. MIS Portal-a thunluh tawh, sum hmuh atanga Beneficiary, DPR-a awm document engkim tihfel tawh zinga mite hnenah hian Rs. 1,50,000/- hi installment vawi thum (40%, 40%, 20%)-a pek chhuah nise, chutiang zelin Beneficiaries dangte pawh Central Ministry atanga Installment dawn belh hunah Rs. 1,50,000/- zela pek chhuah theih turin sum pekchhuah dan ruahmanna hi siam a ni. 

Beneficiaries zingah duhsak bik an awm lo a, hemi kalpui a nihna chhan ber chu: (i) Beneficiaries-te hi mi harsa tak takte an nih avangin sum khaihlak awm lova In sak hna an zawhfel thuai theih nan; (ii) Beneficiaries-te hi hmun hrang hranga In sa tur an nih avang hian Department lamin hneh taka a vil (monitor) theih nan leh Geo-tagging tihna kawngah harsatna a awm loh nan; leh (iii) Beneficiaries zawng zawngte In sak hna vawi leh khata tantir vek a nih chuan In sakna hmanrua leh bungruate to thut thei leh vang thut thei a ni a, hnathawk tur pawh indaihloh vak theih a ni a, heng harsatna thleng theite venthawn thu-ah he ruahmanna hi Sawrkarin a siam a ni. Scheme Guidelines 14.9-a inziak angin BLC bik atana sum kan dawnte hi Beneficiaries-te Bank Account-ah dahluh zel a ni a, heng sumte hi tihkhawtlai, tihbo leh pawhpen theih a ni lo. He sum pek chhuah dan ruahmanna hi ni 24th July, 2019-ah ennawn a ni a, khatih lai huna ram dinhmun tha tak thlirin leh khaw hrang hranga hnatlangte pawh an inpuih avanga harsatna awm thei tam tak an paltlang theih tak avangin, sum lokal hi DPR mila 1st installment dawng vek turin sum pek dan ruahmanna siam a ni ta a ni. He ruahmanna thar ang hian tunah chuan kalpui mek a ni. Mipui tana tha ber ngaihtuah chunga ruahmanna siam leh kalpui danah hian Guidelines kalha thiltih engmah a awm lova, sum bothlau leh hman dikloh engmah a awm bawk hek lo.

D. Pu Lal Hriatrenga Chhangte-in Facebook kaltlanga Social media-a hemi chungchang post a siamah hian Notified Towns 22-ah UD&PA Department-in HFA (Urban) Scheme kalpui anga a tarlan hi a hresual a, Aizawl City leh Towns-ah a vaiin khawpui 23-ah he Scheme hi kalpui mek a ni.

E. “Central Sawrkar atangin First Installment chauh tur rihin (Chhungkaw 15,666-in Rs. 60,000/- theuha chan tur)…” tia a ziahlan pawh hi thudik lo a ni. Central Ministry atanga Sum hmuhte hi State Government-in Beneficiaries-te hnena pek chhuah dan tur hi HFA Guidelines milin State Sawrkarin remruatna leh a duhdan duang tura tih a ni a, Point C-a tarlan ang hian Sum pek dan tur hi duan a ni. Central Sum release-te hi DPR atanga MIS-a beneficiaries thunluh mila pek chhuah a nih avangin beneficiaries tlingkhawm atanga a hlawma sum release vek zel anga sawi khi a dik lo bawk.

F. Tin “Congress Rule chhungin…” tih leh “MNF Rule-ah…” tia thupui hran hmanga Central Assistance kan dawn thliar hrang a, sum dawn leh pek chhuah dan chungchang a tarlanah pawh hian Beneficiaries-te hi guidelines anga demand survey anga lut a nih avangin Sawrkar inthlak avangin beneficiaries a danglam chuang lo. Demand survey ang zelin beneficiaries-te DPR-ah thun an ni a. Central Sawrkarin a pawm hnuah MIS Portal-ah thunluh zel a ni a. MIS portal-a thunluh tawh beneficiaries-te hi thlak danglam theih a ni lo. Guidelines ang zela kalpui a ni a. Duh hun hunah he Scheme kalpui dan tidanglam thei anga tarlan awm hi a dik lo hulhual a ni.

G. Pu Lal Hriatrenga Chhangte-in a tarlan “Hetia Central sawrkarin Chhungkaw 15,666 zet tan First Installment Rs. 60,000 chu sem chhuah (pek vek) tawh mai tur a nih laiin Chhungkua (beneficiaries) 4,272 lek hnenah First Installment Rs. 60,000/- chu pek chhuah a ni ta phawt chauh a…” tih leh “He Scheme hnuaia sum pek chhuah dan hi a mak tulh tulh mai a ni. Central Sawrkarin First Installment atan chauh…chhungkaw 15,666 tan Rs. 60,000/- zel a dawn tur Rs. 9,399.60 lakh a rawn pek laiin.. Ngaiteh a rawn petu hisap leh pek dan tura duan (as per Central Govt. Guidelines) ang lo takin Chhungkaw 4,272 zingah pawh hian 1st instalment Rs. 60000/- bakah 2nd Instalment Rs. 60,000/- dang leh dawng phak chhungkua 2,457 teh meuh chuan Rs. 1,474.20 lakh lai mai an thenawmte 1st Instalment ve tur chu an lo dawng leh hmiah mai le.” tih pawh hi thudik tawk lo a ni a. State Sawrkarin Central Assistance-a dawn hi HFA Guidelines-in a phalsak angin State Sawrkar remruatna leh duhdan angin a pek chhuah dan tur duang tura tih a nih angin, Point C–naa tarlan ang hian State Sawrkarin sum pekchhuah dan a siam hi a kalpui mek a ni. Chhungkaw 15,666 hnenah hian Rs. 60,000/- theuh pek chhuah nghal vek tur tih a awm lo a, State Sawrkarin sum pekchhuah dan tur ruahmanna a siam angin leh a dawngtu tur atana thatna ber tur ngaihtuaha ruahmanna siam ang pek chhuah zawk a ni. Hetah hian sum hmansual emaw guidelines kalha ruahmanna siam engmah a awm lo a ni.

H. “…Chuvangin Rs. 1,891.80 lakh hi engtin nge a bo theih tak daih tih hi a pawimawh ber lai chu a ni ta????” tia Pu Lal Hriatrenga Chhangte-in sum bo awm anga a tarlan hi thudik lo hul hual a ni. PMAY:HFA(U) Mission hnuaia Central Assistance State Sawrkarin a dawnah hian sum bo pakhatmah a awm lo a, he sum bo nia tarlan hi State Sawrkarin Sum pekchhuah dan tur ruahmanna a siam angin beneficiaries-te hnenah felfai takin pek chhuah fel vek a ni zawk a ni.



I. State sawrkar-in mi harsa In sakna neilote tanpui a, an luahlum thuai theih nana nasa taka hma a lak mek lai leh In sak tanpuina dawngtuten Sawrkar tanpuina hnuaia chenna In an lo neih ve theih avanga an lawm em em laia, Insak tanpuina dawngtute chu Suma vawmhlum, an chhungkaw tisa, rilru leh thlarau thleng pawha tihkeh / tihchhiatsak tumna anga Sawrkar puhna awm hi a mak hle a. Mizoram sawrkarin dik tak leh mipuiten hamthatna an neih theih dan ber tur anga hma a lak mek laia, thu phuahchawp hmanga mipuite hruaikawi thei zawnga thuziak lo awm hi a pawi hle a. Thudik mipuiin kan hriat ngei hi kan duh a ni.

J. HFA hnuaia Beneficiary zawng zawngten sum an dawn theih nan Sawrkar chuan theihtawp a chhuah a. Tuna la dawng ve lote pawhin an dawn thuai theih nan hma a la mek a. Sum la awmte hi Mission Directorate atangin DUDO/DPO tinah pek chhuah vek tawh a ni a. DUDO/DPO atang hian Beneficiary-te inchinfel dan (Geo-tagging, Documentation, Grounding) mil zelin sum pekchhuak zar zar a ni dawn a ni.

K. Lockdown lai pawha chawl lova, Department lam atanga RTI chhanna fel tak pek chhuah a nih hnuah pawh thudiklo hmanga thuziak a chhuah mai hi a pawi kan tiin mipui thudiklo hriattirna niin kan ngai a. Tun hnuah hetiang hi ching tawh lo turin kan ngen a ni.

L. PMAY-HFA(U) Scheme chungchang hi hrethiamlo an awm tawh thin a. Chipchiar takin thuchhuah pawh siam a ni tawh thin a. Beneficiary-te sum pek chhuah dan chungchangah pawh hian Scheme hlawhtlin nan leh mipui tana remchang thei ang ber turin Sawrkarin ruahmanna a siam thin a. Tarlan tawh ang hian “Public Interest” leh ram dinhmun ngaihtuahin sawrkarin ruahmanna a siam zel thei a ni. UD&PA Department chuan vawiin ni thleng hian PMAY-HFA(U) a kalpui danah hian tihsual a neih a hre lova, guidelines kalha thiltih a nei lova, sum hman dik loh leh chingpen a awm lova, engkim langtlang leh felfai takin a kalpui mek a ni. Zawh duh leh hriat duh nei kan la awm a nih chuan office hour chungin engtik lai pawhin Directorate of UD&PA, MINECO-ah zawhfiah theih reng a ni.

Written by:
Andrew H Lalremruata, 
MIS, IPRO No.1425/2020-2021
Dated: 28th May 20
Visitor's Voice

Click to Comment

No comments:

Mizo Nula Khal

+