KS NEN ZAN KHAT
A tak taka thilthleng behchhana ziah a ni.

Sana ka en a, dar 12:59 a.m a kawk vâ, tun ang zan rei tawhah; heng lai hmunah lehnghal, chu nula tê chuan eng nge maw a tih reng reng le aw ti rilru chungin kawng sira ding chu nula chu ka thlir reng a, a hmel en mai chuan a pangngai viau, a hmelchhe hauh lo, kum 20 aiin a upat vak a rinawm loh, a kûn ngul a, a phone a hmet mial mial a, nalh lah a nalh narawh e. Rei fê a din hnu dar 1:17 a.m ah chu nula bulah chuan Taxi a rawn ding ta chat mai, engmah sawi lo chuan chu nula chuan Taxi kawngkhar hnunglam hawn leh luh a rual nghal a, Aizawl hmar lam pana an tlan liam vang vang.

Chutia an tlan liam vang vang chu ka uipui tuilian thlir liam thei ta tlat lo, chu Taxi kalna hriat tum chuan ka țhianpa nen a car-in kan umzui ve nghal, zan rei tawh lam a nih avangin chhun lam angin Motor leh mihring veivak an tam tawh lem lo, minute 30 vel ka tlan ta tihah chuan kawng sira Taxi ding ka hmu ta, ka'n bihchiang deuh a, kha nula chuanna Taxi ngei kha a nih tih ka hre thei nghal mai a; mahse, kha nula kha ka hmu ta hauh lo, Driver erawh ciggarette pák khu laih laih paha thlamuang taka a țhu ka hmu. Chu nula chu Taxi-a a rawn let leh hun nghakin kan lo sakuh ser nghah ve thawr a, darkar fê a liam ta tihah pawh chu nula hmel hmuh tur reng a awm tak loh avangin Taxi chhunga Driver-țhu chu ka pan hnai ta tawp a, "Ka pu thil ka lo zawt lawk che, zanina kawppui mai tur nula min hmuhsak thei ang em le?" "Zaninah tak chuan an awm tawh kher lo ang, mahse zan danga mi tur chu ka hmuhsak thei ang che," tiin min chhang a; tichuan, Phone number kan inpe tawn a, khua a var tawh mai dawn avangin kan ținsan ta phawt a.


Taxi driver-in number min pek chu ka saved-a, WhatsApp a pawh leh pawh loh ka'n en a, vanneihthlak takin a lo pawt hlauh a, a Dp-ka'n en chu hman zana kan um nula kha a ni ta hauh lo. Kha nula ngei kha hmuh leh ka duh bawk si, tihngaihna dang ka zawn leh a țul ta.

Ka phone-a rawn ring-rál rál a, sana ka'n en a, dar 11:18 p.m a ri mek a, ka țhianpa'n min lo call chu niin, "Hman zana nula kha ka hmu leh e, hei a dinna ngaiah chiah chiah khan a ding leh tawh ania, lo kal rawh, motor-chhung ațangin ka thlir reng e," a rawn ti. Ka insiam sawk sawk a, ka țhianpa awmna lam pan chuan Scooty-in ka lîm phei ve nghal a, ka țhianpa bul chu ka thleng, motor-chhungah ka lut, motor-chhung ațang chuan kan thlir a; kha nula-i ngei kha a lo la ding vâng a, a bula va kala, va biak ka châk em avangin ka va kalchilh ta nge nge a, mi nghah a neih thu leh zanin atan chuan pawhpên theih a nih tawh loh thu min lo hrilh a, a number-ka dil a, eng sawi si sê lo chuan min pe ve mai bawk a, tichuan ka kalsan leh ta phawt a.

Dar 4:13 p.m vel a ri mek, Pathianni tlai a ni, ruah lah chu a sur hnem em em lehnghal, khawpui a ri dur dur a, kâwl a phe ziai zuai bawk a, ka țhianpa lah chuan car tape-ngaithlain a zai pui rût rût a, kei lahin rilru kawm mial mial pahin kawngsir ka melh phei char char thung, "Țhianpa lawk lawk lawk....mi dawr kawta ding nula saw kan hêllai nula kha a ang lutuk", chu veleh kan tlan muang nghal, chhûm a zîn nasat em avangin leh motor chhung ațang chuan pawn lam hmuh chian a harsat em avangin kan ding a, chu nula chu; kha nula-i ngei kha ni-a ka hriat avangin; chu nula awmna lam chu ka pan leh ta tháwr a, rin ang ngei ngeiin kan nula-i ngei kha a lo ni a, kan han inbiak lûmlâm viau hnuah kan motor-ah chuan kan chuan tir thei ta hram a. Kawng tluanin kan inkawm char char a, tichuan kan indawr hun leh ni tur te kan bituk fel hnuin, a hawna tur hmun thleng kan phur a, kan inthlah fel ta a.

Ka phone-a rawn ri ràk a, WhatsApp private message-ri tih ka chian em avangin ka'n en thuai a, "Ka hman tawh e, hmanni tlaia min thlahna bulah khan ka lo nghak ang che", "Aw le, ka insiam ang a, ka hman a ni deuh nghal mai, ka rawn kal thuai dawn e", tiin ka reply a, phone ka charge a, ka insiam nghal thuai thuai a.

Message-min rawn thawn ațanga minute 35 vel a ral hnuah, chu nula-i nena innghahna tur kan tih hmun chu ka thleng, min lo nghak vâng tawh chu niin, ka Scooty-a rawn chuan leh kal ang tih a rual a, tichuan ka țhianpa te In lam panin kan inphur ta vûk vûk a, zan rei lam a ni tawh a, mi In han kik kurh kurh a inthlahrunawm tawh em avangin ka țhianpa chu ka phone-a, kawng min lo hawn thuai a, awm hahdam vel pahin ka țhianpa room-ah chuan kan han inkawm ho tê tê phawt a, chutah a âwm tawk vel ta maw tihah kan lo ruahman lawksa tawh ang ngeiin; ka țhianpa chuan chance-min pe ta a.


Chu nula-i nen chuan kan inhmatawn ta rán mai le, a mitah tak ka en reng a, a laih hmel angreng viau. "In chi te hi i nei lo em ni?" "Nei ve e, kan la indun dawn nia; mahse, a hmanhmawhthlak loh." Amah titi pui pah chuan a chezia leh hawiher ka chîk ru reng a; a zia pawh a nû dem dem khawp mai. A ma tawkah a inchei ulukin a incheimawi thawkhat bawk a; a hmel hmuh a nuamin, a chhe lo ngei mai. A mawi tawk chauhin a heh a sen vâm hlár a, a hnute a kawh lah a, a mal a mum mawi tawkin, a mawng a pauh khal mawi tawk chiah bawk a, a sam dum sei ngil siau phêna a ha var tak hmuh chu nuam tak a ni. Lasi hmelțha em em kiangah ka awm ta emaw tih mai pawh awl tak a va ni em. Engtinnge he nula-i hi KS a nih mai theih zawk?? A va uiawm em em ve, amahah hian duhawmna hlir a awm emaw tihtur khawpin duhawmnain a bawm a sin. Mahse, an sawi hmeichhe lepchiah KS nula a ni miau bawk si!!! Awih a har, a ni thei lo, a mak. A va lainatawm tehlul em.

"Zu chu thli tawh la, kan tihtur ang ang chu ti vat teh ang", ka harh zawk a, ka suangtuahna khawvel ațang chuan ka zuang chhuak nghal thuai a. Whisky țha mi, man to tak 'Scoth Whisky' ngat chu ka bag ațang chuan ka phawrh chhuak a, "Self serve aw, i duhtawk in rawh", "Keimah chauhin min intir i tum em ni? I in ve ngei ngei tur a ni", tih pah chuan no khat tak țha ngek ngawka thlit chu min pe a. A ni lah chuan a tlak pap pap a, no thum lai a in ta, a rui lutuk dawna ka hriat avangin in tawh hrih lo turin ka ngên a, tichuan ka zawn rûk reng thu leh ka belhchian duh thu leh a harsatna hriat ka duh thu te, a țul a nih chuan puih ka inhuam thu te ka hrilh tlang ta râwt a. A rin loh ang taka ka awm tak si avang chuan min melh ngam ta tlat lo, a indawm kun reng a, chu veleh a bulah ka țhu hnai a, a dara kuah pah chuan, "Tlang takin inkawm ila, țanpui i ngaih chuan ka țhianpa nen khan puih che kan inhuam reng a sin", a ngawi vung vung a, "Tui in tur a awm em? Khawngaihin min lo pe thei ang em aw", Fridge-a tui chu ka la a, ka intir a. A hma ngawt ai chuan min nêlin, ka lakah a thla a ngam ta zân mai.

"Ni e, kei chu i mi hriat ang hian KS chu ka ni ve ta reng mai. KS ka nih hi ka ring pha ngai lo, nih pawh ka tum hek lo; mahse, ka nu leh ka pa an ințhen a, ka rilrua nih ka lo tum rilruk ve zawng zawng te lak sak ang maiin vawi leh khatah an bo duak a, ka ban phak rual an ni ta lo. Ka kum a la tlem si, mahnia intungnung zo rual ka la ni si lo, ka nu emaw ka pa emaw bêl turin zu in mi ve ve an ni a, min ruihsan reng mai bawk si. Ka rilru hi a hah thei lutuk, a rûk hian ka țap ka țap țhin a sin. Chutah le, tlangval fel hmel deuh pakhat, kohhrana inhmang tak mai, inkhawm taima em em hian min ngaizawng a, a fel hmel em avang leh a rintlak ka rin em avangin ka hnawl duh bik ta lo a, tichuan, kan inkawp chu a ni ve ta reng mai. Min duat em em a; tin, min ngaihsak em em bawk, keipawhin ka duh tulh tulh a, ka ngaina telh telh bawk a, pasal atan hial pawh ka hnial lo, amah lah sorkar hnathawk a lo ni bawk nen, kan intawng hlauh chu ka lawm ve hle țhin".

"Mahse, khawvel hi ka tan hian a thinchhe bik ta em ni le!!! Thla li zet ka kawp tawh ka bialpa chuan zan khat chu min beisei ta tlat mai. Kei lahin pasal neih hmaa hmeichhiat mipatna (Sex) hman ka duh hauh si lo, ka bialpa lahin min nawr tet tet tawh mai bawk si, innei phawt ang, heti ang te chu nupui pasal neih hunah chauh tih tur a nia, Pathian a zahawm em mai ka tih pawhin, 'Min hmangaih ve tak tak a nih chuan, ka tan i thianghlimna i hlan phal tur a ni', tiin min kár lui ngawng ngawng bawk si. Kei lahin ka duh loh zawng tak a ni bawk si, ka inveng țang țang a; mahse, ka bialpa chu ka rin ang a ni ta hauh lo, a sualin min sual lui ta, tharumah ka hneh ngang si lo, ka thianghlimna hlu tak chu ka hloh ta. Ka țap a, ka rilru a na a, ka inngahna neih ve awmchhun ka bialpa'n min pawngsual a ni si. Ka tan hian khawvel hi a tawp a ni tawp mai". A ngawi vang vang a, "Mipa hi in lo va tenawm tak em, tumah mi rinawm in awm lo," tih leh kan bula zu um intung chu a vai lêng dawr(h) a, "Khaih khaih khaih, hahdam rawh, hahdam rawh, khati ang a chet tur a ni hleinem, mipa hi kan inang vek lo a, mipa rinawm lo leh rintlak loh i tawng fu palh a nih chu; Pathian engkim ti thei kan nei alawm, lungngai reng reng suh", tiin ka thiam ang tâwkin ka hnêm ve char char a. "Meizial i nei em?" "Ka zu ngai lo a, "Nihleh, kuhva min lo țheh", ka kekawr ipte-a ka ah lai chu ka pe a; tichuan, a rilru pawh a hahdam viau ta-in ka hria.

Tichuan, ka țhianpa chu ka ko lut a, a maha kan hriat châk leh kan hriat duh zawng te thiam takin kan zawt leh țan ta a. A ni lah a kam nam, țawng nuam tawk chauhin a rui bawk nen, zêp neih map loin ti hian min hrilh a, "Khatia ka thianghlimna ka hloh tak si-ah kha chuan, pawisa nei loh nen pawisak neih lohin min zui nghal thuai a, kan țhenawma awm Taxi driver-hi zana service-țhin a lo ni bawk nen, ka zah theih loh chhuahin hlawh neia ka kawppui tur mipa min zawn sak turin ka ngên a, chuta chin chu mipa hi zantin deuh thaw ka mutpui ta mai țhin. Hreawmin rilru nuam lo viau țhin mah se pawisa ka hmuhna kawng awmchhun ni-a ka hriat a nih miau avangin hnawl ngawt theih a ni si lo, ka ti zel a, ka ti uar deuh deuh zel a, tunah chuan an sawi nula lepchiah KS an tih ang kha keimah ngei hi ka lo ni ve ta reng mai."

A sawi zel a, "Aizawl khawpuiah hian ram chin kan insem ve țhin a, keini țhianho hi chu Aizawla hmun țha lai leh lûn lai ber kawtthlerah kan inzuar țhin. Kan ram chin pêlin tumah inzawrh kan remti lo, Vanapa Hall-kawt leh Zodin vela inzuar țhin te hi chu tlema a class hniam deuh leh addict-tak meuh meuh tawh te an ni țhin a, keini erawh hi chu kan man pawh a la to hlawm viau. Tin, KS ni thar, tlema tituai nalh deuh ho hi anmahni duh zat zat man an lo inchhiar ve ngawt kan remti lo a, keini tlema siniar tawh te hian an man ațangin hlep kan lo nei ve țhin."

"Vai mistiri leh helper te hi a na zawngin kan inpawl tir ngawt duh bik lo a, Sex-kan hman hma hian pawisa kan la lawk vek a, an inrin loh laiin kan phit san (Tlanchhiat san) thut țhin. A tlangpuiin pa ni tawh te hian min dawr tam ber a, tlangval țhalai min dawrtu hi an awm ngai lo, vai changkang chin Aizawla rawn zin te hian min dawr ve țhin bawk. Zan khatah mipa pathum pali te kan mutpui tlangpui a, zan khata mipa pali aia tam mut pui chu a chauhthlak ve țhin khawp mai. Harhfim kara hmelhriat miah lohte nena sex-hman hi chu kan zuam ngang bik lo a, zu emaw heroin number 4 emaw kan rui hmasa phawt țhin. Zan lam hi chu kan inzuar zankhua a ni deuh ber mai a, chhun lamah kan mu mai țhin thung."

"Hetia sex-kan hman lai ngei ngei te hian rilru hi a na ve vawng vawng a, sex-min hman puitute hian zo thuai thuai se kan lo ti țhin. Pa țawp ve tak tak te'n sex-min hmanpui țum lah hi a tam si a, a hreawm duh ve țhin khawp mai. Condom hmang loin tumah kan inpawl tir duh ngai lo a, mahni tawkah kan inveng fimkhur ve țhin viau mai."


"KS nih kan duh vang reng a KS ni hi kan ni bik lo a, mi min hmuhsitna leh min thinhrikna zawng zawng te pawh hi a âwm kan tih rual rualin, kan rahbi hi a tleu ve laklawh tawh si a, dinchhuah han tum țhin teh mah ila, kan tlu leh nge nge țhin. Pialtlêpa kal ang mai hian kan inchan. Inzuar loin eizawnna dang dap han tum ve fo mah ila, min țanpuia, han belh chat tur hi kan hmu zo bik si lo nen, kan bu ngaiah bawk kan kir leh mai loh chuan, zawh tur kawng dang reng kan nei miau si lo a ni. Kohhran te, YMA te hian min țanpui dan kawng zawng se kan ti rilru ve rauh rauh țhin a sin. Mahse, tlang rin kan hlawh zo tawh si lo, kan hringnun kawng hi a bumboh ve em a, KS nihna hming țenghneng tak hi keini chuan kan lo chhawm nun ve zel phawt chu a țul a nih ber hi."

A ngawi vang vang a, "Ummm, a tawk ta, khang zawng kha ka sawi theih te chu an ni. Eng nge hriat duh dang inla nei em?" Tiin min zawt a, sana ka en a, rin ai daihin a lo tlai ta, khua a var titih a ni deuh mai si a, thil dang zawh châk viau mah ila, a rem teh țeuh tawh si lo a, kan zawt ta lo a. Zan khat tawmpui man pawisa pek kan tum a, a la duh miah lo, pek luih țal kan tum pawhin a la duh ngang si lo a, kan ințha țhen ta ringawt a.

KS ti-a kamchhe tleuh nan taka kan hman țhin te hringnun tak tak zuk hmuhpui erawh hi chuan, an hringnun rahbi hi a lo fuh lo ve em țhin a tin a ni. Chhungkaw pangngai tak ațanga chawrchhuak ni lo te zel hian humsual an lo dai nge nge fo țhin a lo nih hi. Vawi khat piang a, vawi khat thi tur țheuh țheuh si hi kan va inang lo țhin tak em!!!

(A ziaktu : Tlangval Tlumtea, Aizawl)

Post a Comment

Powered by Blogger.