Makuri‘Ngaih Lungrun’ nen a rawn kir


Rebecca Saimawii
Rebecca Saimawii chu kum 10 chuang a liam hnuah a hla thar ‘Ngaih Lungrun’ nen a rawn comeback ve leh ta a, July ni 13 zan hian a music video pawh Zonet-ah tihchhuah nghal a ni ang a, YouTube-a Makuri channel ‘Rebecca Saimawii Official’-ah uplaod nghal a ni bawk ang.

Makuri’n hla a record hnuhnun ber chu BD-a (L) hlaphuah a sak kha niin, chu chu kum 10 chuang liamta kha a ni tawh a, tunah ama hlaphuah ngei nen a rawn kir ve leh dawn ta a ni. ‘Ngaih Lungrun’ tih hla hi May ni 25-a a phuah kha niin, June thla laihawl vel khan Bangalore-ah recording tiin, music video pawh Bangalore-ah bawk shoot niin, a naute nen an video hi an siam ve mai niin Makuri chuan a sawi a, professional kutchhuak a ni lo tih hriat sak turin a video thlirtute a ngen nghal a, an awmna, Bangalore-ah COVID-19 hri leng a nasat avangin duh ang pawhin video buaipui hleihtheih a ni lo va, tlanchhe chunga video siam ang deuhin a intehkhin nghe nghe a ni.




Read More about THALAI HUANG A music track hi Romal­sawma, Rokunga Rimawi tuk Run-in a buatsaih sak a ni a, recording leh video erawh Banga­lore lama a buaipui a ni thung. Recording studio a luh hnuhnun ber chu kum 10 chuang liam taah khan a ni a, chutiang khawpa rei zai lama a thawm a reh hnuah Mizo mipuite min awi leh thei dawn.  

Makuri hi rimawi khawvelah rei tak a reh tawh a, tunhnaiah YouTube-ah ama pual channel ‘Rebecca Saimawii Official’ tih a siam thar a, hetah hian a hla neih sa thenkhat a dah lut tawh a, a hla thar pawh hi zanin hian a dah lut ve nghal dawn a ni. Tunah chuan YouTube channel a nei ta bawk a, a hla thar dang pawh ngaihthlak tur kan la neih belh zel turah ngai phawt ang.

Zahawm takin lengzem hla a sak theih: Rebecca Saimawii

Kan hriat  ṭheuh angin, love song hun eng emaw chen a sak hnuah Gospel lamah a inlet a, tunah lengzem hla nen a rawn comeback leh dawn a, social media lamah pawh zawhna a dawng nasa niin sawi a awm bawk.

Pi Makuri chuan,"A mihringa hi an pawimawh. Zahawm takin lengzem hla a sak theih a, chutiang bawkin zahawm takin Pathian fakna hla pawh a sak theih a ni," tiin a sawi.

Fitness leh Sports Lam

Rebecca Saimawii hian kum 2018 June thla khan Gold’s Gym India (Bangalore) aṭangin advance personal trainer course ṭha takin a zo a, Mizo hmeichhe zinga a hmasa ber nia hriat a ni.

Makuri Rebecca SaimawiiRebecca-i hian personal trainer leh sports nutritionist course pawh a lo zo tawh a, khawvel huap pawha langpha Gold’s Gym India aṭangin kum 2018 bawk khan a zo bawk a. Mizo hmeiche zinga thisen pe hnem ber Rebecca-i chuan, "Theihtawpin ka bei a, hlawhtlinna ka hmuh avangin ka lawm hle. Kan batch-ah ka upa ber a, fate rual lek lek zinga tel chu ṭan a na duh khawp mai" tiin, a hunlai khan  a sawi.

Rebecca-i hi sport lamah hian mi thar a ni lo a, kum 1981,1982 leh 1983 khan Mizoram Table Tennis Champion a lo ni tawh a ni. Hei bakah hian 1981 khan Mizoram School Games-ah TT Champion a ni a, Mizoram Roller Skating Champion a lo ni tawh bawk. Mipuiin kan hriat larna zawk erawh zai lam a ni a, kum 1984 aṭang khan bul a lo ṭan tawh a ni. Mizo zaithiam zingah chuan hriat hlawh ber te zinga mi niin, zai intihsiak endik lamah pawh hriat a hlawh viau bawk.

Post a comment

Powered by Blogger.