Trump vs Biden: US Politics ThutharTunge hma hruaitu chu? 


Thla thum awrh chauh a awm tawh a, Hripui leng karah US election boruak pawh a lum chho ṭan ta hle mai le. Mizo mipui duhrawn Republican president ni lai Donald Trump chu a khingpui Joe Biden aiin a hniam zawkah a trang mek. Hun a la awm a, chak zawk tur erawh sawi theih a la ni lo. 

 United States election ah hian President leh Vice President hi direct vote a thlan an ni lova. India rama MP kan tih mai, mipui thlan representative (Electoral College) 538 te chuan an thlang dawn a ni. USA President ni tura candidate hian MP vote kan tih ang hi vote 270 a mamawh. 

India ramah ve thung chuan, Lok Sabha (Lower House) ah Member of Parliament (MP) 543 kan nei mek a. Nominate MP 2 nen 545 an ni. Democratic Party candidate Joe Biden hi tun boruakah chuan che ṭha zawkah ṭangin, he dinhmun hi a hum thei zel ang em? A hum thei a nih chuan,a tan  US President 59-na ni turin Pu Trump-a ai chuan a beiseiawm zawk a ngaih a ni.


Tu nge Joe Biden chu:
US politics ah na na chuan,Joe Biden aia tawnhriat ngah an awm kher lovang. A chanchin kan sawi vek hman dawn lova, tlem kan han tarlang ang e. United States Vice President zinga a 47-na, Barak Obama President na hnuaia term 2 chhung Vice President a lo ni tawh a, a duai lo tawp ang tih a chiang mai awm e. 
Joe Biden hi Senator a lo ni tawh bawk a, committee pawimawh tak takah Chairman nihna a lo la nual tawh bawk. Kum 1942, November ni 20 a piang niin, US President upa ber record siam theih tura Candidate senior ber a ni. Kan sawi fo tawh angin, Trump-a pawh hi thlan nawn a nih chuan President zinga kum upa ber a ni ve bawk ang. 

Biden hian a nupui hmasa Neilia Hunter nen fapa 2 leh fanu 1 neiin, kum 1972 khan motor accident vangin a nupui duhtak leh a fanu chu an lo boral tawh a. Hemi trum hian a fapa te pawhin hliam an tuar ve bawk. Tichuan, Kum 1977 ah Jill Jacobs, Jill Biden ni ta, nen inneiin, fanu pakhat Ashley Biden an nei bawk a ni. 

US senate ah ṭum 6 lai a lo tling tawh a. A hunlai khan senator zingah ani aia senior mi 3 chiah an awm a. 2008 electionah Obama vice president tura thlan a nih khan Senator hi a bansan a. Obama tan theihtawp chhuahin, Republican ho be pawptu berah Obama khan a hmang thin a, dan thar tam tak an passed theih phah a ni. He tiang tawnhriat ngah tak a nih vang hian Trump tan pawh awlsam taka hneh mai thei a ni dawn lova, thapui thawh a ngai ngei dawnin a lang. 

Corona virus hrileng vangin campaign leh political party activity nasa takin a khaihlak a. President Trump chuan November election hi tihkhawtlai a duh thu a sawichhuak ta. Tunhma deuh khan online voting, mail voting chu Trump hian a duh loh thu a lo sawi tawh bawk. Hetih lai hian Republican party hotu thenkhat chuan mail voting an duh thu an sawi ve bawk. An President hi an duh tawh lo nge, hemi chungchangah hian Republican party chhungah duh dan a in kalh nuaih mai a.

Covid19 in a tihbuaina hmun tam taka Mail Voting hman mai an duh thu sawi rik a nih khan, Trump chuan thil dik lo tam tak a awm theih thu sawiin, mail voting hi a duh lo hle a. Covid19 case a ni telin a pung tual tual ta mai si a, mail voting a duh bawk si lo, tunah hian November election chu sawn mai a duh thu a sawichhuak leh ta. 

Election chungchang ah hian US President in thuneina a nei lova, US congress in a passed phawt a ngai a. President Trump duh dan hi congress hian a pawmpui hmel loh hle. 

House of Representative leh Senate hi CONGRESS house pahnih tia kan sawi chu a ni. India ram ang chuan Lok Sabha leh Rajya Sabha a nih chu.  US Constitution chuan congress kutah election chungchang hi thuneihna a pe a. Dan siamṭhat ngai a awm a nih pawhin, President thuneihna ni lovin, congress house pahnih kuta awm a ni.

Mail voting hmang duh states paruk an awm tawh a, chung te chu- California, Utah, Hawaii, Colorado, Oregon leh Washington. Tin, state dang te pawhin Mail Voting hi an zirchiang mek a. Covid19 a punbelh zel avangin mi tam zawk chuan mail voting hi an duh zawk a rinawm ta hle. 

President Trump hian duhthlang tur ni ta se, inthlan dan pangngai chu a duhzawk ngei ang tih a chiang a. Mahse, hei hi a tan a thra ber ang em? tih chu zawhna lian tak a ni.  Mitinin vote thlak an duh ngei ang a. Mahse hrileng karah pawn chhuah kher ngai lova vote thlak chu a thra ber awm e. 

"Chinese Virus", "Kung Flu" tia a sawi mai ṭhin Covid19 hi Trump hian a tuar nasa berah a trang mai thei. A chhanchu, a hnathawh ropui tak avangin fak a hlawh viau laiin,Covid19 hripui hian Trump administration chu a timangang hle mai a, chét lak ngaihna an hre lo a ni ber mai.  Trump Political zinkawng hi November election-ah a tawp a nih chuan, Covid19 hi a ni aia tuar nasa an awm lo, kan ti thei awm e.

Tun boruak anga thil a kal chho zel chuan, Pu Trumpa hi White House ah kan hmu tawh lo mai awm mang e. Trump duhtu te tan chuan tan lak nasat a ngai viau ang. 

Post a comment

Powered by Blogger.