TRUMP-AN NI HNUAH HOSPITAL A CHHUAH SAN TA

International news & politics:

BREAKING NEWS: TRUMP-AN NI HNUAH HOSPITAL A CHHUAH SAN TA : 24/7 WORLD-CLASS MEDICAL CARE PEK A NI ANG

Walter Reed Mitary Hospital, Bethesda, Maryland state-a COVID-19 vei vanga enkawl President Donald Trump chuan, ni 3 hnuah amah enkawltu Doctor rualte remtihna angin Hospital chu Thawhtanni 6:30pm (ET) ah, Asia-ah tukinah a chhuahsan ta. Hospital atanga SUV motor atanga Marine One Helicopter a pan laiin a hmai a tuam a, business suite hain, a kut zungpui lek chhuak (thump up) in, Reporters te zawhna erawh a chhanglo. White House ah tha takin World-Class medical care hmangin 24/7 enkawl zui a ni tur thu, ama Doctor Navy Commander Dr. Sean P. Conley chuan Press Briefing a neih 3pm-ah a sawi a, "Hospital dan anga tehna hrang hrang (all standard) ah a chhuak thei a, mahse, tha leh chak zawk chho zel turin enkawl a ni ang" a ti.

President Trump chuan Twitter-ah, "Ka tha tak zet e! Covid hi lo tihbaiin hlauin lo khur chhe suh u! In nun kha hlauhna vangin chi-aiin hneh tir lul suh u. Trump Admin te chuan a dona tur damdawi ropui tak kan buatsaih mek a ni. Kum 20 aiin ka tha zawk daih mai!" tia rawn ziakin, "Campaign bu lu chuh beihpui chu a Siruk lain kan tanchho leh dawn e. Fake News chuan Fake Polls diklo bak an ziak lo ve" a ti.

Sawiseltute chuan Trump chu Hospital atanga chhuak chak hma lutuk leh hri tidarhtu a ni thei ang. Covid-19 hlauhawm lohzia a sawi vak chuan midangte fimkhur lohna a pein, a inrin sual phah thei ang. Amah angin Amemican mipui tam takin damdawia enkawlna tha an nei lo a ni, an ti a. Amah thlawptute thung chuan, Pathianin kan tawngtaina a chhang a, tawngtaina tam tak a dawng a, a dam leh thuai a ni mai ni, an ti ve thung.

US-ah Covid-19 vanga thi 210,000 awmin, veitu maktaduai 7.6 an awm tawh a ni. New York Governor Cuamo chuan, nu leh pate chu an fate school la kal tirlo turin a hrilh, "Kei pawhin ka fate ka kal tir biklo a ni" a ti.

Dr. Conley hian Trump a nat dan chiah leh Covid test negative a nih dan zawhna ti kher kher, "ringhlel Thoma" ang maia a nak nem a zen tum sat kher zawhna te chu Federal Privacy Law angin a chhang duhlo zel a ni. "Uluk taka medical team ten endika sawiho hnuah ni 3 hnuah Hospital a chhuahsan thei a. Damlo chu that lam pana an awm chuan Doctor ten an chhuah tir (discharge) mai thin angin, President Trump pawh chhuahtir a ni a, mahse, 24/7 angin uluk takin vil zui a ni ang. Amah hnaihtu medical staffs, Secret Service Agents te pawhin PPE uluk takin an hmang thin a ni" a ti. Trump a nat dan hi ringhleltute chuan an ringhlel tulh tulh a! Amah lah chu a uih zawn ang vut vutin, campaign tura tei leh vut vut a duh si a. An in rinsiakin, an inhnial laih laihin, an sawi luih luih thin a ni ber mai e!

Hetianga Trump-an Hospital a chhuahsan veleh hian Stock Exchange 10 zet chu an kang (jump) leh dawrh dawrh niin, Politico chuan a ziak bawk. Tin, Producers leh Tech Company ho thuanthu deuh pawh an kang leh awk awk tih a ni.

Marc Polymeropoulos, CIA Analyst, kum 2019 a chawlta chuan, "President Trump dinhmun dik tak hriat tumin Russia leh China Spy te chu hmanhlelin, Walter Reed Hospital lamah an mit leh beng zawng zawng an len vek ngei ang. Enthlatu tute emaw an dah thei" a ti.

Trump chuan Oct 15-ah Florida state ah Biden nen inchapchar hun hman a duh a, mahse, a Campaign Dy Manager Tim Murtaugh chuan, "Oct 15 bawh pelh loh a duh a, mahse, Doctor te rawn chung zelin thutlukna siam a ni ang" tiin, CBS News a hrilh. Biden pawhin, "Inchapchar kan nei anga, mahse, Scientist te leh Doctor ten a him an tih chinah a ni ang" tiin, Trump-a tha chhuak a lawmpui thu sawiin, "Fimkhur tawh se" tiin a chah. Biden hian Florida state a Cuban American hote zingah campaign a nei a, anniho hi Socialism-Communism duhlova Cuba ram hruaitute haw em em an tam avangin Joe Biden a teho thu leh hla hian an beng dar a khawn rik sak zo ang em tih a chianglo a ni. Florida hian Electoral vote 29 zet an nei a, chak a pawimawh hle a, he state hi "batlleground state" zinga tel a ni. 2016 ah Trump chu tlemin Hillary lakah a chak zawk a ni.

Hetih lai hian White House Press Secy Keilaygh McEnany leh a hnuaia thawj Chad Gilmartin leh Karoline Leavitt te chu CNN chuan Covid test positive an ni, a ti. McEnany hian inkhung hran a tum tih a sawi a ni. ~CT LALRINAWMA