HEALTH MINISTER Dr. THANGTEA A LAINATAWM

HEALTH MINISTER Dr. THANGTEA A LAINATAWM

~Dr. Lallianchhunga

Health Minister, Dr.R.Lalthangliana’n May 12,2021 a thuchhuah a siam ‘Thil thenkhat kan hriat tlan atana pawimawh ka tih zualpui te’ –ah  Mizoramah Covid Care Centre (CCC) 42 kan nei mek a, heta enkawl mekte senso hi nitin nuai 8 vel a nih thu leh thlakhatah nuai 230 vel mamawh a nih thu a sawi a; ZMC bika senso phei chu tun ang renga hrileng hi a nasat chuan nitin nuai 20, thlakhatah nuai 600 vel sen ral a ngaih tur thu a sawi bawk a.

Health Minister in COVID-19 hriveite enkawlna senso a sawi hi a dik ngei ang. Chuvangin, sorkar hnathawkte hnena an nikhat hlawh COVID-19 do nana thawh ve tura an ngen pawh hi tih awm tak a ni.

COVID-19 hrileng vanga tangkhang lo haw Bairabi Rel Station atanga hruai hawtu motor hire-na leh CCC a chaw supply bill tang cheng nuai za chuang fe pek loh a la awm teuh bawk. 

Mahse, hetiang hi hripui leng kara kan sum senso leh kan mamawh dan a nih mek laiin Pu Zoramthanga Deptt enkawl Horticulture Dept chuan cheng nuai za tel senna tur May 7,2021 khan Tender a ko a. Hei bakah hian FMGE & W te’n an nikhat hlawh COVID-19 do nana an thawh tur thu Vanapa Hall a an rel hma ni, May 5,2021 khan Chief Minister chuan SEDP sum atangin nuai 63 senna tur Luangmual Hall bula motor kal theih tura Slab siamna tur alo ‘Approved’ ve chiah bawk a. Luangmual khawtlang an lawmpui awm e;mahse, COVID-19 vanga buaina kan tawh dan ngaihtuahin ‘ a la hun rih lo ve’ an ti ve lo’ng maw!!! A hmanhmawh thlak viau chuan thuhran nise.

PAHOSS ah sum la sem loh cheng nuai 5000 chuang a la awm a. Kum 2021-22 Budget-ah SEDP tan cheng nuai 40,000 dah a ni a, Fin.Dept-ah cheng nuai 58,000 dah a ni bawk a. Heng sum te hi ramin a hun tawng zira a mamawh ber dan tura hman theih vek niin, a siam rem dan pawh Chief Minister leh Finance Minister changtu thu thu a ni. 

Hripui leng do nan kan sum dah that te hman kan ui em em laiin, kan duhsak zawngte Contract leh Tender hmanga vur nan hman kan tum tho niin a lang.

Total Lockdown avangin Mizoram hmun hrang hrangah chhungkaw sang tam tak, chhuanchham a awm, ei tur nei mumal tawh lo tam tak, Task Force in an tuamhlawm mai mai an awm mek! Task Force leh mi inphalte kutah heng mite tanpuina tur hi dah ringawt loin sorkar hi luang chhuak tam thei bawk se.

[ToMZ is dedicated for archive and exposition of Mizo affairs to the rest of the world. Informations obtained are re-posted 'as-is' basis as a digitization initiative so as to make accessible to all through online surfing. Due credit is given to all author/owner except those which cannot be ascertained]