VAPHAI KHUAA INSAWISAK HLUMNA

VAPHAI KHUAA INSAWISAK HLUMNA

Ziaktu: David Sailo

23rd April 2022

Vaphai khuaah kumin March thla khan in sawisak rawnna a thleng a, thihna hial a thleng a, a chin chhuakin tarlang teh ang.

VANDUAINA TAWK LALDINGLIANA (42) :

Laldingliana hi Vaphai khaw mi niin inpui nghak a ni a, a unaute chu Aizawlah an khawsa hlawm a ni. Nupui neiin fa 3, mipa pakhat leh hmeichhia 2 an nei a, a naupang ber pawh kum 13 a ni tawh a ni. A nupui nen inṭhenin Aizawlah a fate lehkha zira an awm bawk avangin a nu kum 81 mi enkawl tu a ni bawk nen Vaphaia an in chu midang luah tirin Aizawlah in luahin a ṭul ṭul thawkin hun a hmang a ni.

Amah hi zai ngaina tak, lawmman te pawh lo dawng ve tawh, mi kawm nuam tak niin an sawi a, chhungkaw huikhawmtu ber, Section YMA hruaitu te pawh lo ni tawh a ni. A mizia hrim hrim hi misual tak a ni lovang. A nupui ṭhen hnu ah zu han lem ve zeuh a nei ṭhin.

VANDUAINA TAWH DAN :

Dinga hian 11th March 2022 khan an in leh lo te ti rala Aizawla in ben bel law law tumin Aizawl atangin Vaphai a pan a,Vaphai khuaah hian Pu Rualthangpuia te inah a thleng a ni. 

Chaw eia sawmtu an awm ve ṭhin avangin a ei chhuak ve zeuh zeuh a, 20th March 2020 a chhuak chu a thlenin ah a haw tak mai loh avangin a thlen in pa, Pu Rualthangpuia chuan 22nd March 2022 khan Pu Vanlalhluna te inah hliampui tuarin a va hmu ta a, tichuan Aizawla a chhungte chu 22nd March zanah hian hrilhhriat an ni ta chauh a ni.

THIL THLEN DAN :

Leh lam leh lam thu hriat hian hetiang hi a lan dan a ni. Dinga hi 20th March zanah a ṭhianpa nen Pu Vanlalhluna te inah an leng a, hetah hian mi pakhat a nêl em em mai ṭawngkaa a fiamna chu a hnu khawiah an la na a, a mi fiam hi a nêl sa em em, pianphunga rualban lo niin an sawi bawk. An lenna atangin an ṭhian dunin an haw a, hetia an haw mek lai hian Rohmingmawia S/O Lalnuntluanga chuan hruai let lehin hmun dang aṭangin Pu Vanlalhluna in kawtah Sumo in an lamhnai an rawn thleng khawm bawk a, Pu Hluna in kawngka atanga hnaite ah khawih rawn a ni ta a ni. 

He insawisakna thlen hnu hian Dinga hi Pu Vanlalhluna te inah zawn luh niin he thil thlen atanga ni 2 leh zan 3-na, 22nd March  ah Aizawl lama a chhungkhat ten an hre ta chauh a ni.

THIHNA THLEN DAN :

Dinga hian a lu ah hliam a tuar nasa hle a, a mit ko leh hnar a duk nasa a, a bek a duk nasa hle bawk. A khup chu a chet ngam lo a, a kut hmawr, a ke hmawrah hliam hmuh tur a awm bawk (Heng hi thlalak a awm vek a ni) A lu leiah duk a awm thliah thluah bawk. 

A thlenin pa in Aizawla a chhungte chu 22nd March zanah a hrilh hre ta a, a tuk 23rd March ah Aizawl Civil Hospital panpui nghal a ni a, Sialsuk daiah a chhungten Aizawl atanga lo hmuakin hetah hian a zun ek a hre lova, a chhungte pawh a hre tawh lo. A mumal lo hle tawh a ni. Civil Hospital ah CT Scan neih nghal niin a thluakah thisen a tling nasa hle tih hriat a ni.

Doctor te chuan zai ngam a nih tawh loh thu leh kal mai thei a nih thu a chhungte an hrilh a, hemi ni hian ICU a ruah loh avangin a tuk, 24th March ah ICU ah dah luh a ni. ICU ah hian nikhat leh zan khat a awm hnu in Male Surgical Ward ah sawn niin ṭhat lam a pan hlek niin an sawi a, 27th March phei hi chuan hriattheih turin a ṭawng nghe nghe.

Hemi tuk thawhṭanni 28th March aṭangin a hniam hlek hlek ta a, ICU a dah luh a ngaih thu hriattir an ni a, Civil Hospital ICU a ruah loh avangin Ebenezer Hospital an biak laiin a thawk a buai a, 29th March chhun dar 12 vel khan a kal ta a ni.

THU THANG ṬHENKHAT :

Voice Record ṭhenkhat a awm a, a hlimchhawna mita hmu tute thusawi pawh hriattur a awm a, he insawisakna hmuna awm ve te pawh an List fel taka ziaktu an awm. Hetih lai hian Mizo ze dik tak thudik hailan nana ka ang duh lo, thubuaia intah luh ve hlau a, thu dik hre si fihlim taka awm duhte chuan engmah an sawi ṭha duh hlawm leh lo a, pawikhawih tute nena ṭangrual ang maia awm zui an awm leh si a ni. Mahse thu thang zawng zawng pawh tarlang ila, a dik vek kan ti lova, he insawisak hlumnaa thuthang a ni tih hria ila.

An lennaa hruai let leh tu, Rohmingmawia hian Pu Vanlalhluna hnenah hian "U Dinga hi an rawn khawih dawn a, in beng lo chhu ngawng ula, lo ṭhelh suh u" tiin a chah niin an sawi

A tir berah chuan vawikhat chiah an hnek niin an sawi phawt a, a hliam en hian vawikhat hnek chu a nih loh hmel hle. An sawisakna bul mai in neitu leh Dinga te lenna in neitu, Pu Hluna hi Dinga chhungten an biak hian a sawi dan a danglam nasa hle bawk. A tir berah "A tlu" tiin a sawi a, a hnu ah "Vawikhat chiah an hnek ka hmu" a ti leh a, "A man a hnek hmasa" "A man a rek hmasa" ni te pawhin a sawi bawk.  

An sawisak nasat avangin Pu Vanlalhluna hian "Ka Compound a ni a, khawih tawh suh u, a khawih leh chu ka vawhlum ang, in chhungah hruailut rawh u" a ti e an ti bawk.

Naupang kum 12 mi pakhat chuan "Lungtuma chhut hlum an tum a, a hmuna awm ve Calvin-a chuan lung laksakin inchhungah an zawn lut" tiin a sawi bawk.

Ni hnih lai Pu Vanlalhluna te ina hliampui tuara a awm lai hian Pu Hluna te hian a hliamte chu tui vawta an deh thu leh artui te pawh an pek thu an sawi a. A hliam en leh bawihsawm a nih ṭan tak tak atanga a lan danah hi chuan Artui han ei thei ziazang niin a lang lova, sawi dan dangah chuan Pu Hluna te hian ramah an kalsan thin an ti bawk.

Dinga hian ICU atanga a chhuah a zia hret lai, 27th March khan Lalramsiama hming fiah takin a sawi a, "Ngaihdam an rawn dil tawh em?" tiin a sawi an ti bawk.

POLICE LAM HMALAKNA :

A chhungten an hriat hian 23rd March ah FIR thehluh an tum a, helai Bialtu Dungtlang PS chuan 24th March ah a hmunah kal a FIR thehlut turin thurawn an pe a, tichuan 24th March 2022 ah Dungtlang PS ah FIR Submit ta a ni.

Dungtlang PS lam hian FIR luh atanga darkar 24 chhung hi hmalakna an nei lo in a lang a, 25th March zan dar 10 velah pawikhawihtua puh zinga mi, Lalramsiama leh Lalhumliana te chu man an ni ta a, Champhai District Jail ah dah luh an ni. Champhai Police, SP leh Addl SP te an fakawm hle a, Case pawh hi Dungtlang atangin Champhai Police ah Transfer a ni ta bawk. (Dungtlang PS chungchangah hian tarlan chakawm tak a awm a, Case kal lai leh Champhai PS lam hmalakna chak tak avangin ngawi ila)  Chargesheet peih a la ni lo deuh a, Investigation kalpui zel a la nih a rinawm.

Pawikhawihna tuartu lam aṭanga hriat dan leh thuthang aṭang te, in pun khawm a nih dan aṭang hian he insawisakna ah hian mi pahnih mai hi ni theiin a lang lova, he pawikhawihnaa tel zawng zawngte hi man chhuah a, an phu tawk hremna pek nise tih hi mitin duh dan a ni ngei ang.

TLIPNA :

He thil thlengah hian Laldingliana hi a thiam vek bikin a lang lova, huat tur taka fiam emaw a nei ngei tih a lang a, Side B pawh awm thei a ni. A thiam lohna puan tur a awm ngei ang. Side B lam awm pawh nise hei erawh hi chu thu dik tak, mipui zawng zawngin kan pawm a ni ngei ang.

Laldingliana hi sawisak hlum ngei a ni a, a lakah hian râwng taka che an awm a, a tual thih pawh pawi ti reng reng lo te kut a tuar tih a hriat a, eng anga Side B pawh ti chhuaktu lo nise THIHNA hial tawk khawpa sawisa tute hian sawi tur an nei lova, NUNNA hlu tak pe theitu ni hauh lo ten an chhah sak avang hian he thila inhnamhnawih zawng zawngte (Vawiin thlenga man loh an la awm a nih chuan) chhui chhuaha an phu tawk hremna pek vek ni rawh se.