TIMES OF MIZORAM

Govt. Johnson College: Vawiin chawhma khan kum 2002 August ni 24 a Bungkawn College leh Khatla Art & Commerce te insuihfin atanga lo piang Government Johnson College(GJC) din champha vawi 25-na, Silver Jubilee  lawmna neih a ni. He hun hi Finance Minister Pu Lalsawta chuan khuallian niin a uap a. Celebration Programme tan a nih hmaiin Silver Jubilee Monument khuhhawnna pawh a nei nghal a ni.

GJC kum 25 tlin lawmna puala thusawitu Finance Minister Pu Lalsawta chuan kum 1894 a Mizoram rawn luta Roman Hawrawp rawn siamtu Missionary-te zarah Mizo mipui te kan vannei hle a ni a ti a. Zirna lamah pawh nasa takin Mizoramin hma a sawn phah a tunah phei chuan sawrkar College 21 lai a lo awm ta a. Tunah phei chuan Education tia hriatlar Human Resources Development tia sawi bawk hi resource danga hausa lo Mizoram tan chuan rohlu ber a ni tawh a ni a ti.

Finance  Minister chuan GJC in an tumruhna leh an thawhrimna bakah mar pata tan an lak chhoh avanga hlawhtlinna an hmu chu a lawmpui takzet tih a sawi a. Tang te tanpui chu tunlaia sawrkar  thiltum laimu a ni tawh a ni a ti. "Tunhmain sawrkar hnathawk pakhat tal chhungkaw pakhata an awm chuan chhungkaw pangaiah kan ngai thin a. Sawrkar hnathawk thei  chin chu sawrkar hna a thawh theih hmasak ber thawk turin kan in nawr liam thin. Mahse, tunah chuan sawrkar hna in min daih tawh lo a ni. Hei hi kan tan thil pawi a ni lova kan thatna leh hmasawnna a ni zawka. Hei hian tumruhna leh thildang ngaihtuahchhuahna theihna te lo siamin  kan mithiam te ngei pawh sumdawnna kawngthar te dapin an lo intelkhawm phah a, mi hlawhtling tak tak te an lo chhuah phah a ni. Kan sawrkar chuan Government tih tet telh telh a, Governance tih len telh telh hi kan tum ber a ni a. Sawrkar chu a vengtu leh kaihruaitu niin a ngaihna hria leh tang thei te kutah hmasawnna leh changkanna kawnga hmalak theihna pek tam tial tial  kan tum a ni ", a ti a. Zirna leh thiamna chu engkawng pawh zawh turin a pawimawh hma sa ber a ni reng dawn tih a sawi a. Sawrkar chuan zirlaite chu  sawrkar hna  ringawt tinzawn lovin hmasawnna leh changkanna kawng hmu thiam thei tura an zirnaah te an tan a duh a ni a ti.

 GJC Silver Jubilee lawmna inkhawm hi Pu F.Lalremsiama, Jubilee Organising Committee Vice Chairman in a kaihruai a. He huanah hian inlawmna thuchah sawina leh report tawi pekna hun GJC Principal Prof. K. Vanlalmawia'n a nei a. Pu Lalrammawia Ngente hne atangin Jubilee Organising Report ngaihtlak a ni leh a. GJC Principal hlui Prof. Darchhawna leh Governing Board member atang te paw'n thusawi ngaihthlak a ni bawk a ni.  Tun dinhmunah GJC-ah hian thawktu mi 41 awm mekin heng zinga 28 te hi zirtirtu an ni a. Zirlai 930 an awm mekin Department 6 a awm mek a ni. College Building  sak mek hi zawh thawkhat ni tawhin 70% chu sak zawh tawh a ngaih a ni. GJC awmna hmun hi Veng pahnih ram chhung a ni a, college building thenkhat hi Bungkawn vengchhungah awmin a thenkhat chu Khatla Vengchhunga awm a ni thung. -DIPR

Vawiin khan  A.R. ground ah chapchar kut lawmna chhunzawm a ni a, he hunah hian Kut Pa ah Home Minister Pu. R. Lalzirliana niin, Kut thlengtu ah Tourism Minister Pu John Rotluangliana a ni bawk.

Home Minister Pu R. Lalzirliana chuan, hmanlai kan piputen chapchar Kut kan hman tan dan te sawiin, beidawng thawi damna kut ni thin kha hlimna kut, lo vah chhung zum leh hriam karah dam taka chapchar hun kan piputen an thleng thei chu hlim vangin he kut hi an hmang ta thin a ni, a ti a. Mihring nun hlutna tak tak tehna chu midangte tana malsawmna kan nih leh nihloh ah a ni a, Kut thupui “Sem sem dam dam, Ei bil thi thi” anih ang hian midangte dah hmasak leh midangte tana malsawmna nih tum hi mizo nunze mawi diktak chu a ni a ti. Mahni hnam aia hnamdang zia ngaisang apiangte nun chu belhchian a dawl lovin a chi-ri thin a, mahni hnam a chiang erawh chu an nun a nghet in, khawi hmunah pawh awmse an tlo fo thin, a ti bawk. Pu R.Lalzirliana chuan,”Hnamdang pawlh dal theih loh khawp hian mahni hnam ah I chiang theuh ang u, mahni hnam hmusit tu chuan a hnam a siam tha thei lovang a, a hnam a chawimawi thei bawk lovang” a ti.Mizo mipuite chu, mizo hnam dinchhuahna tur leh hmasawnna atana tha lo seng tawh zawng zawngte chu theihnghilh lo turin leh hnamdang zingah pawh kan zonunmawi chu lan chhuah tir zel turin a chah bawk.

Kut Thlengtu Tourism Minister Pu John Rotluangliana chuan Chapchar Kut chu kan Mizo Kut hrang hrangte zinga kan hlut ber pawl anih thu leh he Kut ah hian Mizo thuam te bakah mizo nunzemawi chu uar taka phochhuak leh turin kalkhawm te a chah.

Most Rev. Stephen Rotluanga’n hunserh hmangin, he Kut hian tlang hrang hranga Mizote min suihkhawmtu leh min pumkhattir tu ni thei se a ti a, Chapchar Kut kan lawmna ah hian a thalo lai te paihthla zela, induhsakna leh inhmangaihna lantirna huna hmang theuh turin kalkhawmte a chah a. Pu Vanlalruata, President, CYMA chuanChapchar Kut thupui “Sem sem dam dam, ei bil thi thi” anih anga chawimawi tlak tamtak zingah Pu Lalrinliana, Saitual Bazar veng, naupang tamtak dawhthlak lo pe tawh thin tu, Rawpui branch YMA leh Thiak branch YMA ten leiminin kawng a dan avanga lirthei khalhtu thahnemtak anlo buaipui naah te zonunmawi YMA member ten kan la chhawm nung zel chu lawmawm a tih thu a sawi.

Chapchar Kut lawm naah hian Kut Pa chu Khuallam a lo hmuah niin, Mizo Cultural Organisation ten Hla do an chham a, Mizo Cardinal Choir ten hawnna hla sa in, CYMA ten Cheraw kanpui leh Costume Parade hmuhnawm tak an entir a, Mizo incheina entirna hunte awmin chhawnghnawh kalkhawm zawng zawngte tan buatsaih a ni a, zaithiam taktak ten hun an hman bakah zavai chaina hun an hmang bawk. Chapchar kut 2018 lawm naah hian zohnahthlak Tripura, Manipur leh Myanmar atanga rawn kal an awm bakah hnamdang Meghalaya, Assam te leh Germany atanga rawn chhimte pawh an awm bawk.

Chapchar Kut hi mipuiten kan hlut hle a, Mizo inthuama inbelin a lawmna Lammualah pawh kal hleihtheih loh khawpin mipui kal an tam a ni.-DIPR

Mizote kût pui ber, Chapchar Kût chu nimin khan Lam­mualah hlim taka hman a ni a, Mizoram pawn hmun hrang hrang aṭangin kut chhim tur hian Zohnahthlakte an lo kal a, Kut Pa chu Art & Culture minister R Romawia a ni. Kumin Chapchar Kut thupui chu 'Sem sem dam dam, ei bil thi thi' tih a ni a, vawiinah chhunzawm a ni ang.

R Romawia chuan hnam zia leh hnam nunphungte chu mihringte siam chawp ni loin Pathian min pek a nih thu sawiin, "Min petu ti beidawng loa, chhawm nun zel hi kan mawhphurna a ni. Pi leh pute nun dan kan Kristianna nena izawm tlatte hi kan chhawm nun zel chuan kan hnam a boral ngai lo ang. Mi hnam tihdan kan entawn tlat erawh chuan kan hnam hi a ral vek ang," a ti a, Mizo hnam nunphung chhawm nung tlat turin Mizo mipuite a sawm.

Kut Pa chuan kan pi leh pute hunlai chu a neite'n an neih ang ang an pumbilh ngai loh thu sawiin, "A neih ang apiang sem zeltu chuan sem zel tur a nei ṭhin. Mahni puala ei bil chu nun tawina a nih piah lamah nun khawharna a ni," a ti.

Thusawitu dang Central YMA general secretary Lalhma­chhuana chuan Chapchar Kut chu lungngaihna ata hlimna, rilṭamna ata puarna leh manganna ata lawmna ni atan hman ṭhin a nih thu sawiin. "Sem sem dam dam, ei bil thi thi tiin mahni neih ang ang midang tan an hlan ṭhin," a ti. 

Lalhmachhuana chuan Mizote chu mahni thil tih ṭhat mahnia inpuang chhuak hnam kan ni lo tih sawiin, "Hei hi kan chhawm nun reng a pawimawh. Kan thil tih ṭhatte hi midangte puan chhuah atan dan tur a ni. Chapchar Kut hian Mizo nunze mawi tlawmngaihna rawn her chhuahpui leh mawlh teh se," a ti. 

Chapchar Kutah hian Kut Thlengtu chu Art & Culture director R Hmingthanzuala a ni a, Myanmar, Bangladesh, Meghalaya, Tripura, Assam leh Manipur aṭanga Zohnahthlak lokalte pawhin thu an sawi a ni.

Lammuala Chapchar Kût hmannaah hian Mizo nun zia chi hrang hrangte tarlan a ni a, zaithiamte an zai bakah, hnam lâm hrang hrang entir a ni. 

Lammuala hun hman a nih bakah Chapchar Kut pual hian Assembly Annexe-ah flower exhibition, Vanapa Hall-ah photo & painting exhibition leh Lam­mualah handicraft/handloom & food exhibition buatsaih a ni.

Chapchar Kut hi vawiinah Lammualah hman chhunzawm a ni dawn a, Mizoram hmun hrang hrangah pawh hman a ni ang. 

Lammualah hian ruahmanna hmasaah chuan Kut Pa atan Myanmar-a Chin State Hakka chief minister U Salai Lianluai leh Kut Thlengtu atan chief minister Lal Thanhawla ruat a ni a; mahse rokhawlhna avanga an hman loh avangin Kut Pa Home minister R Lalzirliana leh Kut Thlengtu Tourism minister John Rotluangliana a ni ang. -Vanglaini

Chapchar Kut 2018 chu vawiin khan Sipai Lammualah ropui taka lawm tan a ni a, Chapchar Kut lawmna ni khatnaah hian Art & Culture Minister Pu R. Romawia chu Kut Pa a ni a, Art & Culture Director Pu R. Hmingthanzuala chu Kut thlengtu a ni.

Kut Pa Minister Pu R. Romawia chuan Chapchar Kut 2018 chu hlim taka mipuiin a hman a duhsak thu leh, kumin Kut thupui “Sem sem dam dam, ei bil thi thi” tih chu vawng renga he Kut hi inpumkhatna leh inunauna tinghettu a nih ngei a beisei thu a sawi. Midang tana mahni neih ui ngailo chuan midang tan malsawmna annih bakah malsawmna pawh an dawng let thin a, duham taka midangte engmah sem phal ve ngailote chu an bula mite nen an inzarzawm lovin an nun a khawhar thin a ni, a ti. Minister chuan hnam zia leh tihdan phung te, hnam lam leh zai te hi Pathianin min siam sak a min pek a ni a, a petu tibeidawng lova chhawm nun zel hi kan bat a ni, a ti a. 'Hnam nun zemawi aia upa zah, tlawmngaihna, huaisenna, mite tanpuina duhnate leh hnam ze dang tha tak tak kan neihte hi Kristianna nen pawh inhmeh em em a, hnam nihna tichiangtu atan kan hlut thiam a kan ken nun chuan kan hnam hi chimral theih a ni lovang', Art & Culture Minister chuan a ti a ni.

Vawiin Chapchar Kut lawmnaah hian  Kut Thlengtu Pu R. Hmingthanzuala chuan thuhma sawiin, Organizing Committee Member Secretary Pu Lalhmachhuana, General Secretary CYMA chuan kalkhawmte lawmna thu a sawi a; ani bakah hian Chapchar Kut Organizing Committee in Mizoram pawn atanga Kut hmang tura Myanmar, Bangladesh, Manipur, Meghalaya, Assam leh Tripura atanga a mi sawmte atangin thusawi ngaihthlak a ni bawk. Vawiin Kut lawmnaah hian CYMA buatsaihin Mizo Infiamna hrang hrang entir a ni a, hnam lam hrang hrang thlir ho a nih bakah hla leh rimawi ngaihthlak a ni bawk.

Chapchar Kut 2018 lawmna hi kawng hrang hrangin kalpui a ni a. Vanapa Hall-ah Photo Exhibition buatsaih a ni a, Assembly Building Annexe-ah Flower Show & Fair buatsaih niin, AR Lammual Basketball ground-ah pawh Food Fest leh Handloom Show-te buatsaih a ni a, mualchhung pavilion ep, lammual sirah Museum Exhibit thenkhat phochhuah a ni bawk.

Naktuk chawhma dar 10:30-ah Sipai Lammualah hian Chapchar Kut lawmna hi chhunzawm a ni ang.-DIPR

Traffic SP C Lalthanmawia chuan thuchhuah siamin, Aizawl Municipal Corporation (AMC) huam chhungah lirthei reng reng darkar khatah km. 32.2 (mel 20) aia chaka tlan phal a ni lo tih a puang.

Traffic SP chuan, "Speed limit pel hian khawpui chhung motor kawngpui khawi laiah mah tlan phal a ni lo," a ti a; chutih rualin, thupek hian police, army, paramilitary force, fire & emergency service, disaster lama hotu te, chhiatrupna thilah emaw, dan leh thupek kenkawhna kawngah emaw, health emergency chungchanga duty-te a huam lo tih a tarlang.

Vawiin khan Aizawl DC Dr. A.Muthamma chuan a Office Chamber-ah Aizawl District huam chhunga sawrkar hmalakna Project hrang hrang internet kaltlanga vilna tur web portal DMDashboard (https://mz.dmdashboard.nic.in) chu a hawng.

Dashboard-ah hian Central leh State Project chi hrang hrang a vil theih a, tun din hmunah chuan heng Central Project hrang hrang Summary hi hmuh theih in a awm:

1) MGNREGS

2) VAHAN

3) NRLM

4) RCH

5) PMAYG

6) NSAP

7) Swachh Bharat Mission Gramin

State Project hnuaiah hian data chi hrang hrang hmuh theihin a awm bawk a, dah belh a siam belh mek zel a ni bawk. Project dah belh chungchang-ah hian Aizawl Bawrhsap chuan Officer-te chu an project leh hna enkawl mek te chu dah turin thurawn a pe bawk.

Central project-te hi webservice hmangin data hi lak/update a ni a, State Project erawh chu Manual a update a ni, webservice hmang a update theih turin hma lak mek zel a ni bawk. Dashboard hi tun dinhmunah chuan registered users (officials) ten an enin an hmang thei a, mipuiin an hman (public access) theih turin hmalak mek zel a ni.

Vawiin Dashboard hawnna hunah hian Aizawl DC Office-a Officer-te leh NIC Official te telin, DMdashboard siam dan leh kalpui dante leh Project hrang hrang dah a vil theih a nih dan NIC, Aizawl District Informatics Officer Pu HC Rochungnunga chuan kalkhawm te hnenah a sawifiah a ni.-DIPR

Aizawl khawpuia a thlawna hman theih tur internet wifi ṭhat tâwk loh chhan sawifiah turin Aizawl Municipal Corporation (AMC)-in contractor a hriattir.

Zawhna chhangin AMC mayor PC Lal­hmingthanga chuan, AMC hmalaknaa free internet wifi hmun hrang hranga dah chu a ṭha tawk lo tih tlangkam aṭangin an hria tih a sawi a, ziaka sawiselna dawng lo mah se, thil awm dan endik a nih hnuah internet wifi a ṭha tâwk lo tih finfiah a nih thu a sawi.

PC Lalhmingthanga chuan, wifi an dahna hmun, Johnson College-a mi chu contractor-in kawlphetha ṭhat tâwk loh chhuanlama tihtawp a dil angin tihtawp a nih thu a sawi a; hmun danga an dahna pawh a ṭhat tâwk loh avangin December 13, 2017-a AMC Board of Councillors ṭhukhawm thutlukna angin con­tractor chu insawifiah tura tih a nih thu sawiin, "A insawifiahna erawh kan la hmu lo," a ti.

AMC hmalaknain December 22, 2016 khan Aizawla free wifi an pek tur chu Govt. Aizawl College-ah hawn a ni a, contractor chu Nextcomm an ni.

GAC-a bul ṭan a nih bakah hiancollege dang paruk - T Romana College, Hrangbana Col­lege, J Thankima College, Aizawl North College, Aizawl West College leh Johnson College-ah te dah a ni.-Vanglaini

Urban Development and Poverty Alleviation department chuan nimin khan UDPA minister Zodintluanga pisaah kum 2017 Krismas puala khawlai chei zinga a mawi leh ṭha zual an thlante hnenah lawmman an hlan a; kâwn/khawlai chei mawi berah Tlangnuam thlan a ni.

Khawlai chei mawite lawmman hlan inkhawm hi UDPA secretary Dr C Vanlalramsanga'n a kaihruai a; minister Zodin­tluanga chuan, mipui náwlpuiina an lenvahnaa hmuhnawm en tur an neih theih nana veng ṭha­hnemngaiten an veng chhung an chei ṭhin chu lawm­awm a tih thu a sawi.

Zodintluanga chuan, khawlai chei mawite hnena lawmman pek a nih tur thu chu puanzar lâwk vak a nih loh thu sawiin, "Lawmman siam a nih dawn loh pawha kawn chei ṭhinte hi a lawmawm a, lawmman beisei loa cheite hnena lawmman pek hi a ṭha kan ti a ni," a ti a; lawmman dawngte chungah lawmthu sawiin, kum 2018 Krismas-ah pawh Aizawl chu mi zawng zawngin an sawi theih nan chei zel turin Aizawl mipuite a sáwm.

Khawlai chei mawi bera thlan Tlangnuam-in Rs. 1,00,000 an dawng a; pahnihnaah Chaltlangin Rs. 70,000 leh pathumna Durtlangin Rs. 50,000 an dawng. Mission Veng (Sikulpuikawn), Republic Vengthlang leh Electric Veng ten consolation prize Rs. 20,000 ṭheuh an dawng bawk. Lawm­mante hi UDPA Minister Zodintluanga'n a hlan a ni.

Khawlai chei endik dan sawitu UDPA Joint Director chuan, Aizawla local council zawng zawng chu khawlai chei lawmman siam a nih tur thu an hriattir thu leh, competition chuan December 24, 2017 leh January 2, 2018 inkar a huam thu a sawi. Veng/hmun 11 an endik a, a endiktute zingah UDPA officer-te bakah, Central YMA leh MJA aiawh an tel thu a sawi bawk.

Khawlai chei endik­naa an tehfungte chu - faina lam kaihhnawih, remhriatna (creativity), a mawina leh cheina hmanrua (eco-friendly decoration), mipuiin an hlut dan, a tlawhtute an lo dawnsawn dan (hospitality) leh, a theme (eng hawi zawnga chei nge) tihna a ni. -Vanglaini

Aizawl District Election Officer chuan Aizawl District chhunga Assembly Constituency 14 chhunga Electoral Roll-a Service Voter chungchangah 1.1.2018 chu reference date-a la in, Registration of Rules, 1960 dan angin siamthat (amend) a nih thu mipui hriattirna a chhuah.  He electoral roll siamthatna hi a duh tan Electoral Registration Officer & Assistant Electoral Registration Officer ah te ngaihven theih a ni.

1.            7 – Tuivawl (ST) AC

2.            8 – Chalfilh (ST) AC

3.            9 – Tawi (ST) AC

4.            10 – Aizawl North – I (ST) AC

5.            11 – Aizawl North – II (ST) AC

6.            12 – Aizawl North – III (ST) AC

7.            13 – Aizawl East – I (ST) AC

8.            14 – Aizawl East – II (ST) AC

9.            15 – Aizawl West – I (ST) AC

10.          16 – Aizawl West – II (ST) AC

11.          17 – Aizawl West – III (ST) AC

12.          18 – Aizawl South – I (ST) AC

13.          19 – Aizawl South – II (ST) AC

14.          20 – Aizawl South – III (ST) AC

AIZAWL DISTRICT CHHUNGA CONSTITUENCY 14 TE HMING

Rabon Lalhmingliani

(Group - RAM VEITUTE)

BAWNGKAWN -

He laiah hian kum 1917 lai khan sebawng nei Gurkha in hnih lek an awm a. An awmna kâwn chu sebawngpu awmna kâwn tih a ni a. Tûnah chuan Bawngkawn kan lo ti ta zâwk a ni.

BUNGKAWN -

Khatla leh Maubawk inkâra awm a ni a. A kâwn lai taka bung awm chu hmingah chawiin Bungkawn hming an vuah a ni. Tûn hma chuan sipai ho nupui an awm țhin.

BETHLEHEM -

He veng hi a tirin Veng hming mumal tak nei lo a ni a, Transport Veng, Thatvunga Veng, Pioneer ho awmna a nih vang in Midum veng te pawh an ti thin a, Veng pa ho kal khawm in Veng hming mumal neih an duh tak avang in, veng chhung ah hriattirna an chhuah a, Krismass leng khawm na ah Pu Rozikpuia'n Pathian hnen atang ka dawn a nia, tun atang chuan BETHLEHEM VENG kan ni tawh e, a tia. Veng pa ho kal khawm chuan lungrual tak in an pawm ta a ni.

CHANMARY -

Tûn hma chuan sipaiho chân kahna (silai kahna) hmunpuia an hman a nih avângin, an sawn hnu pawhin, vai hming vuah Chanmari hming hi an la pu ta zêl a ni.

CHALTLANG -

Tûn hmaa he lai hmuna Châl (mau) a tam avângin a hming hi vuah a ni.

CHAWNPUI -

He vêng hi Hmuia Veng tih a ni thîn a. A awm thar hovin mimal hming an duh ta lo va, Chawnpui kung khat chauh awm chu hmingah chawiin Chawnpui an vuah ta mai a ni. Tûnah chuan Chawnpui-ah hian Chawnpui hmuh tur a awm tawh lo.

CHHINGA VENG -

Bazar pheiah vai tlémtë chauh an awm laiin he lai ngawpui kâr ni thînah hian Chhinga leh mi tlémtë chauh an awm a. An zînga vengva ber hming chawiin Chhinga Veng hming a pu ta a ni. A hming pum chu Chhingrawnga a ni a, Hnamte a ni. Mizo zînga tawng rang bera sawi a ni a. Ui ngul lêr atangin a tla a, thaw vawih, thaw vawih, thaw vawih a ti hman a ni an ti thîn.

CHITE LUI -

Aizawl khawpui bul chhak lama lui luang a ni. Kulikawn thlang atanga lo luang luite pakhat chuan Mualpui tláng thut takah a fin a. A finna lai tui chu a al a, bullut (sava chi khat)-in an tlàn thîn a, bullut sih an vuah nghe nghe a ni. Chu tui al chu a nêp e, tiin a zuk fin lui chuan Chite lui hming a put phah mai a ni.

DURTLANG -

Tûn hma chuan ngawpuiin a khuh vek a, ruah a sûr duhin khua a dur reng thîn a. Khua a dur reng e tiin Durtlang hming a pu ta a ni. Chu’ng hun lai chuan he tláng hi ramhuai leh phung tamna ber niin an sawi thîn.

DINTHAR -

A hming hmasa chu Keltawlh Veng a ni. Chu hming chu duh lovin vêng zau zâwk an siam tâk vângin, kan din thar e tiin Dinthar Veng an vuah ta zâwk a ni.

ELECTRIC VENG -

Tûn hma chuan he laiah hian Tuitu a hrâm thîn avângin Tuitu Veng vuah a ni. Electric khâwlpui bunna hmun a nih tâk avângin a hming chawiin Electric Veng an ti ta a ni.

KULIKAWN -

Tûn hma chuan sipai te, sap te leh midang te puakphur tur apiang chu he laiah hian an innghâkkhâwm thîn a. Kuli ho innghahkhâwmna kâwn tiin a hmingah Kulikawn an vuah ta a ni.

KHATLA -

Gurkha tawng a ni a, kâwn emaw, ruam emaw an tihna mai a ni. Sipai kâwnghrèn nawhtlêtna hrui thûr he lai hmuna mi an lâk thin chu ‘khawia mi nge?’ tia an zawhin ‘khat tla’ khu mi kâwna mi khu,’ an ti thîn a, keini’n Khatla kan lo ti ta a ni.

LAIPUITLANG -

Kumpinu sawrkarin Mizoram khawpuia Aizawl a hman tan lai khan mite’n Pathianni an hriat theih nan tiin Col. Loch Manding sapin Pathianni apiangin he tlángah hian laipui a han kâp thîn a. Kristian an lo awm hnu chuan a lo remchâng hle a. Kanghmun khua leh Sateek khua te pawhin an lo hre phâk a. Mizovin laipui an kahna tláng tiin Laipuitlang an lo vuah ta a ni.

LUANGMUAL -

Hmán laiin a mual hi luang hmunpui a ni a; a mual pumpuia luang awm chu Luangmual tiin hmingah a put phah a ni.

MAUBAWK -

Aizawl tlâk lamah khuan tûn hma chuan mi tlémtëin bâwk an khawh a; an bâwk chu a chungah mau hnah an chih theuh va, chu vângin chu bâwk chu Maubawk hming an vuah.

MISSION VENG -

Tûn hma chuan Hriang thing a tam avângin Hriangmual an ti thîn. Zosap hmasa Saphluia kha a lo awm a, Sapthara’n a rawn fin leh a. Missionary awmna hmun a nih tâk avângin Mission Veng vuah a ni ta a. Veng lai, Dawrkai Veng leh Laltawnga Veng tiin hmun thumah an then a. Tûnah chuan a lo zau ta a. Laltawnga Veng tih chu Vengthlang (Mission Vengthlang) tih a lo ni ta zâwk a ni.

MAC DONALD HILL -

Tûn hma chuan Thingpui huan tlang tih a ni thîn. He lai hmunah hian Aizawl leh a chhehvêla thingpui awmte chu an phun khâwm a, sipaiin an awmchilh a, an rin pui ber pakhat a ni. Kum 1930 khan Mizo chowkider pawh he huan enkawltu-ah an dah nghe nghe. Kumpinu sawrkar hnuaia bawrhsap hnuhnung ber Macdonald-a’n High School hmun atan he lai hi a pêk avângin a petu hming chawiin Macdonald Hill an vuah ta a ni. Tin, he lai hmun hi missionary hmasa berte Pu Buanga leh Sap Upa te lo awmna a ni.

RAMHLUN -

He vêng hi a hming phuahtuin hlaa ‘Aw ramhlun, ka ram ropui..’ tih atanga a phuah niin a lang.

REPUBLIC VENG -

Lunglei Jeep road laih zawh hnua a chunga lamlian kal hi Bawrhsap Barkataki hova laih tlang niin a kawng hmingah Republic Avenue vuah a ni a. Republic tih chu a vêngin hmingah a pu ta a ni.

RANGVAMUAL -

Aizawl chhehvêla rangva in awm hmasak berna a nih avângin a mual chuan Rangvamual hming a pu ta a ni. Vai chuan Paila Camp an ti thîn. Kum 1890-a Aizawl-ah fort (kulh) an siam hmain he Paila Camp hi awm tawhin an hria.

SARON VENG -

He hming hi rambuai hnua an vuah thar a ni. Police Veng (tûn hnua Armed Veng kan tih hi a nih hmêl) leh Mirawng veng an kaikawp a, Saron Veng an vuah ta a ni. Hla thu-a ‘Isua sarawn pâr mawi vul lai a chul lo’ tiha Sarawn hi an vuah chhan niin an sawi.

TANHRIL -

Tûn hmaa Palian lal nunräwng tak Tanhrila khua a nih avângin a hming chawiin ‘Tanhril’ an vuah hlen ta a ni.

TLANGNUAM -

A hming hmasa chu Lalchhinga (Lal Singh Thapa) Veng a ni. Hetah hian nula pakhat tlangval lêm thiam tak a awm a, a tláng a nuam fawm bawk a; tlangvalin nuam an ti a, a tláng chuan Tlangnuam hming a put phah ta hial a ni an ti.

THAKTHING VENG -

Aizawl-a vêng upa ber pâwl a ni. Rahsi leh Babu ho, DC pisa chhuah lam, Venghlui ti-a an vuah tâk (Rahsi Veng) atanga an insuanin Thakthing tlángah hian an awm a; an awmna vêng chu Rahsi Veng tih a ni ta zâwk a. Thakthing Venga awm hmasa, kamding ni lo chu a hnuaiah an hnawt thla a, Rahsi Venghnuai an vuah a. Mahse, hun a lo rei a, rahsi thuneihna a lo dal ta deuh va, Thakthing Veng tih chu a lo lâr leh ta zâwk a ni.

TUIKUAL -

A vêng țhut lui chu Tuikual lui a nih avângin hmingah a pu mai a ni. Indopui pahnihna hma chuan ngawpui a la ni.

VENGHLUI -

He hmun hi Rahsi lo awmna hmasa ber a ni. Mahse, Rahsi ho chu Thakthing lamah an sawn phei tâk avângin Rahsi Venghlui tiin an sawi ta a. Tûnah chuan Rahsi bànin Venghlui kan ti ta a ni.

VENGHNUAI -

Thakthing Veng hnuaiah a awm. Rahsi ho Thakthing Venga an awm laiin, kamding lo an hnawhthlâk ho awmna a nih vângin Rahsi Venghnuai an vuah a. Tûnah chuan Venghnuai ti-a sawi a ni ta a ni.

ZEMABAWK -

A hming hmasa chu Seling a ni. Se pûl phûm a tam avângin Seling hi vuah a ni. Darlawng tláng Seling-ah an pêm zawh hnuin Zema hovin melveng in tlémtë an awm a, bâwk tiin an invuah a. An hotu chu Zema a nih avângin Zema bâwk tiin an sawi kher thîn a, Zemabawk tih hming hi a lo pu hlen ta a ni. Zema hi palian tak, thau tak a ni. Zanlawn-ah a pêmthla a, kum 1940 vêl pawh khan a la dam.

ZARKAWT -

He lai kâwn hi Vaki liam kâwn a nih avângin Ki len an zâr thîn a, Zarkawn an ti thîn. Tûnah chuan ‘Zarkawt’ tih a lo ni ta a ni.

Thulâkna: Țobul by K. Zawla

India ram khawpui lian tam taka tangkai taka an hman, taxi service kohna remchang tak OLA an tih mai chu Aizawl khawpuiah ngei hman theih a ni ve ta. Mipui nawlpui leh taxi khalhtuten kan la hmelhriat vak lova, a thatna leh tangkaina hi sawi kim mai sen pawh a ni lo.

AIZAWL MIPUI TAN OLA TAXI SERVICE: Aizawla taxi hmangtu tam tak sawi thin chu taxi chuan man to thu hi a ni; dikna chen pawh a nei awm e. India ram hmun dang ai a Mizoram thil to leh ni tin khawsak man sang ngaihtuah paw’n Aizawl taxi chuan man hi a sang fû a, engtin emaw tala hmalak hi mipui leh sawrkar tan tih makmawh a ni. Taxi neitu leh a hmangtu mipui that tlanna tur a nih ringin sawrkarin OLA a chah chhuak a, mipui lam hian kan chhawr tangkai thiam a pawimawh dawn hle a ni. Aizawl traffic jam nasa leh internet chak lo tak vang hian harsatna chu a awm ve rih ang tih a hriat a; mahse hei pawh hi sawrkar hmalakna lian tak Traffic Jam Free Aizawl City Programme vang hian hmasawnna a awm ve zel turah beisei ang.

Eng tin nge OLA chu kan hman tak ang? Google playstore atangin OLA application i download anga, i in register hnuah i duh leh khuma mu chungin i bul hnai a taxi awm i ko zung zung tawh mai dawn a ni. Thalai bakah pitar putar thlengin smartphone kan hum fer tawh a, lehkhathiam tamna state mipui hian buaina tur kan nei lo. Taxi number i chhinchhiah loh vanga i thil theihnghilh hmuh let lamah pawh harsatna i nei tawh lovang. I kalna tur chu hrechiang lawk lo pawh ni la, map hmangin rate nen i en lawk thei a, a to lo khawp a nia. Entir nan: tuna Dawrpui atanga Bawngkawn hman man tlangpui chu cheng 150 vel a ni a, OLA kaltlang chuan cheng 130 bak i chawi lovang. Civil Hospital atangin cheng 220 velin Synod Hospital pawh i thleng mai thei dawn tihna a nih chu. Ni tin taxi mamawh tan phei chuan a va tha tehlul em! Hetiang a nih te chuan tunge harsa chung chunga lirthei neih ve kher tum duh ang?

TAXI TAN VANNEIHNA: Taxi khalhtu tam takin rate tlawm zawk leh company-in hlep an lo neih vena tur OLA hi anchhia emaw an ti a, a ni hauh lo. Aizawl taxi hman man hi to viaua an hriat avangin mi tam takin an hire hreh a. OLA kan hman uar hunah chuan rate mumal a awm anga, tlawm dil buai lo leh ngaihngam taka an chuan dawn avangin tun ai hian taxi hmangtu an tam ang tih a rinawm. Intlanchhawk ngai hial khawpin sawrkarin Aizawl mamawh bak taxi permit a pe chhuak a, two wheeler taxi leh auto rickshaw awm hnu phei hi chuan taxi pute pawn rate mumal tak kan neih a hun ta viau mai. Taxi khalhtu pakhat chuan,”Krismas bawr ve tih loh chuan tlanna a vang a, stand-a rei tak din leh thui tak round thlawn hnu chuan rate hi a hniam tak tak thei lo” a ti a, a dik thawkhat ang. Aizawl hi lirthei vang ringawt pawn a tawt tulh tulh hmel a, kawngpui sira lirthei dahna tihtlem zel hi sawrkar tum pakhat a ni. Lirthei nei tan pawh parking a awm miau loh chuan public transport hman mai hi a remchan zel dawn avangin taxi khalhtute pawh kan lo insiamrem thiam leh kan vannei a ni mai. 

Taxi hmanga eizawng leh mipui tan OLA hi kum thar present ni teh se.