TIMES OF MIZORAM

CHOKHLEI KUT: March ni 8-9, 2018-a Lawngtlai District Sentetfiang khuaa Chokhlei Kut (Rhododendron Festival) hman tur theh larna leh sawmna video clip leh leaflet chu vawiin khan Lawngtlai DC Conference Hall-ah Lawngtlai Bawrhsap Dr Arun T., IAS hovin tlangzarh a ni.

He hunah hian Kut Organising Committee leh Information & Publicity Sub-Committee member eng emaw zat kal khawmin, Chokhlei Kut inbuatsaihna chungchang sawi ho nghal a ni a. Chokhlei Kut chu Mizoram Larsap paw’n hmanpui thei tura beisei a nih thu tarlan niin, hlawhtling taka hman a nih theih nan mawhphur tura ruat hrang hrangte’n an mawhphurhna theuh tha taka an hlen chhuah beisei a ni a. Video leh leaflet tlangzarh tak hi social media leh hmanraw dang hmanga theh darh tum a ni.

Chokhlei Kut hi chhawkhlei par chawi vul a, humhalh leh ngaihhlut deuh deuh a lo nih theih nan leh ram pawn atanga zin mite hip luhna tur atana ruahman niin, chhawkhlei par vul lai tak, March ni 8-9, 2018 hian Phawngpui tlang bulthuta Sentetfiang khuaa hman tura ruahman a ni a. Thlalak entirsiak (photo exhibition), Chokhlei Idol thlan, cultural programme, rock concert, hnam thuam entir (fashion show/costume parade) leh tualchhuak infiamna hrang hrang buatsaih tum niin, hnam thil, puan leh kutthemthiamna thil hrang hrang, traditional food leh pangpar lei turte pawh pho chhuah tum a ni a; Phawngpui National Park tlawh theih dan tur pawh felfai taka ruahman tum a ni bawk.-DIPR

CHOKHLEI KUT MIZORAM: Vawiin khan Lawngtlai DC Conference Hall-ah Chokhlei Kut (Chhawkhlei/Rhododendron Festival) hman dan tur relin Kut Organising Committee chu an Chairman Lawngtlai Bawrhsap Dr Arun T., IAS hovin an thu khawm.

He thut khawmah hian Lawngtlai East Bialtu MLA Pu H. Zothangliana, LADC CEM Pu T. Zakunga, LADC-a member-te, state leh LADC hnuaia office hotu lute leh tlawmngai pawl ai awhte an tel a. Pu H. Zothangliana chuan Mizorama tualto ngei leh Phawngpui tlang cheimawitu pangpar hminga Kut buatsaih tum chu lawmawm a tih thu sawiin, hlung leh hlawhtling taka hman theih leh la tihlen zel theih nia a hriat thu a sawi a. Chuti ang tur chuan thawh hona tha a pawimawh a ni, a ti a. Pu T. Zakunga pawhin Chokhlei Kut buatsaih tur chu phurawm a tih thu leh Lawngtlai District tihmingthatu a nih theih a beisei thu a sawi ve bawk.

Lawngtlai Bawrhsap Dr Arun T., IAS chuan Chokhlei Kut chu khawvel huap pawha pangpar mawi leh lar tak, Mizoramah chuan Mizoram tlang sang ber Phawngpui tlangah deuh chauh awm thin, Lawngtlai District mipuite inchhuanna chhawkhlei par chu chawi vul a, humhalh leh ngaihhlut deuh deuh a lo nih theih nan leh ram pawn atanga zin mite hip luhna tur atana ruahman a nih thu a sawi a. Kum tin hman a, tihlen deuh deuh theih a nih pawh a beisei thu a sawi.

Chokhlei Kut hi chhawkhlei par vul lai tak, March ni 8-9, 2018 hian Lawngtlai District, Phongpi tlang bulthuta Sentetfiang khuaa hman tura ruahman a ni a. He Kutah hian ram pawn lam zin mite pawh hip thei tur programme hrang hrang ruahman a ni a; thlalak entirsiak (photo exhibition), Chokhlei Idol thlan, cultural programme, rock concert, hnam thuam entir (fashion show/costume parade) leh tualchhuak infiamna hrang hrang buatsaih a ni dawn a. Zai thiam tak tak zai ngaihthlak tur a awm ang a. Hnam thil, puan leh kutthemthiamna thil hrang hrang, ei leh in leh pangpar lei turte pawh pho chhuah tum a ni a; Phongpi National Park tlawh theih dan tur pawh felfai taka ruahman tum a ni.

Chokhlei Kut hman tur chungchangah hian February ni 19, 2018 khan hman chi a nih leh nih loh te, hman dan tur kalphung te rel a lo ni tawh a. Hetah hian Chokhlei Kut chu hman ngei tha tih niin, hman hun tur leh hman dan turte pawh a riruang duan chhin a ni a. Committee tirhin member eng emaw zat chuan a hmanna tur hmunhma te pawh an lo han thlithlai tawh nghe nghe a ni.-DIPR

Vawiin khan Lawngtlai DC Conference Hall-ah Lawngtlai District-a ICDS project leh school education department-a thawktute tan Measles-Rubella campaign chungchang zir hona (sensitization) chu Bawrhsap Dr Arun T., IAS hovin neih a ni.

He hunah hian Lawngtlai District-a sentut hri danna pek beihpui thlak (Measles-Rubella Vaccination Campaign) kalpui dan tur sawi ho a ni a. Tun hmaa sentut (measles) hri danna chauh pek thin chu, MR campaign hnuaiah hian a inkawpin sentut leh sentut-fang (measles-rubella) vaccine pek a ni tawh dawn a. Naupang thla 9 atanga kum 15 inkar tawh phawt chu, sentut an vei leh vei loh emaw, hri danna an lak tawh leh la lak loh emaw pawh sawi lova hri danna hi pek vek tum a ni a. Target group-te hi anganwadi leh school zirlaite an nih avangin hlawhtling taka campaign neih a nih theih nan ICDS Project leh school education lama hotute chu he hunah hian koh khawm a, zirtirna pek an ni.-DIPR

Mizoram Horticulture Department: Lawngtlai Horticulture Division leh Lawngtlai Florist Association tang kawpin LADC Conference Hall-a Lawngtlai Horticulture Exhibition 2018 an buatsaih chu vawiin khan khar a ni.

He huna Khuallian, Lawngtlai Bawrhsap Dr Arun T., IAS chuan kawng eng kimah hlawhtling tur chuan thlantui fara beih a ngai tih sawiin, kut hna thawktute’n rim taka thawka an thar chhuah hmel hmuh chuan rilru a tihlim a, mi dang tan pawh chona leh phurna thar petu a ni thin, a ti a. Exhibition buatsaih chu a telate tan inelna a nih mai piah lamah, tan petu leh hmasawn zel duhna thlentu a ni tiin, phuisui leh hlung zawka la buatsaih chhoh zel ni se a duh thu a sawi.

Khual zahawm LADC Executive Secretary Pu H. Lalramenga pawhin khawvel changkannain a ken tel kan ei duh zawng leh ngainat zawng lo danglam chho zel chu, thei leh thlai leh pangpar thar chhuaktute tan eizawnna kawng zau zawka hawnsaktu a ni, a ti a. Kut hna thawktute chu hmasawn zel tuma tan la turin a chah a ni.

He exhibition kharna hun hi Lawngtlai Divisional Horticulture Officer Pu L.Lalhmingmawia Pachuau chuan kaihruaiin, Horticulture Demonstrator Pu H. Lalrawngbawla’n hunserh a hmang a. Lawngtlai Florist Association Treasurer Pi Rochamliani’n thu a sawi bakah, Horticulture Development Officer Pu Hunlawmawma chuan exhibition report leh endik dan kalhmangte sawiin, result a puang nghal a. Lawmman sem zui nghal a ni.

Lawngtlai Horticulture Exhibition 2018 hi Lawngtlaia tum hnih buatsaihna niin, February ni 14, 2018 chawhma dar 11 khan hawn a ni a. A hawnnaah hian Lawngtlai Florist Association bul tanpuitu leh kawng tinrenga hma an sawnna tura hma lakpuitu Lawngtlai DHO Pu L. Lalhmingmawia Pachuau MHS chu LFA te chuan chawimawina thuziak an hlan a ni.

He exhibition-ah hian item chi hrang 35 pho chhuah niin, pangpar lam chi a tam ber a; thil entir zawng zawng hi a mal chhiarin 381 a ni. Exhibition-ah hian khua/veng 22 atangin mi 317 an tel a, participant ngah ber veng chu participant 45 thawhtu Lawngtlai Electric Veng a ni. Exhibition neih chhung hian thil pho chhuah hi Rs 60,000/- hu vel hralh chhuah a ni a. Lawmman mal 130 siam niin, lawmman atan hian Rs 82,900/- sen a ni a. Thil pho chhuah hmuhnawm ber - "queen of the show" atan Pi Zonghingi, Lawngtlai-IV ta ‘bongainvillea (sharon)’ leh "king of the show" atan Pi Sanghnuni, Chawntlangpui ta ‘sawhthing thlar (ginger)’ te chu thlan an ni.-DIPR

KAWRAWNG LUI LEI MIZORAM GOVERNOR-IN A HAWNG: Vawiin khan Mizoram Governor Lt Gen. (Retd) Nirbhay Sharma, PVSM, UYSM, AVSM, VSM chuan Project Pushpak hnuaia Lawngtlai-Diltlang-Parva road-a Kawrawng lui kaina lei (RCC bridge) metre 72.50-a thui dawh thar chu a hawng a. Director General Border Roads Lt Gen. Sanjeev Kumar Srivastava, AVSM; Project Pushpak Chief Engineer Brig Birender Singh; Lawngtlai Bawrhsap Dr Arun T., IAS; LADC EM Pu C. Lalneihkhuma; sawrkar official eng emaw zat, tlawmngai pawl leh media lamte’n an tawiawm.

Mizoram Governor chuan Project Pushpak hnuaia BRO/BRTF-in Kawrawng lui lei tha tak mai an dawh hawn theih a ni ta chu lawmawm a tih thu sawiin, lei dawh thar chu Mizoram mipuite hnenah a hlan a. BRO chuan kum 1963, Mizorama an lo awm atangin kawng metres 3600-a thui an siam tawh thu leh lei metre 2200-a thui an dawh tawh thu sawiin, Mizoram hma sawnna atana kawng an siam leh an hna thawh hrang hrang chu fakawm a tih thu a sawi a. An hna thawh that avang hian Mizoram chhung, a bik takin chhim lama kawng siam that nana BRO hnena sum pek belh turin Mizoram Chief Minister nen pawh Defence Ministry an ngen thu a sawi.

Mizoram Governor chuan KMMTTP avangin Lawngtlai District chu ram dang nena insumdawn tawnna kawngpui a la ni thuai dawn tih sawiin, Lawngtlai District mipuite chu lo inbuatsaih lawk turin a chah a. Sawrkarin hmasawnna hna a thawh chu a tha zawnga lo thawhpui zel tura sawmin, an thawhpuina azarah Lawngtlai-Diltlang-Parva road pawh siam that zel niin, a chhehvel mipuite’n kawng tinrenga hma an sawnpui a beisei thu a sawi.

Director General Border Roads Lt Gen. Sanjeev Kumar Srivastava, AVSM chuan Prime Minister ‘Act NE Policy’ zulzuiin BRO chuan NE state-ah mipuite mamawh phuhruk zo turin project eng emaw zat a ruahman thu a sawi a. Project Pushpak Chief Engineer Brig Birender Singh leh 24 BRTF Commander Shri SK Choubey te pawhin thu an sawi.

Kawrawng lui lei hi Lawngtlai-Diltlang-Parva road-a lei dawh tur ruahman 12 zinga pakhat niin, Rs vaibelchhe 7.36 senga dawh a ni a. Project Pushpak leh BRTF hotute chuan LDP road chu tha taka chei chhunzawm zel an tum thu leh, Rs vaibelchhe 250 senga kum 3 chhung chei that hna ruahmanna pawh sawrkarah an theh luh tawh thu an sawi a. Kum 2 liam ta atang khan a chhehvel quarry-ah lung lak tur duh khawp an hmu lo chung pawhin LDP kawng enkawl hna chu theih tawp chhuaha an thawh reng thu an sawi bawk.

Vawiina Kawrawng lui lei hawnnaah hian Khawmawi khaw mipui leh sikul naupangte chuan Mizoram Governor chu lo hmuakin, lei hawnna inkhawm buatsaihah sikul naupangte chuan hnam lam (cheraw) an lo entir a. Hemi hnu hian Lawngtlai lamah kir leh nghalin, 71 RCC camp-ah chawchhun a ei a. Chumi hnuah helicopter-in Aizawl lam a pan leh nghal a ni.-DIPR

Lawngtlai BDO hma laknaa MGNREGS atanga buatsaih Children's Park, Electric Veng, Lawngtlaia mi chu Lawngtlai Bawrhsap Dr Arun T., IAS chuan vawiin khan a hawng.

Lawngtlai DC chuan naupangte chu taksa sawizawi nan leh hrisel nan infiam leh intihhlim mamawh an ni a, tualchaina hmunhma tha siamsak chuan an than len chhohnaah nasa takin kawngro a su dawn a ni, a ti a. Lawngtlaiah Children's Park changtlung tak hawn theih a ni ta chu lawmawm a tih thu a sawi.

Lai Autonomous District Council-a Chief Executive Member Pu T. Zakunga pawhin naupang hmakhua ngaia hma latu DC leh BDO te chungah leh Children's Park a puitlin theih nana thawktu zawng zawng chungah lawm thu a sawi bawk.

He Children's Park hi NREGS sum hmangin Rs nuai 5 senga siam a ni a. Land levelling leh fencing hi Electric Veng VC-in thawkin, retaining wall & PCC pavement leh fountain & beautification hi BDO Lawngtlai chuan thawkin, pipu leh inbukna etc. hi Lawngtlai khawpui chhunga VC-te'n an donate a ni a. Hna hi June 2016 atanga thawh tan niin, December 18, 2017 khan zawh a ni.-DIPR

LAWNGTLAI-AH PIANG LEH THI CHHINCHHIAH CHUNGCHANG ZIR HO

Lawngtlai Tualchhung Chanchinthar: Nimin leh vawiin khan Economics & Statistics Department bul tumin Lawngtlai DRO Conference Hall-ah Lawngtlai District chhunga LADC area-a piang leh thi chhinchhiahtu (registrar of births & deaths)-te tan intuaitharna buatsaih a ni.

Kum tina neih thin he annual training hi ni hnih awh niin, nimin khan RBD-te’n piang leh thi an chhinchhiahna register te endik leh kum thar atana hmanraw mamawh semin hun hman a ni a. Vawiin khan RBD chungchanga thil pawimawh hrang hrang zir ho leh sawi hona hun hman chhunzawm a ni.

Vawiina hun hman hi Economics & Statistics Department Director Pu Lalchhuanawma Hrahsel chuan kaihruaiin, an department-in piang leh thi chhinchhiah an kalpui dan leh kum kal ta report tlangpui a sawi a. Lawngtlai District Bawrhsap Dr Arun T., IAS chuan piang leh thi chhinchhiah pawimawhzia sawiin, ramria awm Lawngtlai District ang te tan phei chuan fimkhur a tul zual a ni, a ti a. RBD-te chuan an mawhphurhna pawimawhzia hre thar turin a chah.

Chief Judicial Magistrate Pu BT Lala Sakachep pawhin piang leh thi chhinchhiah kawngah kum khat chhunga chhinchhiahtir an nih loh chuan Judicial Magistrate 1st Class remtihna chauhva certificate pek chhuah theih a nih dan sawiin, court thlen ngai lo tura RBD-te leh mipuite’n a hun taka inchhinchhiahtir a pawimawh thu a sawi a. Kum kal ta (2017) chhung khan Lawngtlai District chhungah kum khat liam hnua inchhinchhiahtir tum eng emaw zat atangin mi 402 hnenah Magistrate 1st Class hminga phalna pek chhuah a nih thu a sawi.

Election Officer Pu Lalrinawma MCS pawhin piang hriatpuina lehkha (birth certificate) dik pawimawhzia sawiin, India khua leh tui nihna tichiangtu a ni, a ti a. Vote nei thei tur chin pawh birth certificate behchhan veka chhut leh enfiah an nih thin avangin, RBD-te’n certificate dik tak chauh an pek chhuah a pawimawh a ni, a ti.

Chawhma lama thu sawi hrang hrang ngaihthlak a nih hnu hian chawhnu lamah Lawngtlai District Research Officer Pi H. Chhunkungi chuan RBD kal khawmte hnenah thil pawimawh hrang hrang a zirtir a. Zawhna leh chhanna leh sawi hona hun hman ho a ni bawk.

Piang leh thi chhinchhiah hi Mizoramah kum 1985 atang khan bul tan a ni a. Tun dinhmunah Mizoram pumah piang leh thi chhinchhiahtu (RBD) 843 awmin, chu’ng zinga 103 chu damdawi ina mi an ni a. Lawngtlai District-ah RBD 132 awmin, chu’ng zinga 9 chu damdawi in atangin a ni a. Lawngtlai District hi LADC area leh CADC area-ah te then hran leh a ni a. LADC area-ah RBD unit 81 awmin, CADC area-ah unit 51 a awm.

Kum 1985 atang khan Birth & Death Annual Report hi kum tin tihchhuah thin niin, kum 2016 thleng khan vawi 31 tihchhuah tawh a ni a. Kum 2016 chhung khan Mizoram pumah nau piang 22,497 leh mitthi 6,422 chhinchhiah an ni a. Lawngtlai District bikah chuan nau piang mipa 1209 leh hmeichhia 1243, an zavaiin 2452 chhinchhiah an ni a; mitthi mipa 291 leh hmeichhia 198, an zavaiin 489 chhinchhiah an ni bawk.-DIPR

Governor Lt.Gen. Nirbhay Sharma chuan nimin khan Lawngtlai leh Chawngte a tlawh a; Lai Autonomous District Council (LADC) leh Chakma Autonomous District Council (CADC) chhunga hmasawnna hnathawhte Mizoram sorkar leh ADC hotute nen an sawiho.

Larsap hi Lawngtlaiah MLA H Zothangliana leh LADC chief executive member T Zakunga ten an lo dawngsawng a, DC conference hall-ah meeting an nei nghal. Governor chuan, Lawngtlai leh Siaha district-ah theihna leh hmasawnna tur tam tak a hmuh thu sawiin, "Lawngtlai DC leh district council-te inlungrual taka an thawhho hmasak a pawimawh," a ti.

Sorkar aṭanga sum an hmuh hmangin hmasawnna hna tam zawk an thawh theih nan ruahmanna fel tak siam se a duh thu sawiin, "Hmasawnna hna thawh chu mi dang kuta dah lo

Meeting zawhah hian Governor chuan Lawngtlai District Hospital a tlawh a, thawktute'n chief medical officer Dr Thani Pachuau hoin an lo dawngsawng a; medical superintendent Dr Lalmalsawmi Hmar-in damdawi-in chanchin tlangpui a sawi. Larsap hian damdawi-in poor fund atan Rs. 5,000 a pe a ni.

Lt.Gen. Nirbhay Sharma hi Chawngte-ah chuan CADC chief executive member Amit Kumar Chakma hoin an lo dawngsawng a, CADC Rest House-ah sorkar department aiawhte leh CADC hotute nen an inkâwm.

Larsap chuan, CADC hotute chu tun aia chak lehzuala hmasawnna hna an thawh theih thu hrilhin, "Mahni emaw chhung leh khatte tan chauha hna thawk in ni lo a, in tu leh fate tana thawk in ni," a ti a; thianghlim leh rinawm taka hna thawk turin a chah.-Vanglaini

Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chuan vawiin khan Lawngtlai leh Chawngte a tlawh a, Lawngtlai leh Chakma Autonomous District Council (ADC) huamchhunga hmasawnna hnathawh sawrkar leh ADC hotute nen an thlirho.

Governor chuan Lawngtlai chu tlawh hmasain; Pu H. Zothangliana, MLA leh LADC CEM Pu T.Zakunga bakah sorkar mi pawimawh ten an lo dawngsawng a. Lawngtlai DC Conference Hall-ah meeting an nei a ni. Governor chuan Lawngtlai leh Siaha District-ah theihna leh hmasawnna tur tam tak a hmuh thu sawiin, Lawngtlai DC leh District Council te inlungrual taka an thawhho hmasak a pawimawh a ti a. Sawrkar atanga sum an hmuh hmangin hmasawnna hna tam zawk an thawh theih nan ruahmanna fel tak siam turin a duh a. Hmasawnna hna thawh chu midang kuta dah lovin neitu rilru pua kan thawh chhuah tur a ni, a ti. Governor chuan hriselna a ngaihpawimawh thu sawiin, sum tam tak sen ngai lo tura kan hriselna kan vawn that a tul a ni, a ti. Lawngtlai district chu district hnufual a inngai tawhlo in, Mizoram district zinga hmasawn chak ber leh hmahruaitu nih tum turin a fuih a ni. He hunah hian Lawngtlai DC Dr Arun T., IAS chuan district dinhmun leh hmasawnna hnathawh te tarlangin, Lai Autonomous District Council (LADC) CEM Pu T. Zakunga pawhin LADC sawrkar hmalaknate a tarlang a ni.

He meeting zawhah hian Governor chuan Lawngtlai District Hospital chu tlawhin, Dr. Thani Pachuau, Chief Medical Officer te’n an lo dawngsawng a ni. Dr. Lalmalsawmi Hmar, Medical Superintendent chuan Damdawiin chanchin tlangpui a tarlang a. Kayakalp 2017-ah Lawngtlai District Hospital chuan pahnihna a lak thu leh District Hosptial hmasawn chak ber a nih thu a tarlang a ni. Governor chuan Hosptial thawkhtute hmalakna chu fakawm tiin Poor Fund atan Rs. 5,000/- a pe bawk a ni. Hemi hnu hian Govt. Region Higher Secondary School chu tlawh leh in zirlaite hnenah infiamna hmanrua a pe a, Chawngte panin Lawngtlai a chhuahsan a ni.

Governor chu Chawngte-ah Chakma Autonomous District Council (CADC) CEM Pu Amit Kumar Chakma hovin an lo dawngsawng a. CADC Rest House-ah sawrkar department aiawhte leh CADC hotute nen meeting neih chhunzawm a ni. Lawngtlai DC Dr Arun T. chuan CADC dinhmun tlangpui a tarlang a. Governor chuan CADC hotute chu tun aia chak lehzuala hmasawnna hna an thawh theih thu a sawi a. Mahni emaw chhung leh khat te tan chauha hna thawk an nih loh thu leh, an tu leh fa te tana thawk an nih thu sawiin, thianghlim leh rinawm taka hna thawk turin a chah a ni. He meeting zawhah hian mipui hova hun reilote hman a ni a, Kamalanagar-a Public School pawh a tlawh tel bawk a ni.

Governor hi a nupui Pi Jyotsna Sharma, Assembly Speaker Pu Hiphei leh sawrkar aiawhte’n an tawiawm a ni.-DIPR

Vawiin khan Lawngtlai District chhunga constituency pathuma Final Electoral Roll 2018 chu Lawngtlai DC charge latu Pu H. Dolianbuaia MCS chuan Lawngtlai DC Conference Hall-ah a tlangzarh. 

Pu H. Dolianbuaia chuan mipui sawrkar (democracy) chak tak nei turin India khua leh tui, kum tling chin tawh phawt chu electoral roll-a an chuan a, vote thlak huna vote an thlak vek a pawimawh thu a sawi a. Hemi atana District Election Office-in hma a lakna kawng hrang hrangah thawhpui turin BLO leh political party ai awh kal khawmte chu a ngen a ni. 

Vawiina Final Roll tlangzarhna hun hi Election Officer Pu Lalrinawma'n kaihruaiin, he hunah hian ERO, AERO, BLO leh political party hrang hrang ai awhte an tel. 

Final Publication of Electoral Roll 2018-a a lan danin, Lawngtlai District chhunga Tuichawng Constituency-ah voter 30035 (mipa 15273 leh hmeichhia 14762) an awm a; Lawngtlai West Constituency-ah voter 25779 (mipa 12982 leh hmeichhia 12797) awmin, Lawngtlai East Constituency-ah voter 23393 (mipa 11326 leh hmeichhia 12067) an awm bawk. September 2017-a tlangzarh Draft Roll leh tun tuma Final Roll tlangzarh-a voter punna hi Tuichawngah 679, Lawngtlai West-ah 359 leh Lawngtlai East-ah 445, a pumpuiah 1483 a ni. -DIPR

Lawngtlai District chhunga state leh central sawrkar hnuaia hna thawk Group B Gazetted chin telna Officers’ Club Lawngtlai District (OCL) chuan nimin tlai khan an President, Lawngtlai Addl DC Pu H. Dolianbuaia MCS Bangla-ah Krismas Urlawk leh Inthlahna hun an hmang.

He hun hi OCL President Pu H. Dolianbuaia MCS chuan kaihruaiin, Lawngtlai DFDO Pu LH Zirliansanga’n hunserh a hmang a. OCL Patron, District Bawrhsap Dr Arun T., IAS leh Committee Member, Lawngtlai DEO Pu Lalzuiliana te’n thu an sawi a. Election Officer Pu Lalrinawma MCS hnen atangin General Secretary Report leh Treasury Officer Dr K. Lalnghinglova MFAS hnen atangin Finance Secretary Report ngaihthlak a ni bawk.

He hunah hian member 40 chuang kal khawmin, zai ho, inhmelhriattir tawn leh thilpek inthleng tawnin hun hman a ni a. Mahni ei man tur theuh thawh khawmin chawhlui kil ho nghal a ni.

OCL hi Lawngtlai District-in kawng tinrenga hma a sawn theih nan a theih ang anga thawk turin September ni 13, 2017 khan din thar a ni a. Tuna an hun hman hi an thil tih khawm hmasak ber a ni. Nimina Krismas Urlawk an hmannaah hian mi harsa zawkte tanpui nan mahni remchan ang tawk pawisa thawh khawm nghalin, a zavaiin Rs 10,700/- a tling khawm a. Hei hi OB meeting-in tul a tih angin sem chhuah a ni ang.

Nimin leh vawiin khan Lawngtlai DC Conference Hall-ah District Bawrhsap Dr Arun T., IAS hovin National Bank for Agriculture and Rural Development (NABARD) hma lakna chungchang sawi ho a ni a. Lawngtlaia Bank leh sawrkar department hrang hrang ai awhte an tel.

Lawngtlai Bawrhsap Dr Arun T chuan NABARD puihnain Mizoram Rural Bank Lawngtlai Branch tan mobile ATM van neih theih ni se a duh thu sawiin, hei hi bank awm lohna khuate tan a tangkai hle tur thu a sawi a. Hei bakah hian Lawngtlaiah Cooperative Society din a nih ve theih nan hma lak vat ni se a duh thu a sawi bawk.

He hunah hian NABARD Mizoram Regional Office-a Deputy General Manager Pu J. Suresh chuan NABARD kalphung a sawi fiah a. NABARD-a District Development Manager (DDM) Pu Lalrokunga Chhakchhuak chuan Lawngtlai District chhunga NABARD hna thawhte sawi fiahin, an hmachhawpte a tarlang bawk.

NABARD hnuaiah hian Rural Infrastructure Development Fund (RIDF) atangin Lawngtlai Veterinary Hospital leh Solar Water Pumping Scheme project siam tum a ni a. Tin, sikul building sak that hna pawh RIDF atang hian thawh tum a ni.

Vawiina meeting-ah hian kum thar (2018-19)-a Lawngtlai leh Siaha District chhunga NABARD hma lak dan tur ‘Potential Linked Credit Plan’ chu Lawngtlai Bawrhsap chuan a tlangzarh nghal bawk.

Vawiin khan Nehru Yuva Kendra (NYK) Lawngtlai huaihawtin Lawngtlai DC Conference Hall-ah 'Declamation Contest' buatsaih a ni a. Lawngtlai Addl DC Pu H. Dolianbuaia MCS chu Khuallian a ni.

Khuallian Pu H. Dolianbuaia chuan thalaite hmasawn nana thawktu NYK-in thu insawisiak a buatsaih chu lawmawm a tih thu sawiin, eng inelnaah pawh tel ve ngam zel chu mi puitling zia a ni, a ti a. Pathianin mihringah theihna a dah vek a, a hai chhuak peih  apiang an hlawhtling thin tiin, hnam dangte el pha tur leh el ve ngam turin Mizo thalaite'n teirei peih leh tumna tak tak neih kan mamawh a ni, a ti.

He hun hi NYK Lawngtlai District Youth Coordinator (DYC) Pi Mercy Sellate chuan a kaihruai a. Inelna buatsaih a nih dan leh a kalphung te a sawi fiah nghal bawk.

He declamation contest hi India Republic Day 2018 puala rampum huap thalaite inelna tur a ni a. Vawiina Lawngtlaia buatsaih hi district level inelna niin, a ti tha ber chuan state level-ah Lawngtlai District ai a awh ang a; chuta tang chuan national level thlengin inelna hi neih chhoh tur a ni.

Vawiina Lawngtlaia district level declamation contest-ah hian contestant paruk telin, "Patriotism" leh "Nation Building" tih thupui hmangin thu an insawisiak a. B. Lalthlamuanpuia chu pakhatna niin, pahnihna Bobby Lalrammawii leh pathumna Sarika Begum te an ni. -DIPR

Lawngtlai District khaw pathuma Myanmar mi raltlan lo lutte chu an khawsak lailawkna tur sak sak an ni tawh a, Lawngtlai District bawrhsap Pu Arun T. chuan raltlan lo lut mi 1,600 bawr vel hi a theih ang angin sorkar chuan a tuamhlawm zel a ni a ti a, an chenna tur relief camp sak a nih bakah eitur buhfai pek an ni a.

Hri leng a awm lohna'n doctor pahnih leh an thawhpui midang pali-in a hmunah an vil reng a, a tul angin damdawi pawh a thlawna sem a nih thu bawrhsap chuan a sawi a, hri a len an hlau hle niin a sawi.

Nimin khan World Vision India (Chhimtuipui Area Development Programme), Lairam Social Mission (LSM) leh Gilead Drop-In Centre (GDIC) te tang kawp buatsaihin LIKBK Centenary Hall, Lawngtlaiah World AIDS Day hman a ni a. Lawngtlai Bawrhsap Dr Arun T., IAS chu Khuallian a ni.

Bawrhsap chuan HIV/AIDS veite chu hmangaih taka enkawl leh chhawmdawl an ngai tih sawiin, thinhrik leh endawng tur an ni lo va, khawtlangah en hran tur an ni lo tih a sawi a. A natna nihphung leh awmzia te, a veite nena hlim taka khawsak ho theih a nih dan te chu mipuiah inzirtirna tam tak neih a la ngai a ni, a ti a. Lawngtlai District pawh he natna runthlak tak hian min kal kan bik lo va, a dona kawng leh venna kawngah theih tawp chhuahin i tang tlang ang u, tiin kal khawmte chu a sawm nghal a ni.

He hun hi LSM Coordinator F. Lalengvari'n a kaihruai a. LIKBK General Secretary Rev. C. Hrangzuala'n hunserh a hmang a. GDIC Project Director Pi Vanlalhlupuii Fanai, MHIP Sub Hqtrs Lawngtlai President pawhin thu a sawi. He hunah hian resource person pahnih Dr Lalduhawma, Specialist (O&G) leh CZ Rodingliana, Councellor ICTC te'n paper an present a. GDIC Outreach Worker J. Vanlaltharliani chuan "damdawi hman sual" chingchang sawiin, Positive Women Network Mizoram atanga lo kal Pi C. Vanlaldiki pawhin thu a sawi bawk.

Lawngtlaia World AIDS Day hmannaah hian zirlai naupangte, kohhran thalai pawl, tlawmngai pawl leh VC ai awhte an tel a ni. -DIPR Mizoram

Nimin khan Lawngtlai District Bawrhsap Dr Arun T., IAS hovin Lawngtlaia sawrkar officer eng emaw zat chuan Lawngtlai District chhim lama Burma mi raltlan lo lutte chu a hmunah kal chilhin an dinhmun an en fiah a. An mamawh hrang hrang zir chiangin, hma lak zel dan tur an en ho nghal.

DC team chuan raltlanho inkulhna khaw li – Zochachhuah, Hmawngbuchhuah, Dumzautlang leh Laitlang te an tlawh a. He’ng khuaahte hian raltlante chu hmun khatah ko khawmin hriat tur pawimawh hrang hrang an hrilhfiah a. An hriselna ngai pawimawh tur te, zun leh ek thlahdah mai mai lo tur te, kut sil fai uluk tur te, chlorine nena sawngbawl sa tui thianghlim chauh hmang tur te, thosilen zar tha tur te’n an zirtir a. Raltlante khawsakna tur hmun, inthiarna tur hmun, an mutbu leh ei leh in leh mamawh tur hrang hrangte chu khawtlang hruaitute nen sawi hovin, hma lak dan tur an rel ho nghal a. Ramria awm Assam Rifles lam nen pawh inkawm hovin, state police te nen venhim hna thawhna kawnga hma lak zel dan tur te pawh sawi ho a ni bawk.

He’ng raltlante hi kar hmasa lama Myanmar leh Mizoram ramri bawr vela Burma hel pawl (Arakan Army) leh Burma sipaite an inkah vanga mahni khuaa awm ngam lova Mizoram chhunga lo tlan lut ta an ni a. Hel pawl leh Burma sipaite hi an la inkah deuh reng avangin an la haw thei rih lo a ni. Myanmar-a khaw pali – Varang, Pakauah, Phaleuah leh Satanguah atangin raltlante hi an lo lut a. Lawngtlai District-a khaw paliah inkulhin, VLA leh VC-te chhinchhiah danin hmeichhia 635 leh mipa 522, an zavaiin mi 1157 an ni. Zochachhuah-ah mi 250 (mipa – 110; hmeichhia – 140) awmin, Hmawngbuchhuah-ah mi 224 (mipa – 100; hmeichhia – 124), Dumzautlang-ah mi 240 (mipa – 105; hmeichhia – 135) leh Laitlang-ah mi 443 (mipa – 207; hmeichhia – 236) an awm.

District thuneitute chuan raltlante chhawmdawl hna hi an kalpui mek a. DC office atanga registration ti turin BLO leh VLA te’n raltlante chhinchhiah hna an kalpui dawn a. Raltlante hi registration number hran theuh pek vek an ni ang a. Hei hian ration pek dan turah leh raltlante thawn kir leh hun thlengin tangkaina a nei dawn a ni. Raltlante mamawh hrang hrang hi he inchhiarna mil zel hian pek a ni bawk ang.

State police leh Assam Rifles lamin a tir atangin venhim hna an thawk reng a. Health department lam chuan nimin khan Zochachhuah leh Dumzautlang-ah health clinic an buatsaih a. Damlo thisen test 29-ah malaria pf case 11 hmuh chhuah a ni. Hei bakah hian thosilen eng emaw zat semin, raltlante hriselna dinhmun hi enin an vil zui reng dawn a ni. PHE lam paw’n tui tihthianghlimna tur chlorine an sem bakah, ek in sakna tur hmanrua an ngaihtuah a, DC leh supply lamin buhfai, chawhmeh leh silpauline eng emaw zat an pe bawk.

He’ng raltlan tlawhnaah hian Lawngtlai Bawrhsap bakah, Lawngtlai SP Pu Lalsanglura MPS te; PWD Multi Modal Project Circle hnuai atangin SE Er J. Sangkhuma Khiangte, EE Er C. Lalhumhima, EE Er H. Lalnghinglova, SDO Er Joseph Laldintluanga leh SDO Er Perry Minho te; Health Department atangin Chief Medical Officer Dr Thani Pachuau, Chawngte CHC-a MO Dr Vanlallawma Khiangte, Bungtlang ‘S’ MO Dr Lawrence leh health worker te; PHE EE Er Laltlanchhunga leh a staff te; DC Office atangin Election Officer/DM&R Nodal Officer Pu Lalrinawma MCS leh thawktu dang te; Lawngtlai BDO Pu Zoramsiama Hmar, Bungtlang ‘S’ BDO Pu Victor Lalawmpuia leh Lawngtlai DIPRO Pu C. Lalhruaitluanga te; Bungtlang ‘S’ Supply Inspector Pu Vanlalhluna te; Lawngtlai O/C Inspector LP Zohmangaiha leh Mizoram Armed Police mi eng emaw zat an tel.-Dipr Mizoram

Vawiin khan Lawngtlai Bawrhsap Dr Arun T., IAS hovin a room-ah NLUP line department te’n Lawngtlai District chhunga NLUP hma lakna leh hlawhtlinna puanzar dan tur chungchang an sawi ho.

Lawngtlai Bawrhsap chuan NLUP Implementing Board (NIB) atanga lehkha an hmuh chungchang sawiin, NLUP hnuaia hma lakna hrang hrang leh a hlawhtlinnate puanzar nan special campaign neih tur a nih thu a sawi a. Hemi atan hian state, district leh block level committee din tur niin, vawiin meeting-ah hian Lawngtlai District leh block level committee chu din nghal a ni.

Lawngtlai District Level Committee-ah hian AH & Vety Minister Pu C. Ngunlianchunga, Lawngtlai West bialtu MLA chu Chairman a ni ang a. Lawngtlai DC chu Member Secretary niin, Tuichawng Bialtu MLA Dr BD Chakma, Lawngtlai East Bialtu MLA Pu H. Zothangliana, line department hrang hrang hotute, DIPRO leh tlawmngai pawl ai awhte chu member an ni ang. Block level-ah chuan Bialtu MLA Chairman-na hnuaiah, BDO chu Member Secretary niin, line department leh block tina tlawmngai pawl ai awhte chu member an ni ang.

He meeting-ah hian special campaign kalpui dan tur sawi ho nghal niin, kum 2018 Republic Day laiin NLUP Fair-cum-Exhibition buatsaih ni se, tih a ni a. Hetah hian NLUP line department hrang hrangte’n NLUP hnuaia an thar chhuahte leh an hlawhtlinnate an pho chhuak dawn a ni. Hei bakah hian NLUP hma lakna tar lan nan Beautiful Lawngtlai Project nena kai kawpin khawpui chhunga kawng ko bang remchang laiah NLUP kaihhnawih lemziak leh thuziak buatsaih ni se, tih a ni bawk.

-DIPR Mizoram

Nimin (26.11.2017) kha Constitution Day vawi 3-na a ni a. Lawngtlaiah chuan Nehru Yuva Kendra (NYK) huaihawtin BCM Thingkah kohhran hall-ah thalaite nen he ni hi hman a ni.

He hun hi NYK Lawngtlaia Multi Tasking Staff Nl K. Lalhmachhuani chuan kaihruaiin, TKP Thingkah Unit Assistant Secretary Tv K. Lalnunzawma’n hunserh a hmang a. NYK Lawngtlaia District Youth Coordinator Pi Mercy Sellate chuan hun hman chhan leh NYK kalphung bakah, thalaite hmasawnna atana thil pawimawh hrang hrang a sawi a. Lawngtlai DIPRO Pu C. Lalhruaitluanga chuan Constitution Day chungchang te, Dr BR Ambedkar-a chanchin leh India ram Danpui chungchang leh a pawimawhnate a sawi a. TKP Thingkah Unit atangin Treasurer Pu C. Lalrinawma leh Programme Secretary Tv Js Zaithanchhunga te pawhin thu an sawi.

Constitution Day hi November ni 26, 1949-a India Danpui pawm a nih hriat reng nan leh a pawimawhzia inzirtir ni atan kum tin November ni 26-a hman tura tih a ni a. Sawrkar laipui ruahman angin kum 2015 atang khan hman tan a ni.

Tukin khan Lawngtlai Horticulture Division hnuaia Lawngtlai Chandmary venga pack house cum market shed siam thar chu AH & Vety Minister Pu C. Ngunlianchunga’n a hawng a. Kut hna thawktute hnenah Lawngtlai Horticulture Division-in an kui sa purunsen, tomato leh zikhlum tiak a sem nghal bawk.

Pu C. Ngunlianchunga chuan thei leh thlai ei tam hi hrisel nan a tha a, a hrisel, tharlam leh thianghlim ei theih phei chu a tha leh zual a ni tiin, kut hna thawktute thlai thar chhuah thianghlim zawk leh felfai zawka zawrh chhuah theihna tur hmun Horticulture Department-in an ruahman chu hmasawnna lawmawm tak a nih thu a sawi a. Kut hna thawktute’n an thawh rah manhla zawka an seng theihna turin an thar chhuahte hralhna tur hmun tha siamsak mai bakah, an thar sate a chhiat mai loh nana dah thatna tur (cold storage) tha tak te pawh din ve theih thuai chakawm a tih thu a sawi. Kut tling lova sum lak luh leh zawmthaw taka hna thawhah malsawmna dawn tur a awm lo tiin, sawrkar hna thawk emaw kut hna thawk mi emaw paw’n mahni hma zawn theuhvah ram hmasawn nan thlantui fara hna thawh a tul a ni, a ti a. Mite tan malsawmna kan nih theih loh pawha a kalkawng tal nih tum turin kal khawmte chu a chah nghal a ni.

He hun hi Lawngtlai Divisional Horticulture Officer (DHO) Pu L. Lalhmingmawia Pachuau MHS chuan kaihruaiin, pack house sak a nih dan leh an ruahmanna te a sawi zau va. Market shed hmun leh in neitu lam atangin Rev C. Vanlawma’n hunserh hmangin, Pu Thathluna Chinzah chuan thu a sawi a. Horticulture Development Officer Pu Hunlawmawma MHS chuan lawm thu sawi bawk.

He pack house cum market shed hawn tak hi Mission for Integrated Development of Horticulture (MIDH) scheme hnuai atanga sak niin, thei leh thlai thar zuartute’n thianghlim leh tuihnai zawka an thil neihte an zawrh theihna tura ruahman a ni a. A in hi mimal in ding sa, bazar atana hman lai mek niin, MIDH atang hian Horticulture department lam chuan chei hnumin, thianghlim leh enkawl nuam zawk ni turin an buatsaih a ni.

Tukina pack house cum market shed hawnnaah hian Lawngtlai East Bialtu MLA Pu H. Zothangliana leh LADC CEM Pu T. Zakunga te bakah, LADC-a Executive Member leh MDC te, state sawrkar hnuaia department thenkhat hotute, chanchinbumite leh Horticulture department-a thawktute an tel a. Hun hman zawh hian Pu Thathluna Chinzah te chhungkuain chawhlui an buatsaih chu an kil ho nghal a ni. -DIPR Mizoram

Lawngtlai District-a chhiatna a lo thlen thulha rang taka chhanchhuah hna thawh a nih theih nana ruahman Disaster Response Vehicle leh hmanraw hrang hrang chu DM&R Minister Pu C. Ngunlianchunga chuan vawiin khan Lawngtlai DC office tualah hman tan theih turin a tlangzarh.

Tlangzarh hnua Lawngtlai DC Conference Hall-a inkhawm tawi buatsaihah Pu C. Ngunlianchunga chuan chhiatna venna kawnga Lawngtlai District-in hmasawnna hmel thar a hmu leh ta chu lawmawm a tih thu sawiin, a hlawhtlin nana thawktute chungah lawm thu a sawi a. Kawng tinrenga Lawngtlai District-in hma a sawn chhoh zel theih nan sawrkar department hrang hranga hotute chu an hma zawn theuhvah theih tawp chhuah turin a ngen nghal bawk. Chhiatna thlen thulha hma lak dan tur leh inven dan hriat a pawimawh thu sawiin, inzirtirna tam zawk buatsaih a, naupangin an than hnan theih tura inzirtir reng a tul thu a sawi a. Sawrkar pawhin chhiatna kawnga invenna lam chu a ngai pawimawh hle tih sawiin, hemi kawngah hian State Disaster Response Force (SDRF) hnuaiah police leh tlawmngai pawl mi eng emaw zat zirtirna pek an ni a, mi tam zawk zirtir belh zel tum a la nih thu a sawi. SDRF fund atanga za zela 5 (5%) chu hmanrua leh bungraw lei nan dah hran a ni a, department hrang hrang pawhin an budget atangin eng emaw zat chu chhiatna laka invenna atan an dah hrang tur a ni tiin, chhiatna avanga kan in leh lo leh rohlute kan chan palh thulha thlaveng atan leh lukhawng nei turin insurance (dahkham) tih nachang hriat a pawimawh hle a ni, a ti bawk.

He hun hi Lawngtlai District Bawrhsap Dr Arun T., IAS chuan a kaihruai a. DM&R Nodal Officer Pu Lalrinawma MCS chuan District Disaster Management Authority-in disaster management lama hma lakna thar a neih leh thil thar a tawn te bakah, hma lak chhoh zel dan tur te a sawi fiah a. Lawngtlai SP Pu Lalsanglura MPS pawhin thu sawiin, Addl DC Pu H. Dolianbuaia MCS chuan lawm thu sawiin hun khar a ni.

Vawiina hun hmanah hian Minister tawiawmtu LADC-a Executive Member Pu C. Lalneihkhuma te, Planning Board Vice Chairman Pu Suresh Chakma leh Lai DCC President Pu J. Ropianga te leh Lawngtlaia sawrkar department hotu thahnem tak an kal khawm a ni.

Lawngtlai District hian tun hnaiah chhiatna laka invenna kawngah hmasawnna thar a nei nual a. Khuarel chhiatna thlen theitu thlipui, ruahpui leh lirnghing lo thleng tur sms hmanga inhrilh darhna (disaster alert system) ruahman niin, hemi hmang hian tlawmngai pawlte, chanchinbu mite, sawrkar official-te leh VC te chu inralring tura hriattir lawk an ni thin dawn a. Chhiatna thlen thulha thuneitu lam hriattir nghal vatna turin a thlawna biak pawh theihna (toll free number) 1077 chu ruahman ni bawkin, hei pawh hi hman theih reng a ni tawh bawk.

Hei bakah hian DC office motor hman lai (gypsy) chu chei thain, disaster response vehicle atan buatsaih a ni a. Hemi rual hian chhiatna hrang hrang – lei min, in chim, kangmei leh tui tla an awma hman tur hmanraw tha tak tak lei thar niin, disaster response vehicle-ah hian tlan chhuahpuia hman nghal mai theihin chhawp a ni ang. Hmanraw lei thar zingah hian tui tla chhar nana hman tur tui chhung luhna thuam famkim (full set of scuba diving suit) te, concrete leh thing lianpui pui tan bung thei tur thil zaina te, zana current awm loh pawha eng atan hman theih tur tower light generator te, hruizen lian leh fei chi te pawh a tel a ni. Lawngtlai District hi Mizorama district pariat zingah disaster response vehicle nei thei district pathumna niin, scuba diving set phei chu nei hmasa ber nia hriat a ni. -DIPR Mizoram