Showing posts with label Mizo Thawnthu. Show all posts
Tweet Share Share Share Share Share

July 29, 2020 2
Kum tam tak a liam ta, ka la hre reng mai. Pick up Motor-ah chuan kan lawn sung sung a, mihring sawm hnih chuang kan inbeng a, kan khat ṭeh ṭawh hle mai. Kan kal tawh dawn emaw kan tih lai chuan Driver-in meihawl bag 10 zet a rawn theh chho leh a, ṭhut a phal der si lo, kan tawt lu deuh chu a ni.

mizo nula hurAizawl kal tur tih takah theih tawpa nalhin, mi aia nalh daihin ka inchei a, a polite tawkin ka nui deuh var var reng bawk a; mahse, hetia meihawl bag nen kan nih tak nuaiah chuan a polite theih tak tak tawh loh. Kan mang nghal niau nuau mai, a theih dan dana inthiatin kan tlan liam ve ta a ni. Kan nu'n Aizawla chhungkhatte sem tur bekang ro, baibing rep, rawtuai rep, etc. min ah-tirte chu kawng chhiat luatah kan chil sawm zo vek a ni. Fur khaw chhiat laia zin ngang kan ni a, kawng chhia nen, nal nen, tuihawk tling leh chirhdum nen, kan kal sawt lo hle mai. Driver tum lohna lamah te hian a tawlh tleng ang zul zul a, a den ṭhin teh e. Kawng ṭha laiah chuan kan zai ve ṭhat ṭhat ṭhin, Aizawl kal tur kan ni a, kan hlim a ni ve mai a ni. Kei phei chu zaithiam thlah ziding tih takah hla chang ka sawi kawng tluan nghe nghe. Mahse, kan zai rei hman ngai lo, Driver-in, "Chhuk ula, in vaiin nawr rawh u" a ti fo mai a, kan one two three kawng tluan a ni deuh mai. A tira kan nalh ve nen kan tal berh ta viau a ni, ka pheikhawk khing lehlam phei chu chirhdumah a pil bo daih nghe nghe.


Kan tlan leh a, kan zai leh dawn chiah, kawng nalah kan han inpaih vir zawk mai a, Jerusalem lam kan hawi ṭhawt mai mawle, hlauhawm thei vin ven tak chu a ni. Motor chhe em lo na na na chu kan tlan zel a, rei lo teah chirhdum hmun kan lut leh ta, kan chhuk a, kan nawr leh ṭang ṭang a, a tawpah kan nawr chhuak thut, driver-in a control hman si lo, Pu Tlana Lovah a tlan phei, an Mai dahkhawm a chil darh, an Thlam a su awn leh buih a, a ding thei hram a ni. Chutah Lo neitupa thinrim Lo lu aṭangin a rawn tlan thla, chempui a rawn vilik, a rawn meng sen thir rut mai. Min din tlartir a, a mal malin min han check thlap a nih kha! Kei pek chuan ka hlauh luatah ka kuhva neih zawng zawng ka lo pe a, kawng tluanin ka nghei phah a ni. Mahse, thisen chhuak em lovin kan inṭhaṭhen theih phah thung.

Tluanga taka kalin kan insawh ri chawrh chawrh reng a, kan indelh velna lamah Chapal hruite pawh a chat nuai hlawm a. vawikhat phei chu vawn tur ka dap a, Pi Lawmi pawnfen ka'n pawt thla thut mai a, zia lo pek puak teh e. Ni Lianbuangi tlu tur pawn ka serh leh sang a rawn man thut mai a, lehlamah motor a thle leh thut sia, an pawt mar leh zawt a nih kha, a na duh reuh khawp mai. Kawng a hnim sia, kan su phei sun sun zel a, Nl. Hlunpuii powder hnawih phei chu hmunphiah bukin a hlap reh vek mawle. Driver lah 'khalh fimkhur deuh rawh' tih ngam pawh a ni lo, a hah thinrim hmaisen mit sen ha sen, a meng sala tun reng mai a, intualvuak a peih sa ut reng a ni. Tuman biak pawh kan be ngam lo, a be ngam awm chhun a lainate pawn zawi tein 'kuhva kan lo siam leh ang che aw' an ti ngam ṭawk a ni. Kan tlan zel a, Mi dum kham kan thleng ta, tumah kan ṭawng ngam ta lo, a hlauawm a ni. Hmanah Bike nena ka tlak tawhna kha a ni, tuarchhel na na na chu ka thi lo deuh niin a lang. Mahse, kan pelh veleh khawhar hla min han sak khum kherah.

Tichuan thi lo aruang, thifahnukchatin Tlungvel chu kan thleng phei a, hotel kawtah kan ding a, sa rim a rawn nam nghal huk a, rilṭam a ti zual teh e. Pawisa nei deuhho chu an zuang thla phak phak a, chawei turin an lut nghal duah duah a, keini ṭhiandun Rinenga nen chuan pawisa te kan ngah ve lem lo bawk a, mi hnuvaiah, mi chhuk lohna lamah kan ṭum thla per chuai a, kan inbeng fai thawk thawk a, chhangthawp tlawn khat ve ve kan lei a, motor phenah thingpui tel lovin kan han helnuai reuh a nih kha, kan lem mel tawn tawn mai mawle.

Arei areiah chuan inti chaw ei bikho pawh an lo chhuak ve ta, an hmui mawmte chu an han hru fai ṭha duh lo vel a, an irh uk uk a, kuhva hring an ei a, Farstar min han pak khum ngeiah. Tih tak emah chuan kei pawn zo zial polythene khat dawn ka pai ve tho, min hnuaichhiah bik tur an ni lo. Mahse, ka pumpuiin sa a ngen ru deuh tlat, ka wallet-in a support der si lo.


Chuan kan tlan ṭan leh ta, sa ei leh ei lo te chu kan inṭhut pawlh leh ta nuai a, kei pek chu ka sa chak vang pawh ni hauh lovin, ka Aizawl kal tur phur lutuk, Rawtuai bai chhuang lum ṭha hman lova ka ei vang kha a niang chu, ka pum a rawn na ṭan a, kan kal thui tulh tulh a, a na tulh tulh a, ka thisuk lek lek a ni. Pachanga pumpa ka'n rum hem hem mai a nih kha, zia lo mang'e. Tichuan na tuar lungngai, mangang leh sehsama ka boral hma chiah chuan Aizawl kan thleng ta hram a ni.

Ka tan kum vanduai a ni hrim hrim, Damdawi In hi ka lut ngun malh malh khawp mai. Aizawl lama ka chhungte pawn min ning ru khawp ang. 'Naktukah Aizawl ka rawn kal dawn' tia ka phone lawkte hian Hospital lamah min lo chang leh ngawt ṭhin, tlaivar pawh huamin an lo ṭhu ṭhup zel. Min chan fuh chang lah a tam. A chang erawh chuan Bazarah Zikhlum te ka lo zuar daih ṭhin bawk. Mahse, a tawpah chuan sa ei khat tih takah ei luat tuar lovin Damdawi Inah bawk min luhpui leh nge nge ṭhin. Tun ṭumah pawh hian chhungten sa min lo hmehpui leh ngei ang a, a nih loh pawn Dal tak tawk chu kan chawm ngei ang. Chu chu kawng tluana ka hisap chu a ni. Aizawl kal leh ei tui, ka thau haw mum kang ṭhin reng a ni.

Tum loh deuhvin chhungte Ina chaw ei lo leh bazara nepnawi lei hman hauh lovin Civil Hospital sick room, Bed No. 3-naah bawk chuan mi dum kang hlum ang maiin ka mu dum leh ta ran a. Nurse leh Doctor-te pawn min lo hmelhriat tawh khawp mai, 'i room hi i va rawn luahlum khat tawh ve,' te an lo ti mai mai a. Nuih pawh ka nui ṭha peih lo, ka na riau, ka chau, ka nghilh dup, ka chalchang, thi leh dam karah ka leng, ka sahawk a ni ber mai. Ka chhungte pawh an rawn thleng khawm ṭuk ṭuk a, ka meng peih lo nain an ṭawng erawh ka hre thei nual. Pa Chhawntea'n "Tun țum chu a dam chhuak tawh lo vang, In lam lo zuk singsa r'u," a tih te, Țanpuiin, "Nia, thi tho tho tur vety lamah kan lo enkawl mai mai lo a ni, senso a tlem zawk tur," a tih te, U Kimi'n, "A dam leh mai thei asin. Vawk sa chhum hnim tir ila," a tihte chu ka mang hriat riai ruai a, min tithlabar khawp hlawm mai. Ka nau Hnemi pawn ka ruang khuhna tur puan a rawn ak lawk puar luah bawk.

Kha tih lai khan Kuang hi veng neituten an rawn intum chawp mai ṭhin a nih hmel. Ka ruang lak tumin ka lo chen tawhna veng hrang hrangten thi ngei turah min ngai a, kuang an rawn keng hlawm a, ka ruang inchuh an tum a ni, rapthlak hlawmin. Bengvar hlawm teh mah se, bengvarna ṭihbaiawm tak a va ni si em! Engpawhnise, Electric Veng lamin an rawn ken kuang kha chu an siam uluk lo fahran lutuk a, a thingte kha a kawi ang ngel ngul a, inzalh ka tum lo. Bawngkawn atanga an rawn ken pawh kha thing chhia mai mai kilh khawm a ni, ka ruang dah nan ka phal lo. Hmuntha khua aṭanga an rawn ken kha chu a thing a a ṭha; mahse, a phuailuai em mai a, hremhmun lam a nger sa deuh tun bawk sia, ka ngaina lo. Hmunpui lam aṭanga an rawn ken, puan var ser sawra an khuh zan mai kha chu lawiluh a chakawm deuh, thlarau a hip a ni. Chanmari West lama Pu Nghinglova te, Chhuantea ten an rawn ken pawh kha a dangdaiin a rapawm khawp zawk mai. Thirtiang zum sei tawk hi an rawn pu a, min thil tlang a, vawk zawna min zawn an tum a niang, den fia fia tak a ni. Ronie-a lah chu inti thu ziak mi takin vuina programme ami tur ka chanchin a lo lawr khawm ang dun dun a. Lalruatkimi lahin "Khawharte pual ami hla thlan tur vel kha chu ka kutah dah rawh u," a lo ti sek bawk a, mi phum chu an tum hlawm khawp.

Tin, heti hi a ni a, Doctor-ten theihtawp chhuahin min enkawl mah se, ka lei taksa chu a ral riai riai a, ka damlai sakhmel hnuhnung hmuh tumin an rawn tlan khawm a, ka hnukchat lai thlalak tum lah bo lo. Pu Zonuna pawh a rawn lang ve nawlh mai. Ani hi hman kuma a damdawi man ka bat ral sak tak kha a ni, mi rawn nuihsawh deuh vur vur nghe nghe. Chuan le, leilung dana pialral kai hun aia hma fe, naupang tè ni chung chuan rihsang mual liam ka tum ta. Ka chhungte ṭap hawm hawmte chu ka ral hriat raih raih a, ka liam reih reih a, lei mawinate chu hnutiang ka chhawn dawn ta, ram eng mawi panin Jordan lui ka dai kai dawn chiah. Chutah theitawpa intipachangin a tawp nan 'last seeing' ka rawn nei leh a, ka rawn meng leh diar diar a, mit menga khawvel mangṭha ka tum lai tak chuan kawngkaa Nurse chhuak tur, chawn var no nalh lutuk chu ka va hmu ta a nih kha! Ka ṭhu chhuak nghal hlawl mai! A liam hma chu ka thlir zui a, tichuan thingpui te ka in a, ka dam chhuak chho leh ta a ni.

Kha Nurse kha tunge a nih tun thleng hian ka hre ta lo. Han hre hlauh ila chuan kuhva ṭhehte pawh ka duh asin mawle. Kan ṭhenawm Zotei hi a niang han ti dawn ila, khatiang khawp khan a chawn a nalh ve si lo, damna khawp a ni lo. Engpawhnise, chutia ka dam sen leh lul takah chuan ka chhungte an lawm em em mai a; mahse, Kuang siama lo buai ve em emte kha chu an lawm ve chiah lo, "Lehlawi si a" ti hmel an pu tlat, 'a thi der,' te pawh min ti mai thei, 'phum tho tho ang,' te pawh min ti mai thei bawk, tunge va hre tawh bik i. Naupangin pheikhawk min chah, an ke tehna hnang an thliahte chu pawisa nei ta hek lo, ha kher nan ka hmang ta mai mai a. @C. Biaka
Read more »
Tweet Share Share Share Share Share

July 15, 2020

Thu Ngaihnawm Huang chhiar thin te chuan Sibuta chanchin hi kan chhiar tawh ka ring a, mahse Sibuta khan chhan nei lo, suahsual tukhum pawn vangah a farnu kha a that angin kan hmu a, lehkhabu rawnte nena lo tarlangin, a farnu a huat vang hrim hrima that a lo ni reng em tih in bihchiang teh ang.

Mizo Lal SibutaSibuta a hnam hi chiang taka hriat a ni lo a, Rivung hnam nia sawi a ni a, mahse ziaktu tam ber chuan Palian hnam tiin an ziak. Mi thenkhat chuan Darlalpui pa sawn niin an ring a, thenkhatin a hmeifa a nih an ring a. Mi dangin Darlalpuii pa sal man fa a nih an rin laiin thenkhat chuaan lal vanlung ur fapa a nih an rin thu an sawi bawk.(Van lung ur tih chu lal sutpui vuan kan tih ang hi a ni) Engpawhnise a farnu se chaiha a chaih avang hian Mizo te thinlungah a thi tawh dawn lo a, a damlai lungphunaa thisen buak nasatzia te pawhin theihnghilh ni a nei dawn hek lo.

Sakhan lal chu lal tha leh zaidam tak mai a ni a, a khua leh tuite a hmangaihin, a khua chuan kum that kum an hmang deuh reng emaw tih mai turin buh leh thlaiah an intodelh a, a boruak a nuamin nula leh tlangvalte thothang pawh a tha hle a ni. Sa pawh kah tur tam tak awmin pasalthate hla do chham ngaihthlak tur a awm zut thin a ni.

Lal chuan fanu pakhat Darlalpuii a nei a, hmeichhe duhawm tak leh zia pawh pangngai tak a ni, mahse fapa a neih loh avangin lal thinlai chu a dam thei lo a, Sibuta chu kum li mi vel a nihin fa atan a la ta a, lal zedingah mipa an awm loh avangin Sibuta chu nakin lawka roreltu tur a ni mai dawn a, mi vannei tak pawh a ni.


Hun a han rei deuh a, Darlalpuii pawh taitaw rah tiatin a hnute a lo lian ve ta a, a farnu Darlalpuii nena inngeih taka an awm lai chuan lal thisen kai ngei mipa a lo piang a, chuta tang chuan Sibuta chuan lal in chhungah ngaihsak a hlawh lo tan a, atan nau mipa thar chu lawmna ni lovin lungngaihna a lo ni a, thinrimin awmzia a nei lo a, hrehawm ti-ru takin hun a hmang chho tan ta a ni.

Sibuta chu lal in atang chuan a lo seilian zel a, naupang chhia kan tih ang mai hi a la nih avangin Darlalpuii chuan a tiduhdah thin a, a changin thirkhaiin a vit a, a changin a puan tahna bulah thuttir a, a themtlengin a ngal te a khawnsak thin a. A awm hle hle lai te hi meilingin a dep phu leh zeuh thin a, a changin in hnuaiah a bakilh thlauh ang tea sawiin a zawn tir a, chutia a zawng lai chuan in atangin tuiin a leih thin a ni.

Sakhan lal nupa chu a nu leh pa tak tak an nih loh avang leh a vuivaina a thlen chang pawhin ‘naupang thuchang mai mai’ tih ten an lo tihkawi sak a, mahse Sibuta tawrh dan chu naupang tawrh atan chuan a nasat em avangin a hrehawmin lal in chu atana chuan hremhmun te-nau temna a ni ringawt.

Ni khat chu Darlalpuii chuan a tiduhdah leh a, naupangte a ni na a, “Darlalpui, heti em chuan min nghaisa tawh lul suh, a hrehawm em mai, naupang mai ka la ni si a, ka thang thei lo ang. Zangkhua a la bungbu thei a nia,” beidawng leh hrehawm takin a ti a.

Darlalpuii chuan nau mipa a nei bawk a, Sibuta chu lal a nih theih a ring
lo a, lal te chuan sial an chhun tih hriain, “Sibut, lal i nih chuan sial angin mi chhun dawn nia,” a tikher a. Sibuta chuan chu chu a hre reng ta a ni.

Sibuta chu a lo thanglian a, tlangval a lo nih hnu chuan Darlalpuii chuan a tiduhdah ngam ta bik lo va. Darlalpuii hnena a lo sawi tawh ang ngei chuan phuba lak duhna a lo nei ta a ni. Pitar pakhat hmuin ani chuan tur (hman lai chuan hnamtur hi an hmang ber) hman dan te a lo hrilh a. (Sibuta hi amah khawngaihtuten an fuih pawrh a nih an ring a, a hringtunu pawhin a pui nia ngaih a ni) Zu bilhna tur bel mawngah hnamtur hnah a dah ru ta a, a pa nen chuan zu an in dun a, ani chuan a rukin a leih bo zel a, tichuan a pa chuan zu a in emaw a tih lai chuan tur a lo in reng a, reilo teha a thi ta a. A unaupa chu a vaw hlum bawk a, mi bulah chuan ‘Thingkungah sava bu lak a tum a, a tla hlum palh a ni a’ ti tlat a, a nu leh a farnu Darlalpuii chu lal in atangin a hnawt chhuak a.

Darlalpuii chu hmeichhe hmel hmuh nuam tak a nih ang ngeiin a nu a hmangaih a, puantah te pawh a thiamin la deh te chu eirawngbawl ang maiin a thiam a, lal fanu, lal in chhung atanga seilian ni mah se mizo hmeichhe hnathawh ang zawng zawng chu a thiam vek a ni.

An khaw thenawm lal, ranngaw zawnga rilru tiharh mek Lalngura pawhin Darlalpuii duhawmna chu a hmuhhmaih lo chiang kher mai. Sibuta tlawh pahin a an inah a leng lut fo thin a, a ngaina hle a ni. Lal in atanga hnawhchhuah, dai kila cheng mah nise hmeichhe tha chu sawi sawi ngai loin an hming a thang thuai thin a ni tih chu chiang takin Lalngura khuate pawhin an hria a ni.

Sibuta chuan lua kel sam a to hmain khuang achawi dawn a, Lalngura pawh a sawm a, zana an inah an inkawm lai chuan a beisei loh zawng takin a farnu chu nupuia neih a duh thu a sawi ta mauh mai a, Sibuta nupui chuan a duh lo hle a, khawhring pai ang hial ten a chhuah a. Mahse Lalngura thinlung chu a sawi nghin phah eih lo. (Sibuta nupui hian a pasal hi thawi dan kawng a hre hle a, a thu a chhia a tha a zawm diak diak a, lal nu mah nise a khua leh a khaw thenawm tlangvalten an ngaina lo hle a, ‘Mi biakna thlum viau, mitmenga min huphurhtu’ an tihial a ni. A farnu
chunga thil duhawm lo tak lo thleng tur pawh hi Sibuta nupui remruatpuina angin mi thenkhat chuan an ngai.)

Sibuta pawhin a farnu pumrua-ah chuan duhawm tak a nih thu te pawh a sawi a, mahse khuang a la chawi kim loh avangin a khuang chawi zawh te nghak rih se a ti a. Tichuan, thuawih takin Lalngura chu a upate hnena thu lawmawm tak hrilh turin a haw ta a.

Sibuta chuan a khuaa se thau tha tha pakua a tlangval te a hlin tir hnu chuan, “A se sawmna tur hi khawia mi nge kan hlin leh ang aw? kan khuaah chuan a awm tawh kher lo ang. A awm a nih pawhin favai atanga a chil achil chhuah a ngai ta ve ang,” tia tlangval leh pathlawite an inhnial bap bap laiin Sibuta chu a lokal a, a khaw tlangvalte rin loh zawng takin a farnu leh lal fanu Darlalpuii chu a se sawmna atan hling turin a ti mauh mai a. Mahse tlangvalte chuan an lo duh lo nasa mai a, “Lalpa, min tir lui suh, ang che. Se chaih tura kalkhawm kan ni a. Heti ang ngawta tlangvalho nuar pawh ni si lo min bum hi kan ngaithiam lo mai tur a nia,” tiin lal zahawm tak thu chu an hnial hial a, a tawp a tawpah amah ngeiin hnam hruiin a farnu chu an in chhung atangin a hling chhuak ta a ni.


A farnu Darlalpuii chu sial anga chaihin tui pawh in a phal lo a, a tlangvalten an chaih that duh loh chuan a hrem zel mai si a, hremawm titakin lal tualhmaiah chuan an chaih kual a, a nuin tui a in tir dawn pawhin a lo tihbuaksak a, a tui a hal em avangin a thaw te chu lawi ang maiin a thaw huam huam a, a hmaite chu thisenin a khat a, Sibuta en chungin, “Sibut, heti em hian ka chungah i rilru a chhiat hi ka ring lo va sin, i rilru chu ram huai tluk lek a nih hi,” Darlalpuii chuan a ti a.

Sibuta chuan, “Ka naupan lai khan zangkhua a la bungbu ang ka tih kha, a bungbu ta a nih hi, i hre lo’m ni? Chu bakah nang pawhin, ‘zangkhua a bungbut chuan sial angin min chhun dawn nia i tih ngat kha i theihnghilh ta em ni?” a ti thung a.

Darlalpuii chuan, “Theihnghilh lo e, ka hria asin. Lal tha leh ngilnei i nih beisei avang chauhva hrem thin che ka ni asin. Heti ang hian i ti duh tak tak ang tih ring phah lo mah ila, i nun chhiatzia hi chu ka hre tho. Turin ka pa i hrai hlum a, ka nau i vaw hlum bawk a. Heti taka nun chhia leh nun rawng hi chu i dam rei bik hlek lo vang le. Ngai reng rawh, i thih hunah ka pa leh mama te nen mitthi khuaah kan lo hmuak ang che, nuam i ti bik hlek lo vang,” a ti a. Sibuta chu a dangin a hil bul a, a thidang emaw an ti hman hial a. Darlalpuii luphan atan Fartuah kung an phunah chuan a thlun tir a, Se chhun tur pangngai ang deuh hlekin a lu kun deuh hlekin an phuar a. Dar bu leh dar khuang an tum ri a, Thangchhuah tur pain a tih thin dan ang takin diar trial a khim a, puan a sin a, a muzuk chu chung lamah vilik chho zoh zohin a lam hual a, dar tum tih mai loh chu thawm leh tawng ri a awm loh avangin a reh thuap a ni.

Khawvela thil awm ngai lo, thil rapthlak lutuk lo thleng tur chu mipuiin mak ti taka an en lai chuan Sibuta chuan a fei chu a vilik leh a. Mi se chhun chuan thi ser ser thei chauhvin an chhun a, mi dangin an talh leh thin a ni ngai a. Ani erawh chuan dangdai takin, a tum ang ngei chuan, a fei lu bawr tlum hmawk khawpin, nula thianghlim Darlalpuii nakah chuan a chhun ta a ni.

Darlalpuii chu a tlu ta riai riai a. A thi tur chuan, hmeichhia zawng zawngin an tih thin dan pangngaiin a pawnfen kau tur a dawm a zui trang trang a, dawm chung zelin a thi ta a ni. A lu chu an tan a, fartuah kung Seluphanah chuan se lu tar ang chiahin an tar ta a ni. Darlalpuii nu chuan hla hmangin a fanu a ngaihzia leh a khawngaihthlakzia tah hla chu mizo zinga hla phuah hmasa ber pawl zinga chhiar theihin a lo awm ta hlauh a ni.

A khaw mipuite chuan a chet dan chu mak an ti hle a, malsawmna pawh a dawn an beisei tawh lo a ni. Sibuta chuan a thiltih chu a khaw mipuiten an duh dawn lo tih hre lawk mah se a lal sutpui vawn chak an tam em avangin an hnial ngam dawn lo tih a hre chiang a, hei hian lal te hausakzia leh an neih tawm a, an buh leh bal hnianghnar taka chen ruk tum ve reng an awm thu chiang takin a tilang a ni.

Chutihrualin khatia Darlalpuii, nula ngilneih sial ang maia tihduhdah a nih khan hmeichhia leh naupangten an en ngam lo a, lal khawchhungah tulum a lut ta emaw an tihial a, hmana Sakhan khua leh tui nih nuam ti thin khan Sibuta khua leh tui nih chu mualphona a ni tih an hria a, hrehawm an ti em em a ni.
Lalngura chuan a hmangaih Darlalpuii chanchin a hriatin rang takin a hote nen an thawkchhuak nghal a, Darlalpuii nuin a hmuh rualin nasa takin tah hla nen a lo kuah a. Lalngura chu Sibuta inah thinrim alh puat puat chungin a lut a, Sibuta awmna a zawh laiina upaten, “Daithlang tuikhur kawng a zawh ta a nih kha. Min en zui chuan ka that ang che u min ti a, tumahin kan en zui ngam lo a,” tiin an chhang a. Lalngura chuan a hmangaih Darlalpuii phuba lak chu duh hle mah se an zawn ngial hnuah pawh an hmu tak loh avangin a kir leh ta a ni.
Nula riangvai leh khawngaihthlak Darlalpuii thihna avangin Darpuii nu leh Lalngura chu nufa ang maiin a phuarkhawm a, Darlalpuii thih dan chu rapthlak hle mah se hmangaihna zung par chhuah tir tu a nih phah a, he khawvel awmchhung zawnga nula khawngaihthlak tia hriatreng a ni tawh ang a, lal Sibuta pawh a farnu chungah a chet dan tenawm tak avangin a chhe zawnga hriatreng a ni tawh bawk ang.

(Sibuta chanchinah hian mizo nun tam tak a tarlang a ni, keimahni aia pachhe zawk hmusit that lohzia te. Fahrah, hmeithai leh khawtlang chu tangho bawk mah se a ruka hmusit an nih thu te, pipute thufing ‘zangkhua bungbu’ thu te thlengin a takin kan hmu a. Chhantu nei lo emaw kan tih te pawhin chhantu an lo neihzia te, lal ngai lo lal a khakzia te, Sibuta nupui pawhin a pasalin khatia a farnu se chhun anga a chhun dawna ti lo tura thlemna reng reng a neih loh avangin Sibuta lawmna hlir ngaihtuah, a sum chiah hmangaih, tun lai tawng takin, ‘sum ngah ngah hmeltha’ kan tih ang nun vawngtu a nihzia te pawh chiang takin a lang bawk a ni.) 

Ziaktu: David Lallawmawma

Lehkhabu Rawn
1. Rev. Z.T. Sangkhuma - Mizo Lal Ropuite. Publishby Art & Culture Dept. Mizoam. 1996. 2nd Edition
2. Lalchungnunga (8.6.1968- 29.9.2001) - Darlalpuii. B.A Mizo Zirlaibu
Read more »
Tweet Share Share Share Share Share

July 10, 2020
Kum 2007 November thla tawp lam a ni a, India rama hmun pakhat Chhattisgarh-ah chuan bomb a puak a, chu bomb puak avang chuan IR thahnem tak an boral a, boral zingah chuan mizo an tel nual a. Chu bomb puak chuan Mizoram pum a nghawr a, kan hnam pasaltha chhungte biangah an mittui a nghawr tla bawk a. Mitthi zingah chuan kan veng ami pahnih lai an tel avangin keini pawh khawhar chhungte hnemin zan rei thleng kan meng ve a.

“Naktukah, an ruang chu Lengpuiah zu hmuak ve ila”
“Ni e, kan hmuak ve dawn nia”

Chu bomb puak chuan a nghawng tur ang chu a nghawng zo vek turah ka ngai tawh a. Mahse, a tawpna ber thlen tir turin vanduaina chuan min rawn pan mek zawk a lo ni.

VANDUAINA RAPTHLAKVANDUAINA RAPTHLAK

“Didik”
“Kya he”
“Chalte chalte”
“Ek minute”
“Achha he”

Zing chaw eikhamah chuan ral atangin vai tawng phuahchawpin, “Kal tawh ang” tiin ka in au fiam vel a. Chumi ni december ni 1 ah chuan, hnam pasalthate ropui tak leh zah taka hmuak turin Lengpui airport panin ka thianpa nen chuan bike-in kan inphur thla ve ta a.

Sihmui kawnga kan tlan lai chuan :
“Dar engzat nge?”
“Dar 11:45”
“E he, ava tlai tawh ve”

Kan inbiakna tawngkam hnuhnung ber tur a ni tih kan hre der silo, chumi dawtah chuan chu bomb puakin a nghawng hnuhnun ber tur chu kan chungah a lo thleng ta. Thlamuang taka kan tlanlai chu, vawilehkhatah kan tlu ta phut a, kawngah thui fe kan tleng a, metal road a ka tleng lai chuan ka thianpa kawngchhak lama a liam vuai lai ka va hmu a. Ka rindan chuan sidedrain-ah a tla thla ni turah ka ngai a, hlauthawng deuh tak si, a nat lutuk ring bik vak silo in, ka thianpa awmna lam pan chuan ka tlanphei nghal a, mahse ka rindan ang a ni ta lo.


A tlakna chu sidedrain nilo in culvert feet 20 vela sang a lo ni a, chumai anilo kawngsira parapet, a bul hnai khuaa mite’n an sawidan chuan, a hma ni chiaha motorin a sut chet tawh, culvert atanga tlathla tepa lo awm chuan ka thianpa a lo delh reng mai chu ka zu hmu a. Ka hmuh veleh chuan mangang takin, “Didik, Didik” tiin ka au a, min chhang tur reng reng a awm lo, alam pan chuan ke bai sawih sawih pahin hmanhmawh em emin ka tlanthla nghal a, amah delhtu parapet kg 200 bawr vel zet a rit chu keimahin chawisawn ka tuma mahse keimah chauh chuan ka chawi sawn zo silo a. Kawngpui lamah tanpuitu au turin ka tlan chho lehnghal vat a.

MANGANNA VAWRTAWP

Kawngpui ka thlen chhoh chuan kawngpui chu a lo reh thiap a, tumah han auh mai tur an awm lo a, ka piah lawka kan chuanna bike kawngsira let reng tih loh chu thildang hmuh tur engmah a awm lo. Mahse rei vaklo hnuah chuan kan hnunga rawn tlan kan thiante chu an rawn thleng a, anni ka hmuh veleh chuan, “Kan accident, kan accident, hmanhmawh rawh u! Hmanhmawh rawh u! Didika khu...” tiin ka au chel chul a, ka thianpa awmna lam pan chuan ka tlanthla leh a. Midangho chuan min rawn zui nghal a, “Ngawi rawh u, a mar a la awm em?” an tih phei chuan awmngaihna reng reng ka hrelo, mahse vanneihthlak takin a mar chu a lo la awm hlauh mai. An lak chhuah lai chuan en pawh ka en ngamlo, ka khawngaih lutuk.

Kawngpuia an zawn chhoh hnuah pawh chuan nikhaw hrelovin a la awm reng a, ka thianpa chu ka va en a, a malpui ruh a tliak a, a khup kawi a insawn daih a, a luah hliam na tak a tuar bawk a. Ka rawmawl chu a lu atanga thisen lo chhuak dan nan ka pe a, kawngpuiah chuan ka thu hnawk a. “A nu leh pa, a u te engtinnge ka hrilh ang?” tiin ka rilru a insual nawk nawk bawk a, khatianga manganna kha chu engtikahmah tawn leh ka duh tawh lo.

Chutia ka inngaihtuah lai chuan, “A rawn harh e,” ti ri ka hria a, chumi rual chuan motor pawh a rawn thleng ve chiah a. Tichuan, Aizawl lampanin kan inphur chho ta a, kawnga kan tlanlai chuan, “Didik mipa kan nih kha tuar tang tang rawh, Didik i bulah ka awm reng a nia” tih tein ka be chho mawlh mawlh a, minute 30 vel kan tlan hnu chuan Damdawi In kan thleng a. Kan chhungte pawh an rawn thleng sap sap a, an aw leh an mit mengah chuan an mangang tih pawh a hriat.

Damdawi In mipui tamna pawh ni engang mah se chung mipuite chuan ka mittui an dang zo lo, “Engatinge Didika chauh a nat bik, engatinge ka nat ve loh keipawh hi na ve law law ila a tha tur” tiin ka tap a. Laina hnaiten, “I thianpa chu a dam ve leh mai ang” tia min han hnem ve te chuan ka thin a rim deuh ti tiha, hnemtu ka mamawh lo a ni ber mai. Chu aichuan, “Ni e, lo na ve law law la a tha tur,” min ti se ka duh zawk ang.

MANGTHA MAI LE

Mittui nen chuan a tuk zing khawvar kan nghak thleng ve mai dawn ni a kan inhriat laiin, December ni 2 zing dar 3:45-ah chuan, ka thian neihchhun leh ka thiantha ber chuan mual min liamsan ta a ni. An inchhung kan han lut a, a hma ni lawka hlim thawm leh nui riin a luahkhah thin In kha, mittui leh tap thawmin a khat a, vengchhung information centre atanga, “Tv. Oswald K. Lalrindika, thihchhan accident’ ti a an rawn au ka hriat phei chuan hrehawm ka ti lutuk kha bengngawng aia ka vanneih bikna ka hrelo hial reng a ni.

Chutia hrehawm ti taka kan awmlai chuan kan accident dan min lo zawt buai ve chhen lah an bang lo. Ka thianpa vang pawh niloin, ka thianpa ngaia ka tap min khawngaih avangin mi thenkhat mittui a lo luang ve mek bawk a. Kan inkawmngeih em avangin min hai tawk an awm a ni ngei ang, mitthi pangpar te ka dawng a. Chu mitthi pangparah chuan, “Kan ui em em Lalrinsanga hun lo taka min boralsan hi na kan va ti em” tih thu a inziak a. Kei erawh chu ka la dam nasa mai si a, uar tawkin ka lo la tap kuk ruih ruih bawk si a. Pangpara thu inziak kan hmuh rual rual chuan a u nen kan inen a, kan nui deuh suk nghe nghe.

Mittui nen kan vuiliam hnu chuan, ka thianpa pate-a chutih hunlaia central K.T.P leader Rev. K. Lalrinmawia chuan tuma awmlohna room pakhatah min ko lut a, heti hian zawhna min zawt a, “Sangte, i thianpa hi vanram a kai i ring em?”. Keichuan, “Aw ring e,” ka ti a, ani chuan dam dapin, “Thian inkawmngeih tak in ni a, chuvang chuan i tuarna hle mai a. Mahse i thianpa chu vanramah hlimtakin a awm tawh a, i thianpa thihna hi i thalaipuite zingah Pathian rawngbawl nan hmang ang che” min ti a. Keichuan hrethiamlo takin, “Aw” ka ti zawi raih a, tunhnuah hian kha a thusawi kha ka hrethiam ve tan dawn chauh.

TAWRH THIAM A HAR

Thla khat a liam a, exam tura inbuatsaih a lo hun a, lehkha zir ka tum a, ka lehkhapuana a kut ziak ngei mai han chhiar chuan lehkha a zir theihloh, bengah a aw a rawn ri nawn a, min ko ni te hian ka hria a. Zan rei tawh pawh ni mah se an Inah ka tlanphei a, ka va tap leh tawp thin. Exam zawh hnu atang phei chuan, kum khat chhung vel an Inah ka riak a, hlim taka kan pahnih a kan mut thinna khuma mu chungin, kan hlimlaite chu ka chhuikir a, ka mittui a luang fo thin. Ka tap chu hrehawm ka ti a nilo, mahse ka tap min tlemtu tur ber ngaia ka tap ta chu a na ka ti a ni.

Kawnga keimah chauha ka kal lai min hmututen min lo khawngaih thin zia thu min han hrilh ngat phei chuan, ka vanduai ber ta emaw intih mai a awl hial reng a ni. Ka veng ka tlangnelna hmun ngei mai pawh chu ka tan chuan khual khua ang mai a ni a, hmelhriat awm mah se, thian ka neilo, ka thian neih chhun chu thlafam a chang tawh. Ka rualpuite ho an thiante nena hlimtaka an inkawm dial dial lai ka hmuhte chuan ka thik deuh rum rum a. Mi chi hrang hrang an thiante nena hlimtaka an inkawm dial dial lai chu ngawi rengin ka thlir dauh dauh thin a, chutah chuan Didika nena kan nun kha ka va hmu a, ka lunglen ava leng thin em.

KHUAREI A REI TAWK LO

Mittui nena hun ka hmanlai in kumte pawh a lo liam ve zel a, a boral atangin kum 5 lai a lo liam ta reng mai. Mahse, heng kum 5 chhung hian amah theihnghilhin hun ka la hmang ngailo. Ani chu ka thiantha ber leh ka thian neihchhun, nun kawngtha engkim min hrilhtu a ni a, engtikahmah ka theihnghilh tawh dawn lo. Thlafam ngaih chu khuareiah a reh thin an ti a. Kei chuan ka thianpa ngaih hi khuareiah pawh ka bang dawn chuang lo, ka thianpa nghilhnan khuarei hi a rei tawk lo.


Nizan thla en zan pawh niloah khan, ka lunglenna chuan khuma ka mu chu min rawn kai tho a, ka thianpa chu ka ngai em em a, tihngaihna dang a awm silo. Pawnah ka thu chhuak a, ka thinlung hian kan nunhluite chu nimin aia hnaiah fiah em emin a rawn chhawpchhuak a, “Nunhlui ngaihin awmzia a neilo” tiin inhnem ka tuma mahse awmzia a awm lo. Tichuan, nunhlui ngaih chu awmzia neihtir tum hranlo in kan nunhlui chu ka dawn kir ta vawng vawng a, thinlunga thi silo famta, chul silo nunhlui chuaita ngaiin dam ka thlakhlelh tluk zetin thih ve mai pawh ka hrehlo rum rum a.

“Fam ngaih a na hi chu a zia zia a awm, ngaihte an fam hi a ni lona ber mai chu,” ti chungin inchhungah ka lut a, tichuan, he thu hi ka ziak ta a ni. Thil tam tak ziah tur ka nei, mahse ka thei tawh lo. He thu ringawt pawh hi i hnenah a sawi a sawi tur ni ila ka sawi chhuak theilo ang, achhan chu mittui ala luang reng si a. ©David LrSa
Read more »
Tweet Share Share Share Share Share

July 10, 2020
Pu, ka kum 12 pianchamphaphak min lawmsak tuma in in a ka nu leh pa te nen chaw ei tura kan lokal kha i theihnghilh theih ka ring biklo. Fanu mal ah pawh harsa taka kum tam tak an nghah hnua khawvel eng lo hmu ve ka nih a, tupawh mai khan min lawm a, ka nu leh pate ngat phei chuan kehthei dawmin min dawm a, min en ning ngailo tiraw.. Mahse khami zan zet kha chu la let thei ila chu maw pu, in ina lokal kha ka ngen tawp lo ang. Kan in pana kan haw laiin accident kan tawk a, ka nu leh pain an inkarah nghet takin min kuah a, keichu Pathian zarah ka him, mahse ka engkima ka engkim, ka nu leh pate erawh an boral ta si. Ngaihtuah dan pawh ka thiam lo, naupang mai ka ni. Damdawiinah in lokal a, i mangang hmel leh i mitmeng keimah min lainatna hmel kha ka la hrereng. Ka bulah i lo thu a, “Nubawih, thlaphang reng reng suh, i pi nen kan la awm a, theihtawpin kan enkawl ang che”, min tih te khan ka lawm lo a ni lo, mahse ka nuna thil hluber pahnih ka hmuh leh ka biak theih tawhloh tura an bo kha ka hrethiam thei thlawt lo ani.


Hunte a liam a, kum te a vei a. Keipawh thlamuang takin in hnenah ka seilian a, ka nu leh pa te ka ngaihna te,an telloa ka tlei theihlohna te hunin a liampui ve zel a, nang leh ka pi chu ka nu leh pate ang maiin ka ngai che u a, ka hlim ve lutuk thin. Zirna kawngah Pathian zarah chhun tur ka nei tha che u a, Mizoram sikul tha berah lutin matric exam ah pawh ram pumah a titha pawlah ka lan ve kha. Khami tuma ka hnena I sawi kha ka hrereng thin, “Nubawih, Pathian hrereng ang che aw, I nu leh pa an awm tawh lo a, ama enkawl leh malsawm I nih hi, tihian tha takin I zir zel ang a, I puitlin hunah hna tha tak i la thawk ang a, engkim i tihah dikna te, rinawmna te ngai pawimawh la, chhuan tlak leh fak phuin i nun hmang chho ang che”, min tih kha.

Kum 19 ka nihin cancer natna in a man che a, pu, i telloa ka pi nen chauha kan awm tur kha ka ngaingam lo a, ka thlaphang lutuk hi zantin ka tap a, Pathian hnenah nangmah tidam turin ka tawngtai bang ngailo. Mahse i hun a lo thleng a, chelh zawh ruallohin min liamsan ve ta mai si. Min enkawltu ber leh ka innghahna ber I liam ta si a, ka pi lah i thihna a tawrh em avangin a ni telin a chaklo mai si, mawhphurhna ka ko ah loh theihlohin a lo tla a, ka duh angin lehkha te ka zir tha thei ta lo a.Kan inchhungkhur enkawl ka ngaih avangin sikul pawh ka kal mumal thei ta lo.Mahse, khami hun chhung zawng pawh khan engemaw, tu emaw, nangmah avang chauh pawh khan nih chu ka la tum fan thin.

Tichuan harsa takin keimahin lehkha ka zir a, college ah te lut ve thei tawhlo mah ila private in ka exam ve a. Ka result pawh tha ve tak chu a la ni tho asin. Ka hlawhtlin ni tur nghakhlel a duhthu i sam te kha ka zir peihloh pawha min fuihtu an ni reng thin. B.A. ka zawh hlim khan i lehkha hnutchhiah ka pi nen kan haichhuak a, khatiang em em a kilkhawra i dah te tunge ring bik ang. Ka pi nen kan han nui leh bawk bawk a, kan han en chuan ka naupan laia ka nu leh ka pa thenrual thate’n an ralna kha ka lo puitlin huna zirna sang zawk ka beih theih nan bank ah i lo khawl reng tih kan hmu chhuak a. Pu, ka ngei bawk che sia, ka ngai bawk che sia, ka lawm bawk sia, awmdan tur pawh ka thiamlo. Tichuan i thiltih vel lo hriatpuitura engkim i hrilh, i thianpa pu ramtea hnenah kan va kal a, ani lah chuan bank pass book vel min pek pahin a lo nui ang tut tut a. I pawisa min lo khawlsak chuan M.A. chu ka zir chhunzawm ve ta a.Pathianin hriselna tha te min pe a, M.A. pawh chu tha takin ka zo a, kan department ah topper hial ka ni ve asin.

Tichuan, hna te a rem ang ang ka’n melh chho ve a. Hmanni chu hna tha ve takah interview turin ka tling ve hlauh a. Pu, ka lawm ve zia chu maw, hetah awm la chu i ha lem tla thawtin ka nuihtir ang che. Interview tur chuan ka inbuatsaih ve a. Kan thenawm nu lah phur lutuk Millenium centre a an kawr zawrhlai ka hak turin min pe ngei bawk a. Zanah te hian ka mu theilo. Ka interview ni tur chu ka ngaihtuah a, ka huphurh ai mahin ka phur. Hna te ka neih chuan ka hlawh ka khawl ang a. ka nu leh ka pa leh nangmah ngei kan zalhna che u, in thlan ka siam dan tur te ka ngaihtuah a, ka pi kawrthar ka lei ang a, a kum te a upa ve tawh sia, duh tawkin damdawi thain ka enkawl thei tawh ang, te ka tia. Ka suangtuah nasa lutuk hi ka mu hmanlo ani ber mai.

Interview ni a lo thleng a.Ka thianpa hmana ka sikul kalpui pawh a lo awm ve nawlh mai. Kan inhmu chu kan hlim hle a, kan sikul kal lai te kan sawidun luam a. Interview hun alo thlen chuan ama dawt chiaha lut tur ka ni a. Roomah khan a awm reilo riauin ka hria, ka helhhawlh vang nge pawh ka hre chuanglo. Ka hun a thlen chuan phur si, zam ve deuh tho si hian ka va lut a.Zawhna ho te te min zawt a, ka rin ai daihin an zawhna te kha kan interview level atan chuan a ho ka ti a. Nu pakhat erawh kha chuan kan hna mil leh ka zirlai mil har ve tak tak min lo zawt a.Zawhna pakhat ka chhang theilo tih mai loh kha chu chhanna kha ka pe tha thawkhatin ka hria. Min interview tu te pawh an lungawi tih an hmelah ka hmu thei. Room ka chhuahsan pah chuan chu nu zawhna har pui pui min zawttu chuan “Mami, tling ngei la ka duh khawp mai, I beisei ang i pha talo a nih pawhin beidawng lo ang che” , min ti a. Han ngaihtuah zui dan vak pawh ka thiam chuanglo.

Ka thianpa nen chuan dawrah thingpui te kan indun a. Ani chu kan naupan lai atang tawh khan naupang ngainatawm tak a ni thin hrim hrim a. Lehkha a thiamtheih em em chu ka hrelo mahse a nu leh pa in hna tha tak an chelh a, phai ah te lehkha zirin a awm a, kan han inkawm chu kan naupan laia a thil phal ngai rengin a thilphal a, fiamthu a duh a, a bula awm pawh nuam tak ani. Kan han titi dun a, kan interview chungchang te kan sawi a, ka thianpa chuan, “dik tak chuan hemi hna hi a ruak tih pawh ka hrelo a, ka inbuatsaih em em lo, ka pa in I interview a ngai min tia, ka peih vaklo a, mahse i hmel va inlan ve hrim hrim rawh min ti a, ka lo kal ve mai mai.Interview pawh kha ka ti tha lemlo, ka nui ral vel mai mai”, a ti a. Tichuan kan ei man te pawh chu a pe a, kal na tur dang kan la neih ve ve avangin kan inthen chho zui mai a.


Result chhuah hun chu ka nghakhlel khawp mai a. Post pakhat a awm a, mi 5 min ko a, ka thianpa lah chuan ka titha vaklo a ti sia. Midang ho lah kha interview ni khan an chutih hmel teh ual chuang silo, ka tling ve thei mai ang, te ka tia. Nikhat chu phone call ka dawng ta a. Interview board atangin pa pakhat hian interview ka pek danah a lungawi thu te, keimah ang ngei hi hna chelh tur a a duhthu te min rawn hrilh a. Ka lawm lutuk chu au chhuah vak hi ka chak a. A sawi zel a, tun tum atan chuan ka tlin ve rihloh thu min hrilh ta a. Mak ka ti lutuk, ka awih phallo, ka hisap, ka duhthusam zawng zawng te kha hawlhkian duak ang hian an awm a, ka hamhaih vek a. Ani chuan ti hian a ti ta a, “Mami, tun ang khawvelah chuan thiam na chauh te hi a tawk zo tawhlo a, thil tithei nih tel a ngai a. Nang chuan support tu tumah i neilo a, mahse i interview pui thenkhat te kha chuan minister thil tithei tak tak te back up tu an nei a, an lal em a, an thu zawm mai loh chu tihtheih vak kan nei lo ani, hrethiam ang che” min ti ta ringawt a. Ka chil ka lem duk a, ka taksa hi a vawt chhuak vekin ka hria. Harsa ti tak chungin chu pa hnenah chuan, “Anih leh ka pu, tunge in lak?” ka ti a. Ani chuan “LALNUNDIKA” a ti a, phone chua dah ta a.

Ka ngaihtuah chian poh leh ka hrethiam theilo. LALNUNDIKA chu ka thianpa, ka sikul kal pui, “interview ka ti tha lo, ka pa in kal rawh min tih vangin ka kal, ka nui liam vel mai mai”, titu kha a ni si a. Pu, i thlan mawi taka siam te ka duh a, min chhuantlak a awm te ka duh a, ka pi tan pawh innghah na tlak nih ka duh. Ka thinlung tina bertu chu keima tana sum i khawl ruk char char te kha ka ngaihtuah a, awmze neia chantir ka duh, mahse ka hlawhchham chu a ni si.

Pu, keini aia thiltithei tam tak an len suau suau na karah hian, kei i tunu, mahni inhaikuak chawp ngai, minister emaw, mi lian emaw hmelhriat nei velo hi ka tling zo ve ngang lo a ni e. Min ngaidam ang che. @Natalia Sailo
Read more »
Tweet Share Share Share Share Share

July 10, 2020
"Bawih, zanin chu min lo cover teh aw," tih pahin Emily chuan a ṭhiannu chu a biak tlawn vel a. Msi chuan,"Nhaa khawiah? Ka chhungten zan chhuah an phal teuh lo mai a,"a lo ti nghal vat a. Emily chuan, "Aww i dil ve ang chu, ka bula i kal dawn chuan ka chhungte pawn ka chhuah an phal dawn a,"Emily chuan a ṭhiannu chu ngen tak te in a ngen a ni. Msi chu a ngawi vang vang a,"Anu ka lo dil dawn nia, a phal loh chuan ka rawn chhuak thei dawn lo nia aw," a ti ta nge nge a.

"Nu,zanin chu ka ṭhiannu birthday nia,chhuah ve i phal em?,"Msi chuan inthlahrung ang reng takin anu chu a dil a. Pi Ruati chuan,"Bawihi,tun ang kum aṭanga zan chhuah in hrat te chuan aw,a chi loh ang Bawihte. I pa pawn a phal ka ring lo,"a lo ti dam thluam a. Msi chuan, "Min sawm ve nasa bawk sia, zanin chiah chu min phal sak ve la. Zanin bak chu ka chhuak lo ang,"tiin ngen ngawl takin a dil leh a. Pi Ruati chuan,"Aww i pa te pawh dil ve phawt la, i pa thu thu a ni mai,"a ti ta nge nge a. Msi chuan huphurh ru angreng tak chungin a pa chu a dil ve ta ngei a,zan lama chhuah chu a vawikhat dilna a ni bawk a. A pa pawh chuan a fanu neihchhun dilna chu a lo aw sak ve mai a. Msi pawh a hlim ang reng khawp mai;mahse, zanah chuan khawiah nge an chhuah dawn tih erawh a hre lo a ni. A nu leh pa te pawn an kalna hmun tur leh birthday neitu chu an zawt lo bawk a,Msi chuan sawi pawh a tum lo a ni.

Emily leh Msi chu zan dar 7:00pm velah chuan an chhuak ta ngei a. An hlim dun khawp mai,"Emi, khawi lamah nge kan kal dawn a?,"tiin Msi chuan Emily chu a rawn zawt a. Emily chuan nui chungin,"Ka ṭhiante pahnih in min lo hruai dawn lawm, tah hian kan lo nghak dawn nia. I chhuak khat sia, zanin chu nuam deuhin hun i hmang dawn nia aw,"a lo ti liam mai a. Msi erawh zan lama chhuak ngai lo tih takah a tîm angreng khawp mai;mahse, Emily bawk chuan,"Bawih, tuna i hmel ang kha chuan tu mipa mahin an coach duh lo ang che. Hlim hmel pu teh,i hmelṭhatna kha hmang ṭangkai ve teh,"tih pahin Msi biangah chuan a rawn dawm a. Msi chuan,"Zan dar 10:00pm thleng bak ka hman dawn lo nia aw. Apa in dar 10:00pm thleng bak a phal lo,"a lo ti zui a. Emily chu a nui mai a,"Lungngai suh, ka ṭhianpa fel deuh a awm lawm. Dar 10:00pm hma in a thlah fel vek hman ang che, awi hei a rawn call tawh nih hi kan chhang lawk nge aw,"a ṭhianpa Phone call chu a chhang nghal a;

"Aw Ben, kan nghak reng tawh che nia aw,"

"Aw kan lo kal mek, i ṭhiannu nen chuan mi in nih?,"

"Imm ni e,hmanhmawh ve deuh u la aw,"

"Awle kan lo tlan mek,min lo nghak char char ru aw. Kan lo thleng har lo ang,"

"Awle kan lo awm reng ang,"

"Nih ka dah aw,"

"Awle,"
"Mak e,bialpa i thlak leh tawh mi a? Hmannia i bialpa kha Sangtea maw ka tia,"Msi chuan mak tih hmel deuhin Emily chu a rawn en hâ mai a. Emily chuan,"Nhaaa Bawih,bialpa te chu kawp kual mai mai tur a lawm. Sum ngah ngah hmelṭha an tihkha,bakah Sangtea kha chu hun a nei lo thei lutuk a. Chuan,hei hre reng ang che aw,zaninah Sangtea hming lam ri miah suh ang che,"a ti nghal bawrh bawrh a. Msi chuan,"Kawp lawr chu ṭha lo,a tawpah nangmah bawkin i tuar leh mai ang,"a ti leh hram a. Emily chuan,"Nhaaaa i ninawm a,nang ang ka ni ve lo. Nang te chu 1 ah i bet tawp a,i hnê ve lo mi?,"tih pah chuan a nui har har a. Msi chuan,"Hnê love hmangaihnaah hnê a awm ve thei lo. Ka bialpa hi ka la hnê lo hrim hrim,"a lo ti vat a. Emily chuan,"Mipa duh chi i ni lo,zanin chu inhawng deuhin awm ang che aw,"tih pahin a nui zui leh har har a.


Bena leh a ṭhianpa chu an lo thleng rang khawp mai. Emily te bulah chuan an rawn ding dun ran mai a,"Min lo nghak rei tawh em?,"tih pahin Bena chuan a Bike chu a hung rem nghal a. Emily chuan,"Rei lutuk love,kan kal thei mi?,"tih pah chuan a rawn nui sen sen a. Bena chuan,"Imm kal thei ni mai e,kha kha mi i ṭhiannu chu,"tih pahin Msi chu a rawn melh zauh a. Emily chuan,"Aw ni e,a zakzum deuh a. Bawih,lo kal la hei hi Bena nih hi,chuan hei Maruata,"a ṭhian mipa te 2 chu a hmelhriat tir nghal zung zung a. Maruata chuan,"I ṭhiannu chu a hmelṭha hle mai a,"tih pahin a Helmet chu a rawn hlip a,Msi chu a rawn nuih sun sun a. Msi chu zah avangin a hmai a sen ṭawn ṭawn a,"Chutia mi? Ka lawm e,"a lo ti zawi sap a. Bena chuan,"Kal ila kan tlai lutuk palh ang,"a ti a,a Bike chu a ti nung nghal dut dut a. Maruata chuan Msi chu a phur a,Bena leh Emily chu an in phur bawk a,World Bank Road lam panin an liam thla nghal a.

Msi chuan an kalna lam chu nuam a ti vak lo khawp mai. Mahse,a kal ve tawh laklawh bawk si,a khat tawkin a Sana chu a bih leh zauh zauh ṭhin a. A phurtupa lah chuan a tlan chak pui phian mai bawk si,Msi chuan,"Ṭhianpa,khawngaihin tlan muang deuh teh aw,"a ti ta nge nge a. Maruata chuan nui hawk hawk chungin,"Awle tehreng mai,"tih pahin a khalh muang ve nghal mai a.

"Emi,helai hmun hi engnge ni a?,"Msi chu a hawi deuh hû hû mai a. Emily chuan,"Nhaaa...i ṭhing bik thei e Siby's a nih hi. Maruata bulah khan awm ang che,beer ka han la lawk ang,"tih pahin Msi chu a kalsan nghal daih a. Maruata chuan,"Ms,helamah lo kal la lam ila,"tih pahin Msi chu a rawn nuih suk a. Msi chuan,"Aaa min lo hrethiam la,ka lam ngai lova tah hian ka lo ṭhu rih mai ang,"a ti a,a bula Chair-ah chuan a ṭhu nghal chat a. Maruata chuan a kalsan mai bik lo,"Aaa eng lo tikhan lo awm la,theitui ka rawn lak sak ang che aw,"tiin a kal nghal a. Msi chuan ngawi rengin a hmaa mipa leh hmeichhia ruih hmel tak taka lam ho chu a en reng a.

"Kha le,hei tal hi chu in ve la. Emily khan dar 10:00pm rik hma in thlah haw tur che in min ti a,i haw duh hunah i sawi mai dawn nia,"Maruata chuan Msi chu theitui a rawn pe a. Msi chuan,"Awle ka lawm e,"tih pah chuan Maruata theitui ken lai chu a la a. Maruata chuan Msi chu a vil deuh chawt a ni ber mai,inbe tam lo mah se,an inbiak chhunah chuan an inbe chhe lem lo khawp mai. Maruata chuan ngawi rengin Msi chu a en leh reng zel a,Msi erawh eng emaw ngaihtuah muk tak angin ngawi rengin a ṭhu thung a.

Emily leh Bena erawh nuam ti takin an lam dun vel a. Emily chuan a lem leh khalh khalh ṭhin a,dar 9:00pm hnu lamah phei chuan a kâi tawh khawp mai. Bena pawh Emily aiin a kai tawh zawk a;mahse,a khat tawkin a lem leh zauh zauh ṭhin a. "Bawihte,zanin chu kan Inah rawn riak mai la,"tih pahin Bena chuan Emily biangah chuan a fawp zauh a. Emily chuan nui chungin,"A chi dawn mawn le? Zanina Ina ka haw loh chuan ka mark a chhe lutuk palh ang,"a lo ti nghal vat a. Bena chuan,"Aww kan inru nghal daih mai dawn lawm,ka bula awm reng tawh turin ka duh che a sin,"a ti zui ham ham a. Emily chuan,"A chi loh ang,"tih pah chuan a nui zui har har a.

Dar 9:30pm a hnai ta,Msi chuan a Sana chu a bih chhen tawh mai a. Haw mai a duh tawh si,a ṭhiannu lah a la lamtui si a phî sek tawh mai a. Maruata chuan Msi awmdan chu a lo hrethiam vat a,"Aaaa englo i haw duh tawh mi?,"a lo ti vat a. Msi chuan,"Ummm nia aw haw chu ka duh tawh,tuna ka haw loh chuan ka pa in min hau nasa viau ang,"a lo ti nghal vat a. Maruata chuan,"Nihchuan ka thlah haw mai dawn che mi?,"a lo ti vat a. Msi chuan,"Mahse,Emily hi ka hawsan daih chuan...,"a ti leh lawi si. Maruata chuan,"I ṭhiannu chu ngaihtuah suh,ka ṭhianpa in a venghim thei a lawm,"tih pahin a lo nui suk a. Msi chuan,"Mahse,message kan hnutchhiah tal nge aw,"a ti a,a Phone chu a phawrh nghal a message a type nghal mawlh mawlh a.

Maruata leh Msi chu an inphur haw ta nge nge a. Msi chuan,"Zanin bak chu ka chhungten chhuah an phal tawh lo nia aw,"a ti zawi sap a. Maruata chuan,"A ho lutuk kei pawh chhungte hriat lohvin lawm ka chhuah ve tho,"tih pah chuan a lo nui suk a. Msi chuan,"Keichu an phalna la lo chuan ka chhuak ngam teuh lo mai,"a lo ti leh nghal vat a. Maruata chuan,"Nia ni ve tho mai,"a lo ti zawi sup a.

Zan dar 9:35pm velah Msi te In chu an thleng a,"Ka lawm e aw,"tih pahin Msi chu Maruata Bike aṭang chuan a chhuk nghal a. Maruata chuan nui chungin,"A ho lutuk,engmah nih loh kha muttui aw,"tih pahin a Bike chu a ti nung leh nghal dut dut a. Msi chuan,"Awle nang pawh muttui le,"tih pahin a in her a,an In lam pan chuan a kal phei nghal a. Maruata chuan ngawi rengin a en zui vang vang a,"Hmeichhe ṭha tak chu i nih hi maw le,"a ti zawi sap a.

"Emi,khawnge i ṭhiannu kha?,"Bena chu a meng dul raih tawh mai a. Emily chuan,"An haw daih tawh,min thlah haw ve nghal mai la,"a lo ti nghal vat a. Bena chuan,"Nhaaa chi dawn mi?,"a lo ti leh vat a. Emily chu a tûm deuh bar a,"Min thlah haw dawn lo maw? Nihchuan,min thlah haw tu tur dang ka zawng mai ang,"a ti deuh hmak a. Bena chuan,"Hmm tihtauh lah hi nuam i ti ve bawk sia. Lo kal rawh,ka thlah haw ang che,"tih pahin Emily chu a kai nghal hlawk hlawk a. Emily chuan,"Tikhan min kai hlawk hlawk kher suh,"ṭap ṭuau chung chuan a rawn ti a. Bena thin in a tuar ta lo,"I van ninawm e aw,"tih pahin Emily hmaiah chuan a beng sawk mai a. Chu veleh Emily chu a hma aia nasa in a rawn ṭap a,"Misualpa,i bialnu hi kut min thlak a maw? Enganginnge min ngaih a?,"a ti nghal zuah zuah a. An bul vela awm ho chuan an en ṭhup mai a,"Hmel ho,engnge in en ṭhup a? Hmuhnawm a awm mi?,"Bena chu a rui tawh bawk sia,engmah pawisak a nei tawh lo a ni. Nula leh tlangval ding ṭhup kar aṭang chuan mipa 1 hi a rawn pen chhuak a,"Mipa i inti ve a nihchuan hmeichhia kutthlak tawh suh ang che,"tih pahin Emily chu a rawn kai a,"Ani hi nang ni lovin keiman ka thlah ang?,"a tih zawm leh nghal zat a. Bena chuan,"Hmela,tunge i nih a? Ani hi ka bialnu a nih hi aw,lo inrawlh ve suh,"a rawn ti vin ṭhak a. Chutia an buai takah chuan Security ho pawh an rawn lang nghal vat a,rei lo te hnuah buaina chu chinfel a ni ta bawk a.

Emily leh amah rawn chhantu mipa chu an inphur haw ta a. Emily chuan,"Ṭhianpa,min hria mi a?,"a rawn ti zawi sap a. Chupa chuan,"Aw hria e,in In thleng ka thlah dawn che nia,"a lo ti zawi sup a. Emily chuan,"Maw? Min hria maw? Engtinnge min hriat a?,"a lo ti hâ mai a. Chupa chuan,"Nakinah ka hrilh ang che,ka tlan chak dawn nia min kuah nghet rawh aw,"tih pah chuan a hma aia chakin a tlan a. Emily chuan engmah zawt tawh lovin amah phurtu kawngah chuan a kuah nghal a.

"Emi,Bena hi thlah teh Sangtea pawh i ti khawngaihthlak a lawm,"Msi chuan a rawn ti a. Emily chuan nui har har chungin,"Bena ka thlahin tunge party naah min hruai ang? Tu Bike-ah nge ka chuan ang? I thluak te hi hmang ve teh,"a lo ti nghal bawrh bawrh a. Msi chuan,"Huihamm engtinnge maw ka hrilhfiah dawn che le? Bena te ang mipa hi mipa ṭha an ni lo,a lungawi loh deuh apiangin kut a thlak ziah che a. Sex ni se,a duh hun hunah hmanpui che a tum bawk a,tiang mipa hi chu kalsan ngam tur,"a ti ve nghal mawlh mawlh a. Emily lah chu a la nui zui awr awr a,"Sangtea te chu min duh êm vanga nihpui mai chauh ka ni lawm. Bakah a zei lo e mai,a chut si ka duh chi pawh a ni lo,"a la ti zawk zamah a. Msi chuan,"Ka hrilh tawp ang che,ka ṭhian i ni a i ṭhat lohna turin engmah ka ti ngai lo. Sangtea te ang mipa ṭha leh fel i tawng hi chu vannei inti hle rawh. Bena hi thlah la i nun pawh kha ai khan nuam i ti ang,"a ti leh nghal mawlh mawlh a. Emily chuan,"Nhaaa ninawm ka ngaithla peih tawh lo,thudang sawi ang. Eee enteh kan In bulah sawn mithar an lo awm a,an fapa chhiat loh zia chu maw. Awiiii,Korean a ang bawk sia,ka van duh tak,"a rawn ti leh nghal zuah zuah a. Msi chuan,"Hmmm mipa hrim hrim hi lawm viau ṭhin suh,"a lo ti ve thung a. Emily chuan,"Hmelṭhatna te hi hman thiam ve tur. Nang pawh hmelṭha tawp suh,i hmelṭhatna te kha sumah chantir ta che,"a la ti zui a. Msi chu a thaw halh a,"Ka hrilhfiah peih tawh lo che,i inchhir hunah chuan a sawt tawh dawn silova aw,"a ti zui nuah nuah a.

"EMILY ZONUNPAR,Kawngkhar hi rawn hawng teh,"Emily pa chu a thinrim takzet a ni. Emily room kawngkhar chu a chum dawt dawt mai a,"Rawn hawng rawh ka tih chu,"a ti vin ṭhawt ṭhawt a. Rei fe hnuah Emily chuan a rawn hawng a,"Engnge ni vak vak a? Ka la mutui a sin,"tih pahin a mit a rawn nuai chawt chawt a. "I la mutui a maw? Zahna hi i pawh pha ve hlawl lo em ni?,"Emily hmai chu a ri chawrh mai a,a pai nghal chawn chawn a,"En rawh hei i thlalak hi,i pa hi min ti zak lutuk tih i hria em?,"tih pahin Emily chu a beng leh a. Emily chuan a pa Phone-a asaruak thlalak chu a hmu chiang kher mai,sawi mai tur pawh a hre lo.

"ZONUNPAR,hetiang mai mai tur hian emni i nu leh pa te hian kan chawm seilen che a?,"Emily nu chu a thinrim êm vangin a hmai chu a sen ṭawn ṭawn a. Emily chuan,"Nu,ka tihpalh lutuk,"a rawn ti zawi sap a,"Tuna tihpalh tih khan engnge awnzia awm a? Hetiangte chuan ṭhenawm khawvengte pawh kan hmu ngam dawn em ni?,"a ti leh bawrh bawrh a. Emily chuan,"Tihpalh,"tih bak sawi theih a nei lo,a thlalak Social Media-a lo thehdarhtu chu tudang nilovin Bena a ni.

"Emi,hetiang hmeichhia hi maw i lo nih a?,"Sangtea chu a kun lap a,Emily chu a ngawi reng a Sangtea hmel chu a en ngam mawlh lo a ni. "Mahse,Emi,ka thusawi kha i la hria em? 'Ka kalsan ngai lo ang che'ka tihkha,"a rawn ti leh a. Emily chuan inthlahrung takin,"Imm,"a rawn ti zawi sap a. Sangtea chuan,"Ka hmangaih che a,eng dinhmunah pawh ding la ka kalsan ngai lo ang che. I tan ka awm reng ang,ka hmangaih che Emily,"a ti a,Emily chu a lamah a pawt hnai a,a kuah vawng vawng a. Emily chuan,"Sangte,ti khawp khan ka mualpho tawh a min la hmangaih thei ang maw? Min kalsan zawk mai rawh,i tan chuan ka hniam lutuk,"a rawn ti zuai raih a. Sangtea chuan,"Khatiang vang mai mai khan ka kalsan lo ang che,"a ti thawp sut a,Emily chalah chuan a fawp vawng vawng a.


"Kan fanu awmdan hi chuan min ti zak takzet a ni. Kum 20 pawh a la tling lova,hetiang hi a ti ngam tawh a nia,"Emily pa chu an In chhung dungah chuan a vei kual sek mai a. A nupui chuan,"Kan fanu thil tih ah hian kan thiam loh pawh a tel ve tho a nia. Kan enkawl dan hi a felhlel deuh a tin ni,"a rawn ti a. Pu Kima(Emily pa)chuan,"Eng a? Fa enkawl dan thiam lo viauah min ngai em ni a?,"a rawn ti vin ṭhak a. Pi Muani(Emily nu) chuan,"Chutiang lam ka sawi loh kha,a tir aṭanga kan enkawl dan a dik lo ka ti lawm. Kan fanu mal a ni a,kan duat em em a. A duh apiang kan tihsak a,thil a tihsualin kan hau phallova. Tute emaw in a thil tihsual min hrilh se,kan ṭan tlat lawi a. Tunah chuan kan tih dik loh rah kan seng ta a nih hi,"a ti mawlh mawlh mai a. Pu Kima chuan,"Nia,i sawi takah chuan nih chu a ni khawp mai. Eng pawh nise,amah hi lo haw phawt se ṭha deuhin titi pui ila a ṭha ang. Chubakah,khapa pawh kha hmuh ka duh a ni,ka fanu timualpho tu kha,"a lo ti ve leh a. Pi Muani chuan,"He thilah hi chuan pawr vak ngam pawh kan niin ka hre lo. Kan fanu thiam loh te pawh a awm ve tho a,in ngaihdam tawn hi a ṭha ber lo em ni?,"a lo ti ve thung a. Pu Kima chuan,"Ee mai mai a,keinin ngaidam ringawt ila nakin lawkah hmeichhe dang a timualpho leh mai ang. Dân a awm a,dân hmangin hremna chu a hmu ve ngei tur a ni. Kan fanu thiam loh chu a awm tehmeuh mai;mahse,kha tlangval pawh khan a thil tih rah chu a seng ve a ngai a lawm,"a lo ti ve leh hmiah hmiah mai a.

"Bawih,i thusawi te kha lo awih ni ila tiang hian mualpho takin ka awm lo tur a nia. Sum hi chuan min ti â takzet a nih hi,"Emily chuan Msi kut chu a vuan a,"Nang hi awm lo la chuan,ka chhe vek tawh ngei ang. Ka lawm lutuk aw,ka ṭhian ka hmangaih che,"a ti a,Msi chu a kuah vawng vawng a. Msi chuan,"Ṭhian inkarah lawmthu an sawi ngai lo,tikhan Bena chu thlah la Sangtea vuan tlat tawh ang che,"a lo ti nghal mawlh mawlh a. Emily chuan,"Bawih,ka lawm lutuk aw. Tun aṭang chuan i thusawi ka zawm vek tawh ang,chuan Sangtea pawh ka kawp tawh lo ang a ka lerhsan tawh lo bawk ang,"a ti leh mawlh mawlh a. Msi chuan,"Sawi hi chu a har lo,a taka thlen tir hi a har ṭhin. I thusawi zawng zawng hi i hlen loh vaih chuan maw,ka ṭhian i ni tawh lo ang,"tih pahin Emily hnarah chuan a pawh sak a. Emily chuan,"Yess Emily mithar ka ni tawh a lawm. Lungngai suh,ka ṭhian ṭha ber hi chân che ka duh hleinem,"tih pahin Msi chu a kuah a. Msi chuan,"E taka Bena kha engtinnge an tih tak?,"a rawn ti chhuak hlawl a. Emily chuan,"A chhungte khan ngaihdam min dil nasa tawp a. Mahse,apa rilru a dam thei ngang lova'Kan chhungkua chuan kan ngaidam ang che u. Mahse,Dân hi chuan a ngaidam ve thei lo ang che u,'tiin a chhang a. Bena chu engtin tak nge a chungchang an ngaihtuah dan tur chu ka hre bik lo,"a lo ti nghal vat a.

"Ka fapa hming koh tiin ka lo chhuang ve ṭhin che a. Mahse,tuna i thil tih hian min ti zak khawp mai,eng ang fapa nge maw i nih le?,"Bena pa chuan Bena chu a beng hawi sawk mai a. Bena chu a ding ngawi ngul mai a,"Hetiang thil tenawm ti tur hian i nu leh pa te hian kan chawi lian lo che. Min en rawh,i pa hian ka buaipui dawn lo che tih hria ang che,"a ti a room lamah a kal phei nghal hlawk hlawk a. By: Rs Thangluah
Read more »
Tweet Share Share Share Share Share

July 10, 2020 13

THE STORY OF ZOTEII

Ziaktu: Toni Râlte

Hringnun hi i sual hnem poh leh i chak tawlh tawlh ang, hlawhtling tura hlawhchham ngai zat hi antam lutuk i ti anih chuan, hlawhtling tlak i la ni lo a ni ngei ang
Ka pahrawnin thinrim taka min melh khûina lak atang chuan tlan chhuakin, kan in piaha theihai buk hnuaiah chuan ka thu leh ta vang vang a. Kum 12 chauh ka ni nachungin ka pahrawn chuan min nula cheibawl tlat si a! Sáwn ka nih a hnu hmanah ka pi leh pute hi an thi hma a, ka nu nen ka putea te bulah kan awm a. Kan rethei thin si. Ka nu a hah em em a, mahse, fakna awka a dawng ngai lo. Kei lah ka la chhawr tham teuh si lo. Ka putea fate chu pahnih an ni a. A nau zawk nen kan inrual. Unau kan nih angin han inkawm leh infiam te kan ti lo thei lo va. Mahse, chutiang hunah pawh an nu leh pate min en dan dik hek lo, min nau cheibawl ve ve a, an chhiahhlawh lemah te ka tang thin. Thil thar an neih apiangin an thil hlui ka khawm ve thei zel a, ka la lawm zawk. Tea set man to ve pangngai an neih laiin, mi khaini hmuam ruahna bur ka khawm ve rûih zel. Sa kan hmeh changin sa ti hrang khat ka puar pui thin. Ka nu min lainat hian a eitura a suah sa hi min sih thlak sak ve thin a, mahse, ka nu tak pawh chuan a suak tha ngam ngai lo. Ka putea chu kan khuaa thaibawih bera an sawi a ni tlat a! Huan a nei a, ka nu nen an feh thin. Ka nu chuan leipui a nei bawk a, a thlai thar te chu a hralh ve thin a, mahse, chu pawh, "In hrâwk chawmtu kan nih hi" tiin an chhuhsak leh thin. Ka nu hi a nulat vanglaiin a bialpain a boralsan hlauh a. A lenrei phah ta a ni. Tichuan, tlangval hawklak pakhatin bumin a chetsualpui a. Kei min pai ta a. Ka pa chuan thla nga ka nih laiin nupui a nei a ni. Ka nu chuan rilru na takin min enkawl chho va, ka tet lai tak tak kha chuan ka pi a la dam a. Min duat ve bawk nen, hrehawm ka hre hran lo. Kum 7 ka nih atangin ka pi awm ta lo nen ka nu nen piteii tihduhdahna chu kan tuar chho ta a ni. Kan unaua chaw kan kil ho pawn chawhmeh kan inhmeh tam hleih bik thin. Ka la naupang a. Ka rilru a thianghlim bawk nen, hrehawm tia tah ang kha ka nei ngai lo.

Ka nu chu pathlawi pakhatin a rawn hel ta a. Kan khua ami tho a ni a, a nupui fanaute erawh Aizawlah an chhungte bulah an haw daih. Chu pathlawi chuan Forest deparmentah hna a nei ve a, ka nu chuan kan nufa hrehawmna a ziaawm beiseiin rei an inrim hmain a nei ta mai a. Kei pawh min hruaitel ve ta a ni. Ka pahrawn chuan quarter a luah a. Kum 11na ka hmang ve mek. Min duat thin hle, pa nelawm pui, tawngkam tha duam mai a ni roh a. Kum 56 bawr vel daih a ni tawh ang. Mahse, ram hna thawk vak ngai lo nafam chu a sa a tha a, a hrisel tha phian. Ka nu pawh a hlim ve ta deuh. Inngeih angreng tak chuan kan khawsa ho ta zel a. Ka nu erawh chuan leipui a la nei kal reng a, a thlai thar te erawh ka zuar thin a, sum pawh a kutah a lut ve thei ta. Piteii te inah ka leng ngai tawh lo, "I nu lah hi mipa râwp lutuk, tulpui ve mai tur che hi a nia" tih a ching a. Ka ngaithla peih lo. Thawmhnaw thar pawh ka nei ve ta fó a. School pawh ka kal ve thin. Lehkhathiam ka ni lo va, mahse, ka zir peih. Lehkha zir hi nuam ka ti.

Kum 12 ka tling chho va. Ka nu ka chhun bawk a, ka thang duhin ka tuai nguak mai. Ka vun a lo ngo ve angreng bawk nen, kan khua angah chuan vun ngo kan ngaisang, kan hmu hmel tha deuh tawp mai. Zan khat chu mitthi kan nei a, lumen tur a ni a. Ka nu thian hnai a lo ni nen, ka pa nen chuan an va kal ve a. Ka huai ve hrim a, ka hlau lem lo. Dar 10 a ri hnai tawh tihin ka pa chu amahin a lo hawng a. "I nu chu a la awm rih dawn anih kha" a ti a. Kei pawh ka mu tawh a.

Zoteii ChanchinKa kap za mer mer chuan ka mutui lai min kai harh zawk mai. Ka meng a, a lo thim vek. Ka thu chhuak a, khum mawnga ka pa lo thu reng chu ka hmu ta a. Ka kekawrte chu a lo inhlip vek a, mak ka ti a, hlauh nachang pawh ka hre lo.

"Hawh ka mutpui ang che" a ti supva. Min rawn kuah ta hlu hlu a. Ka muhil ve leh mai. Khata tang khan ka pa chuan ka nu hriat loha min khawih neuh neuh chu a hrat chho ta riau mai a. Ka la á ve bawk nen, ka hlau lawk lo. Mahse, ka nu feh hlanin chhunah kawngka a khar phui vek a. Ka serh chu a khawih ta a. Ka tap tuar tuar mai. Hemi tum hian khawih ringawt a duhtawk a, sual em chu min sual lo. Ka hlau ta ngawih ngawih mai a ni. Ka nu ka hrilh chuan ka nu nen hnawhchhuahah min vau si. Bakah kut min thlak fo a, sakei hlauhin ka hlau a ni ber.


Ka nu feh hlan thoin min sual leh a. A hlawhtling lo naa ka tuar thei ta ngang lo va, ka nu ka hrilh ta tawp. Ka nu chu a thinrim em em a, ka pa nen chuan an inhau hrep. A tlan phah nghhe nghe. Mahse, ka putea te bulah kan rethei si, ka pa lah chuan a rawn vir chhen mai si a. Thu intiamkamin kan haw leh ta a ni. Mahse, ka thla a muang thei tawh chuang lo. Ralti reng rengin hun ka hmang a ni ber. Thian pawh ka kawm ngai tawh lo. Keimaha awma tah keuh keuhte ka ching chho va, a chang chuan zanah te hian ka chhuak daih a, kan in piah theihai buk hnuaiah te ka muhil thin. Kan thenawm te nen hian kan inhnaih vak lo va, kan boruak vel chu an hre ve vak lo.

Ka pa khan ka nu bulah, 'Amah hian a zir em alawm. Tleirawl a ni ve tawh a, ka hmaah saruak deuhthaw ten a awm thin a" tiin chhuanlam a siam a. A tirah ka nu chuan a awih bik lo. Mahse, a rei tial tial a, ka pain a tilawm hneh si, tin, ka chhang tur a pai ta bawk nen. Min ngaihthah tan ka ti mai. Ka nu awm mah se, ka pa lakah chuan ka him zo meuh tawh lo a ni.

Chutia ralti leh nun hrehawm reng renga ka awm lai chuan Aizawl atangin ka pa fa bikte an lo zin nawlh mai. Pathum an ni a, mipa pahnih leh hmeichhe pakhat. An te ber nen kan inrual a,. Ka nu chuan that a lo chhuah ve viau. Kei pawh min hrilh nasa a, a chimawm zawngin ka khawsa lo. Khawpuia awm tih takah an no sur mai a. A tirah chuan kan innel lo hle. Mahse, ni 2 kan chenho hnuah chuan inkawm rual ni na na na chu kan inkawm tlangnel chho va, exam chawlh rawn hmang an ni a, keini kan lo chawl ve bawk nen, luiah te kalin ramhnuaiah kan chetla nasa. Han inkawm takah chuan an fel em em a. An te ber Mama nen phei chuan kan inkawmngeih fâl. An u ber Nunpuia nen erawh kan innel tehchiam lo. Rawlthar a ni tawh a. A inla puitling vel tawp. An awm lai na na na chuan ka pa pawh ka chungah a hlauhawm loh a, kha ringawt pawh kha ka thlahlel a ni ber.

Luia kal turin kan insiam leh a, ka nu chuan fimkhur turin min chah leh mawlh mawlh mai. Nunpuia leh Teteii chuan eitur vel an ak a, mama nen erawh ruak deuhthawin kan kal. Ka thian kawm ve deuh thin te kan sawm belh bawk a. Kan hlim ve khawp mai. Kan khaw lui hnai berah kan kal a, thlen thlak chiah hian li lian ve deuh a awm a. Chutah chuan kan cheng thin. Thlen rual rualin kan cheng leh nghal a. Nunpuia leh kan khua ami Tlana te chuan tuihleuh an thiam, a bak zawng chu innemkhalh chunga kal zut zut vek kan ni. Kan chen nin deuhah a kam vela chakawk leh tumbu te kan veh khawp a, Tlanan mau thei a va sat a. Ram hnuaia chaw ei kha a tui ve hrim. Hrim. Bawk nen. Mei kan chhem, theiah chuan tumbu leh chakawk chu kan bai ta a. Kan thiam tha si lo nen, kan nui nghek nghek mai. Chaw ei hma si chuan tui kan cheng leh phawt a, kei ka kal thuk fâl deuh nge lî chu a bir thut ve lah taka.. Ka pil báwrh mai. Innemkhalh ka tum a. Ka ban pha tawh si lo, ka duh vang ni miah lo vin ka pil ka pil ta mai a. An au tuar tuar hlawm a. Nunpuia hnah sat, hmanhmwwh zeta rawn tlan thla chu ka hmu vuai. Ka pil ta vang vang a, a thim ta vek mai.

Vawilehkhatah ka kang dâwrh a, meng lo mah ila, a eng uar mai. Ka taksa chu an sawi nawk nawk ni maiin ka hria. Ka che thei der si lo. Tu emaw hian ka ka chu a rawn ham vak vak a.. Ka kawchhunga tui ka pai zawng zawng chu vawilehkhatah a rawn sah ta huk mai. Ka beng, hnar leh ka atang chuan tui chu a chhuak lum piat piat a. Ka meng thei ta. A eng lutuk a, ka chhing leh tawp. Ka meng leh diar diar a. Hnai zeta min melhtu Nunpuia chuan ngaihtuah hmel zet hian min lo en a.

"Zote, Zote" a ti a. Mama pawn ka lu te chi a lo chûl a. Min thuttir ta a. Ka va chau tak em.. Ka zawi vek. Chaw chu an ei a. Bar hnih vel bak ka bar thei lo. Ka luak dawn zel. Ka riltam tehlul nen, tui puain ka puar ul mai. Kan haw dawn ta a. Ka han kal dawn thin ka tlu dawn zel. Ka ding nghet zo thlawt lo a ni ber e.

"Khawi ka paw mai ang che. Mam, hei ipte hi ak rawh" tiin Nunpuia chuan a hnung a rawn dawh a.

"Ngai lo. " ka lo ti. Mahse, min nawr tlat, min paw ta a. Ka rit ve awm tho sia, ka va inthlahrung tak.

"Ka kal tawh ang.. "Ka tih ve pawn min thlah duh si lo, a hah ve hle in ka ring. Khaw chhungah erawh min kai ta a. In kan va thleng chu Teteiin ka nu bulah ka tui tlak thu a sawi a, ka nu a chek tlat tlat mai. Thei leh thei lo vin ka inbual a, ka mu daih. Mutthilh ka chak em a ni. Chaw pawh ka ei lo. Mahse, zan dar 8 velah ka harh a, ka riltam lutukin min kai harh a ni ber ang chu. Ka unaute ho chu chhuatah an lo mu thap tawh a. Zawitea kal them themin chaw thing ka va bar ngial a. A zia ta deuh. Ka thleng seng thawmah a lo harh nge ni, Nunpuia chu a lo tho va,.. "Ei teuh rawh" a rawn ti teh ngawt.

"Ka kham tawh a" ka lo ti a. Ka va melh a, "Ka lawm lutuk ania aw.. " ka ti ve a..

"Ka nau i nia. Ka tihtur alawm" a lo ti ve mai a. Ka khumah mu tawh lo vin mama bulah a kilah ka inhnawh ve a. Ka muhil ve leh ta a.

Ka unaute chu an hawn a hnai ta. An hawn hma niin ka nu hovin a leipuiah an hawn tur chawhmeh kan va la a. Ka nu leh Nunpuian chawhmeh eng ilo an vai laiin hmarcha kan lo mal ve a. Nunpuia hi a la upa over miah lo naa a puitling. Ka nu pawn a fak khawp mai. A pasal fate an ni nachungin ka nu pawh an chungah a tha ve khawp chuan ka hria. Ka pa aiin an ngaina mah zawk. Thlamah kan chawl a, thlifim kan inkohsiak a, kan nui dar dar reng mai. A tlai chhiat hmain kan haw leh ta a. Nunpuia hmaah ka kal a, ka nu te hi a chak bawk a, a kal chak thei si, Mama leh Teteii te chuan an um dâwr dâwr a.

"Naktukah kan haw daih dawn sia, in ngaihawm dawn e" Nunpuia chuan a ti a.

"Nangni feee" ka lo ti ve mai a

"Apa phone atangin kan lo be thin ang che.. Nang pawh anu number i hriat kha.. Min lo be ve thin la" a ti a.

"Umm.. Mahse, apa sawn khawih a phal vak lo va" ka ti niah niah a.

"Aizawlah lo awm ve daih la, anu ka lo dil ang aw" a ti leh daih a. Ka châk angreng. Mahse, thanthi pawh ka la nei lo va, ka la nau deuh. Bakah ka nu pasal nupui hluite bula awm ve ngawt chu a zia lo. Khatihlai khan chutiang si se chu kan ngaihtuah lo. Kan rilru kha a thianghlim ve bawk a. In kan thleng a, tuikhurah inbual turin kan kal lehnghal. Nunpuia chuan a naute chu a bual a, a nâwt tâwk tâwk mai.

"Zote, nang pawh lo inhlip rawh. Ka bual ve ang che" a ti a…

Kekawrte nen ka awm a. Min bual ve a. Ka hnute a la um chiah lo naa a bál ve tan a. A ruh tulh mai.

Zanah ka nuin chow min lo leisak a, kan unau bakah kan thian thenkhatte sawmin kan kang ve a. Ka pa pawh a fel thluam thluam viau. Chhuatah kan unauin kan mu tlar leh thám a. Nunpuia leh Teteii inkarah ka mu a. Ka harh apiangin Nunpuia chuan min lo kuah ziah. A kut chu la dahsawn thin a. Mahse, ka mutthilh hlanin min lo kuah zel. Inkhan te inkuah chial te hi ka thiam ve lo va. Mahse, Nunpuia min kuahna chu hrehawm ka ti em em lo.

A tukah chuan kan inthlah liam ta a. Kan in chu a zau sawt, a ngui vek ni maiin ka hria. A hma ang bawkin ka pa lak atanga inven leh a ngai dawn chu ania. Ka va peih tawh lo tak. Thla khat chhung vel chu a reh a. Kei pawn thanthi ka nei ta. A hma aiin ka vun a lo mam a. Ka tituai chho ta viau. Ka lian ur bawk nen. Mahse, inngaihzawnna lam ka la ngaihtuah lo hrim hrim.

Kum tawp a lo hnai a. Christmasah kawr thar mawi tak ka nei a. Teteii nuin Teteii kawr hlui a rawn thawn bawk. A mak ve ngawt mai. Nu tha tak a ni aniang, kan inpawh em em tlat. A pasal fahrawn ni mah ila min enhrang hran lo anih hmel. Ka pa mood that laiin a phone chuan Nunpuia te chu ka be ve thin. An ni lahin min lo be chamchi bawk. Vawi khat phei chu ka pa in a khak nghe nghe. "Mi dang pawh kan be ve hman hleinem. In lo be zing leh lutuk," tiin. Khata tang khan tlemin an reh ta deuh a. Christmas rawn hman an chakzia pawh ka hria, ka thu lo ve bawk si.. Thiante nen mas pawh chu kan hmang ve a. Zaikhawm kan phur tlang a. A nuam ve reng ka pa pawh a hlauhawm rih loh.

Kum a lo thar a. Kei pawh thingtlangah na na na chuan tleirawl ang ka lo ni ta a. High school ka rap chho ve ta bawk nen. Ka nu pawn naute a nei ta a. Hmeichhia bawk a nei a. Ka duat khawp mai. Puak theih anih atangin ka nu ai mahin ka paw tam zawk. A hmel tha hi ka ti a, ka en ning thei thlawt lo. Ka pa erawh chuan mitmeng hur zet zeta min melh a la bansan lo va. Bansan ahnèkin a zual zawk. Nunpuia te unau an reh daih. Ka call pawn kha number kha a nuin a hmang tawh lo nge a tlang thei tawh lo. Ka ngaiin ka khua a har thin khawp mai. Mahse, kan naute Lawmsangkimi chuan tlemin min hnem ta deuh.

Zan khat chu zantir lamah Kimi chu a tap deuh reng a, na a nei anih ka ring. Ka nu in a pang vel a han dap chu a lo sa deuh va, tlang hrileng a kai ve pawh a ni maithei. Ka pa te nen thenawmte motorin PHC-ah an tlan chho a. Dar 9 velah ka pa chu amaha lo hawin naute an admit thu leh ka nuin a riahpui tur thu a sawi a. Fimkhur ka ngai tih ka inhre nghal.

Rizaiin ka intuam hlun a, ka inluhkhup a ni mah ang chu. Dar 12 bawr velah a rawn keu ta dûk dûk a. Ka la harh kar bawk a, ka hre vek.

"Pa, eng nge" tiin ka thu chhuak nghal a. Amah zawk chu a phu zawk.

Ka khumah rawn thuin, "Thawmhnaw thar nalh deuh deuhte i duh chuan, i nu ai hi awh la… i nuamsa a ni mai" a ti a. Zu rim a nam bawk.

"Ka duh lo.. Pa.. Ka au vak ang" ka ti a.

Ka inrin hmain ka ka a rawn hup a, min bawhbet ta. Ka tal nasa, amah a palian si ka hneh ngang lo a ni ber e. A kut chu ka sehsak a, a rum kâwk. Min thlah laiin ka au nghek a. Mahse, ka bek dinglam a rawn hnek dawp. Ka thal nghal der. A natzia chu aw… ka kut a phuar a. A duh tawkin min suasam ta anih chu! Au pawh ka au duh tingtang lo. Ka chhe vek tawh. Ka serh chu blade a zai ang maiin a na a. Min kalsan hnu pawn chet nachang ka hre lo. Mittui tla zawih zawihin ka mu ta reng mai.

A tuk zingah Damdawiinah ka tlan chho va. Ka nute pawh an lo tho tawh a. Ka hmel a hmu chu mak a tih hmel hle.

"Nu, kan inah khuan ka awm duh tawh lo. Ka pain min sual asin" tiin ka tap nghal. Ka nute khum bulah naupang pakhat a awm ve a, a nu inthiar hlan anih vangin puitling dang an awm ve lo.

"A mak em em e. I pa sawi ang khan nangmah hian i zir aniang e. Ka awih seng tawh lo" tia ka nu tawngkam chuan min vit sawk mai. Ka melh tlawk tlawk a. Ka tap miah lo. Mahse, min hringtu ka nu ngeiin ka pahrawn laka ka thianghlimna ka hloh pawiti miah lo anga keimah zawk thiam loh min chantir chu rapthlak ka ti takzet a ni. Engmah sawi leh tawh lo vin ka chhuak ta a. Ka vai ruai mai. Mittui karah kawng chu ka hmu phe ruai a. Ka pai chawn chawn mai. Thih mai te kha ka duh hman rum rum a ni. Mahse, ka ngam bik si lo.

In ka thlen chuan ka pa pawh a lo tho tawh a. Tukthuan ka rèl nghal. Ka be lo va. Min biakna pawh ka chhang hek lo. Khata tang khan hmeichhe tawngmawh, luhlul, sual tia sawi ka ni ta a. Tuman ka chhungril nun an hrethiam ve lo. Min hringtunu pawhin a awih loh chuan tuman ka thusawi an awih ka ring hek lo. Ka nute an lo chhuak a, ka be lo. Naute pawh ka pawmin ka lawm tawh ngai hek lo. Saw naute thisenah sawn mi hurpa thisen a tel ve si a. Zan reiah chhuakin theihai buk hnuai ka pan leh tan a. Ka nu awm loh kar hlekin ka taksa chu ka pahrawn chuan a suasam thin. Ka dang peih tawh lo. A sâwt chuang lo. Damdawi min eitir thin. Rai lohna a nih ka ring. Ka nu pawh hian a hriatpui hial ka ring. Ka beidawng a ni.. Beiseina chaurua tak erawh ka la nei ve det det, lehkha ka zir zel anga. Ka inzir puitlina hna ka neih hunah keimahin ka awm hrang ang tih hi.

Nautein duat a hlawh telh telh a, ka tlatlum lo tial tial bawk. Zan khat ruah a sur chiam a, kan mu thap tawh. Ka nu awm ve reng laiin ka pa chuan min rawn beisei ngam anih chu! Rapthlak hi ka va ti em..

Mahse, ka tang ve ta tlat a, kan inelh ngat ngat laiin ka nu a rawn tho ta a.

"Siami, hei en la, min sawm nasat zia hi.. I muhil tawh tih a hria a. Min rawn kaitho ngam nia mawle" ka pahrawn chuan a ti! Ka ngawi hmak.

Ka nu hmela min huatna lang chu ka hmu thei ta. Engkim a hmaah pholan a ni tawh chungin thudik hmu lo vin dâwt lamah a tang ta chu a nia.

"Ka fanu ni tlak pawh i nih nek loh hi.. " a tih ri chu ka bengah ring tak a ni.

Tichuan, an mut tawh hnuin ruahsur hnuaiah chuan, thawm dim takin kan in chu ka chhuahsan ta a ni. Ka vahvaihna bultanna chu…

Aizawl road lamah ka kal tawp. Ka thawmhnaw tlemte chu rambo polythenne-in ka tuam a. Ka inpawm bawr hle. Ruahin min nan hun hnèp tawh. A thim bawk si. Ramhuai leh thlahrang ka hlau lo, ka pa anga mi hur tawn leh erawh ka hlau a ni. Motor veivak an awm mang lo lehnghal. Kan khaw pelh a, chawlhbuk angreng an sakah chuan ka tlan lut a. Ruah ban hun ka nghak ta ngat ngat. Motor pahnih chu an lo tlan. Mahse, thlahrang angah min ngai nge ka phar lawm lawm pawn an tlan chak zual sauh mai. Beidawng takin khua ka nghak var ta ringawt a. Vawt ka ti si, ka tlaivar a nih ber chu.

A tukah erawh khua a tha ta a.. A thiang nuam ta hle. Truck a lo tlan a. Ka lo phar vat. A ding ve ta hram e. Driver leh handyman chauh an ni bawk a. Min chuantir ve ta mial e. Zawhna an ngah viau lehnghal. Mahse, dawt ka sawi fai vek. Engtin nge ka chhan chiah pawh kha ka hre ta lo. Ka hming erawh Mary ka inti tain ka hria. Kalkawngah an chawl zeuh zeuh a, zu pawh an in. Min khawih an tum ang em tihah ka lo buai. Mahse, mak deuhin min khawih lo. Ka lawm hle a ni. Aizawl kan thleng a. Ka pawisa khawl ve chhun cheng 1500 chiah ka ak a. Chuan man pek ka tum in an la duh tlat lo. Ka va lawm si em..

Aizawl ka kal vawikhatna a ni a. Eng nge ka tih ang tih ka hre mai lo. Ka riltam em vangin thingpui dawrah ka chawl ta phawt a. Thil ei chung chuan tihtur ka ngaihtuah a. Kawng a va ping em.. Awmna tur ka hre bawk si lo.

"Ka pi, in dawrah hian inhlawhna min siamsak ve thei ang em le? " ka ti ta tawp! Thau ve deuh hi a nia. Nu sual tak chu a nih hmel loh. Min melh vang vang a. Ka hming leh khua ka chanchin tlangpui min zzawt a.


"Hlawh chu a tam thei lo vang. A chhan chu i hrawk kan chawm tel dawn sia. In hnuaiah khuan kan riak nghal a. I duh leh i thawk ve dawn nia" a ti ta a. Va pawm nawk nawk ka chak kher mai. Tichuan, chumini atang chuan hna thar chu ka thawk ve ta a. Ka pi chu ka pu nen chauha cheng an lo nia. Mahse, mipa pakhat a chhawr tel ve. Kan inkawmngeih phian. Kan inah khan eirawngbawl leh sekrek ka khawih nasa bawk a. Ka bil hran lo. Ka viak a lo tha bawk nen, ka pi pawh chu a lungawi hmel viauin ka hria. Tihian ka intuak tang tang anga. Mahniin ka la awm hrang ang ka ti ve a ni.

Ka thianpa chu Sawma a ni a. Anuteii te bula awm ve tho, mi chuang ve tho a lo ni. Thla hnih kan thawh dun hnuah ka chanchin diktak ka hrilh a, min khawngaih ve hlein ka hria. Amah hi tlema tuai lek lek a ni a. Mahse, mi fel leh thilphal tak a ni. Ka pi pawh a awl phah ve bawk nen, kan chungah lungawi lohna a nei vak ngai lo. Kan inpawh tlang hle. Ka pu erawh inah a awm tam lo. Mistiri a ni a, a inhlawh deuh reng mai a ni. A changin Sawma chu a lo riak ve thin. Anuteii pasalin kut a thlak thin thute, anuteii faten an hmuhsit theihzia te a sawi ve suam suam zel a. Ka lo lainat ve lehchhawng thin. Anu hian a piantirhin a lo thihsan tawh a lo nia. Apa pawh a hre bik hauh lo.

Aizawla ka awm tak hnu hian Nunpuia te unau hmuh mai inbeiseiin ka hawi nasa thin. Kan dawr hi a tet bakah a changkang ve lem lo va, mi satliah leh tawp hnawk te te bak an lo chawl ngai meuh lo. Nunpuia te khan min hmu thut se mak an va ti dawn em.. Ka nute. Chanchin hriat ngaihna a awm lo va. Kan khaw mi ho ka hmuh chang pawn ka pumpelh hram hram thin. Ka taksa thanlai a ni bawk a, Aizawl boruak chu ka ngeih sâwt hle. Tin, ei tha kan lo ei tam ve bawk nen. Kan customer te fiam pawh ka hlawh chho hle. Ka hîp ve bawk nen. Keimah vanga rawn chawl hi an awm ve reng. Ka pi min hrilh angin zaidawh takin ka lo chhawnchhaih ve thin a, tumah lungawi lo va an chhuah ka hre ngai lo.

Kum a tawp lo hnai tan a. Christmas pawh Sawma te nen kan hmang ho va. A nuam ve viau mai. Kum a thar a, ka tan kum anchhia a ni chho leh ta. Kum 14 ka tling chiah! Ka kum zat ka sawi hian tuman an awih ngai lo. Ka lian tawh lutuk tlat. Bakah ka taksa chu a inphut chho va. Ka khal reuh si.. Min ngaizawng der vetu pawh ka hmu ve reng. Mahse, pasal neih ka tum lo. Ka virgin tawh lo tlat alawm..

Ka pu nau tlangval hi February thla Atangin a rawn awm ve a, ka pite hian fa an nei lo hrim hrim. A rai thei lo a ni maithei. Chu pa lo awm ve chu Zuala a ni a. U angin ka en ve mai. A thatchhe hle a, a rui deuh reng bawk. Eng em em a thawk ngai lo. Dawr bungrua eng emaw hi a va lam ve zawk a. Chu zanwg chu. Mahse, ka pi chuan a duat phian. A pasal hi a hlau thiam ve bawk nen. U Zuala chuan min fiam ta zeuh zeuh a. Ka pahrawn nen an mizia a inan deuh vangin ka fimkhur angreng. A bul hnaiah ka awm tam duh ngai lo. Mahse, inven sen a ni lo aniang e

.. Ka pi te nupain kan veng thenawma mitthi an ral hlanin min sual ta a. Ka tang nasa viau. Ka lo huaisen ve ta deuh bawk nen, ka hmanraw hmuh hmasak ber chhemthei rit nelh nawlh hian a bekah ka hlap ta a. A lu chu a pawp nge a rawn thi ta zur zur mai. Ka pi te an lo hawng ve chiah bawk.

U Zuala chuan, "Ka mutthilh laiin mipa a hruai lut a. An mu dun lai ka phawk ta si, mipa erawh a tlanchhe nghal daih. A tihngaihna hre lo vin min hlap ta a nih hi" tiin dawt ngialngan tak a sawi ta a. Kei erawh ka kha a chih vek.

Ka pi chuan min beng pawp. Ka pu erawh a ngawi reng.

"Hetiang hmeichhe lepchiah leh hurherh hi ka mamawh hleinem. I chhungte lak atanga i tlanbo chhan pawh hetiang mi i nih vang a ni ngei ang. Zanin la la hian chhuak nghal rawh" a ti ta a. Vawikhat tal ka thusawi ngaithla tura ka ngenna chuan awmzia a nei lo. Mittui tla chungin ka thawmhnaw ka pack ta a. Ka pawisa khawl ve, cheng 4000 nen chuan ka chhuahsan leh ta. Lalpa, heti reng reng tur chuan ti nge maw min lo piantir ve le..

Phone ka lei ve hman hlauh a, Sawma ka call nghal. Tap chungin ka chamchin ka sawi a. Tihngaihna a hre bik si lo. An inah min hruai lut ngam dawn teuh si lo. Mahse, ka tana vantirhkoh ni turin in atangin a rawn chhuak a, khawlaiah kan vakvai dun ta. A tawpah office pakhat verandaah kan riak ta a. Chutah chuan Sawma chuan a ngaihtuahna a sawi ta a

"Ka hna saw ka bansan anga, in atangin ka chhuak bawk ang. In inluah tawm ila, eizawnna dang dap ang hmiang" a ti ta a.

"Eng eizawnna nge kan dap ang" ka ti a.

"Zote, mak i ti viau ang. Mahse, khawngaihtakin min huat phah lo la, min hmuhsit phah suh aw. Ka patea sawn vawitam min pawngsual ve tawh tho asin. Ka tette atang khan a ni a. Chuvangin tun thlengin hmeichhia ka ngaihsak thei lo. Ka chhiat phah ta vek a ni. Nang lah i pa in a pawngsual ve tawh tho bawk. Che a, suangtuahna kan nei ve ve, mi te anga hausa tak leh nuamsa taka awm ve kan duh sia. Chuvang chuan bultanna tur sum tam tham kan mamawh a ni.. " a ti ta a. Mipain a mipatpui a pawngsual chu ka la hriat ngai loh thil anih vangin mak ka ti ngawih ngawih. Mi râp hial.

"Chuan eng tin nge eizawnnna chu" ka la ti hram. Ka la hrethiam. Chuang lo a ni.

"Kan inzuar ang. Kan taksa hi kan zuar ang.. Chuan sum kan thawhchhuah tam hunah mizoram kan chhuahsan daih anga. Phai velah kan awm daih dawn nia" a ti ta mai a! Ka káng awk mai. A fiamthu der si lo. Ka ngawi char char. Ka inngaihtuah nasa khawp mai.

Mahse, ka virgin tawh lo va, neih engmah ka nei tawh hek lo. Chenna tur takngial pawh. Sawma rawtna chu rapthlak ti hle mah ila, kawng dang ka hre si lo. Mi te angin ka zirsang ve si lo va, dawr changkanga thawk turin ka thiamna a beitham si… ni e, kawng bumboh leh rapthlak tak zawh tur chuan thutlukna chu ka siam fel ta a ni.

A tukah Sawma chuan a pawisa khawlsa nen in a rawn chhuahsan ve a. Cheng 11000 kan nei ve ta phawt. Veng tlabirh lamah in luah tur a tlawm thei ang ber kan dap ta a. Kan hmu ve mial. Cheng 500 man chauh. A tè hle a, a mawng hle bawk. Mahse, pawi kan ti lo. Kan pawisa neihchhunin bungbel kan lei ve a, puanthuah vel erawh Sawma'n tlem a zawng a rawn ru chhuak thei hlauh a. Kan mamawh ngawih ngawih bak kan lei lo. Engtin nge kan inzawrh dawn tih pwh ka hre thiam lo. Zanriah chu hotel pakhatah kan ei a. Kan ei zawhah phone a hmang a. Kan chhuak ta ani. Taxi chhungah ka thu ta ran a. Reivak loah min dawrtu chu a rawn thleng ta. Patling a ni a. A lian lem lo. Ka ten ngawih ngawih. Mahse, ka tih a ngai si. Hotel pakhatah min luhpui a. Ka sumdawnna hmasa ber chu kan tlingtla ta. Nuam tihna ka nei hran lo. Sum ka hmuh chuan lungawi chawp ka zir mai a ngai a ni. Sawma pawh mipa a ni nachungin dawr tu a haihchham miah lo. Mak ka ti. An ngam sang em em lehnghal. Mizote hi kan lo va tenawm tawh tak em..

Thla hnih chhung zet khat dana dawrtu han neih takah chuan sum kan khawl ta tân mai. Bankah ac kan nei si lo va, kan theihtawpin kan dah fimkhur ve a ni. Min dawrtu te chu a tlangpuiin patling an ni a. Tuman ka chanchin minnzawt ngai lo bawk a. Kei pawn ka ngaihven bik lo. Kan inhrithla mawp mawp a ni ber e. Zep nák emaw nuam tihna ka nei chho tan a. Sex nawmna chuan min fan zing ta bawk nen, hrehawm ka ti ngai ta meuh lo. Ka nu khan hria se min that duh mai in ka ring. Ka thingpui dawr inhlawhna kha kan ban atang khan a tlachhe zui a, ka pi pawh a nuamsa ta vak lo. An phutawk an hmuah ka ngai.

Kan in luahna te nen kan inlenpawh hran lo va. Sawma nen chuan unau angin kan insawi mai a. Zanah hnathawk angin kan insawi bawk. Ks ho anga khawlaia tal kan ninve lo bawk a, tu khawkhain min hre mang lo.

Nunpuia te unau ka hrechhuak leh fo thin a. Tunah chuan hmu chak mah ila, min haw tawh ang ka ring. Ka nun dan tenawm tak a vang hian. Zu ni se ka tem ve ta fo bawk. Ka kum ngaihtuaha ka chet khawbawzia ka ngaihtuah chuan ka inten hluah hluah thin. Hun a kal ve zung zung a. Thian pawh nei lem lo vin kan hna kan thawk ve mawlh mawlh mai. Kan inkhawl hnem ve ta viau e.

Nikhat ka bazar kal chu kan khawmi leh sa Pa Khuma te nupa ka hmu hlawl mai. Tlanchhiat hman ni tawh hek lo le.. Kan inchibai a.

"I nuin a sawi reng thin che a.. I pa swn zu a in nasa ta deuh a, i nu chu a khawngaihthlak viau mai. Rawn hawn hnai i tum lo em ni? " an ti a.

"Tum lo deuh, ka hna hi a laklawh deuh a. Lawk aw.. Pakhum, hei hi ka nu chu min lo peksak ta che u. A remchang em mai. Ka tha a ka dam tih min lo hrilhsak bawk ula" tiin ka pawisa ahchhuahsa cheng 2000 chu ka pe a.

"I nu sawi ang khan khawpuia hnathawh chu a hlawk deuh dawn anih hi.. Nang pawh i thau mum káng mai" min ti.

Ka nu chuan khawpuia hnathawk tur angin min lo sawi a ni ngei ang. Ka tetlai chhung zawnga min enkawla min hmangaihtu anih ka la hai lo va, ka lainat em em bawk. Ka pahrawn a hmangaihna leh a hlauhna vang khan min puhchhe ve mai a nih pawh ka ring. Chuvang chuan ka nu chu ka la ensan thei bik lo. ka nu a ni tlat si a. Chumini atang chuan ka pawisa hmuh atangin Rs. 300 emaw 200 emaw te ka dah hrang hlek hlek a, thla tawpah ka thawn thin. Dâkah

Sawma pawh ka hrilh tho va, a pawm thiam hle. He pa hi mawngkawhur mah nise, khawvel mihring ka hriatah a rilru a la tha ber awm e. Ka unau ang tak takin ka en a ni.

November thla kan chuangkai ta a. Kan pawisa khawl sa pawh Dâkah kan dah tha ve ta zel a. A him bawk a. Thla a muang. Kan hnathawh vang hian ei leh in tihthat a ngai a. Eiturah kan insèng ber. Mahse, a tul si a. Tin, natna tha lo lakah kan fimkhur ve bawk. Thisen pawh kan test ve ve tawh a. Kan la him rih. Sawma nen in chhung mamawh lam turin kan chhuak a, Kawngkama an zawrhte chu kan zawt a. Chutia kan in dawr buai lai tak chuan, "Zote" a rawn ti a. Ka lehhawi vat.

A bikeah a thu a, a helmet a phelh chu ka ding ngil zawt. Nunpui a ni reng mai. Hman ai khan a lo lang upa ve ta deuh a. Tlangval tak tak te pawh a ang. Ka la hai awzawng lo mai. He khawpuia ka zawn ruk reizia ka ngaihtuah a, mahse, kan inhmu chu ka lawmna leh lawmlohna a inbuktawk vel ang. A rawn chhuk a, kan inchibai ta a.

"Ka va zawng rei ve che ve" a ti thawp sat a.

"Mama te an dam em? " ka lo ti daih thung.

"Hawh, sawlai restaurant-ah sawn chawl lawk ang" a ti a. Sawma chu ka thil awmzia ka hrilh a, "Ka lo lei mai ang.. " a lo ti leh thliam.

"I bialpa mi? " Dawra kan thut hnu chuan a ti a.

Ka nui hawk. "Teuh lo mai. Ka unau anga ka en anih kha" ka ti a. A nui ve sak.

"Shillongah kan pem ta daih a, ka putea hna vangin. Ka nuin a phone a tibo sia, biak pawh ngaihna che ka hre ta si lo. Mahse, nikum kum tawp lam khan in khuaah ka va zin a. I lo awm si lo. I nuin a rukin i tlanbo thu min hrilh ta a.. Aizawlah i awm ringin ka zawng char char che. Mahse, Shillongah lehkha ka zir si a, ka awm rei thei si lo. Tichuan, kuminah Aizawlah ka nu ho in kan lo let leh a, nitin ka zawng ziah che. Tunah ka hmu ta chauh che a nih hi" a ti dap dap a.

"Ti nge min zawn kher? " ka lo ti.

"Ka hre bik lo.. I pawimawh aniang" a ti a.

"Mama te chu an dam maw? "

"Umm ani pawh a intitlangval ve tawh lutuk. Tetei erawh putea te bulah a awm rih a"

Ka ngawi daih. Sawi tur ka hre si lo.

"Anih eng nge i tih ber? " a ti ta a. Ka chhang thei lawk lo.

"Ih.. I hriat chuan min hua ang" ka ti tawp.

"Ka hre daih tawh lawm. I ka atang ngeia hriat ka duh vang ania" a ti ta a. Ka thil ei lai ka chawl hmak.

"I hria maw.. Engtin? " ka ti chul a.

"In taxi hman thin kha ka thianpa patea a nia, i thlalak kha a kawl a. Kan thian dunin min hmuh alawm" a ti ta a. Ka kun tawp. Ka zak ngawih ngawih.

"Mahse, Zote, ka dem lo che. I dinhmun a khirh em a ni. Chuvang ania ka zawn nasat che. Tunah chuan kan bulah awm tawh rawh aw. " a ti a. Ka hnuk a ulh.

"Sawma nen kan cheng dun alawm.. "

"Ka sawipui mai ang. A hrethiam tho ang. Zote, i la naupang a, nun thar neih i mamawh. Pasal te i la nei ve duh dawn asin.. Ka nau i nih angin ka hrikh che nih chu"

"In unau ka ni ve hleinem. I nu pawn min hua ang"

"A teuh lo mai. Amah zawk zawkin zawng turin min ti thin alawm.. A khawngaih ve lutuk che.. "

"Tunah chuan engmah ka la sawi thei lo. Sawma nen ram danga awm daih kan tum a. Ka phatsan thei lo alawm" ka ti a.

"I phatsan dawn hleinem.. Ani pawh kan ngaihtuah dawn tho alawm.. "

Kan inhnial char char. Mahse, kan thinrim lem lo. Kan ei zawhah kan chhuak a, kan ina kal ve a duh tlat si. A bike chuan kan in lam kan pan ta a. Ka u chu ka zah ngawih ngawih.

Sawma a lo haw lo va. Kan in tetakteah chuan kan inzui lut ve ta rawih a. A hawi nasa mai.

"Naktukah lo phei la.. Ka rawn lam leh che anga" a ti a.

.. "Aih, tak takin ka bansan thei lo. Ka sawi awmzia chu Sawma ka phatsan thei lo" ka ti ta tawl mai.

Sawma a rawn haw ve a, "Awwii thil hrilh tur che ka nei,. " a rawn ti hlut. Nunpuia a hmuh chuan a ding chawt. Nunpuia chu a ding a, "Zoteii u ka nia.. Sawma, biak che ka duh bawk a" a ti a.

Min zawn nasatzia leh an ina cheng ve tur leh zirna pawh chhunzawm tura min duh thu te chu a sawi ta zung zung a.

Sawma chuan, "Kha chu ama thu thu a ni. Thil hrilh tur che ka nei ka tih kha ka thianpa ka sumdawnpui thin hian phaiah hna thawh tur a awm thu leh zu thawh a tum thu a sawi a. Chuan, min sawm ve nghal a. Kan eizawnna ang hi a ni lo va. Parlour ah a nia. Training erawh kan nei dawn thung. Chu chu ania.. I lo kal ve duh pawn i thawh tur chu a awm mai ka ring a. Mahse, hei i u in a rawn zawng ta si che a. I thu thu aw. Min vengthawng suh. Ka vengthawng zawk che" a ti ta a.

"Awii ka van lawmpui che " ka lo ti hlut. Nunpuia pawh chaun, "A remchang lehzel anih chu. Nang phaiah hna i thawk anga, Zoteii kan bulah.. A tha mai alawm tiraw? " a lo ti ve a.

Chumi zan la la chuan naupanga thuchang thutlukna kan siam ta a. Kei pawn nunphung panngai zawh ka chak ve tawh tho bakah Nunpuia hi ka hnial fithla ngam miah lo. Ka zah ru tlat a ni. Kan sum khawlsa erawh Sawm'n insem a rawt a. A lo thahnem ve tawh bawk nen, kei paw pek tawp chu ka ui.

A tukah pawisa kan va la chhuak a, Sawma chu hmabak ko tak la nei anih vangin hmun thuma thena hmun hnih ka pe ta a. A lawm ngang mai. A mittui a tla hial, "Mate, harsatna i neih phawt chuan ka tlanchhe lo vang. I tan ka awm reng ang" a ti a ni. Ka ringtawk bawk.

A tawi zawngin sawi ila, Nunpuia te in lamah chuan ka insawn phei ta a. Sawma pawh a thianpa nen sumoin Gauhati. An pan ta phawt. Chuta tangin rail in an kal leh dawn a ni. Ka ngai ngawt ang le… buaina a tawh loh hram ka beisei. Ka in thar chu a nuamin a thianghlim a, a zau viau bawk. Nunpuia nu chu ka nu aiin a upa hlek chauh ang. Nu hmel tak leh zaidam hmel tak a ni a. Min lo lawm thiam khawp mai. Ka pahrawn nen an inthen khan Nunpuia pu hi a la dam a, ani chu party lama inhmang ve deuh, a thu pawh tlang tak mai a ni ve a. Nunpuia nu chu lehkhathiam a lo ni bawk nen, hna a hmuhsak thei nghal a. An vannei khawp mai. Tin, tuna an awmna hi Nunpuia nu hmingin a dah bawk. In luah man atang ringawt pawn sum a lut hnem khawp ang. Nunpuia putea erawh shilongah hna a la thawk a. An inpui ber chu Nunpuia nuteii te nupain an luah mek thung.

Mama nen kan han inhmu chu kan inkuah chung chung a, kei aiin a lo lian zuah tawh. Teteii pawh ka hmu chak khawp mai. Nunpuia room bul chiahah ka room chu a awm a. Mahni puala room hrang ka han nei ve ta chu ka mumang a ang ka ti. Ka vanduaina kha a zozai tawh lutuk a, vanneihnain min um ve tan a nih ka ring. Ka pawisa khawl ve sa kha Dâkah khan ka la dah ve a. Ka thawhchhuah dan a tuihnai loh vangin hman pawh ka inthlahrung thin. Ka nu ti tawh mai ang, Nunpuia nu chu a ni.. Hetiang hmeichhe fel hi engtin nge ka pahrawn khan a then phal le.. Mahse, tun hnua ka hriat danin ka pahrawn khan ngaihzawng a lo neihsan thin a niawm e. Kan khuaa an rawn awm hnu khan a zia ta deuh a. Mahse, kan khaw thenawma nuthlawi pakhat nen an mu dun lai a phawk ta si a. Tikhan an inthen phah ta a ni. Ka pahrawn kha Nunpuia pi leh pute phal lo chung ka nu hian a neih vangin rei tak an biak duh loh phah nghe nghe a ni. Ni e, khatiang misual kha tu in nge hmangaih reng thei ang? Ka chunga a chetdan tenawm tak kha an hre ve ang em? Ka sawi duh bik lo va. An pa a nia, nawm lohna a awm thei tih ka hria.

Kum a laklawh tawh vangin zirna chu ka tan ta lo. Bakah ka tum vak tawh lo, puanthui lam te zir ve mai mai ka duh zawk. Ka nute thu thu a ni mai e.

Ka awm rei tial tial a, an chhungkaw inpawhzia leh inhmangaihzia ka hrechiang telj telh. Nuam pawh ka ti. Ka nu erawh ka la theihnghilh bik lo va, pawisa ka la thawn ve reng. A hlawma thawn vak kha a hman thiam loh ka hlau a, a tahtawlin ka thawn thin. Kum tawpah Teteii a lo haw ta bawk a. Kan au chul mai. Kei aiin a lo la te reng a, mahse, a hmel tha zawk. Kan unauho in kan inkawm mai a. An leng chhuak ngai lo. Zanah Mama roomah kan in card den thin a, kan hlim ve em em thin.

"Zote, taka ka thianpain a star che nia aw.. Kha ih.. Ruata kha i hria em? " Mama chuan a ti a.

"A ho e a" ka lo ti hmuk.

"Ehh.. I duh ve chiang, ka sawi dawn nia aw.. Nihpui ve la"

. "i zak lo, ka duh bawk lo' ka lo ti vat. An nui vak vak a. Nunpuia erawh a nui naa min melh danah a nuih a za miah lo tih ka hre thei. Ka rinhlelhna hi a rei tawh. Unau anga min en lo nia ka hriatna hi a rei tawh. Min ngaihsak bik ziah a, intipem emaw in tipalh ta ila, min buaipui hmasabertu a ni ziah. A class bang a rawn haw a piangin thil chhete tal min lo hawn ziah bawk. Mi ngaihah chuan a nau chu a duat hle mai tih tur nisi, ka tana ngaihloh lama ngaih theih tur nisi hian a awm thin. Ni e, keimah zawk hian ka ngaihzawn ruk vang pawh a ni maithei. Hmana kan tet laia ka tuitla min chhan chhuah atang khan ka vei daih tawh. Mahse, ka vei dan kha ka la hrethiam lo va, heta kan inhmuh leh hmasak ber nia ka feelings atang khan ka lo ngaizawng ru reng tih ka hrethiam tawh. Chuvangin ka theih ang angin ka inthup ve a. Ka fimkhur hle bawk.

Urlawk zanah kan unauin in chungah sikri ai pahin kan thukhawm a. Mama'n guitar a perh a, kan zai dal dal mai. Ka nu pawh rawn chho vein, a arsa hem hmin a rawn keng chho va. A va nuam em.. Ka eizawna tenawm zet kha chu ka hre chang tawh lo. Mahse, a chang erawh chuan khang min dawrtu te khan min la hre awm sia, engtikah emaw chuan ka la mualpho ka ring thin..

Arsa kan ei zawhah Mama chu a thianten an rawn call reng vangin a chhuak a. Teteii erawh a mutchhuah thu sawiin ka nu rualin a chhuk ve daih. Nunpuia nen chauh kan awm ta.

"Va chhuak ve la" ka ti a.

"Nangmah nen aw" a ti a.

"Ka peih lo. A. Vawt si"

"Taka thil tihdan tur ka hria.. Kal ang" tiin min kai tho a, sikri a khai a. In hnuaiah min chhukpui zawt zawt.

"Nu, Teteii nen khan in thawmhnaw hlui la tha si kha lo khawm ru le.. ". ati lung lung a. A tihtur ka hrethiam. Ka nu te pawh chuan ihe lo vin an zawng nghal. Sitting roomah chuan an vawm khat hnûr mai. Amah chuan a pheikhawk bun tawh lo a thar ang mai la ni si te chu a khawm bawk a., " Nang chu a ngai ve lo aw. I la nei lo em mai" a ti a.

Tichuan, chung thawmhnaw phur chuan kan veng kan hrut ta. Veng mwng lama in pahnih lam kan pan ta vang vang a. A tawi zawngin, chumite hnena thawmhnaw kan han pe chu an tap lo chauh. Nunpuia chuan a pawisa khawlsa Rs. 2000 ve ve a pe bawk a. Naupang an awm ve sia, naupang hak tawk kan keng si lo chu lawm a kim chiah lo. Mahse, tleirawl an awm ve tho a, an mawipui dawn lutuk. Ka nu thawmhnaw lah an nute chuan an lo ha ve thei lehzel a. A petu te lawm bawk, a dawngtu te lawm bawk. Rilru hlim takin kan haw chho leh ta a. Mahse, kan in lam pan ta lo vin khawpui chhung kan fangkual leh a, kawn chei te kan en dun. Nuam ka ti, hmuhmawm bawk si.

.. "Ehe! I dam maw.. Ka zawng rei tawh che sin, khaw nge i awm daih" Min dawr zeuh zeuhtu pavalai lam hian min lo pawt ding chawt. Ka khur deuh.

"Nia, ka bansan tawh a.. " ka ti ringawt.

"Zanin chauhte chu…. Leng lawk ila" a ti ham ham a. Nunpuia a awm ve si, ka va zak em..

"Ngawi teh, thianpa, ka nau ania, hetiang chuan ti lo teh. A bansan tawh tih amah pawn a sawi kha.. " tiin Nunpuia chuan min rawn kai a, min kalpui nghal. Motorah kan lut a. Kan ngawi reng. Kan in thlen dawn kawng kawi thim laiah a ding a. A reh viau.

"Pawiti suh. Hrehawm ti bawk suh.. " a ti nghut a.

"Khatiang kha ka tawn tur a nia lawm.. Ka zak khawp mai" ka ti ve a. A hmaa ka hlimna zawng zawng kha a bo vek.

Min rawn hnaih a, ka kut a vuan bawk. Hnai takah min melh a, ka chal a rawn fawp. Ka lo chhing a. "Tikhan a zia deuh em? " a ti sup a. Ka bu nghat ringawt.

A kutin ka khabeah a dâwm a, ka hmuiah a rawn fawp leh. A rei lo. Mahse, engtin emaw ka awm.


"Anih tikhan" a ti leh a. Ka chil ka lem khawlh.

"Ih.. Unau kan ni sia" ka ti niah niah a.

. "kan ni lo. Kan hrang hlak" a lo ti hmuk.

"A theih loh alawm.. " ka ti leh. Lungawi hmel vak loh hian min rawn melh a.

"A theih alawm.. Hmana i tui tlak lai atang daih tawh khan ka vei tawh che. Ka nau angin ka en ngai lo hrik hrim che.. " a ti ta a. Keimah ang chiah a lo nih chu..

"Mahse, ka chanchin i hre vek alawm" ka lo ti a. Hmalam ka melh daih.

"Hria e. A pawi ka ti lo" a ti khawl mai. Ka va melh zawk a, minnlo en reng mai.

Min rawn pawm chawt a, rem leh rem lo vin kan inkuah, ka hnar phal bik lo. Ka vei ruk ngawih ngawih, zantin ka suangtuah thin kha a ni miau si a. Min fawp, ka fawp let ve. Kan lei leh lei chu a inbuan tep tep mai. Khua a vawt viau naa a lum tan. A rem lo bawk a. Kan tawp ta rih.

" I roomah ka lo riak dawn" a ti a.

In kan thlen chuan an lo mu tawh aniang. A reh dûk mai. Ka intifai a. Ka mu ve nghal. A sawi ang tak tak khan a rawn lut a. Ka room hi thlanglam bera awm a ni a, Teteii room thin a ni. Mahse, Teteii chu ka nu bulah a mu ta a. A awm rei dawn lo bawk nen.

Khum zaupuiah chep zetin kan mu dun a. Kan inkuah chial reng mai. Khum khata mu, innduhtawn leh innâwk reng ta na na na chu Isua Pianzanah sex kan hmang ta anih kha! Ka duh ber nena hmang kan ni bawk a, a nawm dan a dangdai. Ka kham hleithei lo a ni e. Sex nawmna ka pawh tawh ka tih kha… a zei viau lo naa a mi tawhna apiang chu a sa hat hat zel, mi bik a ni miau a. Khawvar hmain a roomah a insawn leh.

Khata tang khan inthup ru deuh siin kan induhna chu kan lantir ta a. Mi dang chuan min rinhlelh ka ring lo. Amah hian a thiam èm a. Christmas vuakvet pawh kan pahnih ngawr ngawrin kan hmang. Sex lah kan hmang nasa.

Kum a thar a, Teteii a chhuk leh. Kei pawh ka nu hmelhriatte dawrah puanthui ka zir ve tan a. An fel bawk a, a nuam ka ti chho angreng. Sawma nen kan inbe fô a, nuam a tih thu te a sawi a, ka lawmpui em em. Mahse, a tuai nihna chu a sim thei bik lo. A la hman zeuh zeuh thu a sawi. Ka khawngaih ve lehchhawng khawp mai.

"Zoteii i ni em? " tiin ka puanthui lai chuan nu pakhat, la naupan hmel tak hian min rawn bia a.

"Aw ni e" ka lo ti a.

"Kan pa bialnu thin kha i ni chiang, kan pa saw lo tibuai tawh suh aw. In mu dun lai thlalak tihdarhsak i duh loh chuan" a ti ta mai. Ka ding hluai a. Dawra awm ve te pawh an lo hawi thap.

"Ka pi, in pa chu ka hre miah lo. Tu pasal mah ka ngaizawng hek lo" ka ti a. Ka chhungril erawh a khur nasa.

"Whatsappah a hmaa in inbiakna ka hmu alawm.. In inhmuh zin em kha.. " a ti a

"Keimah ka ni lo aniang" ka lo ti vat

"I ni chiang. A bialnu i nih loh pawn call girl i ni tal ang. In inbiak dan kha" a ti hlawih hlawih a. Ka chhing sawk.

"Enteh, ka pi, he lai hi ka dawr a ni a, hetia buaina siam hi ka phal lo. Min chhuahsan rawh. Ka dawra thawkte hi ka hrechiang, Zoteii hi chutiang mi a ni lo" Dawrneitu Nu Rini chuan a lo ti chang ta fak a. A rawn bengdai ta a ni. Ka thlavang hauh mah se, mi dang thawk ve te min en dan chu a danglam phah tih ka hai lo. Zahna hi chu ka la tawng dawn chauh a nih awm hi maw…

Zanah chumi chungchang chu Nunpuia ka hrilh a, a thinrim viau. Mahse, ka khap bet.

In khata chenho tlat chuan inthup theij loh chinte a lo awm lo thei lo va. Vawikhat phei chu Ka rooma Mama rawn lut hian min phâwk thelh a ni. Nunpuia nen kan inhnial buai lai tak a ni a. Puanthui zir bansana in lama hna thawh ka duh thu ka sawi a, min lo hnial si. Kan inhnial ta deuh. Mama rawn lut chu a phawk viau a, mahse, lehlamah kan inkuah emaw fawp lai a rawn hmu lo va, a zia. Ka nu pawn min man tep thin. Ka nu chhuah laiin ka inbual tur min zui lut pek a, a lo haw ta thut si. Kan va che buai tak. A rooma a chhoh hlanin kan chhuak ta a. Mahse, min hmu hman deuhin ka hria.

Chuan zan khat ka rooma a rawn phei tur hi mama leng haw nen an intawk bawk. Chhuanlam a siam thiam lo thei si. A rukin an hriat ka ring. Ka then phal bawk si lo. Engkimah kan inzawm tawh a, a tel lo chuan ka awm hleithei tawh lo. Shillonga a zin zawk hlan te hian ka tap tep zel, tlaivar dawna kan inbiak changte a awm thin. Ani pawn min thlahlel ve takzet niin ka hria. Inneih lam erawh sawi rik ngam chi ah ka ngai lo.

Kan khaw mite atangin vanneihthlak takin ka nu nen kan inbepawp thei ta hlauh a. Ka pa khan ngaihzawng dang neihsanin an lo rethei nufa hle a lo ni. Then ringawt dawn se ka pute te an sual si, a tan kawng a ping hle a ni awm e. Ka pawisa thawn te khan an lo intungnung ve hram hram a. Ka nu chu chhanchhuaha hlim taka awm tir ka chak. A chang erawh chuan min rinhlelhna kha ka hrechhuak a, ka hel ve fô. Mahse, amah bak ka chhungkua tak tak tihtur ka nei lo. Tin, ka nu a ni tlat!

"Khaw nge i awm.. Tumah an awm lo.. Ka roomah lo kal vat teh" kawmchhak dawra ka awm laiin Nunpuian a rawn ti. Ka chhuk thla var a. A rooma ka va lut chu thlahlel zet hian min lo kuah nghal châwih a. Tun hnaiah kan inhmu fal hleithei si lo va, min ngai tawh aniang. Kan infawp leh bawrh bawrh a. Kawngka kalhin kan inbawhbet leh run tawh.

"Tun tum chu a chung lamah tang ve chhin teh" a ti sup a. Ka nui hawk. A sawi ang chuan a chung lamah ka awm a. Ka thiam ang angin…

Zanah ka nu chu a inkhawm a. Mama erawh an group sumtuaknaah a kal. Nunpuia pawh a chhuak.

Ka lo mutui hle aniang, ka nu ángthawmah ka harh ta hlawl a. Nunpuia room atanga lo chhuak a ni.

"Nu,, tawng zawi ve deuh teh. A hre thei ang e" Nunpuia chuan a ti sap.

"Hria ang hmiang. Ka duh lo reng reng, hetia in awm hi. Unau in nih hi hre ta che u. Miin engtin nge an ngaih ang che u.. A zah pawh in zak lawm ni? Zoi pawh naktukah ka hrilh ang, a duh chuan min chhuahsan mai rawh se.. A chhuah loh chuan nang hi Shillongah i chhuk nghal ang" a ti hlaih hlaih a. Ka nu ang thawm ka hriat vawikhatna a ni hial ang. Rizai hmer ngawt ngawt chungin ka lo ngaithla.

"Ngaih tuah ve la, ka pa in a chungah thil tha lo tak a tia, kan rulh ve a ngai alawm.. I duh ang ngeiin amah saw ka nei lo vang. Mahse, hnawhchhuah kher a ngai lo. Ka pa tihsual siamthat ka tum mai chauh a ni. A bak a awm lo" Nunpuia tawngkam tin chuan min chhun sup sup nia! Ka nu tawngkam aiin na ka ti zawk. Kei hi a pa tihsual vanga a kawp mai chauh maw ka lo nih a?! Min thungrulh nan min lo tuamhlawm mai mai chauh a lo nih chu!

"Call girl a nia, natna tha lo te pawh a kai thei. I hre vek.. I pa tihsual chu kan rul tawk tawh viau e. Nuamsa takin a awm a, engkim kan tumsak bawk.. Hetia nang lehzel a tihbuai che hi ka remti tawh lo" ka nu a ni.

"Aw ka hria.. A tawk.. Tlangval ka ni a, nula dang ka va mutpui ai chuan a tha zawk. A mualphothlak loh zawk. Mahse, nia, ka sim tawh ang. Ka pa tihsual chu ka rul zo tawh e" Nunpuia bawk a ni.

Kei chu ka ral ta daih mai. Ka khur hlawk hlawk. Ka chhungril a sa huam huam bawk. Ka hriat ngei tura an nufa inhau thawm chuan, ka thinlung a chhun keh zo ta. Ka tihtur ka hre chiang bawk.

Zing dar 4 a ni a. Ka luh tirha ka thawmhnaw kenluh ho bak ka ak lo. Kan in, ka hmangaih em emte chenna hmun chu ka mang tha leh ta. Ka damchhungin hmuh leh tawh loh ka duh a ni.

Pawisa eng emaw zat ka la nei a, ka lungngai vak lo. Hotel fianrial deuhah ka innghat a. Ka nu ka bia. Naute nen thla tharah Aizawl lo chho turin ka ti a. Chumi hmain sum tlem azawng thawhchhuah leh phawt ka duh. Tichuan, he khawpui chhuahsanin hmun dangah ka nu leh ka naute nen kan khawsa ve tawh anga. Nunphung pangngai tak zawhin kan nung ve tawh ang.

Ka customer hlun te ka be kual tan a. An lo phur hlawm ngei mai. Zan khatah mi pahnihte ka mutpui. Sum pawh ka hmu tha. Zu erawh ka thlah. Harhfim karin Nunpuia min phatsanna hrikthlak nan ka taksa chu ka hlan thin. Mipa dang nena kan mut dun lai pawhin a hmel ka mitthla thin a. Ka la ngai a, ka la thlahlel ngawih ngawih. Anu a hlauh vang nge min lo play tak tak ka hre lo. Mahse, hei hi ka hria. An chhungkaw kehchhiat ai chuan, kei hi ka bo hlen ang.. Tih hi.

Thla a thar meuh chuan pawisa thahnemfe ka thawk chhuak ta. Ka taksa hriselna a tlahniam a, ka thu that mai. A pawi chai lo ve. Ka nu ka be leh a,. An rawn chho ta. Kan inhmuh chuan kan inkuah a, kan tap tawp.

Nunpuia te in ka chhuahsan hnuah ka sim card ka thlak a. Tuman min rawn be thei lo. Ka tan thil an ti tawk tho va, dem tumna ka nei lo. A rang thei ang berin ka nu nen Lunglei kan pan ta a. A hmel pawr fap leh zur lek lek chu ka lainat ngei mai. Keimah vangin rilru hrehawm takin a awm thin ngei awm si a. Hnathawh ngai bawk nen, a pasal vanga a rilru natna nen. Ka nu chu ka khawngaih takzet. Ka nau Kimi pawh a lo lian ve viau tawh a. Mahse, min ngaina mang tlat lo. Ka nu nen an insi chât reng mai. Lunglei kan thleng a, hotel man tlawm deuhah kan innghat phawt. Muangmarin in luah tur ka zawng ta a. Ramthar vengah ka hmu ta hlauh. Kan nufa awmna atan chuan a tawk viau. Kan luahlut ta a. Bungbel leh mutbu lei nen, mamawh a tam ve angreng si a. Ka inseng nual.

Kar khat lai kan in tharah kan awm tling ve ta. Ka eizwnna ka bansan tawh si a. Kawng ka dap nasa ve viau. Eisiam lam ka tihmi deuh a nih vangin Restaurant-ah ka thawk ve thei ta hlauh. Ka nau chu kan veng english medium school pakhatah kan admit ve ta bawk. A la naupag deuh naa ka nu tan chhuah vah a harsat phah si a. Tichuan, ka nuin ka nau school kal hlanin thenawm te panhnah a phuahsak a, kuhva a thelsak thin bawk. Kan zia ve tan e. Ka hna chu nuam ka ti bawk a, ka thawk sâwt hle. Ka thawhna te pawn min duhsak ve tial tial a. Aizawla ka awm lai ang khan ka hlauthawng tawh lo bawk nen, Nunpuia vanga ka hliam zawng la awm mah se; ka hneh ve hret hret mai. Hausa lo mah ila, thlamuang taka hna thawh theih hi a va hlu em…

Lungleiah kum khat zet kan awm ta tihin ka nunah mipakhat a rawn lang leh a. A hming chu Sangzuala a ni. Ka thawhna dawr neitu te fapa a ni a. Chennaiah a awm char char a, a rawn haw ve chauh a ni. Kei ai feinna upa a, a puitling bawk. A hmel pawh a tha. Min hmuh tirh atangin min ngaihven nghal. A luck awm tehlul nen. Mahse, nat leh ka hlauh em vangin ka hnaih duh lo. Nunpuia vanga ka hliam pawh a dam fel tan tawh a. Ka nuna a hmasaber a nih vangin theihnghilh hlen chu ka thei dawn lo tih ka hria. Kum pawh ka la tling lo chungin thil tam tak ka tawng ta a. Ka huaisen belh ve zel chuan ka hria. Mahse, mahni inrintawk erawh a har thin.

Sangzuala chu zantin deuhthaw a rawn leng thin a. Ka nu nen pawh an inkawm thei fu. Ka chanchin zawng zawng hria nise min iai awm sia aw..

Min hnaiah min zui rengtu na na na chu kei pawn ngainat chin ka lo nei ve ta a. Zep loh chuan mipa ka mutpui tam tawh vangin mipa zia leh cheng hi ka man ve viau tawh. Min duh ve tak tak nia ka hriat vangin ka chhang ve ta a. Sex erawh hmanpui ka tum lo bur. An dawrah ka thawk bawk nen, a rawn kal zut mai a. Thawk ve dangte pawn an hrethiam deuh aniang, min chhaih zuk zuk. Khawlaiah kan inzui chhuak vak lo naa zantin deuhthaw kan inah a lo len vangin hun thawl kan ngah angreng. Kan khawsak a inthlau viau naa min hmusit angin a awm ngai lo. Kan naute lah hian a ngaina em em lehnghal. Pafa te pawh an ang deuh.

"Khawi i beng ka lo zat ang che" a ti a. Ka samzai a hrual mum a, a rawn hawlh.. Awii a za lutuk. Ka nu leh Kimi an chhuah daih vangin kan inbuan thiak thiak a, kan nui awr awr bawk.

. "zote, sex hman i duh lo tih ka hria.. I la virgin ngei pawh ka ring" a ti thawp sat a. Ka thin a na zawk.

"Umm.. Nia.. Hman ka duh lo lawm" ka ti bah niaih a.

"Ka nupui i nih hunah i thianghlimna chu kan chen dawn nia. Keipawn khawihchhiat che ka duh lo" a ti sup a. Ka na zel. A va hrehawm ngai ve le.

Nitin kan nghet tual tual lehnghal. Virginah min ngai si. mipa chi hran hran ka mutpui tawh thin tih hria se, min va ten dawn em…

A chhungte beng a thleng ta. An dawra thawk satliah hmeichhe naran ve mai chu an fapa ngaihzawng atan an lo duh awzawng lo mai a. An hriat tukah hlawh min pe a, an dawra ka thawh theih tawh loh tur thu sawiin min ban fel ta der mai. Ka tawn tur tho anih ringsa mah ila, chuti tut tuta thil an kalpui ka ring bik lonva. Mahse, an che rang khawp mai. Ka nu pawh engkim ka hrilh. Zanah Sangzuala a rawn lang ve leh nghal tho. Thil awmzia a hre vek tho va, min phatsan a tum lohzia a sawi bawk.

Ka nu chu chhuak turin ka mitmei a. A chhuah hnuah, ka nunhlui zawng zawng ka hrilh fai kèlh a. Min melh tlawk tlawk ringawt. A ding hluai a, a kut a hum ruh thul. A thaw leh hawk zel a.

"I thutlukna a piang ka pawm e" ka ti sap a.

Ngawi rengin min chhuahsan. Chu chu Sangzuala nen kan tawp dan a ni. A vawihnih nan kalsan ka ni leh ta. Ka phutawk rèng a ni e. A pawi lo.

Mahse, Sangzuala chu a pa lo ka tihna a awm. Ka chanchin ka hrilh zawng zawng kha a thiante bulah a lo. Sawi a, kawnga intawh leh inhmuh changa min endan leh biak dan a danglam ta. Ka Phutawk alawm ti zel chungin ka la pen ve hram hram a ni e.

Ka pahrawn thih thu kan hre ta thut. A inawkhlum an ti! Chunglamin phuba min laksakah ka ngai. Chhetemahin ka khawngaih lo.


Sawma ka bia a, ani chu a hlawh a thahnem tham tawh a. A nuamsa ta hle. Mai. Ka mamawhna te ka sawi a, Catering tih ve ka tum thu leh bultanna ka mamawh thu ka sawi. Ka neihsa hi a beitham deuh hlek tawh atin ni. Hmana ka thian kha ka thian a lo la ni reng mai. Engmah sawi buai lo vin ka mamawh zat aia tam min lo thawn nghal! Ka tap tawp. Amah ang vek hi khawvel mihring nise hmeichhe pangngai tak ka ni ve tur.

Kan nufain eisiam kan han zir leh rih phawt a. Mamawh zualpui kan inlei bawk. Chanchinbu lamah hnathawk tur kan duh thu ka chhuah a, kar lo vah mi pahnih chu ka hmu ta. Kan in luahna te an fel bawk a. Kan inhnuai chiah rumrawk dah nana an hman chu chei thata hman an phal a. Kan chei thain kan thuam tha a. Eisiam nan kan hmang ta a ni.

A tirah dawrtu kan hmu mai lo. Kan lar lo nasa si a. Mahse, kan in chungnu hian a thiannu fanute inneihnaa catering ti turin min lo sawisak hlauh mai a. Ka va lawm tak em. Ka theih ang tawka tui leh thianghlimin ka siam a. Mi an sawm zau lem lo bawk a. A hautak lutuk lo. Khata tang khan kan lar chho ve ta a. Ka eisiam a tuizia an tlangaupui ve tan ta a. Dawrtu neuh neuh kan nei ta deuh reng. Hnawkthawk pawh pakhat ka lakbelh leh.

Kum nga zet a liam hnuah chuan Sangzuala te dawr thin kha ka luah ta a. Bai Bâwm tia hming thlakin ka tuaihnum chho a. Mizo chaw leh chawhmeh ka hung chhuak ta. A chungah intihhlimna chi hrang hrang ka zam tel bawk a. Karoke zawng zawng nen.. Engkim chu ka duhthusam a ni ve ta. Khang kum 5 liamta ah khan ka nunhlui vanga hnualsuatna vawi 6 dawn ka hmachhawn a, zak leh kimki taka hna ka thawh a tam mai. Mahse, ka luhlul laklawh tawh. Mipa ka ngaihven ngai tawh lo va, ka nunah ka nu leh ka nau chiah an leng tawh. Ka dawr chu a lar ve tak èm vangin chanchinbumi te pawn min rawn kawm ve ta hial a! Aizawl lamah pawh an lo hre ve ani chèk ang chu..

"Zote, keimah Mama.. Ka lawmpui lutuk che.. " Mama'n min lo biak chuan ka nui sak.

"Ka lawm e. In dam tha em" ka ti a.

"Dam e.. Ka nu boral thu pawh i la hre awm si lo"

"Awii.. A va zia lo ve.. A pawi ka ti takzet.. "

. "Sawi tur ka ngah lutuk, ti nge i tlanbo daih… ka u hi nangmah vangin mi â ang maiin a awm asin" a ti ta.

Ka khur der der.. Ka puakkeh lo chauh.

"Zote, dawt ka sawi lo.. I tlanbo ni atang khan tuman kan be tawng zo tawh lo. Ka nu pawh a inchhir a. Mahse, zawn ngaihna che kan hre si lo. Ka u chu Shillongah Mental hospitalah nikumah khan kan dah tawp. A hmangaih takzet che asin" a ti mial mial a. Nunpuia hmel ka mitthla.

"Mahse.. Min phatsan alawm"

"A phatsan lo che.. Ka nu bula a thusawi te kha chu ka nu rilru hneh nan alawm a sawi.. Zote, khawngaihin ka u hi rawn chhanchhuak rawh" Mama aw a ngenngawlna rilzia chu ka hre thei.

Shillong pana kan tlan lai chuan engmah ka ngaihtuah lo. Ka awm ve tawp.

"U nunpui" ka ti sap a. Min hnungchhawn zawngin khumah a lo thu.

A che hrut a. A rawn lehhawi. Chiang takin min melh. Keimah ka ni tak tak em tih fiah a tum ni berin ka hria. A inzuah buk hle naa ka hai hlawl lo. Hman ang khan a la tha reng.

"I ni lo… nangmah i ni lo" a ti bul bul. A.

A bulah ka va thu. A kut ka vuan a. "Keimah ngei ka ni. I nau Zoteii kha.. " ka ti mawlh mawlh. Ka mittui a luang nghal.

"Zote… " a ti tham tuak a. Min lo kil laihtu tu te pawh zah zo lo vin ka fawp ta a. Min pawm bet thlawp.

"Haw ang aw" ka ti a.

"Min kalsan tawh lo vang tiraw" a ti thung.

"Umm.. Engtikahmah ka thi anih loh chuan, ka kal bo tawh lo vang" ka ti a.

Ka tuitla min chhanchhuah nia hnai taka min melh ang chiaha mitmeng thûk zet khan min melh vawng vawng a….
Read more »
Subscribe to: Posts (Atom)

Contact Form

Name

Email *

Message *

TOM © 2026. All Rights Reserved.
Published by Songate G
Powered by Blogger.