TIMES OF MIZORAM

Mizo Idol 2018 season 6 atana District hrang hranga audition neih chu kalpui chhoh mek zel a ni a, District pathumah zawh fel a ni tawh. Serchhip audition-ah mi 10 an tling a, zanin hian Lawngtlaiah neih ve leh a ni ang. 

Audition hi July 25 aṭang khan ṭan a ni a, Champhai-ah neih hmasak ber a ni. Champhai-ah hian contestant 54 awmin, zan hnih intihsiakna neih a nih hnuah mi 14 an tling. July 28 zan khan Serchhip-ah neih ve leh a ni a, mi 27 zinga mi 10 ten intihsiak an hmachhawn zui thei dawn a, second round lutsa pakhat a awm bawk. 

Lunglei-ah pawh July 30 khan audition hi neih ve leh niin, mi 68 an inlan a ni. Lunglai audition result hi Lawngtlai-ah puan a ni ang. 

Serchhip Audition-a tling te : 

1. Lalruatfeli, Bungtlang

2. Lalhmingsangi Ralte, Hriangtlang

3. Lalmankima, Thentlang

4. Vanlalduhawma, Rengdil/Kanghmun

5. Vanlalruata, Venghlun, Thenzawl

6. Lalsiamtluanga, P&E, Serchhip

7. PC Malsawmkima, Vengthlang, Thenzawl

8. Eric Lalremsiama Zadeng, IOC, Serchhip

9. Lalrindiki, Chanmari, Chhiahtlang

10. Laldingliana Khiangte, P&E, Serchhip

---

Lawngtlai-ah mi 32

Zanin dar 8:00 aṭangin Lawngtlai-ah audition neih a ni ve leh dawn a, mi 32 an inlan ang. District dang ang bawkin endik hna thawk tur mi pathum ruat an ni. A. Lalzara, C.Z Thanliana

 leh Lalbiakchhungi te chu judge atan hian ruat an ni a, Lancy Remlalhruaii chuan a host leh dawn a ni. Intihsiak hi Zonet Zawlbuk-ah live-a pekchhuah a ni ang. 

Judge tur te : 

A. Lalzara

C.Z Thanliana

Lalbiakchhungi

#Vanglaini

Chanchinthar ToMZ: Mizoram sawrkar chuan mipui tan harsatna a thlen loh nan Aizawl, Lunglei, Serchhip, Champhai leh Mamitahte IPC Section 144 puangin zanin atangin heng districtahte hian Magistrate leh Policete duty tura tirhchhuah nghal an ni ang.

Home Minister leh Acting Chief Minister ni bawk Pu R. Lalzirliana hovin a chenna inah Lump Sum Higher Secondary School 9-te thil nawr chungchang leh law and order lama a thil nghawng te ngaihtuahin School Education Department, Home Department leh Finance Department hotute an thukhawm a. Finance Minister Pu Lalsawta leha School Education Minister Pu H. Rohluna te an tel.

Thutkhawmah hian thil awm dan ngun taka ngaihtuah a nih hnu in heng private school pakua ten Ad-hoc Grant in Aid a hlankai an phut chu tun sawrkar sum dinhmun en in tihsak theih a niloh thu a sawi a. Sawrkar atanga puihna Lump Sum Grant dawng mekte tan an sum dawn zat hi tipung turin a hma atang tawh khan hma lo lak tawh niin, sawrkarah file a kal mek thu sawi a ni bawk.

Home Minister chuan nu leh pa ten kan fate tan a a tha thei ang ber kan duh ang chiah hian sawrkar pawhin mipui tan a tha thei ang ber a tlin chinah chuan tih a duh thin a ti a. Chutihrual chuan sum neihin a tlin tawk ang zela rualkhai taka hmalak a ngaih thin avangin private school ten Ad Hoc Grant in Aid a hlankai an dilna chu tihhlawhtlin sak duh hle mahse a theihloh a ni, a ti bawk.

Committee hian thil phut nawr a zirna tibuai zawnga zirna in hial khar a ni chu pawi an tih thu leh, zirna leh zirlaite hma ngai tan chuan hetiang zawnga chet te, mipui chetvelna tibuai zawnga inkalpawhna kawng dan te chu thalo a ti a. 

Hemi avang hian mipui tan harsatna a thlen loh nan Aizawl, Lunglei, Serchhip, Champhai leh Mamit ah te IPC Section 144 puan nghal niin, zanin atangin heng district ah te hian Magistrate leh Police te duty tura tirhchhuah nghal an ni ang.

~DDK

Sawrkar laipuiin Serchhip District hnena pawna inthiar awm tawh lohna, Open Defecation Free (ODF) Certificate a hlan chu PHE Department-in DC Pi Sangchhin Chinzah hnenah nimin khan a hlan a, he hunah hian Swachh Bharat Mission (Gramin) hnuaia District chhunga hmalak tawhna leh hmachhawp te sawiho a ni.

He hun hi DC leh SBM (G), Serchhip District Chairman ni bawk, Pi Sangchhin Chinzah chuan kaihruaiin, Serchhip District-in faina kawnga hma a sawnnaah sawrkar lam atanga thawktute, khawtlang hruaitute leh tlawmngai pawl te hmalaknaah lawmthu sawiin, faina kawnga nasa lehzuala hmala chhunzawm zel turin a sawm nghal a ni.

He hunah PHE Serchhip WATSAN Division EE Pu F.Lalsanglura SBM (G) Member Secretary ni bawk pawhin Serchhip District chu Mizorama District dang zingah hma la chak te zinga mi a nih thu sawiin, District chhung khua zawng zawngah vantlang bawlhhlawh bawm sem chhuah a nih tawh thu a sawi a, bawlhhlawh paihna hmun pawh khaw 8-ah sak zawh tawh a ni tih a sawi a, Swachh Bharat Kosh (SBK) hnuaia district chhunga ek in 1346 siamthat tura ruahmanna pawh thawh zawh tawh a nih thu leh hemi atana sum lo kal pawh pelhe lovin a dawng turten an dawngkim nia a hriat thu a sawi a, Central a\anga hnathawh endik tura lo kal te pawhin an hnathawh chu tha an tih thu a sawi bawk a ni.

He huna tarlan anih danin, Serchhip Dist ah hian SBM (G) hnuaiah thingtlang khua 35 a awm a, heng khaw hrang hranga ek in nei lo 422 te chu ek sak zawhsak an nih hnuah SBK hnuaiah ek in 1346 chu siamthat zawhfel a ni tawh a, June ni 29, 2017 khan District chu khawlaia inthiar awm lohna (ODF)-ah puan a ni tawh a, khaw 8-ah Solid Liquid Waste Resources hnuaiah bawlhhlawh paihna sak zawh tawh a ni a, bawlhhlawh paihna hi khaw 23-a sak leh turin ruahman mek a ni a, vantlang inthiarna pawh khaw 12-a dah turin ruahman a ni. -DIPR

Tun hnai ruah sur nasa avanga Serchhip dai, Sailiam kawn bula NH 54 kawngpui meter 100 vel zet min bal chu PWD Highway leh Serchhip DDMA tangkawp chuan tun kar chhunga sial tlang leh tumin hna an thawk mek.

He kawng bal siam that dan ngaihtuaha sawiho tur hian PWD Highway Chief Engineer Pu K. Lalsawmvela chuan inrinni kal ta (dt 1.6.18) khan Serchhip rawn tlawhin Serchhip District Disaster Management Authority Chairman leh Official pawimawh dangte nen a hmunah an en hova. He lai kawng hi a min nasat avang leh kawng zauh/a thar laihna tur ram chu mimal ram a lo nih bawk avangin a bawhzui dan tur sawi ho a ni a. 

NH 54 hi Double lane-a sial tura hmalak (survey) mek a nih tho avangin he Double Lane Project hnuaia helai ram neitute ram hi lak sak tura inbiak fel a nih chuan hna hi thawh nghal mai theiha a lan avangin Bawrhsap Pi Sangchhin Chinzah chuan ram neitute a be nghal a, ram neitute pawhin harsatna siam lovin NH 54 min siam thar hna hi thawh theih a ni ta a ni.

Hetianga he kawng min thawh theih a nih tak avang hian PWD Highway Division chuan nimin Pathianni zing dar 8:00 atang khan khawl pakhat dah nghalin hna hi thawh tan nghal a ni a. Leh lam sir atanga hma lo la ve nghal turin tukin (vawiin) zing dar 10:00 a.m atang khan khawl pakhat an dah belh zui leh ta bawk. PWD Highway Engineer te chuan khuain a zira, a leiah lung tam tham takte a lo awm lo hlauh a nih chuan tun hapta chhung ngeia he kawng hi tih tlang an tum thu an sawi a ni. Kawng hi laih tlanga, Boulder phah phawt tura ruahmanna siam a ni. 

Tin, he kawng Diversion, DDMA in hmanhmawh taka a siam Hriangtlang road to Dawngzawl pawh Serchhip Addl. DC Pu Chuauhnuna chuan a theih ang anga chei zel rih a nih tur thu a sawi a, a hlauhawm zualpui tihnep nan Boulder te pawh phah tum a nih thu a sawi. NH 54 a pin tukah khan Serchhip DDMA chuan he kawng (9 kms approx) hi hmanhmawh takin a chei nghal a, NH 54 pin atanga darkar 48 chhungin lirthei te chi (4x4 drive) tana kal theihin a peih hman a, tunah chuan Sumo thenkhat pawh an kal tawh niin an sawi. 

Tin, Serchhip khaw chhung, Tuikhuah Veng Baptist Biakin thlanga NH 54 tlahniam nasa pawh PWD Highway Division hian zawh nuam deuh zawk tura siam that an tum thu an sawi a ni.

Serchhip District chhunga chenna in chhia leh thiah ngaite pawh Addl. DC Pu Chuauhnuna chuan, SDRF Norms in min hrilh angin tanpuina awm thei chi apiang chu pek chhuah nghal zel a nih thu a sawi a. Tunah hian loneitute thlai chhia report khawn khawm mek a nih thu a tarlang bawk.-DIPR

Vawiin hian AH & Vety Department hnuaia 3rd & 4th Phase NLUP Piggery Trade thlangtu mi 144 te hnenah NLUP Tuizem sem a ni.

NLUP Tuizem hi AH & Vety Office tualah sem a ni a, Serchhip khawpui chhunga mi 142 leh Hriangtlang ami 2 te hnenah sem a ni. Serchhip District chhungah hian 3rd & 4th Phase ah Piggery Trade thlangtu mi 458 an awm a, ruahman lawk dan chuan New Serchhip leh Serchhip District chhunga khaw hrang hrangah te pawh a tahtawla sem chhunzawm zel tur a ni.

Tuizem hi sem zawh fel anih hunah 3rd & 4th Phase NLUP hnuaia vawk vulh thlangtute hian tanpuina an dawn tur zawng zawngte chu an dawng kim tawh dawn a, tanpuina an dawn zawng zawng belhkhawm hi Rs. 1,00,000/- hu a ni.

Nimin lam atanga ruah nasa takin Mizoram a tuam avanga chhiatna thleng; Serchhip khaw chhung leh a chhehvela mite chu nimin tlai atanga vawiin, District Disaster Management Authority Chairman Pi Sangchhin Chinzah chuan Zonal officer te a tlawh kual tiring a tul anga hmalak zui nghal ngai hrang hrangte an thawk.

Serchhip ah hian nimin tlai dar 4 velah New Serchhip a Salvation Army enkawl Old Age Home retaining Wall chimin a thlang kawnga Auto Rickshaw a deng chhe nual a. Nizan lamah AOC leh P&E veng inkalpawhna kawngpui ber chu leiminin hnawhin he kawng hi tunah chuan tihtlang leh tawh ani. Tukin zing lamah Sailiam Kawn bula NH 54 chhaka awm Pi Darengi te chenna chu a chhak atanga leiminin a hnawl vek a. Nunna chan an awmlova, bungrua erawh chu an chuh hman lo a ni. He leimin hian NH 54 hi hnawhin chhun dar 12 thleng khan lirthei engemawzat a dang a, JCB a then nghal niin chawhnu lamah tih tlang a ni. Tin hemi hnu lawk hian Serchhip Dintharah leiminin NH 54 hi a hnawh leh a, chu pawh chu tihtlang lehnghal a ni. 

Tukin zingkar vek khan New Serchhip Vengtharah Pu PC Lalthanngura in sak thar, la luah loh chu a chhak leiminin a hnawl vek bawk a, New Serchhip Vengthar panna kawng hi leiminin hmun dangah a hnawh ping vek bawk. Pu Laldawngliana, Serchhip Vengchung te in chu a chhak leiminin zau tawk takin a delh pawp a, tin an kawmchhaka Pi Kapliani in ban chu he leimin vang hian a inkhai bawk. Serchhip Chanmary Veng kawngpui pawimawh pahnih chu leiminin hnawhin heng leiminte hian Pi Vanneii te 207 Truck a chhilh a, National Highway 54, Tuikhuah Veng Baptist Biakin thlang pawh tlahniam lehin tlemin thlang lamah a tawlh deuh bawk a. Hei vang hian he kawngpui pawimawh tak hi lirthei lian chu zawh tir huphurhawm tak dinhmunah a ding mek a. A sira motor Workshop leh Furniture Workshop te pawh tukin khan an inthiarchhuak nghal a ni.

Hengte bakah hian leimin hmun hrang hrangah sawi tur engemawzat a la awm a. Mat lui lianin Leilet leh Sangha dil engemawzat a chim pil mek bawk.

Indian Meteorological Department in Warning a pek danin ruah hi naktuk lamah pawh la tla chhunzawm tur a nih hmel a. Hei vang hian Pi Sangchhin Chinzah, chuan mipuite chu chhuak vak rihlo tur leh an in leh a chhehvel uluk taka lo vil turin a chah a. A tul hun apiangah Disaster Operation Centre No. 038381077 (landline tan 1077) ah te, Zonal Officer hrang hrang Mobile Phone ah te hrilh leh biak theih reng an nih thu a sawi (Zonal Officer te contact hi Social Mediaah nasa taka thehdarh a ni) a. District Disaster Management Authority chu a tulna a pianga che chhuak tura an inralrin reng thu a puang a ni.

Zonal Officer thawk chhuakte chu; Pu R. Vanrengpuia, SDO Sadar, Lalvenhima, EO, Ngurthansanga, SDC, Nengthianlala, SDC, Lalhruaitluanga, SDC leh Vanlalduhin, DO te an ni a, an report dawn hrang hrangte report tlangpui; Disaster Incident Report chu hetiang hi a ni:

Chenna in a khawih (affected) zawng zawng paruk (6), an zingah a then chhia 1, chhe nasa 1 leh chhe vek 3.

Vantlang hmun leh chenna area a leimin zat 39

Leiminin Road Block a siamna hmun zat 13

Silpauline pekchhuah zat 72

Zawlpui phai chu Mat lui lianin a chim

-DIPR

Pi Sangchhin Chinzah, District Magistrate, Serchhip District ram dang atangin Serchhip District chhungah vawk lak luh leh lak chhuah khap a nih thu a hnuai a mi ang hian thupek a chhuah.

District AH&Vety Officer, Serchhip District hnen atanga report kan dawn danin tunlai hian Serchhip khaw chhungah Vawk hri, Porcine Reproductive and Respiratory Syndrome (PRRS) a leng mek nia rinhlelh a ni a. Hemi hri leng avanga Serchhip mipuite tan buaina/harsatna a thlen loh nan, Section 144 Cr Pc hmanga khapna thupek chhuah hi thil tul tak, tih loh theih lohah ka ngai a ni.

Chuvangin, kei SANGCHHIN CHINZAH, MCS, DISTRICT MAGISTRATE, SERCHHIP DISTRICT chuan Sec 144 of Code of Criminal Procedure 1973 in thuneihna min pek angin Serchhip District huam chhungah mi tumahin ram dang(Foreign Country), a bik takin Myanmar atanga VAWK lakluh leh lakchhuah hi khap tlat a ni tih thupek ka chhuah e.

He thupek hian thu leh awm hma chu puan a nih atanga thla hnih (2 months) a huam ang.

He thupek zawm lo chu Section 188 IPC dan hmangin hrem theih an ni ang.

He thupek hi vawiin Dt.11st June,2018 hian District Magistrate Seal chhu-a nemnghetin hming ka ziak hnan e.-DIPR

NLUP hmanga  hlawhtlinna hrang hrangte phochhuah leh zawrhna hun NLUP Fair-cum- Exibition-2018 chu vawiin khan Serchhip District tan Serchhip Town Hall-ah neih a ni. Serchhip NLUP Kûtpui hawnna inkhawmah hian Chief Minister Pu Lal Thanhawla chu khuallian niin a hawng. He hunah hian Pi Vanlalawmpuii Chawngthu, Minister of Cooperation, Fisheries, Sericulture chu khualzahawm a ni. 

Chief Minister Pu Lal Thanhawla chuan mamawhtute hnenah tanpuina sawrkarin a sem a, mi vanduai fal tlemte tih loh ah chuan a dawngtute zinga mi taima leh rinawm, thahnemngai taka thawktu chuan NLUP an hlawhtlin pui zel a ni, a ti a. Vawiin NLUP Kûtpui neih a ni thei pawh chu beneficiary taima leh tumruhte hlawhtlinna tichiangtu a nih thu a sawi. CM chuan kuthnathawktute, rambuai avanga eizawnna mumal nei lova hun rei tak an awm hnuah leirem an rah leh theihna tura NLUP duan a nih chhoh dan sawiin, NLUP chu a tir atangin sawrkar hnathawk leh sumdawng hausate tan nilovin mirethei, khawsak harsa, pachhia leh hmeithaite tanpuina leh leirem an rah theihna tur atana ruahman a nih thu a sawi a. Kuthnathawktute chawikanna tur lam hawi leh mil zawng hmalakna te chhunzawm zel a nih tur thu a sawi bawk.

Chief Minister chuan NLUP kalpui a nih atanga kum 7 kum 8 a lo tlin khan India ramah Mizoram chu state thang tha ber 4 zingah telin, NITI Aayog in tehnaah Mizoram GSDP chu a sang tha hle tih leh NLUP hmalakna chu Mizoram hmasawnna atana thawhhlawk ber pakhat a nih thu a sawi a. Ministry of Finance chhutlawk dan chuan Mizoram GSDP pun lehna tur chu digit-mal ni tawh lo in digit hnih (double digit) a ni chho tura ngaih a nih tur thu te, Mizoram Per Capita Income chu India ram pum huap aiin a San zawk thu leh chawkhapkhawm hmulo tlemna ber state a nihna te chu lawmawm a tih thu a sawi a. NLUP an hmelhriat avanga UNO hnuaia Agency te nen Mizoram sawrkarin thawhhona a  neih kaltlangin hmasawnna hrang hrang kalpui mek a nih thu te, University Of Minnesota pawhin NLUP chu tha an tih em avangin Mizoram sawrkar sawm pawh ni loin rawn telve dilin, Mizoram University nen pawh inremna thuthlung an ziah thu leh chung zawng zawng chuan Mizoram tana tangkai tur rah tha a chhuah zel tur thu a sawi a ni.

CM Pu Lal Thanhawla chuan India ramah dinhmun sang tak leh state hmasawn a kan awm theihna chu ram mipui - kuthnathawktute leh sawrkar hnathawkte tanlakna a nih thu sawiin lawmthu a sawi a. Hun lo kal zel turah tun aia hlawhtlinna nasa zawk kan neih kan duh a, chumi atan chuan theihtawp kan chhuah zel dawn a ni, a ti. NLUP Implementing Board a thawktute, Line Department-te leh DC leh a thawhpuite bakah beneficiary te thawhrimna zarah Kût hlawhtling tak bautsiah a ni thei chu lawmawm tiin, ram hmasawnna atan neitu rilru pu chunga sawrkar hmalakna tawiawm zel turin kalkhawmte chu Chief Minister chuan a sawm bawk a ni.

Khualzahawm Minister Pi Vanlalawmpuii Chawngthu chuan kuthnathawktute chu ram hmasawnna atan an pawimawh thu leh, sawrkar pawhin kawng hrang hranga an hmakhua a ngaihtuah thin thu a sawi a. Sawrkar hmalakna hrang hrangte hlawhtlinna chu a thawktute mai bakah  tawiawmtu mipuiah thui tak a innghat a, NLUP kalpui a nih hma leh kalpui a nih hnu chuan Mizoram economy in hma a sawn zia en chuan a dawngtute tawiawmna a that zia a lantir tel a ni, a ti a. NLUP Kûtpui a beneficiary ten an hlawhtlinna rah an phochhuak thei chu lawmawm tiin, an thawhrimna leh rinawmna chu chhunzawm zel turin beneficiary kalkhawmte chu a chah a. NLUP beneficiary-te chuan an tanpuina dawn an hman that leh thatlohna avanga malsawmna an dawn leh dawn loh chu anmahni kutah a innghat a ni tiin Cooperation Minister chuan beneficiary-te rinawm leh a nih dan tur dik hmanga tanpuina hmang thin tura hrilh an lo nih tawh thinna chu vawng reng turin a chah a. Hlawhtlinna hmutu chu sawrkar nilovin kuthnathawktute an nih thu a sawiin, kut hlawhtling tak hman a nih a duhsak thu a sawi bawk.

Pu P.L. Thanga, Member Secretary, SPB & Vice Chairman, NIB chuan thu sawi bawkin, miretheite leirem rah vena tur a duan leh thing leh mau, ramngaw leh nungchate humhalhna tura duan a ni a ti a. Thang leh thar, Mizoram luah chho zel turte tana ram tha leh nuam siam tumna, Mizoram dinthar tumna a nih thu a sawi. NLUP kalpui a nih atangin Mizoram chuan state tharchhuah atanga ei leh bar hmasawnna tehna ah kum nga chhung India average chu a khum thu a tarlangin, NLUP chu a huam a zau in chutihlai chuan he programme hnuaia hmalakna hrang hrangte chuan rah tha tak tak, ram pawn atanga an rawn ngaihven zui leh entawntlak a chhuah zel a ni, NIB Chairman chuan a ti.

Chief Minister Pu Lal Thanhawla chuan Specially Abled zirlai Zosangliani, Thenzawl hnenah kumin HSLC exam a pass lawmpui nan an chhungkaw inchawmna turin CM's Special Scheme hnuaiah Autorickshaw a pe a. Special Scheme hnuaiah hian Serchhip Cluster chhunga mi harsa zual NLUP dawnglo mi chhumchhiate tanpui nan chhungkaw 156 hnenah cheng 20,000 theuh a hlan nghal bawk. Chief Minister hian Serchhip  Cluster chhunga Commerce & Industries Department hnuaia NLUP Beneficiary mi 44 hnenah tanpuina 3rd leh 4th Phase a installment hnuhnung ber la hmulo te hnenah Rs. 90,000 theuh a sem bawk a ni.

Vawiina Serchhip NLUP Kutpui hawnna inkhawm hi Serchhip District Bawrhsap Pi Sangchin Chinzah chuan a kaihruai a, Pu Chuauhnuna, Addl. DC, Serchhip chuan lawmthu sawiin hun a khar a ni. Kût hian ni hnih chhung a awh dawn a ni.

NLUP Kutpuiah hian Line Department hrang hrangten Stall hawngin, Kûtpui pual hian Line Department hrang hrang hnuaia NLUP Beneficiary-te chuan an thil thar leh an thil siamchhuah te man tlawm zawkin an hralhchhuak a ni. I&PR Department chuan stall siam  bawkin NLUP hlawhtlinna pholanna Photo Exibition leh Video Show neih a ni bawk a. NLUP Kutpui hian hlut a hlawhin tlawhtu pawh an thahnem hle a ni. - DIPR

SERCHHIP CHANCHINTHAR: Vawiin hian Serchhip Bawrhsap pisaah Pi Sangchhin Chinzah, District Bawrhsap hovin NLUP Line Department ten Serchhip District NLUP Kut hman dan tur an rel. 

Chairman Pi Sangchhin Chinzah chuan,  Serchhip District NLUP Kut chu kut ropui leh danglam tak, mi tihdan entawn emaw, satliah deuh taka hman mai mai emaw  awm lova hman ngei a duh thu sawiin Line Department te chu a tha ber zel  rawn pho chhuak ngei turin a ngen a. A tha ber an phochhuah theihna a nih dawn phawt chuan a tul ang zela thuneitu sang zawkte biaksak zel pawh a inhuam thu a hrilh a ni. 

Vawiina meeting hian NIB lamin duh dan a rawn zamte milin Kut hman dan tur hi a rel a. A hun atan May 17-18 ruat niin, ni hnih chhung hman tur a ni ang a. A hmun atan Serchhip khawpui lailia awm Town Hall chu ruat a ni. A hmun hma enfel leh Stall hrang hrang buatsaihte chu DC lam kutah dah niin Line Department tinte chu he Kut atana an inruahmanna, an mamawh leh Subsidy a an tharchhuah an hralh theih tur zat tlangpuite lo siam a a ranglama DC a thehlut tura tih an ni. Tin, he Kutah hian NLUP hmalakna chi hrang hrang phochhuahna, Photo Exhibition chu I&PR Serchhip District in an buatsaih bawk ang. Heng bakah hian thil tul leh pawimawh hrang hrangte an sawiho nghal a ni. 

Vawiina meeting ah hian member te an kal kim a ni. -DIPR

Vawiin chawhma dar 11:30 hian Lt.Col.(Retd) Pu Z.S. Zuala, Aizawl South-II bialtu chuan New Serchhip a Fire Station Building thar chu a hawng.

Building hawnnaa thu sawiin Khuallian Lt.Col (Retd) Z.S. Zuala chuan Serchhip bialtu MLA, Chief Minister ni bawk Pu Lal Thanhawla kaihhruaina hnuaiah Home Department in nasa takin hma a sawn thu a sawi a. Chhingchhipa Sainik School din tak te hi ram hmasawnna lungphum pawimawh tak niin, officer tam tak leh mithiam an rawn chhuahna tur a ni, a ti. India ram hmun danga an tih ve ngai loh, Sainik School, Chhingchhip ah hian hmeichhe naupang 6 luh theihna turin admission hawn a ni dawn thu sawi a. Kang mei ven thuah mitinin mawhphurhna an neih thu sawiin, tu emaw fimkhur loh avanga khawtlanga chhiatna thleng thinah a bul tumtu man chhuaha hremna pek ngei thin pawh a tha hle a ni, a ti.

Er. Lalhmingsangi, SDO, PWD, Project Division III hnen atangin Technical report ngaihthlak a ni a. He building  hi 13th Finance Commission (2011-2015)  sum hmuh atanga sak niin, Rs. 179.70 lakhs senga sak a ni a, a zau zawng hi 554.76 Sqm niin a  building ah hian office, barrack, duty room, recreation room, underground tank, garage leh Store bakah Type II quarters pali a awm a ni. Ni 18.09.2015 a sak tan niin, ni 10.01.2017 khan sak zawh a ni. Contractor hi Pu Vanhnuaithanga, Tuikhuahtlang a ni.

He building sak rual hian Fire station complex chhungah tho hian, Type IV Quarter pakhat, cheng 47.99 lakhs senga sak leh Type III Quarter pakhat Rs. 50.87 lakhs senga sak bakah Brick Walled Boundary Fencing, Rs. 16.44 lakhs senna Contractor dang hnuaiah thawh zawh tawh a ni bawk a ni.

Serchhip fire station hi ni 17.4.1998 khan neih tan a ni a. Tun dinhmunah hian Officer incharge 1, driver 3 leh firemen 6 an awm mek a, Fire tender hi 2 an kawl bawk a ni.

Building thar hawnna inkhawm hi Pu Lalhuliana Fanai, IPS, Director Fire & Emergency Services chuan a kaihruai a, Serchhipa sawrkar mi pawimawh hrang hrangte, chanchinbu mite leh district chhung mi pawimawh te an tel tha hle a. Pu Saidingliana, SP, Fire & Emergency Services chuan lawmthu sawiin hnu a khar a ni.-DIPR

Serchhip DC Sangchhin Chinzah leh YMA sub-headquarters, Serchhip hnuaia Vigilance & Monitoring Committee hruaitute chuan nimin khan Serchhip Hmarveng Complex Field-a phûl lem phah mek an tlawh. Phul lem phahtu NBCC hnuaia Agni Shanti hotute chuan, February 2018 chhunga phah zawh an tum thu an sawi.

Khelmual siam mek an en hnuah YMA Vigilance & Monitoring Committee hruaitute chuan Serchhipa UDPA department officer Vanthangpuii a pisaah hmu a; artificial grass phah leh stadium gallery inkarah synthetic track phah a nih loh chuan a sir vela vaivutin grass a tihhmêlhem an hlauhthawn thu hrilhin, synthetic track phah a nih hma chuan khelmual chu hawn an remtih loh tur thu an sawi.

Vanthangpuii chuan, Aizawla UDPA hotu liante beráwn nghalin, UDPA hotute chuan phul lem phah hualin synthetic track phah an tum thu leh, a phah turin contractor SIMCOT thlan a nih tawh thu an hrilh a; a siamna tur sum pawh NEDP-ah dil mek a nih thu an sawi bawk.

Serchhip Hmarveng Complex Field-a football khelmual sak hna hi kum 2011-a ṭan a ni a, NBCC hnuaiah a tirah BGM company-in an sa phawt a, kum hnih chhunga peih tura ruahman ni mah se, an peih theih loh avangin BGM chu bàn an ni. Chumi hnuah NBCC hnuaiah Agni Shanti, Guwahati-in an thawk leh a ni.

Football stadium hi cheng vbc. 15 sênga siam a ni a, mipui ṭhutna tur gallery leh dressing room turte peih tawh niin, a hungnapawh peih a ni tawh bawk. -Vanglaini

SERCHHIP AH CHAPCHAR KUT 2018 : Vawiin khan Serchhip DC Meeting Room ah Bawrhsap Pi Sangchhin Chinzah kaihhruaiin Chapchar Kut Organising Committee chuan kumin March ni 2 a Chapchar Kut hman dan tur an rel.

Chairman Pi Sangchhin Chinzah chuan, Chapchar Kut hlu leh nuam tak kan hman theih nan ruahmanna siam thiam a tul thu sawiin hnam ziarang chawilarna leh thangthar te hnena hrilh hriatna remchang tak a nih thu a sawi a. Member te chu Kut hlimawm tak duangchhuak ngei turina fuih a ni.

Vawiina meeting hian Chapchar Kut hi ni khat hman turin a duang a, a hmanna hmun atan Leisekawt Field chu a thlang bawk.  Kum hmasa lama Serchhipa Kut hman tawh dan te thlirletin kumin atana fund dawn tur Rs. 1 Lakh chu a beitham deuh nia hriat a ni a. Thuneitu sang zawk hnena dil belh tha tih tlan niin a bak mamawh la awm pawh a tul anga thawhkhawm tura ruahmanna siam a ni. YMA Sub-Headquarters chu a hman dan tur kimchang, mipui huapzo leh thangtharte tana tangkai tur zawnga programme lo duang turin a ruat a. Mizoram Upa Pawl Sub Headquarters leh MHIP te pawh an chanvo tur hrang hrangte ruahman sak nghal an ni.

Hengte bakah hian a hmanna hmun tur puahchahna atana sawrkar Department hrang hrangte chanvo tur pawh a siam fel nghal a ni. Tin, he ni hi sawrkar ni pawimawh a nih ang ngeiin sawrkar hnathawk zawng zawngte a hmuna kala kim taka tel ngei turin a rel bawk.

Vawiina meeting ah hian Serchhip SP, Pu Lalringdika, Addl. DC  Pu Chuauhnuna leh District Officers te, tlawmngaipawl, MJA, khawtlang hruaitute leh member dangte an kal tha hle a ni.-DIPR

Mercy Hospital Serchhip ( Rural Diagnostic & Research Centre): Vawiin chawhnu khan Chief Minister Pu Lal Thanhawla chuan New Serchhipah private hospital thar, Mercy Hospital( Rural Diagnostic & Research Centre)  chu a hawng.

Chief Minister Pu Lal Thanhawla  chuan state thanglai Mizoram tan Hospital tamtak din a harsat laia mi tlawmngaite rawn penchhuakin mipui rawngbawlna a ngaiin Hospital an rawn din zel chu malsawmna a ni a ti a. Damlo enkawlna mai ni lo, natna zirchianna atan te thlenga Mercy Hospital in hmalak a tum chu tha a tih thu a sawi a. Tunhnaiah rannung seh avanga natna bakah TB (Ngawr) natna te a lo pung leh ta te chu a bulthum ah zirchian theih ni se a lawmawm hle ang a ti a. Mizoram in a mamawh chu damlohna avanga phai pana inenkawl ngai lo in state chhungah damdawiin tha awm ve se tih a nih thu a sawi a. Private Hospital ten hma an sawn viau chuan sawrkar hospital te pawhin tanlak nachang an hriat a ngai ang a ti.

Mercy Hospital Serchhip ( Rural Diagnostic & Research Centre): Hriselna (Healthcare) chu India ram pum mamawh leh chona lianber pawh a nih tel thu a sawi. Vaihlo zuk leh hmuam hman nasat ei leh ina fimkhurlohna avangin Mizoram chu a chhunga mihring cheng zata chhut chuan state hrisello ber a tih theih chu a vanduai thlak hle a ni a ti a. “Min ti baltu, min ti rimchhetu leh min ti hrisellotu vaihlo hi drug a ni tih kan hriat a ngai a, Chinai hi mihring ei atana siam a ni lo a ni”, a ti. Hriselloh avangin Mizoram sawrkar sum a hek tih a sawi a.  Kum tin sawrkar hnathawkte Damdawi in Bill chu Cheng vaibelchhe sawmriat atanga za thleng te a nih ziah avangin Mizoram Budget a sum hmun thuma thena hmun khat dawn chu sawrkar hnathawk leh an chhungte damdawiin senso ah hman ral ziah a ni a ti. Chief Minister chuan nitin  amah rawn dawrtute zinga tam zawk chu mi khawsak harsa tak tak RSBY a inziahna chang hre si lo te an nih thu a sawi a. VC leh LC ten heng mi harsa zawkte hi Central sawrkarin a tanpui theih nan RSBY kawhhmuh turin  tanlak ni se a tha hle ang a ti.

 Ram kalsiam ruhrel tam tak sawrkarin a siam mek leh a ranglam a tihhlawhtlin tum zingah Medical College pawh a tel thu a sawi a. Nakumah chuan college kalpui theih beisei a nih thu sawiin hmalak belh tur leh sen belh tur pawh a tam tham hle a ni a ti. Mahni hna a thahnem ngailo leh sawrkar in hlawh a pek phua thawklo sawrkar hnathawkte an hnawksak tih a sawi a. Damdawiina thawk zingah pawh chutiang mi chu an tel thu leh private hospital aia an mahni pan hram hram tu mi rethei zawk te  an lo dawnsawn danah pawh thil mawilo hriat a ngai fo chu siam that ni se a lawmawm hle ang a ti. Sawrkar Hospital hnathawkte inthlahdah avang ni ngeia puh theih tura  thu hriat nuamlo leh thil vanduaithlak a awm fo chu enfiah ni se a duh thu a sawi a. Hospital din tawh zingah damlote vanduaina denchhena sum siam tum an awm thin tih sawiin chutiang mi chu Mizoram in a mamawh lo a ni a ti.  Damlote duat taka enkawltu leh hmangaihtu hospital te Mizoram in a mamawh ber a ni a ti a. Sumdawnna rilru pua hospital din, damlo suma in chhek lian leh damlo te harsatna hrethiamlo  chu an referral nihna hlihsak zel a ni ang a ti a. “An enkawl dam theih si loh sum duh vanga an hospital a rei tak  damlo kawl chingte pawh an awm tih sawi a ni a, chung mi te chuan a thil tih ah zahna chang hria se a tha hle ang”, tih a sawi a. Sawrkar damdawiin a chinfel theih sum um vanga Private Clinic a in refer le hang chi te pawh sim tel ni se a tha hle ang a ti.

Mercy Hospital Serchhip ( Rural Diagnostic & Research Centre): Mercy Hospital hi Pu PC Lalnunpuia leh Dr.Lalrinchhana Pachuau ten inthuruala an din a ni a. An ni pahnih leh Resident Doctor Dr Laldingngheti te bakah Mercy Hospital-ah hian thawktu mi 30 : Staff Nurse 8, Female Attendant 4, Grade IV 4, Driver 2, Cashier 2, Accountant 2, Shopkeeper 1, Radiologist 2, Lab Technician 2, Receiptionist 2 leh Pharmacist 1 te an awm a ni. Puanzarna nena thuam khum 20, Cabin Room TV chhawm 4, Inzaina Pindan (Operation Theatre), Backup ICU, Nauneihna Pindan, Patho & Bio Chem Laboratory, UltraSound, Digital XRay  leh Maternity Ward Khum 3 awmna te Mercy Hospital-ah hian siam a ni bawk a ni. Nikum November ni 27 atang khan Mercy Hospital hi a takin hman tan a ni a. Tun thlengin OPD-ah mi 618 an inentir tawh a, mi 244 Casualty ah an lut tawh a, mi 21 hlawhtling taka zai an ni tawh a, damlo 87 enkawl an ni tawh a ni.

Mizoram Journalist Association (MJA) Serchhip District chuan vawiin khan Annual Conference vawi 11-na hmangin he hun hi MJA Geheral Hqrs. atangin hruaitute pawhin an rawn hmanpui a ni.

Serchhip I&PR Conference Hall-a MJA Serchhip Disric Annual Conference hi Pu C. Ramengmawia, Vice President chuan kaihruaiin he hun hmanpuitu R. Lalhmangaihzuala, Treasurer, MJA General Hqrs. chuan Journalism chu hna pawimawh tak a nih thu leh hei vang hian MJA pawh pawl pawimawh tak a nih thu a sawi a. Hei vang hian Member pawh sawrkar in fir taka duhin Mizoram pumah mi 194 chiah an awm mek thu a sawi a. MJA chu mipui rawngbawltu a nih thu leh a Moto pawh ‘Mipui rawngbawl’ a nih thu sawiin, hei vang hian mahni hna ah thahnem ngaih a pawimawh thu a sawi bawk.

MIZORAM JOURNALIST ASSOCIATION (MJA): He hunah hian Serchhip DIPRO, K. Saitluanga chuan MJA Serchhip District in an dintirh atanga thlalak chi hrang hrang an dahkhawmna, Photo Album chu tlangzarhin MJA Serchhip District te nen thawhhona tha tak an nei chu lawmawm a tih thu a sawi a. Sawrkar-a I&PR Deparment lam pawhin thuthar thehdarhute tan theihtawp chhuaha hma an lak thu sawiin, sawrkar hmalakna puanzarna kawngah pawh an theih anga hma an lak thu leh thuhar thehdarhtu ten sawrkar hmalakna zau zawka an tlawh theih nan ruahmanna siam a nih thu a sawi bawk.

He hunah hian C. Lalhminghlua, President, MJA Serchhip District chuan thuthar thehdarhtu, a bikin eizawn nana hmangte chu sawrkar leh mipui kara palai rinawm tura ngaih an nih avangin, sawrkar leh deparment hotuen an duhsak rualin an kut phuartir loh a pawimawh tih a sawi a, chutih rualin mipui lam pawhin an duh duh an tihtir theih leh an vuak fung ni lo tura fimkhur a tul thu sawiin, a diklo leh thalo zawnga boruak her theiah pawh boruak tidai tur zawngin ngaihuahna hmang thin turin a chah a. Chi leh chi, hnam leh hnam, party leh party mai bakah kohhran leh sakhua thlengin a enga mah ngaihtuahna fim tibo khawpa feeling loh a pawimawh thu a sawi a. “He media hna hi kan hlawkpui lo a nih pawhin ram leh khawtlang rawngbawlna hna pawimawh a ni tih pawm tel chungin thawk ila. Mahni mai chuan engmah nilo te kan nih avangin, kan thawhhona atana inlungrualna hi ngai pawimawh theuh ang u,” iin kalkhawmte chu a fuih bawk.

MIZORAM JOURNALIST ASSOCIATION (MJA): Vawiin a MJA Serchhip District Annual Conference-ah hian Zonunsanga Kawlni,  General Secretary, leh Lalremruata Ralte, Treasurer, te hnen atangin report ngaihthlak a ni a, tunhnaia Mizoram Civil Service (Combined Compeiive) Exam-a Serchhip atanga MCS-a tling, Lalthakima Chhangte s/o Biakkhuma Chhangte, New Serchhip Bazar Veng hnenah lawmpuina thuziak an hlan a. An President, Pu C. Lalhminghlua kaihhruaina hnuaiah rorelna neiin tlai lamah kum 2018-2020 chhunga an pawl hruaitu tur thlanna an nei nghal bawk. MJA Serchhip District-ah hian Member mi 12 an awm mek a, heng zinga mi 9 hi Serchhip-a awm niin Thenzawl-ah mi 2 leh North Vanlaiphai-ah mi 1 an awm bawk.

MZP headquarters, Serchhip chuan thuchhuah siamin, Serchhipa Roṭhuami'n Bilzel-a a in hmun chu Mosolman biak-in (mosque) sakna atan hnam dang hnenah a hralh niin an tarlang a, "Hnam dang hnena ram hralh hi dan kalh a nih avangin hralh lo turin kan hriattir a ni," an ti.

Serchhip MZP chuan, India ramah eng sakhaw biak-in pawh a ding thei a, Mosolman biak-in din pawh ram danin a phal tih an sawi rualin, "Tribal area-ah non-tribal ten in leh lo ram nghet an nei thei lo tih a nih avangin mosque hmun tur hi an nei nghet thei lo a ni," an ti a; Roṭhuami w/o Lalbuanga (hnam dang)-in hnam dang hnena ram a hralh chu tribal-te humhalhna dan kalh a nih thu an sawi.

Mizo hmeichhia, hnam dang pasala neite chu pasal an neih rualin tribal an nihna a tawp ve nghal tih hre tura chahin Serchhip MZP chuan, "An pasalte sponsor theihna dan an nei lo tih hre nawn leh turin kan ngen a, an pasalte thlavang hauh lo turin kan hriattir a ni," an ti.-Vanglaini

Krismas leh Kum thar lo thleng turah boruak muanawm tak a awm theih nana hmalakna tur chungchang ngaihtuahin Pu Lalringdika, MPS, Superintendent of Police, Serchhip chuan Sub Hqrs. YMA Serchhip  hruaitute leh Serchhip Khaw chhunga YMA branch  hrang hrang hruaitute a Office-ah  Meeting neihpui.

Pu Lalringdika, SP Serchhip chuan kumin  hunpui lo thleng tur hi mipuiten hlim tak leh thlamuang taka an hman theih nan YMA hruaitute chu thawhho puiah a sawm a. He hunpui chhung hian midang tana hnawksaka awm leh bengchheng siamte chu khap tlat anih thu sawiin, lirthei chetsualna chi hrang hrang  thleng thei laka venhim hna thawktu Police te tawiawm turin YMA hruaitute sawm a. Mahni huam chhung theuhah zanlama duty-te lo insiam leh tura ngenin, tlawmngaia duty leh hnatlangte tan thingpui inna tur pawh ngaihtuah sak theih anih tur thu a sawi a. YMA te nen thawhhona thatak anlo neih tawh naah lawmthu sawiin he hunpui lo thleng turah pawh thawhhona tha tak an neih leh ngei a beisei thu a sawi bawk.

Pu R. Sanghmingthanga, President, Sub Hqrs YMA  Serchhip pawhin  thusawiin, sawrkarin YMA a beiseina leh sawrkar thuchhuakte bawhzui tura  theihtawp chhuah  an inhuam thu sawiin, Police te nen thawhona tha tak an nei thin chu lawmawm a tih thu leh inlungrual taka thawhho zel a duh thu a sawi a. Sawrkar phal loh halpuah/halmawi leh puak thei thil chi hrang hrang  hal lohna Branch nih tum theuh turin YMA branch tinte a ngen bawk a ni.

Vawiin Meetingah hian Sub Hqrs YMA Serchhip hruaitute bakah Serchhip khawpui chunga Branch YMA hruaitute an kal  tha hle a ni. -DIPR

Vawiin khan Serchhip DC Conference Hall ah Serchhip District chhunga sawrkar Department hrang hrang aiawh kal khawm ten Serchhip District Disaster Management Plan thar buatsaih dan tur sawihona leh inrawn khawmna an nei a. He hun hi Serchhip District Incidence Response Team a Incident Commander Pu Chuauhnuna, MCS, Addl DC nibawk chuan a kaihruai a ni.

Pu Chuauhnuna chuan, chhiatna lo thleng palh thei atana lo inbuatsaih lawkna tha neih tluka inbuatsaih dan tha a awm chuang lov    a, kan duh ber erawh chu chhiatna hian min nuai lo se tih a ni reng thung a ni, a ti a. Serchhip District Disaster Plan 2016 tha tak kan neihsa atanga hmasawn tulna lai leh siam rem deuh ngai te, tihbelh ngai awm an gang te tihbelh bakah keimahni lam te pawh kan intuai thar nan vawiina DDMA Meeting leh Plan thar sawihona hi kalpui a nih thu a sawi a ni.

He hunah hian Pi Vanlalduhi Ralte, District Organiser, Disaster Management and Rehabilitation chuan District Disaster Plan, 2016 a Department hrang hrangte chanvo leh an hnathawh tur duan tawh te tarlangin, chuta tanga hmasawn theihna kan neih hrang hrante Department aiawhtenan sawi zui nghal a. Hriat thiam loh inzawhfiahna hun leh hmanraw mamawh belh awm thei te pawh sawi ho nghal a ni bawk.

Vawiin hian Serchhip Khawpui ah UD&PA Department hmalakna in "Zero Littering Campaign" hman ani. He hun hi khawpui chhung hmun hnih - Serchhip Bazar ah leh New Serchhip College Peng ah te hman ani.

He Campaign hi Serchhip khawpuiah bawlhhlawh a hmun taka paih anih theih nana hmalakna ani a. He programme ah hian India Ram Khawpui Fai inelna Swachh Survekshan-2018 chu mipuite hnenah hrilhfiah leh hrilh hriat ani bawk. India Ram khawpui fai inelna ah hian Mizoram atanga khawpui 23 zingah Serchhip chu tel in, he inelna atan hian mipui a te ber atanga lian ber thlenga tanrual a ngaih thute sawi niin "Swachh Survekshan-2018 Roadmap" inzirtirna neih nghal ani bawk.

He hunah hian, Pu R. Vanrengpuia, SDO (Sadar)  leh Pu Chuauhnuna, Addl. DC te chu Chief Guest niin, Pi Vanthangpuii, District Urban Development Officer leh Pi Grace Lalrinfeli, Project Manager  ten zirtirna an pe a, Swachh Survekshan-2018 Ambassador Pu Lalhmangaiha Chawngthu leh pawl hrang hrang kohhran thalai ten an telpui bawk.

Serchhip Khawpui chuan "Tualphiah Fai Ni" hman tan tum in, he Tualphiah Fai Ni hi Inrinni tin chhungtin ten mahni In leh a vel phiatfai tura Serchhip District Sanitation Task Force in a rel anga kalpui tan anih thu te tlangzarh ani bawk. -DIPR Mizoram

Vawiin chawhma dar 10:00 khan Swachh Bharat Mission (G) hmalaknain khaw 45 a sem tur Community Dust-Bin 400 chu Pu Zodintluanga, Hon'ble Minister PHED chuan PHED Serchhip Office tualah a vai liam.

Minister chuan faina kawnga hmasawnna atan sawrkar laipuiin nasa takin hma a la mek zel a, chu hmalakna kalpui anih hma pawha Faina Hapta kum tam tak lo kalpui tawhtu kan ni a, chuvang chuan faina kawnga hmalakna kawngah pawh hmasawnna hmel kan hmu zel a, a lawmawm hle a ni a ti. Serchhip District chu pawnlera inthiar awmlohna (ODF) ni hmasa pawl an ni chu chhuanawm a tih thu sawiin, thawktute inpekna a fakawm hle ani a ti a.Faina kawnga chak zawka hma lak anih zel theih nan Aizawl khawlaia bawlhhlawh paihte hrem theihna dan siam anih tawh thu sawiin, a bawhzuina kawngah pawh hma lak mek zel ani a ti bawk.

He hun hmanpuitu Pi Vanlalawmpuii Chawngthu, Hon'ble Minister pawhin thu sawiin, bawlhhlawh bawm sem turte hi tangkai taka hman anih ngei a beisei thu a sawi a. Faina atan hian pawimawh bik kan awm lova, kan zavaiin kan pawimawh dan a in ang vek a, kan tanrual a tul ani a ti a, Serchhip chu bial dangte entawn tlak ni tura tan la zel turin a chah bawk a ni.

He hun kaihruaitu Er. F. Lalsanglura, Sr. EE, PHED chuan Swachh Bharat Mission (G) hmalakna tlangpui sawiin, thingtlang khua in thianghlimna, hriselna leh kan nun dan hrim hrimah changkanna lama hma kan sawn theih nan bawlhhlawh leh tui chhia te chu kan hriselna khawih pawi thei lo tura dah bo turin Solid Liquid Waste Management (SLWM) chu theih tawpa kalpui anih thu a sawi a. Serchhip District chhunga khaw hrang hrang 7 ah bawlhhlawh paihna (Burial Ground) siam niin, khaw 1 ah zawh fel tawh ani, a ti.

Thingtlang khuaa chhung tinin bawlhhlawh bawm tha an neih theih nan Keitumah 455, Bungtlangah 457 leh Buangpuiah 113 sem anih tawh thu sawiin, heng bakah hian khaw 35 ah atah tawla sem tura hma lak mek anih thu a sawi bawk-DIPR Mizoram

PWD National Highway chuan Bungtlang leh Serchhip inkar blacktopping hna an thawk dawn a, kawng siam hna hi chak taka kalpui anih theih nan a hnuaia tarlan ang hian Pi Sangchhin Chinzah, District Magistrate chuan kawng hawn hun leh khar hun thuchhuah a siam-