Mizoram team chuan vawiin hian Santosh Trophy khel turin Kolkata an pan ang. Nimin zing khan Mizoram team hian Lammualah training hnuhnung ber an nei a, manager Hmingthansanga chuan, "Inelna hmachhawn turin kan inpeih tawh," tiin Vanglaini a hrilh.
Santosh Trophy vawi 72-na hi March 19 leh April 1 chhungin Kolkata, West Bengal-ah khelh a ni dawn a, Mizoram hian an match hmasa berah Goa chu March 20 hian an hmachhawn ang.
Mizoram hi Group B-ah Punjab, Goa, Odisha leh Karnataka te nen an awm ho a, nikum khan Lalsangzuala Hmar kaihhruai team hian semifinal-ah champion zui ta. West Bengal chu penalty-ah an hneh lo. Santosh Trophy-ah Mizoram hian kum 2014-a nomawi an chawi hnuah final an la thleng leh lo a, kum 2015 khan H. Vanlalthlanga hoin champion nawn tum mah se semifinal-ah Punjab lakah penalty hmangin an chak lo.
Mizoram manager Hmingsanga chuan, "Qualifier kan khel zo a, harsatna vangin kan player ṭhenkhat kan chhawr thei lo. Kum dang zawng aiin kan squad a pan deuh turah kan ngai hman a, amaherawhchu Mizoram Police player chhawr theih an nih leh takah chuan ka ṭha thawkhat viau a ni. Training kan nei ṭha a, nomawi rawn hawn ngei kan tum ang," tiin Mizo mipui lawmna siam ngei an tum thu a sawi.-Vanglaini
Post a Comment