Showing posts with label Mizoram Infiamna (Sports). Show all posts
Tweet Share Share Share Share Share

March 15, 2022
KUM 4 CHUANG CASE RIP TAK AWRHA JAIL A TAN HNUAH MIZO TT PLAYER CHHUANAWM LALRINPUIA'N THIAM A CHANG TA, LALPA KAN LAWM E!
Mizo Player Lalrinpuia

Mizo tlangval rawlthar Lalrinpuia, Table Tennis player chhuanawm, Mumbai Airport-a Narcotics Control Bureau te’n an man tak kha kan la hre reng awm e. December 13, 2017 zing dar 4:30 vela an man atang khan, hrehawm takin Mumbai Taloja Jailah thubuai rip tak nen a tang ta reng mai kha a ni a. He an puhnaah hian thiam lohna engmah nei lo, naupang rilru thianghlim tak bumna tenawm tak avanga vanduai ta ni ngeia hriatna a awm avangin Mizoram Table Tenis lam hruaitute leh amah lainat tuten Jail atanga a chhuah theih nan theihtawp an chhuah a, an thawhrimna leh tawngtainate Pathianin a chhang a, vawiin khan a thiamchanna thu tih chhuah niin, jail atangin tlangval Rinpuia hi lak chhuah a ni dawn ta!


Tunge Lalrinpuia Chu?
Lalrinpuia (Rinpuia) hi Pu Lachhuankima leh Pi Loicy te fapa Maubawk veng, Aizawla cheng thin an ni a. Lalrinpuia hi kum 11 mi a nihin India rama Table Tennis zirna tha bera sawi thin, Petroleum Sports Promotion Board (PSPB) Table Tennis Academy, Ajmer, Rajasthan-ah awm tanin he hmun atang hian Mizote aiawhin National Tournament-ahte tel chhovin Cadet, Sub-Junior, Junior leh Youth Category-ahte India ram champion a rawn ni chho va, Gold, Silver leh Bronze Medal Naional level pawh a vaiin 40 vel lai a la hman. National Championship/Tournament-ah tum 7 a Champion hman a, Mizo ti hmingthatu, Mizo nih ti nuamtu pakhat a lo ni thin a ni.

India ram aiawhin khawvel hmun hrang hrang a tlawh tawh thin a, International Medal pawh 8 lai a la hman a, heng zinga 3 phei chu Champion medal an ni nghe nghe. Youth Category a khelh atang phei chuan naupangte ni chungin India Senior Team-ah pawh koh a ni ve ta hial a. 2017 Asian Championship, China-ah khan India Team squad-ah a han telve hial a ni. Mens Singles-ah naupangte ni chungin India ram pum (National Championship)-ah lawmman 3-na la thei a ni hman a, hma hun eng tak a neih mek laiin bumna avangin harsatna nasa tak a tawk ta a ni. 

Zofate mai ni lo, India nghahfak zing a mi Olympic hial khel thei tura rinkai zing ami a ni a, chumi thlen ngei tuma India rama Professional TT Player ho inzirna tha bera sawi Anshul Garg Academy (AGA), New Delhi a inzir mek a nih laiin vanduaina tawkin a tih sual awm miah lovah jail bang a zut ta a ni.

Rimpuia hi hi aia upa zahthiam, mi ze zawi leh mi inthlahrung tak a ni a, a fel zia leh a rilru put hmang chu a thianten an hrechiang hle a ni. Midang tana inpe tak mai a ni a, mi tlawmngai tak a ni bawk.

Bumna Thangah Awkin, A Tan Vanpui A Chim! : 
Kum 2017 December thla a lo ni a, Chutia hmasawn tuma thahnemngai leh phur taka Anshul Garg Academy (AGA) a Table Tennis training a beih sauh sauh lai chuan, Delhi-a In luaha khawsa ve thin, a Mizo pui amah duhsaktu leh hmangaihtu anga a ngaih, u ena a en te; Rebecca Ralte (Shillong) leh Lalduhkimi (Aizawl) te chuan anni Table Tennis thiam ta chu Mozombique, Africa lamah a thlawna zinna (to & fro - Air ticket free-in) an thian (mihang)te nena an buatsaih sak theih thu leh zin ngei tura an duhsak thu an hrilh a. An ni thalai tan chutianga a free-a zin thawven theihna hun remchang an nei ta chu an lawm hle mai. Phur takin Mozambique-ah chuan an zuk kal ta a. A thianpa sawi danin khulai velah pawh Mizo hmeichhe 2 te thian mihang hoin an lo buaipui a, an polite-in an chungah pawh an lo tha hle.

An haw a lo hun ta a, an thian dun hawna tur ticket an neih sa December ni 8 chu engemaw airlines lamah harsatna a awm avangin tih danglam (cancelled) a ngaih thu leh tihdanglam a tul thute, ticket thar ni indawtin an thiandun tan an laksak leh tak thu chu Rebecca Ralte te thiandun chuan an rawn hrilh ta mai a! Mak an ti viau nghe nghe. An ticket lak thar ang chuan a thianpa chu December ni 11-ah a lo haw hmasa ta a ni. Rinpuia erawh chu ni 1-a tlai turin, December 12, 2017 atan ticket laksak a ni ve thung a. Hetia a rawn haw dawn hian, mihang lo buaipuitu ber chuan, Rinpuia hnenah an thianpa (mi hang) Delhi a awm bungrua, thawmhnaw lum tlem azawng awmna Trolley Bag Sen thawn a duh thu leh Delhi a thlen hunah, an thianpa chuan Rebecca Ralte te nen an lo lam tur thu hrilhin, hawn sak hram turin a ngen ta a. A ni chuan a chhunga awmte an han check thuak thuak a. Thiam taka bag thuahna kara thil an dah chu hmu lovin, thawmhnaw tlem azawng chauh anga ngaiin, tha taka an cham chhunga lo buaipuitute thil chu tlawmngaiin a rawn hawpui ta a ni.

Chutih mek lai chuan, Narcotics Control Bureau lam chuan an agent te kal tlangin Rinpuia thil kenah chuan ruihhlo a awm tih report an lo dawng thlap mai si. Mumbai Airportah an lo chang ran mai a. December ni 13 zing dar 4:30 vel a lo ni a, Ethiopian Airlines lo tumin Rinpuia chu ama pual Bag dum ak chungin a lo thleng a, belt no.9-a checked-in trollley bag sen rawn vir chhuak a chan lai pawh chuan amah man tumtute chu a bulah an lo awm reng tawh a. Trolley bag sen a lak veleh chuan Rinpuia leh a bag sen chu an man ta nghal a ni. A bul pindanah chuan hruai lutin a bag-a thil awm an zawt a, a ni chuan Chu bag senah chuan thawmhnaw bak a awm loh thu leh mi thawn a nih thute a sawi a. Delhi a an lo lam tur thute a hrilh a. Bag chunga thil awm chu an han bun a, a sawi angin thawmhnaw tlem chu a ni mai a. Mahse NCB-te chuan uluk takin an han check ta a, bag chhung lam zipper chu an han hawng a, a tet thui phui thar lehna hnuhmate leh screw-a kilh hnan thlap chu an han hmu ta a. Bag chu an zai teta, a chhungah chuan lehkha buanga tuam chhungah plastic/sarang eng(yellow) phek thlarh leh fel taka intuam ruihhlo (methaqualone) chu an hmu ta mai a. An han buk a 3.900 kg zet a lo ni leh nghal a. Rinpui atan Vanpui a chim a, Mumbai Taloja Jail hreawm takah dah a ni zui ta nghal a ni.

Engtin Ni Ta Zel Maw? 
A mantu ten thubuai rip tak an siamsak zui ta a. Narcotics Control Bureau(NCB) Delhi lam ho chuan AGA, New Delhi-a Rinpuia room-te an lo luh chilh zui ve nghal bawk a. Uluk takin an lep se a, mahse rinhleh tur thil pakhatmah hmuh tur an nei lo.  
Hemi rual hian Rinpuia te zinna ngaihtuahsaktu Rebecca Ralte, Shillong, Lalduhkimi Aizawl leh an thian mihangte chu man tumin Delhi leh Shillong-ah te NCB ho an fehchhuak nghal a. Mahse anni hi an lo bikbo hman zel thin avang leh an tlanchhiat reng avangin, tun thlengin man an la ni ta lo.

Hun a lo vei a, Rinpuia chu thubuai rip tak nen Covid hri karah Jail-ah hun a hmang chho ta zel a. A chhungte leh amah lainattu, duhsaktu leh a thiante, Mizoram Table Tennis Association (MTTA) hruaitute leh Mumbai Mizo hruaitute indawrin Ukil-te ruaiin Bail a chhuah an dil sak a. High Court thlengin dil a ni thin a, mahse a bail dilna hi hnawl a ni thin.

Hun a lo kal a, Mizoram Table Tennis Association chuan an player tan hian hma la thar lehin, anmahni chhung leh mi thenkhat te hnenah thawhlawmte an khawn a. Chu chuan a daih zawh loh avangin social media lamah Tanpuina thawhlawm khawnna siam a ni a. MSR lamah pawh September ni 21, 2021 khan Rinpuia puala vehbur khawnna kan lo post tawh a ni. Bail dilna High Court-ah thlen thar leh niin, a hlawhtling leh ta lova. Beidawng lovin India ram court rorelna sang ber Supreme Court-ah an zualko leh ta a. Hearing vawi 4 neih hnuah Supreme Court chuan September ni 7 khan order siamin, bail hi a phalsak lo leh ta a ni.

Amah ngaihsaka hmangaihtuten beidawng lovin an bei zel a. Mi thahnemngaite zarah ukil rawihna tur cheng nuai 10 chuang khawn ngah a ni a. Ukil ruaiin kum 4 chuang zet Jail-a hrehawm taka a tan hnuah, Supreme Court chuan a bail dilna hnawl paha a thubuai hi ngaihtuah thuai nise a tih ve tak avangin, beiseina sang tak nen tawngtaina nen an tang takmeuh a, vawiin khan court order chhuakin Rinpuia hian thiam lohna engmah a nei lo tih court-in hriain thiamchangin chhuah a lo ni dawn ta a ni.

Rinpuia hmangaiha a chhuah theihna atana sum leh tha leh ngaihtuahna sengtute chungah Rinpuia chhungte leh amah buaipuitute an lawm em em a ni.

~14th March, 2022: Vanneihthanga
Read more »
Tweet Share Share Share Share Share

December 15, 2021
MIZOTE LEH INFIAMNA TIHMASAWN THEI 'CHAMPION THURUK' TLANGZARH

Infiammite leh coach-te tana pawimawh, infiammi ni ve lote tan pawha ṭangkai tak, Pu H Thangchungnunga buatsaih awmze nei zawka Mizoram infiamna tihmasawn thei tura beisei 'Champion Thuruk' tih lehkhabu tlangzarh a ni.

Thawhlehni khan Terrace Restaurant, Aijal Club, Aizawlah Revd. Chuauṭhuama chuan 'Mizo ṭhalai, a chhiar apiangin bengvar nan an hman a, infiamna lama hmasawn nan an hman theih nan' sawm bik hmaah a tlangzarh.

Lehkhabu ziaktu, Pu Thanga chuan Mizoten infiamna tuipui hle mah ila, sports science lamah ráwn tur mihring leh Mizo ṭawng lehkhabu a awm mang lo va, chuvang chuan a buatsaih tih a sawi.

Champion Thuruk, 'Evidence Based Practices in Sports Training' lehkhabu hi a kawm bakah a phek pum puiin colour vek a ni a, sawi hawngtu Pu Hmingthansanga chuan 'infiammite tana hlu leh infiammi ni lote tan pawh taksa tihchakna tura ṭangkai a ni ngei ang' a ti.

Kawng kal neia taksa tihchak leh sawizawi dan tur hrilh fiahin a lem nen inkawh hmuhna a awm vek a; ei tur ṭha leh dik bakah intihsiak dawna inbuatsaih dan tur indawt, inkhelh hma leh inkhelh zawha tih tur, naupang talent zawn chhuah dan leh pheikhawk bun tur thlenga ziah a ni.

Lehkhabu ziaktu Pu Thanga chuan : "Mizoram infiamna huangah kum 2000 vel khan sports science kan sawi ṭan a; khatih lai khan mi mâwl ang maiin min en a, a manganthlak hle a ni.

"Tunah chuan a ṭangkaizia leh zir chianna awmze nei behchhana inpuahchah a ṭulzia kan hrethiam tawlh tawlh a, thil lawmawm tak a ni," a ti.

Mizoram Weightlifting Association president Pu Thanga hian Mizoram State Sports Council hnuaiah sports promotion officer hna rei tak chelhin nikum khan a pension a, sports medicine subject-ah master degree nei niin Inder, Cuba atangin High Level Sports Training-ah diploma a zir chhuak bawk a ni.

'Champion Thuruk' lehkhabu hi phek 193-a chhah a ni a, Rs 500 man a ni.

~Thang Khuma T-a
Read more »
Tweet Share Share Share Share Share

December 03, 2021
MSR, 3 Dec, 2021: Muaythai World Championship, December ni 4 -11 a Bangkok-a neih tura referee & judge atana ruat zingah Mizo 3 an tel a, he inelnaah hian India atangin Mizo player (fighter) 5 an tel dawn bawk. Inelnaa tel tur te leh Mizo referee & judge te duhsakna ka hlan e.

Football Ground hi a hlu lo a ni lo. Field zawng zawng a Football khelh tum lo hian ngaihtuahna kan sen a va ngai em. Kan pumraw mila khawvel huapa kan lan theihna, cantact sport lam te hi kan tih changtlun a, hmasawn zawnga kan kal a hun ta hle mai.

Pic 1 : Standing (L-R) : Samuel Lalrozama, Dawrpui (referee & judge); Benjamin Zonunsanga, Luangmual; Lalthasanga Lelhchhun, Tanhril; Lalhlimpuia, Zonuam, Aizawl (referee & judge).
Sitting (L-R) : Jessica Lalhriatkimi, Dawrpui; Hmangaihlaltlansangi, Chamring; K. Lalhmingmawii, Durtlang; Liansangpuii Renthlei, Zemabawk North (referee & judge).
Mizo Infiamna


Pic 2:Player (L-R) : Lalthasanga Lelhchhun, Tanhril; Benjamin Zonunsanga, Luangmual; Hmangaihlaltlansangi, Chamring; K. Lalhmingmawii, Durtlang; Jessica Lalhriatkimi, Dawrpui

Mizo Muaithai


Read more »
Tweet Share Share Share Share Share

June 04, 2021
MIZO ZINGA USA A BASKETBALL PLAYER  HMASA BER TUR LALHNEHPUIA

Lalhnehpuia
June 3, 2021: Lalhnehpuia Chhakchhuak S/o Aldrin Lallawmzuala, Zarkawt veng chu North Park University, Chicago. Illinois, USA ah College kal turin thlan a ni. USA ram chhunga College level Basketball inelna a Point Guard atana an duh vanga he College hian rawn thlang an ni.   

Ani hi NBA Academy Noida, UP. India rama zir chhuak hlim a ni a. Tunah hian pawl 12 result a nghak mek.

NBA Academy a zir tur hian National Sub - Junior a zuk khelh tum khan NBA Academy Scout ten an lo thlang a. Kum 2018 khan Academy hi a zawm tan a. Academy games hi Australia ah te, USA ah te pawh a khel nghal a. Kum 2019 khan Point Loma Nazarene University, San Diego USA ah te pawh a lo zu khel tawh bawk.

He Zarkawt tlangval hi kum 18 chauh a la ni na a, feet 6 leh inchi 2 a sang a ni tawh a. Amah rawn thlang tu North Park head Coach Thomas Slyder pawhin a pawmraw len leh a chetran zia a hmuhin a lung a awi thu a sawi nghe nghe.

Hnehpuia chuan "Hetiang ka thleng thei hi ka lawm a. Academy Staff te leh ka chhungte min puihna vang liau liau a ni" tiin he hmun North Park hmuna khelh a lo chak tawh thu a sawi tel bawk.

Tum anga an awm chuan kumin August thla hian USA ah a chhuk thla dawn a. A  hma hian India player panga in USA a zirna hi an lo zu zawm tawh a. A then chu nikum lama kal tawh te an ni a. Ani hi India ram atanga a parukna niin, College level ah phei chuan a pahnihna a ni nghe nghe a. NBA Academy, India atrang a NCAA (National Collegiate Athletic Association)  khel hmasa ber tur a ni a.

College kal tura thlan ni tur hian thiamna, lehkha lamah leh Basketball lamah that leh thlen san a ngai hle a. Mizo tlangval thlan a ni thei hi a chhuanawm hle a, a sang thei ang ber thleng turin duhsakna kan hlan nghal bawk e. ~Madawnga Khiangte

[ToMZ is dedicated for archive and exposition of Mizo affairs to the rest of the world. Informations obtained are re-posted 'as-is' basis as a digitization initiative so as to make accessible to all through online surfing. Due credit is given to all author/owner except those which cannot be ascertained]
Read more »
Tweet Share Share Share Share Share

May 23, 2021
Mizo Boxer Lalbuatsaihi
Asian Elite (Men & Women) Boxing Championship 2021 neih turah Mizo nula Lalbuatsaihi chu India tan a feh chhuak dawn, nizan khan Delhi aṭangin inelna neihna tur hmun Dubai, UAE an pan.

Bethlehem Vengthlang nula Bs-i hian 2019 khan World Police Meet-ah India tan gold medal a lo la tawh a, ram tan vawi tam tak a lo feh chhuak tawh ṭhin. Tun ṭumah hian world champion vawi nga ni tawh MC Mary Kom te nen an inlan ang.

Kg 64 huanga khel tur Bs-i chuan, "Hri leng vangin inkhunghran a ngai a, hun rei tak chhung chu training ka nei ṭha tawk lo. Mahse, taksa chu ka sawizawi reng a, Pathian zarah a ṭha thei ang bera khelh theih ka beisei," tiin Vanglaini a hrilh.

Championship khel tur hian India team zingah Tokyo Olympic khel tura tling tawh - Mary Kom (51kg), Lovlina Borgohain (69kg), Simratjit Kaur (60kg), Pooja Rani (75kg) te bakah mipa boxer world number 1 Amit Paghal (52kg), Vikash Krishna (69kg) leh Asish Kumar (75kg) te an tel ang.

Tun hma chuan Interna­tional Boxing Associa­tion (AIBA) hnuaiah hian lawmman atan pawisa a tel ngai lo. Tun ṭumah erawh lawmman a awm tawh dawn, pakhatna $10,000 (Nuai 7.28), silver medal $5,000 (Nuai 3.64) leh bronze medal la tan $2500 (Nuai 1.82)a ni dawn. @Vanglaini 22nd May 2021

[ToMZ is dedicated for archive and exposition of Mizo affairs to the rest of the world. Informations obtained are re-posted 'as-is' basis as a digitization initiative so as to make accessible to all through online surfing. Due credit is given to all author/owner except those which cannot be ascertained]
Read more »
Tweet Share Share Share Share Share

December 21, 2020
Mizo tlangval chhuanawm NT Lalbiakkima

~Rsi Colney 
Nutlai Lalbiakkima

Mizo zinga boxer tha ber pawl leh a hming kan hriat reng tawh tur NT (Nutlai) Lalbiakkima chuan kum 1993 April ni 3 khan he khawvel eng hi a hmu a. N. Zomawia leh Zothanpuii te fa hming koh hian boxing khawvelah a hming a chher lian zual zel a ni.

New Siaha a khawsa mi tumruh NT Lalbiakkima hi zirna lamah pawl 12 a pass a. Zirna aia boxing thlangtu hian a duh a thlang sual lo hle. A tum ruhna leh sehhelna avangin LPS Pro Fight Light fly title tum nga zet a kawl a. Kum 2014-2019 chhungin a kawnghren chhuhsak thei an awm lo. 

Boxing thiamsa a piang a ni bik lo. Kum 2011 khan boxing luhchilh tanin Dingdong boxing club leh SAI-ah a training thin a. Kum 2014 ah chuan Mizoram  chhunga boxer tha ber te zingah chhiar a ni tan a. A thawhrimna leh tumruhna avangin amah hmangaih em em tu a nu leh pate enkawl nan Navy a zawm a. 

Boxing khel chhunzawm zelin kum 2018 June thla khan President Cup, Kazakhstan-ah inlanin World Number 1 leh Olympic gold medalist Hasanboy Dusmatov a hneh a. Boxing khawvel a barakhaih hneh hle a ni. President Cup ah goal medal hlawh chhuak zo lovin Bronze hawn mahse khawvel hriat a hlawh phah tho a ni.

Feet nga chauha sang ni mahse boxing huang chhungah chuan palian tak niin India tan medal a hlawhchhuak nual a. Nikuma a pa boral hnuah a pa duhthusam tihlawhtlingin turin a hna (Navy) chawlhsanin Professional boxer zinkawng a zawh tan a. South Korea-ah professional zinkawng zawh tura training neia a kal hnuah hripui a len tak avangin a duh ang a thleng thei lo a. Mizoramah rawn haw lehin a pa hnena a tiam a la tihhlawhtlin theih loh avang erawh chuan an khua ngeia haw a hreh hial a ni.

Hemi hnu hian Marine Pro Boxing Promotions, Mumbai a hmun khuar te nen inbiain a duh ang takin professional match an hlui thei a. December ni 20 ah inhnek tura tih a ni. Professional match khel tura a inbuatsaihna kawngah a duh anga hmanraw tha leh tihpuitu a nei lawk lo a. A harsatna hriatthiampuitu Pu Lalmuanpuia, Bawngkawn tawngin a ni hian a mamawh ang zawng zawng a buaipui sak. Boxing club/gym dinsakin a professional match hmasaber tur inbuatsaihnan a hmang zui nghal a ni. 

Mizoram mipui ten kan nghahhleh NT Lalbiakkima chuan professional huanga a inhnek hmasak berah South Indian boxer chu round 1-ah TKO in a hneh a. Zokeite tia inchhal NT Lalbiakkima tan bungthar a intan ta a ni.

Chawimawina a dawn tawhte:

1. 1st India Open International Boxing
Champhionship 2016 - Bronze Medal

2. Kazakhstan President Cup 2018 Bronze Medal
and Special Award

3. A.H Kydrov Memorial International Boxing Champhionship 2018 Bronze Medal at Russia

4. Senior National Boxing Championship 2017, Silver Medal and Best Challenger Boxser Trophy @ Visakapatnam

5. Senior National Boxing Championship 2015 Bronze Medal at Nagpur

6. All India Invitational Boxing Championship 2019 - Gold Medal and Best Boxer at Kolkata

7. 2nd LB Chhetri Invitational Boxing Championship 2017 - Gold Medal @ Meghalaya

8. All India Inter SAI Championship 2012 - Gold Medal

9. NorthEast Games 2013 & 2014 - Gold Medal

10. National Junior Boxing Championship 2011 Pune Bronze Medal

11. LPS Pro - Fight 2014-2019 Champion Title holder 5 times and Longest Reigning Champion Record

12. United Sports Association of Mizoram (USAM) Best Sports Person of the year

13. Vulmawi Award 2018 - Best Sportsman of the year

14. Moonlight Award - 2014, 2016 and 2018 Best Sportman of the year
Read more »
Tweet Share Share Share Share Share

May 09, 2020
Power lifting (bench press)- a Mizoram record holder KMS. Dawngliana

K Hmingliana(L)leh H. Lalchhingpuii te fapa KMS Dawngliana Serkawn, Lunglei hi Kum 2019 Mizoram Inter district Championship-ah bench press bikah Mizoram record siamtu a ni.

Lunglei Power lifting competition, Mizoram Championship, Inter district, State games-ah te lawmman a lo la tawh a,  National classic Power lifting Championship Murickassery, Idukki, Kerala a neihah Mizoram ai awha kalin pangana a ni nghe nghe. 

Fitness a tan tiin Kum 2014 atangin gym lamah a tui chho a, Nerve tha lo avanga thla thum damdawi in a awm tawh a ni a, tunah chuan a nerve tha lo hian a ti buai tawh lo.

A chhungten a tuina lama an support \hat em avangin, amahah phurna nasa tak a siam a, a taksa a fit chho zel a, fitness ringawt ni tawh lovin, bodybuilding lamah pakai lehin heta tang hian Power lifting lam hi tun thlengin a luhchilh chho ta  a ni.


He kawng ka zawh chhohna a tana  kaihruaitu pawimawh tak pakhat P. Lalchamliana (Cham chaka)chungah a lawm hle a, “In tanpui tawnna hi a pawimawh ka ti em em a, gym lama tui, min mamawh tu te an awm ve anih chuan englai pawhin ka in hawng reng” a ti.

Mizoramah gym kanlo uar chho ve telh telh in, taksa hriselna kan ngaipawimawh em em tawh a, theih tawp chhuah a tum ruhna nen a kan tih chuan eizawnnan pawha hman tlak tak a ni,a ti.

Dawngliana chuan, Mi tu te tan pawh a tih theih vek a ni a, eizawnna tlak a ni kan tih rualin,a lawmman hi hmu miahlo pawh ni ila mahni hriselna atan ringawt pawh a thatna hi sawitam angai awm lo ve, he thil ina a ken tel taksa tana thalo tur laka insum theihna te,taksa tana tha tur ngaih pawimawh tlatna te hi mitin tan,abik takin thalaite tan hian a tha em em a,hun vawndik,self control leh taimakna leh tumruhna te a ken tel tlat avang hian tu tan pawh thil tha tak a ni.Engthil pawh ti dawn ila,tumruhna leh taimakna nen Pathian malsawmna dawng tlak tura kan thil tih apianga kan tih hi a pawimawh ka ti hle,a ti.

Ka hun hmasa lamah hian ka chanchin mualpho thlak leh nuihzatthlak tak tak hi sawi tur ka nei ve a,sawisen pawh a ni lo a, sawi pawh zahthlak  khawp te a ni ve thin .Sual in a duhna lam lamah min pawt phar a, mahni duhdan leh tum ang pawn ka awm thei lo, nun pangngai tak a hman te chu ka duh ve thin mahse  ka chakna ngawt chuan ka thei lo,zanah ka rilru ka siamfel a,a tukah keimah bawkin ka bawhchhe leh nghal thin.

Kawng dik leh tha chu ka hria mahse chu kawngah chuan sual bumna vangin ka kal thei lo,nun a beidawng a nun a hahthlak em em thin, tawngtai ngaihna pawh hi ka hre tawh lo ka tawngtai ve chhunah chuan ,'Lalpa ka thih hma ngei in i hmel min hmuhtir rawh' tih hi ka tawngai na a ni..Heihi ka hun hmasa lam a tawi thei ang ber a ka sawi thiam dan a ni.     

Kum 2014 -ah camping-ah ka lut ve a, camp kan neih naah pawh hian a buaipuiawm berte zingah kan la tel ta zel a, mahse Pathian in hna a thawk a he camp ah hian a ni Pathianah siamthar leh na ka chan tak chu.

Pathian hnena ka nun ka hlan dawn pawh hian ka in ngaihtuah nasa hle a, engchen mah hi ka zui tak tak thei dawn lo a in hriatna ka nei lian hle a,reilo teah ka nun ngai bawkah ka let leh a nga ka mualpho mai mai zawk ang ka inti a ni, mahse Pathian in min tanpui a a hnenah ' i thu ang zelin thleng rawh se '  ka ti a, mualpho ka hlauh na te leh a hnung zui ve thei tak tak lo tura ka in ngaih na te zawng zawng nen a hnenah ka in hlan ve ta a ni.I THU ANG ZELIN THLENG RAWHSE  tih hi ka inhlan na a nih avangin ka nun a thil thleng zawng zawng hi Pathian thu a ni.Ka sawibelh lawk duh chu, Pathian kan belh tlat chuan mualpho te hi tum mah ila Pathian hian a lo phal miah lo..kan mualpho na berah pawh Amah hi a lo mawi zel tawh zawk a ni.

"Kohhran ah te kan in hmang chho ve zel a reilote ah ka phu loh chanvo Pathian in min pe mawlh mawlh a ni ber mai inthlahrunawm rum rum zawk khawpin chanvo hi min pe a ni. Mi tih tur a ka dah kha ka tih turah a lo tla ve ta zel a, karkhatah hian zan awl nei miah lo khawpin kohhranah hian mawhphurh na ka nei
ve thin.Tun hma lam a ka buai nen chuan danglam tak a ni. Tun hma chuan ka buai a ka hah a ka nunah hlimna pakhat mah a thlen lo; tunah chuan Pathian leh a kohhran tan ka hah poh leh ka hlim zawk thin.

Hun a kal leh hlek a thlarau lam hrisel na a pawimawh rual in taksa lam hrisel na hi a pawimawh tel ve e, tiin Gym hi ka kal chho ve leh ta a ni, a tirah chuan fat loss duh mai ka nia (100kg-80kg ah ka in cut ve hman nghe nghe a ni) mahse taksa a han fit chhoh chuan mipa tã chuan sek te chak te kan lo chak ve leh zel a, tichuan body building leh powerlifting hi ka ti chho ta a ni.Ka workout dawn hian rilru tawngtai na ka nei ngei ngei thin. Tin, ka workout pui (  partner) te bulah hian Pathian leh a kohhran thu hi tlem tal sawi rik ziah hi ka duh bawk thin, mihring in theihtawp kan chhuah anga Pathianin mal a sawm ang tihte; kan chakna te kan theih na te hi Pathian min pek a ni tih hriat tlat leh ama tan a hmang tur kan ni tih te hi ka sawi ve fo thin.

"Hriselna kan ngai pawimawh chho tulh tulh a meizial zuk te hi a lo hnawk ta tlat mai a, ka Gym kal a vangin meizial hi ka nghei a...kuhva hi chu zaipawl a ka tel vangin( kuhva ka ei chuan ka hrawk a za a ka zai tha thei lo..thiam loh sa naklaia??).Gym ka kal a body building leh powerlifting ka khel a hemi hmang hian Pathian hnenah ama ropuina ka puanchhuah ve theih nan ka dil thin a, chu ka dilna tlawm tak chu Pathian in min hriatsak a, tunah hian Mizoram bench press record holder nihna min pe ve a ni. Hemi hmang hian kohhran leh YMA ah Pathian in keimah a  a hnathawh te  sawichhuah na hun remchang min pe ve tawh a ni.

Pathian hnathawh hi a uar thei ang bera sawi ka duh thin mahse ka tawngkam thiam in a tlin lo..Pathian in heihi min hriatpui  ani ang ka lo sawi ve vak ai chuan amah zawk hian mite hnenah a sawi mai zawk ni hian ka hre thin.A tawp ber a ka sawi duh chu heng zawng zawng ah hian chakna leh theihna min pe tu,Pathian chauh hi lo ropui ber zel rawh se, a ti.

-Lunglei Times
Read more »
Tweet Share Share Share Share Share

May 02, 2020
EDMUND LALRINDIKAEdmund Lalrindika hi Lunglei footballer zingah thleng sang tak a ni tawh a, naupangte a nih lai atangin Football hi a tuipui a, a tuina chu a takah chantir zelin tunah hian India Footballer zingah pawh en hlawh pawl tak ni chho mek ta.

Edmund-a hi Bazarveng Lunglei a ni a, Lalnunsanga leh Lalhmingthangi te fapa a ni.
Lungleia Age Group Football Tournament(U-12,14) LDFA in a buatsaih thinah veng aiawha khel thin a ni a, heta tang hian Lunglei District Football Association (LDFA) hruai tute mit a tlung a, an ngaihven a, kum 2011 khan Mizoram aiawha trial nei turin Lunglei atanga thlanchhuah a ni a; a mah chuan Pathian leh LDFA hruaitute zarah he dinhmun hi ka chang a, ka lawm hle a ni, a ti.

Lunglei atanga trail tura player kal ho zingah Mizoram aiawh tura thlan zingah a tel veleh ta a, Kolkata a All India Football Federation (AIFF) Football Festival U-14 a Mizoram aiawha khel turin a kal veleh ta a ni.

Hetih hun lai hian player ho zingah a naupang ber pawl a ni a, a la tuai deuh an tih avangin khelna hun a nei meuh lova, heti chung hian, India tana khel tur trail tura Mizo player pakua an thlanchhuah zingah a tel leh a, trail an nei ta a, Mizo pakua inlan atangin pathum an thlanga Edmund-a hi pathum thlanchhuah zingah a tel leh ta a ni.

Kum 2012-2018 chhung India camp-ah a awm a, hemi chhung hian India aiawhin U-14,16 leh 19-ah te a ka khel a, exposure trip engemaw zat an nei bawk a, 2013 khan SAFF CUP U-16 Nepal-ah neih a ni a, hetah hian India aiawhin a khel a, an champion a ni.

India junior team a a awm tawp kumah, India U-19 ah a tel ve satliah ringawt lova, captain-ah a awm daih tawh a ni.

A lo puitlin chhoh hnuin professional player tak tak a ni chho ta a, professional contract a sign hmasak ber chu Bengaluru FC-ah a ni a, a kum khatnaah chuan loan in Indian Arrows ah a khel chhuak a, Thla 5 hnuah Bengaluru-ah a let leh.

Vanduai thlak takin inhliam avangin thla riat chhung football khel thei lovin a ka chawl a, hun rei tak a chawlh hnuah a rawn tha chhuak leh a, Bengaluru ah hian (2018-2019) season khan atan a first season chu ka han hmang ve ta a ni.

A Inhliam avang hian season tawp lam game 7 vel chiah a awm tawh in, Team a zawm ve thei chauh a, he season-ah hian match a khel tam thei lova, he season-ah hian Indian Super League-ah an champion.

Bengaluru FC hi club tenau lo tak a nih avangin, an squad alo chhah a, Edmund hi a la naupang bawk nen khelna hmun a chang tam thei lova, hei vang hian a khel tam theihna tur zawngin kumin hian loan in East Bengal Club-ah a chhuak leh ta a; tun dinhmun hian a nang chho ta rih a ni.

Lunglei Times in a thalai puite hnena thuchah duh a neihte sawi tura a ngen angin Edmund chuan, ‘Keipawh la inzir chho mek ka ni nachungin thalaite hnena ka sawi ve duh chu, mi hlawhtling tam tak te pawh vawi tam tak lo hlawhchham tawh thin te an ni a, I hlawhchham rih avang khan beidawng mai lo la, Pathian ring chhung zelin inthlahdah lovin thawhrimna nen hmalam i pan zel ang u, a ti.

-Lunglei Times
Read more »
Tweet Share Share Share Share Share

March 02, 2020
Mizo Professional Footballer Jeje Lalpekhlua chuan a hliam enkawl malsawmna dawngin nizana Real Madrid in 2-0 a khawvela stadium ropui ber pawl Santiago Bernabeu-a Barcelona an lo hneh kha a hmunah a en ve a, Mizo zinga khawvela derby ropui berte zinga mi "EL CLASICO" ngei mai a hmuna en hmasa ber a ni awm e.

Jeje-a hi India World Cup Qualifier squad player koh chhin zingah a tel ve a, hliam avangin tun season ah a la inlan mumal lo. Heivang hian Europe lamah a hliam enkawl turin a kal a, Real Madrid leh Barcelona inkhel hmuhnawm a hmunah a en theih phah ta a ni.


Jeje-a hian khawvela footballer ropui berte zinga mi Lionel Messi inkhel live in a en thei a ni. He match en tur hian Italy atangin Real forward hlui Cristiano Ronaldo pawh Santiago Bernabeu ah hian a thu ve bawk. Jeje-a hi Mizo zinga El Clasico a hmuna en hmasa ber a nih bakah tun hnai kum 10 chhunga footballer ropui ber pahnih Ronaldo leh Messi te live in a hmu tawh bik a ni.
Read more »
Tweet Share Share Share Share Share

February 26, 2020
NE Live TV a Business Head Pu Pancham Chanda chuan Mizoram Tourism Minister kawmin Mizoram chungchang zau zawka khawvel hriata puanchhuah dan turte sawidun.

He meeting ah hian Pu RRRa Sports Minister nibawk chuan NE Live TV te chu Aizawla Professional Boxing Fights huaihawt puiah sawmin Mizo Rawlthar 2 - Lalrinsanga Tlau leh NT Lalbiakkima te chuan Professional Boxing an luhchilh tawh tih hrilhin NE a la awm ngailo Proffessional Boxing Fight huaihawt nan Aizawl chu a awm ber nia a hriat thu a sawi.


NE Live TV hi kum 2 chauhva upa mah nise NE leh India ram pumah thlirtu a nghah chak hle a,Assam Finance Minister Himanta Bishwa Sharma te chhungkaw ta a ni.

Ataka kan la hmuh ngailoh Professional Boxing Fights pawh Sports Minister nachang hre tak Pu RRRa zarah atakin kan thlirho thei mai thei a nia! @V.Zamuana

Read more »
Tweet Share Share Share Share Share

February 12, 2020
Lalremsiami Hmar CHANCHINKhawvel puma hockey thuneitu sang ber International Hockey Federation (FIH) chuan hmeichhe player chhuak thar beiseiawm ber '2019 FIH Women’s Rising Star of the Year' atan Lalremsiami Hmar a thlang.

Mizo nula Siami hi India player zingah Rising Star of the Year chawimawina dawng thei hmasa ber a ni a, award dawng tur hian vote tla zawng zawng zinga 40% a hmu. Lawmman dawng thei tura chhawp chhuah dang Argentina tleirawl Julieta Jankunas (21.5%) leh Netherlands star Frederique Matla (19.8%) te a khum.

India captain Rani Rampal chu 2010, 2013 leh 2014 khan chhawp chhuah lo ni tawh mah se award hi a la dawng lo, India player zinga chhawpchhuah pahnihna leh dawng thei hmasa ber dinhmun chu Siami hian a rawn luah. Mipa lamah India player Vivek Sagar Prasad chuan Rising Star chawimawina hi a dawng ve bawk.


Mi bik chu
Kolasib tleirawl, Thenzawl Hockey Training Centre a\anga inzir chhuak Lalremsiami Hmar hi junior player tura a inngaih laiin senior team atan 2017 khan koh a ni a, squad player zingah naupang ber ni zel mah se a theihna a san avangin team zingah a mikhual lo.
India tana a inlan hmasak ber a\angin hnunglam a hawi tawh lo, ram tan match 42 a\angin goal 15 a khung tawh. Season hmasa bik khan Olympic playoff khel phak tur zawnnaah Australia, China leh Japan te nen an intawng - Japan nen final an khelh tumin Siami hian chakna goal a khung.

Japan rama inelna an neih lai hian a pa Lalthansanga chu a thi. Mahse, Siami hian inelna hmachhawn zui zelin India chu hlawhtlinna a chanpui a, inelna an neih zawh hnu hian, "Ka pa tan fanu chhuanawm nih ka duh a, kan ram tana hnehna chan ka duh a ni," tiin a sawi.
India hi United States nen FIH Olympic playoff-ah an intawng zui a, inkhel pawimawhah hian goal khung lo mah se tlarhma lama player pawimawh leh hmuhnawm a ni a, match hnuhnung zawka India chakna goal Rani-i'n a khung theih nan pawh tha a thawhhlawk hle.

Vote Hmuh Dan
Pakhatna: Lalremsiami (IND)
National Associations 47.7%
Media 28.4%
Fans/Players 36.4%
Total 40%

Pahnihna: Julieta Jankunas (ARG)
National Associations 12.3%
Media 23%
Fans/Players 38.4%
Total 21.5%

Pathumna: Frederique Matla (NED)
National Associations 21.5%
Media 20.3%
Fans/Players 15.7%
Total 19.8%
Lawmpuina
Hockey India chuan Lalremsiami Hmnar lawmpuina thu an chhuah, president Mohd Mushtaque Ahmad chuan, "Siami hian ram tan a khelh tirh atangin hmalam a pan zel, player naupang zawkte entawn tlakin a awm a, hetiang chawimawina dawn hi a phuin kan lawmpui takzet," a ti.

Sports and Youth Services chief coach Lalrampari chuan, "Thenzawlah hockey training center tha tak kan nei a, a rah chhuah kan hmu zel. Remsiami hi naupang tumruh leh Pathian tih mi tak a ni a, hotute thu ngai pawimawh leh zahthiam tak a ni bawk. A theihna leh a nungchang vang hian malsawmna pawh a dawng.

"Nipui laia neih tur Tokyo Olympic-ah pawh India tan a fehchhuah ngei a rinawmin kan duhsak," tiin Vanglaini a hrilh. India nulate hi a vawi thum nana Olympic khel turin an tling tawh a, boruak a inher danglam viau a nih ngawt loh chuan Mizo tleirawl Siami hi khawvel huap inelna lianah a inlan ngei a rinawm.

2000 • Lalremsiami Hmar
pian kum.
2011 • Kum 11 mi chauh niin Thenzawl Hockey Academy a zawm.
2016 • National Hockey Academy a awm turin thlan a ni a, November thlaah a lut.
2017 • India Junior Camp tana training a nei lai chu India coach Harendra Singh-a'n hmu fuhin, senior team tana khel turin a ko.
2017 • November thlaah
India tan Asian Cup a khel a, match zawng zawngah inlan vekin goal hnih a khung; India a champion pui.
2018 • April 4 - 15 chhunga neih 2018 Commonwealth Games-ah India tan koh a ni a, kum 17 mi chauh a la nih avangin squad player naupang ber a ni; Malaysia 4-1 a an sawp
\umin goal khat a khung.
2018 • Women’s Hockey World Cup 2018-ah India aiawhin a inlan a, kum naupang ber a ni zel. India hi semifinal a thlen pui a, Italy an hneh tumin goal a khung.
2018 • Asian Games-ah India ai a awh leh, Asian ramte inelna lianah hian goal li khungin, India chu silver medal a vuak chhuahpui a ni. Mizo infiammi zinga Asian Games medal la thei hmasa ber a ni nghal.
2018 • 2018 Summer Youth Olympic Games-ah India tan silver medal a dawng.
2019 • Japan-a Women's FIH Series Finals khelhah India chu pakhatna a nihpui, match tinah inlan vekin goal hnih a khung.
2019 • FIH Olympic Qualifier-ah India tan a inlan a, playoff khel turin an tling.
2019 • Olympic Qualifier-ah United States nen an inhmachhawn a, inkhel pahnih belhkhawmah hnehna changin Olympic khel turin an tling.
2020 • Khawvel puma hmeichhe hockey player chhuak thar beiseiawm 2019 FIH Women’s Rising Star of the Year atan thlan a ni.

Source: VANGLAINI
Read more »
Tweet Share Share Share Share Share

February 12, 2020
LPS Pro Fight champion NT Lalbiakkima'n professional boxing-ah bul a ṭan dawn a, tun thla tawpah South Korea-ah a inhnek ang.

Kum 22 mi Siaha tlangval hian VN Promotion hnuaiah contract a ziak a, February 12-ah Delhi atangin South Korea a pan ang. February 29-ah a vawi khat nan professional huangah a inhnek dawn a, Korea-ah hian thla thum training nei zuiin hetih chhung hian vawi hnih inhnek hman tura beisei a ni.

2014 atanga vawi nga a zawna LPS Pro Fight lightflyweight champion ni mek Biakkima hi June 2018 khan India aiawhin kg 52 huangah President's Cup khelin Astana, Kazakhstan-ah a fehchhuak. Quarterfinal-ah Olympic champion leh world number one Hasanboy Dusmatov hnehin bronze medal a dawng a, professional luhchilh tura sawmna a dawng zui hle.

Nikum June 6 khan a pa, Pu NT Zomawia a sun a, a pain professional boxing-a hlawhtling ngei tura a duh angin thutlukna a siam fel nghal bawk. A hna vawn lai Indian Navy kalsanin nikum July aṭangin professional luhchilh turin Sete Boxing Academy a zawm a, krismas leh kum thar hunpui lai pawh chawl lovin ngawrh takin a inbuatsaih niin coach Sete Lalchhuanawma chuan a sawi.

Professional contract ziahpuitu Vikas Krishan Yadav leh Neeraj Goyat chuan a chungah beisei an nei sang. Thla ruk chhung amah enkawl tawh Sete-a chuan a pain a thihsan hmaa professional world title la ngei tura a duh angin a bei nasa hle tih a sawi a, world title fight a hmachhawn theih thuai a ring a ni.

Biakkima hi MSR official athlete niin MSR Fitness Centre, Upper Republic chuan Aizawl aṭanga Delhi-a kalna tur an buaipui. Monster Gym neitu Pu Elijah chuan Rs 10,000 leh a mamawh tur thil dang a paitir bawk. - Thang Khuma T-a‎
Read more »
Tweet Share Share Share Share Share

February 06, 2020
Jeremy an Senior National Weightlifting championship ah gold medal lain National record thar a siam
Mizo Infiammi

Kokata : Mizo rawlthar weightlifter Jeremy Lalrinnunga chuan Senior National Weightlifting Championship Kolkata a neihah kg 67 huangah inlanin vawihnih a hlawhchham hnuah a vawithum naah kg 132 a chawi zova, clean & jerk ah kg 167 chawi bawkin a pumpui thuah kg 299 chawin gold medal a la.

Jeremy hian tun senior championship ah hian a ṭhat ber ṭum tawnglo mahse gold medal lain National record a siam pha ta tho a, nikum December thla a Qatar a record a siam kg 306 erawh a tluk phak talo deuh a ni. - Enzet Chongthu
Read more »
Tweet Share Share Share Share Share

January 15, 2020 3
LallianzualaJanuary 11, 2020 (Missionary Day) hian BCM Zohnuai, Lunglei chuan an kohhran member Lallianzuala Chhangte hnen ațangin an Biak In sak na'n Rs.10,00,000/- (Nuai Sawm) teh meuh an dawng a, titi a luah rang hle.

Norway club Viking FK pan tur anga India media ten an tarlan kan lo rin ve ngawt avanga thu diklo kan lo thehdarh tawh avangin amah ngei ka zu zawt a, inngaitlawm takin thudik a nih thu min lo hrilh.

Kum 22 mi hian vantlang hriat atana puanzar a duh lem lova, Matthaia 6:4 a thilpek chungchanga kan Lalpa Isua Krista min zirtir angin, a kut vei lamin a tih chu a kut ding lamin a hriat ve kher țul a ti lo.



Mahse, tlang chunga khaw awm ang maiin a thil tihțhat hi a langsar a, amah ni lovin midangin an puanzar sak a, miin he thil avang hian Pathian an chawimawi a, amah an chawimawi tel lo thei lo. A phu.

LZ-a chanchin sawi chuan a inkhelh thiam thu ai mahin a taimak leh thawhrimzia hian rilru a luah lian zawk fo.

Kan player tam zawkte chawlh an neih laia an chawlh dêr țhin laiin ani hi chuan season off laiin training a bei ngawrh zual sauh va. A dam țhat loh pawha awmhmun tala che chhunzawm țhin a ni.

Zan rei lam tawhah Lunglei rawn thleng pawh nise a tuk zingah SYS Football Academy training a zawm nghal a, academy naupang kum 17 hnuai lamte ang thovin tih ngai zawng zawng a ti vek. India international ni mah se a inla 'ropui' ve ngai lo.

SYS naupangte training zawh hnuah amahin a chhunzawm a, a chang phei chuan kawng engkima a rawn ber Pu R. Lalmuankima (SYS Coach) nen a hranpa ngatin training an chhunzawm leh țhin.

'Lianzuala a chawl ve ngai lo.'

A kum dik tak hmanga academy-ah pawh inziak hi aia upa zawk leh hruaitute zah kawngah a chhuanawm hle a, hei vang hian a player puite leh football hruaitute pawhin amah an zah let.

June 8, 1997 a Pu CVL Hriatpuia leh T.Lalroliani ten an hrin khan hetiang fapa ropui hi Zofate min hrinsak ang tih an inring bik lovang. Feet 5 leh inches 5 1⁄2 leka sang, veikhawr lehnghal hi tun dinhmunah chuan Mizo zingah India ram football a palian ber a ni rih.

Lallianzuala ChhangteA thawhrimna leh a tum ruhna piahah Pathian a țihna hi a hlawhtlinna bul a ni.

Pathian a hre renga Pathian pawhin a hre reng.

Inkhelin an zin chhuak tam a, zan riaka an chhuah dawn apiangin Bible a keng tel zel a, Thufingte 3:5-6 leh Sam 37:5 chu a inngahna a ni.

Kum 2016 khan DSK Shivajians-a a training pui Jerry Mawihmingthanga (Odhisa FC) nen Liverpool First team zingah Melwood, Liverpool-ah an lo training tawh nghe nghe.

Tuna a thilpek tam tham tak hi a neih chuang liam ațanga a pek a ni lo. Nikum 2019 khan mi hlawhtlingte huanga tel thei turin Chennaiyin FC ah a lut a, a hlawh pawh a tam tham. Mizo footballer zinga hlawh tam ber dawttu niin season khata Rs.120 lakhs hlawhtu Jeje Lalpekhlua chiah a phak lo.

LZ-a Bank Account-ah hian sum tam tak a awm rih lovang! A chhan chu Chennaiyin a zawm hma khan a hlawh tam lo. Delhi Dynamos (Odhisa FC ni ta) ah khan che țha viau mahse season khatah Rs.15-18 lakhs bak a hlawh lo.

Hei vang hian a rawn ber Pu Muankima chaw ei tura a sawm ve țum pawhin Sir Muana hian, "I hlawhtlin hma chu ka rawn ei dawn lo," a ti. Tunah chuan an insawm kal tawh ngei ang.


Tun season ațangin a dinhmun a țha chho ve ta a, season khatah Rs.90 lakhs vel hlawh mekin season khat chhunga a hlawh pumpui ațanga Sawma Pakhat a pek tur aiin tuna Biak In sak na'na a thehchhuah hi ala tam zawk cheu!

Season tharah a hlawh hi Nuai 10 in a pung dawn a, chhiah chawi hmain season khatah Rs.100,00,000/- a hlawh tawh ang.

Mi țhenkhat chuan vantlang laka an hmai phih na'n te, hmingțhat leh fak hlawh duh avang tein kut tling lova an lakluh sum tam tak kohhranah an chhung lut a, hnuchham pualin thilpek an pe a, pawl hrang hrang leh țanpui ngai țanpui na'n an hlan châwk.

Tuna LZ-a thilpek erawh hi chu a thawhrim rah, thlantui leh mittui tam tak senga a beih hram hram avanga Pathian hnen ațanga malsawmna a dawn, Malsawmtu hnena ui hauh lova a pêk lêt a ni a, a hlu bik hliah hliah.

A dawngtu tan paw'n khawi ațanga a neih nge, engtianga a lakluh nge ni ang, tih ngaihtuah buai a ngai ve tawh lo. Malsawmna tam zawk vur tura Chungnungbera hnena dilsak a awl ngei ang.

Kan footballer te hi mi dangte țanpui, thilpek pek leh Pathian țih kawngah an fakawm hle. Christian Hospital Serkawn Cabin pakhat chuan East Bengal fa chuam Didika Ralte hming a chawi. Lunglei Eletric Veng pa tuaitir hian a sakna tur a thehchhuah vang a ni.

Lallianzuala ChhangteJeje-a'n Hospital Poor Fund atana a chhunluh te, khuarel chhiatna tawkte puala a neih a thehchhuah bakah vehbur a khawnsak te sawi hmaih a har.

Bengaluru FC forward Lunglei Bazarveng tlangval Edmund Lalrindika'n senior contract a ziah hnu lawka Missionary a chawmzui te hi an chhungkuain zêp sa teh mahse midangte entawn atan sawichhuah loh a har.

Kan footballer hlawhtlinna chang mekte inpekna leh an zar kan zawh mekna, mi hriata an sawi chhuah duh lohte hi riah chaw fai nena thawkchhuak meuha sawi tham a awm.

Anni hian kan aiawhin, hnam dang, sakhaw dang betute zingah Savun Hampuar hmangin Chanchin Țha an hril. Chuvangin kan țawngțainaah i hre reng țhin ang u.

Ka fapa hmingah pawh 'Lallianzuala Chhangte' tih sak mai ka nâp e.

-Lawmkima Hmar
Read more »
Tweet Share Share Share Share Share

January 09, 2020 7
PROFESSIONAL BOXING KHEL TURIN NT LALBIAKKIMA'N TIHFEL NGAI A TIFEL

LalbiakkimaLPS Pro Fight champion NT Lalbiakkima chuan professional boxing zawm tura thutlukna a siam hnuah training zawm thei mai turin thil a tifel thaw khat tawh.

Kum 23 mi Biakkima hian nikum June 6 khan a pa Pu NT Zomawia a sun a, a hma atanga a lo tum tawh tipuitlinga hlawhtlinna chang ngei turin a pa, Pu Zomawia chuan a thih hmain professional huang luchilh turin thu a chah a ni.

Biakkima chuan an chenna Siaha-ah a pa a vui liam a, hemi hnu hian a hnathawhna Indian Navy a zawm leh tawh lo tih a sawi. Sete Boxing Academy zawmin Aizawlah professional boxing-a lut turin ngawrh takin a inbuatsaih a, India rama hetiang lam buaipuitu Vikash and Neraj Promotion hnuaiah contract a ziak bawk.


WBC hnuaia bulṭan tumin hma a la a, South Korea-ah training nei tura kawhhmuh a nih angin nikum kum tawp lam atangin visa buaipui. Tunah hian a nei fel tawh a, ruahman angin engkim a kal thei dawn niin a manager Kuldeep Keda chuan a hrilh.

Siaha tlangval hi 2014 khan a vawi khat nan Mizorama boxing show ropui tak LPS Pro Fight-ah a tel a, lightflyweight-ah a champion nghal. Nikum khan a zawnin vawi li title a humhim a, Pro Fight chanchina weight pakhata vawi nga champion thei awm chhun a ni.

Boxing a thiam vangin Indian Navy-ah a lut a, June 2018 khan India aiawhin kg 52 huangah President's Cup khelin Astana, Kazakhstan-ah a fehchhuak. Quarterfinal-ah Olympic champion leh world number one Hasanboy Dusmatov hnehin bronze medal a dawng a, professional luhchilh tura sawmna a dawng zui nasa hle a ni. - Thang Khuma T-a
Read more »
Tweet Share Share Share Share Share

December 21, 2019
Zothan Autoworks chuan kum 10 mi ni chunga Mizoram State Games 5000m intlansiaka SILVER MEDAL la thei, Chanmari West naupang Mimi Vanlalṭhazuali a chhawmdawl dawn a, sponsorship an tifel thuai ang.

Zothan Autoworks neitu leh Aizawl North III Mizoram State Games Committee Vice Chairman Pu Zothantluanga chuan thawhpui tlak a ni a, hma a sawn zel theih nan ṭanpui a duh tih a sawi.

"Kan sponsor dan tur chu anmahni nen kan la sawi ho ang. Thla tin a inbuatsaihna tur sum kan pe dawn nge ka la hre thei rih lo," a ti.

Mimi Vanlalṭhazuali hian Mizoram State Games-ah hriat a hlawhin infiammi 7000 chuang tel zinga medal la thei naupang ber a ni.

Aizawl North III tan silver medal a awrh avangin bialtu MLA Pu C Lalmuanpuia chuan Rs 1000 a pe a, Aizawl North III Mizoram State Games Committee Vice Chairman Pu K Lalthanzama chuan Rs 5000 a hlan tawh bawk.

Hei bakah hian Aizawl North III Mizoram State Games Committee chuan an bial tana medal latute hnenah pawisa fai a pe ṭheuh dawn a ni.

 ~Thang Khuma T-a
Read more »
Subscribe to: Posts (Atom)

Contact Form

Name

Email *

Message *

TOM © 2025. All Rights Reserved.
Published by Songate G

Ads Section

Powered by Blogger.