Showing posts with label Hriattirna/Press Release. Show all posts
Tweet Share Share Share Share Share

September 11, 2021
PRESS STATEMENT OF LALDUHOMA MLA
 LEADER, ZPM LEGISLATURE PARTY
(September 10, 2021 Aizawl Press Club)

Vawiina sawi ka tum subject pahnihte chungchangah hian nimina tawp ta Assembly Session-ah khan motion put luh tumin Speaker hnenah ka dil a, ka dilna chu vawi 2 min hnawlsak tak avangin, tunah hian sawi a lo tul phah ta a ni.

Lalduhoma Press Release

COMPENSATE SCANDAL

1)  P. Patta lem siam tura hmalaknate:
Four Lane kawngpui siam turin a tihchhiat tur, Vairengte leh Sairang inkara NH-6 leh NH-306 kam metre 100 huam chhunga ram neitute chu thla 2 chhunga update vek tur te, chumi baka ram awl la awm zawng zawngte chu khawih danglam theih tawh loh tura vawn that (Frozen) vek a nih thu leh, ram awl la awm chhungah chuan ram Pass thar dil emaw, Extension dil emaw phal a nih tawh loh thute chu Pu Pu R.Lalramnghaka, Secy, LRS chuan Notification siamin a chhuah a. (No K.12011/53/2020 - REV, dt 27-05-2020 leh No K.12011/54/2020 - REV, dt 01-06-2020).

2) Heng Notification-te bawhzui hian ram neitute tihchian hna chu peih a nih tak thu te, Bhoomirashi Portal-a thun theih a nih thu te leh, buaina engmah a awm lo tih hriatpui nan, ni 27-01-2021 khan, heng mite – Addl. D.C, Kolosib te, Project Engineer, Transys Consulting Pvt.Ltd te, Kawnpui Village Council I, II, III, Venglai VCP te leh Bualpui VCP ten hming an ziah hnan thlap a ni.

3) Engkim peih fel vek a nih tak avangin, kawng laitu tur NHIDCL pawhin Compensate dawng turte chu an Portal-ah an dahlut ta vek a. Ni 24-03-2021 ah khan, Ministry of Road Transport and Highways (MoRTH) pawhin Compensate dawng turte hming leh an Pass no te chu Gazette of India-ah Notification an chhuah bawk.

4) FIR thehluh a ni:
Hetianga Compensate la turte chhinchhiah fel vek an nih hnu hian, Aizawl lam atangin mi 16 (an hming thup rih ila) te chuan, Bilkhawthlir North VCP hlui Pu F.Tlangkhuma Seal lem leh Signature lem hmangin Kolosib Revenue Office-ah P.Patta siamtir an tum a. Bilkhawthlir Joint V/C ten Police Outpost-ah FIR an thehluh tak avangin an siam thei ta lo a ni.

5) Kolosib DC-in Pass lem siam a duh lo:
Aizawl atangin thuneitu sang zawk ten P. Patta siam turin Kolosib-ah Surveyor-te a tir thla leh a. Kolosib DC chuan khap a nih tawh hnua Pass thar siam tur chuan ziak ngeia Dan tlawhchhan tur a mamawh thu a lo hrilh a. Surveyor-te chu beidawngin an kir leh ta a ni.

6) Kawng daltua ngaihte chu transfer an ni ta:
Thuneitu sang zawkte chuan P.Patta lem siamna atana an kawng daltu nia an ngaih Officer-te chu transfer-in an aiah mi dang an dah ta a, chungte chu – Secy, LRS te, Kolosib Revenue Office-a Settlement Officer leh Asst Surveyor Officer te an ni.
7) Secretary thar chuan Notification thar a siam:                                        
Ni 8-7-2021 khan, Secretary thar chuan Notification thar a chhuah ta a. (No K.52012/2/2021 - REV dt 8-7-2021). He Notification hian, Kolosib District-a Notified Town chhunga Sorkar remtihna tel lova Pass neite leh Valid Document nei lo zawng zawngte pawh an Pass chu regularise sak vek tur a ti ta a ni. He Notification hian Secretary hmasain Pass thar dil a khap te, ram awl zawng zawng Frozen vek a nih thu a chhuah kha a rawn palzut zo ta vek a ni.

8) Kolosib-ah Surveyor 6 attached an ni:
P. Patta lem siam tur chuan Secretary thar chuan Surveyor 6 ngawt mai te chu Kolosib Settlement Office-ah attach-a awm turin Office Order a siam zui ta a. Heng Surveyor-te hlawh hi an awmna hlui atanga la tura tih an ni a. Hei hian hun rei lote chhung, an hna an thawh chhung chauh atana tirh an nihzia a tilang bawk. (No A.22012/3/2017 - REV. dt 16-07-2021) 

9) Surveyor-te chuan Detailment Order an dawng ta:
Settlement Officer thar chuan Kawnpui-a P. Patta diltu mi 71 te dilna chu, August ni 13, 2021 hmaa chinfel sak turin Detailment Order a siam ta a ni. (No K.11011/1/2021/KLB/LRS(K) dt 27-07-2021). Chuti chuan, Surveyor-te chuan an pu te thupek angin P.Patta thar siam hna chu an thawk ta char char a, Pass issue turin an peih tep tawh nia hriat a ni. Hei hian tualchhunga titi a siam nasa hle a, mipui an lungawi lo hle a ni. P.Patta te hi tualchhung mite hminga siam a ni a, Compensate an dawn tur chu an insem dawn nia sawi a ni.

10) Tunge mawhphur?
Compensate dawng tur list an kawl vek tawh hnuah leh, Gazette of India meuh a chhuah a nih tawh hnua, hetia Compensate dawng tur tihbelh tumna hi NHIDCL te hian an pawmzam thei ang em tih chu zawhna chhan har tak a lo ni ta a. Tuirial Hydel Project-ah khan Compensate dawng tur thun belh a nih avangin harsatna lian tak a thleng tawh a. Tunah pawh hian kan Four Lane kawngpui siam tur hian a tuar leh ang tih a hlauhawm ta hle a ni. Chief Minister hlui, Pu Lal Thanhawla khan, “Compensate hnam kan ni” a lo ti hial tawh kha a ni a. Hetiang thil hian kan hnam hmel a tichhia a, Ramthara kan rawngbawlna thlengin harsatna kan tawh phah a, hnam mualphona thlentu a ni.

He thil dik lo tak hi tih a nih theih nan ruahmanna hrang hrang – Officer transfer te, Dan lova Pass neitute regularise sak tura thupek siam te, Surveyor rual Kolosib-a tirh thlak te hi Revenue Minister thu lo chuan thil tih chi rual a ni lo tih chu sawi ngai lovin a chiang khawp mai a, Minister bakah hian MLA pahnih (an hming chu thup hrih ila) te pawh an phusa hle nia hriat a ni bawk.

PAWLRANG LAMAH PAWH:
Manipur pawh tur kawngpuiin a tan tlang tur khuaah te, a bik takin Pawlrang-ah, Compensate tinzawna V/C Pass thar siam a tam hle nia hriat a ni bawk. Pawlrang rama kawng puiin a tan tlang tur ram neitu (a hming thup) ramah Aizawl lam mi (a hming thup) mi pakhat chuan in sei pui a sa a (a thlalak pawh kan nei). He in hi hmanna tur engmah awm lo, ruak ringawt, Compensate dawn tum vanga sak nia hriat a ni.

ENQUIRY COMMITTEE DIN:
Heng kan sawi takte hi tihpuitlin a nih hma ngei hian, mipuiten rinna kan nghah ngamna ngei tur Enquiry Committee din kan phut a ni.
Read more »
Tweet Share Share Share Share Share

May 03, 2021
ZPM - PRESS RELEASE
Zoram Peoples Movement

Aizawl 2nd May, 2021 : Serchhip bial by-election result kan hre ta a. Vote tluang taka chhiar zawh a ni thei leh, vanneihthlak taka ZPM party in hnehna kan chang hi kan lawm em em a. Pathian leh bial chhung mipuite bakah, thawktute zawng zawng chungah ZPM Party chuan lawmthu kan sawi e. 

He inthlan kan hmachhawn dawn leh kan hmachhawn lai zawng zawng a tha leh zung sengtu zawng zawng te, bang lova min tawngtaipuitu zawng zawng te, mite kan ang phak lo mai ang tih hlau a sum leh pai a party leh kan candidate Pu Lalduhoma lo puitu ram chhung leh ram pawn a mi zawng zawng te chungah lawmthu ka sawi tak meuh meuh a. Serchhip bial chhunga vote nei lo, awmhmun atanga nasa taka min puitute chungah kan lawm takzet bawk a ni. He chakna hi ZPM chakna a ni ringawt lova, kan zavaia thawhrah a ni tih kan hriat hian kan lawmna a ti zual takzet bawk a ni.

Pu K Sapdanga, Acting President chuan, “Politics-a intihsiakna mah ni se, dik tak leh thianghlim taka inthlang tluan chhuak turin Pathian hnenah kan dil thin. Kan dilna min chhangtu Pathian hnenah lawmthu kan sawi a, Serchhip bial mipuite hnenah an rilru huaisenna vangin lawmthu kan sawi bawk. Mizoram pawn leh ram chhung atanga thahnemngai taka tawngtaina leh thilpek hlantute zawng zawng chungah lawmthu kan sawi a, Serchhip bial chhunga kan block leh unit hruaitu te, member zawng zawngte thawhrimna avangin lawmthu kan sawi bawk a, keimahni party worker, bial pawn atanga mahni senso intuma rim taka thawktute chungah ZPM kan lawm takzet a ni. Kan hotupa Pu Lalduhoma thawhrimna a fakawm hle a, bial tan leh Mizoram mipuite tan tangkai lehzuala thawk turin duhsakna kan hlan  e,” a ti. 

Pu Lalduhoma, ZPM Party Official Candidate chuan, “He hnehna hi bial mipuite hnehna a ni. Kei hi ZPM MLA mai ka ni dawn lova, bial pumpui aiawh MLA ka ni dawn a. Min vote lo tu te tan pawh an aiawhtu ka ni a, mipui zawng zawng aiawhtu tur ka ni. Hman laiin kan pi puten pasaltha an nei thin a, dai ngul an ni a, mi zawng zawng hma an tawn thin ang khan, mi zawng zawng hmaah he bial aiawh hian ka ding dawn a ni. Bial chhung mipuite nen lungruala ke pen ho turin ka inpeih a. Ka theihna avanga tling ni lovin, khawngaihna avanga tling ka ni tih ka in hria a. Mimal thilah a ni emaw, chhungkuaah a ni emaw, chhiat that thu hlaah harsatna kan neih chuan inthlahrung hauh lovin keima hnênah emaw kan party hruaitute hnênah emaw inpawh takin rawn in lan se kan duh  a. Theihtawp kan chhuah ang a, mitin hma hi kan tawn dawn a ni. Chu chu Serchhip bial mipuite hian an phu ngawih ngawih a ni. 

Campaign hun chhungin mi rilru ka lo ti na palh a nih chuan ngaihdam ka dil a, kei pawhin mimal in beihna te pawh ka tawk nasa ve hle a. Khang zawng zawng te pawh kha ka ngaihdam a ni,” a ti bawk. 

He inthlanah hian ZPM Party Candidate Pu Lalduhoma chuan vote 8269 a hmu a, amah hnaih bertu aiin vote 2950 in a hmu tam zâwk a ni. 

Sd/-
(EDDY ZOSANGLIANA COLNEY)
General Secretary
Publicity Department
No. ZPM-01/22/’20- 21/56        
Dated Aizawl 2nd May, 2021
Read more »
Tweet Share Share Share Share Share

April 13, 2021
ZPM General Headquarters, Aizawl
Serchhip Press Club (April 12,, 2021)

PRESS STATEMENT OF TBC LALVENCHHUNGA
Serchhip, 12th April 2021:  MNF Party-in Serchhip Bye Election atana video advertisement/ fakna an siam zinga Serchhip Government College zirlai naupangin sawrkar leh MNF Official Candidate Pu Vanlalzawma hmalaknaa College zirtirtute leh zirlaite an lawm takzet avangin Serchhip hmasawn zelna tura MNF Official Candidate vote tura a ngenna video chu a darh zau hle a. He video-ah hian zirlai naupang hian Public Property-ah Party Candidate mal tan vote a dil a. Chumai ni lovin, an College zirtirtu leh zirlaite aiawhin, an lawm tak zet thu a sawi a ni. 

Hei hi ngun taka ngaihthlak chuan sawrkar College-ah sawrkar hnathawkten party tihbik neiin public property chu vote dilna atan an hmang a tih theih ang. Kan party hruaitute, kan dan hre mi (Legal Board) te leh mithiam dangte biak rawn niin he video hian ECI-in Election Model Code of Conduct a duan chu a bawhchhe ngei niin kan hria a. Chutihrualin hêk dawn ila, MNF Party candidate hi disqualified hial tawk palh tase, chutiang chu keini ZPM Party chuan tha kan tih loh avangin leh in hêkna avanga he bye election hi hmachhawn mek kan nih avangin Official-a Complain thehluh erawh kan hruaitu ten tha an ti lova. Amaherawhchu he video a fakna te hi belhchian dawl lo leh MNF Official Candidate ngenna avanga lo thleng a nih leh nih loh erawh ZPM Party chuan mipui hnena puan tul a tih avangin hetiang hi thil awmdan leh thudik tak chu a ni. 

1. Pu Vanlalzawma ngenna zarah Mizoram sawrkar chuan NEC atangin Serchhip Government College Administrative Building sakna tur cheng nuai 1095.00 lai mai hnuh chhuah ni dawn ta chu lawmthu a sawi a. 
A hmasa berin MNF Official Candidate ngenna vang nia sawi hi Planning Department Note Sheet March ni 24, 2021-a a lan danin Planning & Programme Implementation Department, Government Of Mizoram hian H&TE Department DPR chu March ni 23, 2021-ah NEC-ah submit a nih thu a tarlang a. Model Code of Conduct (MCC) in March ni 16, 2021 atangin sawrkar hmalaknate puanzar a khap laiin advertisement hmang meuha an puangzar hi dan bawhchhiatna ni ngeiin a lang. 

Bye Election hmaa hmalakna an tarlang a nih chuan Serchhip Government College Administrative Building sakna tur cheng nuai 1095.00 atana DPR hi Mizoram sawrkar-in NEC-ah a thehlut ngei a. Mahse, NEC lam hian sum an sanction theih loh avangin Central sawrkar-a Line Ministry atanga India Hmar chhak tana 10% Gross Budgetary Support atanga a hmuh theih tak mialin tiin dilna hi a thehluh sak a. Kum khat meuh a vei hnuah MCC puan a nih thleng khan sanction thawm hriat a ni lo. NEC website-ah April ni 11, 2021 thlenga sanction list tarlan-ah hmuh tur a la awm lo va. Kan sawrkar hian he building sakna tur DPR hi NEC-ah ni lovin kum khat chuang zet Central-a line ministry-ah file a awm tih pawh a hriat loh chuan engtin nge an hnuh chhuah theih ang? 

Hetih lai hian PUC chuan nikum September ni 10 khan NEC Scheme atangin Academic Block sakna tur Nuai 495.00 lai mai sanction an hmu thung a. Thangthat erawh lak an tum lo niin a lang, a chhan erawh sawrkar-in a hrechiang ang a. Chuvangin he fakna hi thudik a nih chuan sawrkar hian sanction order mipui hmuh-ah phawrh ngei rawh se. 
2. A dawt leh-ah chuan, Pu Vanlalzawma ngenna avangin College-ah hian Asst. Professors, regular post 4 lai pek an nih thu a sawi leh a. A bulthut chu a hnuaia mi ang hi a ni zawk e : 
Mizo National Youth Front (MNYF) in August ni 8, 2018-ah Press Release siamin College 26 zirtirtu indaih lohna (post hnawhkhah loh) regular post 151 a nih thu leh heng post ruak bakah RUSA hnuaiah Asst. Professor, State-in 10% a tum ve tur a post ruak 70 chuang la thuai turin Congress sawrkar an ngen a. Kum 2014 hnu-ah heng hnaruak hi hnawhkhah/lak belh a ni lo. 

MNF sawrkar thar chuan October ni 25, 2019-ah Asst. Professor post ruak 17 hnawhkhat turin MPSC kaltlangin advertisement a chhuah a. January ni 29, 2021-ah Interview atangin mi 17 te chu thlan niin Reserved-ah mi 32 dah an ni. MNF in Pu Vanlalzawma candidate tur an puan hma daih a thil thleng tawh a ni.
Kum 2020 February thla a Budget Session-ah H&TE Minister chuan post 98 zet hnawhkhah a dil belh pawh pek a nih loh laia mipui thlan ni ve miah lovin sawrkar hna dah chungchangah thu a nei hian Campaign Kick-Off a Chief Minister-in “Hnam Runa hna semtu” a tih kha a lo dik tihna nge ni a, kan sawrkar hi a mumal lo hrim hrim tih hi kan zawhna a ni. Hei bakah H&TE changtu Minister pawh a ti mualpho hle bawk a ni. 

Engpawhnise, Govt. Serchhip College zirlai leh zirtirtute kan lawmpui a. Zirna hi hmasawnna bul a nih angin Mizoram College hmun hrang hranga zirtirtu indaih lohna te pawh hma la chhunzawm zel turin sawrkar kan beisei a. Thudik famkim lo leh dawt hmanga mipuite thu fah fo erawh sim theih ni se. 
Kan sawrkar hian mipui hnena a hnathawh puanzar a duh a nih chuan nikum chhunga NEC Schemes atanga a hmuh (sanctioned) tawh te pawh hi a hmalakna te puangzar law law se.

May ni 28, 2020 a Integrated Tourist Circuit, Serchhip tana Nuai 428.00 a hmuh te, Loneitu te tana Sawhthing thar chhuah hlutna belhchhahna tur a Nuai 267.00 (19.10.20) sanction te, Hrileng vanga lo haw te chhawmdawlna/eizawnna siamna tur tum thum atana Nuai 569.00 (1.29+1.70+2.70), October ni 16 leh December ni 9-a a dawn (sanction) hmanna te han tarlang thei se la. Kan sawi bak tam tak zinga heng pathum chauh te pawh hi han puangzarin sawrkar fakna atan han hmang se mipuite hian kan hlawkpui leh zual tur. 

A tawp berah chuan mipuiten thudik hriat hi kan chanvo a ni a. Political party tin ten inhek leh insawichhiat bansan a thudik hmanga ram siamthat hna thawk tura tan in lak siak turin ZPM Party chuan kan ngen tak meuh a ni e.
Read more »
Tweet Share Share Share Share Share

April 08, 2021 2

MSU IN ZIRLAITE HNENAH SCHOLARSHIP A RANGLAMA SEM TURIN SAWRKAR NGEN

Mizoram Scholarship

No. B.101/MSU-GHQ/2020-22/12 
Dated Aizâwl: the 7th April, 2021

PRESS RELEASE

Mizo Students’ Union (MSU) General Headquarters, Aizâwl chuan ni 6 April, 2021 khân Pre & Post Matric Tribal Scholarship chungchângah Mizoram Scholarship Board hotute hmuin zirlaiten 2020-2021 scholarship an la hmuh loh chungchângah thu awmziate zawt fiaha sawipui a ni.

Govt. of India hnuaia Ministry of Tribal Affairs (Scholarship Section) in ni 6 May, 2020 Letter No. F.No.20014/22/2018-Sch Post Matric Tribal Scholarship Mizoram tâna first installment tûr ₹1179.18 Lakhs (25% of Central share as 1st Installment) Finance Department, Mizoram sawrkâra a rawn pêk chhuah tawh tûn thlenga  zirlaite hnêna sem chhuah a la ni lo chu MSU chuan hriatthiam har a ti tak zet a ni. Ministry of Tribal Affairs (Scholarship Division) chuan March ni 27, 2021 Letter No.19012/04/2017-Edu/Sch(Pt) khân 1st installment pêk chhuah tawh zirlaite hnêna sem chhuahnate a rang lama thawn thla tûrin a lo ngên tawh bawk a ni.

Kum 2020-2021 atâna Govt. of India-in scholarship a sem chhuah zat tura a buatsaih hi ₹5240.81 Lakhs a ni a, Central sawrkârin hemi aṭang hian 90% a tum dâwn a, chu chu ₹4716.73 Lakhs a ni. Mizoram sawrkârin a tum ve tûr chu 10% a ni a, chu chu ₹524.08 Lakhs a ni. Kum kal ta daih tawha 1st installment pêk chhuah tawh tûn thlenga zirlaite hnêna sem chhuah a la nih loh avângin  installment dang lo kal zêl tûr pawh a lo lût thei lo a, Mizoram sawrkâr inthlahdah avânga zirlaiten kan chanvo kan hmu thei lo hi MSU chuan pawi a ti tak zet a, a tâwp thlengin hma a la dâwn a ni. Scholarship hi zirlaite hnêna a rang lama sem chhuak tûrin MSU chuan Mizoram sawrkâr kan ngên a ni.

                Sd/-
     (LALDINSANGA)
Asst. General Secretary
Read more »
Tweet Share Share Share Share Share

July 17, 2020

Sumdawnna lem hmanga inbumna laka fimkhur turin Police in mipuite hriattir

Aizawl, the 17th July 2020: A hnuaia mi ang hian sumdawnna lem leh inbumna thila mipuite lo him zawk nan Mizoram Police chuan thuchhuah a siam.
Inbumna


Tunlai hian Mizoramah company thenkhat, product nei lo leh product zuar ni lo, hlawkna an hmuh theihna tura scheme holam te te siama, joining/scheme subscription fee etc. atan mipui pawisa deposit-tira sum vei virtir vel (money circulation scheme) an lo chhuak mek tih hriat a ni. An kalphung ber chu Youtube video clip ‘view’, ‘like’, ‘subscribe’ leh online internet task dang atang leh company member log-in tawhte'n an hnuaia downline member an hmuh tam dan ang zela hlawkna pek thin a ni.

Heng ang chi company hi zirchian niin, dan lova thilti eng emaw zat hmuhchhuah tawh an ni a, hnathawk zui lo tura tihtawp zel an ni. Heng company-te hian an bum tur mipuite’n an rin theihna turin sawrkara inziah luhna (registration) erawh a hmingin an nei ve zel a, mahse an thiltih ang tih theihna tur phalna erawh an nei hauh lo. Phalna an nei lo mai ni lovin hetiang anga sumdawnna hi danin a khap tlat a, a ti thinte chungah dan anga action lak theih a ni.

Hetiang inbumna thil lakah hian mipuite fimkhur turin kan inchah a, mi pakhatin hloh tam lo mah se mipui sang telin an hloh chu nasa tak a ni thin. Hetiang chungchanga hriat fiah duh leh zawh duh nei chuan Economic Offences Wing, SP(CID Crime) Office, Contact no. 03892333741 /2335753/9612081851 -ah zawh theih reng a ni. DIPR No.3175/2020-2020
Read more »
Tweet Share Share Share Share Share

June 30, 2020
Dt. 29. 06. 2020 (Thawhṭanni) khan Lunglei Ṭhalai Pawl (LṬP) te chuan Thorang bialtu MLA, Pu Zodintluanga'n Lunglei tân a Reverse Transcriptase Polymerase Chain Reaction (RT-PCR) khâwl a pêk leh a kaihhnawih chungchang ah Lunglei Civil Hospital a Medical Superintendent leh Microbiologist te, High Powered Committee(HPC) Vice Chairman te, Deputy Commissioner(DC) te, MNF Sub-Hqrs hruaitute leh Congress Party aiawh te an kawm a.
ṬHALAI PAWL THUCHHUAH

Medical Superintendent hian khawl an dawn zet tawh hnua DC office a an dah let leh chungchang ah, "thil lian tham a ni a, hman chuan pawisa a kal ve zel lo thei lo a, sum hi kan hotute min ngaihtuah sak a ni a, hotute lam aṭanga dawng tura hriattirna kan hmuh loh avangin kan dah let leh ta mai a ni, a ti a. Dah let tura thu petu an awm leh awm loh zawh a ni a, an awm loh thu leh ama thu a dah lêt tir a nih thu a sawi bawk. 


He khawl hi Lunglei a awm tura a duh leh duh loh zawhna chu, "chhim pa ka ni a, thil ṭha te chu kan duh alawm", ti in a chhâng bawk a ni.
Microbiologist hmuh a ni ve leh a. Laboratory an neih mek chu Bio-Safety Level-2 (BSL-2) a nih thu a sawi a. BSL-3 a siam tur a tihdanglam nasat a ngaih leh ngaih loh tur leh senso a hautak leh hautak loh tur te zawh a ni a, thil harsa tak a nih a rin loh thu leh senso pawh tam uchuak a nih a rin loh thu a sawi a. Chubak ah, RT-PCR khawl hi Medical Council of India(MCI) in 2.06.2020(Thawhlehni) aṭang a Bsl-2 laboratory a dah a rem tih tawh thu a sawi bawk. Khawl hi Lunglei ah awm se a duh leh duh loh zawhna chu, awm thei se chuan duhthusam a nih thu in a chhang a, RT-PCR khâwl in test hrang hrang a tih tam theih zia leh natna hrang hrang vei te tan a ṭangkai tur zia a sawi bawk.

He mi zawh hian Lunglei High Powered Committee Vice Chairman leh Lunglei East AC bialtu MLA ni bawk Pu Lawmawma Tochhawng kawm leh a ni a, thilpêk chungchang ah, Setana pêk te a nih em loh chuan kan district tana thil ṭha chu lawm tak a lo dawn mai tur ni a a ngaih thu a sawi a, a theih ang a hma lak a tum thu a sawi bawk.

Deputy Commissioner Pu V. Lalsangliana hmuh a ni ve leh a, DC hian MLA leh Medical lam hotute nen a an inhmuhkhawm ṭum in, inpek dan tur chungchang ah hotute ràwn a ngaih tur thu te, helai a Medical lam hotute bawhzui tur ni a a ngaih thu te a sawi lan thu Lunglei Ṭhalai Pawl te a hrilh a. Mi in lawm tak a an pek chu lawm tak a dawn mai tur ni a a ngaih thu a sawi bawk.
Dah let leh a nih chungchang ah, an thu a inhmuh loh deuh thu a sawi a, mahse, "a hmanna tur in rêl fel chhung leh in insiamrem chhung chu kan lo kawl mai a ni ang chu", ti a thu an tih tluk tak thu a sawi bawk.
DC hian Medical lam hotute pawh atìr ah chuan an lawm a ni, tih thu a sawi a, amah pawh in, thil ṭha chu District tân a duh thu leh a neih theih dan zawn tur ni a a ngaih thu a sawi ve bawk.
DC hmuh zawh hian an Office ah MNF Sub-Hqrs hruaitute hmuh a ni a. MNF Sub-Hqrs hruaitute hian RT-PCR khawl neih hi an duh thu an sawi a, hemi avanga Damdawi In an tlawh thu te, mithiam te pawh an biak thu te an sawi bawk. Lunglei Damdawi In enfiah tura lo kal mithiam te hnen ah RT-PCR dahna tur hi siam ni dawn ta se senso engzat vel nge ni ang, tih an zawh thu leh, expert lam hian, nuai zahnih (200) vel a ngai ang, ti a an chhàn thu an sawi bâk ah, khâwl hi bun a nih theih nan sorkar ah report kan lo pe ang e, an tih thu mnf sub-hqrs hruaitute hian an sawi lang tel bawk. Pu Zodintluanga khawl lei pawh ṭha an tih thu an sawi rual in, Sawrkar nen a indawrna tur chi ni a an ngaih thu an sawi tel a, anni pawh in he khâwl chungchang hi Chief Minister an va sawipui tawh a, mahse Bio-safety Level -3 Laboratory siamna tura sum a harsat thu a lo hrilh ni in an sawi.

MNF Sub-Hqrs chuan, RT-PCR khawl hi neih kan duh, mahse hemi chungchang ah hian thu kan nei lo a ni, an ti a. "Health Minister hian hemi chungchang ah hian hma lak a rem tih thu sawi sela chuan keini pawh in theihtawp a nawr kan duh a, mahse Health Minister ber a ngawi tlat bawk si a, keini tân chêt ngaihna a awm lo a ni", an ti nghe nghe!
A tawp ber ah Congress aiawh te kawm an ni a, Pu Zodintluanga awm lai a lo ni a, ama ho in Lunglei Ṭhalai Pawl te an lo dawngsawng a ni.
Pu Zodintluanga hian a chin chhuak in thil a sawi a, Lunglei in ambulance an nei lo a, Police ho ta an hawh tih a hriat avanga Ambulance a pek thu te, thil dang pawh tih a duh thu leh a rilru a awm chu Ventilator a nih thu a sawi a. 

DC Office a an lèn thu leh Medical Superintendant leh Chief Medical Officer te tel ve tur a an ngen thu te a sawi a, Medical Officers te bul a Ventilator siam a duh thu te, Superintendant in siam mek a nih thu a hrilh chungchang te a sawi a, RT-PCR khawl hi Medical Officers te hian neih ve atan a ṭha an tih thu an sawi avangin DC office a kal tur a Microbiologist an biak chawp thu leh, ani thuràwn ang a RT-PCR khâwl lei tura thutlukna an siam tâk thu a sawi.



Boruak a sosàn tâk avanga Health Minister a hmuh thu leh, Health Minister hnen ah, "Ka pu, tun a ka hmalakna hi ka kal zel dawn nge, ka tâwp san dawn, ka ti a, Health Minister hian min chhang duh lo", tih thu a sawi bawk!
Khawl hi Health Secretary emaw Minister emaw pe mai lo a a lo phurh phei chhan leh Lunglei DC a pek chungchang ah, Pu Zodintluanga chuan, a dik lohna a hriat loh thu a sawi a, "phurh phei leh tho a ngai dawn a, Sawrkar kan chhâwk zâwk a ni, Ambulance pawh an hmang duh a, engatinge RT-PCR khawl an duh loh bik?" , a ti a ni. 
Pu Zodintluanga hian Laboratory siam a huphurh loh thu a sawi bawk a, phalna pe se, rim tak a beih chuan kar hnih chhung a a zawh hman a rin thu a sawi bawk.
Khawl remkhawm chungchang ah pawh, online a tih theih vek a nih thu leh harsatna a awm chuan mithiam rawn tirh an inhuam reng thu a sawi lang tel bawk a ni.
Congress Party aiawh te leh Lunglei Ṭhalai Pawl te inkawm lai hian Pu Zodintluanga hian Health Minister a phone a, "Lunglei Ṭhalai Pawl te an lo leng a, Zalên chanchinbu ah, khawl hi sorkar ta a ni tawh e, i ti bawk a, engtik nge hma i lak ṭan dawn tih an hre duh a ni", a ti a. Health minister hian, "tun ah Expert Team te nen kan meeting a, kan sawi mek e", ti in a lo chhâng a ni.
Lunglei mipuite hriselna hi inkhelhna tâwk lek a kan ram hruaitu ṭhenkhat ten an ngai hi Lunglei Ṭhalai Pawl chuan a vanduaithlak a ti a, a dem takzet a ni. 
Lunglei Ṭhalai Pawl chuan Lunglei ṭhatna tur a ngaipawimawh ber a, Lunglei ah RT-PCR khawl hi dah ngei ni se tih hi a duhdan a ni a, a rang lam a dah a nih loh chuan a ṭul anga hmalak zel a hreh dâwn lo a ni.
Lunglei ṭhatna tur ah chuan thil dang dah ṭha vek a ṭanrual pui ah Lunglei mipui te a sâwm a, Lunglei tân a harsatna thlentu reng reng chu lungrual tak a do pui zel tur in a sawm bawk a ni.
"Lunglei in a ko che"
Issued by: Lunglei Ṭhalai Pawl
Read more »
Tweet Share Share Share Share Share

June 29, 2020
MAUTUAI THATNAMautuai a tam leh ta a, Gilead Thinghnai (Hriselna lamtluang) Lehkhabu-a Mautuai chungchang ka ziah hi han dah chhuak teh ang. Vawi khat chu kan nau Rema hi kan mikhual alawm le. Mautuai kan hmehpui a. "Kha, mautuai te kha ei ţeuh rawh, a hrisel a nia," ka ti. "Ka duh teuh lo, mautuaiin eng chakna mah a pai lo," a'n tiahh.  Ani kha zawng, alu a awm loh chuan chaw a ei thei lo, alu ngawr ngawr a ni mai e.


Mautuai hi a duh tan chuan chawhmeh tui tak a ni a. Mautuai chanchin leh a ţhatna tlem han tar lang teh ang.


Mautuai hi kum 2500 liam ta khan Chinese-hovin an lo ei daih tawh a, Tang Dynasty (618-907 AD) leh Ming Dynasty-ah (1368-1644 AD) daih tawh khan mihring taksa tana a ţhatzia hi an lo hre daih tawh a ni.

Japan ramah chuan mautuai hi, "King of forest vegetables" ti hiala a hming phuah a ni. Mau tak tuai, tuaiterek, nâl tuai, raw tuai, ţhing tuai te hi Mizorama kan hmuhte chu a ni mai âwm e.

Mautuai hian chakna (energy), carbohydrates, dietary fibre leh protein a pai tam a, Vitamin B1(thiamine), Vitamin B2 (riboflavin), Vitamin B3 (niacin), Vitamin B5 (pantothenic acid), Vitamin B6 (pyridoxine), folate, Vit C, Vitamin E leh Vitamin K a pai a.

Mautuai hian iron, manganese, phosphorus, magnesium, zinc, copper, potassium leh amino acids a pai bawk a ni.

Mautuai hian tûr a pai ve a; mahse, a tûr pai Cyanogenic glycosides hi kan chhumnaah a thi vek a, a hlauhawm loh a ni.

Mautuai hi taksa rihna tih hniam (weight loss) nan a ţha hle a. Mautuai hian thau chhia (LDL Cholesterol) ei chhiain thisena cholesterol awm zât a thunun thei a, potassium a pai tel vangte hian lungphu leh blood pressure a thunun bawk a.

Dietary fibre a pai tam avangin êk khal vêngin chaw pai ţawih (digestion) a pui a. Ril aţang tûr leh bawlhhlawh paih chhuah puiin ril a ti hrisel thei a. Taksain natna a do lêtna theihna khawl a ti chak thei a, natna do lêt kawngah taksa a pui a.

Mautuaia Chlorophyll tel hian rilpui cancer a veng theia hriat a ni a. Mautuai hi nachhâwkna anga thawkin pân leh hliam a ti dam hma a, thâwkna dâwt natna atan a ţha a.

MAUTUAI THATNACopper leh iron a pai tel hian thisen (RBC) a siam bawk a. Mautuai hian chaw ei a ti tui ve hrim hrim bawk a, thlum (sugar) a pai tlem a, zunthlum nei tan insum a ngai lo bawk a.

Mautuai hi hmânlai Ayurvedic damdawi niin rul tûr thahna (antivenom) atan pawh an lo hmang tawh ţhin a, a ţha tak tak em tih finfiahna erawh a awm lo.

A siam dan chi hrang hrang a awm a, saum leh dangpuithu nena bai hi kan ei dân tlangpui a ni âwm e. Soda telh tam hian a chakna a paih ţhen theiin a rinawm a. Khawvel hmun tam taka a tharlâm an ei ve phâk loh MAUTUAI hi, Pathianin kan ei tur atana a lo dah a ni chiang mai.

Source:Dr Lalkhawngaihsanga, GILEAD THINGHNAI
Read more »
Tweet Share Share Share Share Share

June 26, 2020

LIRNGHING THLENG PALH THEI LAKA INVENNA TUR THIL PAWIMAWH DDMA HRIATTIRNA


Dr. Lalzirmawia Chhangte, Deputy Commissioner & Chairman, District Disaster Management Authority, Serchhip District chuan lirnghing lo thleng palh thei laka fimkhur tura mipuite chahin, a hnuai ami ang hian invenna atan thil pawimawh mipuite hriat tur a chhuah:

Tunlaiin Mizoram hmun hrang hrang leh Serchhip District huam chhung ngeiah pawh nitin lirnghing hriat tur awmin mipui thlabarna leh chiaina a thlen a. Serchhip District mipuite chiai mai lo tur leh lirnghing lo thleng mai thei lakah fimkhur turin kan in chah a. Heng lirnghing lo thlen palh thuta tih tur leh tih loh turte hi mipuiin zawma, District Disaster Management Authority in heng bak chhiatna thleng a awm anih chuan theihtawpin hma a la zel ang tih hre theuh turin kan in ngen e.

LIRNGHIN HMAA KAN LO INBUATSAIH LAWK DAN TURTE:

Lirnghing laka invenna



1. Chhungtin ten lir a nghing zawhah chhungkaw inhmuhkhawmna tur hmun him ruat lawk tur a ni.

2. Chhuahna tur kawng a lo pin palh theih avangin kawngka dang ruahman lawk la, chhuahna dal theiah engmah dah hnawk suh ang che.

3. Almirah, pangpar khawina leh tarmawi frame ten min tlak/delh theih avangin kilh beh tlat tur a ni.

4. Family Emergency Kit siamin heng- nawhalh, torch light, first aid kit, radio, battery thar, puan hlap, telephone number pawimawh, tui thianghlim in tur leh ei tur chhe mai thei lote lak mai theihin dah sa ang che.

5. Lehkha pawimawh, entirnan - in leh lo pass, certificate, bank account bu te hi hmun him, lak mai theih tura dah a tha.

6. Tukverh leh khum hnaiah thil hun loh tur a ni.

LIR A LO NGHININ:

1. Lir a nghin zawh hma chu inchhungah awm tur a ni.

2. Inchhunga i awm anih chuan khum hnuaiah emaw dawhkan hnuaih tawm tlat la.

3. Khumah i awm anih chuan rizai/lukhamin i lu khuh tlat ang che.

4. Pawnah i awm anih chuan building lian, electric hrui leh thing lian delh phakah awm loh tur a ni.

5. Motor i khalh chuan hmun him zawl laiah awm ang che.

6. Office ah emaw puipunnaah i awm anih chuan tlanchuak rum rum lovin a indawtin chhuah nise.

LIR NGHIN ZAWHIN:

Lirnghing laka invenna


1. Lirnghing nasa tak alo thlenin, ni engemawzah chhung chu lirnghing hnukhawi (after shock) a nghing nawn fo thin tih hriat tur. Hetiang lirnghing hnukhawi hian a hmaa a lo sawi chet tawhte a tih chim belh theih avangin in chim mai thei bulah i awm anih chuan chhuahsan vat tur a ni.

2. Midangte tanpui thei dinhmunah i ding anih chuan puih ngaite puiin, naupang, tar leh pianphunga rual banlote ngaihven hmasa ang che. Hliam tuarte an awmin, mithiam bikte an awm chuan bawihsawm tir ang che.

3. Lir a nghin hian kangmei chuakin a zui thei. Chutiang a thleng anih chuan i theih ang angin thelh tum la, Fire Service te hnathawh lai lo khawih pui chiam erawh tum loh tur a ni.

4. Radio leh thuneitute thupuan ngaichang reng la, pawimawh tak anih loh chuan phone hman loh a tha.

5. Thubelhchian dawllo thehdarh lo ang che. Serchhip District-in khuarel chhiatna kan tawh palha harsatna neite tan Police Station hrang hrang leh heng a hnuaia phone number ah te hian phone vat tur a ni.

1. Pu Denny Lalchhuanawma, Sub Deputy Commissioner Ph. No. 8787708157
2. Pi Vanlalduhi Ralte, District Organiser Ph. No. 9862116104/6033123760
Read more »
Tweet Share Share Share Share Share

June 15, 2020
JOINT NGO’S S.CHAWNGTUI PRESS RELEASE

S. Chawngtui Mizoram UPC Biak Ina zu dah chungchang thu dik tihlanna


Dt. 7.6. 2020 (Sun) zinga S. Chawngtui Mizoram UPC Biak In a zu hmuh chungchangah tunlai hian Social Media lamah thu dik lo theh darh a ni hi a pawi kan ti hle a, thil thlen dan chu hetiang hi a ni.

S. Chawngtui Branch YMA – te hian Mizoram UPC S. Chawngtui Local Chairman hnen atangin Dt. 7. 6.20 (Sun) zinga a tawngtai tur kalin an Biak In Pulpit – ah zu a hmuh thu a rawn report a. YMA – te hnena a report hma hian an bialtu Pastor hnenah a lo hrilh tawh a ni. Kan khawtlang Branch YMA hian ruihhlo doin theih tawpin hma a la a. Sub- Committee – te hial a din a ni. Report kan dawn angin Branch YMA chuan hma a la nghal a. Sunday zingkar a tang hian chaw in ei chhawkin, Biak Ina zu dahtu man chhuah tum hian a rukin an duty nghal a. Sunday ni leng leh zan lam thlengin uluk takin, a ruk thei ang berin, zu dahtu man chhuah tum hian Biak In bulah hian duty a ni. Hemi Zan dar 11:00pm thleng hian zu dahtu man tum hian chan a ni a. Tumah rawn lak tum an awm lo ni a hriat a nih avangin YMA lam pawhin Biak Ina zu chu la chhuakin Mizoram UPC Chairman hnenah an bei dawn rih thu leh a theih ang ang hma an lakpui zel tur thu an hrilh bawk a. 

Mizoram UPC lam hian an Biak Ina zu dahtu hi man chhuah a nih loh chuan Social media lama theh darh an tum thu Local Chairman hian a sawi a. Chutiang a nih avang chuan Mizoram UPC lam hi Branch YMA hruaitute leh VC – ten khawtlang mualpho theihna a nih avangin Social Media lama min lo post darhsak lo turin kan ngen a. Amaherawh chu an bialtu Pastor- in an bial group- a a lo post chu Social Media lamah a lo darh ta a ni. Hetianga khawtlang hruaitu- YMA leh VC – te ngenna ngai pawimawh lova Mizoram UPC lamin Social Media lama an lo puang zar mai kha pawi kan ti tak zet a ni. Tun hnuah chuan hetiang thil hi thleng tawh lo se kan ti hle.

Tin, he thil thleng hi Kohhran inhuatna avanga thleng a ni lova, he zu dahtu hian eng rilru puin nge a dah kan hre bik lo. Mi tuten emaw remchanga hmanga kohhran leh khawtlanga hem thlak tum ang zia zanga kohhran hming nen lam an tarlang duhte hi a tha lo tak zet a. S. Chawngtui khawtlanga UPC (NEI) leh Mizoram UPC inkarah hian eng buaina mah a awm lo tih hi Mizoram mipuite hian min lo hriatsak turin kan duh hle a ni.

Hetianga boruak a kal mek laiaThingsai Police – ten Mizoram UPC Biak Ina zu dahtu Lalnunhlua (28), s/o Lalbiakzuala S. Chawngtui an man chhuak hi kan lawm tak zet a ni. Lalnunhlua hi Mizorram UPC Biak In bul lawk a awm a ni a. A mah hi Khawtlang In BLACK LIST- a kan neih sa a ni bawk. Mizoram UPC Local Chairman Pu Lalrinchhana pa Pu Lalrinawma leh Lalnunhlua pa Pu Lalbiakzuala hi unau piang hmun an ni a. Lalnunhlua hi ruihhlo a tih nasat avanga ruihhloin a tihbuai, a chhungte pawh ina an buaipui a ni. UPC (NEI) kohhran a nih avanga Mizoram UPC Biak Ina zu dah a ni lo tih hi kan sawi duh bawk a ni.

Biak Ina zu dahtu chhuihchhuahna kawngah hian Branch YMA hian theih tawp a chhuah a, a theih chin chinah hma pawh a la ve a ni. Chutianga theih tawp an chhuah laia khaw mualphona a ni dawn si a tia Police investigation ti tur pawh lo dang anga Social Media lamah thu thehdarh lo awm kha dawt hul hual a ni a. A theih ang angin Police lo kalte hi khawtlang hruaitute hian kan lopui zawk a ni. He thu dik lo thehdarhtu hian S. Chawngtui khua hi min tihmualpho a duh hrim hrim niah kan ngai a, chuvangin FIR pawh kan theh lut ta a ni. Hetianga thu dik lo hmanga kan khaw timualphotu hi man chhuah ngei ni se la, a phu tawk hremna pek ni ngei rawh se.

Sd/-
(LALNGURLIANA SAILO) President
Branch YMA S. Chawngtui

Sd/-
(PC. SANGLIANA)
President MUP S. Chawngtui

Sd/-
(H. LALTHANLIANA)
President
Village council, S. Chawngtui

Sd/-
(VANENGMAWII)
President
MHIP S. Chawngtui
Read more »
Tweet Share Share Share Share Share

June 10, 2020

HEALTH & FAMILY WELFARE DEPARTMENT IN COVID-19 DONA ATANA STATE SAWRKAR ATANGA SUM A HMUH DAN LEH HMANRAW THENKHAT CHUNGCHANG SAWIFIAHNA

No.1862/2020-2021

Tunlaiin Covid-19 dona atana Health & Family Welfare Department in state sawrkar atanga sum a hmuh dan leh a hnathawh dan chungchang te bakah sorkarin RT-PCR khawl a ngaihtuah har lutuk tiin mi thenkhat ten thu belhchian dawllo an vawrh darh mek tih hriat a ni a. Hemi chungchangah hian mipuiten thu dik an hriat theihna turin Health & Family Welfare Department chuan a hnuai a mi ang hian thil awmdan sawifiahna a siam ta  a ni.

Covid-19 hripuiin India ram a rawn thlen tan tirh lai February, 2020 tir khan he hripui laka lo invenna tura mamawh hrang hrang te leina turin Rs 132 lakh Finance Department-ah dil a ni a. Finance Department chuan hetih lai hian R.E. 2019-2020 leh B.E. 2020-2021 te a lo final tawh a. Kum dang ang lo takin kuminah hian Budget session neih hma niin, ni 19.2.2020 khan Assembly ah budget hi pharh a ni nghe nghe a. Budget present tur hian a hma chawlhkar hnihah budget figure tih fel vek anih tawh avangin Finance Department tan thil tih danglam theih a ni tawh lo a. Tin, additional allocation dil tur pawhin ni 20.1.2020 hmaa proposal theh lut vek turin department te hriattirna Finance Department hian a lo ti chhuak tawh bawk a ni. Chuvangin, Health & Family Welfare Department-in sum mamawh hmasa a dil hun lai hi a tlai tawhin hun laklawh lai tak a ni hlauh mai a, pek nghal mai theih a ni lo a ni. Amaherawhchu, hemi hnu lawkah hian budget allocation pawh ti loin, rang takin re-appropriation hmangin Rs 500 lakh zet Health & Family Welfare Department hnenah pek a ni leh ta a ni. Tin, tun thleng hian Health & Family Welfare Department-in Covid-19 do nana a sum mamawh reng reng Finance Department hian pek loh a la nei lo a, Chief Minister zahawm tak phei chuan Covid-19 do nan anih phawt chuan a tul anga Health & Family Welfare department tan sum ngaihtuah zel a inhuam thu vawi duailo a sawi chhuak nghe nghe a, a chungah Health & Family Welfare Department-in lawmthu a sawi takmeuh a ni. Chuvangin, hemi chungchanga a chhuan chhe zawnga thudik zik tluak tarlang loa thu lo vawrh darh hi H&FW Department chuan sorkar tih mualpho tumna liau liauah a ngai a ni. 
CHUNGCHANG SAWIFIAHNA


Tin, Zoram Medical College, 2018-ah din a ni a. Tunhnai atangin  sorkarin chak taka hmalain infrastructure hrang hrang te a din chho mek a, faculty leh thawktu dang engemawzat pawh lak an ni. Medical College nei turin Medical Council of India chuan VRDL (Viral Research Diagnostic Laboratory) neih ngei ngei tur (mandatory) a ti a. Hetiang VRDL hian khawl dang engemawzat bakah RT-PCR hi a keng tel a ni. Hun hmasa lamah VRDL (RT-PCR) nei turin tih tak zeta hmalakna a lo la awm ngai lo a. Amaherawhchu, tun hnaiah chak takin hmalak a lo ni ta a ni. VRDL (RT-PCR) din tura dilna te theh luh niin ICMR (Indian Council of Medical Research) pawhin a ngai pawimawh hle a. National Lockdown avangin dilna erawh approve a ni ta mai lo a, approval hi tun hnai mai khan dawn a ni. RT-PCR khawl hi BSL3/BSL2 laboratory chin tal nei ten research tih nana an hman thin a ni a. Mizoramah CVSc&AH (College of Veterinary Sciences & Animal Husbandry) Selesih, MZU (Mizoram University), PUC (Pachhunga University College) leh RIPANS (Regional Institute of Paramedical and Nursing Sciences) ten RT-PCR khawl an nei a. 

India ram leh Mizorama Covid-19 vei an pun zel dan leh he hripui hmachhawnna atana sorkar laipui chetlak dan te bakah ICMR in inkaihhruaina chi hrang hrang a siam te thlir chungin rang taka RT-PCR neih dan tur sorkarin a ngaituah ta a. CAU, Selesih atanga khawl hawhin kar hnih chhung lekin C&DST Lab, Falkawn behchhanin RT-PCR khawl chu mithiam ten an lo bun ta a, ni 7.4.2020 atang khan he khawl hian hna a thawk tan thei ta a ni. Hei hi kan dinhmun anih laia hawh chawp mah ni se kan mamawh em em RT-PCR hman theih a lo awm ta hi Chief Minister zahawm tak leh Health & Family Welfare Minister zahawm tak te hmalakna a ni a, an chungah Health & Family Welfare Department chuan lawmthu a sawi tak meuh a ni. 

Institute of Bio-resources and Sustainable Development (IBSD), Government of India ten Imphal-a an regional office atangin RT-PCR min hawh tir bawk a. Ni 7.6.2020 atang khan he khawl hian hna a thawk tan ve nghal ta bawk. Tin, Pu Thantluanga, Haua & Sons in RT-PCR leina tur Rs 21 lakh sorkarah a rawn pe hlauh bawk a, a lawmawm takmeuh a ni. He khawl hi hun reilote chhunga chah thlen beisei a ni. NHM hnuaiah RT-PCR pakhat lei turin tih fel a ni tawh a, ni reilote chhungin a lo thlen beisei a ni. Hei bakah hian RT-PCR khawl chi khat tho “TRUENAT” khawl chu 4 chah thlen tawh niin Civil Hospital, Lungleiah khawl 2 hi bun fel a ni tawh a, ICMR approval pawh lak tawh niin reiloteah hman theih mai tura beisei a ni. Health & Family Welfare Department chuan Chief Minister zahawm tak hmalaknain a hun tak zelah mamawh ang khawl hman tur a nei thei hi lawmawm a ti a, sorkar chungah lawmthu a sawi tak meuh a ni. 


RAT (Rapid Anti-body Test) kit hman chungchangah  thu belhchian dawllo nasa taka theh darh a ni bawk tih Health & Family Welfare Department chuan a hria a. A tir te atangin RAT hi diagnostic atan hman a ni lo. Mizoram pawn atanga lo haw te an awmnaah Covid-19 an lo kai tawh reng em tih enfiah nan an lo thlen hnuah  RAT hmanga endik an ni thin a. Covid-19 miin a lo kai hian a kai atanga ni 7 hnu-ah a taksaah antibody insiam tura ngaih a ni a, hetianga antibody lo insiam tawh te chu RAT hmanga endik an nihin reactive an nih chuan Covid-19 an vei tak tak em tih hriat (diagnose) nan, chutiang mi te chu symptom nei lo mah se RT-PCR hmanga test leh an ni thin. Amaherawhchu, an taksaah virus a luhna a la rei loh a, antibody a la insiam loh chuan RAT hian awmzia teh chiam a nei lo a. Chuvangin, RAT hmanga negative te pawh RT-PCR ah an positive ta hlawm nual a ni. Hemi awmzia chu RT-PCR chuan virus a detect vat theih avangin RAT in a a detect theih loh antibody insiam hma pawhin positive leh negative te a hre thei a ni. Hei hian RAT hi a hmantlakloh hulhual tihna   a kawk lo a, a vei tantir te diagnose-na  atan tangkaina a ngah lo tihna mai a ni. Tuna RT-PCR khawl hmanga a tam thei ang ber test tur a lo nih takah hian RAT hi surveillance atan tutenge antibody nei tih en nan hman zui zel tur a ni a, entir nan, Chennai atanga lo haw RT-PCR a test loh te zawn chhuah a test nan hman tur a ruahman a ni. Tin, frontline workers hrang hrang paramedics leh nurse te, police te endik nan pawh hman chhunzawm tura ruahman a ni. RAT hi ICMR in hman a phal hnuah state dang tam tak te tih angin Mizoramah pawh hman tan ve a ni.

Covid-19 hripui dona atana sorkar, tlawmngai pawl hrang hrang, kohhran te leh mipui te inlungruala kan tanhona tha tak avangin Health & Family Welfare Department chuan lawmawm a ti a. Kan ramin hetiang hun khirh a tawh laia hruaitu chak leh Pathian tih mi Chief Minister kan nei hi Health & Family Welfare Department chuan vanneihthlak a ti a. Sum leh hmanrua mamawh leh tul dang tinreng a hun tak zela ngaituahsak zel an nih avangin vawiin dinhmun hi thleng thei niin Health & Family Welfare Department chuan an in hria a, amah leh a thawhpui Minister zawng zawngte leh Chief Secretary chungah lawmthu a sawi takmeuh a ni. 

Issued by Health & Family Welfare Department, Govt. of Mizoram 

Read more »
Tweet Share Share Share Share Share

June 07, 2020
Kan heti zel si a, tunah Covid19 case 34 lai ka neih der tawh a. Kan chhiat vek hma hian kan sawrkar hian khuahkhirhna khau zawk a puan vat a ngai a ni.
Khai Khai....

Khatla South veng chhunga drugs addict pakhat in quarantine centre hrang hrang a awm te drugs an lo sem thin tih hriat a ni a, kut ngeia inhlan hi hmuh a ni a, vengchhung mipuite fimkhur lehzual turin kan in hriattir e.

    
Khatla South Tlangau 11:06 AM 07/06/2020

Covid19 damlo pakhat enkawl dam nan cheng nuai 5 (5 lakh) vel a ngai niin an sawi a. A enkawl  hi a hautak hle, tih kan hria. Medical team te quarantine leh zel an ngai a. Kan dinhmun en hian, damlo za enkawl hautak tur zia hi kan chhut a  ngai a. Mitin kan fimkhur a ngai hle. 

[ToMZ is dedicated for archive and exposition of Mizo affairs to the rest of the world. Informations obtained are re-posted 'as-is' basis as a digitization initiative so as to make accessible to all through online surfing. Due credit is given to all author/owner except those which cannot be ascertained]
Read more »
Tweet Share Share Share Share Share

June 05, 2020

B. LALCHHANZOVAZPM IN PU B. LALCHHANZOVA RAJYA SABHA M.P ATAN CANDIDATE DAWN


ZPM Political Affairs Committee (Extended) vawiin 5th June 2020-a thukhawm chuan, June 19, 2020-a Rajya Sabha MP inthlan lo awm turah hian Candidate siam ni se tiin a rel a, ZPM party official candidate atan Pu B Lalchhanzova, Dawrpui Veng Aizawl a ruat.

Pu B Lalchhanzova hi ZPM Gen. Hqrs -ah General Secretary i/c Frontal etc. a ni a, kum 2018 MLA Election-ah khan Aizawl East-II biala ZPM official candidate a ni.

June ni 19 a Mizoram atanga Rajya Sabha Member thlanna lo awm turah, vawiin khanZoram People's Movement Public Accounts Committee Extended Meeting chuan candidate siam ngei nise an ti am ZPM Official Candidate atan Pu B. Lalchhanzova, Dawrpui an ruat a, a ni hi mi hneh thei tak tura thusawi thiam tak a ni. A ni hi an party General Secretary i/c Frontal etc. a ni a, kum 2018 Mizoram Assembly Inthlanah khan Aizawl East II atangin ZPM ticket in a lo ding tawh a, hemi tum hian vote hmu tam ber dawttu a ni pha. 

 Rajya Sabha Inthlanna atan hming pekluh theih hun chu June ni 9 a ni a, June ni 10 ah candidate te hming endik a ni ang a, a tukah candidate inhnukdawk leh duh te tan hun hawn zui a ni ang a. June ni 22 ah chuan inthlan kaihhnawih hi zawh vek tawh tur a ni.
Read more »
Tweet Share Share Share Share Share

June 02, 2020

Covid-19 chungchanga Mizoram Police thuchhuah


No.1606/2020-2021

Thu Diklo Thehdarh Chungchanga Aizawl the 2nd June, 2020 : IGP (Hqrs) leh Chief Public Relation Officer, Mizoram Police Media Cell ni bawk chuan COVID-19 chungchangah a hnuai ami ang hian thuchhuah a siam.

Dt. 31.5.2020 (Pathianni) khan social media platform whatsapp-ah mi pakhatin mi tichiai thei thu, “Thawhtanni atangin Rangvamual chu total lockdown tum a ni. Nimin lama phai atanga lo haw zinga pakhat quarantine duhloh vanga Phunchhawng-a motor atanga zuangthla chu a chin hriat ala nihloh avangin thawhtanni atangin Phunchhawng leh a chhehvel vengte uluk zawka venhimna kalpui anih theihnan lockdown tum a ni” tih thu, whatsapp group pakhat “NEWS TODAY”-ah a post a, a post thlalak(Screenshot) pawh whatsapp group hrang hrangah darhin mipui tam tak a tichiai a ni.

He thu hi chhui nghal a ni a. He thu post tantu Aizawl Venglaia cheng kum 40 mi leh he thu sawi ri (audio) post-tu Phunchawng, Aizawla cheng kum 40 mi te chu thu zawhfiah niin, midang titi an hriat atanga he thu hi whatsapp group-a post an nih thu an sawi a. A post-tu pakhat zawk hian Rangvamual-a a lennaa a hriat a nih thu leh a dang pakhat zawk hian a thiante thu sawi a hriat avanga a thusawi ri (audio) thehdarh a nih thu a sawi. Quarantine tur tlan chhuak an awm thu an hriat loh thu an sawi ve ve bawk.

State pawn atanga Mizorama lo hawte hi Govt. Quarantine Facility-ah emaw, Community Quarantine Facility-ah emaw, thuneitute phalna neih hnuah Home Quarantine emawa awm tir an ni a. An lo thlen hian uluk taka enzui leh vil an ni. Hetianga thu dik lo leh mi rilru tichiai thei post avang hian mi pahnih, kum 40 mi ve ve lakah thubuai ziah luh a ni a. Chief Judicial Magistrate, Aizawl hnenah cognizance lak a nih hnuah Vaivakawn Police Station case no. 164/2020 Dt. 01.06.2020 U/s 505(1)(b) IPC R/W 54 DM Act 2005 register niin thu dik lo post-tu hi man a, judicial custody-a thawn tura hma lak mek a ni.

A dik lo zawnga mipui rilru hruai thei leh mipui tichiai a, thu dik tluantling lo leh thu belhchian dawl lo thehdarh hian nghawng tha lo tak a neih theih avangin mipuite i fimkhur ang u. ~DIPR Mizoram
Read more »
Tweet Share Share Share Share Share

June 01, 2020
No.J.32019/4/2019-DC(K) 
IN THE COURT OF DISTRICT MAGISTRATE 
KOLASIB DISTRICT : KOLASIB, 
( JUDICIAL BRANCH ) 

Dated Kolasib, the 1st June, 2020 

Maharashtra atangin kan Mizo unaute’n Bairabi Railway Station, Bairabi lo thlengin District hrang hrangah thawn darh an ni dawn a. Khualzinte mahni District theuh tluang taka an thlen theih nan leh natna inkaichhawn theih laka mipuite kan him tlan zawk theihnan thupek chhuah tulin ka hria a.

Chuvangin, Kei, Dr.H.LALTHLANGLIANA, MCS, DISTRICT MAGISTRATE, KOLASIB DISTRICT hian The Mizoram Epidemic Diseases (COVID - 19) Regulation, 2020 Clause 11 (1) in thuneihna min pek angin, hetiang hian thupek ka chhuah e.

Kolasib DC thuchhuah

1. Dt.02.06.2020, tlai dar 04:00 atanga Dt.03.06.2020, chhun dar 12:00 emaw Maharashtra khualzin phur Bus tawp ber a chhuah fel hnu darkar khat (1) hnu thleng Bairabi leh Zero Point (Saihapui peng) inkarah mihring leh lirthei eng chi mah kal phal a nilo.

2. Khualzin lo thleng te Private motor a inlam leh inhmuah phal a nilo.

He thupek zawm lo te chu “Disaster Management Act, 2005, section 51 atanga section 60, The Mizoram (Containment & Prevention of COVID -19) Ordinance, 2020 hmangin hrem theih an ni ang.

He thupek hian COVID - 19 dona atana Sawrkar in Duty tura a ruatte leh phalna pek bik te a huam lovang .

He thupek hi vawiin 01.06.2020 hian Court Seal chhu in hming ka ziah hnan e. Download PDF
Read more »
Tweet Share Share Share Share Share

April 30, 2020
Ni 25.4.2020 (Inrinni) zana Dinthar veng Local Level Task Force duty-te chet dan Social media-a video clip darh chungchangah Dinthar Local Level Task Force on Covid-19 chuan thil awmzia sawi fiah tulin a hria a, hetiang hi thil thlen dan chu a ni :-

1. Tunlaia Dinthar venga mi vuak hrat ber, pawisak nei miah lo, inti YMA leh lutuk, mi huat rawn hlawh tih thu ziaka thlalak, WhatsApp Dinthar News Group’ atanga rawn darh chhuak hi ni 23.4.2020 (Ningani) dar 11:30 am-a post a ni a. A post-tu hi Dinthar veng mi, Lalhmunsiama s/o Ngurchhingi, Vanapa Section (House No. D/V-78)-a cheng a ni. Amah hi ruihhlo zuar leh ti thin, YMA pawhin vawi eng emaw zat a zilh tawh hnu pawha sim duh lo; chhiatni fund leh membership fee a lo pek tawh pawh pek let tawh a ni bawk. Ni 23.4.2020 (Ningani) tlai lamah Tawngtai Bethel Camping Centre, Sakawrtuichhun-ah dah luh nghal a ni nghe nghe. Thlalaka lang kha Dinthar Veng tlangval tlawmngai leh chhuanawm, khawtlang leh kohhrana inhmang tak a ni a. Branch YMA Executive member leh Section YMA OB (Asst. Leader) ni lai a ni. Hetianga mimal inhuatna avanga intihmualphona thlalak a lo darh ta mai hi Dinthar Veng khawtlang chuan pawi kan ti a, a thlalak pho chhuaktu leh tidarhtute hi kan dem tak zet a. Kan hruaitu leh khawtlang min timualphotu hi dan anga hrem a nih ngei theih nan hma kan la zel dawn bawk.

2. Dinthar Local Level Task Force on Covid-19 leh Dinthar Branch YMA Vigilance Sub-Commitee-te chet dan, thu dik tluantling loa video clip theh darh a ni hi pawi kan ti a. Tun lai boruakah Dinthar Local Level Task Force on Covid-19-te an hah hle a, veng chhung mi harsate tanpui leh Covid-19 a darh zel lohna tura sawrkar thupek bawhzuiin theih tawpin, tlaivar thak thakin hma an la thin a. Chutih laiin zan rei lama sawrkar thupek (curfew/lockdown) bawhchhiaa thu awih loa ruihhlo lam buaipui leh veng chhunga hnawksak an awm ve reng bawk a. Chungte avang chuan duty pawh ngawrh leh zualin kalpui mek a ni.

Ni 25.4.2020 (Inrinni) zan lai dar 12:00 am hnu lam khan tleirawl rual thenkhat, thu awih lo mi pariat (8)-te chu an ruihhlo tih-lai (ganja) nen man an ni a. Man an nih hnu hian thu zawh fiaha hawtir mai tum an ni, chutia thu zawh fiah lai chuan an zinga pakhat chuan duty-te tham lo taka tiletin, cho let (challenge) zawngin a khawsa a. Hemi avang hian duty-te pawhin amah bik hi zilhin, a kut an vuak bakah han ben deuh a ni nghe nghe a. Mi dang zawng erawh an kutphahah vawi khat diat diat vuaka beng suktir an ni. Hemi hnu hian veng dang mite hi an khawtlang hruaitute hrilhin an ruihhlo mansak te nen an khawtlang hruaitute kutah hlan an ni.

He thil thleng video lo darh hi heng tleirawl man zinga pakhat, taksa hrisel lo (gout na neia insawi), hrem ve loh-a a sira lo awmtirin a mobile phone-a thla lo lain, a lo darh ta a ni. Hetianga veng chhung tihmualpho tumna leh thu dik tluantling lo hmanga video clip leh thu lo darh hi pawi kan tiin a titu hi kan dem tak zet a ni. Tun hnuah hetianga thu dik tluantling lo hmanga veng tihmualphona ang chi hi khawiah mah thleng tawh lo se kan ti a. Covid-19 hri leng laka Dinthar Veng kan himna tur leh sawrkar thupek keng kawha chhun zan zawma hah taka thawktute hi kan thlawp tlat a, tun atang chuan dan leh thupek ken kawh kawngah a hma aiin chak leh zuala hma lak zel kan tum a ni.

Copy to :-
1. The Editor, All Daily Newspaper (chanchinbu) zahawm taka news item-a min lo puan zarsak turin.
2. The Editor, DDK/LPS/ZONET - news item-a min lo puan zarsak turin.
3. Pu Lalruatkima, Bialtu MLA - a lo hriat atan.
4. Pu R. Thanglura, Bialtu Councillor (AMC) - a lo hriat atan.
5. Chairman, State Level Task Force on Covid-19 - a lo hriat atan.
6. Aizawl DC - a lo hriat atan leh tul anga min bawhzuisak turin.
7. Aizawl SP - a lo hriat atan leh tul anga min bawhzuisak turin.
8. LLTF Zone 5 bialtu Magistrate - a lo hriat atan leh tul anga min bawhzuisak turin.
9. O/C, Vaivakawn PS - a lo hriat atan leh tul anga min bawhzuisak turin.
10. Chairman, Tuikual North Local Level Task Force on Covid-19 - a lo hriat atan.
11. File.

Sd/-
R. LALAWMPUIA
Chairman
Dinthar Local Level Task Force on Covid-19
Aizawl, Mizoram.

_Sd/-_
C. VANLALHRUAIA
Secretary
Dinthar Local Level Task Force on Covid-19
Aizawl, Mizoram.
Read more »
Subscribe to: Posts (Atom)

Contact Form

Name

Email *

Message *

TOM © 2025. All Rights Reserved.
Published by Songate G

Ads Section

Powered by Blogger.