TIMES OF MIZORAM: Mizo Thawnthu

Showing posts with label Mizo Thawnthu. Show all posts

UIRENA - Mizo Thawnthu Ngaihnawm

ToMZ August 25, 2021 2

TU'N NGE HMANGAIH ZAWK ? NUPUIIN NGE BIALNUIN?

Duh leh hmangaih taka ka neih ka nupui nen hian kum 10 dawn chu nupa kan lo ni ve ta reng mai. Mahse kum khat chuang kal ta aṭang khan ka nupui chu ka hmangaih tawh lovin ka hria a, ṭhen ka duh ni berin ka hria. Tunhmaa amah ka duhna leh hmangaihnate kha an chuai ta a ni ber mai. Ani aia hmelṭha leh tunlai zawk hmeichhe dang duh ka neih vang pawh a ni mai mahna.

Ka nupui chuan keiin ka duh tawh loh ang bawkin ani pawhin min mamawh tawh lovin ka hre ve bawk a. Thil ho te teah hian kan inhau ta fo mai.

Chhan engemaw avangin zan khat chu kan nupa room-ah kan inhau leh a. Chumi zan chu kan inhau satliah a ni lo, ka thinrimin kut hial ka thlak a. Chu chu ka nupui emaw, hmeichhia hrim hrim kut ka thlak ṭumkhatna a ni. Ka inthiam lo viau mai a. Mahse ka hmelah erawh ka inthiam lohna chu tilang duh lovin, ṭawngkain ka la ti chhunzawm zel a. Chumi hun ṭha chu hman ṭangkai tumin min chhuahsan turin ka ti a. Tunhma pawhin lo inhau tawh ṭhin mah ila, chhuak tur em chuan ka la ti ngai lo. Rilru na em em chunga ṭapin a insiam a. A insiam zawh chuan kan fanu kum 2 la tling lo, muhil lai chu puain a chhuak nghal a. Ruah a sur lai takin an chhuak a ni a, engtin tak awm ang maw ? Ka lak ata a kal bo dawn avangin ka lawm a, mahse ka fanu erawh ka ngaihtuah ve a ni. Ruah a sur hnem bawk si a.

Zing a lo ni a. Naute leh a nu an awm lo tih a hriatin ka pa, kum 80 mi chuan an chin min zawt a. Zep lovin ka hnawhchhuah thu ka sawi ve mai. Min hau hrep hnuah ko hawng leh turin min ti a. 'Aw' emaw 'aih' pawhin ka chhang lo. Ka pa hi a upa tawhin a hriselna a ṭha lutuk lo bawk nen khum hi a khawvel a ni tawh mai a. Ka nupui, a monu chu a kut leh ke a ni ṭhin. Ka pa leh ka fa upa lam pahnihte enkawltu turin awmpui ka ruai ta ringawt a.

Chumi ni chu office pawh kai lovin nilengin ka bialnu nen kan inkawm a, ka nupui ka hnawhchhuah tawh thu te hrilhin kan hlim dun khawp mai. He ka bialnu hi thingtlang aṭanga lehkha zir tura Aizawla rawn awm a ni a, a hmel a ṭhain a pian a mawi a, an college miss atana an thlan ve ngat kha a ni. Kum 10 dawn mi pasal ka nih hnuah tlangval ka ni leh tawh bawk a, ani nula a ni bawk nen kan innei vat pawh ka ring.

Zankhat chu an inluah aṭanga ka haw laiin ka haw kawngah bungraw phur motor lian leh car an insu a ni awm a. Zan rei hle tawh mah se mi an lo tam khawp mai. Car-ah chuan nupa hi an lo chuang a, an pa zawk chu a na khawp mai a, biak pawh a hre lo. An nu erawh a hliam ve tho na a, mahse a harh ṭha a, ngaihtuahawm a ni lo. A pasal a hliam na hle tih a hriat rualin a mangang chu naupang ang maiin a ṭap ta vak vak a.

Kei ka lo awm remchang nen ka car-in an nupa chuan damdawiin lamah hmanhmawh takin ka tlanpui a. Kawng laka a pasal dinhmun avanga a mangang ṭawngkam leh thlabar ṭap ri te ka hriatin chu nu chuan a pasal chu a hmangaih hle tih ka hre thei. Ka khawngaih hle a, a pasal chu damchhuak ngei se ka duh bawk a ni. Vanduaithlak takin a pasal chu a hliam tuar lovin lo thi palh ta se a tawrh zawh ka ring lo.

Ka car khalh pah chuan ngaihtuahna ramah ka cheng a. Ka bialnu chuan engtiang takin min hmangaih ve ang maw ? Heti ang hian hliampui lo tuar palh ve ta ila, engtiang takin nge a lungngaih ang tih vel ka ngaihtuah a ni.

Damdawiin chu thlengin kan indah lut nghal vat a. An chhungte an rawn thlen hnu pawh chuan damdawiina hruaitu ka nihna angin an chanchin ngaichangin ka la awm ve reng a. Chumi zan chu ka lehkha zirpui ṭhin, doctor ni ta duty zan a lo ni hlauh mai. A room-ah lutin ka damlo hruaite chu eng nge an ân ka zawt a. Ngaihtuahawm lutuk an nih loh thua min chhan zawhah, "I buai tawh lo tiraw? Thil min tihsak lawk teh. Ka bialnuin engti ang chiahin nge min hmangaih tih ka hre duh a ni," tia ka sawi lai chuan, "Nupui i nei tawh emaw ka ti ! " a lo ti vat a. Kan inṭhen tawh thu leh ngaihzawng dang, hmelṭha leh pian mawi tak ka neih thu hrilhin ka ngaihzawng chu min call-sak turin ka ti a. Ka ngaihzawng hnenah chuan car-a ka accident thu hrilh turin ka ti a ni.

Damlo khum pakhata min muttir hnuah ka bialnu chu a call a. Loud speaker-ah dahin he thu hi a sawi a. "Hello, doctor Biakkima ka ni a, hei i bialpa Mapuia car-in a accident a, a dinhmun a ṭha lo khawp mai. Inzaina pindan aṭangin ka chhuak chiah a, a ke pahniha tan a ngai dawn a ni. Hetah tumah a chhungte an awm bawk si lo, a phone kan en a, chuta 'Love' tia a save chu ka rawn call tawp mai. Khawngaihin i rawn kal hman ang em ?"

Mangang leh hlauthawng taka a ṭah vak ka rin laiin ka beisei lo lam daih a thleng a. "Number dik lo i call palh a ni ang. Mapuia ka hre ngai lo. Khawngaihin rawn call tawh suh ang che," tiin phone chu a dah daih mai. Doctor chuan mak ti hmel takin kei chu min en ringawt a. Ka zak leh thinrim bawk si chu ka puak keh mai dawn khan ka hria. "A va mak ve. Ka'n call leh chhin ang e aw," tiin a call let leh ngat a. Mahse call a la duh tawh reng reng lo. A ṭumhnih nan call leh a tum a, mahse a phone a lo switch off tawh a, a call tlang thei tawh lo.

Ka zak lutuk leh thnrim bawk si chu, "Zawngi chu a châk lo ngawt ang !" ka'n ti ta ringawt a. A ngawih deuh vang vang hnuah doctor chuan, "Ṭhianpa, Lover ni lovin Gold digger zawk i tawng a nih hmel," nui deuh chungin a lo ti a. Ka nui a za ve lo khawp mai. Amah bawk chu rawn ṭawng lehin, "Tuna mi ang chiah khan i nupui call leh ang," a lo ti a. "A ṭul lo. Ani te chu ka duh tawh hlei nem, ka hnawtchhuak tawh alawm. Bakah a mu tawh ang, a tlai tawh em mai," ka ti a. A call ka duh loh chhan tak zawk chu ka zahna a belhchhah mai mai ka hlauh vang a ni.

A tih tlat avang chuan a number chu pein a call ta nge nge a. Mahse a muhil tawh a ni ang, call a la thei lo. Call tawh lo tura ka tih chu duh lovin a call leh a. A ring rei lo, call chu lain thophang aw tih hriat em em hian ka nupui hlui ngei chuan a rawn chhang a. Ka bialnu hnena a sawi ang tho khan accident ka tawh thu leh ka dinhmun a ṭha lo va, ka ke pahniha tan a ngaih tur thu a sawi a. A sawi zawh hma hma chuan ṭap chungin khawi damdawiinah nge ka awm a lo zawt vat a. Ka awmna damdawiin a hrilh hnu chuan call chu a dah nghal a. Ka bialnu ai kha chuan min ngaihtuah deuhin ka hria. A fate pa ka nih vang te pawh a ni mahna le.

Ka ṭhianpa chu a lo phur laklawh a. Ka lu leh ban vel bandage-a min tuam hnuah inzaina pindanah min luhpuiin inzaihna khuma min muttir hnuah puanin min khuh bawk a.

An inbiak aṭanga darkar chanve hnuah hlauhthawn hmel em emin ka nupui hlui chu a nu nen an rawn lut a. Doctor chuan ka dinhmun a ṭhat loh thu leh inzai an ṭan ṭep tawh a, min zai ṭan hmain minute 5 vel ka bula awm a phalsak thu sawiin a nu erawh a chhuahpui thung a. Hetih lai hian keiin nikhua hre lo angin lem ka lo chang ve mek bawk a. Ka ṭhianpain a tih tlat avangin ka ti vel mai mai a ni. Min hmangaih emaw ka tih ka bialnuin min hmangaih miah loh avangin ka thin a rim a, ka thiltih mek pawh chu ka ṭhianpa angin ka phur ve lo.

Ka mutna khum bula ṭhutna awmah chuan ṭhuin zawitein ka kut a la a. Ka kut chu fawpin inhnih feih feih chungin, " Pa a, hei ka lo thleng e. I bulah ka awm aw. Engtin mah i awm lo vang. Min kalsan miah suh ang che. Pa a, dam ngei ang che aw. Ka hmangaihzia che hre tur tal pawhin dam ang che. I hria a, naupang leh i pa enkawlin nitin leh zantinin ka buai em em ṭhin a, ka ngaihsak hman ṭhin lo che a nih kha. Mahse khami avang khan ka hmangaih lo che tihna a ni reng reng lo. I piancham kha i la hria em ? I lo haw loh zan kha. Khami ni khan i piancham lawmsak che tumin ka inbuatsaih ve nasa a, khami ni ngei khan kan inneih tirha ka hmangaih ang tho che khan ka la hmangaih reng che a ni tih hrilh che ka tum a ni. Mahse min phatsanin ngaihzawng i nei reng tih ka hre ta zawk a nih kha. Khata chin kha chu ka hmangaih che tih pawh hrilh che ka tum tawh ngai lo. Ka awm awmin ka awm ve tawp tawh a nih kha. Mahse maw pa a, hmana ka hmangaih ang tho che khan tunah pawh hian ka la hmangaih reng che asin!

Khawngaih takin min kalsan suh aw. Ke nei lovin ruanbanlo ni dawn tawh mah la, a bak awm thei tawh lo tur khawpa nasain ka hmangaih reng tho ang che. I inzaih chhungin pawnah kan lo nghak ang che, ka hmangaih che," tiin ka kut chu fawp vawng vawngin a tho a. Min lo hmangaihzia ka hriatin a chunga ka lo sual ṭhinzia ka ngaituah a, ka inchhir lutuk chu ka mittui a tla hial a ni. A chhuak tur chu a kutah ka lo chelh vat a. A phu deuh zawkin ka hria. A kuta la chelh reng chung chuan min khuhna puan chu hlipin ka tho a. Amah chu va kuah vatin, "Min ngaidam ang che. Hmangaih tlak loh heti ema min hmangaih hi ka lo hrethiam lo a ni. Min ngaidam thei a nih chuan hei hi ka tiam ang che, ka tiam ang mawlh che, tun aṭang chuan ka diklohna leh sualnate avangin i na tawh lo vang a, i tan khawvela pasal ṭha ber ka ni tawh ang.

Nu-i, ka hmangaih che," ka ti a. Mak ti hmel takin, "Eng nge awmzia ? I ke a na lo maw ? I lu leh i ban te pawh ? I accident lo tihna em ni ?" a lo ti vat a. "Aw, nu-i, engtin mah ka awm lo, ka accident lo hrim hrim. Min hmangaih em tih hriat theihna tura lemchanna mai mai a nih kha," ka ti a. A lawm leh ka tihder avanga thinrim bawk si chu mittui nen, "Mi a pa, ka hlauhthawn hmanzia kha i hria em?" tiin min kék bu lawp lawp a.

"Hmangaihna hi inzahtawnna, inhriatthiamtawnna leh inrintawnnate nen an thawh ho loh chuan hmangaihna famkim a ni ngai lo".

By - JH Davies Tlangthan

Mizo Thawnthu

Tweet Share Share Share Share Share

RAMDINSANGA - MIZO SHORT STORY

ToMZ May 04, 2021

RAMDINSANGA - MIZO SHORT STORY [Fiction]

By: RS THANGLUAH

"Khawi ka lo khâi pui ang che," tih pahin ka hnung lam aṭang chuan mipa pakhat hian ka thil khâi chu min rawn lâk sak a. Tunge a nih pawh ka hre hauh lo ,"A ngai hleinem, ka khâi thei a lawm," ka lo ti ve nghal vat a. Mahse, ka thusawi chuan awmzia a nei lo chiang kher mai. Ka bula mipa chuan ngawi rengin ka bungrua chu a khâi a, en pawh min en chuang lo. Mask a vuah tlat vangin tunge a nih ka hre thei mai si lo ,"Kan kalna lam tur a inang em ni?," tiin ka zawt tawl a. Engtinmah min chhang lo, ngawi rengin ka kal rual chuan a kal ve mawp mawp a. Mahse, chutiang ringawt chu ka duh dan a ni si lo ,"Ṭhianpa, kan haw kawng a inang em ni?," ka ti leh a. Min rawn en a ,"Zawhna i van ngah tak," a rawn ti hmuk a. Sawi leh tur pawh ka hre tawh lo, engvanga min pui nge maw a nih reng reng le? Kan inhria a zeng pawh a ni si lova ti rilru nuah nuah chung chuan, engmah zawt nawn tawh lovin ka kal ve mawp mawp a.

Thui fê kan kal dun hnu chuan ka bula mipa chuan Phone call a dawng a. A hre lo nge, a chhang duh lo ka hre lo. A Phone call dawn chu a chhang hauh lo mai, vawi 3 lai an rawn call hnu chuan keimah bawk chuan ,"Ṭhianpa, Phone call i dawn kha, chhang la. Ka bungrua kha ka lo khâi tawh ang e," ka ti leh ta nge nge a.

"A ho lutuk," tih chiahin min chhang a. Mahse, a Phone call dawn chu a tawp phah chuang si lo, vawi 5 vel lai an rawn call nawn hnu chuan a ning ta deuh a ni ngei ang, a chhang ve ta nge nge a ,"Eng nge i duh? Min rawn be tawh suh," tih leh Phone dah chu a rual leh nghal a. Amah rawn call tu tan chuan a van hrilhhai thlak dawn tak êm! Ka tan tak pawh hian a hrilhhai thlak takzet a ni. A ding det a, thâwk a rawn la hak a ,"Tunlai hmeichhe ho luhlul zia leh thinchhiat zia hi chu aw," a rawn ti leh ringawt a. Kei lah chuan ,"Tunlai hmeichhe ho zingah chuan ka tel ve lo chiah chiah a nihchu," ka lo ti leh hram pek a. Min rawn en a ,"Tunlai hmeichhia ni si lovah chuan i hmelṭha khawp mai," a la rawn ti zui a. Min tih thinrim a tum nge? Min bâwl a tum zawk pawh ka hre lo ,"Tunlai mipa ho nghal zia hi chu aw," ka lo ti ve leh zat a. A rawn nui chhuak hawk hawk a ,"Ka nghal zia chu i la hre dawn chauh, Rose," tih pahin ka bungrua min khâi sak chu ka kutah min rawn hmehbel nghal chawt chawt a ,"In in peng kan thleng chiah e, a nih aw phawts," a ti a, lawmthu pawh ka sawi hma in a kal ta daih a. Engtinnge ka hming te kha a hriat le? Ka hming mai ni lo, kan in kalna peng thlengin a hre vek bawk si. Tunge maw a nih le? Hummm, a ho lutuk ngaihtuah rih lo teh ang.

In ka thlen chuan ka chau takzet a ni tih ka in hre chiah. Ka thil lei chu ka dahfel zung zung a, ka nu eirawng bawl chu ka pui nghal bawk a. Ka pa chuan zanah a hnathawhpui te 2 an lo lên tur thu a sawi bawk a. Zanin chu ka mu hma leh thei dawn lo a nih hmel, eirawng kan bawl zawh chuan rei vak lo ka ṭhut chawlh hnuah inbual turin ka inbuatsaih nghal a.

Ka inbual pah chuan khapa bawk kha ka ngaihtuah leh a. Tunge ni ang le? Engtinnge ka hming leh kan In peng te kha a hriat le? Heiham, engvanginnge maw ka ngaihtuah chiam chiam le? Ka inbual zawh hnu rei vak lovah chuan zan riah kan kil nghal a. Zan riah eikhamah chuan, zan lamah ka pa in inlêng a neih dawn vang chuan ka room-ah ka lut chho duh lem lova. Ka pa inlêng tur te pawh an rawn lang har lo kher mai, ka pa ho in sitting room-ah chuan an inkawm a, an hna lam thil an sawiin ka hria. Kei leh ka nu erawh Choka lamah kan awm thung a. Ka pa chuan min rawn au a, thingpui lum turin min rawn ti nghal a. Kei pawh chuan thingpui chu ka lum nghal vat bawk a.

Ka pa inlêng te chu zan dar 9:30pm velah an haw a, an haw hnu rei vak lovah chuan keini pawh chu kan mu ve nghal bawk a. Chhun lamah ka tei hah viau e ti lo chuan, ka mut erawh a chhuak lo kher mai. Mut pah chuan ka online mai mai a, mipa biak bik nei em em ka ni lo bawk a private message ka dawng tam lo kher mai. Kan ṭhian ho group-ah chuan ka nawi leh hle a, dar 10:30pm velah chuan mut mai tumin ka Phone chu silent mode-ah ka dah a. Whatsapp aṭanga out ka tum lai tak chuan number hriat ngai loh aṭang hian ,"Mu tawh em?," tih message ka dawng nawlh mai. Chhan tur nge chhan loh tur ti a ka ngaihtuah mek lai chuan ,"Vawiin khan i nalh lutuk," tih hi a rawn thawn leh a. A Profile Picture ka en nghal vat a; mahse, a Profile picture-ah pawh chuan a hmai a tuam tlat tho. A message chu ka hawng vek a; mahse, chhang lovin ka mutsan ta zawk a.

Zingah chuan ka thawh veleh ka nu nen eirawng bawlin kan buai nghal a, ka Phone pawh ka ngaihtuah hman meuh lo. Eirawng kan bawl zawh meuh chuan nî pawh a lo tlangsâng leh ta hle mai. Ṭhut chawlh pahin ka Phone pawh ka bih ve thei ta hram e, nizana min rawn text tu bawk khan message a lo hnutchhiah leh tawh a lo ni a.

"Good morning, i tho nuam maw?," tiin min lo text a. A message chu chhan loh bawkin ka tuai liam zui leh nghal a. A beidawn ve mai ka ring a; mahse, a teuh lo mai. Min rawn text leh a ,"A mak e, min chhang let ve em em la. I van induh tak e aw," a rawn ti leh a.

"Nimin vang khan ka lawm lutuk a nia aw," tih chauhin ka chhang a, ka out a, chaw ei ka siam san daih a. Tûk ṭhuan eikhamah chuan ka hna lama kal turin ka insiam nghal mawlh mawlh a. Dar 9:30am-ah chuan Office lam panin ka chhuak leh tawh a. Office ka thlen chuan ka hnung lam aṭang hian ,"Miss," tiin mipa pakhat hian min rawn ko a. Ka ding nghal chawt a, ka hawi let nghal vat a.

"Chibai le, Miss," tih pahin a nui sâng a. A mit meng aṭang chuan nimina min puitu kha a ni tih ka hre thei nghal a. Mak tih hmel zeta ka en reng lai chuan, amah bawk chuan ,"I thil chah ka rawn dah dawn a," tih pahin a kut veilama a thil khâi chu min pe nghal a. Eng nge ka chah le? Thil chah ka neih âwm ka hre si lova ,"Lawkin, min hai a ni lo maw? Thil chah ka nei si lova," ka lo ti nghal vat a.

"Hei en la, i hming vek a nih hi. Rosalinda Remsangpuii tih a nih hi," a ti a, ka hming in ziahna lai chu a kâwk a. A nui suk a ,"Nangmah chuan i chah lo a ni maithei. Mahse, tu emaw in i hnena pe tur che in min ti a," a tih takah chuan ka hrethiam ta uar uar a. Thla khat liam ta a ka kalsan tak, min tina em emtu Mazuala hnen aṭangin a ni tih ka hre thei mai a. Engtinnge hetiang thil te hi a la rawn tih ngam zawk le? A laka ka thinrimna kha a la reh lo reng reng ,"Mazuala hnenah chuan pe let leh la, a hnen aṭangin engmah ka mamawh loh thu i hrilh bawk dawn nia," ka ti a, a thil min pek tawh chu a kutah chuan ka hmehbel nghal chawt chawt a ,"Min hrethiam dawn nia," ka ti sap a, Office chhungah ka luhsan ta a.

Chhun chawlh lai chuan khapa hnen aṭang bawk khan message ka dawng leh a.

"U Mazuala chuan thilpek kha i hnena pe ngei tur che in min ti a. Khawngaihin pawm sak hram mai la," tiin message min lo thawn leh a. Ka van ning tak êm!

"Min rawn pe reng reng suh ang che," tiin ka chhang let a, ka out zui nghal bawk a. Ka out rual rual chuan number 1 ka hriat ngai loh hian min lo call leh a, ka chhang ta lo.

Office ban pah chuan ka nu kawr tur lei kawi pahin ka bazar kawi nghal a. Bazar aṭang chuan ke bawkin ka haw leh a. Thui fê ka kal hnu chuan, ka hnung aṭang hian ,"Ngatinge U Mazuala chu i biak duh tawh lohva?," tiin khapa bawk khan min rawn zawt leh a.

"Mipa ve si, zawhna i ngah hle mai," ka lo ti let ve kher a. Za vak lo hian a nui a ,"U Mazuala chuan a la hmangaih reng che a sin," a rawn ti leh a.

"Engmah i hre lo," ka lo ti tawi tuk a. Min rawn en a ,"A la hmangaih reng che a lawm," a rawn ti leh a.

"Khawngaih takin Malsawmzuala hming kha lam ri tawh lo ang che," ka ti leh hmuk a. Chutianga ka tih hmuk hmuk takah chuan a in thiam lo ve deuh a ni ngei ang ,"Awle, in inkar thu chu ka hre thûk viau lo a. Mahse,....aaaa.... ka tihpalh lutuk aw," a ti a, a hmai tuamna chu a phelh a, a nui suk a. Kan In peng thleng chuan kan inzui haw leh ta nge nge a ,"Khawngaih takin U Mazuala tan lo in ngaihtuah nawn leh hram ang che aw," tiin ngen tak te chuan min ngen ngawih ngawih a.

"Mazuala chu i tan eng nge a nih a? Min tihnat zia i hriat hunah chuan hlat turin min ngen zawk ngei ang," ka ti ve leh fak fak a. Inthlahrun hmel zet hian min rawn melh a ,"U Mazuala chu ka û a nia," a ti ta mai. Mak ka van ti tak êm!

"Maw? Mazuala chu i û maw? Engtinnge a nih theih a? Ani kha an unau zinga mipa awmchhun a ni si a," ka ti nghal mawlh mawlh a.

"Sawi dawn chuan a thui lutuk, rem i tih chuan zaninah kan lo leng ang aw," a rawn ti leh a. Rei ngial ka ngawih vang vang hnu chuan ,"Nangmah nen in nih dawn chuan a pawi hleinem," ka lo ti mai a. A nui leh suk a ,"Ngatinge keimah nen kher?," a rawn ti leh a.

"Tunlai mipa ho zawhna ngah zia hi," ka ti leh kher a. A khi vur vur a ,"Tunlai nula senior ho nghal zia hi," tih pah chuan a tukhum a hiat nuah nuah a, a thusawiah chuan a inthiam lo leh deuh a ni ngei ang.

"Chhe lo min tih êm tho kha," ka ti zui leh zat a, a lâi kher mai ,"Aaaa, iiih a nih ka kal phawt ang e aw," tih pah chuan a tlan nghal vut a. A pumrua a len ang aiin a la naupang chhia ve hle mai, kum 23 vel chauh a nih ka ring. A hmel erawh a ṭha reuh phian mai.

Zanah chuan Mazuala te unau chu an lo leng ta ngei a. Mazuala chu inthlahrun hmel tak hian a ṭhu ngawi reng a, a nau lah chuti tho. Sawi tur a vâng em em bawk si, Mazuala nau chuan ,"Û, ka ṭhianpa te Inah thil copy lawk tur ka nei a, ka va kal zuai aw, ka rei lo ang," a ti a, a chhuak nghal daih a. Mazuala nau chhuah hnu pawh chuan sawi tur kan vân dun hle mai. Rei ngial inbe mang lova kan ṭhut dun reng hnu chuan ,"Rose, engkim vang khan ka tihpalh lutuk aw. Khawngaihin min ngaidam thei ang em?," tiin Mazuala chuan ngaihdam min dil ve ta nge nge a. Kei erawh chuan ka luhlul ka chhuah lui a, ka la ngawi reng a.

"Rose, khawngaihin," tih pahin ka hmaah chuan a ṭhingṭhi ta rawp mai. Ka rei le (h)! Ka pian a hnu lamah ṭhingṭhia ngaihdam min diltu awmchhun a la ni. Mazuala chu a kun chal a, engmah dang a sawi rih lo. Kei erawh sawi mai tur hre lovin ka ngawi reng ringawt a.

"Rose, khawngaihin min ngaidam thei em?," a ti leh a. Engtinmah ka la chhang lo, ka kutah a rawn vuan a ,"Rose, khawngaihin. Ka thil chîn ṭha lo zawng zawng pawh ka sim vek ang. Ka tiam a che, khawngaihin min ngaidam hram rawh," a ti leh mawlh mawlh a. Mazuala nen hian thla 5 vel kan inzui ve tawh a, tun hi kan intih thiam loh ṭum hnihna a ni a. A hmasa berah chuan in ngaihtuah nawn miah lovin a thil tihsual chu ka ngaidam nghal a. Mahse, a ṭum hnihna erawh hi chu awlsam tak chuan ka ngaidam thei tawh lo a ni.

"Rose, khawngaihin ka tiam a che," a rawn ti leh a.

"Ka lo in ngaihtuah dawn nia," ka ti ve ta nge nge a. Chutianga ka chhan takah chuan ani pawh chu a hlim ve deuhin ka hria ,"Ka lawm lutuk aw, Rose, ka hmangaih che," tih mawlh mawlh pah chuan a rawn ding chhuak a. Ka mitah tak min rawn en a ,"Ka hmangaih che," a rawn ti leh a, ka hmuiah chuan min rawn fawh a tum nghal ngawt pek a ,"Ni love, tunah rih chuan," ka ti a, ka hawi sawn nghal daih a. Ani pawh chu ka bulah chuan ngawi rengin a rawn ṭhu ve leh mai bawk a. Sawi tur a vâng kher mai, a nau lah chu rin aiin a rawn let leh har a.

Ngun deuha ka in ngaihtuah fê hnu chuan Mazuala pawh chu ka ngaidam ve thei ta hram a. Mahse, ngai awh leh chu a harsa khawp mai. Thla khat dâwn chu pangngai takin kan awm chho leh a, a mizia pawh a thlâk ve nasa khawp mai. Mahse, khapa a nau anga insawi kha ka hmu ngai ta miah lo, a hming pawh ka hre ta si lova. Whatsapp lamah lah min block tlat leh nghal a, a awmzia ka hre lo kher mai. Ṭum khat chu Mazuala bulah ka zawt ta tawp mai a ,"Mazual, i nau kha ka van hmu ngai tawh lo. In awm ho lo em ni?," tiin ka zawt chawt mai a. Mazuala chu a rawn nui chhuak hawk hawk a ,"Ka nau dik tak pawh a ni hleinem," a rawn ti ringawt a. Kei lah chuan hriat chian ka châk telh telh thung si ,"Awww, chu pawh nise, amah vanga kan inkar hi ṭha a ni bawk si a, lawmthu hrilh te pawh ka duh a sin," ka tih chuan a lungawi loh hmel kher mai.

"Kan pahnih inkar ṭhat hi eng nge amah vang a nihna? Theihtawpa ngaihdam ka dil vang che a ni lo em ni?," a rawn ti leh khar khar tawh a.

"Aaaa, chutiang pawh a ni lo. Amah khan palai hna rawn thawk lo se, tunah hian kan awm dun hauh lo ang," ka lo ti ve thung a. Chutia ka tih takah chuan ,"Ni e, a ni khawp mai. Mahse, ani chu a nu bulah a awm leh tawh a," a rawn ti a. Ka hrethiam lo kher mai ,"A nu i tih chu eng nge a awmzia?," ka lo ti leh vat a. Mazuala chuan ,"Kei leh ani kha pa hmun nu hrang kan ni a. Thla khat vel liam ta khan ka pa hi a rawn zawng chhuak a, thla khat vel chu kan kiangah a awm a. Mahse, a nu in a bula awm ve leh tawh turin a rawn ti si a, a kal ta a nihkha," tiin an unau chanchin chu a sawi ta a. Mak ka ti hle mai, Mazuala pa hian hmeichhe dang lakah fa a lo nei reng a ni maw? Chu pawh tuna a fate zawng zawng aiin a la naupang zui a. Nupui a neih reng lai hian hmeichhe dang lakah fa a nei em ni le? ti a ka ngaihtuah mek lai chuan ,"Ka pa hian a hnathawhna hmunah bialnu a lo nei deuh a ni maithei. Ka pa sawi dan chuan ka nau kha a fa a nih a ring vak lo a ni awm e. A chhan chu, khapa nu kha hmeichhe lepchiah deuh mai a ni a. Mahse, hmeichhia khan naute paah ka pa a rawn puh tlat bawk si a. Ka pa chuan pha viau mah se, hmeichhia zawkin a rawn puh tlat siah chuan lungsi lo takin a pawm ve mai a," tiin Mazuala chuan a rawn sawi leh a. Mak ka ti telh telh mai, Mazuala chuan min rawn en leh a ,"Heng zawng zawng hi engmah i hre lo em ni?," a rawn ti leh a.

"Min hrilh si lova, ka hre lo a lawm," ka lo ti ve mai a. A nui leh suk a ,"Kha nau khan i bulah ka nau angin a lo insawi maw?," a ti leh a.

"Aww, i nau a ni miau si a," ka lo ti leh mai a.

"Dik tak chuan, ka pa hausakna hi a awt a, a fin a rawn chhuah vel a nih hi. Kei aiin a naupang zawk bawk si a, ka û te phei chuan an mil lo lutuk," a rawn ti leh a. Engmah ka sawi leh hma chuan ,"Ka pa a rawn tlawn dan te kha ka lawm lo a sin aw. Ka pa lah hian a duat si, Bike lei sak te a tum mai mai a. Ka phal lova, a ti lui ta bik lo a nihkha," a rawn ti leh a. Chutia a phun a phun takah chuan a in phun thinrim leh takngial dawnin ka hria a ,"Sawi tawh lo ang, a ho e mai. Kan pahnih inkar sawi zawk ang," tiin ti ti dang ka vawrh ta daih a.

Inrinni a ni a, Office chawlh a ni bawk a tiin Mazuala nen chuan bazar turin kan in phur chhuak ve leh ta a. Solomon's Cave-a kal a duh tlat vang chuan Solomon's Cave-ah chuan kan kal ta a. A Jacket tur kan en mêk lai chuan hmeichhe pakhat hian ,"Mazual, i dam maw?," tiin Mazuala chu a rawn bia a. Mazuala pawh chuan ,"Aw, dam a lawm, nang zawk i dam em?," tiin a lo chhang let ve mai a. A ṭhian satliah a nih ringin ka lo ngai pawimawh em em hran lova; mahse, ka beng verh zar tu thu a rawn chhak chhuak ta ,"Ngatinge hmanni khan Mki kha i van be ṭha lo ve a? Nizanah a lungawi loh thu hlir a rawn sawi leh nghal," a la ti zui a. Mazuala chuan ,"Aaaa, a ho e mai a. Chutiang sawina hun pawh a nih loh hi," a lo ti liam puat a. A bula hmeichhia chuan min rawn hmu ve ta a ni teh chêk ang chu ,"Awiii, Rose, nang maw? Kan ṭhianpa in a star thei lutuk che. Malsawmzual, i nau hi Puia khan a star theih em kha, lo sawipui ve la," a la rawn ti ham ham zui a. Ka rei le(h)! A ṭhian te ho bulah chuan a nau maw ka lo nih a? A va mak ngai ve le? Mahse, ka awmdan ka ti danglam duh hauh lo ,"Ka û hi chuan a duh ang tak mipa chiah ngaihzawn a phal a. Mahse, Puia pawh chu a chhiat loh viau chuan a rukin ka nihpui thei tho a nia," ka ti a, za vak lo chuan ka nui zui a. Mazuala chuan sawi tur pawh a hre tawh lo, za lo zet zetin a nui a nui a. A tawpah phei chuan min kai a, min kalpui ta nghal daih a.

"I ṭhiante bulah chuan i nau maw ka lo nih a?," tiin ka chhuahchhal nghal bawrh bawrh a. Min rawn en a ,"I ngaih ang kha a ni lo a nia," a rawn ti leh a.

"Chuan, Mki chu tunge? I biak ṭhat loh vangin a titau ngam a nia, i tan a pawimawh viau ang tiraw?," ka ti leh hlaih hlaih a.

"I va rapthlak ve a, a tawk tawh," tih pah chuan min rawn hnek leh chawrh mai a. A mize pangngai a rawn chhuah leh dawn ta, ka chhip samah a rawn kek a ,"Mki chu ka best friend a ni a, i thîk thiang lo. Ka thu thu hian awm ve mai ṭhin rawh, khanu bula i awmdan te kha tenawm lutuk," tih pahin min hnek leh a, ka lu a hai chhup mai.

"Mazual, khawngaihin kut min thlak tawh lo teh. Khawngaihin," ka ti lawm lawm a.

"Ka duh dana i awm dawn lo a nihchuan, i tuar zel ang," tiin a mit meng thîp zet chuan min rawn melh râwm râwm a. A laka beiseina ka neih ṭhin te chu an bo zo ta, tunah chuan tih tak zetin ka beidawng tawh a ni. Ṭhingṭhia ngaihdam min dil laia a thutiam kha tak tak emaw ka lo ti a. Mahse, hun a liam a, hun chuan a mize ngai bawk a rawn her chhuah pui leh si. Khatih hunlai khan lo ngaidam lo lêk ila ṭha tur hi a nia. Khawvela ka thil tih tawha ka inchhir ber a la ni ang.

Mazuala chuan kan In peng thleng chuan min thlah a. Ka hmaia min hnekna chu a na ngut ngut mai, Bike aṭang chuan ngawi rengin ka chhuk a. Ani pawh ngawi rengin a tlan liam zui ve nghal bawk a, kan In pengah chuan rei ngial ka ding a. Ka hmai duk lai te chu ka theih ang angin ka make up hmang chuan ka hliah khuh a. Kan In lam pana kal tuma ka inher mek lai chuan ,"Nangni anga nula hmelṭha chuan make up in mamawh ve vak hleinem," tiin mipa pakhat hian min rawn bia a. A âw chu ka hriat hnu a nih vangin min rawn be tu chu ka hai thei lo a ni ,"Khawiahnge i kalbo daih a?," tiin zawhna ka lo zawt let thung a. Min rawn pan a ,"Ngatinge a? I van hlim loh hmel ve a? I ṭha maw?," tiin ka zawhna pawh chhang ta lo chuan, zawhna dang min zawt let zawk a.

"Ka ṭha a lawm, i rawn leng leh dawn em ni?," ka lo ti vat a. Mahse, ka mit meng aṭang chuan ka ṭha lo a ni tih a hmu tlang thei vek a nih hmel ,"Hmeichhe ho tak hi chu aw, 'I ṭha em?' han ti ila, ṭha lo mah u la 'Aw ṭha e' in ti leh ṭalh a. Mahse, i mit meng aṭang khan ka hre vek a nia aw. I ṭap zo deuh chiah a ni tiraw?," a ti nghal mawlh mawlh mai. He tlangval hian engtinnge min hriat chian viau theih le?

"Ka ṭha tak tak a lawm," ka ti leh a. Mahse, ka thusawi chu kei pawh hian ka ring lo a ni. Hnai set sawtah min rawn en a ,"Nidangah make up i hmang ngai lo. Mahse, tun ṭum chu i hmang ve tlat. I hmai duk hi ngatinge a? Khapa khan engtinnge a tih che a?," a ti leh nghal bawrh bawrh a. Ani hian engmah hre lo se a ṭha zawk a sin le. Mahse, engkim hi a hre vek lawi bawk si ,"Make up te chu ka hmang ve fo a lawm," ka ti thla ve leh rawk a.

"Dawt min hrilh tum duh suh. Kut a thlak che em ni?," a ti leh a.

"Nang hi tunge maw i nih chiah le? Ka hming leh kan In i hre vek bawk a. Tunge i nih a?," tiin ka zawt let ve leh mawlh mawlh a.

"Min hriat hma khan kei chuan ka hre daih tawh che a lawm," a ti leh mai a.

"Mahse, ngatinge ka hriat ve loh che?," ka ti leh kher a. A nui a ,"I ngaihven loh zawng ka ni tihna a ni mai a," a ti leh a. A la chimawm reng tho a nih hi ,"Chimawm viau lo teh," ka ti a, ka nui zui a.

"I hmai chu ngatinge?," a rawn ti ṭha leh a. Engtinmah ka chhang lo, a kekawr ipte a zen a, a mit meng fiah zet chuan min rawn en kal a ,"Ni e, i kâ aṭang hian engmah i sawi dawn lo tih ka hria. Mahse, i mit meng hian engkim chu min hrilh vek tho. Khapa khan kut a thlak che tih pawh ka hria; mahse, hmeichhe tuarchhel tak i ni tih ka hai lo," a rawn ti leh a. Sawi tur ka hre lo kher mai, ngawi rengin a thusawi chu ka ngaithla tawp mai a. Rei ngial kan in din chilh hnu chuan ,"Zaninah engkim tifel turin ka pa ka hmu dawn a. Chumi zawhah chuan ka rawn leng ang aw, i phal em?," a ti leh a. Ngawi rengin ka lu ka bu ringawt a ,"I hmaiah khan damdawi hnawih ang che aw," a ti leh a, min kalsan zui ve ta a.

Ka nu bulah chuan ka nawmsam loh vangin zan riah pawh ka ei peih loh thu ka hrilh a. Nachhawkna ka ei a, ka tlu zâl daih a. Dar 7:00pm velah chuan Mazuala chuan min rawn call a, party naa kal dun puiah min rawn sâwm a. Mahse, ka lo hnial a, a thin a rim leh khawp mai ,"Remsangpui, min hnial dawn a maw? A ṭha e, Mki nen kan kal ang a ni mai lawm," a rawn ti vei âwr âwr a. Kei lah chuan ka thîk lo nasa mai si, a chhan pawh, amahah hian beiseina engmah ka neih tawh loh vang a ni. A lerh chu thuhran ni se, kut min thlak a hrat lutuk hi ka hua a ni.

"Aw, i duh duh chu kalpui rawh. Engmah ka rawn sawibuai lo ang, i duh dan danin i awm thei ang," ka ti ve ta ngat a. Ti fuh in ti zet hian ,"A ṭha e, chuti chu inṭhen ila ni mai lawm," a rawn ti leh khar khar a. Kei lah chuan ,"I duh te chuan a pawi ka ti reng reng hleinem," ka lo ti ve leh hmak a.

"Hummm, a tawk a nihchu," tih pahin Phone chu a dah hmak a, kan inṭhen ta chu ka thawveng huaiin ka hria.

Zan dar 8:00pm velah chuan ka nu in min lo call a, inlêng ka neih thu min rawn hrilh a. Mazuala nau kha a ni ngei tawh ang, ka room aṭang chuan In hnuai lamah ka chhuk thla ta a. Ka rin ang chiahin sitting room-ah chuan Mazuala nau chuan min lo nghak reng tawh a. Ka hmel a hmuh chuan a lungawi loh hmel kher mai ,"Eng nge i an tawh a? Chaw pawh i ei lo a ni maw?," a lo ti nghal vat a.

"Ka ṭha a lawm, chaw ka châk vak lova," ka lo ti mai a.

In chhunga inkawm aichuan pawna boruak hîp paha inkawm chu ka duhzawk a, kan pahnih chuan veranda thlang lamah chuan kan ṭhu chhuak dun ta a. A hming takngial pawh ka la hriat loh vangin ,"Lawkin, nang hi i hming pawh min la hrilh miah lo," ka ti leh nghal tawl a.

"Ramdinsanga ka nia," a lo ti tawi tuk a. A hming ka zawt chu ka inchhir hman lek lek nia; mahse, amah bawk chuan ,"Ka nu chuan Duatpui tiin min ko ṭhin," a rawn ti leh kher a, a sawi pah chuan a rawn nui zui suk bawk a, a hmelṭha reuh kher zek leh nghal a.

"Nihchuan, Duatpui tiin ka ko ve mai dawn che em ni?," ka ti leh kher a.

"Naaaah, ka nu pawh i nih loh kha," tih pah chuan zah hmel zet hian a nui leh a.

"Nihchuan, engtinnge ka koh ang che?," ka ti leh a.

"Ramdin tiin min ko mai dawn nia," a rawn ti ta a.

A chanchin engmah ka la hriat chian loh avang chuan zawhna ka ngah kher mai. Ani pawh chuan ka zawhna te chu phunnawi hauh lovin min chhang ve vek a, ka rin aiin a fel phian mai. A nu leh pa chungchang Mazuala hnen aṭangin hre thawi tawh mah ila, a hnen aṭang hian hriat ka châk leh ta tlat pek a. Ka zawt leh ta nge nge a.

"Ka nu hian ka pa chanchin hi min hrilh duh ngai lova. Mahse, a hming leh a thlalak erawh chu min hrilh tho. A chanchin dang erawh ka hre ngai lo, ka nu chuan engtiklai pawn hlim hmel put reng a tum ṭhin. Mahse, a mit meng aṭang hian natna tam tak a tuar a ni tih hi ka hai ngai si lo. Vawi tam ka pa chanchin ka zawh hnuah pawh min hrilh duh ngai lo. Mahse, vawikhat chu ka nu dairy ka hmu chhuak hlawl mai a. Chutah chuan engkim chu a lo in ziak vek a, ka pa hian nupui fanau nei chungin ka nu lakah fa a nei a. Ka nu chu nupuiah a neih tur thu pawh a tiam a. Mahse, ka pian thlengin ka pa chuan ka nu chu a rawn ngaihven zui ta lo a ni. Ka nu chuan, kei min hrin hnu hian ka pa chanchin engkim a hre ve chauh a ni. Kha dairy ka chhiar aṭang khan ka nu hnenah chuan ka pa chanchin ka zawt ngai tawh lo. Mahse, ka pa chu zawn chhuah ve hrim hrim chu ka duh ta a. Ka nu pawh hrilh lovin a ruk tak meuh meuhin ka zawng ta a. Thla hmasa khan ka zawng hmu ve ta a, pa nei lova awm ngawt zawng a ṭha berin ka hre si lova. Ka pa hnenah chuan a fapa ka nih thu leh ka nu hming te ka sawi a, chutianga ka insawi takah chuan an hausakna ît vangah min ngâi leh ta si a. Chutiang chu ka thil tum a ni loh zia leh unau ka awh ve zia te ka sawi a. Ka pa chuan min ring ve mai a; mahse, midang erawh chuan min ring lo. U Mazuala erawh chuan min rin theih nan thil tih tur min tuk sak thung. Chu chu in inkar a palai hna thawh kha a ni, a duh ang ngei chuan ka rawn thawk ta anihkha. In ṭhat thu ka hriat khan kei chu in tan ka hnawk mai mai dawn tih ka hai lova, chuvang chuan in pahnih lak aṭangin ka inthiar fihlim ta a nikha," tiin an chhungkaw chanchin chu a sawi ta melh melh a. Mazuala sawi dan nen chuan a inang lo kher mai, thil pakhat hriat duh ka la neih avangin ka zawt leh a ,"Chuan, zanina i thil chinfel chu eng thil nge ni ta?," ka ti leh a.

"Ka nu khan pa leh fapa inkar chhut chah hi pi leh pu pawn an duh loh thil a nih thu min hrilh ṭhin a. Mahse, kei chuan ani ang mi tenawm kha ka pa atan ka duh ta lo a ni. Ka chungah eng pawh thleng se, ani kha ka pa a ni ngai lo ang," a rawn ti hul hak a. Ka lainat kher mai ,"Ramdin, pawi ka tih pui lutuk che. Mahse, ani chiah kha khawvelah pa i nei a sin," tiin a rilru chu thlâk tir leh ka tum a. Mahse, awmzia a awm lo kher mai ,"Khawvelah hian pa nei lo mi engzatnge awm i hria em?," a ti ta daih a. Ngawi rengin ka lu ka lo thing ringawt a ,"Chung zingah chuan ka tel ve tih pawh i hre lo ang tiraw?," a ti leh a. Sawi tur a vâng kher mai, engtinmah ka chhang lo. Ka lam a rawn hawi a ,"Mazuala pa vangin kei hi ka lo piang a, a pa vang bawkin ka nu thinlung chu tih kehsawmin a awm a. Tunah hian khapa vanga i nat leh hi ka phal lo bur, anni chhungkua vang sawn ka hmangaihte hi an nat ka remti tawh lo," a ti hmarh hmarh mai a. A thusawi awmzia chu ka hrethiam tho a; mahse, ka zawt nawn leh kher a ,"Eng nge i sawi awmzia?," ka ti leh kher a.

"I hriat thiam tura sawi pawh ka ni chuang lo," a ti leh daih a, hepa tak hi chu aww.

Mazuala nen chuan kan inṭhen chiang khawp mai. Engkimah a tawp a ni tawp mai, Ramdinsanga nen erawh kan innêl ṭan chho viau mai. Ani erawh hi chuan kawng engkimah min ngaihsakin min duat em em a, ka nat hi a phal ngai lo. Ka hlim loh a hlau em em a, ka hlim lo deuh ni a a hriat chuan a chhan min zawt nghal vat ṭhin. Ka tan chuan vantirhkoh tluk hial a ni; mahse, in ngaihzawn lam thu hla erawh kan sawi dun ngai hauh lo. Ṭhian ṭha tak angin kan awm a, ngaihzawng erawh kan ngaihsak lo dun em em thung a. A châng leh keimah hian bialnu nei tur hian ka tur a, ani lah hian ,"Nang pawn bialpa i nei chuang lova, bialnu ka nei duh bik lo," a ti ve leh tlat zel si. Ka ṭhian te ho lah chuan ka bialpa emaw an ti vek leh nghal a, a ṭhenin an lo star bawk. Ka hnathawh puite ho lahin ka nau emaw an lo ti bawk a. Engtinpawh chuan lo ngâi se, pawi kan ti lo ve ve. A chhan chu, an ngaihdan chu kan nih miau loh vang a ni.

February ni 12 a ni a, inngaizawng tam tak chu Valentine's Day lo thleng mai tur atan an inbuatsaih nasa tawh hle mai a. Keini ṭhian dun erawh ngaihzawng kan neih loh vang nge ni, kan ngaihven lem lo thung a. Mahse, a rukin Ramdina hnena ka pek tur chu ka ruahman lâwk ve vek tawh tho a. Ani erawh chuan Valentine's Day-ah chuan a nu tan thilpek ropui deuh pek a tum thu a sawi thung a. Ramdinsanga hi kei aiin kum 6 velin a naupang a, a kum naupang ang aiin a rilru erawh a puitling reuh zek a. Class kal pahin Chanchinbu semin a in hlawh ṭhin a, zan lamah an ṭhenawm naupang te tution pe in a inhlawh leh bawk ṭhin. A dinhmun chu a hre chiang a, mi hmuhsit tur leh mi nuihzat turin awm a tum ngai lo. Ruihhlo in a nun a tibuai ve lova, a thawh chhuah loh sum a awt ngai lo bawk. Engkimah dikna a ngaina a, dawt a haw em em bawk.

February ni 14, Valentine's Day chu a lo thleng ve ta e. Ramdina hnena ka thilpek tur chu Sana a ni a, uluk zetin ka tuam a. Paper bag-ah dahin ka Scooty seat hnuaiah chuan ka dah ta a. Chawhnu lama chhuah kan tum vangin chawhmaah ka hna thawh tur ang ang ka thawk zo vek a. Chawhnuah chuan kan pahnihin kan in phur chhuak ve ta a. Amah chuan Scooty chu a khalh a, kal duhna ka neih leh neih loh min zawt a, khawpui pawn lamah khawpui thâwm bengchheng hriat theih lohna hmunah kal ka duh thu ka sawi a. Aizawl khawthlang lamah min tlanpui a, Lengpui Airport road-ah chuan min tlan thlak pui ta a. Kawng sir zau deuh laiah chuan kan ding a ,"Kan kalna hi nuam lo i ti em?," tiin min zawt nghal vat a.

"Nuam lo ti lo e, i kiangah chuan khawi hmun pawh a nuam vek a lawm," tiin ka lo chhang nghal vat a. A nui var var a ,"Bialpa chu nei la, vawiin ni angah te hian thil pek hlu tak i dawng awm si a aw," a rawn ti leh ringawt a. Kei lah chuan ,"Bialpa ka nei duh tawh teuh lo mai a. Rilru natna tur hlir, na nawn leh turin bialpa ka nei tawh dawn lo," ka lo ti nghal bawrh bawrh a. A rawn nui hak hak a ,"Mipa zawng zawng hi kan inang vek hleinem," a rawn ti nghal vat a.

"In inang vek, hmeichhe rilru tihnat bak thiam in nei lo," ka ti let zêk a. A nuih lah chu a za telh telh leh nghal a ,"I senior tawh lutuk a, i duhtui lak lawh a nihkha," a la ti zui a, ka van ngei reuh tak.

"Suala, ka thil pek tur che hi ka pe lo tawp mai tur che a sin," ka ti leh hlaih hlaih a.

"Wow! Thilpek ka dawng dawn maw? Ka van lawm tak," a lo ti nghal mawlh mawlh a.

"Scooty seat kha hawng rawh," ka ti deuh hmuk a. Nui var var chungin Scooty seat chu a hawng a ,"E he! A ṭhat hmel hle mai, eng nge ni ang le?," tih pah chuan a rawn lek chhuak nghal a.

"Hawng la, i hre mai ang," ka ti leh hmuk a. Ka titau deuh a ni tih a hrethiam nghal a ,"Titau kher lo la, i la senior lo hrim hrim a nia. Kum 18 chiah i la nihkha," a rawn ti leh a, ka thil pek chu a hawng a, a hlim hmel kher mai ,"A nalh lutuk, ka van lawm tak; mahse, a to viau lo maw?," a rawn ti nghal chûk chûk a.

"To viau love, bun chhin teh i inhmeh ngawt ang," ka lo ti ve vat a. A ban dinglamah chuan a bun nghal a, a inhmeh khawp mai. Min rawn en a ,"Rose, ka lawm lutuk a nia aw. Mahse, ka thil pek ve tur che hi i pawm ve ang em le?," tih pahin ka dar leh lam leh lamah chuan a rawn vuan a.

"Ka ṭhian ṭha ber i ni a, i hnen aṭanga ka dawn a nihchuan eng pawh nise lungawi takin ka pawm vek ang," ka lo ti ve nghal vat bawk a. Ngawi rengin a kun deuh chal a, a rawi hawi chhuak leh a ,"Rose," a rawn ti sap a, thawk a la leh hak ṭhin a.

"Aw, sawi la ka ngaithla a nia," ka lo ti leh vat a. Van lamah a dâk chho vang vang a, min rawn en leh a ,"Eng lo, vawiinah hian maw, i kuta i dawn tur thilpek pek tur che ka nei lo. Mahse, ka hmangaihna che ka thinlung hi min pawm sak thei ang em?," a ti mauh mai. Thleng se ti a ka lo suangtuah ṭhin; mahse, ka beisei ngam si loh kha a lo thleng ta. Ka hamhaih lutuk leh ka hlim lutuk chu ṭawng mai nachang pawh ka lo hre lo leh pek tawh a. Amah bawk chuan ,"Ka tihpalh lutuk, sawi loh tur tur ka lo sawi a ni," tiin ka kokia min vawnna a kut chu a la thla a. A kekawr ipte a zen a, hnuai lam a bih leh ngar tawh a.

"Suala, hmanah sawi tawh ta che," tih pahin ka kuah nghal chawt a. Ani pawh chuan min lo kuah let ve nghal chawt a, kan hlim a ni. Kan thinlung chu a in hmu tlat si a, kan inkuahna chu kan inthlah a kan inen a, duhthaw takin ka infawp nghal vawng vawng a.

Tlai lam dar 4:00pm-ah chuan an In lam panin min phur ta a. Ṭhian kan nih lai zawng khan an Inah hian kal a phal ngai miah lova; mahse, vawiin chu min hruai ve tlat mai. Eng thil nge tih a tum erawh ka hre hauh lo.

An In kan thlen chuan a nu chiah a lo awm a. A nu hnenah chuan ,"Nu, ani hi khawvela ka hmeichhe hmangaih ber dawttu a nih hi," a ti mai chu(h)! Ka zak lutuk hi ka sa pup pup thei nia, a nu lah chuan min lo lâwm thiam kher leh nghal a. Ei tur te min lo siam sak a, kan hlim tlâng hle mai. Ei tur te kan ei zawh chuan Ramdina chuan a nu hnenah chuan ,"Nu, hei i Sana awh deuh kha," tiin a nu hnenah Sana nalh zet Silver rawng chu a pe ta a.

Ramdinsanga bulah chuan ka thil hriat châk em em thil pakhat chu, ka zawt leh hram a ,"Keiin ka hriat hma che khan engtinnge min hriat a?," tiin ka zawt ta nge nge a. A rawn nui leh sâng a ,"Nang chuan i hre tawh lo maithei. In Office-ah khan ei tur ka rawn deliver a, chumi ṭum chuan kawngka bulah kan insu chawrh a. Chuan, i Purse i thlauh a, i I.D Card a rawn tla chhuak nawlh a. Ka chhar pah khan i hming leh Address chu ka chhinchhiah nghal vek a lawm. Chuan, khami ni aṭang khan ka star ṭan che a," a ti a, zah hmel zet chuan a hawi sawn leh daih a.

----A TAWP TA----

Mizo Thawnthu

Tweet Share Share Share Share Share

KA U RAITU AH MIN PUH

ToMZ July 29, 2020 2

Nia, kei pawlnga ka zir kum khan a ni chu kohhran zaipawl leh pastor bial zaipawl ah pawh an soprano chhuan vawr zing a mi kha a ni tawh lawi a, kha tih lai pawh khan u ang tak tak a ka en rual chuan, kan khaw nula ah chuan ka tha tih ber a ruk in a ni tho tho. A bul a awm kha nuam ka ti fo.

Mak tak mai in, pawl sawm ka zir kum pawh hian pasal a la nei lo, nula hleitling dawng ngauh mai leh hmeltha pawl ni si a, pasal a la nei lo hi, a mak fu mai, ngaihzawng hi chu a nei a lawm, an ti fo bawk sia, a bul a awm hi chu nuam ka ti hrut hrut fu mai. Thisen in zawmna awmlo mahse chhungkhat ang a awm kan nih a vang hian min zilh in min hau fo mahse ka haw phal lem lo, a tha rauh em a lawm, thingphurhna leh lo a thlai la a, a kal te hi ka zui fo thin, a tha lah hi a tha fu lehnghal.

Pawlsawm ka zir kum chuan, boruak hip a lo dang in kan khuang ve tan ta bawk a, min en dan a dang in ka hre deuh reng a, inrinni tumah an feh ve loh tum a, kan pahnih in thlaihnah leh a rah te la tur in kan chhung ten min tir vei a kan in ngai zawng thut mai a le. Kal lam phur loh teh reng nen hawlam chu khawvel a thar ta daih mai, ni dang a thlai hawn tur duh tam ngai lo, hei hi ak leh rawh i chhung ten hawn tlem an ti ang che, tia mi pek belh a tum pawh a titau hmuk thin kha, vawin zet zawng a phur a, a dah hnu te kha kan ah then sak vel a, zangkhai haih haih tak ka ni. A phur kan chawi te chu neitu riau a in hriat na awm chung in dim tak si,nel tak leh tihdek chung in a ro luahtu rilru pu chung in kan chawi sak ta tlat mai.

Lo mual mar, chho deuh euh euh a kan chhawm chho te chu, "A mi an riang maw van mi a lo piang" tih chho hep hep mai te ka chak rum rum mai, chu tah buh kur nghiau mai thli in a chhem fawn delh delh mai leh vamur ho thlawk leng der der te, chawhnu her ni in kan khaw zau an chhun eng uar maite chuan ka boruak sosang chu, an chawk so belh a, engkim mai hi a mawi a ni, lo hal a kangbang be ngul tur a an zuah, kang tlu lo a, ung thual te chu a mawi ta bik riau a hriatna kan nei tlat mai a nih chu mawle.Kan khaw zau a, lo hnai ber Pu. Zatlaia lo lu sawn tlung pawng ah chuan, ka u chu a lo han thleng chho a, kei boruak sosang lutuk chuan kal na chang pawh ka lo hre lo nge, ka pan chho ta a.

A ni chu a phur nghat lo in ding chung in a lo chawl a, ka kut pahnih chuan a beng zawn a hnam hrui chu vuan in a sam chhawlleng chu a bek zawn ah chuan rawn ui thla hning in thlifim chuan a chhem leng siau siau a, chhimchhak lam deuh hawi a nih a vang in ni chuan a bek dinglam leh a taksa dinglam chu a rawn chhun eng raih a,, a bul ka han thlen chuan i va muang ve, min lo ti deuh hmak a, kal nghal ang i muang thei em mai tih pah chuan , kal a rual a.

Nia, ka u rual fe a ni a, ni dang ah pawh a bul ah, ka tal nasat a vang hian tu tan a mit hah na tur awm hek lo le, mi zing ah min zilh a min hau a, mi awm loh na ah an no leh nghual mai thin hi chu tuar a har duh fu a sin, mi in min kaihruai a ka zui emaw an tih lai khan ,thununna hreawm emaw an tih kha vanram tlafual. Vawikhat an inpui a kan awm lai in ka ni Nithangi a lo lut thut a, ka u chuan zei fahran in awmdan tha min han hrilh nghal a, ka ni chuan, i vannei ngawt mai u fel deuh thutha hrilh tu tur che i nei a an tih ve luam kha.

Chu tia thla nga vel kan in zui tak ah chuan, thlarau thinghlim in pawlchang nei thin mahse mihring in pawl chang a lo awm ve nge a rai ta hut mai, zahthlak haih haih ve aw, chhungten la hre lo mahse in thiamlohna a nasa ngang mai. Kan in nei dawn nge dawn lo pawh hriat a ni si lo, chhungte hriat hun a huphurhawm hle a ni, a tawp ah chuan hriat loh theih loh chu le, a dul a rawn puar lian zel tak ah chuan a tlangthang ta huk mai, zia lo hle mai, zah tuar erawh chhel a ngai fu, chhungte mitmei ven ngai bawk nen kan in hmu thei ta vak lo, Mipa chu mipa kan lo ni deuh nen mi zing ah pawh kan awm ve ngam deuh, ka ni Nithangi te kawm thlang ah volleyball beng ka en a thiante nen kan thut thep thawp lai chuan, ka ni leihkapui a rawn chhuahpah in ring leng lawng hian, "Țhuamkim (tlangval Senior a nia) zaii (a fanu) te hi farnu ti in rawn zilh fo suh, "khu Thangpuia pawh a u Rawntlingin a zilh a zilh a, an in zilh puar luah khu" " a U a rai zuah khu" an ti mai chu.

Muallaizawl a tlangval thu ho an nui thum huk, min rawn melh nghal thuap mai chu, sawi tur a vang hle volleyball beng pawh an chawlh phah a, an nui hui hlawm mai, an in khel leh tan, minute nga vel a liam ang a, ka nauin min rawn au a, lo haw rawh a rawn ti, rilru a kal ding deuh nge. "Eng nge" tih kan tum, chu ring lenglawng in "ZILH Eeee" kan ti a. @Anonymous

Mizo Thawnthu

Tweet Share Share Share Share Share

A REI LO ANG - MIZO LOVE STORY

ToMZ July 29, 2020

Ka inbual zo bual in aṭanga ka chhuak, ka lu ka hruk mawlh mawlh lai chuan. Ka khum a, ka phone ka inbual dawna ka theh thlak tawp kha a lo ri râl ral a, kan lak nak chuan hmeichhe aw ngei mai hian ‘hello’ a rawn ti a, kei chuan tu nge? kan tih chuan min hre nange, a awm tho e, kan inhmuh lohna a rei ta em a ni.

Partei, ka nia. Sawmtei thiannu ti a, an in sawifiah chu, ani maw! ṭhangkhat lian aliam ta a lawm le. Eng tinnge ka numberte i hriat theih â? kan tih chuan, “chu lam zawng nakinah ka la hrilh ang che”, a ti mai a.

Hun eng emaw chen an ngawih vang vanng hnu chuan, aw tham tiak leh trah aw treuh hian, ‘”a awm emaw ka hre lo a. Mahse, rang deuhin tunah hian Durtlang damdawinah I lo kal thei ang êm, sawmtei hi a hniam khawp mai a. I hming a lam a lam mai si a”, a han tih chuan ka ngawi reng a ka mit chuan hla tak a, Reiek tlang khum a van thiang tak pel a, kawlkil a chum tlemte awm chu a thlir vang vang a.

Eng ti zia nge ni a, ti a. Kan chhan chuan, “I hre na nge a Cancer a lawm”!! an ti leh a, ka hre hauh lo mai a, kan inkar thu a chhungten min ṭhiahsak a, pasal a neih tir tak hnu atrang khan, vawi khat mah a chanchin hi ka hre zui ta lo-in, a hmel pawh hi ka hmu zui ta lo reng reng a ni, kan tih chuan,, ani chuan khawngaihin, lo kal hram teh, ngawiteh a zahthlak viau ang a, pasal te pawh a nei tawh si a, kha tilam chu venthawn tur a awm lo, an inthrenna pawh kumkhat a tling tawh alawm an ti leh a, a chhungte pawhin ka hmel hmuh te zawng an duh lo tawp ang, tia kan chhan leh chuan, kha tilam chu ngaihtuah suh, an zah chein an pun ngam lo zawk che alawm, achhungte avang ni lovin. Sawmtei, avang zawk hian khawngaih takin lo kal thei hram la ka van ti em? Thil tamtak I hnenah hian hrilh tur che pawh ka nei a sin, an ti leh hram a. Ka lo inngaihtuah a nge tiin phone chu ka dah ta a.

Ka inngaihtuah vang vang hnu chuan, khang hun liamtate khan min tihnat zia leh, ka rilru min tih tlawmngaih zia te kha aw, mahse chu tih rual chuan Sawmtei hi nu leh pa zahthiam mi leh thu awih mi a nih nate, ama duh thu vang reng nilo va, inthren ta kan nih dan te leh kan inhmuh hnuhnun ber ṭum a, a chhungte hnial ngaihna ahriat tawh loh thu leh a rilru nat zia te sawi chung a, an inneih rei arin chuan loh thu te min hrilh chunga, a mittui a hru mawlh mawlh lai te, ka mitthlaah chuan an lo lang iarh iarh a, kei pawhin nu leh pa thu awih hi a ṭha ania, hlim takin kal la fanau malsawmna tam tak nen hlim takin awm ang che u ti a, duhsakna thinlung kehsawm chung a ka hlan ni tlai te chu ka hmu thar iarh iarh zel a, vawin thleng a ka thinlung luah tlat tu leh ka zan tawnmang lalnu la nireng chu, tunah hian thih ngamin natna khumah muin ka hming a lam a lam a maw, tiin ka ngaihtuah a, ka bing mup mup hian ka inhria a.

Awle, Sawmte ka lo kal e, nang lo chu hmangaih dang hi tumah ka nei lo a sin, tiin ka insiam nghal ta mawlh mawlh a. Ka phone chu kan en a, Partei chu kan bia a, -parte ka lo kal e, mahse lo hrilh la, nangman min lo hmuak ang che, kan tih chuan, ‘awi ka lawm lutuk’ tiin min chang a, kei pawh chuan ka phone chu ka dah leh ta nghal a.

Ka motor chu kan ti nung a, Durtlang damdawiin lam pan chuan ka tlan chho ta nghal vang vang a, Ka motor kan hun fel hnu chuan an awm na Cabin lam pan chuan ka kalta nghal a, Partei leh Sawmteii nu leh pa chuan Cabin kawtah chuan min lo hmuak a, khawi lai ber hi nge inluah ka pu, Sawnteii pa chuan "room no 3 ah khan lut rawh" min ti a, Parteii chuan min hruai lut a, Sawmteii nau chuan a u damlo khum a mu dang bem mai chu a lo thutchilh ran maia, ka hmel an hmuh chuan thutna chu min ken pahin, "a muhil leh zawk a ni', tiin min hrilh a, a hnarah chuan Oxigen pipe chu an lo vuahin drip hi bur chanve dawn a phai tawh hi an lo pe mek bawk a.

A sir a ṭhu chuan kan thlir vang vang a, ka rilru avan nain kavan lainat tak em ve aw, Partei leh Sawmteii nau chu ka sirah chuan an mittui hru mawlh mawlh chungin an lo insut hraih hraih mai bawk nen, ka tan pawh mipat a har ṭep a ni, ka tawt up up a ka hmai chu hmu thei ilang chuan a sen vek hialin ka ring a ni.

Zawitein khum a akut a phah diai chu kan vuan a, a pangti chuan lumna reng hi a nei lo a ni ber e. A dai thlera tui tak a muhil ang mai hian a thaw sek sek a, mah se mak hi ka van ti em, nge a lo muhil lo zawk nge, ka kut chu a la hre hrang reng zawk em ni ang le!? a kut ka vawnna chu rawn hum let vein, a mitsir aṭang chuan mittui hi a lo luang chhuak ngiai ngiai a, kei chuan duat takin a khum lu a, towel chu la in dim te hian ka lo hruk sak a, a hminga han koh mai chu ka chak em em a, mahse ka hrawkah hian hnawh tu awm ang maiin ka ṭawng chhuak thei tlat lo a ni, Parteii chuan kei chuan ka enthei lo a che u, ka chhuahsan dawn che u, tiin ṭah aw ṭeuh chuan kawngkaah chuan a chhuak ta a.

Kei pawh chuan ka mittui chu ka dang zo ta lo, a lo meng siar siar a, “Ute”, min koh dan ṭhin ngei mai chuan, “min kalsan suh aw? kan inhmuh leh dan hian kalung hi avan ti awi lo em, ka ngai em em reng chein, englai mah hian min kalsan ni atrang khan minute khat pawh hi ka theihnghilh ngai lo che asin", a sawi zawih em avang chuan ahmui bulah ka beng chu ka zuk dawh a. Ka mitui chuan a hmai chu a far huh kiang mai a, kan bulah tu nge awm pawh ka ngaihtuah tawh lo! khua ka hmu hek lo, a lo meng siar siar chu an rawn meng fiah leh deuh a, min han en vang vang a nuih luih hram an tum a, a kut leh lam chuan ka hmai a ka mittui luang chu min hruk sak hram a, ka lung hi a van tileng tak em, a mitkhur te chu tladek mah se, a hmelthatna leh duhawm na chu ka tan chuan a la ngai reng a ni.

I hah lutuk ang muthilh tum hram rawh kan ti a, aih tiin a lu chu an thing ner ner a, Thei leh theilo hian ka lu chu min kuai kun a ka hmuiah chuan zawite hian min fawh sak a, min la hmangaih ve ti rawh? an ti leh a kei chuan aw ka hmangaih reng chein ka hmangaih reng bawk ang che, tih pahin a chalah chuan kan fawp keuh a, min kalsan suh aw! ka kal dawn hunah chuan I trang bel a kal hi ka duh a ni, ka mitthlaah hian i cham reng a. I hming hi ka lam ka lam thin a sin, an tih chuan ka lawm e, muhil tawh rawh le tiin kan ngen leh a, aṭawng erawh chu a hah deuh tak avangin a ngawi ta a, amit erawh chuan min hawisan phal loin min en reng a, ka kokiah chuan min rawn vuan tu hi an awm avangin kan hawi chhuah nâk chuan anu leh pa leh hmeichhe nopang kumsawm pakhat mi awm vel leh mipa naupang kum riat mi awm vel hi an lo ding a, Sawmtei nu leh pa pawh chuan an mittui an lo hru mawlh mawlh bawk a, naupang pahnih chuan maktih hmel zet hian min lo en reng bawk nen.

Kei chuan Sawmtei pa chu thutna ken tumin kan tho uaih na chu, Sawmteii chuan ka kut chu a thlah duh ta hauh lo mai a, kan en nak chuan mitui luang zawih zawih chung hian ka kal aphal lo tih entir nan a lu hi a lo thing met met a, ngawi rengin a bulah chuan ka ṭhu leh ta a, “khawiah mah kal sawn suh! a rei tawh lo ang an ti sep a”, a ṭawng chu a fiah tha vei reuh fe a, a zawi deuh e tih mai loh chu, a khum sir leh lamah chuan naupang a fa te pahnih ding chu an en zawk a, Parteii chu an lam zauh bawk a, parteii hnenah chuan eng emawni hi an sawi zauh a, naupang pahnih chu kaiin parteii chuan a chhuahpui ta a.

Zunram ka thiar chhung tih loh chu thawh san poh hi a phal lo a, a khum bulah chuan Partei chuan ei tur leh intur engkim hi min chhawp tawp hi a ni mai a, Nakinah chuan ṭangkham a duh thu an sawi leh a, anau leh partei chuan an han tungin a nau chuan kei man kan ṭang kham ang che an tih chuan a lu a thing ne ne a, ka lam hawi hian annui sen sen a, min beisei a ni tih an hriat chuan Partei leh a nau chu an nui hak hak a, a nih leh keiman aw, ka ti ve ta a, nuih sen sen chung hian aw zawitea tih pah chuan a lu chu an bu nghêt nghet a, khumah chuan ka lawn a hmalam hawiin ka pawm ta a, Parteii chuan nuih hak hak pah hian, ka nghenchan tur lukham leh ilo chu ka hnunglamah chuan an rem khawm a, kei chuan a tawk e ka lo ti var a, ka ṭhu awn deuh hlek a, ka kut chu a zak hnuaiah min zen chhuah tir a a hmalamah chuan a vuan ta veng veng mai a ni.

Ka âwmah chuan rawn bei thler chung hian “Kum sawmpahnih a ni ta, a van rei tak em an ti sep a. Ni e, mahse trawng suh i hah lutuk ang ka ti a, an ngawi vang vang a, na kinah chuan Dr a lo lut a, damlo awmpuitu chu kan chhuah alo ngai ta si a, a mut dan te kan han siam thrat leh hnu chuan kei chu kal chhuah ve an phal lo leh dawn a, meizial pawnah te kan va zu ve lawk zawk a nge, ka rei lo ang kan tih chuan, lungawi vak lo hmel pu hian a lu chu an bu ve hram a.

Kei chu pawnah ka chhuakin damdawi in piah tlangah chuan mei chu ka va zu ta hlât hlat a, thla no a tia ve dawn eng ruai mai karah chuan khawthlanglam hi ka thlir vawng vawng a. Sawmteii nen a kan inhmuh leh dan chuan ka rilru hi a tina tak zetin ka lung hi a tileng êm êm mai bawk a. Chuti taka min han ngaihdan em em leh, a rei lo ang ti a min han chelh dante ka ngaihtuah chuan kei pohin kalsan chu ka tum awzâwng bik lo, inlam pawh thil awmdan engkim ka hrilhfiah phah ta nghe nghe a ni.

Chu mi zan chu a hlim ru ve hle a ni tih hriat tak hian ka kut vuan tlat chung hian a mu hil ve zeuh zeuh a, englai mah hian ka kut chu a thlah chin ta lo reng reng a, zing khua kan han var hram a. Chhun dar 11 vel kan han thlen leh meuh chuan Sawmte kan ti tuarh a, a rawn meng leh diar diar a, min nuih hram hi an tum a, ka bula Nurse leh Dr chuan lo ko mawlh mawlh teh aw, min ti a, Sawmtei chuan ka kut chu a hmer nget tawlh tawlh a, Sawmte Sawmte kan tih nawn leh a, a rawn meng leh riai riai a min en a, midang pawh chu pindanah chuan an lo lut khat a ni tawh mai e, ka mittui hi a far zawih zawih mai nen, a mi hmer na chu a nghet lo tail tial a, a zawi tawlh tawlh bawk a. Thlamuang takin kal rawh aw!! ka hmangaih kan ti thei hram a, Dr chuan thawktir leh tumin a awmah chuan an nam leh sauh sauh a awm zia a awm ta lo.

Amahah chuan tha reng awm tawh lo mah se, ka kut a vawnna chu a la thlah chuang lo. Amah rawn siamtuten i kut kha la sawn tawh ta mai che, min han ti chu har hi ka van ti em, Sawmte min ngaidam la ka kut hi kan la sawn tawh a nge aw kan ti chu , ka sir a Parteii leh anu leh pa insum zo ta lo awrawl chhuah meuhin Sawmtei chungah leh ka chungah ngaihdam dilin an han ṭap chuak a.

Parteii erawh chu a ṭah dan ki a dangin “sawmte i thil min hrilh zawng zawng kha U-te-a hnenah chuan ka lo hrilh ngei ang, i hriat chak ber chu ala hmangaih che em tih kha a nia , a la hmangaih che tih hre reng chunga i kal san erawh hi chu i lainat lo em ni an ti ve thung erawh chuan awmngaihna minti hre lo kher mai ka tho a, a hmuiah leh a chalah chuan kan fawp vawng vawng a. Ni e, a rei lo ang tih kha min hrilh a, ka duh ai chuan avan hma si em Sawmte, kan intawn leh chhung hi a van rei lo em. Ka ti sep sep a, ka mittui chuan a hmai chu a bual huh kiang a, a rei dawn lo a ni tih i hriat lawk vang a ni maw ka kut i vawn pawh i lo thlah phal loh ni, Ka van ui tak che em tiin ka thlah liam ta a.

Vawiin zet chu ka khua avan har em! tunah chuan Sawmtei thlan pawh an hung zo tawh ngei ang chu, A thlan thlenga thlahnaah ka tel ve tih loh kha chu ka lang zui ta lo, ka inngaihbel nge? Mi mit kha ka chungah fu bik riaua hriaatna ka nei khan! han inlan leh min tihreh mai bakah ka tih tur chin chu zo tain ka inhria a ni.

Tlailam dar 4 vel a ni ta ka intifai zo chu ka wardrobe atanga ka whisky thachi dah thrat chu la chhuakin ice cube nen tui ti takin, ka han in khalh a, "September' thla aliam dawn ta ruai mai a, chu favang ni her liam tur chuan Sawmtei ka ngaih a ti zual hle a, kan pahniha kan hla duh em em thin '’Dokamlova phuah. Chun hrawn vang maw’' tih hla chu ka ngaithla a inhmeh hi kan intih dun thin em em hla kha a ni si a.

Ka phone chu arawn ri ral ral a, kan lak nak chuan Parteii bawk a lo ni a, ‘U-te’ vawiin i lo lang silo a. ka lo leng lok dawn e, tiin min rawn phone a, kei chuan ni e, ka tih tur ka zo thawkhat tain ka hria a ni, lo leng rawh u tiin, ka chang a, ka lo kal nghal e tiin phone chu a dah ta a, tlai ni liam mek chu thlir chungin ka ngaihtuahna chu a kal ding hle a ni. Darkar chanve hnu velah chuan ka kawtah chuan bike hi a rawnin hung fel ve nghal chat bawk a, kan awmpui nu hnenah chuan ka roomah rawn tir lut nghal lurin ka lo hrilh lawk tawh avangin, Ka thrutna atrang chuan thawh poh hi ka tho chuak lo va. Parteii lo lut chuan min en a, zu ka lo in a ni tih a hriiat chuan a mitui chu a tling kiang kiang nghal hian ka han hmu thei nain, ka theng a thawngah a kal phak tawh lo.

Ka bulah chuan thut hmun an rem a, “kan la ti ti chunzawm dawn nia, mahse hei hi Sawmteiin pe tur che a min tih kha a ni a. Vawiinah lo lang la chu a diary hi ka pe ang che ka ti a,, mahse ka hmu ta si lo che a, kan lo kal ta ngawt mai a ni”, tih pahin a bag atrang chuan sawmtei diary a kawm a fung khat lek hmawr a rose sen mawi taka par hi, tin a bu pawh ribon sen tetaktea ṭawn kawkalh mawi em em leh uluk tak a enkawl tih hriat tak mai hi an phawrh chhuak ta a.

Partei chuan ‘U-te’ min ti a, kei chuan ummm ti ngawtin ka lo chang a. An ngawi leh deuh hnu chuan, “I hriat angin in inkar thu hi hriatpui loh che u ka nei miah lo a ni ber a, i inthiar fihlim san hnu aṭang phei kha chuan Sawmtei hian ngai a awh zo lo mai ang tih hlauhawm khawp khan a tuar a ni a, a nu leh pa lah khan Zika kha an duh puiin an neih luih tir ta thuai kha a ni reng a. Sawmteii chuan a nu leh pa thu a zawm naah Pathian hnenah ka tawng tai thinna chu, nu leh pa thu awih turin min ti a nih chuan, he ka pasal ka hmangaih theih hlek loh hi hmangaih theihna min pe rawh tiin ka dil thin a, mahse engmah awmzia a awm lo, ka nu leh pa te hian pathian thu thlir miah loin an duh zawng an thlirnaah Pathian lakah an ti sual a ni tih hi ka pawm dan a nih avangin, hmangaih miah loh bula nun pum hman tluka hremhmun hi a lo awm loin, hmun rapthlak ber zawng a lo ni e, tih a sawi hian ka lainatna a ti zual a ni”, ṭah aw ṭiau a asawi chu ka ngai thla zel a. U-te tah khan i tanna ahmangaihnate, a ngaihzia che leh a thlakhlelh zia che chu engkim a sawi tih min hrilh a, kan inhmuh leh hunah kan la sawi dun leh dawn nia, tiin min ṭin san leh ta rih a.

Sawmtei', diary chu ka pawm vawng vawng a, Ni an liam hnu a kawl lo sen phet mai leh mawi em em lam chu thlir reng chungin ka mittui ka biang a lo luang thla ngiai ngiai chuan amah ka hmangaihna leh ka ngaihhlut na chu min len bosak tum ni awm tak hian dan rual loh hian ka mittui chu a lo luang zawih zwih mai a,ka khawharna leh Sawmtei ka hmangaihna chuan a vawrtawp tak meuh meuh min thlen a ni ber e.

In chhungah lutin electric engah chuan kut khur ru zawih zawih chungin sawmteii diary a tawnna ribon chu kan phelhin kan keu ta a, ka zuk hmuh hmadak ber chu 4.feb. 02 a ziak a pasal neih hlim te a mi, ‘U-te’ ka khua a harin ka van ngai tak che em, khawihah nge i awm tak le, tunah hian eng nge i ngaihtuah ve ang a, e nge i tih ve ang le, min ngaihtuah ve a ngem aw!! tih hi ka zuk chhiar a, ka mittui lo luang chhuak karah chuan ka ngaihtuah na hi i kiangah a awm reng zawk a sin ka ti sep a, ka enzui thei ta lo, ka khup a, ka awm ngaihna hre lo chu ka bing mup mup ni ber hian ka inhria a.

Ka kaw chhung chu ruak ta vek ni hial hian ka hria, Sawmtei diary chu kan khup thin a, kan keu leh thin, awm ngaihna reng reng hi ka hre lo a, ka khumah chuan ka let ka let mai a, kan hui leh pap thin vei nen, awmdan tur hriat thiam hi har ka van ti em, ka en lo thei si lo.

Ka han inngaihtuaha, intih pachan tum tak chuan ka rilru kan siam a. Bath roomah chuan lutin ka han inphih harh vel hnu chuan, ṭhut hmun kan rem ṭha leh te te a. Sawmtei diary chu keuin kan chhiar zawm leh ta a, 4 feb hnu lam chu a bazar thil leh a buai zia thu te, khawiah mah a chhuah peih loh thu te, anpa zika chu office kal turin chhuak thuai thuai se atih thu leh a nute in a alen thu vel mai mai hi a lo ni a.

10 feb 02 kan en kai chuan feb 4 leh ni 10 inkara min theihnghil tum a a beih nasat zia leh a hlawh chham a ni tih a inhriat thu leh, tlailam a khawhar zia te, a ngaihtuahna atranga min paih chuah tum a, a lehkhabu chiar thu te a lo ni leh a.

Ni 11feb 02 kan en kai chuan, u-te, ka hlawhcham a ni nanghlat thei ang ber a awm tum a ka beih nasat zawh poh leh ka hlawh chham zia ka inhre chiang tinga, ka lo hnaih tawlh tawlh zawk zel che hi a lo ni si a, U zika hi mi sual zawng a ni hauh lo, min duatin min hmangaih takzet pohin ka hria, mahse ka nun hi amah hmangaih zir tur a ka infuih poh leh amah ka hmangaih lo zia ti fiah tu a ni zel bawk si, aw ka zan mu hi harh chhuak leh tawh lo thei ilang ka va han inti em, tukin zing chu i hming hian min kai tho a sin, he thu ka ziah lai mek hmalamah khian keimahah i chamin min luahkhah hneh em avanga, ka hrehawm tawrhnate theihnghilh tum a nang hriat reng lo che tum hi a hah thlak zawk daih a sin, 'U-te' ka van ngai tak che em? tiin a thu khar nan ka hming chu an lam leh si a.

Ka thinlung hi ana vawng vawng leh ṭan ta, mah se, ka inti pachang lui thei hram hram zel a. Ni 12 kan keu kai chuan, ka awmdan hi ka ning lutuk a, U Zik a pawh a lungawi vak lo, kan in hau va, i U-tea chu i hmangaih reng a nih pawhin a neitu che chu keimah ka ni tho tho, i zan mu i tawngvaihna zawng zawngah U-tea, tireng mah la, ka ta i nih hi min tih chu maw le, ka thinin a tuar bik lo va, i zak na nge ka hmangaih thei lo ang che, ka hmangaihna zawng zawng hi U-tea ka pe tawh, adang ka nei tawh lo ka tih pohin ka nu leh pa aṭangin ṭan ila a, a sual thlak hi ka tiin Mipaah poh ka chhiar lo che kan ti chu, min beng ta anih kha. U-te, i hming hi a ni lam ve tur poh a ni lo, mak min ti em, ka nun hi a chhe zoin funah chuan hmana i hriat thin i hmangaih Sawmtei kha ka ni tawh lo, ka thinte a chhe em emin hlauh poh ka nei miah tawh lo, ka nihna letling kha ka ni zo ta.

Ka thinrim chu kan inah ka tlan a, kanu leh pa mak tih khawpin kan inah chuan kan ang ta a nih kha, Hei hi a ni reng dawn a sin, kanu kapa inthu hi a kawi a ngilin ka hnial ngai lo va. Ka pasal tur thlengin ka duhzawng leh duh loh zawng ka sawi vete poh min ngaithla duh lo va, hremhmun thleng rawkin infanu hian inthu ka awih hnuah hi chuan min ngai thla ve teh u, kan ti mai chu, ka nu leh ka pa chuan mak minti lutuk hi sawitur reng reng poh an hre lo a, kei lah ka ṭap zawih zawih bawk si nen, kei poh mak ka inti kawp a sin.

Ka nuin Sawmte eng i ti zo ta nge ni ngai min ti erawh chuan tlemin ka rilru ngaihtuahna a ti fim deuh a, ka ngawi ta ringgawt mai a ni. Ka mit ka chhing a, kathinlung chung hi a ṭap tak meuh meuh a, Ka riruah he hla chang hi a lo lang a, Dka hla ngei mai kha:

Vang khaw mawi a lengtin chhing a,

Sakhming dar ang thangin,

A mi hluan a, lung kan ruallaiin maw;

Kan hlimlai leh par ang kan lawmlai a rei lo vin,

Ngai chung a thren a tul ta aw;

An dawn lo ve hmangaihte kar thu leh hmangaihna awmzia,

An chhui phak lo i chhun leh zua ten;

An phal lo ve run hmun ka lendun a ai chuan,

An khaak chein hrai chawi riahrun an vaih tir che maw,;

Ngai chung leh chhing mittui far chung zelin,

Thinlai lungkim lo te'n duh reng chung then zai maw kan rel e;

Aw vang khawpui pawh a ngui ruai e,

A na em luaithli kan nul bang lo ve.

Tih kan ngaihtuah thleng chuh!! ka kawchung hi a let but but hian ka hria a, ka thin a rim tel bawk a, “Zika officer leh mi hausa poh ni la kut kher zawng lo thlak lul lo la a ṭha tur”, kan ti chhuak pop mai a, tin, a nu leh pa huatna thinlung ka nei dawn tlatin ka hre nghe nghe a, Sawmte avan na êm kan tuar hi, kan ti rô halh a, ka mang ang lutuk hian Sawmteii thih poh chu ka theihnghilh ṭep hial a ni.

Mite hi chuan hmangaihna hi a tlan hian an tlân phak a ni si a, Sawmte keini ve hi eng kan ti nge,, mite inhmangaihna ai chuan kan inhmangaihna hi a mawiin a thianghlim em em zawk a ni lo vem ni, kan van hi a duailua a ni e! Aw hetiang tak hian i tuar ang tih zawng hria ila ka kal tir hauh lo ang che maw le, kei chu mirethei ka ni a, anni zawng an hausain i chhungten i tan a thra ber tur an duhpui che ang bawkin kei pohin thinlung na êm êm chungin i hlim theih hun ala awm hi ka lo beiseipui ṭhin che kha ni a. Aw avan pawi tak em, i chhungte thlan ka ni lo khan keimahah insitna min siam len sak em a ni, Sawmte min ngaidam rawh aw? ka ti mawlh mawlh mai a.

Kei ang fahrah tan chuan ka nuin mual min liamsan daih tawh nen, i hnen atranga khang hmangaihna ka dawnte kha ka tan a hlut tehreng nen. Ka dinhmun hian nawr lui tur che a huaisenna aiin, tuar thei tur a insitna chuan tawrhna hi a thlang lo thei si lo a ni. Ani, ka hmangaihna che chuan i hlimna tur leh inchhungkua inremna tur atan chuan ka nun pum hi hlan zawk khan ka lo inngai a, ka lo tisual der a ni e, ka ti a, thinlung kehchhiatna aurawl chu ka thinlung chungah hian a thangkhawk tak meuh meuh a ni.

Ka thinlung tawt lutuk chu ka bathlarah chuan ka va chhuak a, pawn boruak chu kan hip vang vang a, thla no eng lah chu a dul reih mai a. Engkim mai hi a chul hian a chul reih ni hian chu thla no eng hnuaiah chuan ka hria a. Ka khawharna leh lungngaihnate chu van lam a thil siam thla leh arsi te bakah, lei lam a thilsiam nungcha te pawh chuan min tuarpui ve niawm tak hian chu zan chu engkim mai hi a reh hian a reh tlawk tlawk mai a, khauhriang leh lei hrik hram tak ngial pawh hriat tur zuk awm hlek lo chuan maw le.!!!

‘Sawmtei ’ diary chauh chu Sawmtei aw ka hriat theih na awmchhun a ni ta, chu vangin ka muhil thei hek lo, eng mah ka ei thei hek lo, ka tan chuan ka kawm theih awm chhun a ni si, inchhungah chuan lutin ka thut hmun ngaiah bawk chuan thut hmun remin a diary chu kan keu leh tran ta a.

'’Ka nuin Sawmte, fate innei ang a, i rilru leh ngaihtuahnate chu a la inthlak ve mai ang". tiin, min hrilh a, ka pa erawh thung chu a ngawi reng a, thil thui tak ngaihtuah niawm takin’', tiin, a thu chu an khar ta a.

A bak zawng hi chu ‘Ute’ ka van ngai tak che em, tih leh vawin chu ka khua avan har em, khawnge i awm, ka lung a van leng tak êm tih te a ni a, mahse, ka tan erawh awmze thuk tak nei vek an nih avangin, kei pawh hian ka theihnghil ngai bik lo che a sin tiin ka phun sep sep a. A bak hi chu ziah miah loh nite pawh a neiin, nasa tak a, a tuar theih tawk chu tuar tur a, a inbuatsaih thu leh Pathian hnenah tranpuina a dilna thu te an ni a.

April thla kan chhiar kai leh chu a ruak lo a ni tih a inhriat thu te, Dr hnenah inen tir tur a an kal thu te a ni a, ka thikin ka rilru a nat deuh avangin ka chhiar kan ta deuh zung zung a, a ṭhen laiah chuan ‘U-te’ ka naute pai hi nang nen zawk a kan fa chu ni se, ka hlim tur ka nunah hian nghahhlelna leh danglamna reng reng min siam zo miah lovin, nang ka hriat rengna hi tlemte pawhin a hliah zo hlek lo nia maw le, tih te a ni a, ka lungngaihna leh ka lainatna puntir tawk lek hi chu ka hmu deuh nial reng bawk a.

2003 kum chu tiang hian a chhiar zota , 31 dec 03 chu Partei alo leng a, kum hlui thlah zan chu min hmanpui turin ka ngen a. “U-te’ i chhanchin ringawt kan sawi dun a, ka ṭah khum leh ṭhin velin , U zika, awm loh na lam apiangah ka insawn pui zel a,, kan bul a awm chi-ah a ngai bik lo a ni ang, min pawh zawm a tum ta bik lo a, Partei chuan ka awmdan chu min hre thiam tho mahse, min hauin ka awm dan dik lo a tih thu te min hrilhin min thlem bawk a, mahse chung zawng zawng pawh chu ka tan chuan, nang ka hmangaihna che leh ka hriat rengna che belhchhah tu mai an ni zel si hi a ni, aw ka van ngai tak che em U-te, kum thar lo thlengtur te hi kei zawng ka huphurh mah zawk a ni , tiin 2003 chu a ziakin akhar ta a ni.

A bu dang zawng chu kalsan in 1 jan 2014, chu ka keu san ta zawk a. An nupa nunin awmzia a neih theih loh mai bakah keimah min hmangaihna leh min hriat rengna chuan a pasal chu a hnaih tir thei ngang loh avangin , a pasal pohin ngaihzawngte pawh a neih phah ve tak hial thu leh, chungte chu a thik chin eih loh bakah alawmpui zawk zia thu te, a chuang a, amah a thikna reng reng awm lo pawh chu mak hi a tih zawk zia thu tein jan 14, chu a khar leh a.

1, feb, 14 kan keu kai erawh zawng a sam a tlak nasat thu leh a hahni te a thi leh ringawt thin avanga a ngaih thrat loh thute a ruk a Partei sawm a , Dr hnen a an inentir thu hi a ni a, Biopsy te lak alo ṭul tak hial avang a inthren nghal mai a duh thu leh, apasal a hmangaih miah loh avanga sum leh paiah pawh atih hautak ngai miah loh chung changte, a mamawh chu kawng hrang hranga a indap chawp ve dan te, Cancer a nih a inrin avang a sumsen a hautak tur zia leh Zika sum hmang hlek lo a. Inenkawl tur a anu leh pa hnen a kir leh a duh zawk thu te chu an ni a.

10, feb, 14-ah chuan a nun chu lemchanna khawvel nen a tehkhin a, hrehawm a tawrh luihna zawng zawng chuan amahah rah ṭha pakhat mah a chhuah loh mai bakah, A pasal chu hrehawm nasa tak tuartir tu ve tho anih dan te a ngaihtuah avanga, chung thu zawng zawng leh an in neih chhung a, a pasalin a enkawlna kawng a alawm thu te, a pasal Office kal hlan a, an in lam a pan tak thu leh an fate erawh chu mipa fa an nih ang a, harsatna siam a tum loh thu te ziak a dahin a kal san tih a sawi a.

!7, feb 14, a apasalin rawn hruai tum a alo kal thu leh, tlang tak a kum sawm leh tllem an in neih hnu pawh a. A hmangaih theih loh thu leh an nunin a chhiatpui zawk zia thu te sawiin, engtik lai maha a hmangaih theih miah loh avanga a tih hautak ngai lo zia te hrilhin, a ni nen a inneih leh ai chuan thih a thlan zawk thu a lo hrilh thu techu a chuang a, a pasal beidawnga a hawn tak thu nen.

20, feb 14 Dr ten a cancer a ni tih an fiah tawh hnuah chuan thih mai a thlan zawk avanga, a chhungte hrilh mai pawh a tum lem loh thu leh tumah tih hautak a duh loh zia thu te a ni a. Mahse, chutih rual a min hmangaih zia leh, ka tranpuina beisei si, beisei ngam tawh si lo, a thianghlimna te mi dang kutah a chhung ten hlan a, an tih bawrhban sak tak avanga na atih zia thu leh, ka tan tling ta lo ni a, a inngaih thu te, khawilaiah emaw min hmuh mai beisei a bazaar lamah peih leh peih lo a, a chhuah ṭhin thu te alo inziak a, thukhar nan chuan ‘U-te’ tianghrep a ka tuar hnu hian i laka ka lo dawihzep zia hi ka inhre chhuak a, ka inten thrin Nu leh Pa thuawihna hlawk lo ber chu ka telta niin ka inhria a, min ngaidam ang che aw? Ka ngai chein tunah hian i enkwlna hnuai a awm hi ka van chak tak êm, min la hmangaih ve reng ang nge mi dangah i tlei ta zawk, tiin. A thu chu a khar ta a.

Ka mitui chu lo hnamin kan inthren hnu khan tumah ka ngaihsak ta lovin, nang lo chu hmangaih dang reng reng hi ka la nei lo asin, i pasal neih ni khan ral hla tak atrangin ka lo thlir che a, khang inneihna thu tiam in chham tur harsa i tih zia kha ka hre vek asin. I chham thei lo in i trawng chhuak zo ta lo zawk a nih kha!! kha inneihna kha pastor khan ti tawp ta mai zawk se ka lo ti khawp a sin, mah se a kal tlang pui ta tho si kha a mak ka ti, i mittui luang kha a hmu ve vek awm si a. kha Zika khan ka sawi tur zawk leh ka chham tur zawk a chham lai khan keipohin i tan a rinawm zel turin ka thinlung khan a lo chham ve tho a sin, a van na ngai em, kha hun kha ka tuar zo lo trep a ni, ka hmu thei ngang lo che a, ka kal bo ta nghal a ni, tiin kan chhang ve a, kha inneihna kha mite sawi leh mak tih hial pawh akai reng a ni.

5 March 14, ka taksa leh ka awmdanah, ka chhungte ngaih a thra lo a, mahse eng mah ka la hrilh duh lo. 7 March 14 Partei zin lo hawngin bag min rawn hawn sak min rawn pe chuan ka hmel leh awmdan atrangin ka inenkawl lo tih hriain ka nu leh pain an hriat tawh leh hriat tawh loh thu min zawt a, ka ngawih reng avangin ka chhungte a lo hrilh ta ani. Ka pa chu a hmel atrang rengin a lungngaiin a thinlung hi a na tih a hriat a, ka hmuh loh hlan chuan a mittui pawh a seng nasa hle a ni tih a hriat theih a, ka nu pawh chu ti tho chu a niin tu mah chaw ei thei pawh an awm lo a, an hriat rual rualin chhungkhat laina inpun khawmin ro an rel nghal a, tih hi a ni a.

10, Mar, 14, engkim an peih fel tak avanga Aizawl chhuah sanin phailam damdawi in lian Vellor Hospital an pan tak thu leh, a nau Hmingtei nen anu leh pa nen an kal thute, a ngaihtuahnaah chuan a nain amahah awm zia a neih loh thu leh a ngaihpawimawh loh zia thu te, chu ai chuan min ngaihzawk zia thu leh, a hun liamtain a thinlung a tih nat zawk thute, a tun din hmunah hian a kiangah awm vese min tih thu leh awm ni ila chuan ka kut vuan reng chung leh ka awmngheng a a chanchhin min hrilh a chak zia leh min ngaih thin zia min hrilh a chak thu hi a lo ni a.

Ka van lainat tak che êm, ‘Sawmte’ Inthlahrung hauh lo khan min hrilh nila chuan engmah hian min dal thei lo vang, kan pawnlam nun chu thiah sakin awm mah ila, kan chung ril a kan inzawm na erawh hi zawng tu man an lo thiat thei lo a nih hi, ka van chhuang tak che em, a eng a pawh chu ni la, lo hre hma ila zawng ka hmangaihzia che leh ka nun hian a nghah awmchhun chu nang hi i ni tih lan tir nan ka nupui atan hmanhmawh takin ka nei tho tho tur che hi a ni a, thlamuang takin ka kiangah ka thlazar hnuaiah ngei i muhil mai tur hi a ni a tiin ka phun sep sep a, ka mitui chu dan rual lohin a lo luang leh nghal ta zawih zawih a. Kan dak chhuak chu, khua hi a lo var der tawh mai a, ka bathlarah chuan ka va chhuak a, ni chu khaw chhaklam atrang hian a lo eng det det tran der tawh a, chu thlasik ni rawn intran zing khaw han vawt vek leh, khua han thlir reng reng chuan khua chuan, min tuarpui ve niawm tak hian a ngui nghiai hian ka hre hial a ni.

Tunah chuan 'Swmteii'n' he khawvela mal leh khawhar tak a, awm tur a, min kalsan na chin pawh ni li a liam ta, tu khaw hriatpui hauh lo a mahni chauh a han tawrh tlawk tlawk mai chuh. A van thaw pik thlak em. Tunah rih chuan, 'Sawmtei' diary-ah chauh chuan ka ngaihtuahna thinlung zawng zawng hi hipin a awm rih bawka, ka ṭhuthmun remna pangngaiah bawk chuan ṭhut hmun remin, awmpui nu thingpui min pek in pah chuan a diary chu kan keu chhun zawm leh ta a.

'Vellore' an thlen zan a, a chauh zia thu a ziak ni hi, March ni 12 tlai lam a ni a, ti hian a ziak a ni, Damdawi inah kan in admit nghal mai thei si lo a, Pawn lamah khual bukah kan riak a, ka nu leh pa leh ka nau Hmingteii te ka bul a an awm lai chuan ka chau lutuk chu ka lo chhing sek a, 'U-tea' ka mumangah ka lo hmu che a, khawhar hmel tak mai hian hmun fianrial tak lam pan hian i lo kal dawn a, U-te min lo nghak rawh, min lo nghak teh ti hian ka lo au vak vak che chu ka lo au chhuak a, ka nau Hmingtei chuan min lo sawi harh a, ka nau chuan, ka u, mi lainat leh mitui parawl kianga ṭah aw ṭiau hian, U-tea i hmu elo min ti a, kei chuan nia mawle ngahnge min sawi harh kher kher ni, ka van ui em ka mang chu ka ti a, ka nau chuan kan hrilh ve mai lo a ni, a pawi ngawt mai a han ti a, ka pa pawhin a rilruah chuan hrilh mai che a duh thu leh a inthlahrun thu te a lo sawi ve bawk a, ka nu erawh chu a ngawi reng a.

Chu hun chu remchangah lain, ka nu leh pa hriatah chuan Hmingte nang chuan i hmangaih theih miah loh chu nei ve reng reng suh ang che ka ti a, ka pa pawh chuan Sawmte chhungkua hi a bula ṭan leh theih zawng nise i duhthu sam ngei leh i hmangaih ngei hi i nei tawh ang, min ti a, a sawipah chuan ka nu chu a melh rum hle bawk a, ka nu erawh chu hawi chhuak ngam loin ngawi rengin a kun tlawk tlawk ri ngawt a, inharh hi a tlai em a ni, ka nu engah mah inrilru ti na suh ang che u, thil kal tawh leh hun liam tawh a nih hi ka ti a,ka hnem a tiin, a thu chu a khar leh ta a.

March ni 15 ah chuan a inen tir ve thei tain, chu mi ni vek chuan hospitalah chuan admit a nih thu a ziak leh a, a taksa awm dan a hriat danah chuan beisei tur awm hian a hriat loh thu leh a chhungte rilru dam nan a kal mai a nih thu a ziak a, ni tin maia a diary a ziah theih chinah chuan a tlang kawm naah hian ka hming hi a lam tel ziah bawk a, ka hming hian chuan loh na phek reng reng a nei lo a ni. 25 March 2014 ah chuan a chawkawng cancer lai chu zaingam a nih tawh loh thu leh chemo leh radiation chauh a an en kawl theih tak thu hi a sawi a, chu pawh chu a pa bulah chuan ṭul a tih loh thu leh inlam a haw mai a duh zawk thu a hrilh te, mah se, apa-in theihtawk chhuah hram aduh thu leh, amah sawmteii pawh chu lo tuar hram hram tur a a tihna thu te a ni a.

April ni 16 thla laihawlah chuan an inenkawlna avang a a chauh tawh zia leh rawn hawn a min hmuh a chak zia thu te, a sawi leh a, Chemo avang a, a samte a tlak kawlh tran thu leh, thih mai a chak zawk tawh thu a pa hnenah a hrilh thu te, leh a thinte pawh a chhiat tak zia thu te a chuang bawk a. May ni 7 chuan an lo haw tak thu leh Parteii hnenah chuan a hun tawn engkim mai chu, he khawvel a chhuahsan hun a lo thlen dawn hnaih ta ni a ahriat avanga, a chanchin leh min hmangaihzia hria se min tih avanga ka hnena a thu chah duhte, a hrilh ṭan thu leh Parteii leh a nau Hmingtei chu ka chanchin a sawipui theihte an nih avanga a bul a awmreng tura a duh ṭhin thu te a chuang bawk a.

A diary chu a ziak khat tawlh tawlh danah leh, a kut ziak pawh a mawi theih teh reng nen, a nawi ṭan tak niaih danah chuan, a chau in ziah peih loh chang a ngah ta hle a ni tih a hriat theih a. Kei chuan a nun leh hun tawnte kan thlir let sak chuan, engtin nge maw i tlin zawk le! 'Sawmte' ka ti hial a, min han hrilh vat ni lang chuan i chungte emaw tu thutlukna mah hi ka pawisa tawh miah lo ang maw le, nga tinge i ngawih reng a?, ka hriat loh a heti ang harsatna hi mahni mai a i hmachawn mai le? he tiang hun min mamawh lai hian nga ti nge?, nga ti nge? eng a ti nge?, tih zawh na hi ka thinlung chuan a zawt mawlh thung si a.

SAWMTE

1) Pialral lamtluang zawhin,

Min nghilzai i rel ta em ni,

Cham rih la hringlang tlangah.

Min ngaiin min hawi leh la,

I chhingmit rialtui ang farin,

Ariang hi min han dawn ve maw.

2) Dan rual lohin hawilohpar i thliak ta si a,

Chutin hringhniang khuavel nghilh zai relin,

Lungloh tui dawn i rel ang maw,

Rihlipui lamtluang zawhlai bang lo hian,

Minngai lo te’n thlafam vangkhua min lawi santa si,

Aw!! Awmhar khua a sei dawn ngei e.

3) 'Duhlai' hei hi maw ka chan tawk lo ni,

I laisuih tuahrem thai fung chawi a,

Phek tin mawian ka sakhming i ban le,

Nghilhar i thaikawi biathu, thlir ninawm lo.

Senlai nau ang tlei a har dawn ngei e,

Auhlai ka banglawng che.'Sawmte'

( I tan itan chauh, tiin, ka hming chu ka ziak a. )

Tiin, ka lungleng lutuk awmngaihna hre lo chuan, Ka thinlunga hla thu rawn thleng chu kan ziak ve nghal zung zung a, ka thinlunga khawharna leh tuarna rawnin sawr chhuakin a hrin a ni bawk a, kan ennawn leh pawh chuan mawi ka tiin ka ṭahpui vawng vawng reng mai a ni.

Sawmtei diary chu kan keu chun zawm leh ta a, a ziak chhunah chuan ka hming chuan loh na Phek reng hi a awm ta lo, a thla a thla a ziah peih loh chang a nei ta nualin a ziak chhun pawh a tlem ta hle mai, vawin chu ka nau hnenah mittui tla zawih zawihin U_te, i hnenah min hruai turin ka ngen a. ka nu leh pa te a va rawn a, U zika leh nopang ho lo awm ve reng bawk si nen, an zah ve si a, a tih ngaihna ka hre lo a ni, a khat tawk a damdawiin luh leh ṭhin hi ka pawn chhuah theih tawk a ni mai si a, aw ka van ngai tak che em, ti a, a lehkha ziak mittui far tih hriat tak a pherh niaih chu ka chhiar thei hram hram a.

Ka lungzing lutuk chuan ka phone chu lain, Partei chu kan call a. Sawmtei diary ka chhiara ka rilru nat zia leh, heng ang hun zawng zawngah hian min hriattir vat loh avang chuan ka vui thu leh ka thinrim thu kan thlen ta ngawt a,Partei chuan Ute, a ni ti rawh, Sawmtei pasal hlui U Zika leh anfate lo kal ve reng kha a chhungte tan pawh kawng leh lamah chuan an zahawm ve em bawk a ni, tiin, min rawn chang a, phone-ah chuan Partei insum thei lo chu anṭap leh a, sawi hi ahrehawm a ni U-te, Sawmtei nu leh pa pawh khan in chungchangah an fanu duh ang tipuitling thei turin i hmel an zahna khan a dal ve nasa em em bawk nen, thiam loh ngawt chi anni bik lo a sin, inpahniha inchungchangah hian an inthiam lo vin, an rilru a nat bakah an zah takzet che a ni e, tiin an phat pui a, a ni maw ahun lo a inthlahrunna chuan englaimah a dam tawh ngai lo tur ser ka thinlung lamah min belhchhah ta zawk a nih hi, tiin, kan in biakna chu ka ti tawp ta a.

26 sep14 kan chhiar thlen chuan U-te, vawin hi ka diary ka ziak theih hnuhnun ber a nih tawh ka ring hial a ni, ka hun hi a rei tawh lo ang tih ka hria a. Chuvangin vawin hian ka hmuh ngei che angaih avangin, ka chhungte hnenah poh U Zika rawn lantir tawh lo turin ka ti nghe nghe a, naupang erawh chu thu hran ka ti a, ka nu'n min hnial a tum a, ka nu ka thih hnuah i duhtawkin makpaah lo neih zui ang che, tiin, ka hau ve ta ve thung a, chuvangin an hriat laiin Parteii hnenah i lo kal ngei na tura rawn hriattir tur che leh a theih ang ang a i phone number zawngturin ka ngen tak avangin ka chung te pohin engmah an sawi ngam ta lo a ni, tih hi nawiniaih hian a ziak a. ka thinlung leh rilru hi ana takzet a ni e, chumi hnu lam chu inlo chhiar tawh zawng kha a ni e

Ka rilru na chuan ka hla ziak chu ka copy tha nawk nawk a, ka phone chu lain Partei chu kan be leh a thlanah lo awm rawh ka rawn kal dawn e, tiin, kan hrilh a, ka hla ziak chu sarang fim tha takah hian chhiar theih turin ka thun felin ka char ta thlap a, ka chemte ( swiss knife ) chu ka keng bawk a, thlanmual lam chu ka pan ta a.

'Sawmtei' thlan ka thlen chuan a hming leh kum an ziahna cross chu mittui far chungin ka hla ziah ka phum theihna turin ka kher ta mawlh mawlh a, ka peih fel chuan kan dak chuak a, Parteii chuan chutah chuan engtia rei nge min lo nghah tawh ang tih reng ka ngaihtuah thiam lo, Partei chuan min rawh hnaihin ka kut chu a rawn vuan a, Sawmte, U-tea, alo kal e, rawn tho tawh rawh le, an ti zet chuh, insum chu har ka van ti em.

Ni chuan tlak a hnaih ta hlein Reiek tlang sanglai chu, a en nonghelh lai chuan, Sawmtei thlan bula ka ding chu Parteii min lainat leh min khawngaih lutuk chuan min rawn kuah a, a ni pawh chu in sum thei lo chuan a inhnit hlawp hlawp a. Kei erawh Partei lungchhe taka ṭap chu khuah chungin Sawmtei thlan chu ka thlir reng a, ka rilru leh ngaih tuahna chuan kan pahnih hian khua ruat kan lo ni lo a nia nge Sawmte, nang nen hian awmdun thei ilang chuan chatuan hi puntirtheih nise puntir kan duh ngei ang le! nang nen chuan, chatuan hi tawite a nih ka lo ring hial ṭhin a ni, ti a phun sep sep chungin lei hnuai thuk taka zal ta, ka hmangaih Sawmtei chu ka be sep sep a.

Tunah chuan thinlung rehri chu ngaithlain ka bathlar aṭang chuan chhumzinna paih lama ram mawi tak mai chu ka thinlung mit chuan a thlir a. Chu kawng panna Sawmteii kal tur inbuatsaih lai leh a marphu det det te chuan min hmangaih zia hi min hrilh nawn leh ni ber hian ka hria a ni.

- By: Zualtea Ralte

Mizo Thawnthu

TIMES OF MIZORAM

Job News

UIRENA - Mizo Thawnthu Ngaihnawm

RAMDINSANGA - MIZO SHORT STORY

KA U RAITU AH MIN PUH

A REI LO ANG - MIZO LOVE STORY

Ads Section