Showing posts with label MIZO MILARTE. Show all posts
Tweet Share Share Share Share Share

April 16, 2023

Lalfakkimi (Makfaki) kum 34, Pathian fakna hla satu chu tûkin (16.4.2023) khan thiin chhar a ni. 
Tûkin khan a thenawm ten a zîng tho an hmu lo a, a thawm a reh zui em avangin a chhûng te an hrilh a, a chhûng te hian an phone a, a chhang ta si lova, an ngaih țha lo chuan YMA punin, a in kawngkhar an tichhia a, khumah thiin an va hmu ta a ni. An va hmuh hian a taksa pawh a lo khawng tawh niin an sawi.

Mafaki hi Republic Vêngchhak, T. Romana College bulah amahin in a luah a, a ruang hi Tripura, Tlangsang khûaah phurh tura ruahman a ni.

A chhûngte hnen atanga thudawn danin tunhma lamin a taksa hrisel lohna a neih loh thu an sawi a, BP sang erawh a nei niin an sawi.

Music Domain Mizoram (MDM) Thuchhuah

Music Domain Mizoram (MDM) chuan kan member Lalfakkimi Sailo Mafaki Kum 34, Tlangsang, Tripura in vawiin April ni 16, 2023 zan dar 6pm a Republic Veng, Aizawla a chenna in-a mihring ngaih a hunlo kan la tih em em laia, van kohna min chhan sak mai hi mihring lam ngaihtuahna atang chuan kan tuar hle a; a kalsan tak a chhungte hnenah Pathian thlamuanna leh awmpuina lo thleng se tih hi kan tawngtaina a ni.
MDM in Mizo Rimawi tana theih tawp a chhuah hlim atangin Mafaki hi Mizo Rimawi hmasawnna duhtu leh pawl tana thahnem ngai leh inpe tak a ni a, kum 2023 MDM Calendar atana nikum kum tawpa Photo Shoot an neih chu pawl anga a Activities hnuhnung ber a ni dawn ta a, kumin June thla ah Mafaki te thlalak hi MDM Calendar ah hian a chuang nghe nghe dawn a ni. MDM chuan Mafaki hi puan in a tuam a, MDM dan bu in a sawi ang a Chhiatni/Thatni a inkaihhruaina kan neih ang in kan thlah liam ang. 
Zoram dung leh vanga amah ngaisanga, Mafaki kaltlanga Pathian hnathawh lo hmu tawh thinte MDM chuan kan tawrhpui em em a, a fak thin Pa ang chhung ah thlamuang takin a chawl ngei ang.

Sd/-
General Secretary
K. Lalremruata (Klr Tetea)
Issued by Information & Publicity 
Music Domain Mizoram (MDM) 
General Headquarters, Aizawl

MAFAKI RUANG ENDIK DAWN

#Vanglaini 16.04.2023 10:30 p.m.
Zaithiam lâr Lalfakkimi (Mafaki), Republic Veng, vawiin April 16, Pathianni tlai dar 5:45-a a chenna ina thia hmuh chu zaninah Republic Vengah lumen a ni ang a, naktuk April 17, Thawhtanni zing karah Civil Hospital, Aizawlah a ruang endik a ni dawn a, chumi hnuah an khua Tlangsang, Zampui (Tripura) panpui a ni ang.
Read more »
Tweet Share Share Share Share Share

April 22, 2021
Hla phuah thiam C Durthanga

Pu Thanmawia leh Pi Novi te inkarah 15. March 1944 ah Khawruhlian ah a lo piang a. Unau 12 an ni a upa ber atanga chhiar a pathum na a ni. A hming an sak hma in Durtlang ah an pem a, a pu hi tunhma Lal khawnbawl thin a nih avingin Durtlang khaw hming chawiin DURTHANGA tiin a hming a sa ta a ni. C.Durthanga hming bula C hi Chhangte tihna a ni.

Durtlang ah Primary-middle thleng a zira chumi hnu ah Aizawl ah an pem. Aizawl ah hian Night coaching an tih thin ah pawl 8 atangin a tan leh a pawl kua a pass leh. Pawl sawm zir zawm tumin admission an ti fel vek tawh hnu ah rambuai in a nang a, MNF underground a zawm ta a ni. 

1969 ah MNF a zawm a E: Pakistan ah te tlanchhia in  ramri tuipui kan hma lawk Sajek luiah an lo ambush a, an man a jail ah an khung. Phuldungsei camp atangin Aizawl ah helicopter in an hruai chho a. Chutah Aizawl qtr guard an tih mai ah chuan thla khat vel a awm a, chutatangin Jail hlui( tuna Babu tlang) ah an sawn leh a chuta tangin Silchar jail ah an sawn leh a ni. Tah hian kum khat leh chanve vel a tang.

Silchar jail a a tan lai hian JAIL RUN THIM tih hla a phuah. Silchar Jail atangin Tezpur jail ah an sawn leh a he Jail a a tan lai hian a bialnu Khawrihhnim nula Lalsawmi Jail ka tan chhuah hun ah ka nei ang a ti chu a boral thu a hria a, a rilru a na ngei mai. Tichuan Jail atanga a chhuah hnu 1971 ah C. Lalrinmawia hla hit I RAU I THLA TAL RAWN TIR RAWH tih a phuah ta a ni. 

Tezpur jail a a tan lai hian MIN LO HMUAK ANG CHE VANGKHAWPUI TUAL AH tih hla a phuah a. R. Vanlalrova'n  Radio ah 70's chho bawr vel khan a sa a a lar thei hle thin. 
C Durthanga

Pu Durra hian MNF underground a nih chhungin SURGEON  a kai ve. 

A hla phuah hmasak ber chu 1959 kuma a phuah, KHIANGAWIIN MUAL MIN LIAMSAN MAI LO LA tih a ni a. Mahse sak lar a  ni lo. Aman hmanlaia tingtang nen zana zai an uar thin ang khan a man a sa ve mai mai thin.

Kum 1974 ah Pi Lalromawii primary Head tracher nen an innei a, fa pathum an nei. An nu a pension na thleng a a thawhna Zawlnuam ah an in bengbel ta a ni.

A hla phuah zawng2 500- 600 inkar a ni. A hla phuah tam tak zingah tlemte chauh tarlang ila:

Ka Thlang mizo val ngei, Chhul khat kual, I rau i thla tal rawn tir rawh, 

Damlai thlan thim- he hla hi Radio ah Vanhlupuiin a sa a, Opa of Tribal power in album ah a sa.

Lam ang lo let leh rawh- He hla hi Zosanglianin audio album ah a sa a Vanhlupuii'n Radio ah a sa bawk.

Tin, C. DURTHANGA HLATE tih album chu kum 2003 khan  Skylink ah tlang zarh a ni a, a hla phuah zaithiam hrang2 in an sa a ni.

He album a hla pakhat Tommy L. Pachuau sak HRING DUP KA TLO tih kha a awm zia kan hre vak lo. " Hmanah chuan maw vana pa Hall a awm velo  zaina run tha kawlphetha eng a awm hek lo awm heklo peromax nen Theater hall ah/ Hring dup ka tlo ka tlo kan ti"  tih te a ni nawk mai.

HRINGDUP KA TLO AWMZIA- Hmanlai kan mi hmasa te khan tingtang ri thum an perh in ' tut tururu tut tururu tut'  tlangval hovin an hrui thum an perh kha HRING DUP KA TLO tiin an hria a, khami hrui thum ri kal hmangin HRINGDUP KA TLO tih a ni ta a ni. 

A hrui thum Do, re, mi  fa, saw, la, ti, daw tih kha pi leh pu ten Hring Dup ka tla tiin an sawi a ni.

Pu Durthanga te chenna Zawlnuam hi a hming hmasa chu Lokichera tih a ni thin. Loki- Vai Pathian, Chera- Kawtchuah. VAIPATHIAN KAWT CHHUAH tihna a ni. 

Tun hma in vai hovin mau leh thing an la thin a, an haw thei lova an Puja ta a .An Pathian kawtchhuah ah ngaiin LOKICHERA tih hming a pu ta a ni. 

Pu J. Thanghuama( speaker a nih tan tirh hunlai)  khan " a vai hming emai" tiin hming thlak a rawt a. A khaw chhim lam veng pakhat zawl zau deuh mai Km- 5 vela hla a awm chumi chawi chuan mimal phuah pawh ni lovin khawtlangin phuah in ZAWLNUAM tih a ni ta a ni.

Borai leh Zawlnuam khu khaw khat a ni vek tawh. Tun hma chuan Zawlnuam khua hi Rengdil khaw Lal Ralzamanga'n a awp thin a( khawper). Borai khua erawh Hriphaw Lalhnuai ah a awm thung. Rambuai khalh khawm khan he khaw pahnih te hi an in fin ta.

~Tedika Chawngthu

[ToMZ is dedicated for archive and exposition of Mizo affairs to the rest of the world. Informations obtained are re-posted 'as-is' basis as a digitization initiative so as to make accessible to all through online surfing. Due credit is given to all author/owner except those which cannot be ascertained]
Read more »
Tweet Share Share Share Share Share

July 16, 2020 2

AW MIN KAI LA, AW MIN HRUAI RAWH

Pi Lalruali CHANCHIN

A chanchin tlangpui :

Pian leh murna : Pi Lalruali hi a pa Dokunga Khiangte, a nu Chawnglali a ni. 1924, February ni 13-ah Sihfa khuaah a piang a. Sihfa khaw lal Thangkama fapa nen an pian rual avangin an lalnu chuan "Sihfa Lalruali a nih hi", a ti a. A hnuah Lalruali tia koh a ni ta zel a ni. An hnam hming hi Khiangte Khupthang a ni.

Zirna lam : Pi Lalruali hi a naupan lai atangin mi hlim thei tak leh rual pawl thiam tak, harhvâng leh kawlhrawng ang reng tak a ni a. An khua Sihfaah lehkha a zir a, 1936-a pawl thum a kala, vanduai thlak takin January thla chawhnu lamah a khup a lo na a, a vung a; a khua a sik a, a lute a hai deuh bawk a. A khup mai ni lo a malpui dinglam chu a vung zela,chhunzan ,zawmin a mu char char mai a ni. Muhil țha thei si lo, a na tuar chu a țap leh ringawt mai thin a ni. He a natna hi Ruhnget (Osteomyelitis) a ni a, a damdawi a vang hle. He a natna avang hian pawl thum chu a zir zo ta lo niin a lang.

Kut themthiam : Kum 1940 tir lamah kawr a phiar țan a, a kut hnu a mamin a phiar thiam hle. Vanneihthlak takin Sawrkar ațangin puanțhuikhawl leh laphiarna hmanrua te a dawng ve hlauh mai a. Puan țhui leh laphiar kawngah pawh a intodelh ta hle a, mi tan pawh a țangkai hle a ni. Kum 1947 khan Aizawl Bawrhsapin Aizawl Lammualah thil entirsiakna a siam țumin a kawr phiar chu an zuk entir ve a, lawmman pahnihna a dawng nghe nghe a ni.

Solfa lam : Sikul a kal laiin solfa pawh a zir ve a, a solfa zir hi a tangkaipuiin a chhawr hle. Țum khat chu Saitualah Solfa exam a bei ve a, a tling (passed) ve nghe nghe a ni. Solfa te a lo zir thiam ve avang chuan hla a han phuah chhoh tak tak hnuah pawh a sawlfa lo zir tawh chuan a puiin a chhawr țangkai hle a ni. Hla thluk han siam mai thei tur pawhin a kawng hmang a hre chho ve zel a. Siam țhat leh theih tura a lo remkhawm thiam lawk avangin a hla tam tak pawh a tira a thinlunga a lo lan dan angin a sa chhuak thei mai țhin a ni.

Kohhrana a rawngbawlna : Pi Lalruali hi Presbyterian Kohhran mi leh sa a ni a. Kohhran leh khawtlang thilah a theih ang tawk tawkin a inhmang ve țhin. Sunday Sikul Zirtirtu a ni a, kum 1949 ațangin Kohhran Hmeichhe Committee-ah a tel ve a. Ziaktu atan te, tangka vawngtu atan te an hmag țhin a ni. Amah pawhin chutiang rawngbawlnaa inhman chu nuam a tiin hlimawm a ti hle țhin a ni.

Durtlang Damdawi Inah : Kohhrana rinawm taka rawng a bawlna avang hian Sap Missionary Pi Hruaii te nen an inhre pawh țha a. A natna avangin Pi Hruaii chuan Durtlang Damdawi In lama awm thla ngei ngei turin a nawr tlat a. Chu duhsakna leh ngenna lawmawm tak chu tihlawhtlingin Sihfa khua ațangin Durtlang Damdawi in a pan ta a. Chutah chuan he khawvela a zinkawng tam ber chu a hmang ta a ni.

Țhutlirh (Wheelchair) nen : Ruhngêt natna khirh tak avangin mi pangngai angin a kal ve thei ta lo va, zakdawm tiang pahnih hmangin a kal chhet chhet thei chauh țhin a ni. A na a chhuah zual lai phei chuan zakdawm tiang nena kal pawh a har a, țhutlirh (wheel-chair) te ngaihtuahsak a ni ta zel a, a tan vah vel a harsa țhin hle mai.

Hosital Evangelist : Durtlang Damdawi Ina a awmna Ward bik chu Rinna Ward kha a ni a. A khuma a țhu lai hmute chuan natna nei damlo angah an ngai kher lo vang. Khumah fel takin a țhu a, hlim hmel sarhin amah bia leh hmu duh apiang a lo kawm thin. Chutia Damdawi Ina a awm chhan ber chu : 1962 khan "Hospital Evangelist" atan Dr. R.K. Nghakliana'n a sawm a, chu sawmna ang chuan Mai 1962 ațang khan Hospital Evangelist a lo ni ta a ni.

A tlu sual leh : Kum 1983 August thla khan a tlu sual leh hlauh mai a, chuta chinah chuan a awmna "Rinna Ward," P.C. Synod Hospital Durtlangah hian a awm chho ta ngar ngar a ni. Mi dangte tana hun a hman loh chang apiangin lehkha a ziak țhin a, hla a phuah bawk țhin. Heng a tih bakah hian pangpar mawi tak, damlo thisen pekna bur ruakin a siam bawk thin a, pakhat Cheng Sawm (Rs 10/-) zelin mite'n an leisak țhin. Chu chuan Damdawi In khum man a tuak ve ngat ngat a; nuam a ti ve hle țhin. Ngal nget neiin pianphunga rual ban lo ni mah se, hna pathum - Pathian thusawi, Lehkha ziak leh Pangpar siam hnate chu nuam ti takin a thawk ngar ngar reng a ni.

Thu ziak lam : Pi Lalruali hian thu ziak lamah a thawh hlawk hle, Kristian Tlangau bu thlatin chhuakah a thu ziak chi hrag hrang țhahnem tak, ngaihnawm leh țha tak tak te 1954 ațangin an chhuah țan a, mite thlarau nun rilțam tuihal a chawm hle a, an chhiar kham lo hle a ni. Tin, 1988-ah thawnthu tawi bu pathul leh "Ka pa chanchin leh a thlahte" tih a ziak țeuh bawk.

Hla phuah lam : Pi Lalruali hian hla phuahtu lar ang zawnga hming chher a tum ngai reng reng lo va, Pathian chawimawi nan leh ropui nan chauh a phuah țhin a ni. Chutiang rilru pu chung chuan hla 59 lai a phuah a ni. 1958-a a hla phuah hmasak ber "Ka chenna ram thlaler a ni Lalpa" tih hi a lar ber awm e, hei hi 1983 khan Kristian hla Buah seng luh a ni. Kun 2002 - 2003 ah "Hneh theih loh nun ka nei," tih hi Kristian Hla Buah seng luh a ni bawk. Kristian hla Bua seng luh a nih hnu phei chuan sak a hlawh lehzual a ni. A hla phuah hnuhnung ber chu 2001, March thla khan a phuah thung. Kum 1984 kha Pi Lalruali tan chuan a hla phuahah "Par vul chhuah kum" tih theih hial a ni awm e, he mi kum hian hla 14 ngawt a phuah a, hetiang reng rengin kum dangah hla a la phuah ngai lo a ni.

Țha tih ber : Pi Lalrualin a hla phuah tawh rau rauvah chuan "Thihna luiah kan intawk ang" tih hi țha berin a hria a, amah pawh hneh berin a inhria. A rilru chhungril ațanga lo luang chhuak tak meuh niin a hria a ni.

Ka Testimony hla : "Ka Testimony Hla" a tih erawh chu "Ka Chhandamtu ka tawh hma chuanin" tih hla a ni daih thung. He hla chanchin phei hi chu sawi nuam a ti em em a. Zep pawh a zep lo khawp mai, "Englai pawhin he hla chanchin hi chu ka sawi peih reng a ni" a ti thlawt mai.

Pi Lalruali hian a hla phuahte hi fel takin a vawng a, amah ngeiin lehkhbu hranpa ngat a zuah a, chutah chuan a hla phuahte chu a ziak belh zel a. A phuah ni, thla leh kum te chiang takin a ziak lang zel a. A hla thluk (Tonic Solfa) thlengin a ziak zel a ni. Hla thluk țhenkhat phei chu ama siam liau liau a ni nghe nghe. Aw chi hrang kim (Zaipawla sak chi ang) tur erawh chu a part dang remkhawm turin mi dang a ruai bawk țhi a ni.  @B. Chhangte Kolasib Vengthar
Read more »
Tweet Share Share Share Share Share

June 06, 2020

MIZORAM RAJYA SABHA M.P CANDIDATEPU K. VANLALVENA BIH CHIANG ANG AW


PU K. VANLALVENAPeka Ngente
Lunglei.

Kumin 2020 a India ram rorelna In pakhat, Rajya Sabha M.P thlan tur a Mizoram atanga MNF in candidate tura an chhawp chhuah Pu K.Vanlalvena hi Pu K. Lalzika leh Pi Sangvungi te fapa atan rambuai khawkhawm laiin East Lungdar khua ah 14, Jan.1970 khan a lo piang a, North Mualcheng khua ah a seilian a , tunah hian a nupui fanau te nen Aizawl Bawngkawnah an cheng mek a, Ruihhlo chi hrang hrang laka fihlim, mi inngaitlawm, Pathian leh mahni aia upa te zah tlat mi a ni.

Zirna lamah
Zirna lamah chuan North Mualchengah bul a tan a, Primary School a zir zo va, Middle school hi North Mualchengah leh Dawrpui Vengthar Middle School ah zir zovin, High School chu East Lungdarah leh R.M High School Aizawlah a zir zo leh a, kum 1993 khan Pachhunga University College atangin BSC chu tha takin a zo a ni.

Kohhran leh Zirlai pawl
High School leh College a kal lai atangin Students' Union hruaitu atan thlan thin a ni a, mi kaihhruai theihna nei tha tak a ni. MZP General Headquarters ah President term khat leh Vice President ah term thum atan thlan tlin a ni. Kohhran rawngbawlna lamah Mizoram UPC Kohhran ah kum 2009 khan Upa atan thlan a ni a, Thuhril rawngbawlna a nei thin. Tunah hian Shalom, Bawngkawn Mizoram UPC Kohhran, ah Secretary hna a chelh mek bawk a ni.

Infiamna lam
Infiamna chi hrang hrang hi a thei hle a, Table Tennis leh thluak hman tulna tak, Chess hi a tuina lam an ni. College a kal laiin PU College TT team chu Table Tennis ah tum hnih champion puiin; NEHU Inter College ah Silver lain Mizoram Inter College Sports ah Gold Medalist team ah a tel bawk.

Politics lamah
PU K. VANLALVENA CHANCHIN TAWI
Ram leh Hnam vei mi a nih avangin Politics ah lut chhovin, Mizo National Front a zawm a, MNF General Headquarters ah Thalai President term khat a chelh zawh hnuin, General Secretary hna a chelh leh a, tunah hian MNF General Headquarters ah National Core Committee Member nilai a ni.

Kum 2015 MLA Bye Election ah khan Aizawl North III bialah MNF Official Party Candidate in din tir a ni a, kha tih laia Rorel lai party Congress candidate kha a hneh lo hlauh a ni. Chu ti chung chuan Ram leh Hnam hmasawnna leh din chhuahna tura leilehnaa kut nghat tawh a nih tlat avangin Political Field a Pathian kohna chu a chhunzawm zel a, tunah hian Mizoram Rajya Sabha MP ni turin Rorellai MNF candidate atan chhawp chhuah a lo ni ta a, Politics ah hmabak eng tak nei a ni.

Kum 1994 a MPSC in High School Teacher tur interview a conduct khan Pu Vena hian a dil ve a,kum 1995 ah result hi chhuakin HS Teacher atan a tling a,Govt Hrangchhuana High School, Aizawl-ah appoint a ni a, zirtir hna hi thla 3 a thawh laiin MZP President atan hneh takin thlan tlin a ni a, Ram leh Hnam tana Zirlai kaihhruai hna chu thawh tul a tih tak zawk avangin High School Teacher hna chu bansanin, Zirlai pawlah a in hmang ta zawk a ni.

June ni 19, 2020 a Mizoram atanga Rajya Sabha Member thlanna lo awm turah rorel lai MNF Party candidate atan ruat a ni a. Tling ngei tura ngaih a ni.
Read more »
Tweet Share Share Share Share Share

December 21, 2019
Zoliana Royte, kum 71 chuan vawiin chawhnu dar 3:50 khan chatuan ram min lo pansan ta. A va uiawm em!

Zoliana Royte kha kum 1971-a Synod High School-a Class X ka va zir khan zirtirtu zinga pakhat a lo ni a. Kei chu tlangval puitling uaih tawh ka ni a, zirtirtute chu ṭhian kawmin ka kawm hlawm a. Zoliana nen kan han inkawm chian chuan kum 1962-a Class VI pass ve ve kan ni a. Aizawl District-an Pahnihna ka ni a, Zoliana chu Palina a lo ni a. Kan inkawm ngeih phah lehzual ta a. Min hrem ve ngai lo a, hrem ngaiin ka awm ngai lo bawk.

Kum 1971-ah chuan MZP Hqrs-ah Assistant Secretary ah min thlang a; Zoliana chu Vice President niin ka hria. Kum 1972-ah General Secretary ka ni a; kum 1973-ah Zoliana kha President a ni ta awm e. President a nih lai chuan Khatla Traffic Point chhak lawkah hian in chhawngah MZP Office kan hawng a. Zingah office kal pahin MZP office chu ka tlawh ṭhin a, Zoliana te inah hian tukṭhuan ka ei ṭhin. A nau Zokhumi (w/o Revd Vanlalchhunga) hian rawng a bawl ṭhin a, sawh bawl a thiam fu! Zoliana te ina chaw ka ei aṭanga ka zir chhuah chu sangha ṭin hi kang tawh chuang loa ei a ni. Kan hawng a, kan ei mai; kan ṭhat leh aiin a rim a na lo zawk!

Kum 1974 February 15-a nupui ka neih pawh khan ka ṭhian 5 zingah a tel ve. Khatih lai khan ṭhian (best man) bakah ṭhian dang 5/6 vel kan nei ṭhin. Ka ṭhian atan Synod High School-a kan zirtirtu C. Hmingthanga ka hmang a. Ka ṭhian dangte chu - Prof. Siamkima, Zoliana Royte, H. Rosema, Vanlalnghaka (The Nghaka), P. Vanluia te an ni. Zoliana Royte leh P. Vanluia hi Sports Director aṭangin an pension ve ve a ni.


Zoliana hnen aṭanga thil dang pakhat ka zir a la awm. Kum 2005-a Mizo Bible Encyclopedia ka tih chhuah khan ṭhian ṭha tiin min hralhpui turin copy 10 a hnenah ka dah a. A ṭawngkam pakhat lek aṭang chuan chutianga lehkhabu hralh tura Upate hnena thawn chu a tih chi vak loh tih ka dawng a; chuta ṭang chuan ka sim hlen ta a, ka ti leh ngai ta lo. Kan thawnna kohhran tan khan a lo tih chi vak lo tih ka hriat phah a ni.

Zoliana Royte kha mi thothãng ṭha, ṭawng vat vat mai, a langchanga thu sawi mai ṭhin a ni kha a ngaihsanawmna tak a ni.

ATC-a ka thawh hnuah ani kha Sports Director a ni bawk a. Sports lam thil kan mamawh ka lam ṭhin. Pastor Conference kan thlen dawn pawhin an puanthuah kan hmansak bawk. A theih ang tawka mi ṭanpui ṭhin mi a ni. Veng kar a hla a, kan inkawm tam lem lo. Mahse ka ṭhian ṭha a ni. MZP-a kan thawh dun lai khan kan inkawp rem ṭha hle a ni. Ka aia naupang zawkin min lo kalsan ta mai chu ka ui hle. A nupui leh a tu leh fate Pathianin awmpui zel rawh se.
Read more »
Tweet Share Share Share Share Share

November 19, 2019
MIZORAM BOXING KUNGPUI DR. ZORAMMAWIA (59) KAN THEN TA - Vanneihthanga

MiZBA President Dr. Zorammawia (Dr. Maa) chuan lungphuchawl (Heart attack) vangin nizan/tukin zing dar 12:40 vel khan Aizawl Civil Hospital-ah min peih loh san ta.

Dr Maa hian fapa pahnih leh fanu pakhat a nei a, a fa u ber hian nupui nei tawhin fa 3 mipa 1 hmeiche 2 a nei. A tu leh fa te nen hian Zarkawt High Field bula an inpui sira a in leh loah an cheng a ni.

Dr. Zorammawia hian Regional Dental College, Guwahati atangin Dental Doctor a zir chhuak a, Aizawl Civil Hospital-ah reilote a thawh hnuin Lunglei lamah transfer a ni a, 1988-ah Aizawl Civil Hospital lamah sawn let leh a ni. Doctor hna a thawh lai mek hian King George Medical College, Lucknow-ah MDS (Maxilofacial Surgery) zir zawm lehin kum 2001 khan tha takin a zo leh a. Mizo zinga MDS zir chhuak hmasa ber a ni. Kum 2002 khan Senior Dental Surgeon-ah a kaisang a, Head of Department niin kum 2019 June thla khan Joint Director (Dental), Directorate of Hospital & Education-ah kaisangin a thih ni thlengin he hna hi a chelh a ni.

Dr Zorammawia hi Kohhran, Khawtlang leh NGO hrang hrangah mi tangkai a ni a, sawi vek sen a ni lovang Mizoram boxing hmasawnna atana thawh hlawk leh a ban pawimawh berte zinga mi a ni a, Kum 2006-2012 thleng MiZBA President a nih hnuah term khat midangin an han thlak ve zawk a, kum 2015 atanga vawiin thlengin President nihna hi a chelh chho leh ta a ni. Mi inngaitlawm leh hawihawm tak niin thu zaizap thiam, pawl kaihruaina kawnga mi tling leh rintlak a tling.

Dr Maa hi midangte tanpui peih mi a ni. LPS Samari mitha buaipuitute zingah ka tel ve avangte leh, MSR kaltlanga charity kan lo buaipui ve thin avangin mi chhumchhia damlo tanpui ngai buaipui zui ngai an awm fo thin a. Mirethei chanhai damdawi in awm mamawh, khum chan harsa tanpui kawngahte leh dam lohna thilah vawi duailo ka lo pun tawh thin a, Pu Maa hian phur takin a theihtawp a chhuah thin. Mi lian leh mite thliar hrang lova zangkhai, nelawm leh hawihhawm taka mitin dawr thin mi a ni. Pu Maa hi ka ui tih hian a sawifiah zo lo a ni. Heti ang mitha bik hi Chunglam pawh khian a mamawh a ni ngei ang!

Dr Zorammawia hian tunhmain lung lam natana insawiselna a neih ngai hriat a ni lova, thisen sang erawh a nei ve thin a, chu pawh chuan a ti buai em em lem lo. Nizan khan Durlang lama an leng hawng lam chu Zarkawt an thlenin a thaw a hahin thlanin a bual a, an in lam panna Zarkawt High Field kawng chho, kawng ana a clicnic-kawtah a car a ti ding a, a chhungte phone-in a dinhmun a hrilh a, rang takin Civil Hospital panpui nghal a ni. Aizawl Civil Hospital casualty an thlen hnu hian a rawn harh chho viau a, ICU lamah suan luh tuma an zawn laiin a vawihnih nan a rawn buai zual leh ta a, nizan/tukinzing dar 12:40 khan chatuan ram min lo pan san ta a ni. @Vanneihthanga Vanchhawng
Read more »
Tweet Share Share Share Share Share

May 23, 2019
ZOTHANTLUANGA CHANCHIN: Aizawl West – I assembly bial by-election a thlan tlin tak, rorellai MNF candidate Pu Zothantluanga (kum 65) hi Biakhnuni (L) leh Subedar Lalruata (L) te fa niin, an unau hi 10 an ni a. Kum 1986 khan Rothangkimi leh Upa Lalruata, Aizawl Chhinga Veng te fanu, Lalbiakmawii nen an innei a, fa 5 an nei.
Chanchin chanchin

Pu Valtea tia hriat lar zawk, Pu Zothantluanga hian Primary School hi Kawrtethawveng leh Mamit khuaah a kal a, Middle Sikul chu Dawrpui School-ah a kal a. High School hi Khawbungah leh KVM Shool-ah a kal. Union Christian College Barapani atangin PU (tunlaia pawl 12) a zova, St.Edmund’s College, Shillong atangin BA a zo a. MA (Sociology) hi NEHU, Shillong-ah a zo bawk a ni.

Zirlai a nih atanga ram leh hnam vei mi a ni a. Shillong-a lehkha a zir chhung zawngin Mizo Students Union (MSU), Shillong-ah Office Bearers dinhmun a chelh tluanchhuak vek a. MA a zir zawh hnuin ram leh hnam hmangaih vangin MNF zawmin tualchhungah MNF sipaite tan mi \angkai tak a ni thin. Underground Army, MNA-ah 2nd Lieutenant pek a ni. Tunah hian MNF General Headquarters-ah Adviser a ni.

Kohhran leh Khawtlanga mi inhmang tak a ni a. Zotlang venga Village Council leh Local Council-ah Chairman chanvo a lo chelh tawh a. YMA Branch president-ah term li a chelh bakah hun rei tak OB a ni. - AIR Aizawl
Read more »
Tweet Share Share Share Share Share

May 02, 2019

MIZO MIPA ZAITHIAM CHUAI THEI LO H. LALTHAKIMA CHANCHIN TAWI


-Vanlalruata Pautu

A aw mawi lutuk vanga Mizo te thinglung ti tuiral thin tu H.Lalthakima hi 24th February 1973, khan Pu.H Lalhmingliana leh Pi. Rohmingliani te fapa neihchhun ni turin a Zawlnuam khua ah alo piang. Naupang dang ang bawka lo seilian ve tho ni in , a naupan(g) lai atang hian rimawi hi a ngaina em em a, a theih ang tawk tawka mahni a inzir chho ve bek bekin tun hun hi alo thleng chho ta ani.

Pu H.Lalthakima hian a tlangval hun chhung hi tun hun ngaihtuah chuan a hmang reilo ve hle a, Kum 24 a nih Kum, 1997 ah Biakthansangi nen inneiin fa pahnih an nei a, tunah hian Aizawl-Chaltlang Lily vengah an khawsa mek a, Pu Thakima hian Home Department-(Police) lamah hna thawkin a nupui fanau te a enkawl mek bawk ani.

H.Lalthakima hian Album hi pariat dawn lai siam tawhin, a hla sak te reng reng hi mi duh loh a hleih pawh a awm mang lo hial.

Zo Rimawi ngaina mi,mitamtak te chuan tihian an lo sawi thin ''Zaithiam dang zai ka ngaihthlak hian ka phawklek vek zel a, H.Lalthakima zai ka ngaihthlak erawh chuan ka lung a leng vawng vawng thin.," tiin an lo sawi thin ani.

Hei hian a zaithiam zia leh mite lunglenna a kaihthoh chian thin zia a sawi chiang mai awm e. Thla bial(Full moon) zan vela laihkapui ngei maia tingtang nen "Thapui Nangnen" tih hla an han sak vang vang phei hi chuan lunglen a kaitho in a hla thu that zia leh a hla te alo ril zia a hrilhfiah chiang viau awm e...

Pu Thakima'n a hla sak te reng renghi naupang te te atanga pitar,putar thleng a hrelo kan awm pawh ka ring meuh lo, a hunlai khan a lar vet vet êm mai. A vanglai hre phalo leh hmu phalo pawhin a lar Zia ka sawi theia, hmu pha leh hre pha ni ta ila, a lar dan Zia kha hei ai pawh hian ka sawifiak thiam zawk awm e..

H.lalthakima hla te hi chumi khami Chu lar ber han tih tur pawh hrechang lo khawpin a hla te hi an nalh in a ril em em vek maia, a hla te hi larlo a lawi pawh a awm lo .

Zorimawi khawvela mikhual lo zet mai leh engtik niah mah a hming dai tawh ngailo tur Pu.H Lalthakima hian a zaithiam avang hian lawmman pawh thahnem tak alo hui khawm tawh bawk a,chung zinga langsar zual deuh te chu

Lelte award 2011, Best Male Vocalist, Rimawi Khawvel Best Male Love Song 2007, Lelte Award Best Album of the year 2007 te niin heng kan tarlan loh zingah pawh hian award dawn a nei nual tawh bawk ani.

H.Lalthakima hla ka ngainat) ngaihthlak nasat zual deuh te leh lar zual deuh nia ka hriat te chu.

1. 'Lawm Zel Tang Nge'
2. 'I Tan Ka Theih Tawk'
3. 'Mangtha Mai le'
4. 'Leng lengin'
5. 'Ngaihlai Makur'
6. 'Bawihte Lo Lungphang Suh'
7. 'Lenna Tlang Dang'
8. 'Tha Ainawni'
9. 'Zan Ngaihawm'
10. 'Kan hel lai D tleitiri 
11. 'Thapui Nangnen'
12. 'Thai'


13. 'Vulmawi'
14. 'Khawnge in awm'
15. Bawihmami'
16. 'Belh nin loh D'
17. 'Min tuarpui ve asin'
18. 'Ka lei rohlu'
19. 'I tiam dun ang'
20. 'Lungkham Di lenna'

Read more »
Tweet Share Share Share Share Share

March 30, 2019

PRISM PARTY MP(LS) OFFICIAL CANDIDATE TBC LALVENCHHUNGA CHANCHIN


TBC LALVENCHHUNGA CHANCHIN
TBC Lalvenchhunga hi Pu TBC Lalthangliana leh Pi Lalsawmi te fa pariat zînga naupang ber dawttu niin Kelkâng khua, Champhâi District-ah kum 1982, December ni 28-ah a piang a. Kum 1985 khân Kelkâng aṭangin tùna an chênna Champhâi Vêngthlang-ah hian an insawn a ni. Kum 2013, October ni 25 khân Lalremsiami d/o Hrangliana (L) Pàngzâwl nên Champhâi Vêngthlang Presbyterian Kohhranah inneiin, fa pahnih TBC Ramengmawia (4yrs) leh TBC Malsawmhlui (1.3yrs) an nei.

Zirna lam:
Champhâi-ah zirna bul ṭanin Class I - VIII thleng a zir a. Hemi hnu hian Govt. Higher Secondary School, Aizâwlah zirna chhunzawmin, heta ṭang hian Matric chu 1st Div-ah ṭha takin a zo. Matric a zawh hnu hian hna awm theite exam pein Mizoram aṭangin amah chauh Indian Navy (Artificer Apprentice)-ah a inziak tling nghâl a. Amaherawhchu, he hna hi zawm loin Mizoram Institute of Comprehensive Education (MICE)-ah Class XII Science a zir zawm ta zâwk a. Heta a zir lâi hian Indian Navy (Sailor) leh Indian Air Force (Airmen Technical)-ah inziak tling leh ve vein chhûngkaw khawsak dinhmun thlîrin zirna chhunzawm zêl tawh loin Indian Navy chu a zawm ta a.

Navy-a a ṭan chhûng hian IGNOU-ah BA (Public Administration) a zir a. A service chhûng hian Marine Technology Certificate Course te, Nuclear Biological Chemical Defence & Damage Control (Fire Fighting) Basic Course te, ISO 9001:2008 Internal Auditor te a zir chhuak bawk. 

Eizawnna:
Kum 2001, January-a Navy a zawm hian Odhisa (Orissa) hmuna INS Chilka-ah a training a. Visakhapatnam, Andra Pradesh-ah Sea Training INS Garial-ah a nei leh a. Hêng training-te hi a zawh hnuin a department chan tùr bîk atân special professional training INS Shivaji Lonavala, Maharastra hmuna Centre of Marine Engineering Techonogy (CMET)-ah Engineering Machanic (Internal Combustion Engine) chu ṭha takin a zo. He hmunah hian ‘Best All Rounder Training Award’ a dawng nghe nghe. 

INS TIR, Kochi, Kerela-ah post niin hetah hian 1st Class Engineering Machnic (Bel khat) a kâi a. Kum 5 zet a thawh hnuin kum 2006 khân INS MATANGA (Ocean Going Tug) Mumbai-ah a insawn. Heta a awm chhûng hian Leading Engineering Mechanic (bel hnih)-ah a kaisâng a.  Kum 2009, May thla khân Fleet Testing Tuning Team (FTTT) Mumbai-ah khawmualah sawn a ni a. Thla 6 chhûng khawmuala a awm hnuah Indo lawngah bawk INS SUVARNA (OPV) Karwar (Karnataka)-ah sawn leh niin hetah hian Petty Officer (Engineering Mechanic)-ah a kaisâng. 

A kaisàn hnu kum 2012-ah Indian Navy-a hmun pawimawh leh service record ṭhat ngaih êm êmna hmun HR Centre, Bureau of Sailors Mumbai-ah sawn leh a ni a. Mumbai-ah hian kum 3 awmin kum 2013-a India sawrkârin foreign embassy-a defence staff tur a thlan zînga Singapore Embassy-a awm tùra thlan chhuah leh a ni. Amaherawhchu, foreign-a posting hi kum 5 ṭan belh leh a ngaih dâwn avangin a kaisânna tùr nên chuan hnàwlin Mizoram politics luh chilh tùrin Mizorama rawn chhuah a thlang ta zâwk a ni. 

HR Centre, Bureau of Sailors hi a pawimawh êm avangin he hmun aṭanga pension hi phal a ni lo a. A hna bânsana Mizorama rawn chhuah a duh zâwk si avangin a service tâwp hi Naval Maritime Academy (NAMAC) Mumbai, Merchant Navy training petu-ah sawn chhuah niin kum 2016, January ni 31-ah a hna chu a rawn bànsan fel ta a.

Ram Fan:
Pu TBC Lalvenchhunga hi Mizo zîngah chuan ram fang zâu berte zînga mi a ni a. Khawvêl ram hrang hrang 17 – Malaysia, Thailand, Myanmar, Sri Lanka, Italy, Egypt, Australia, Dubai (UAE), Oman, Bahrain, Kuwait, Saudi Arabia, Indonesia, Kenya, Maldives, Seychelles leh Mauritius te a tlawh tawh. 

Internet khawvelah:
Internet khawvêlah TBC Lalvenchhunga hi a mikhual lo hle. Zofate zînga social media lama hmahruaitu tih ngam hîal khawp a ni. ‘Blog’ làr ṭan tirha mahni pûala mahni ngaih dân leh tawnhriat te ziaka internet khawvêla ‘blog’-a târ chhuak hmasatute zînga mi a ni a. Tùn thlenga hriat hlawh ‘misual.com’ kan tih kha a enkawltute zînga pakhat a ni. ‘VaiVa’ tih hminglem vuahin social network-ah Mizoram leh Khawvêl politics vir vêl dân te a lo ziak tawh ṭhin. Chakma chungchânga a ngaih dân te, Sawrkâr ṭha nei tùra a duhthusàm te ziakin, a bîkin political party-te dinhmun hrang hrang chîk takin a thlîr a, a ziak ṭhin a ni.

Khawtlâng Lam:
Mizorama a rawn chuan chhuah hnu hian theih ang angin khawtlângah a inhmang a.  Champhâi District NGO Co-Ordination Committee-ah te, Champhâi Ṭhalâi Pâwl-ah te dinhmun pawimawh tak tak chelhin, Champhai Nature Conservancy dintute zînga mi a ni bawk. YMA Champhai Vêngthlang Branch-ah executive member ni mêkin, committee pêng hrang hrangah a tel a. Kum 2018 khân Vêngthlang Branch YMA hnuaia Education & Human Resources Development Committee buatsaihin ‘EDU FEST’ chu hlawhtling takin Champhai leh a chhehvêl khuate tân an lo buatsaih tawh nghe nghe.

Politics:
India sawrkâr tâna a thawh lai aṭang tawha ram vei mi a ni a. Rorèlna dik leh ṭha duhtu, mi inzir peih leh taima tak a ni. A bîk takin Zofate hnam anga din chhuahna tùr leh insuihkhâwm theihna duhtu a ni a. Hetiang mi hi a nih avang hian India tâna a hnathawh bànsana Zofate tâna a suangtuahna tihlawhtling tùrin politics a luh chilh a. PRISM Party zawmin Champhâi District Headquarters President a ni a. Kum 2018 MLA inthlanah khân Champhâi North bialah a lo ding tawh a ni.  

“Zofate dikna chanvo humhim tùr chûan kan lo kal sual a nih pawhin kei chuan pawi ka ti lo. Tawrh a ṭul leh kan tùar mai a ni ang chu.”

 -TBC Lalvenchhunga, 
On Right to Secession Bill & CAB @ Zonet Interview

A symbol chu LUNGHLU a ni a. EVM-ah a chung lam aṭanga chhiara 3-na a ni.
Read more »
Tweet Share Share Share Share Share

March 18, 2019

MP(LS) MIPUI CANDIDATE LALNGHINGLOVA HMAR (Tetea) HI TUNGE A NIH CHIAH ?


Pian Ni: October 9, 1977
Address: Aizawl Venglai, Aizawl, Mizoram
Pa: H Lalchhuanliana, MPS (Rtd)
Nu: Biakthuami
Nupui Hming: Lalsangzeli
Fate: 
1.Zosangi Hmar (Kum 6) 
2.Zochhuani Hmar (Kum 4)


LALNGHINGLOVA HMARUnaute:

1.Rev Lalrokhuma Hmar, Aizawl Theological College, Durtlang Leitan
2.Dr Lalawmpuia Hmar, USA
3. Lalhlimpuii Hmar, Aizawl Venglai

Zirna:

St Paul's High School-ah pawl 10 a zo a, Pachhunga University College-ah PUC (Pawl 12) a zo leh a, St Edmund's College, Shillong-ah BA zoin NEHU hnuaiah Master of Arts (History) a zo leh a, National Eligibility Test (NET) certificate a nei bawk.

Eizawnna:

College ah Guest Lecturer-in kum hnih a thawk tawh. Kum 2001 atangin Vanglaini bakah Kristiante kar tin chanchinbu chhuak Revival Evangelical Weekly Joint Editor a ni a, tun thlengin Vanglaini Joint Editor a la ni.

Nihna chelh mek:

1. Honorary Secretary – Mizoram Football Association

2. Executive Committee Member, All India Football Federation

3. Deputy Chairman, League Committee, AIFF

4. Joint Secretary, Mizoram Olympic Association

5. Member, Confederation of Indian Industry (CII) National Committee on Sports.

Hnuhma thenkhat:

1.MA a zirlaiin All Mizo Post Graduate Student's Union (AMPGSU) President a ni thin.

2. Journalism lama a hnathawh avangin pawl hrang hrangin chawimawina an hlan tawh.

3. Mizoram mai ni lo national, international thlengin hmun tam takah media seminar, workshop, conference-ah a lo tel fo tawh a, hmun thenkhatah chuan resourse person a ni.

4. Kum 2010 khan khawvel ram hrang hrang 24 atanga thalai pakhat theuh thlan khawmah telin India ram aiawhin Young Leaders Visitors Programme, USA-ah a kal a, hei hi US sorkar buatsaih a ni.

5. Mizoram Football Association-ah kum 2011 khan Honorary Secretary tura thlan tlin a ni a, 'Mizoram Premier League' bul tumtu zinga mi a ni.

6. Kum 2012 khan India rama a hmasa ber ni turin FIFA hnuaiah Grassroots Football Project chu Mizoram ah bul tan a ni a, a bul tumtu pawimawh a ni.

7. Kum 2012 khan a hmalaknain German Football Confederation atangin German Football Coach pahnihte Mizoramah lo kalin a thlawnin Mizo football coach-te training an pe a, senso zawng zawng hi German Consul General office lamin an tum vek a ni.

8. German football club Hoffenheim chu kum 2014 khan Aizawlah an lo kal a, an lo kal theihna tura a bul tumtu a ni.

9. Kum 2016-a German Student National Football Team chah chhuahna kawnga a sulsutu a ni.

10. Mizo footballer thahnem takin India rama eizawnna tha tak an neih theihna tura a bul tantu leh a tha thawhtu pawimawh a ni.

11. Kum 2014 khan football business summit lian Soccerex, Manchester, UK-ah a tel.

12. School, college, kohhran leh youth club leh pawl hrang hrang thiltihah sports, career awareness, drug awareness chungchangte sawi tura koh leh sawm hlawh tak a ni.

13. Central YMA Sports Sub Committee-ah term hnih chhung member a ni.

14. Mizorama HIV/AIDS darh zau zel tur hi veiin a thusawinaah hengte hi a tlangaupui thin a; Mizo thalaite'n lehkhazirna piah lama eizawnna an neih theihna tura fuihtu a ni a, entreprenuership lama midangte kawng kawhhmuh tura fuihtu a ni.

15. Zai inelna Mizo Idol bul tantu zinga mi a ni a, a hun hmasa lama (2007, 2009, 2011) a khaipa a ni. Mizoram Music Festival bul tantu zinga pakhat a ni bawk.

Kohhran lam:

1. Presbyterian Kohhran mi niin Aizawl Venglai Kohhranah thuhriltu (Pathianni chhun leh zan) a ni a, Puitling Sunday School zirtirtu a ni.

2. Shillong-a lehkha zirlai atang tawhin naupang leh puitling sunday school-ah a zawnin kum 20 zirtirtu a ni mek.

3. Shillong Branch KTP, Shillong Bial KTP, Aizawl Venglai Branch KTP leh Electric Pastor Bial KTP-ah office bearer leh committee member niin kum 1998-2016 thlengin hruaitu a ni.

4. Kohhran hrang hrang - Presbyterian, Baptist Church of Mizoram, Roman Catholic, Salvation Army, Seventhday Adventist, LIKBK etc lama thalai pawlah thusawi turin vawi eng emawzat sawm a ni tawh a, kuminah pawh kum tluan deuhthawin sawmna a dawng chho mek.

5. Tleirawlte a vei a, Mizoram hmun hrang hrangah kohhran hrang hrangin tleirawlte puala hun hmang turin an sawm thin.
Read more »
Tweet Share Share Share Share Share

March 16, 2019

LOK SABHA MP ELECTION-A MNF PARTY OFFICIAL CANDIDATE PU C. LALROSANGA CHANCHIN TLANGPUI


C. LALROSANGA CHANCHIN (Biography)Pu C.Lalrosanga hi kum 1957 March ni 1 khan a lo piang a. Tunah hian Tuikual North, Aizawl-ah an khawsa mek.

ZIRNA LAM:-

Pachhunga University College-ah B.A History(Hons.) a zirlaiin Sawrkarah a lùt a. Sawrkar a a luh hnuin a hnuai a mite hi a zir zo leh a ni:

i). Management Course, Administrative Staff College of India, Hyderabad.

ii). Orientation Course (6 months), Indian Institute of Mass Communication, New Delhi.

iii). Radio Management Course, Deutsche Welle, Cologne, Germany.

iv). Staff Training Institute of All India Radio, New Delhi.

DESIGNATION:-

Director General, Doordarshan, New Delhi kum 2015 atanga a pension thlengin a thawk a. Kum 2010-15 chhungin Deputy Director General leh Additional Director General, All India Radio & Doordarshan(for North Eastern Region) a chelh a, kum 2005-2010 ah Director, Doordarshan Kendra, Aizawl a ni bawk.

C LALROSANGA CHANCHIN TLANGPUI:-

Kum 1975-ah All India Radio, Aizawl-ah News Reader hna a thawk tan a. Hemi hnu hian UPSC kaltlangin Indian Information Service, kum 1982 khan a zawm a, kum 1991-ah UPSC kaltlang vekin Indian Broadcasting Programme Service, a zawm leh a. He Service a thawh chhunga chanvo hrang hrang a chelhte chu;

1). News Editor, All India Radio, Aizawl

2). Director, North Eastern Service, All India Radio, Shillong

3). Station Director, All India Radio, Shillong

4). Station Director, All India Radio, Aizawl

5). Joint Secretary, Gov't of Mizoram

6). Director, Dte., AIR, New Delhi

7). Director, Doordarshan Kendra, Aizawl

8). i/c DDG, NER-II, AIR
9). ADG, NER, AIR & Doordarshan, Aizawl

AWARD DAWN LANGSAR THENKHATTE:

1). INBUSH Award for Excellence in Media, Amity University, New Delhi

2). Best Actor Award, 1975, NEHU, Shillong

KHAWTLANG LEH KOHHRAN A RAWNGBAWLNA THENKHATTE:

1). Chairman, Wake-Up Mizoram Ministry, Aizawl

2). Chawlhni Zan Thuhriltu, Presbyterian Kohhran, Tuikual North, Aizawl

3). Adviser, Set Free Ministry, India

4). Founder Speaker, Prayer for Myanmar

5). Adviser, Orissa for Christ(Love India Mission)

6). President(2000-04), Mizo Zaimi Inzawmkhawm(MZI), General Headquarter, Aizawl

7). Director, Redemption Theatricals(Mizo Hamlet Drama)
Read more »
Tweet Share Share Share Share Share

March 15, 2019
Pian Ni : October 9, 1977 
Address : Aizawl Venglai, Aizawl, Mizoram 
Pa : H Lalchhuanliana, MPS (Rtd) 
Nu : Biakthuami 
Nupui Hming : Lalsangzeli 
Fate : Zosangi Hmar (Kum 6), Zochhuani Hmar (Kum 4) 
Unaute : Rev Lalrokhuma Hmar, Aizawl Theological College, Durtlang Leitan; Dr Lalawmpuia Hmar, USA; Lalhlimpuii Hmar, Aizawl Venglai

CHANCHIN TAWI

ZIRNA St Paul’s High School-ah pawl 10 a zo a, Pachhunga University College-ah PUC (Pawl 12) a zo leh a, St Edmund’s College, Shillong-ah BA zoin NEHU hnuaiah Master of Arts (History) a zo leh a, National Eligibility Test (NET) certificate a nei bawk.

EIZAWNNA College ah guest lecturer-in kum hnih a thawk tawh. Kum 2001 atangin Vanglaini bakah Kristiante kar tin chanchinbu chhuak Revival Evangelical Weekly Joint Editor a ni a, tun thlengin Vanglaini Joint Editor a la ni.

NIHNA CHELH MEK 
1. Honorary Secretary – Mizoram Football Association 
2. Executive Committee Member, All India Football Federation 
3. Deputy Chairman, League Committee, AIFF 
4. Joint Secretary, Mizoram Olympic Association 
5. Member, Confederation of Indian Industry (CII) National Committee on Sports.

HNUHMA ṬHENKHAT 

1. MA a zirlaiin All Mizo Post Graduate Student’s Union (AMPGSU) President a ni ṭhin. 
2. Journalism lama a hnathawh avangin pawl hrang hrangin chawimawina an hlan tawh. 
3. Mizoram mai ni lo national, international thlengin hmun tam takah media seminar, workshop, conference-ah a lo tel fo tawh a, hmun ṭhenkhatah chuan resourse person a ni. 
4. Kum 2010 khan khawvel ram hrang hrang 24 aṭanga ṭhalai pakhat theuh thlan khawmah telin India ram aiawhin Young Leaders Visitors Programme, USAah a kal a, hei hi US sorkar buatsaih a ni. 
5. Mizoram Football Association-ah kum 2011 khan Honorary Secretary tura thlan tlin a ni a, ‘Mizoram Premier League’ bul tumtu zinga mi a ni. 
6. Kum 2012 khan India rama a hmasa ber ni turin FIFA hnuaiah Grassroots Football Project chu Mizoram ah bul ṭan a ni a, a bul tumtu pawimawh a ni. 
7. Kum 2012 khan a hmalaknain German Football Confederation aṭangin German Football Coach pahnihte Mizoramah lo kalin a thlawnin Mizo football coach-te training an pe a, senso zawng zawng hi German Consul General office lamin an tum vek a ni. 
8. German football club Hoffenheim chu kum 2014 khan Aizawlah an lo kal a, an lo kal theihna tura a bul tumtu a ni. 
9. Kum 2016-a German Student National Football Team chah chhuahna kawnga a sulsutu a ni. 10. Mizo footballer ṭhahnem takin India rama eizawnna tha tak an neih theihna tura a bul ṭantu leh a ṭha thawhtu pawimawh a ni. 
11. Kum 2014 khan football business summit lian Soccerex, Manchester, UK-ah a tel. 12. School, college, kohhran leh youth club leh pawl hrang hrang thiltihah sports, career awareness, drug awareness chungchangte sawi tura koh leh sawm hlawh tak a ni. 
13. Central YMA Sports Sub Committee-ah term hnih chhung member a ni. 
14. Mizorama HIV/AIDS darh zau zel tur hi veiin a thusawinaah hengte hi a tlangaupui ṭhin a; Mizo thalaite’n lehkhazirna piah lama eizawnna an neih theihna tura fuihtu a ni a, entreprenuership lama midangte kawng kawhhmuh tura fuihtu a ni. 
15. Zai inelna Mizo Idol bul ṭantu zinga mi a ni a, a hun hmasa lama (2007, 2009, 2011) a khaipa a ni. Mizoram Music Festival bul tantu zinga pakhat a ni bawk.

KOHHRAN LAM 

1. Presbyterian Kohhran mi niin Aizawl Venglai Kohhranah thuhriltu (Pathianni chhun leh zan) a ni a, Puitling Sunday School zirtirtu a ni. 
2. Shillong-a lehkha zirlai aṭang tawhin naupang leh puitling sunday school-ah a zawnin kum 20 zirtirtu a ni mek. 
3. Shillong Branch KṬP, Shillong Bial KṬP, Aizawl Venglai Branch KṬP leh Electric Pastor Bial KṬP-ah office bearer leh committee member niin kum 1998- 2016 thlengin hruaitu a ni. 
4. Kohhran hrang hrang - Presbyterian, Baptist Church of Mizoram, Roman Catholic, Salvation Army, Seventhday Adventist, LIKBK etc lama thalai pawlah thusawi turin vawi eng emawzat sawm a ni tawh a, kuminah pawh kum tluan deuhthawin sawmna a dawng chho mek. 
5. Tleirawlte a vei a, Mizoram hmun hrang hrangah kohhran hrang hrangin tleirawlte puala hun hmang turin an sawm thin.
Read more »
Subscribe to: Posts (Atom)

Contact Form

Name

Email *

Message *

TOM © 2025. All Rights Reserved.
Published by Songate G

Ads Section

Powered by Blogger.