Zoliana Royte, kum 71 chuan vawiin chawhnu dar 3:50 khan chatuan ram min lo pansan ta. A va uiawm em!

Zoliana Royte kha kum 1971-a Synod High School-a Class X ka va zir khan zirtirtu zinga pakhat a lo ni a. Kei chu tlangval puitling uaih tawh ka ni a, zirtirtute chu ṭhian kawmin ka kawm hlawm a. Zoliana nen kan han inkawm chian chuan kum 1962-a Class VI pass ve ve kan ni a. Aizawl District-an Pahnihna ka ni a, Zoliana chu Palina a lo ni a. Kan inkawm ngeih phah lehzual ta a. Min hrem ve ngai lo a, hrem ngaiin ka awm ngai lo bawk.

Kum 1971-ah chuan MZP Hqrs-ah Assistant Secretary ah min thlang a; Zoliana chu Vice President niin ka hria. Kum 1972-ah General Secretary ka ni a; kum 1973-ah Zoliana kha President a ni ta awm e. President a nih lai chuan Khatla Traffic Point chhak lawkah hian in chhawngah MZP Office kan hawng a. Zingah office kal pahin MZP office chu ka tlawh ṭhin a, Zoliana te inah hian tukṭhuan ka ei ṭhin. A nau Zokhumi (w/o Revd Vanlalchhunga) hian rawng a bawl ṭhin a, sawh bawl a thiam fu! Zoliana te ina chaw ka ei aṭanga ka zir chhuah chu sangha ṭin hi kang tawh chuang loa ei a ni. Kan hawng a, kan ei mai; kan ṭhat leh aiin a rim a na lo zawk!

Kum 1974 February 15-a nupui ka neih pawh khan ka ṭhian 5 zingah a tel ve. Khatih lai khan ṭhian (best man) bakah ṭhian dang 5/6 vel kan nei ṭhin. Ka ṭhian atan Synod High School-a kan zirtirtu C. Hmingthanga ka hmang a. Ka ṭhian dangte chu - Prof. Siamkima, Zoliana Royte, H. Rosema, Vanlalnghaka (The Nghaka), P. Vanluia te an ni. Zoliana Royte leh P. Vanluia hi Sports Director aṭangin an pension ve ve a ni.


Zoliana hnen aṭanga thil dang pakhat ka zir a la awm. Kum 2005-a Mizo Bible Encyclopedia ka tih chhuah khan ṭhian ṭha tiin min hralhpui turin copy 10 a hnenah ka dah a. A ṭawngkam pakhat lek aṭang chuan chutianga lehkhabu hralh tura Upate hnena thawn chu a tih chi vak loh tih ka dawng a; chuta ṭang chuan ka sim hlen ta a, ka ti leh ngai ta lo. Kan thawnna kohhran tan khan a lo tih chi vak lo tih ka hriat phah a ni.

Zoliana Royte kha mi thothãng ṭha, ṭawng vat vat mai, a langchanga thu sawi mai ṭhin a ni kha a ngaihsanawmna tak a ni.

ATC-a ka thawh hnuah ani kha Sports Director a ni bawk a. Sports lam thil kan mamawh ka lam ṭhin. Pastor Conference kan thlen dawn pawhin an puanthuah kan hmansak bawk. A theih ang tawka mi ṭanpui ṭhin mi a ni. Veng kar a hla a, kan inkawm tam lem lo. Mahse ka ṭhian ṭha a ni. MZP-a kan thawh dun lai khan kan inkawp rem ṭha hle a ni. Ka aia naupang zawkin min lo kalsan ta mai chu ka ui hle. A nupui leh a tu leh fate Pathianin awmpui zel rawh se.

Post a comment

Powered by Blogger.