US Ambassador to China in bán a tum a. Engvanga ban tum ta mai nge a ni, tih kan sawizau dawn a ni.

Khawvela ram ropui ber America chanchin kan ngaithla fo a. A rama chéngte ang bawkin thilthleng engkim kan lo hre thei ve zel a. Tun tumah pawh hian chanchin ngaihnawm tak a awm leh ta a. Chu chu United States ambassador, China rama awm mek Terry Branstad a hna atanga a bán tur thu hi a ni. 

US-China relations chhiat zia chu sawi nawn ngai lovin kan hre vek a. China rama ambassador awm te hi, tu ram ambassador pawh ni se, mi namai lo tak an ni vek a. Ambassador zinga a thiam filawr ber ber te vek an ni.

Han sawi zau ta zel ila, ndia pawh hian ambassador Vikram Misri, Indian Foreign Service chhuanawm tak a dah ve mek a. Vikram Misri hian Indian Prime Minister 3 ngawt heng- IK Gujral, Dr. Manmohan Singh, leh Narendra Modi hnuaiah Private Secretary hna a lo chelh tawh a, President hlui Pranab Mukherjee hun lai pawh khan External Affairs ah Director hna a lo thawk tawh bawk a, Indian embassy Islamabad, Washington DC,  ah te pawh a lo awm tawh a ni. Kan han sawi kher na chhan chu, United States pawh hian ambassador a dah hi a duai lo khawp a. Chuti ni si, engvanga US-China relations chhiat vanglai taka bang turah Trump Admin in nawr ta mai nge a ni? Tih chu zawhna lian tak a ni. 

US Ambassador to China Terry Branstad hian kum 73 na a hmang mek a. He hna hi la thawk zel tur pawh nih se, hun a ngah tawh lo. Kum 2017 khan Donald Trump chuan he hna thawk tur hian a ruat a ni. Donald Trump in a duh zawng tak, a foreign policy tuipuitu, ama thlan ngei ni si hi, engvanga báng tura  nawr leh ta tlut tlut nge ni? Trump duh loh zawngin China a lo dáwr thin reng em ni? Nge Terry hi Trump a chungah a lung ni lo? 
Kum 3 zet US China trade war an kalpui hnuin, thla thar hian Terry Branstad chu a báng dawn ta a ni. Kar liamta khan President Donald Trump nen phone a inbia in, a thutlulkna hi Trump a hrilh ta. US Embassy chuan Terry chawl tur hi a puang tawh a, mahse a chawlh chhan hi engmah sawi lan a ni lo. 

Terry Branstad hian US Embassy, China a thawktute hnenah China nena Trade deal, tiang taka an kalpui thei chu lawmawm a tih thu a hrilh. US Secretary of State Mike Pompeo chuan twitter lamah Terry Branstad chunga a hnathawh ropui tak vanga fakin, lawmthu a hrilh a. He ta tang hian Terry bán tur hi a lo thangchhuak ta a. Pompeo chuan, ambassador Branstad hian US-China insumdawn tawnna chuan rah thra a chhuah theih nan a bei a, a chungah kan lawm a ni, a ti. 

China lam chu engmah ambassador inthlàk tur chungchangah hian hriattirna an la hmu lova, dan ang thlapa hriattirna an hmuh hunah Terry chawlh chhan hi an rawn tuihni ve ngei ang. 

Trump in Fake News tia a lo sawi fo tawh CNN chuan Terry Branstad ban chhan hi an rawn puang ve nghal a. A dik ngei a rinawm. Terry Branstad hian term khat bak ambassador hna hi chelh a tum lo thu a lo sawi tawh a. A tum dan chuan Trump a tling leh pawh ni se, November election zawh hian chawl a tum hrim hrim a. Thla 2 chauh a awm ta, a chawl leh ta si hi, CNN chuan Trump Campaign pui turin Donald Trump hian a koh haw dawn niin a tarlang. 

Iowa Governor lo ni tawh Terry hian election hmasa pawh khan a thawh hlawk hle a, tun tumah pawh hian Trump chuan a puihna a mamawh a ni mahna. Terry Branstad hi Chinese president Xi Jinping nen kum 1980 daih thawh khan an lo inhre tawh a, thian tha tak an nih thu hi CNN chuan a ziak a. Mahse, Terry hian a mimal thil chu dah tha in, China chu US nen Trade War ah a nawrlut a. Jinping nena an in thian thatna hi a mimal hlawkna turin a hmang duh hauh lova, rinawm takin President Trump duh dan America First tiin kum 3 chhung zet hna a thawk a ni. Jeo Biden te pafa ang loh takin, sum leh pai a ûm ve lo. 
Terry Branstad a fapa Eric Branstad hi Trump Campaign team 2020 ah hian Senior Adviser a ni ve mek a. Trump chuan Iowa Republican senator Joni Ernst chu bia in, Eric a pa a lo haw dawn, campaign a duh vangin tiin a hril a. He an inbiakna hi Joni hian twitter lamah a puangchhuak nghe nghe a ni. 

Terry hian US politics ah tawnhriat a ngah khawp mai a. A bik takin Iowa, Wisconsin, Missouri leh Minnesota ah teh a tla na hle mai a, mipui rilru sûkthlek a hria a, Trump 2020 campaign ah nasa takin a tangkai dawn niin an hria a ni. 

Terry lo Governor tawh na Iowa ah hian kum 2016 khan Trump hi 10% in Hillary Clinton aiin a chak a. Tunah chuan Democratic lam an che tha mah zawk tawh a, helai bialah hian Trump leh Biden hi chak zawk tur sawi a har viau mai a. Republican lam hi an thlapháng deuh nge, Terry hi an chah chhuak dawn ta hial a ni. Trump an Terry hi China ambassador atana a ruat tir khan China chu a lawm viau mai a. Kha tih laia Chinese Foreign Ministry thupuangtu Lu Kang chuan China thian hlui tiin, an lo welcome hle. 

Mahse, Terry hi pa nép leh eiru duh mi a ni lo hrim hrim a. China lawm zawngin a khawsa ta tlat lo. A ngaihdan, China sawrkar hmalakna kalh  tak tak chu ziakin China Communist Party chanchinbuah chhuah turin a pe fo mai a. Tunhnai September ni 9 pawh khan People's Daily, China communist party chanchinbua chhuah tur hi a pe leh a, mahse an hnáwl sak leh a ni. Hemi chungchangah hian Mike Pompeo chuan China chu, ram nghet leh puitlin tak i nih chuan, ambassador te tawngkam i ngaithla ve tur a ni. Kan palaite hi Chinese mipui te hriatah an tawngchhuah ve a ngai, tiin China chu a khak ve bawk. 

Obama president laia National Security Council Asia director Evan Medeiros chuan, Terry Branstad hian US-China relations ah engmah a ti ve hleih nem, a hmaa ambassador te angin Trump in thuneina a pe lo hrim hrim. Mike Pompeo hian engkim a thunun zawk a ni, tiin Terry chungchang a sawi. A awmzia chu Democrats lam hian Terry lo haw tur hi, Iowa leh state thenkhatah an boruak a tichhe thei dawn niin an ngai a ni deuh ber. @TimesofMizoram

A KAMKEUNA:

Mihring taksaa natna   hrik kai tur lo venga lo dolettu hi immune system tih a ni a; chungte chu: Thisenvar (white blood cells),  antibodies, lymphatic system, La (spleen), Thymus, leh thling (bone marrow)- te niin hengho hi natna laka min chhanhimtu bulpui bera ngaihte chu an ni. Hengho hi tih chak that reng an nih loh chuan mihringte hian eng natna pawh kan kai hmain kan vei awlsam ēm êm thin. 

Tuna khawvel puma hripui leng mek chinawm tak pawh hi immune system thuam chak tha lo apiangin an kai awl ēm ēm a; chuvangin, hripui laka kan lo him tlan zawk nan immune chihrang hrang thuam chak dan i lo tarlang teh ang.

IMMUNE THUAM CHAK DAN: 
1. Vitamin
Natna dotu immune thuam chak nan hian vitamin 'C' B6; 'E' -te hi a tha hle. Vitamin 'C' tlak chham hian khawsik a thlen awlsam hle a, chuvangin, vitamin 'C' ei thin a tha a, vitamin 'C' ei kher lo pawhin thei thûr leh thei  lam chi ei tam hi immune thuam chakna a ni. 

Vitamin B6 hi natna dotu thuam chak nan a pawimawh  hle. Chuvangin, vitamin B6 tamna tomatto, arsa, bekang, sangha, balhla kawlbahra, bawngsa & satisen, tofu, theihai, lakhuihthei, alu, butter theite ei tam a pawimawh.

Vitamin 'E'  hi antioxidant tha tak a ni a; vitamin 'E' hian natna dotu a pui tha hle chuvangin, viamin 'E' tamna nihawi chi, spinach, peanut, theite, butter thei, brocoli leh lui lam sate ei tam a tha.
NATNA DOTU
2. Insawizawi
Nitin zing leh tlaia hah lutuk lova insawizawi fo hi natna dotu thuam chakna hmanraw pawimawh tak a ni. Nitin kawla ni chhuak chhiara kut hnathawk thinte tan a hranpaa insawizawi chiam a ngai ve lo. Hnathawh tur nei lo, awm mai mai tan leh hna hahdam thawk, pisa kai thinte erawh insawizawi ngei ngei thin tur. Insawizawi dan chu mahni tuina zawng martial arts, boxing, hruizuan, thisakawr khalh, ritchawi, tlan, kea kal, yoga, hrui zuan, lungden, football leh games chihrang hrang tam tak a awm.

3. Ashwaganda
Ayurvedic damdawi chikhat hmasang ata  tun thlenga  hman tangkai ber pawl chu ashwaganda hi a ni. Mizotawngin a hming kan nei lo, hnimbuk chikhat hniam te, parmawi tak leh a rah pawh itawm tak leh tuitak a ni. Saiêkhlo kan tih nen hian a hnah leh a awm dan chu a inang hle. Natna dotu thuam chak nan a tha hle a, a zung hi an hmang nasa hle thin. Chuvangin, ashwaganda ei fo hi covid-19 laka invenna chikhat a ni thei.

4. Triphala
Hei hi thei/thing chi thum chawhpawlh atanga siam a ni. Mizovin a hming kan nei lem lo. Hindi-in thil chi thum atanga siam a nih avangin tin(pathum)+phal(thei)=triphala tiin a hming an vuah mizotawng chuan thei chi thum chawhpawlh tihna a ni. Chungte chu thingvãndãwt, rērãw & sunhlu chawhpawlhte a ni a, ei nawm deuh nan vaiho chuan khawizuin an chawk diak thin. Bilkhawthlirah khuan Mizo damdawi siam thin Dr. R. Vanlalkunga'n a mum tablet-in a siam ve thin tlat. A fakawm khawp mai! Vai company erawh chuan a diakin hlirin an siam thung. He damdawi hi natna dotu thuam chak nan a tha hle a; ei fo a tha.

5. Neem
Nim hi saisiak ang bawka ramhmul damdawi tha tak, natna hrik bacteria thattu  atana hman tangkai a ni. Nim hi khawsik, Pum nuam lo, Thawhah, sikserh. Rulhut.Vun natna, lungna, Thisensang, zunthlum, pem, hliam, tai natna leh natma chihrang hrang enkawl nan a tha hle. Chuvangin, nim sawhsawm tui emaw, a chhumna tui in, emaw, a hnah hel thial thinte hi natna dotu thuam chak nan a tha hle.
 
6. Thingbehlawi
Thingbehlawi (moringa) hi chaw tha pawimawh tak a ni. Natna dotu thuam chak nan a tha hle a, vitamin "c' aiin a let 7 laiin a tha zawka ngaih a ni. Thingbehlawiah hian potassium, iron, calcium & amino acids a awm tha hle a, cells a siam tha hle bawk. Thisen hniam leh Hb hniam lutuk avanga chauhna a awm changin rang taka siamtha lehtu atan a tangkai hle. A hel emaw herbal comany siamsa capsule ei fo hi natna dotu thuam chakna tha tak a ni.

7. Tulsi (Basil)
Hei pawh Mizotawngin a hming hranpa kan nei lēm lo. Nim ang bawkin tulsi hi antibacteria tha tak a ni. Natna hrik thattu (germicide)tha tak niin phytochemicals & antioxidants, tha tak a ni bawk. Khawsik, hritlang, khuh, awmna, bengna leh natna chihrang hrang enkawl nan a tha hle. Chuvangin, nitin tuisik rialno khatah far 2-3 lek leka in thin hi natna dotu thuam chak nan a tha hle. A hnah hel thial thin pawh a tha hle.

8. Sawhthing
Sawhthing hi antibiotic tha tak beng nã, ãwm nã, khuh, leh thãwk harsat, vung, vun thak, bawl, enkawlna leh tūr thahna tha tak a ni a, luak chhuak tihreh nan te, pum nuam lo tihdam nan te, pumpui pãn hrik nei thah nante leh thana enkawl nante a tha hle a, antioxidant tha tak a ni bawk. A dip, a hriak (oil) leh a mum, a tui emaw, a hela ei thin a tha hle. Natna dotu thuam chakna tha ber pawla ngaih a ni.

9. Purunvãr
Sawhthing ang bawkin purunvãr hian natna hrik tê tak tê tê a tihlum thei a, thisen silfaitu tha tak a ni bawk. BP sang leh hniamah te, zunthlum leh hrawk nã, hritlãng khuh leh ãwm nã damdawi atan bakah pumpui pãn enkawl nan te, lung tha lo tan leh pum puar nuam lo leh thisen khal enkawl nan leh thisen siamtu atan a tha hle a, natna dotu thuam chaktu atana hman tangkai ber a tling. Zingtin chaw ei hmaa mal khat lek thial thin te, a tui, a dip, rãwt, kan leh chhum eite a tha hle.

10. Ãieng
Ãieng hi natna hrik thattu, tūr thattu  phytochemical tha tak a ni. Bãwnghnute nena ei hi thawhah asthma vei tan ei a tha hle. A tui in hi zunthlum tan te, pumna tan te, chau tih reh nan te leh lung tha lo tan te, na chhãwk nan leh cancer vengtu atan te, depression, ruh chakna, vun enkawl nante a tha hle a, a hel, a dip, a tui, a mumtea ei thin hi natna dotu thuam chak nan a tha hle.

A TLÃNGKAWMNA
Tunlai politic party-te inmawhpuhna tawngkam han hawh zuai ila. Local/village council inthlan Result chhuak chhunzawm zelah inthlan buaipuitu leh thawktute mi engmaw zatin hripui an kãi darh tan mêk chu a ni ta ber  a. Inenkawlna hmanrua leh damdawi leh thawktu thlengin kan la indaih lovin kan la pachbe si a, engtiang takin nge kan la inkaidarh dawn tih lah Pa chauh lo chuan tuman engmah kan hre si lo.
Covid-19 laka invênna tha ber chu natna dotu (immune system) thuam chak a ni tih medical science atang leh scientist tam takte leh WHO atangin kan hre tlãng theuh a, inenkawlna senso hau tak tak pumpelh nan leh hripui laka kan him tlãn zawk nan achunga immune system  thuam chak nana mitinin kan tih theih kan han tarlan takte khi ngun taka chhiara a taka  zãwm theuh tumin tan la ila, he hripui nunrãwng tak hi pumpelh theuh tum ila a lãwmawm ngawt ang.

-Dr. C. Lalrampana

Chanchin hmasa lamah khan India leh Japan Military Pact chungchang leh, hrisel lohna vanga Japanese Prime Minister Shinzo Abe chawl tur thu kha kan sawi thuak tawh a. 

India leh Japan inlaichînna siamthatu chu Shinzo Abe hi niin, politics a chawlhsan hnu hian, India-Japan relations hi engtin nge a kal zel dawn ni. Prime Minister dang Japan in a nei hunah, China lam a hawi mai lovang maw, Shinzo Abe a chawl tawh chuan Japan hi International Politics ah a hnungtawlh phah ang em? Tih te kan sawizau dawn a ni. 

Thenkhatin News Source hi an beisei thin a. Kan kalphung hi News ang diak diaka ziah a ni  ngai lova. Thupui pakhat atan ringawt pawh hian newspaper, magazine leh lekhabu kan chhiar kual nual thin a. News ang ngawr ngawr ni lovin, kan ngaihdan te pawh a tel a, mahse zeldin thu erawh a ni lo. Tun tuma kan sawiho tur pawh hi Shinzo Abe chanchin ziahna te, Japan economic policy te, India-Japan relation, ram pahnih te embassy website a mi te, Japan Politics chungchang South China Morning Post, This Week in Asia, NHK World Japan leh CGTN  editorial leh News te atanga lakchhuah a ni hlawm a. Source han dah ngaihna a awm lo a ni. 

Thenkhat chuan article pakhat an rawn lehling (translate) tawp a, source a dah thei mai. Keini kalphung ah chuan, information leh editorial kalkawp ang a ni a, kan dah thlip thlép thei loh a ni, tih kha ka han sawi tel hram a ni. 

Awleh, kan thupuiah lut ila, Shinzo Abe political career tawp tur hian khawvel politics kalphung a ti danglam theina lai a awm a. Nimin mai khan a thlazar hnuaiah  India nen military pact an ziak a. Sawrkar fawng chelhtu a mihring a inthlak chuan, Policy tam tak a inthlak thin a. Party khat chhungah pawh duh dan a inan vek lo. Tuna Japan ram enkawltu chu Liberal Democratic Party (LDP) niin, Shinzo Abe hi an president ni lai a ni. Japanese Chief Cabinet Secretary ni lai Yoshihide Suga chu Liberal Democratic Party member tam zawk chuan Abe thlaktu turin an duh a. Mahse, Suga chauh hi a ni lo, LDP chhungah thuneina inchuna a awm ve reng a. Shigeru Ishiba leh Fumio Kishida pawhin LDP hotu nihna an chuh ve bawk a. A tu ber hi nge LDP president dinhmun luah tur chu, a la chiang lo hle a ni. 

Japan a eptu pawl lian ber pahnih chu Shinzo Abe an a chawl tur thu a puan hnu hian, rorel lai khing thla turin an inkawp tawh a. Eptu pawl inzawmkhawm hian an president atan Edano Yukio, Constitutional Democrai Party of Japan chu an thlang nghal a ni. 
Indian Army Ak 203
Hetianga opposition party chak tak a din mek laia Ruling party chhunga buaina hian Liberal Democratic Party  (LDP) chu a tikeh thei dawn a. Eptu lam hian hei hi an hre karh dawn a, Shinzo Abe chawl hnu hian, Japan politics a inthlak zui thei bawk a ni. Hetiang hi tuna Japan ram dinhmun a ni mek a. LDP an la sawrkar chhung chuan India-Japan relation hi a hma aia nghet zawkin a kal zel a rinawm a. Chutih rualin, China-Japan relations erawh a chhe tial tial dawn a ni. 

Khawvel politics a inlumlet nasat vanglai taka  Abe  chawlh a ngai ta hi, US leh a hote tan, India tiamin thil pawi tak a ni. India leh Japan inlaichînna siamtu chu Abe hi a ni, tih India in a pawm hmak a. Tunlai boruakah China in a thuneina zauh a tum mek laia sawrkar fawng chelhtu inthlak a tul hi, a fuh chiah lo a ni. China hian India leh an ramri lamah buaina a siam reng a. Japan nena an inchuh mek Senkaku Diaoyu thliarkar, East China tuipuia awm chu China hian lak vek a tum bawk a. China hian a ram thenawm, a lam tang lo te a tibuai kim vek a ni. 

September ni 9 khan Modi leh Abe chu minute 30 zet phone in an inbia a. Modi pawhin Abe hi a uiin, a ngai hle dawn hle thu a hrilh a, rorelna khawl chelh tawh loh mahse, a hoten India-Japan inlaichhina an vawn nun reng, a beisei thu Modi hian a hrilh bawk. Tihian Modi chuan Twitter lamah a ziak a, I hriselna chhiat thu kan hriat chuan min tilungngai ngei mai. Thian duhtak Abe, i finna zarah India leh Japan in inlaichînna tha kan neih thei a. I hnuaiah Ram pahnih ten inzawmna tha tak an neih pha a ni tiin. 

Kum 65 mi Abe hma hian, a pu Nobusuke Kishi chuan India ram a lo tlawh daih tawh a. Kishi hi Japan Prime Minister, India ram rap hmasa ber a ni. Abe hian a pu hmalakna chhunzawmin, China a hlat tial tial a, India nen Inzawmna tha a siam a, hmelma thuhmun China do turin an inthurual hle tawh a ni. Japan rama Indian Ambassador lo ni tawh Deepa Wadhwa chuan, Abe hian Asia rama China huangtau tur hi a hria a, India nena thawkdun a tul thu hi a hmu chiang hle a  ni, tiin Abe chungchang a sawi. 

India leh Japan in Military Pact an ziah ni khan  thupuan (Joint Statement) an siam a, Indo Pacific chu tu ram pawh zalen taka an chettlak theina a ni, tiin thuchhuah an siam a. An thuchhuah hian China a kâwk deuh ber a ni. India leh Japan chuan China huat zawng takin, a hma aia nasa in South China Sea lamah inrawlh an tum thu pawh an sawi. China hian Indo-Pacific leh South China Sea chu a ram anga pumbilh a tum fai vek mai a. Ramdang ho hian tu ram pawhin zalen taka an paltlang thei an duh a, China hian a duh dér si lo a ni. 

Japan Prime Minister chelh rei ber Shinzo  Abe hian kum 2006 atang khan ram pahnih te inzawmna tur kawng a lo sial tawh a. India-Japan summit buatsaihin, Asia-Pacific atangin Indo-Pacific lam a zawh chho ta a ni. Hemi hnu hian Australia, India leh United States chu sawm lehin, thawh hona tha zawk an neih theih nan Quadrilateral Security Dialogue a siampui a. Hei hian a tum ber chu Indo-Pacific tuipui atanga China petchhuah a ni. 
India Japan Relations
Kum 9 zet Prime Minister a nih chhung hian India ram vawi 4 zet a tlawh hman a, Kum 2014 phei kha chuan Republic Day Chief Guest a ni nghe nghe. Modi pawh a duai bik awzawng lo, Ram dang hruaitu zingah Abe thlahtute awmna hmun tlawh hmasa bertu a ni. Modi leh Abe hi tum 4 zet an inkawm tawh bawk. 

Indian ambassador to Japan lo ni tawh, Wadhwa leh Chinoy chuan, Abe awm loh vangin India-Japan inlaichînna a chhiat an rin loh thu an sawi a. Ram pahnih te inzawmna thûk zawka kalpui zel a nih an ring. 

India hian Japan thiamna a hmang nasa mai a. Rail tlan chak chi tam tak hi Japan thiamna hmanga siam a ni. Japan hian India ramah investment nasa tak a kalpui a, Development thila kum 2018-19 chhunga Japan in India rama a hman ral hi USD 4.9 billion zet a ni. 

September ni khat khan India, Japan leh Australia commerce minister te chuan online meeting neiin, Indo-Pacific tuipuia chak zawka bungraw in supply tawn dan tur an lo sawiho tawh bawk. Indo-Japan summit hi nikum December thla kha neih hun tur niin, mahse Assam a Citizenship Amendament Act protest vang khan sawn hlat niin, April 2020 a nei tura tih niin, chu pawh chu Chinese Virus vangin thulh a ngai leh ta a ni. 

India-Japan relation that chho zel chhan pakhat chu US-China Trade war vang niin, Japanese company tam tak chuan China chhuahsana India rama inbun an tum tawh a. India pawhin a welcome hle a ni. Barak Obama ai chuan Trump hian China lakah beihpui a thlak nasa a. Trump hi lo tling ta lo se, Tun ang hian India hi International Politics ah a bûk a rit ang em? 


Engpawh nih se, Hmelma thuhmun nei an ti tlat a, sawrkarna inthlak vangin India-Japan relation hian a chhiat phah a rinawm lo. Japan hian a thliarkar mawi tak chu China a pe duh dawng lova, India in Ladakh hi China kutah a dah dawn bawk hek lova, India-Japan inzawmna hi a tu tan pawh ngaihtha chi a ni lo.
@TimesofMizoram
Powered by Blogger.