RAMDINSANGA - MIZO SHORT STORY [Fiction] 
By: RS THANGLUAH
Mizo Thawnthu Ngaihnawm

"Khawi ka lo khâi pui ang che," tih pahin ka hnung lam aṭang chuan mipa pakhat hian ka thil khâi chu min rawn lâk sak a. Tunge a nih pawh ka hre hauh lo ,"A ngai hleinem, ka khâi thei a lawm," ka lo ti ve nghal vat a. Mahse, ka thusawi chuan awmzia a nei lo chiang kher mai. Ka bula mipa chuan ngawi rengin ka bungrua chu a khâi a, en pawh min en chuang lo. Mask a vuah tlat vangin tunge a nih ka hre thei mai si lo ,"Kan kalna lam tur a inang em ni?," tiin ka zawt tawl a. Engtinmah min chhang lo, ngawi rengin ka kal rual chuan a kal ve mawp mawp a. Mahse, chutiang ringawt chu ka duh dan a ni si lo ,"Ṭhianpa, kan haw kawng a inang em ni?," ka ti leh a. Min rawn en a ,"Zawhna i van ngah tak," a rawn ti hmuk a. Sawi leh tur pawh ka hre tawh lo, engvanga min pui nge maw a nih reng reng le? Kan inhria a zeng pawh a ni si lova ti rilru nuah nuah chung chuan, engmah zawt nawn tawh lovin ka kal ve mawp mawp a.

Thui fê kan kal dun hnu chuan ka bula mipa chuan Phone call a dawng a. A hre lo nge, a chhang duh lo ka hre lo. A Phone call dawn chu a chhang hauh lo mai, vawi 3 lai an rawn call hnu chuan keimah bawk chuan ,"Ṭhianpa, Phone call i dawn kha, chhang la. Ka bungrua kha ka lo khâi tawh ang e," ka ti leh ta nge nge a.

"A ho lutuk," tih chiahin min chhang a. Mahse, a Phone call dawn chu a tawp phah chuang si lo, vawi 5 vel lai an rawn call nawn hnu chuan a ning ta deuh a ni ngei ang, a chhang ve ta nge nge a ,"Eng nge i duh? Min rawn be tawh suh," tih leh Phone dah chu a rual leh nghal a. Amah rawn call tu tan chuan a van hrilhhai thlak dawn tak êm! Ka tan tak pawh hian a hrilhhai thlak takzet a ni. A ding det a, thâwk a rawn la hak a ,"Tunlai hmeichhe ho luhlul zia leh thinchhiat zia hi chu aw," a rawn ti leh ringawt a. Kei lah chuan ,"Tunlai hmeichhe ho zingah chuan ka tel ve lo chiah chiah a nihchu," ka lo ti leh hram pek a. Min rawn en a ,"Tunlai hmeichhia ni si lovah chuan i hmelṭha khawp mai," a la rawn ti zui a. Min tih thinrim a tum nge? Min bâwl a tum zawk pawh ka hre lo ,"Tunlai mipa ho nghal zia hi chu aw," ka lo ti ve leh zat a. A rawn nui chhuak hawk hawk a ,"Ka nghal zia chu i la hre dawn chauh, Rose," tih pahin ka bungrua min khâi sak chu ka kutah min rawn hmehbel nghal chawt chawt a ,"In in peng kan thleng chiah e, a nih aw phawts," a ti a, lawmthu pawh ka sawi hma in a kal ta daih a. Engtinnge ka hming te kha a hriat le? Ka hming mai ni lo, kan in kalna peng thlengin a hre vek bawk si. Tunge maw a nih le? Hummm, a ho lutuk ngaihtuah rih lo teh ang.

In ka thlen chuan ka chau takzet a ni tih ka in hre chiah. Ka thil lei chu ka dahfel zung zung a, ka nu eirawng bawl chu ka pui nghal bawk a. Ka pa chuan zanah a hnathawhpui te 2 an lo lên tur thu a sawi bawk a. Zanin chu ka mu hma leh thei dawn lo a nih hmel, eirawng kan bawl zawh chuan rei vak lo ka ṭhut chawlh hnuah inbual turin ka inbuatsaih nghal a.

Ka inbual pah chuan khapa bawk kha ka ngaihtuah leh a. Tunge ni ang le? Engtinnge ka hming leh kan In peng te kha a hriat le? Heiham, engvanginnge maw ka ngaihtuah chiam chiam le? Ka inbual zawh hnu rei vak lovah chuan zan riah kan kil nghal a. Zan riah eikhamah chuan, zan lamah ka pa in inlêng a neih dawn vang chuan ka room-ah ka lut chho duh lem lova. Ka pa inlêng tur te pawh an rawn lang har lo kher mai, ka pa ho in sitting room-ah chuan an inkawm a, an hna lam thil an sawiin ka hria. Kei leh ka nu erawh Choka lamah kan awm thung a. Ka pa chuan min rawn au a, thingpui lum turin min rawn ti nghal a. Kei pawh chuan thingpui chu ka lum nghal vat bawk a.

Ka pa inlêng te chu zan dar 9:30pm velah an haw a, an haw hnu rei vak lovah chuan keini pawh chu kan mu ve nghal bawk a. Chhun lamah ka tei hah viau e ti lo chuan, ka mut erawh a chhuak lo kher mai. Mut pah chuan ka online mai mai a, mipa biak bik nei em em ka ni lo bawk a private message ka dawng tam lo kher mai. Kan ṭhian ho group-ah chuan ka nawi leh hle a, dar 10:30pm velah chuan mut mai tumin ka Phone chu silent mode-ah ka dah a. Whatsapp aṭanga out ka tum lai tak chuan number hriat ngai loh aṭang hian ,"Mu tawh em?," tih message ka dawng nawlh mai. Chhan tur nge chhan loh tur ti a ka ngaihtuah mek lai chuan ,"Vawiin khan i nalh lutuk," tih hi a rawn thawn leh a. A Profile Picture ka en nghal vat a; mahse, a Profile picture-ah pawh chuan a hmai a tuam tlat tho. A message chu ka hawng vek a; mahse, chhang lovin ka mutsan ta zawk a.

Zingah chuan ka thawh veleh ka nu nen eirawng bawlin kan buai nghal a, ka Phone pawh ka ngaihtuah hman meuh lo. Eirawng kan bawl zawh meuh chuan nî pawh a lo tlangsâng leh ta hle mai. Ṭhut chawlh pahin ka Phone pawh ka bih ve thei ta hram e, nizana min rawn text tu bawk khan message a lo hnutchhiah leh tawh a lo ni a. 

"Good morning, i tho nuam maw?," tiin min lo text a. A message chu chhan loh bawkin ka tuai liam zui leh nghal a. A beidawn ve mai ka ring a; mahse, a teuh lo mai. Min rawn text leh a ,"A mak e, min chhang let ve em em la. I van induh tak e aw," a rawn ti leh a. 

"Nimin vang khan ka lawm lutuk a nia aw," tih chauhin ka chhang a, ka out a, chaw ei ka siam san daih a. Tûk ṭhuan eikhamah chuan ka hna lama kal turin ka insiam nghal mawlh mawlh a. Dar 9:30am-ah chuan Office lam panin ka chhuak leh tawh a. Office ka thlen chuan ka hnung lam aṭang hian ,"Miss," tiin mipa pakhat hian min rawn ko a. Ka ding nghal chawt a, ka hawi let nghal vat a. 

"Chibai le, Miss," tih pahin a nui sâng a. A mit meng aṭang chuan nimina min puitu kha a ni tih ka hre thei nghal a. Mak tih hmel zeta ka en reng lai chuan, amah bawk chuan ,"I thil chah ka rawn dah dawn a," tih pahin a kut veilama a thil khâi chu min pe nghal a. Eng nge ka chah le? Thil chah ka neih âwm ka hre si lova ,"Lawkin, min hai a ni lo maw? Thil chah ka nei si lova," ka lo ti nghal vat a. 

"Hei en la, i hming vek a nih hi. Rosalinda Remsangpuii tih a nih hi," a ti a, ka hming in ziahna lai chu a kâwk a. A nui suk a ,"Nangmah chuan i chah lo a ni maithei. Mahse, tu emaw in i hnena pe tur che in min ti a," a tih takah chuan ka hrethiam ta uar uar a. Thla khat liam ta a ka kalsan tak, min tina em emtu Mazuala hnen aṭangin a ni tih ka hre thei mai a. Engtinnge hetiang thil te hi a la rawn tih ngam zawk le? A laka ka thinrimna kha a la reh lo reng reng ,"Mazuala hnenah chuan pe let leh la, a hnen aṭangin engmah ka mamawh loh thu i hrilh bawk dawn nia," ka ti a, a thil min pek tawh chu a kutah chuan ka hmehbel nghal chawt chawt a ,"Min hrethiam dawn nia," ka ti sap a, Office chhungah ka luhsan ta a. 

Chhun chawlh lai chuan khapa hnen aṭang bawk khan message ka dawng leh a.

"U Mazuala chuan thilpek kha i hnena pe ngei tur che in min ti a. Khawngaihin pawm sak hram mai la," tiin message min lo thawn leh a. Ka van ning tak êm! 

"Min rawn pe reng reng suh ang che," tiin ka chhang let a, ka out zui nghal bawk a. Ka out rual rual chuan number 1 ka hriat ngai loh hian min lo call leh a, ka chhang ta lo.

Office ban pah chuan ka nu kawr tur lei kawi pahin ka bazar kawi nghal a. Bazar aṭang chuan ke bawkin ka haw leh a. Thui fê ka kal hnu chuan, ka hnung aṭang hian ,"Ngatinge U Mazuala chu i biak duh tawh lohva?," tiin khapa bawk khan min rawn zawt leh a.

"Mipa ve si, zawhna i ngah hle mai," ka lo ti let ve kher a. Za vak lo hian a nui a ,"U Mazuala chuan a la hmangaih reng che a sin," a rawn ti leh a.

"Engmah i hre lo," ka lo ti tawi tuk a. Min rawn en a ,"A la hmangaih reng che a lawm," a rawn ti leh a. 

"Khawngaih takin Malsawmzuala hming kha lam ri tawh lo ang che," ka ti leh hmuk a. Chutianga ka tih hmuk hmuk takah chuan a in thiam lo ve deuh a ni ngei ang ,"Awle, in inkar thu chu ka hre thûk viau lo a. Mahse,....aaaa.... ka tihpalh lutuk aw," a ti a, a hmai tuamna chu a phelh a, a nui suk a. Kan In peng thleng chuan kan inzui haw leh ta nge nge a ,"Khawngaih takin U Mazuala tan lo in ngaihtuah nawn leh hram ang che aw," tiin ngen tak te chuan min ngen ngawih ngawih a.

"Mazuala chu i tan eng nge a nih a? Min tihnat zia i hriat hunah chuan hlat turin min ngen zawk ngei ang," ka ti ve leh fak fak a. Inthlahrun hmel zet hian min rawn melh a ,"U Mazuala chu ka û a nia," a ti ta mai. Mak ka van ti tak êm! 

"Maw? Mazuala chu i û maw? Engtinnge a nih theih a? Ani kha an unau zinga mipa awmchhun a ni si a," ka ti nghal mawlh mawlh a.

"Sawi dawn chuan a thui lutuk, rem i tih chuan zaninah kan lo leng ang aw," a rawn ti leh a. Rei ngial ka ngawih vang vang hnu chuan ,"Nangmah nen in nih dawn chuan a pawi hleinem," ka lo ti mai a. A nui leh suk a ,"Ngatinge keimah nen kher?," a rawn ti leh a.

"Tunlai mipa ho zawhna ngah zia hi," ka ti leh kher a. A khi vur vur a ,"Tunlai nula senior ho nghal zia hi," tih pah chuan a tukhum a hiat nuah nuah a, a thusawiah chuan a inthiam lo leh deuh a ni ngei ang. 

"Chhe lo min tih êm tho kha," ka ti zui leh zat a, a lâi kher mai ,"Aaaa, iiih a nih ka kal phawt ang e aw," tih pah chuan a tlan nghal vut a. A pumrua a len ang aiin a la naupang chhia ve hle mai, kum 23 vel chauh a nih ka ring. A hmel erawh a ṭha reuh phian mai.

Zanah chuan Mazuala te unau chu an lo leng ta ngei a. Mazuala chu inthlahrun hmel tak hian a ṭhu ngawi reng a, a nau lah chuti tho. Sawi tur a vâng em em bawk si, Mazuala nau chuan ,"Û, ka ṭhianpa te Inah thil copy lawk tur ka nei a, ka va kal zuai aw, ka rei lo ang," a ti a, a chhuak nghal daih a. Mazuala nau chhuah hnu pawh chuan sawi tur kan vân dun hle mai. Rei ngial inbe mang lova kan ṭhut dun reng hnu chuan ,"Rose, engkim vang khan ka tihpalh lutuk aw. Khawngaihin min ngaidam thei ang em?," tiin Mazuala chuan ngaihdam min dil ve ta nge nge a. Kei erawh chuan ka luhlul ka chhuah lui a, ka la ngawi reng a. 

"Rose, khawngaihin," tih pahin ka hmaah chuan a ṭhingṭhi ta rawp mai. Ka rei le (h)! Ka pian a hnu lamah ṭhingṭhia ngaihdam min diltu awmchhun a la ni. Mazuala chu a kun chal a, engmah dang a sawi rih lo. Kei erawh sawi mai tur hre lovin ka ngawi reng ringawt a.

"Rose, khawngaihin min ngaidam thei em?," a ti leh a. Engtinmah ka la chhang lo, ka kutah a rawn vuan a ,"Rose, khawngaihin. Ka thil chîn ṭha lo zawng zawng pawh ka sim vek ang. Ka tiam a che, khawngaihin min ngaidam hram rawh," a ti leh mawlh mawlh a. Mazuala nen hian thla 5 vel kan inzui ve tawh a, tun hi kan intih thiam loh ṭum hnihna a ni a. A hmasa berah chuan in ngaihtuah nawn miah lovin a thil tihsual chu ka ngaidam nghal a. Mahse, a ṭum hnihna erawh hi chu awlsam tak chuan ka ngaidam thei tawh lo a ni. 

"Rose, khawngaihin ka tiam a che," a rawn ti leh a. 

"Ka lo in ngaihtuah dawn nia," ka ti ve ta nge nge a. Chutianga ka chhan takah chuan ani pawh chu a hlim ve deuhin ka hria ,"Ka lawm lutuk aw, Rose, ka hmangaih che," tih mawlh mawlh pah chuan a rawn ding chhuak a. Ka mitah tak min rawn en a ,"Ka hmangaih che," a rawn ti leh a, ka hmuiah chuan min rawn fawh a tum nghal ngawt pek a ,"Ni love, tunah rih chuan," ka ti a, ka hawi sawn nghal daih a. Ani pawh chu ka bulah chuan ngawi rengin a rawn ṭhu ve leh mai bawk a. Sawi tur a vâng kher mai, a nau lah chu rin aiin a rawn let leh har a.

Ngun deuha ka in ngaihtuah fê hnu chuan Mazuala pawh chu ka ngaidam ve thei ta hram a. Mahse, ngai awh leh chu a harsa khawp mai. Thla khat dâwn chu pangngai takin kan awm chho leh a, a mizia pawh a thlâk ve nasa khawp mai. Mahse, khapa a nau anga insawi kha ka hmu ngai ta miah lo, a hming pawh ka hre ta si lova. Whatsapp lamah lah min block tlat leh nghal a, a awmzia ka hre lo kher mai. Ṭum khat chu Mazuala bulah ka zawt ta tawp mai a ,"Mazual, i nau kha ka van hmu ngai tawh lo. In awm ho lo em ni?," tiin ka zawt chawt mai a. Mazuala chu a rawn nui chhuak hawk hawk a ,"Ka nau dik tak pawh a ni hleinem," a rawn ti ringawt a. Kei lah chuan hriat chian ka châk telh telh thung si ,"Awww, chu pawh nise, amah vanga kan inkar hi ṭha a ni bawk si a, lawmthu hrilh te pawh ka duh a sin," ka tih chuan a lungawi loh hmel kher mai.

"Kan pahnih inkar ṭhat hi eng nge amah vang a nihna? Theihtawpa ngaihdam ka dil vang che a ni lo em ni?," a rawn ti leh khar khar tawh a. 

"Aaaa, chutiang pawh a ni lo. Amah khan palai hna rawn thawk lo se, tunah hian kan awm dun hauh lo ang," ka lo ti ve thung a. Chutia ka tih takah chuan ,"Ni e, a ni khawp mai. Mahse, ani chu a nu bulah a awm leh tawh a," a rawn ti a. Ka hrethiam lo kher mai ,"A nu i tih chu eng nge a awmzia?," ka lo ti leh vat a. Mazuala chuan ,"Kei leh ani kha pa hmun nu hrang kan ni a. Thla khat vel liam ta khan ka pa hi a rawn zawng chhuak a, thla khat vel chu kan kiangah a awm a. Mahse, a nu in a bula awm ve leh tawh turin a rawn ti si a, a kal ta a nihkha," tiin an unau chanchin chu a sawi ta a. Mak ka ti hle mai, Mazuala pa hian hmeichhe dang lakah fa a lo nei reng a ni maw? Chu pawh tuna a fate zawng zawng aiin a la naupang zui a. Nupui a neih reng lai hian hmeichhe dang lakah fa a nei em ni le? ti a ka ngaihtuah mek lai chuan ,"Ka pa hian a hnathawhna hmunah bialnu a lo nei deuh a ni maithei. Ka pa sawi dan chuan ka nau kha a fa a nih a ring vak lo a ni awm e. A chhan chu, khapa nu kha hmeichhe lepchiah deuh mai a ni a. Mahse, hmeichhia khan naute paah ka pa a rawn puh tlat bawk si a. Ka pa chuan pha viau mah se, hmeichhia zawkin a rawn puh tlat siah chuan lungsi lo takin a pawm ve mai a," tiin Mazuala chuan a rawn sawi leh a. Mak ka ti telh telh mai, Mazuala chuan min rawn en leh a ,"Heng zawng zawng hi engmah i hre lo em ni?," a rawn ti leh a.

"Min hrilh si lova, ka hre lo a lawm," ka lo ti ve mai a. A nui leh suk a ,"Kha nau khan i bulah ka nau angin a lo insawi maw?," a ti leh a.

"Aww, i nau a ni miau si a," ka lo ti leh mai a.

"Dik tak chuan, ka pa hausakna hi a awt a, a fin a rawn chhuah vel a nih hi. Kei aiin a naupang zawk bawk si a, ka û te phei chuan an mil lo lutuk," a rawn ti leh a. Engmah ka sawi leh hma chuan ,"Ka pa a rawn tlawn dan te kha ka lawm lo a sin aw. Ka pa lah hian a duat si, Bike lei sak te a tum mai mai a. Ka phal lova, a ti lui ta bik lo a nihkha," a rawn ti leh a. Chutia a phun a phun takah chuan a in phun thinrim leh takngial dawnin ka hria a ,"Sawi tawh lo ang, a ho e mai. Kan pahnih inkar sawi zawk ang," tiin ti ti dang ka vawrh ta daih a.

Inrinni a ni a, Office chawlh a ni bawk a tiin Mazuala nen chuan bazar turin kan in phur chhuak ve leh ta a. Solomon's Cave-a kal a duh tlat vang chuan Solomon's Cave-ah chuan kan kal ta a. A Jacket tur kan en mêk lai chuan hmeichhe pakhat hian ,"Mazual, i dam maw?," tiin Mazuala chu a rawn bia a. Mazuala pawh chuan ,"Aw, dam a lawm, nang zawk i dam em?," tiin a lo chhang let ve mai a. A ṭhian satliah a nih ringin ka lo ngai pawimawh em em hran lova; mahse, ka beng verh zar tu thu a rawn chhak chhuak ta ,"Ngatinge hmanni khan Mki kha i van be ṭha lo ve a? Nizanah a lungawi loh thu hlir a rawn sawi leh nghal," a la ti zui a. Mazuala chuan ,"Aaaa, a ho e mai a. Chutiang sawina hun pawh a nih loh hi," a lo ti liam puat a. A bula hmeichhia chuan min rawn hmu ve ta a ni teh chêk ang chu ,"Awiii, Rose, nang maw? Kan ṭhianpa in a star thei lutuk che. Malsawmzual, i nau hi Puia khan a star theih em kha, lo sawipui ve la," a la rawn ti ham ham zui a. Ka rei le(h)! A ṭhian te ho bulah chuan a nau maw ka lo nih a? A va mak ngai ve le? Mahse, ka awmdan ka ti danglam duh hauh lo ,"Ka û hi chuan a duh ang tak mipa chiah ngaihzawn a phal a. Mahse, Puia pawh chu a chhiat loh viau chuan a rukin ka nihpui thei tho a nia," ka ti a, za vak lo chuan ka nui zui a. Mazuala chuan sawi tur pawh a hre tawh lo, za lo zet zetin a nui a nui a. A tawpah phei chuan min kai a, min kalpui ta nghal daih a. 

"I ṭhiante bulah chuan i nau maw ka lo nih a?," tiin ka chhuahchhal nghal bawrh bawrh a. Min rawn en a ,"I ngaih ang kha a ni lo a nia," a rawn ti leh a.

"Chuan, Mki chu tunge? I biak ṭhat loh vangin a titau ngam a nia, i tan a pawimawh viau ang tiraw?," ka ti leh hlaih hlaih a.

"I va rapthlak ve a, a tawk tawh," tih pah chuan min rawn hnek leh chawrh mai a. A mize pangngai a rawn chhuah leh dawn ta, ka chhip samah a rawn kek a ,"Mki chu ka best friend a ni a, i thîk thiang lo. Ka thu thu hian awm ve mai ṭhin rawh, khanu bula i awmdan te kha tenawm lutuk," tih pahin min hnek leh a, ka lu a hai chhup mai.

"Mazual, khawngaihin kut min thlak tawh lo teh. Khawngaihin," ka ti lawm lawm a.

"Ka duh dana i awm dawn lo a nihchuan, i tuar zel ang," tiin a mit meng thîp zet chuan min rawn melh râwm râwm a. A laka beiseina ka neih ṭhin te chu an bo zo ta, tunah chuan tih tak zetin ka beidawng tawh a ni. Ṭhingṭhia ngaihdam min dil laia a thutiam kha tak tak emaw ka lo ti a. Mahse, hun a liam a, hun chuan a mize ngai bawk a rawn her chhuah pui leh si. Khatih hunlai khan lo ngaidam lo lêk ila ṭha tur hi a nia. Khawvela ka thil tih tawha ka inchhir ber a la ni ang.

Mazuala chuan kan In peng thleng chuan min thlah a. Ka hmaia min hnekna chu a na ngut ngut mai, Bike aṭang chuan ngawi rengin ka chhuk a. Ani pawh ngawi rengin a tlan liam zui ve nghal bawk a, kan In pengah chuan rei ngial ka ding a. Ka hmai duk lai te chu ka theih ang angin ka make up hmang chuan ka hliah khuh a. Kan In lam pana kal tuma ka inher mek lai chuan ,"Nangni anga nula hmelṭha chuan make up in mamawh ve vak hleinem," tiin mipa pakhat hian min rawn bia a. A âw chu ka hriat hnu a nih vangin min rawn be tu chu ka hai thei lo a ni ,"Khawiahnge i kalbo daih a?," tiin zawhna ka lo zawt let thung a. Min rawn pan a ,"Ngatinge a? I van hlim loh hmel ve a? I ṭha maw?," tiin ka zawhna pawh chhang ta lo chuan, zawhna dang min zawt let zawk a. 

"Ka ṭha a lawm, i rawn leng leh dawn em ni?," ka lo ti vat a. Mahse, ka mit meng aṭang chuan ka ṭha lo a ni tih a hmu tlang thei vek a nih hmel ,"Hmeichhe ho tak hi chu aw, 'I ṭha em?' han ti ila, ṭha lo mah u la 'Aw ṭha e' in ti leh ṭalh a. Mahse, i mit meng aṭang khan ka hre vek a nia aw. I ṭap zo deuh chiah a ni tiraw?," a ti nghal mawlh mawlh mai. He tlangval hian engtinnge min hriat chian viau theih le?

"Ka ṭha tak tak a lawm," ka ti leh a. Mahse, ka thusawi chu kei pawh hian ka ring lo a ni. Hnai set sawtah min rawn en a ,"Nidangah make up i hmang ngai lo. Mahse, tun ṭum chu i hmang ve tlat. I hmai duk hi ngatinge a? Khapa khan engtinnge a tih che a?," a ti leh nghal bawrh bawrh a. Ani hian engmah hre lo se a ṭha zawk a sin le. Mahse, engkim hi a hre vek lawi bawk si ,"Make up te chu ka hmang ve fo a lawm," ka ti thla ve leh rawk a.

"Dawt min hrilh tum duh suh. Kut a thlak che em ni?," a ti leh a.

"Nang hi tunge maw i nih chiah le? Ka hming leh kan In i hre vek bawk a. Tunge i nih a?," tiin ka zawt let ve leh mawlh mawlh a. 

"Min hriat hma khan kei chuan ka hre daih tawh che a lawm," a ti leh mai a.

"Mahse, ngatinge ka hriat ve loh che?," ka ti leh kher a. A nui a ,"I ngaihven loh zawng ka ni tihna a ni mai a," a ti leh a. A la chimawm reng tho a nih hi ,"Chimawm viau lo teh," ka ti a, ka nui zui a. 

"I hmai chu ngatinge?," a rawn ti ṭha leh a. Engtinmah ka chhang lo, a kekawr ipte a zen a, a mit meng fiah zet chuan min rawn en kal a ,"Ni e, i kâ aṭang hian engmah i sawi dawn lo tih ka hria. Mahse, i mit meng hian engkim chu min hrilh vek tho. Khapa khan kut a thlak che tih pawh ka hria; mahse, hmeichhe tuarchhel tak i ni tih ka hai lo," a rawn ti leh a. Sawi tur ka hre lo kher mai, ngawi rengin a thusawi chu ka ngaithla tawp mai a. Rei ngial kan in din chilh hnu chuan ,"Zaninah engkim tifel turin ka pa ka hmu dawn a. Chumi zawhah chuan ka rawn leng ang aw, i phal em?," a ti leh a. Ngawi rengin ka lu ka bu ringawt a ,"I hmaiah khan damdawi hnawih ang che aw," a ti leh a, min kalsan zui ve ta a.

Ka nu bulah chuan ka nawmsam loh vangin zan riah pawh ka ei peih loh thu ka hrilh a. Nachhawkna ka ei a, ka tlu zâl daih a. Dar 7:00pm velah chuan Mazuala chuan min rawn call a, party naa kal dun puiah min rawn sâwm a. Mahse, ka lo hnial a, a thin a rim leh khawp mai ,"Remsangpui, min hnial dawn a maw? A ṭha e, Mki nen kan kal ang a ni mai lawm," a rawn ti vei âwr âwr a. Kei lah chuan ka thîk lo nasa mai si, a chhan pawh, amahah hian beiseina engmah ka neih tawh loh vang a ni. A lerh chu thuhran ni se, kut min thlak a hrat lutuk hi ka hua a ni.

"Aw, i duh duh chu kalpui rawh. Engmah ka rawn sawibuai lo ang, i duh dan danin i awm thei ang," ka ti ve ta ngat a. Ti fuh in ti zet hian ,"A ṭha e, chuti chu inṭhen ila ni mai lawm," a rawn ti leh khar khar a. Kei lah chuan ,"I duh te chuan a pawi ka ti reng reng hleinem," ka lo ti ve leh hmak a.

"Hummm, a tawk a nihchu," tih pahin Phone chu a dah hmak a, kan inṭhen ta chu ka thawveng huaiin ka hria.

Zan dar 8:00pm velah chuan ka nu in min lo call a, inlêng ka neih thu min rawn hrilh a. Mazuala nau kha a ni ngei tawh ang, ka room aṭang chuan In hnuai lamah ka chhuk thla ta a. Ka rin ang chiahin sitting room-ah chuan Mazuala nau chuan min lo nghak reng tawh a. Ka hmel a hmuh chuan a lungawi loh hmel kher mai ,"Eng nge i an tawh a? Chaw pawh i ei lo a ni maw?," a lo ti nghal vat a.

"Ka ṭha a lawm, chaw ka châk vak lova," ka lo ti mai a. 

In chhunga inkawm aichuan pawna boruak hîp paha inkawm chu ka duhzawk a, kan pahnih chuan veranda thlang lamah chuan kan ṭhu chhuak dun ta a. A hming takngial pawh ka la hriat loh vangin ,"Lawkin, nang hi i hming pawh min la hrilh miah lo," ka ti leh nghal tawl a.

"Ramdinsanga ka nia," a lo ti tawi tuk a. A hming ka zawt chu ka inchhir hman lek lek nia; mahse, amah bawk chuan ,"Ka nu chuan Duatpui tiin min ko ṭhin," a rawn ti leh kher a, a sawi pah chuan a rawn nui zui suk bawk a, a hmelṭha reuh kher zek leh nghal a.

"Nihchuan, Duatpui tiin ka ko ve mai dawn che em ni?," ka ti leh kher a.

"Naaaah, ka nu pawh i nih loh kha," tih pah chuan zah hmel zet hian a nui leh a.

"Nihchuan, engtinnge ka koh ang che?," ka ti leh a.

"Ramdin tiin min ko mai dawn nia," a rawn ti ta a.

A chanchin engmah ka la hriat chian loh avang chuan zawhna ka ngah kher mai. Ani pawh chuan ka zawhna te chu phunnawi hauh lovin min chhang ve vek a, ka rin aiin a fel phian mai. A nu leh pa chungchang Mazuala hnen aṭangin hre thawi tawh mah ila, a hnen aṭang hian hriat ka châk leh ta tlat pek a. Ka zawt leh ta nge nge a.

"Ka nu hian ka pa chanchin hi min hrilh duh ngai lova. Mahse, a hming leh a thlalak erawh chu min hrilh tho. A chanchin dang erawh ka hre ngai lo, ka nu chuan engtiklai pawn hlim hmel put reng a tum ṭhin. Mahse, a mit meng aṭang hian natna tam tak a tuar a ni tih hi ka hai ngai si lo. Vawi tam ka pa chanchin ka zawh hnuah pawh min hrilh duh ngai lo. Mahse, vawikhat chu ka nu dairy ka hmu chhuak hlawl mai a. Chutah chuan engkim chu a lo in ziak vek a, ka pa hian nupui fanau nei chungin ka nu lakah fa a nei a. Ka nu chu nupuiah a neih tur thu pawh a tiam a. Mahse, ka pian thlengin ka pa chuan ka nu chu a rawn ngaihven zui ta lo a ni. Ka nu chuan, kei min hrin hnu hian ka pa chanchin engkim a hre ve chauh a ni. Kha dairy ka chhiar aṭang khan ka nu hnenah chuan ka pa chanchin ka zawt ngai tawh lo. Mahse, ka pa chu zawn chhuah ve hrim hrim chu ka duh ta a. Ka nu pawh hrilh lovin a ruk tak meuh meuhin ka zawng ta a. Thla hmasa khan ka zawng hmu ve ta a, pa nei lova awm ngawt zawng a ṭha berin ka hre si lova. Ka pa hnenah chuan a fapa ka nih thu leh ka nu hming te ka sawi a, chutianga ka insawi takah chuan an hausakna ît vangah min ngâi leh ta si a. Chutiang chu ka thil tum a ni loh zia leh unau ka awh ve zia te ka sawi a. Ka pa chuan min ring ve mai a; mahse, midang erawh chuan min ring lo. U Mazuala erawh chuan min rin theih nan thil tih tur min tuk sak thung. Chu chu in inkar a palai hna thawh kha a ni, a duh ang ngei chuan ka rawn thawk ta anihkha. In ṭhat thu ka hriat khan kei chu in tan ka hnawk mai mai dawn tih ka hai lova, chuvang chuan in pahnih lak aṭangin ka inthiar fihlim ta a nikha," tiin an chhungkaw chanchin chu a sawi ta melh melh a. Mazuala sawi dan nen chuan a inang lo kher mai, thil pakhat hriat duh ka la neih avangin ka zawt leh a ,"Chuan, zanina i thil chinfel chu eng thil nge ni ta?," ka ti leh a. 

"Ka nu khan pa leh fapa inkar chhut chah hi pi leh pu pawn an duh loh thil a nih thu min hrilh ṭhin a. Mahse, kei chuan ani ang mi tenawm kha ka pa atan ka duh ta lo a ni. Ka chungah eng pawh thleng se, ani kha ka pa a ni ngai lo ang," a rawn ti hul hak a. Ka lainat kher mai ,"Ramdin, pawi ka tih pui lutuk che. Mahse, ani chiah kha khawvelah pa i nei a sin," tiin a rilru chu thlâk tir leh ka tum a. Mahse, awmzia a awm lo kher mai ,"Khawvelah hian pa nei lo mi engzatnge awm i hria em?," a ti ta daih a. Ngawi rengin ka lu ka lo thing ringawt a ,"Chung zingah chuan ka tel ve tih pawh i hre lo ang tiraw?," a ti leh a. Sawi tur a vâng kher mai, engtinmah ka chhang lo. Ka lam a rawn hawi a ,"Mazuala pa vangin kei hi ka lo piang a, a pa vang bawkin ka nu thinlung chu tih kehsawmin a awm a. Tunah hian khapa vanga i nat leh hi ka phal lo bur, anni chhungkua vang sawn ka hmangaihte hi an nat ka remti tawh lo," a ti hmarh hmarh mai a. A thusawi awmzia chu ka hrethiam tho a; mahse, ka zawt nawn leh kher a ,"Eng nge i sawi awmzia?," ka ti leh kher a. 

"I hriat thiam tura sawi pawh ka ni chuang lo," a ti leh daih a, hepa tak hi chu aww. 

Mazuala nen chuan kan inṭhen chiang khawp mai. Engkimah a tawp a ni tawp mai, Ramdinsanga nen erawh kan innêl ṭan chho viau mai. Ani erawh hi chuan kawng engkimah min ngaihsakin min duat em em a, ka nat hi a phal ngai lo. Ka hlim loh a hlau em em a, ka hlim lo deuh ni a a hriat chuan a chhan min zawt nghal vat ṭhin. Ka tan chuan vantirhkoh tluk hial a ni; mahse, in ngaihzawn lam thu hla erawh kan sawi dun ngai hauh lo. Ṭhian ṭha tak angin kan awm a, ngaihzawng erawh kan ngaihsak lo dun em em thung a. A châng leh keimah hian bialnu nei tur hian ka tur a, ani lah hian ,"Nang pawn bialpa i nei chuang lova, bialnu ka nei duh bik lo," a ti ve leh tlat zel si. Ka ṭhian te ho lah chuan ka bialpa emaw an ti vek leh nghal a, a ṭhenin an lo star bawk. Ka hnathawh puite ho lahin ka nau emaw an lo ti bawk a. Engtinpawh chuan lo ngâi se, pawi kan ti lo ve ve. A chhan chu, an ngaihdan chu kan nih miau loh vang a ni.

February ni 12 a ni a, inngaizawng tam tak chu Valentine's Day lo thleng mai tur atan an inbuatsaih nasa tawh hle mai a. Keini ṭhian dun erawh ngaihzawng kan neih loh vang nge ni, kan ngaihven lem lo thung a. Mahse, a rukin Ramdina hnena ka pek tur chu ka ruahman lâwk ve vek tawh tho a. Ani erawh chuan Valentine's Day-ah chuan a nu tan thilpek ropui deuh pek a tum thu a sawi thung a. Ramdinsanga hi kei aiin kum 6 velin a naupang a, a kum naupang ang aiin a rilru erawh a puitling reuh zek a. Class kal pahin Chanchinbu semin a in hlawh ṭhin a, zan lamah an ṭhenawm naupang te tution pe in a inhlawh leh bawk ṭhin. A dinhmun chu a hre chiang a, mi hmuhsit tur leh mi nuihzat turin awm a tum ngai lo. Ruihhlo in a nun a tibuai ve lova, a thawh chhuah loh sum a awt ngai lo bawk. Engkimah dikna a ngaina a, dawt a haw em em bawk. 

February ni 14, Valentine's Day chu a lo thleng ve ta e. Ramdina hnena ka thilpek tur chu Sana a ni a, uluk zetin ka tuam a. Paper bag-ah dahin ka Scooty seat hnuaiah chuan ka dah ta a. Chawhnu lama chhuah kan tum vangin chawhmaah ka hna thawh tur ang ang ka thawk zo vek a. Chawhnuah chuan kan pahnihin kan in phur chhuak ve ta a. Amah chuan Scooty chu a khalh a, kal duhna ka neih leh neih loh min zawt a, khawpui pawn lamah khawpui thâwm bengchheng hriat theih lohna hmunah kal ka duh thu ka sawi a. Aizawl khawthlang lamah min tlanpui a, Lengpui Airport road-ah chuan min tlan thlak pui ta a. Kawng sir zau deuh laiah chuan kan ding a ,"Kan kalna hi nuam lo i ti em?," tiin min zawt nghal vat a.

"Nuam lo ti lo e, i kiangah chuan khawi hmun pawh a nuam vek a lawm," tiin ka lo chhang nghal vat a. A nui var var a ,"Bialpa chu nei la, vawiin ni angah te hian thil pek hlu tak i dawng awm si a aw," a rawn ti leh ringawt a. Kei lah chuan ,"Bialpa ka nei duh tawh teuh lo mai a. Rilru natna tur hlir, na nawn leh turin bialpa ka nei tawh dawn lo," ka lo ti nghal bawrh bawrh a. A rawn nui hak hak a ,"Mipa zawng zawng hi kan inang vek hleinem," a rawn ti nghal vat a.

"In inang vek, hmeichhe rilru tihnat bak thiam in nei lo," ka ti let zêk a. A nuih lah chu a za telh telh leh nghal a ,"I senior tawh lutuk a, i duhtui lak lawh a nihkha," a la ti zui a, ka van ngei reuh tak. 

"Suala, ka thil pek tur che hi ka pe lo tawp mai tur che a sin," ka ti leh hlaih hlaih a.

"Wow! Thilpek ka dawng dawn maw? Ka van lawm tak," a lo ti nghal mawlh mawlh a. 

"Scooty seat kha hawng rawh," ka ti deuh hmuk a. Nui var var chungin Scooty seat chu a hawng a ,"E he! A ṭhat hmel hle mai, eng nge ni ang le?," tih pah chuan a rawn lek chhuak nghal a.

"Hawng la, i hre mai ang," ka ti leh hmuk a. Ka titau deuh a ni tih a hrethiam nghal a ,"Titau kher lo la, i la senior lo hrim hrim a nia. Kum 18 chiah i la nihkha," a rawn ti leh a, ka thil pek chu a hawng a, a hlim hmel kher mai ,"A nalh lutuk, ka van lawm tak; mahse, a to viau lo maw?," a rawn ti nghal chûk chûk a. 

"To viau love, bun chhin teh i inhmeh ngawt ang," ka lo ti ve vat a. A ban dinglamah chuan a bun nghal a, a inhmeh khawp mai. Min rawn en a ,"Rose, ka lawm lutuk a nia aw. Mahse, ka thil pek ve tur che hi i pawm ve ang em le?," tih pahin ka dar leh lam leh lamah chuan a rawn vuan a. 

"Ka ṭhian ṭha ber i ni a, i hnen aṭanga ka dawn a nihchuan eng pawh nise lungawi takin ka pawm vek ang," ka lo ti ve nghal vat bawk a. Ngawi rengin a kun deuh chal a, a rawi hawi chhuak leh a ,"Rose," a rawn ti sap a, thawk a la leh hak ṭhin a.

"Aw, sawi la ka ngaithla a nia," ka lo ti leh vat a. Van lamah a dâk chho vang vang a, min rawn en leh a ,"Eng lo, vawiinah hian maw, i kuta i dawn tur thilpek pek tur che ka nei lo. Mahse, ka hmangaihna che ka thinlung hi min pawm sak thei ang em?," a ti mauh mai. Thleng se ti a ka lo suangtuah ṭhin; mahse, ka beisei ngam si loh kha a lo thleng ta. Ka hamhaih lutuk leh ka hlim lutuk chu ṭawng mai nachang pawh ka lo hre lo leh pek tawh a. Amah bawk chuan ,"Ka tihpalh lutuk, sawi loh tur tur ka lo sawi a ni," tiin ka kokia min vawnna a kut chu a la thla a. A kekawr ipte a zen a, hnuai lam a bih leh ngar tawh a.

"Suala, hmanah sawi tawh ta che," tih pahin ka kuah nghal chawt a. Ani pawh chuan min lo kuah let ve nghal chawt a, kan hlim a ni. Kan thinlung chu a in hmu tlat si a, kan inkuahna chu kan inthlah a kan inen a, duhthaw takin ka infawp nghal vawng vawng a.

Tlai lam dar 4:00pm-ah chuan an In lam panin min phur ta a. Ṭhian kan nih lai zawng khan an Inah hian kal a phal ngai miah lova; mahse, vawiin chu min hruai ve tlat mai. Eng thil nge tih a tum erawh ka hre hauh lo.

An In kan thlen chuan a nu chiah a lo awm a. A nu hnenah chuan ,"Nu, ani hi khawvela ka hmeichhe hmangaih ber dawttu a nih hi," a ti mai chu(h)! Ka zak lutuk hi ka sa pup pup thei nia, a nu lah chuan min lo lâwm thiam kher leh nghal a. Ei tur te min lo siam sak a, kan hlim tlâng hle mai. Ei tur te kan ei zawh chuan Ramdina chuan a nu hnenah chuan ,"Nu, hei i Sana awh deuh kha," tiin a nu hnenah Sana nalh zet Silver rawng chu a pe ta a.

Ramdinsanga bulah chuan ka thil hriat châk em em thil pakhat chu, ka zawt leh hram a ,"Keiin ka hriat hma che khan engtinnge min hriat a?," tiin ka zawt ta nge nge a. A rawn nui leh sâng a ,"Nang chuan i hre tawh lo maithei. In Office-ah khan ei tur ka rawn deliver a, chumi ṭum chuan kawngka bulah kan insu chawrh a. Chuan, i Purse i thlauh a, i I.D Card a rawn tla chhuak nawlh a. Ka chhar pah khan i hming leh Address chu ka chhinchhiah nghal vek a lawm. Chuan, khami ni aṭang khan ka star ṭan che a," a ti a, zah hmel zet chuan a hawi sawn leh daih a.

      ----A TAWP TA----

Post a comment

Powered by Blogger.