TANHRIL NULA MARINA THIHNA CHUNGCHANGA MIZORAM POLICE PRESS STATEMENT

TANHRIL NULA MARINA THIHNA CHUNGCHANGA MIZORAM POLICE PRESS STATEMENT 

Dated: Aizawl, the 27th January, 2026 : Zonuam Outpost-ah ni 03.12.2025, 08:30AM-ah Pu John Sanghnuna, Tanhril Vengpui hnen atangin a tunu Marina Lalchhanchhuahi (26) d/o Joseph Malsawma (L), Tanhril Vengpui, Aizawl chu ni 01.12.2025 dar 11:30 AM-ah an chenna in atanga mamawh lam tura a chhuak chu, ni 03.12.2025 thlengin a la haw loh thu report dawn a ni a, hma laksak turin police an ngen a, Zonuam Police Outpost General Diary-ah mibo report ziahluh niin theihtawpa zawnpui nghal a ni. 

Mi bo Marina Lalchhanchhuahi (26) chu ni 4.12.2025 – 12.12.2025 chhung hian Police leh Tanhril khawtlangte nen tangkawpin theihtawp chhuaha zawn a ni. Hetia mibo zawn hna kalpui a nih lai hian, Marina Lalchhanchhuahi Mobile Phone SIM No.6909104207/8259895917 chu a Call Detail Report (CDR) te la chhuakin, uluk taka zirchian a ni a. CDR atanga a biak thinte chu thu zawhfiah an ni a. 

CDR atanga a lan danin, Marina Lalchhanchhuahi a bo ni hian, a biak mi pakhat chu uluk taka thu zawhfiah a ni a. Nimahsela, Marina bo chungchangah hian evidence tha a awm loh avangin chhuah leh nghal a ni. 

Marina Lalchhanchhuahi zawn hna kalpui a nih mek laiin, Ni 13.12.2025 05:25 PM-ah Pu RS Lalrinsanga, Tanhril Branch YMA hnen atangin, MZU Football Playground bulah hmeichhe ruang ni awm tak an hmuh thu leh, he ruang an hmuh hi mibo zawn mek Marina Lalchhanchhuahi a nih ngei rin a nih thu Zonuam Police Outpost-ah dawn a ni a. Chanchin hriat a nih veleh ruang hmuhna hmun chu Police team-in pan nghalin, Forensic team te pawh hrilh nghal an ni. 

Ruang awmna hi MZU football playground atanga 50 metres bawr velah niin, ruang hi a lo tawih chhe tan tawh a. Inquest uluk taka neih niin, Forensic expert ten uluk takin ruang endik hna an thawk a ni. 

Pi Vanlalrovi, Tanhril Vengpui chuan, ruang chhar chu a fanu bo mek Marina Lalchhanchhuahi a nih ngei thu a finfiah bawk a. 

Police inquest atanga a lan danin, ruang chhar chu a chhiat tawh avangin leh, pawn lam lang theiah hliam hnuhma engmah a hmuh theih loh avangin a thih chhan dik tak hriat a ni lova. 

Hetiang a nih avang hian ruang chu Civil Hospital, Aizawlah ni 14.12.2025 khan a thih chhan chiang taka finfiah a nih theih nan, Post Mortem Examination tura thawn a ni. 

Hemi chungchangah hian Vaivakawn Police Station-ah Unnatural Death (UD) case (Vaivakawn PS UD C/No.26/25 Dt.14.12.2025) register niin, uluk taka a thih chhan chhui zui a ni. 

Marina Lalchhanchhuahi thihna chungchanga enquiry neih a nih mek lai hian, mi engemawzat thu zawhfiah an ni a. Enquiry atanga a lan danin, Marina Lalchhanchhuahi hian nau a pai mek thu hriat a ni a, amaherawhchu a fa paina erawh hriat a ni lo. 

Marina Lalchhanchhuahi hian pasal neih a tum thu leh a pasal tur chu pa upa lam, Pensioner a nih thu a sawi thinte thuhretu hnen atangin hriat a ni a. Tin, Marina-i’n he a pasal tura a sawi hi Tanhril veng khua leh tui diktak a nih loh thu pawh hriat a ni.  

Marina Lalchhanchhuahi thihna chungchanga enquiry-ah rinhlelh pakhat chu, Zonuam Police Outpost-ah ni 16.12.2025 khan koh a ni a. Hetih mek lai hian Pu RL Peka chu a chenna In atanga a zuan thlak thu leh Ebenezer Hospital panpui a nih thu dawn a ni. 

Rang takin Ebenezer Hospital, Chawnpui pan nghal a ni a, FSL team-te nen RL Peka motor B/R No. MZ-01S-4967 (TATA Nexon) chu rinhlelh thilah hriatpuitute hmuh laiin, uluk takin motor chhung chu enfiah a ni a. A motor chhung hmun hrang hrangah thisen kai ni ngeia rin chu hmuh a ni ta a. Hnuchhuina kalzelah FSL expert team te endik atan seized a ni ta a ni. 

RL Peka chu Marina Lalchhanchhuahi thihna chungchanga inhnamhnawih ngei nia rin a nih tak avangin an chenna In chu ‘Ground of belief’ siamin enfiah a ni. 

RL Peka phone hman lai Redmi 8A chu an chenna In atangin man/seized a ni a, Forensic Science & Laboratory, Aizawlah enfiah tura thawn a ni bawk. 

HNU CHHUI ZUI ZELNA - 

Police Enquiry-ah hian Marina mobile phone SIM Number 6909104207 Call Detail Report (CDR) chu zir chian that leh niin, Marina be hnuhnung bertu chu, SIM No.7627949735 niin, a biak hun hi Dt. 01.12.2025 dar 11:40Am a ni a. He SIM No. 7627949735 neitu hi Pu RL Peka, Tanhril Vengpuia In sa mek leh, Kolasib atanga Tanhrila pem, mi in luaha khawsa mek a ni tih hriat chian a ni. 

Hmun hrang hranga CCTV/surveillance camera awm ang angte enfiah niin, hetah hian TATA Nexon var (B/R No. MZ-01S-4967) chu, Marina-i ruangchharna MZU campus, Tanhrilah ni 01.12.2025 khan a tlanlut ngei tih finfiah a ni a. He motor hi MZU campus-ah darkar 2 leh 18 minutes chhung a awm tih hriat a ni bawk. 

Marina-i thihna chungchangah hian Pu Peka hi rinhlelh kai ber a nih tak avangin, uluk taka zirchian zui zel a ni a. He lirthei B/R No. MZ-01S-4967 (TATA Nexon) hi E challan apps atanga a lan danin, Lalduhsaka Lelhchhun, Maubawk hminga registered niin, ni 21.10.2023 khan 3rd ownership nei mektu Joseph Lalremmawia s/o RL Peka, Kolasib hnenah Rs 5,80,000/- (nuai nga singriat) a hralh chhawn a ni tih hriat a ni.  

Marina Lalchhanchhuahi thihna chungchanga hnuchhuina kal zelah, ruang chharna hmun atang hian, Marina Lalchhanchhuahi nghawngruh ni ngeia rin leh, a Ha 8 leh thisen ni ngei a rinte chu hmuhchhuah a ni a. A chunga tarlan, motor chhunga thisen ni ngei a rin leh, a ruang chharna hmuna evidence lakkhawmte chu Forensic Science & Laboratory, Aizawlah endik turin thawn nghal a ni. 

Hriatpuitu leh evidence chi hrang hrang lakkhawm endikna atanga a lan danin, Marina Lalchhanchhuahi thihna chungchangah hian, pawikhawihna (criminal offence) awm ngeia hriat a nih avangin Vaivakawn Police Station-ah tualthah thubuai ziahluh (Vaivakawn PS C/No.08/26 Dt.17.01.2026 U/S 103(1) BNS) a ni ta a ni.  

Hnuchhuina kalzelah, evidence chi hrang hrang Forensic Science & Laboratory, Aizawl-a thawnte chu ni 23.01.2026 khan evidence examination report dawn a ni a. Examination report atanga a lan danin, RL Peka motor chhunga thisen kaite chu Marina Lalchhanchhuahi thisen ngei a nih thu leh ruang chharna hmuna ha hmuhte pawh Marina Lalchhanchhuahi ha ngei a nih finfiah a ni. 

Tin, Pu RL Peka mobile phone Redmi 8A examination report chu Forensic Science & Laboratory, Aizawl atangin dawn a ni bawk a. 

Dt.12.11.2025 khan Pu RL Peka phone-ah hian ‘Pregnancy Test Kit’ thlalak hmuh chhuah a ni bawk. 

Marina Lalchhanchhuahi tualthihna chungchanga hnuchhuina kawng hrang hrang atanga lo lang ta chu; Pu RL Peka (62) s/o RL Dama (L), Tanhril Vengpui hi pawikhawihtu leh mawhphurtu ber niin hmuhchhuah a ni. 

He hnuchuinaah hian Tanhril YMA leh FSL team ten Police te theihtawp chhuaha an puihna avangin an chungah SP Aizawl District leh a staff te chuan lawmthu an sawi a ni.

 

ISSUED BY MIZORAM POLICE MEDIA CELL