MIZO TT PLAYER CHHUANAWM LALRINPUIA'N THIAM A CHANG TA

KUM 4 CHUANG CASE RIP TAK AWRHA JAIL A TAN HNUAH MIZO TT PLAYER CHHUANAWM LALRINPUIA'N THIAM A CHANG TA, LALPA KAN LAWM E!

Mizo tlangval rawlthar Lalrinpuia, Table Tennis player chhuanawm, Mumbai Airport-a Narcotics Control Bureau te’n an man tak kha kan la hre reng awm e. December 13, 2017 zing dar 4:30 vela an man atang khan, hrehawm takin Mumbai Taloja Jailah thubuai rip tak nen a tang ta reng mai kha a ni a. He an puhnaah hian thiam lohna engmah nei lo, naupang rilru thianghlim tak bumna tenawm tak avanga vanduai ta ni ngeia hriatna a awm avangin Mizoram Table Tenis lam hruaitute leh amah lainat tuten Jail atanga a chhuah theih nan theihtawp an chhuah a, an thawhrimna leh tawngtainate Pathianin a chhang a, vawiin khan a thiamchanna thu tih chhuah niin, jail atangin tlangval Rinpuia hi lak chhuah a ni dawn ta!

Tunge Lalrinpuia Chu?

Lalrinpuia (Rinpuia) hi Pu Lachhuankima leh Pi Loicy te fapa Maubawk veng, Aizawla cheng thin an ni a. Lalrinpuia hi kum 11 mi a nihin India rama Table Tennis zirna tha bera sawi thin, Petroleum Sports Promotion Board (PSPB) Table Tennis Academy, Ajmer, Rajasthan-ah awm tanin he hmun atang hian Mizote aiawhin National Tournament-ahte tel chhovin Cadet, Sub-Junior, Junior leh Youth Category-ahte India ram champion a rawn ni chho va, Gold, Silver leh Bronze Medal Naional level pawh a vaiin 40 vel lai a la hman. National Championship/Tournament-ah tum 7 a Champion hman a, Mizo ti hmingthatu, Mizo nih ti nuamtu pakhat a lo ni thin a ni.

India ram aiawhin khawvel hmun hrang hrang a tlawh tawh thin a, International Medal pawh 8 lai a la hman a, heng zinga 3 phei chu Champion medal an ni nghe nghe. Youth Category a khelh atang phei chuan naupangte ni chungin India Senior Team-ah pawh koh a ni ve ta hial a. 2017 Asian Championship, China-ah khan India Team squad-ah a han telve hial a ni. Mens Singles-ah naupangte ni chungin India ram pum (National Championship)-ah lawmman 3-na la thei a ni hman a, hma hun eng tak a neih mek laiin bumna avangin harsatna nasa tak a tawk ta a ni. 

Zofate mai ni lo, India nghahfak zing a mi Olympic hial khel thei tura rinkai zing ami a ni a, chumi thlen ngei tuma India rama Professional TT Player ho inzirna tha bera sawi Anshul Garg Academy (AGA), New Delhi a inzir mek a nih laiin vanduaina tawkin a tih sual awm miah lovah jail bang a zut ta a ni.

Rimpuia hi hi aia upa zahthiam, mi ze zawi leh mi inthlahrung tak a ni a, a fel zia leh a rilru put hmang chu a thianten an hrechiang hle a ni. Midang tana inpe tak mai a ni a, mi tlawmngai tak a ni bawk.

Bumna Thangah Awkin, A Tan Vanpui A Chim! : 

Kum 2017 December thla a lo ni a, Chutia hmasawn tuma thahnemngai leh phur taka Anshul Garg Academy (AGA) a Table Tennis training a beih sauh sauh lai chuan, Delhi-a In luaha khawsa ve thin, a Mizo pui amah duhsaktu leh hmangaihtu anga a ngaih, u ena a en te; Rebecca Ralte (Shillong) leh Lalduhkimi (Aizawl) te chuan anni Table Tennis thiam ta chu Mozombique, Africa lamah a thlawna zinna (to & fro - Air ticket free-in) an thian (mihang)te nena an buatsaih sak theih thu leh zin ngei tura an duhsak thu an hrilh a. An ni thalai tan chutianga a free-a zin thawven theihna hun remchang an nei ta chu an lawm hle mai. Phur takin Mozambique-ah chuan an zuk kal ta a. A thianpa sawi danin khulai velah pawh Mizo hmeichhe 2 te thian mihang hoin an lo buaipui a, an polite-in an chungah pawh an lo tha hle.

An haw a lo hun ta a, an thian dun hawna tur ticket an neih sa December ni 8 chu engemaw airlines lamah harsatna a awm avangin tih danglam (cancelled) a ngaih thu leh tihdanglam a tul thute, ticket thar ni indawtin an thiandun tan an laksak leh tak thu chu Rebecca Ralte te thiandun chuan an rawn hrilh ta mai a! Mak an ti viau nghe nghe. An ticket lak thar ang chuan a thianpa chu December ni 11-ah a lo haw hmasa ta a ni. Rinpuia erawh chu ni 1-a tlai turin, December 12, 2017 atan ticket laksak a ni ve thung a. Hetia a rawn haw dawn hian, mihang lo buaipuitu ber chuan, Rinpuia hnenah an thianpa (mi hang) Delhi a awm bungrua, thawmhnaw lum tlem azawng awmna Trolley Bag Sen thawn a duh thu leh Delhi a thlen hunah, an thianpa chuan Rebecca Ralte te nen an lo lam tur thu hrilhin, hawn sak hram turin a ngen ta a. A ni chuan a chhunga awmte an han check thuak thuak a. Thiam taka bag thuahna kara thil an dah chu hmu lovin, thawmhnaw tlem azawng chauh anga ngaiin, tha taka an cham chhunga lo buaipuitute thil chu tlawmngaiin a rawn hawpui ta a ni.

Chutih mek lai chuan, Narcotics Control Bureau lam chuan an agent te kal tlangin Rinpuia thil kenah chuan ruihhlo a awm tih report an lo dawng thlap mai si. Mumbai Airportah an lo chang ran mai a. December ni 13 zing dar 4:30 vel a lo ni a, Ethiopian Airlines lo tumin Rinpuia chu ama pual Bag dum ak chungin a lo thleng a, belt no.9-a checked-in trollley bag sen rawn vir chhuak a chan lai pawh chuan amah man tumtute chu a bulah an lo awm reng tawh a. Trolley bag sen a lak veleh chuan Rinpuia leh a bag sen chu an man ta nghal a ni. A bul pindanah chuan hruai lutin a bag-a thil awm an zawt a, a ni chuan Chu bag senah chuan thawmhnaw bak a awm loh thu leh mi thawn a nih thute a sawi a. Delhi a an lo lam tur thute a hrilh a. Bag chunga thil awm chu an han bun a, a sawi angin thawmhnaw tlem chu a ni mai a. Mahse NCB-te chuan uluk takin an han check ta a, bag chhung lam zipper chu an han hawng a, a tet thui phui thar lehna hnuhmate leh screw-a kilh hnan thlap chu an han hmu ta a. Bag chu an zai teta, a chhungah chuan lehkha buanga tuam chhungah plastic/sarang eng(yellow) phek thlarh leh fel taka intuam ruihhlo (methaqualone) chu an hmu ta mai a. An han buk a 3.900 kg zet a lo ni leh nghal a. Rinpui atan Vanpui a chim a, Mumbai Taloja Jail hreawm takah dah a ni zui ta nghal a ni.

Engtin Ni Ta Zel Maw? 

A mantu ten thubuai rip tak an siamsak zui ta a. Narcotics Control Bureau(NCB) Delhi lam ho chuan AGA, New Delhi-a Rinpuia room-te an lo luh chilh zui ve nghal bawk a. Uluk takin an lep se a, mahse rinhleh tur thil pakhatmah hmuh tur an nei lo.  

Hemi rual hian Rinpuia te zinna ngaihtuahsaktu Rebecca Ralte, Shillong, Lalduhkimi Aizawl leh an thian mihangte chu man tumin Delhi leh Shillong-ah te NCB ho an fehchhuak nghal a. Mahse anni hi an lo bikbo hman zel thin avang leh an tlanchhiat reng avangin, tun thlengin man an la ni ta lo.

Hun a lo vei a, Rinpuia chu thubuai rip tak nen Covid hri karah Jail-ah hun a hmang chho ta zel a. A chhungte leh amah lainattu, duhsaktu leh a thiante, Mizoram Table Tennis Association (MTTA) hruaitute leh Mumbai Mizo hruaitute indawrin Ukil-te ruaiin Bail a chhuah an dil sak a. High Court thlengin dil a ni thin a, mahse a bail dilna hi hnawl a ni thin.

Hun a lo kal a, Mizoram Table Tennis Association chuan an player tan hian hma la thar lehin, anmahni chhung leh mi thenkhat te hnenah thawhlawmte an khawn a. Chu chuan a daih zawh loh avangin social media lamah Tanpuina thawhlawm khawnna siam a ni a. MSR lamah pawh September ni 21, 2021 khan Rinpuia puala vehbur khawnna kan lo post tawh a ni. Bail dilna High Court-ah thlen thar leh niin, a hlawhtling leh ta lova. Beidawng lovin India ram court rorelna sang ber Supreme Court-ah an zualko leh ta a. Hearing vawi 4 neih hnuah Supreme Court chuan September ni 7 khan order siamin, bail hi a phalsak lo leh ta a ni.

Amah ngaihsaka hmangaihtuten beidawng lovin an bei zel a. Mi thahnemngaite zarah ukil rawihna tur cheng nuai 10 chuang khawn ngah a ni a. Ukil ruaiin kum 4 chuang zet Jail-a hrehawm taka a tan hnuah, Supreme Court chuan a bail dilna hnawl paha a thubuai hi ngaihtuah thuai nise a tih ve tak avangin, beiseina sang tak nen tawngtaina nen an tang takmeuh a, vawiin khan court order chhuakin Rinpuia hian thiam lohna engmah a nei lo tih court-in hriain thiamchangin chhuah a lo ni dawn ta a ni.

Rinpuia hmangaiha a chhuah theihna atana sum leh tha leh ngaihtuahna sengtute chungah Rinpuia chhungte leh amah buaipuitute an lawm em em a ni.

~14th March, 2022: Vanneihthanga