RINPUIA TALOJA CENTRAL JAIL MUMBAI ATANGIN A CHHUAK FEL TA
- Vanneihthanga
15th March, 2022 (MSR): Mizo tlangval TT player chhuanawm Lalrinpuia chu vawiin chhun dar 1:30 vel khan Mumbai Taloja Central Jail atangin a chhuak fel ta.
Taloja Jail hi Mumbai khaw daifem-a awm a ni a, amah hruaichhuaka a tul anga buaipui turin Pu H. Lalruatliana DRC, Rev. P.C. Nghaklianmawia leh Tv. Mawia (MMA) te an thawk chhuak a, harsatna awm lovin tluang takin Jail atangin hruaichhuah a ni.
Mizo tlangval rawlthar Table Tennis player chhuanawm Lalrinpuia hi a chanchin kan ziak nual tawh a, sawi tam ngai lovah ngai ila. December 13, 2017 zing dar 4:30 velah Mumbai Airport-ah Narcotics Control Bureau ten an man a, U anga a en Mizo hmeichhe pahnih leh an thian mihangte bumna tenawm tak avangin a tihsual ni miah lovah kum 4 leh thla 3 leh ni 2 jail-ah hrehawm taka a tan hnuin, Pathianin a mite tawngtaina a chhang a, thiam changin Jail atangin vawiin khan a chhuak ta a ni.
Naupang nungchang tha leh thuawih thei, Lalrinpuia hian an puhnaah hian thiam lohna engmah a neilo tih ring nghet tlatin Mizoram Table Tennis Association te hmalaknain Rinpuia Puitu Group-te siam a ni a, Rinpuia case buaipuina kawngah hian pawl leh mimal fak phu tak tak an tam hle a, sawi kim sen a ni lovang. A case buaipuina kawngah ukil rawihna tur pawisa tam tham tak a ngaih avangin hemi atan hian vehburte khawn a ni a, cheng nuai 14 chuang khawn a ni. Tanpuina pawisa thawhkhawm chu tangkai taka hman niin, vawiinah hlawhtlinna ropui tak kan chang ta a ni.
Rinpuia'n Mizoram a rawn thlen hun tur hi sawi lawk theih a la ni rih lova, a case kaihhnawiha a thil an man sakte court lamah claim te a la ngai anga, tih fel neuh neuh ngai la awm tura ngaih a ni.
Nichin maiah khan amah buaipuitu Rev. P.C. Nghaklianmawia phone kaltlangin ka bia a, a hriselna a that thu min hrilh. A mobile phone kha a tan tirhah man sak a ni a, kum 4 chuang phone a kawl tawh lo. Pandemic avangin Jail tang ten kar khatah vawi khat (minute 10 chhung) Jail phone hmangin chhungte biak an phal sak thin.
Jail chhungah TT parctice-na engmah a awm lova, exercise erawh theih ang angin a la regular hle. Kum 4 chuang TT practice thei tawh lo ni mahse, naupan lai atanga skill leh tactic a lo hriat bel tawh avangin a huphurh lova, TT khelh leh thuai chu a thil chak ber a ni.
Jail chhunga a luh hlim atangin thian tha leh duhsaktu a hmu nghal a, TT lama a record te an lo hriat tawh avangin an lo dah sang hle a, a lakah that an chhuah vek mai. Jail lut tharte chu bathroom bula mu tur an ni a, a ni erawh mutna hmun tha leh nuam lai an chan tir nghal a ni.
Rinpuia hian Jail atanga a chhuah theih loh mai hlauhthawn chang a nei ve fo thin a, chutianga a inngaihtuah chang chuan hrehawm a ti zual thin. Mahse, inngaihtuah hah vak vak chuan awmzia a nei lova, hrehawmna belhchhahtu mai a ni tih hriain rilru tih thawven a tum hram hram thin. A inkhel thei lo chu hrehawm a tih ber pakhat a ni bawk. A tanna Jail-ah Mizo tang dang an awm lova, "Enga" tihpui tur pakhatmah an awm lo. North East mi pakhat a awm ve. Inbiak nan Hindi leh English an hmang thin. Jail chhungah a duh tan open university atangin lehkha zir theih a ni a, zir nan Hindi leh Marathi chauh an hman avangin Rinpuia tan tih ngaihna vak a awm lo.
Rinpuia lainattu, thiam a chan theihna tura theihtawp chhuaha hmalatute an fakawm takzet a, a case buaipuina atana hman tur pawisa thawhtute, sports discipline association hrang hrangte, Mumbai Mizo Welfare te leh mimal thahnemngaite chungah MTTA chuan lawmthu an sawi a ni.
Photo : Rinpuia leh vawiina amah Jail atanga hruaichhuaktu te, L-R Rev. P.C. Nghaklianmawia, Lalrinpuia, Tv. Mawia (MMA aiawh), Pu H. Lalruatliana (DRC)
Post a Comment