HNAR SATLIAH LEH HNAR DAN HLAUHAWM A AWM - Dr. Rosangluaia

HNAR SATLIAH LEH HNAR DAN HLAUHAWM A AWM

- Dr. Rosangluaia  

Hnar satliah a hlauhawm lo. Hnar dan tha lo obstructive sleep apnea hi khawvel pumpuiah, puitling zingah mi 5% in an vei.

Hnar dan thalo chu engtia lo awm nge?

Muthilh hian kan dang chhung tihrawl a lo zawi a, kan thawkna dawt hrawk chho lai a rawn ti zim a. Khami zim kaltlanga boruak kan thawk luh/chhuah kha a ngai si a. Chu chuan ri a siama, hnar ri a lo awm ta a ni. 

Hnar thin ho hi a zangthal zawnga an mutin an hnar nasa tlangpui thin a. Kan mut zangthal hian kan lei hian, kan thawkna kawng, kan dang chhung hi a rawn hnawh thla deuh hlek a. Chuvangin a tam zawk chu a saisir zawnga mut tir khan an hnar a reh ve mai thin a ni. Upa lam zingah hnar an tam bik a. Hmeichhia aiin mipa zingah hnar an tam zawk bawk. Thau zingah hnar thin an tam a, zu in mite, zial zu mite zingah hnar an tam. Tonsil vung te dang mawn fual lutukte an hnar duh bik. Khabe ruh te lutukte, biang ruh te lutukte an hnar duh bik bawk a ni

Hnar thinte hian an hnar leh hnar loh an inhre ngai lova. An bula mute leh an chhung ten an sawi atang chauhin an hnar thin tih an inhre thin tlangpui a ni. 

Hnar thinte hi an mutpui ten mut theih loh phah nan an hmang fo thin a, hrehawm an ti thin a. Chutiang avanga rilru lam natna anxiety nei ta hial pawh an awm thin. 

Hnar nasa thenkhat chu an hnar a tawp vang vanga, thaw chhuak lovin second 10 te an han thaw tawp a, an rawn thaw hrawih a, an hnar chhunzawm leh a. An thaw tawp leh a, chutiang reng reng chuan zan khuaa hriat nuamlo taka hnar an awm thin. Chutiang natna neite chu, darkar khat chhungin vawi tam tak an thawk a tawp thin. Ring takin an hnar a, tawt takin an thaw a, a chang chuan hah hmel takin an insep dawrh dawrh thin. An muhil hi an harh zawk zawk thin a. An harh chhung a rei loh em avangin an harh tih pawh an inhre lo. An mut a tui lova, an taksa a hahdam lova, a tukah an mut a chhuak bur thin a ni. An mut a ngheh loh avangte, an muthilh dan a hahdam loh avangin chhunah thil tih khawmnaah te, inkhawmnaah te awlsam takin an muthlu mai thin a, chhuna an muthlu pawh an hnar leh mai thin. Hetiang mite hian lu nâ an sawi thin a, an hriatrengna a chak lova, an fim lova, an nun a harhvang lova, an thau duh hle bawk a ni. 

Hetiang natna hi enge a hlauhawm na le? Taksa tan a hlauhawm thei em? A chhanna chu "hlauhawm thei e" tih a ni

Hetiang natna neite hian Bp sang an nei duh bik a. Mi normal-ah chuan an zan muthilh laiin an bp a tlahniam thin. Obstructive sleep apnea natna nei ho hi chu, an muthilh laiin an bp a tlahniam lo mai ni lovin an muthilh khan an bp a sang zawk ta hial thin a. Khatianga muthilh hlana bp sang kha a hlauhawm. Chuap bp a ti sang thei a, lungphu dik lo, lung phut dan mumal lote an nei thei bawk a, lung nâ te an nei duh a ni. Tin, stroke te an nei duh a, an thau avangin zunthlum te pawh an vei duh bik a ni. Sex lamah an tlahniam thei a, depression pawh an nei hial thei a ni. 

A natna hriatchhuah dan:-

Khawl hmangin a en theih a. Khawl hmang kher lo pawhin a natna hi a hriat theih. In chhungte zingah khatiang anga hnar bur bur thin kha an awm chuan, ngun takin lo chik la. An muthilh laia an awmdan video record in doctor hnenah in entir dawn nia.

Engtia enkawl tur nge?

1. Thau lutuk chu intih cher ngei ngei tur a ni. In ti cher turin ei tlem tur a ni. 

2. Kan ei tur thlan danah kan fimkhur tur a ni. Thau siam duh chi; thlum lutuk te, mawm ei tam te, thlum siam tam chi; rice te, maida atanga siam reng reng, bakery chhang te, cake te, company siam biscuit te, puri/paratha kan te, fast food leh street food te ei tam lutuk chuan thau a siam hma tih hria ila. Ei tlem tur. 

3. Chet tam tur a ni a, kea kal tam tur a ni. Hna thawh tam tur a ni a, awm awl tam chu thauna a ni tih hriat reng tur. Gym kal mi tan taima taka kal a tha a, zing walk mi tan regular taka thlan chhuak khawpa walk thin te a tha. 

4. Mei zu mi chuan mei nghei tur a ni a. Zu in mi chuan zu in loh tur a ni. 

5. Mut ti chhuak thei thil damdawi ei tlem tur a ni a, ei loh theih hram chuan ei loh a tha ber. 

6. Khum lu lam inches 4 leka han tih sante hian thenkhat chu an hnar loh phah ve thei. 

7. Zangthal zawnga mu a hnar chuan, saisir tir la a reh ve fo bawk. 

8. Zan muthilh laia vuah chi Cpup an ti a, thenkhat chuan an hman a ngai thin. 

9. A chhan a zirin zai/surgery dam theihte pawh a awm. 

Sawi belhna :- 

1. Zana kan hnar thin a nih chuan, engvang nge tih chik ila. Doctor hnenah i in entir hreh lovang u. 

2. Pa valai/nu valai lam ka nih a, chhun lamah ka mut a chhuak ngawih ngawih thin a nih chuan, hetiang natna hi ka vei a ni thei a. Doctor in entir vat a tha. 

3. Kan zing tho kan fim lovin kan rit luk a, rilru a mang deuh muih thin a, kan thil hriat rengna a chak loh viau chuan, hetiang natna hi kan vei a ni thei a. In chîk ila doctor i pan ang u. 

4. Hetiang natna nei ka nih chuan, ka chenpui, ka mutpui, nupui/pasal ten an mut theih loh phah fo thei a, an tan harsatna ka siam fo thei tih inhriain midang laka inthlahrun vang tal pawhin i inenkawl tha ang u. 

5. Zin honaahte, chhuah khawmnaahte mut chhuak reng mai nih bik chu a zahthlak hrim hrim a, abikin inkhawmnaahte, biak in chhungahte mutthluk a hnar phei chu a zahthlak duh viau a ni. Chuvangin hetiang natna kan vei a nih chuan i inenkawl ngun ang u. 

6. A tawpna berah chuan, hetiang natna hi a hlauhawm thei a ni tih hre nawn leh ila. Bp sang a siam thei a, thau lutuk vangin zunthlum a thlen thei a. Lung tha lo a siam thei a. Stroke a thlen thei a, thih thutna pawh a thlen thei a ni tih hria ila. Hetiang natna hi kan nei a nih chuan doctor pan ila, in enkawl ngun ila, a dam leh thei a ni tih i hria ang u. 

(He thu ziak hi Dr. Rosangluia MD Medicine Specialist thu sawi, ama Youtube channel (MSR Heath Tips) video atanga lak chhuah a ni a, ama phalnain kan rawn post a ni e. Tangkaipui kan awm ngei ang tih ka beisei - Vanneihthanga)