Showing posts with label Lawngtlai District. Show all posts
Tweet Share Share Share Share Share

June 06, 2020
NAUPANG PAHNIH DILAH TLA HLUM

Lawngtlai piah lawk, Chawnhu khaw naupang pahnih Hriatsanga leh Stephan-a te chu vawiin chawhnu lam dar 1:30pm vel khan Pu Champion-a Sangha Dil (Tuikhuah) ah an tlahlum.

Naupang ho hi khua a ṭanga 2km leh a chanve vela hla Sangha Dila chêng tur hian an kal a, an zinga naupang 3 te chu Dil tui, puitling pil zeta thûkah chuan chéngin an talbuai zui ta a, an zinga naupang pakhat chu a nauin changêl lian vaklo thehluh sakin chumi hmang chuan a inhâi chhuak thei hlauh a, an zinga mi pahnih Lalhriatsanga kum 13 S/o. B. Remruatkima leh Stephan Vanlalawmpuia kum 9 S/o. Lalsiamthanga te chu vanduaithlâk takin an boral ta a ni.

Naupang dangte hian vanduaina an tâwk tih an hriatin puitling pun turin Sangha Dil aṭanga hla vaklo, 33 KV Sub-Station WT Room Duty te hrilhin an tlan chho vat a, anni hian khawchhung lam an hrilh nghal a, a hre hmasa a piang tlan nghalin naupang ruang hi an la chhuak ta a ni. Hriatsanga ruang hi hmu hmasain a hnu deuhah Stephan-a ruang hi an hmu leh a ni.

Pic: Naupang vanduaite tlâkna Sangha Dil

NAUPANG PAHNIH DILAH TLA HLUM

Stephan Vanlalawmpuia hi kum 9 chauh mah nise hmanni lawk khan Bible a chhiar chhuak a, tunah hian ziah chhuah leh tumin thui fê chu a ziak leh tawh a ni. A puitlin huna Pastor nih a tum thu a sawi fô ṭhin niin an sawi. Naupang vanduaina tawk te hi zanin Dar 9:00 pm hian vuiliam an ni ang.

Source: Maveni Khiangte‎
Read more »
Tweet Share Share Share Share Share

September 01, 2019

MIZO ZINGA UPA BER (?) DARCHENGI CHINZAH KUM 109 KAN CHAN TA


DarchengiVawiin (zanin) 31.8.2019; 11.00pm khan Pi Darchengi kum 109 chu a chenna in Lawngtlai Chanmari a a thi ta. Nikum 1.9.2018 khan a kum 108na piancham a tu leh fate hmun hrang hrang a awm ten an lawm sak a, naktuk khi a piancham leh hun tur ni mah se zanin khan kum 109 mi niin chatuan ram a pan ta a ni. 

Darchengi Chinzah hi 1910 khan Lungtian khua ah a piang a. Lungtian khua hi Hausata Chinzah lalna khua a niin Hausata nau Dokulha kha Mizoram history a kan hriat thin, Sap a thah avanga Andaman a tang ta kha a ni. Pi Darchengi pa Sangthiauva chu Lal khawnbawl ni in khawnbawl zing pawha rin berte zing a mi a ni.

Pi Darchengi pasal hi Keihranga Hnialum hnam a ni a. A pasal Keihranga te unau hi mipa rual tak leh belhfakawm tak chhung a ni. A pasal hian 1.9.1989 khan a boral san tawh a ni. Pi Darchengi hian fa 13 nei in 3 te chu naupan laiin an thi a, 10 zingah hian mi hriat han hlawh ve te pawh an awm, Upa Lianmanga (L) chu Chanchintha hril vei em em thin a ni a. 

Tunhma a Zaipawl in an sak lar tak “Khawvel zawng zangah kal ula, Thilsiam zawng zawng hnenah chuan Chanchintha hi hril rawh u” tih te, KHB No. 343na Zoram Hmangaihtu Lalpa tih te leh Martyr hla “Min rawtsawm vek rawh Lalpa” tihte hi a phuah a ni. A fate rawngbawlna lam a kal midagte chu Upa H. Sangmuana Lawngtlai Bazar, Upa H. Lianbuaia (L), Upa H. Rochhunga te hi an ni. Tin, a fa zinga upa ber Nichuangi kum 90 niin College veng Lawngtlaiah a cheng mek a. Pi Nichuangi pasal Upa Tialiapa (L) kha Lungtian a zirtirtu anih lai chuan “Hotupa” tia khawtlangin an koh thin a ni. 

Pi Darchengi hi hmanlai mi, khaw kil khawr taka cheng ni mahse a pasal Keihranga nen khan mi khaw hawi zau tak an ni a, an fate pawh hian eizawnna ngelnghet an nei vek. Mipa te hi Zirtirtu an ni tlangpui a, tin, a fanute pawh hian pasal atan Zirtirtu, Pastorte an nei hlawm. 

Sawi tak ang khan Pi Darchengi hian Fa 13 nei in a dam 10 te atangin malsawmna tam tak a dawng a. A thlahte Tu, Tuchhuan leh Tuchhuan(khup thumna) zawng zawng hi an vaiin 320 zet a nei a ni. Heng a tu leh tuchhuante zingah hian mi hriat hlawh tak tak Sakhaw puithiamte, Upa leh Rawngbawltute, Missionaryte, Ramhruaina lam te, Educator te, sorkar milian IFS, MCS, Doctor leh Engineer te an awm nual bawk.

@Tlana Zathang
Read more »
Tweet Share Share Share Share Share

May 10, 2019

 Lai Autonomous District Council huam chhunga Village Council inthlanpui neih zawh takah hriat theih chinah MNF-in khaw 64-ah hnehna changin Congress in khaw 13 ah VC an siam thei a ni


Lai Autonomous District Council huam chhunga Village Council inthlanpui nilainia vote thlak te chu vote thlak zawh rualin chhiar nghal a ni a, Village Council 95 ah result kimchang la hriat loh khaw 2 tel lovin MNF-in khaw 64-ah hnehna changin Indian National Congress in khaw 13 ah hnehna an chang a, chak bik awmlohna, inhnehtawkna khua 11 awmin, Independent Candidate tlin tam zawkna khaw panga a awm bawk.

Boruak muanawm tak hnuaiah Vote thlak zawh a nih hnuin, vote tlate hi chhiar nghal a ni a, chhiar zawh a nih ve leh Sector Officer ten an huam chhunga mi la khawmin Lawngtlai DC Office an panpui a, result hriat theih chinah Indian National Congress in Seat 115 lain, Mizo National Front ten Seat 294 an la a, Independent Candidate 43 thlantlin an ni bawk.

Khaw thenkhata inhnehna tlem deuhna hmunah te Inthlan buaipuitute leh Agent-te remtihnain vote chhiar nawn a awm nual a. Village Council inthlanah hian Ballot paper hman a nih vangin, a bikin khawpui chhung leh vote tam deuhnaah te zan rei tak thlengin vote chhiar a ni a, vote chhiar ngaihventu pawh an thahnem hle.

Tun tum Village Council inthlannaa hnehna changtu Party te chuan nimin atang khan Village Council thar din turin ruahmanna an nei chho tan a, chak bik awmlohna khuaah te pawh Village Council thar din tur hian Political Party leh Candidate te an indawr chho mek a ni.

(Lalngheta Ralte PTC Lawngtlai)
Read more »
Tweet Share Share Share Share Share

April 18, 2019

MIZORAM RURAL BANK-IN MORGUE VAN MARA THYUTLIA PY AN HLAN


MARA THYUTLIA PYVawiin ni 18 April, 2019 chawhma dar 11:30 am khan Mizoram Rural Bank chuan Mara Thyutlia Py, Siaha hnenah Morgue Van an hlan.

Mizoram Rural Bank chuan kum danga an lo tih ṭhin tawh angin Corporate Social Responsibility (CSR) programme chu Hotel Regency Conference Hall-ah an hmang a; Pi Mary Deng, General Manager, Reserve Bank of India, Aizawlin a hmanpui. Morgue Van hlanna inkhawm hi Pu C. Laldampuia, Member Secretary, CSR Committee-in a kaihruai a. Pu V Jaya Chandra, Mizoram Rural Bank, Chairman-in kalkhawmte lawmna thu a sawi rualin Mizoram Rural Bank chu Mizo te ta a ni a, Mizorama inzarpharh zau ber Bank anih angin thingtlang leh hmun harsa zawka awmte tan a ṭangkai thute sawiin, tun aia nasa lehzuala hmang ṭangkai zel turin mipuite a beisei thu a sawi a. "Banking service piahlamah pawh khawtlang tana theihtawp chhuah pawh Bank-in a tum a, chumi bawhzuina atan CSR hi mipuite tana ṭangkai thei ber turin hman chhuah a ni," a ti bawk.



Pi Mary Deng, General Manager, Reserve Bank of India, Aizawlin Morgue Van hi Mara Thyutlia Py, Siaha hruaitute hnenah a hlan a. Mizoram Rural Bank-in hetiang programme an siam hi lawmthu a sawi bakah hun lo kal zelah pawh Mizoram Rural Bank zar zotu an pun zel a beisei thu a sawi bawk.

MARA THYUTLIA PY

Kum 2018-19 Financial Year chhung hian Mizoram Rural Bank hian CSR atan ₹ nuai 28 zet a hmang a. Morgue Van hlan rual hian Mizoram Rural Bank-in CSR atana a thil tih langsar zualte tarlan a ni a, chungte chu-
Central YLA-ah Morgue Van, Baptist Child Orphanage-ah Eecovan, Synod Hospital, Durtlangah Plasma Expressor Penpol, Mizoram Cancer Care Foundation-ah Washing Machine leh Steel Almirah, Gilead Special School, Bawngkawn leh Hermon Children's Home-ah Water Cooler, Aizawl DC hnuaia sawrkar Middle thenkhat thlan bikah Science Programme, Pratham Education Foundation nena tangkawpin RAHBI sponsor a ni bawk.

He hunah hian Mizoram Rural Bank a thawktute pawh engemaw zat telin hun hlimawm tak an hmang.

Mizoram Rural Bank-ah hian thawktu mi 416 an awm mêk a, Branch 85 nei mêkin Regional Office pakhat leh Head Office pakhat an nei a, Mizoram chhunga Bank Branch ngah ber an ni.

 Source: Rinmoya Vanchhawng 
Read more »
Tweet Share Share Share Share Share

March 02, 2019 1
Kum 2017 March thla atanga Lawngtlai District – Lungzarhtum Tlangpui khuaa Sele inlar, Bawngrual zinga khawsa thin ni ngeia rin chu tukin zing khan Lungzarhtum khaw bulah thi a hmuh a ni a; nizanah Sele hi mi tu tih hriat loh ten a sa an chan vek avang leh silaia kahhlum ni ngeia an ngaih avangin Lungzarhtum khawtlang chuan Bualpui (NG) Police Outpost-ah FIR an ziak lut.

LUNGZARHTUM SELE




LUNGZARHTUM SELE thiLUNGZARHTUM SELE


Sele ruang hmu hmasatu Pu Lalcheuva Tlangpui khua chuan a Bawng vulh thlithlai tur leh Sele ngaihven tura a kalin, Mulukawlh thlawk leh chung Mulukawlh te chu lei lama an bir lut leh thin a hmuh avangin Bawng thi an awm a nih ringin a chian a; Lungzarhtum khaw daiah hian Sele ruang hi a hmu ta a ni. Pu Lalcheuva hian LADC Forester, Bualpui (NG)-a RO aiawh mektu chu be pawp nghalin Sele thih thu hi a hrilh a, anni nen hian Sele hi ngun taka an bihchian thu leh silaia kahna hnuhma leh hliam engmah an hmuh loh thu Pu Lalcheuva hian a sawi.

Hetihlai hian Lungzarhtum khawtlang hruaitute chuan nimin zing dar 7 vel khan Sele ruang hmuhna bul hnaiah hian silai puak ri an hriat thu an sawi ve thung a; silaia kahhlum ngei nia an ngaih avangin Bualpui (NG) Police Outpost-ah FIR an ziaklut a, Sele sa lo chansawmtute pawh an chhuizui nghal tih an sawi bawk.

@Lalngheta Ralte Lawngtlai PTC

Read more »
Tweet Share Share Share Share Share

January 07, 2019
tualchhung chanchinChakma Autonomous District Council (CADC)-a MNF Legislature Party hruaitu, MDC Rasik Mohan Chakma chuan sorkarna an siam thei nia sawiin Mizoram sorkar, District Council & Minority Affairs Secretary hnenah sorkar siamtir tura dilna a thehlut.

Hemi chungchangah hian MNF District Hqrs, Kamalanagar chuan thuchuah siamin, CADC-a Congress MDC 4 - Kali Kumar Tongchangya, Amit Kumar Chakma, Buban Kumar Chakma leh Mohan Chakma te chuan vawiin khan MNF Party an zawm a ni, an ti a. Heti a nih tak avang hian member 19 awmna CADC-ah chuan MNF Party chuan member 11 a nei ta a ni, an ti bawk a.



Hetiang hi thil awmdan a nih tak avangin MDC Rasik Mohan Chakma chuan District Council & Minority Affairs Department Secretary hnenah sorkar siamtir turin dilna a thehlut a, tuna Chief Executive Member nihna chelh mektu Shanti Jiban Chakma chuan banna chang hria se an duh thu MNF District Hqrs, Kamalanagar chuan an thuchhuahah chuan an tarlang a ni.

MDC Rasik Mohan Chakma chuan sorkarna an siam thei niin a sawi

Hetihlai hian state sorkar a inthlak avanga Lai Autonomous District Council (LADC) a Pu T..Zakunga kaihhruai Congress sorkar nghing ve mai tura sawina awm chu thu belhchian dawl lo a nih thu, LADC a Congress Legislature Party, Secretary, Diltlang bialtu MDC, Pu Laltlawmlova Chinzah chuan a sawi.



LADC-a eptu hruaituin LADC-ah MNF sorkar din tumna a awm nia a sawi chungchangah, vawiin khan Lawngtlai-a kan Corr. Lalngheta Ralte chuan Congress Legislature Party Secretary hi kawmin, Pu Laltlawmlova Chinzah chuan, tunhma lamin state sorkar a inthlakin Council-ah pawh MDC thenkhat ten ram leh hnam mualphona tur pawh ngaihtuah chang lovin state-a thuneihna changtu party lamah pakaiin, Council sorkar pawh a nghing thin a, tuna LADC, Pu T.Zakunga Chief Executive Member kaihhruai sorkarah erawh Congress MDC ten pelhe tumna an nei lo tih sawiin, ram leh hnam tan rinawm takin Congress MDC te chu an awm a ni, a ti.

Vawiin vek khan Lai District Congress Committee chuan thuchhuah siamin, MDC pasarih chauh nei, MNF ten LADC-ah engtizawng maha sorkarna an siamtheih loh thu tarlangin, sorkarna siam an tum thu an sawi chu mipui tihchi-ai tumna mai a nih thu an sawi a. MDC te, thlantlin an nihna Party duh dan ni lova sawrkarna siam tura Party dang thawhpui leh Party danga inleh chu LADC Constitution, Conduct of Business Rules 2010 chuan a khap tlat tih an tarlang tel bawk. - PTC Lawngtali
Read more »
Tweet Share Share Share Share Share

September 29, 2018
times of MizoramLawngtlai Chanchinthar: Vawiin khan Mizorama national highway kawngpui zauh hna thawktu tur sawrkar laipui Ministry of Road Transport and Highways hnuaia National Highways & Infrastructure Development Corporation Limited (NHIDCL) huaihawtin Lawngtlaiah faina kawng zawh (cleanliness drive) buatsaih a ni.


He kawng zawh hi Swachh Bharat Mission hma lakna thlawpa buatsaih niin, Ngurnunsangi English School-a Class IX zirlaite'n faina chungchang thuziak kengin Lawngtlai Chandmary Square atanga Areopagy thleng kawng hi an zawh a. "India ram a lo fai chuan natna hrik a bo ang", "Lawngtlai khawpui a lo fai nan mi tinin mawh kan phur theuh a ni", "India ram fai nan bawlhhlawh bawm hmang thin ang che" ti tea au rualin, mipui hnenah faina ngaih pawimawh a tulzia an au chhuahpui a ni.

He kawng zawhnaah hian NHIDCL-a thawkte leh zirtirtu thenkhat an tel bawk. - DIPR


Read more »
Tweet Share Share Share Share Share

September 10, 2018
LAWNGTLAIA CYLA KHELMUALA
Lawngtlai Chanchinthar - 08.09.2018: Mizoram State Sports Council (MSSC) hnuai atanga Lawngtlaia Central YLA khelmuala phullem (synthetic turf) phah chu vawiin khan Sports & Youth Services Minister, MSSC President ni bawk Pu Zodintluanga chuan inkhelh nana hman theih turin a hawng.


CYLA khelmuala phullem phah thar hawnna inkhawmah hian Pu Zodintluanga chuan Lawngtlaia phullem phah chu District mipuite tan thil chhinchhiah tlak tak nia a hriat thu sawiin, phullem phah thar avang hian tun atanga kum rei lo teah chuan Lawngtlai atangin footballer tha tak tak an lo la chhuak sup sup dawn a ni, a ti a.

Mizo naupangte hian talent an nei tha a, an talent hai chhuak turin District-a Sports Association te, District Football Association te leh Young Lai Association te'n naupang chher chhuah lam ngai pawimawh a, grassroot football an uar a pawimawh ang, a ti a. A tul chuan coach pawh an pek theih tur thu a sawi.

Infiamna chu hriselna leh mahni inthununa invawn theihna (discipline) atan a pawimawh tih sawiin, Pu Zodintluanga chuan naupangte hi sports-ah teltir ve vek tur a tih tlat thin thu a sawi a. Sawrkarin thalaite leh infiam mite hmakhaw ngaia hma a lak atangin Mizote chuan infiamna kawngah hma sawnna rahbi thar tam tak kaiin,

India ram leh khawvelah pawh kan lang chho ta nawlh nawlh a, a lawmawm hle a ni, a ti. Football turf tam tak enkawl uluk loh avanga hma taka chhe ta mai a awm thin thu sawiin, enkawl dan dika enkawl chuan kum 20 daih tur chu neitu nihna nen uluk taka enkawl turin CYLA, DFA leh mipuite chu a chah nghal.

Khuallian chuan Lawngtlai harsatna ber tui harsatna su kiang tura hma lakna Greater Lawngtlai WSS chu fur tui lianin Tuipui pump intake a chim avangin khua a thal veleh siam thain hawn a nih tur thu a sawi a. UD&PA hnuaiah Lawngtlaia in sa thei lo chhungkaw 500 in sakna tur tifelin, 200 chuan bul an tan tawh thu a sawi a. Chhungkaw 2000 in sakna tur pawh sawrkar laipuiin pawm tawhin, tun atanga rei lo teah pek chhuah a nih tur thu a sawi bawk.
KHELMUALA PHULLEM PHAH

Khual zahawm, AH & Vety Minister Pu C. Ngunlianchunga chuan Mizoram sawrkarin Lawngtlai District mipuite thil ropui tak min tihsak a ni tiin, a hlawhtlinna tur erawh chu District chhung thalaite kutah a innghat a ni, a ti a. Football chu ei zawnna atan hman theih a ni a, phullem phah thar chu football hmanga ram hma sawn nan hman tangkai ni ngei se a duh thu a sawi.

Khual zahawm dang Lawngtlai East bialtu MLA Pu H. Zothangliana chuan CYLA khelmuala phullem phah thar leh Lawngtlaia sawrkar hma lakna thar tam tak awm chu sawrkarin Lawngtlai mipui min duhsakzia tilangtu a ni tiin, min duhsaktute hriat reng leh lawm nachang hriat chu mipuite bat a ni, a ti a. Phullem phah thar chu Lawngtlai District-in malsawmna tam tak aa dawn phahna a nih a beisei thu a sawi.

Lai Autonomous District Council-a Chief Executive Member Pu T. Zakunga pawhin thu sawiin, an awh ve em em, nei thei lo tura an inngaih tawh hnua phullem phah khelmual an nei ve thei ta chu lawmawm a tih thu sawiin, Lawngtlaia CYLA khelmuala phullem phah a nih theih nana hma latute chungah Lairam mipuite ai awhin lawm thu a sawi nghal.

Khelmuala phullem phah thar hawnna hunah hian MSSC Secretary Pu C. Laltlanthanga chuan kal khawmte lawmna thu a sawi a. MSSC Asst Engineer Pu James Lalramnghaka chuan phullem phah hna kal chhohpui a nih dan a sawi a. CYLA President Pu J. Sangthangpuia chuan lawm thu a sawi bawk.

Vawiina phullem phah hawnnaah hian zaithiamte zai ngaihthlak niin, CYLA chuan hnam lam an entir a. CEM team leh CYLA team-in phullem thar lawmna exhibition football match an khel nghal bawk. Phullem phah thar hi MSSC chuan CYLA kutah a enkawl mawhphurhna an hlan nghal a ni.

CYLA khelmuala synthetic football turf phah tur hian kum 2017-2018 khan Ministry of Youth Affairs & Sports - Khelo India Scheme hnuai atangin Rs nuai 450 hmuh a ni a. Turf phah hna hi Lushai Engineers, Ramhlun, Aizawl chuan thawkin, May ni 26, 2017 khan thawk tanin, August ni 24, 2018 khan tha taka zawh fel a ni.

Turf phah zau zawng hi a dung metre 110 leh a vang metre 74 a ni a. Football line hi permanent marking-a rin vek niin, a dung metre 105 leh a vang metre 69-a zau a ni a. Security fencing fit 7-a sanga hung kual a ni. An synthetic football turf phah hi Xtreme TurfD60 niin, FIFA approved company Act Global USA siam a ni. -DIPR 

Credit: Collin Chinzah
Read more »
Tweet Share Share Share Share Share

September 04, 2018
chanchintharLawngtlai Police-te chuan vawiin khan Crime Review neiin inthlanpui neih tura inbuatsaihna an thlirho bawk.

SP Conference Hall-a thutkhawm hi Lawngtlai SP, Amit Goel-a’n a kaihruai a. Kumin January atanga thla hmasa August thla thleng Lawngtlai District-a Police hnathawh dan thlirlêt a ni a. Lawngtlai Police-te hian kumin chhungin thubuai 67 an ziak lut tawh a, heng zinga 45 chu chargesheet tawh a ni. Case Pending 19 an nei mek a, heng case te thaibo dan tur leh hmalak zel dan tur an sawiho a. Thiamloh chantir 17 an nei tawh bawk.

Nungchang that vanga Jail tang chhuah pakhat an nei a, Court-a thubuai ngaihtuah mek 27 an nei bawk a ni.

Assembly inthlanpui neih hmachhawn tura Lawngtlai District dinhmun pawh thlirho a ni a. Lawngtlai District chhungah Polling Station 162 a awm dawn a. Heng zinga Polling Station 13 chu venhim ngai bik-a puan a ni a, amaherawh chu ngun zawka heng venhim ngai zual te hi la ennawn leh tur a nih avangin hei ai pawh hian a la tlem zawk beisei a ni. Inthlannaa Duty tur Central Armed Police Force leh State Armed Police Force te awmna tur leh lo dawnsawn dan tur pawh ngaihtuah a ni bawk.

Lawngtlai Police Crime Review Meeting-ah hian Lawngtlai khawpui chhunga Addl, SP, SDPO leh OC bakah ASI chin chung lam te, Chawngte, Vaseikai, Sangau Police Station leh Bungtlang Out Post atangin SDPO leh OC te an tel a ni.

(Lawngtlai PTC)
Read more »
Tweet Share Share Share Share Share

July 26, 2018
ChanchintharVawiin khan Lawngtlai District Fisheries office chuan BNRGSK Hall, Lawngtlaiah RKVY Scheme 2017-18 hnuaia sangha khawitute tan fish farmers training an buatsaih a. Lawngtlai Bawrhsap Pu N. Chakhai MCS chu Khuallian a ni.

Pu N. Chakhai chuan ram awh zau zawng inang rau rauvah sangha dil siam chu thar chhuah hlawk ber pawl a nih thu sawiin, sangha khawitute chu phur leh thatho taka hna thawk a, Lawngtlai District mamawh phuhru khawp tal thar chhuah tum turin a chah a. Taima leh thahnem ngai taka an thawh chuan district danga thawn chhuah tham thar turin theihna an nei tih hre turin a fuih.




He hun hi Lawngtlai District Fisheries Development Officer Pu LH Zirliansanga'n a kaihruai a. Fisheries-a mi thiamte'n sangha dil siam dan tha zawk te, sangha enkawl, chaw pek leh natna  laka ven dan te, sangha chi (note) thar chhuah dan te leh hlawk zawka sangha thar chhuah dan turte an zirtir a. Zawhna leh chhanna hun leh sawi hona hun hlawk tak hman a ni bawk.

Vawiina training buatsaihah hian Lawngtlai District chuunga sangha khawitu mi 50 vel an kal khawm a ni.
Read more »
Tweet Share Share Share Share Share

July 22, 2018
MNF National Core Committee Member Pu H. Rammawi chuan Sorkarin tar tanpuina (Old Age Pension) thla tina a pek thin chu Lawngtlai District-ah chuan kum khat chuang an dawng tawh lo niin a sawi.





He thu hi nimin khan Aizawl Press Club-a chanchinbumite hmaah a sawi a, a tam zawk chuan he \anpuina hi an eibel ber a nih thu a sawi a. Tunah hian harsatna namen lo tawkin, he tanpuina nghakhlel ngawih ngawih chungin a then phei chu an boral tawh nghe nghe a, a la damte pawh tunah hian an mangang hle tawh niin a sawi bawk.

Pu H.Rammawi chuan he thil hi Social Welfare Department lam chuan Pensioner ten Bank Account an neih loh vang niin April thlatirah khan an hrilh thu a sawi a. He mi hnu hian Mizoram Chief Secretary hnenah amah ngeiin Bank Account an nei ngei a nih tih lanna an Bank Account Number te thil telin May Ni 10 khan ziaka a thlen thu a sawi. Sawrkar lam chuan ‘Signal that loh vang leh Current awm that loh vang’ tia an chhan thu leh vawiin thleng pawh hian heng harsatna hi chinfel a la nilo, a ti.





Hetih lai hian Social Welfare Minister chuan heng pensioner pawisa te hi kumin March Thla thleng released vek a nih tawh thu tualchhung cable TV pakhat hrilhin an chanchinthar-ah chhuah a nih tawh thu a sawi lang a. Sawrkar chhuanlam hi a dik loh zia tilangtu nia a sawi chu Mizoram Rural Bank Branch, Sangau, Bualpui (Ng) leh Lawngtlai-te chu tha takin an function reng bakah Mizoram Rural Bank-te chu Core Banking a ni vek tawh a ni a ti.

Pu H.Rammawia chuan Sawrkarin a rang thei ang berin an Account theuhah an pension pawisa te hi thun nghal turin an ngen thu sawiin tunah hian heng Tar mangangte thlavang hauh tur hian Law Court hawng tura in buatsaih mek a nih thu a sawi bawk.

(AIR CORR)
Read more »
Tweet Share Share Share Share Share

July 20, 2018
Lawngtlai Chanchinthar: Vawiin khan World Vision India (WVI), Chhimtuipui Area Programme leh District Child Protection Unit (DCPU), Lawngtlai te tang kawp huaihawtin Central YLA Hall, Lawngtlaiah naupang khuaikhem (child sexual abuse) a bo theih nana district pum huap beihpui thlak hawnna buatsaih a ni a. AH & Vety Minister Pu C. Ngunlianchunga chu Khuallian a ni.

Lawngtlai ChanchintharPu C. Ngunlianchunga chuan changkanna kawngah a tha zawnga hma sawnna a awm rualin, sual pawh a pung ve zel a, thil thleng thei ni pawha mawi lo, naupang khuaikhem thlengin Mizoramah pawh a hluar chho zel tih sawiin, hemi a reh theih nana theih tawp chhuaha hma latute chu an fakawm a tih thu a sawi a. He'ng mite'n theih tawp an chhuah mek lai hian, an kuta dah ringawt lovin, kohhran leh khawtlangin tang ruala beih ve a ngai tih sawiin, sual tibo tur chuan tanrualna leh thawh hona tha a awm a tul a ni, a ti a. Naupangte khawsak tamna ber chu chhungkua a nih angin, chhungkua atanga bul tan dik a pawimawh thu sawiin, puitlingin naupangte entawn tlaka nun hman a, thil tha lo an zir theihna laka anmahni ven him leh an tawh palh theihna laka mahni inven dan te pawh zirtir a tul a ni, a ti.





He hun, WVI-CAP Coordinator Pu Thanglunpaua Guite kaihhruaiah hian sawrkar mi pawimawh leh naupang himna kawnga thuneitute/hma latute bakah, tlawmngai pawl ai awh leh college zirlaite an kal khawm a. Keynote address sawitu WVI-CAP Manager Pu Paul T. Touthang chuan India rama naupang khuaikhem a hluarzia te, nghawng a neih nasatzia te sawiin, hemi tireh tura World Vision India-in hma a lakna te a sawi.

World Vision India (WVI) chuan India rama hur sualna kawnga naupang khuaikhem tibo turin beihpui a thlak mek a. Kum 2021 ral hmaa ram pum tuam chhuah hman tumin, Mizoramah pawh he hma lakna hi kalpui a ni a. Naupang kum 18 hnuai lam maktaduai 10 zette himna turin India ram district 200 huam chhunga khawpui leh thingtlang khaw 7000-ah campaign hi neih tum niin, Mizoram tiamin state 15-ah campaign hi neih tawh a ni. State Level Consultation and Launching programme chu July ni 11-12, 2018 khan Aizawlah neih niin, hemi bawhzuina kal zelah hian district level campaign pawh hi buatsaih a ni.





Thu sawitu dang, Child Welfare Committee (CWC) Lawngtlai Chairperson Pu HL Rinawma chuan kum tin naupang laka hleilenna leh hursualna kawnga khuaikhem report a pun tial tial thu sawiin, Lawngtlai district chhunga case awm tawh 318 zinga 28 chu hursualna kawnga khuaikhem tuar an nih thu a sawi a. A bika humhim leh enkawl ngai naupangte tana District Chlid Protection Unit-in service a pek theih hrang hrang bakah, naupang himna kawnga an hna thawh hrang hrang leh Lawngtlai District dinhmun tlangpui a tarlang a. Dan bawhchhiatna a lo thlenin ngawih bopui mai lova a kalna tur dik taka report thin turin leh Lawngtlai District bik tana report theihna tur number 9774222275 leh 9612018408 te chu hmang tangkai turin mipuite a sawm nghal.

He hunah hian DCPU Lawngtlai-a Probation Officer (IC) Pi PC Malsawmtluangi chuan mipui kal khawmte chu naupang khuaikhem tibo tura intiamna a sawi rualtir a. Probation Officer (NIC) Pi Zohlimpuii Hmar chuan lawm thu sawiin, hun khar a ni a. Hun hman zawh hian naupang khuaikhem a bo theih nana intiamna hming ziak (signature campaign) buatsaih niin, mipui kal khawmte'n hming an ziak hlawm a ni. -DIPR
Read more »
Tweet Share Share Share Share Share

July 18, 2018
LAWNGTLAILawngtlai District, Bungtlang South-a sawrkar hnathawk inzawmkhawm, Govt. Employees Association hmalaknain puitling, ziak leh chhiar thiam lote tan Zan Sikul din a ni.

Bungtlang South Zan Sikul hi tunkar Thawhtanni khan Govt Employee Association Chairman, BDO Pu Daniel Sailo chuan a hawng a. Pu Daniela chuan Lawngtlai District chhungah Bungtlang South Block chu puitling ziak leh chhiar thiam lo tam berna a nih avanga hetianga hma la hi an nih thu a sawi a. Ziak leh chhiar thiam tam lam tehnaa Mizoram dinhmun tihniamtu an nih avanga tanlak a ngaih thu leh an hmalakna chuan rah tha a chhuah ngei a beisei thu a sawi bawk.




Pu Daniela chuan ZAN SIKUL din tur hian a hmain zirchianna an neih thu leh Bungtlang South khua bikah puitling ziak leh chhiar thiam lo mi 150 vel hming an lak khawm thu Lawngtlaia kan Corr. Lalngheta Ralte a hrilh a. Ziak leh chhiar thiam lo nih zah vanga inziak lut duh lo mi thenkhat an awm avangin hming an lakkhawm aia tam hi ziak leh chhiar thiam lo an awm a rin thu a sawi a. Bungtlang South khuaa hma an lak zawh hian Bungtlang South Block chhunga khawtinah zirchianna nei lehin, puitling zawng zawngin ziak leh chhiar an thiam vek theih nan hmalak zel an tum thu te, an hmalakna chu Mizoram sorkar Education Deptt hnuaia Adult Education Wing bakah MSRLM te pawhin an phurpui thu leh anni te nen hian hmalak zui zel an tum thu a sawi bawk.

Bungtlang South ZAN SIKUL-ah hian tlawmngaiin mi pathum an thawk dawn a. Zirtirtute hian mi pakhat zel ziak leh chhiar an thiamtir hnuah Cheng 300 zel an hlawh ang a; Puitling ziak leh chhiar zirte pawh an thiam veleh lawmman pek an ni dawn bawk a ni.

(PTC Lawngtlai)
Read more »
Tweet Share Share Share Share Share

June 25, 2018
Lawngtlai Bawrhsap Pu N. Chakhai MCS chuan vawiin khan Lawngtlaia chanchinbu mite chu a office chamber-a lengah sawmin, District hma sawnna kawnga thawh ho dan tur a sawipui.

LAWNGTLAI CHANCHINTHARLawngtlai Bawrhsap Pu N. Chakhai chuan Lawngtlai Bawrhsap hna a zawm tirhah boruak hrang hrangin a tlakbuak zui avanga chanchinbu mite nen inkawm khawmna hun a buatsaih hma thei lo chu pawi a tih thu a sawi a. Chanchinbu mite chu sawrkar hma lakna puanzar kawngah te, mipuite zirtir kawngah leh sawrkar khalh ngil kawngah te mawhphurhna lian tak chelhtu, sawrkar leh mipui inkara palai hna thawktu pawimawh tak an ni tiin, Lawngtlai District hma sawnna atan thawh hopuiah a sawm a. DC chuan amah maiin hna a thawk thei lo va, District hma sawnna tur chuan department dang te, chanchinbu mite leh mipuite nen thawh hona tha tak neih a ngai a ni tiin, District tana hna a thawhna kawngah a tul anga finchhuah zel turin MJA member-te chu a sawm nghal a ni.


Lawngtlai District MJA te hi an President Pu ZD Dengngura'n hovin, DC chu District hma sawn nan thawhpui zel an tum thu an sawi a. Chanchinbu mite’n an tih tur an hlen rualin, sawrkar thuneitu lam paw'n chanchinbu mite laka an tih tur pawh tha taka an hlen chhuah an beisei thu an sawi bawk. Lawngtlai District MJA te hian District chhunga hma sawnna hna thawhte DC leh chanchinbu mite'n a hmuna en ho thin ni se an tih thu te, sawrkar office hrang hrangte'n pisa kai hun ngai pawimawh se an duh thu leh chanchinbua advertisement chhuah tur reng reng a dan dik taka DIPRO kal tlanga pek ni se an duh thu te Bawrhsap hnenah hian an thlen a. MJA Lawngtlai District patron atana ruatna lehkha an hlan nghal bawk.

He inkawm khawmnaah hian Lawngtlai DIPRO Pu C. Lalhruaitluanga MIS pawh telin, inhmelhriatna thingpui an in ho nghal a. District hma sawn nana hma lakna tur hrang hrang an sawi ho a ni. -DIPR
Read more »
Tweet Share Share Share Share Share

June 18, 2018
Lawngtlai Chanchinthar:  Tukin khan DM&R Minister Pu C Ngunlianchunga’n Lawngtlai-III lei tlahniam a hmunah enin khawtlang hruaitute nen hmalak dan tur an sawiho.

tualchhungLawngtlaia kan corr. Lalngheta Ralte dawi dan chuan, NH 54-in a paltlang Lawngtlai-III lei tlahniam hi kum 1995 atanga tlahniam tan a ni a, a hmaa kawng ana awm In pawh tunah hian feet 7 velin a tlahniam tawh a. Minister chuan he lai lei che ven nan hian Cheng Nuai 70 dah a nih thu leh pawisa pawh DC kuta a awm tawh thu a sawi a. He pawisa hmang hian Checkdam siam a ni ang a, tuiluankawr pawh a remchan dan angin siam a ni ang.

Vawiin vek khan DM & R Minister Pu C.Ngunlianchunga ho hian ruahsur vanga chhiatna thleng chungchang Lawngtlai DC Conference Hall-ah sawiho a ni a. Minister chuan chhiatna thlenga harsatna tawk ten DC hnena report an pekte bawhzui vat a nih thin loh avangin Lawngtlai District-ah harsatna a thleng fo thin tih sawiin, mahni hnaa rinawm taka thawk turin kalkhawmte a chah a. Khuarel chhiatna vanga In chhia te, tuikhuah leh thil dang chhia report, a tak hmuh tur awm lo thin pawh thawktute inthlahdah vang liau liau a ni, a ti.

Minister chuan state sawrkarin chhiat tawkte chhawmdawlna atan pawisa engemawzat a dah thin a, chhiat tawk tak takte tanpui chu sawrkarin a hreh ngai lo, a ti a. Mizoram pumpuia khuarel chhiatna tuartute chhawmdawlna atan Cheng Vaibelchhe 35 leh Nuai 9 hmuh a nih thu pawh sawiin, hei hi District hrang hrangah sem darh a ni, a ti.

Vawiin inhmuhkhawmnaah hian Lawngtlai khawpui chhung veng hrang hranga tuiluankawr siam ngai leh chhiatna thlen hlauhthawnawm lai te venhim a nih theih dan tur te pawh sawiho a ni a. Central YLA Playground sir leimin venna tur NEDP sum Cheng Nuaih 30 ruahman a nih tawh thu pawh sawilan a ni.

(Lawngtlai PTC)
Read more »
Tweet Share Share Share Share Share

June 02, 2018
Lawngtlai: Vawiin khan Lairam Isua Krista Baptist Kohhran Central Thalai Pawl leh LADC Environment Forest & Climate Change Deptt. ten thawhdunna thuthlung an ziah bawhzui nan Lawngtlai Khawpui tuilakna Chengkawllui thianfaia hnatlang neih a ni.

Hnatlang pual hian Lawngtlai Areopagy ah Inkhawm tawi an nei a, LADC-a Executive Member, Forest changtu Pu KC.Malsawmdawngliana chuan hawnna thusawiin, Lawngtlai Greater Water Supply Scheme atanga Lawngtlai Chawm tur tui an pump chhohna Chengkawllui chu a chhehvela awm ten bawlhhlawh an paih nasat avanga a thinghlim tawk loh thu sawiin, hun lokal zel turah, tui thianghlim a nih theihna turin a tibawlhhlawhtu nilo tura tan lak tlan angaih thu a sawi bawk.


He hunah hian PHE Lawngtlai Watsan Division a EE Pu.Laltlanchhunga pawhin thusawiin, Lawngtlai tui lakna ber Chengkawllui chu Deptt pawhin an tihfai thin thu leh enkawl ngun erawh angaih thu a sawi a, bawlhhlawh paih thin chuan tui a tih bawlhhlawh avang a harsatna an tawh thin thu a sawi. 

LIKBK Central Thalai Pawl Secy Rev.Suikharliana, chuan LADC Environment Forest & Climate Change Deptt nen inremna an ziah angin, hun remchang hmasa berah Unit tinten thingtiak an phun leh tur thu a sawi a, a hmasaber atana hnatlang vawiina an neihah Pastor Bial Pali College Veng Pastor Bial, Chanmary Pastor Bial, Vengpui Pastor Bial leh AOC Pastor Bial te an hnatlan thu leh Pastor Bial dang ten hun remchanga an tih fai leh dawn thu a sawi bawk.


Vawiina hnatlangah hian Central YLA Kumpuan Committee te telin, Committee Member engemawzat an thawk chhuak a, hnatlang zawng zawng hi Member 220 vel an ni a,Chengkawllui chu a hnar atanga tifai tanin, a tawp Tui pump na thleng an thianfai vek tih kan corr chuan a sawi a ni.

(Lawngtlai PTC)
Read more »
Tweet Share Share Share Share Share

May 29, 2018
Ngurnunsangi English School (NES), Lawngtlaia Legal Literacy Club din thar chu vawiin khan Lawngtlai District Legal Services Authority (DLSA)-a Secretary, Lawngtlai Chief Judicial Magistrate ni bawk Pu BT Lala Sakachep MJS chuan a hawng.
NGURNUNSANGI ENGLISH SCHOOL LAWNGTLAI

Legal Literacy Club hawnna inkhawm hi Advocate Pu C. Lalrinfela’n a kaihruai a. CJM Pu BT Lala Sakachep chuan dan hriat pawimawhzia sawiin, dan hriatna chuan mi a tihuaisen a, thil tihsual tur lakah mi a veng thin, a ti a. Legal Literacy Club chu zirlaite tan dan hriatna kawnga anmahni kaihruaitu tha tak a nih tur thu sawiin, zirlai naupangte pawh dan chu hriat tuma zir tur leh anmahni leh an chhungte tana tangkai taka hman tum turin a chah a ni.

He hunah hian Advocate Pu MC Lalbiakliana chuan Legal Literacy Club awmzia, a thil tum leh kal chhohpui dan tur a sawi a. NES neitu leh Principal Pi Ngurnunsangi pawhin zirlaite fuihna thu a sawi bawk.


Legal Literacy Club din hi National Legal Services Authority (NALSA) hma lakna niin, dan leh hrai lama tui mi sikul naupangte’n an phak tawka dan leh hrai an zir a, khua leh tui tha ni tura buatsaih an nih theih nana din a ni a. India ram pumah Club 1040 din tawh niin, member-ah zirlai naupang nuai hnih chuang an awm mek a ni. NES Legal Literacy Club-ah hian member atan zirlai naupang 20 thlan chhuah an ni a, zirtirtu pakhat (nodal teacher)-in kaihruaiin, DLSA atang hian a tul angin an vil zui reng bawk dawn a ni.

NES Legal Literacy Club hman atan hian Lawngtlai DLSA chuan computer, lehkhabu chhuar (bookshelf), thutthleng (chair), dawhkan leh lehkhabu eng emaw zat an pe nghal a. He’ng hmanruate hi member-te’n an hun awlah dan zir nan an hmang ang a, a remchan danin DLSA lam atangin class te pawh neihpui thin an ni ang.

Lawngtlai DLSA hian NES bakah hian Lawngtlai District chhunga zirna in eng emaw zatah Legal Literacy Club dinna tur hmun a thlang fel tawh a. He’ng LLC dangte pawh hi hawn theih thuai beisei a ni.
Read more »
Tweet Share Share Share Share Share

April 28, 2018
MIZORAM CHIEF SECRETARY-IN LAWNGTLAI A TLAWHMizoram Chief Secretary Pu Arvind Ray IAS chuan vawiin khan Lawngtlai a tlawh a. Lawngtlai Bawrhsap Pu N. Chakhai MCS hovin sawrkar official-te'n lo dawngsawngin, Circuit House Conference Hall-ah inkawm hona hun an buatsaih.

Pu Arvind Ray chuan office chawlh ni a ni chunga Lawngtlai District-a sawrkar official-te'n ko kim taka an lo dawngsawng chu lawmawm a tih thu a sawi a. Tunhnaiah harsatna neuh neuh a awm chunga CADC inthlan tluang tak leh muanawm taka kalpui a ni thei chu inthlan buaipuitute an fakawm tiin, lawm thu a sawi nghal. Chief Secretary chuan Lawngtlai tlawha a lo kal chhan chu Lawngtlai District-a sawrkar hna kalpui a nih dan leh harsatna awmte a taka hmu turin a nih thu sawiin, office kai ni-ah office chhuahsan a harsat thin avangin kar tawp chawlh remchanga laa zin chhuak a nih thu a sawi bawk.

MIZORAM CHIEF SECRETARY-IN LAWNGTLAI A TLAWH

Chief Secretary chuan a changtu officer-te chu zirna, hriselna, tha eng (power & electricity), tui leh kawng dinhmun tlangpui zawtin, official-te chuan an dinhmun leh hma bak te, harsatna an tawhte an lo hrilhfiah a ni.

He hunah hian District Administration leh DRDA chuan Chief Secretary hi Lai puanbah leh kawrchung ban bul an pe a. Official kal khawmte inhmelhriattirna hun hman niin, thingpui in ho a ni bawk. Hemi hnu hian Chief Secretary chuan District Hospital Lawngtlai tlawhin, DMS leh CMO hovin doctor leh thawktu dang eng emaw zatin an lo dawngsawng a. Damdawi in pindan hrang hrang fan kualpuiin, an hmanraw neihte an lo enpui a. Damdawi inin hma a sawn dan leh an hma chhawp leh an mamawhte an lo hrilh a ni.

Chief Secretary hian KMMTTP kawngpui sial mek chu AOC Veng atanga Chawngte kawng pawhna thleng zawhin, a en nghal bawk a. Zanah Lawngtlaiah riakin, naktuk zing hian Siaha a pan leh dawn a ni.-DIPR
Read more »
Tweet Share Share Share Share Share

March 08, 2018
CHOKHLEI KUT VAWI KHATNAMizorama a vawi khat nan Chokhlei Kut (Rhododendron Festival) 2018 chu vawiin khan Mizoram Larsap Lt Gen. (Retd) Nirbhay Sharma PVSM, UYSM, AVSM, VSM chuan Lawngtlai District chhunga Sentetfiang khuaah a hawng.

Larsap chuan Mizorama a vawi khat nana Mizorama tualto pangpar ngei, chhawkhlei hming chawia kut buatsaih a ni chu lawmawm a tih thu leh a hlawhtlin nana tha leh zung sengtute inpekna zawng zawng chu fakawm a tih thu a sawi a. Chokhlei Kut chu state dang kut hmingthang tak takte el pha thei tur khawpa beiseiawm a nih thu sawiin, chuti ang a nih theih nan chuan a kut dawltu district mipuite chu theih tawp chhuaha tan la turin a chah a ni. Larsap chuan thil ropui tak tak chu thil te tham te atanga intan a ni thin tih sawiin, ram leh state ropui din tur paw'n khaw tin, district tina mipuite an pawimawh ber a ni, a ti a. Ram leh hnam tana mahni theihna zawna theih tawp chhuah turin Kut chhimtu mipui kal khawmte chu a sawm a ni.



Khual zahawm Lawngtlai East bialtu MLA Pu H. Zothangliana chuan Chokhlei Kut chu khuavel deng chhuak khawpa kut ropui leh hlawhtling ni thei tur, hnam ziarang leh khuarel thila ram hausakna chawi larna leh humhalhna tha tak ni bawk si a ni, a ti a. Kut chu hlawhtling taka hmang turin duhsakna a hlan a ni.

CHOKHLEI KUT VAWI KHATNAKut hawnna hi Sentetfiang khelmualah chawhma dar 11-ah tan a ni a. Chairman, Lawngtlai Bawrhsap Dr Arun T., IAS chuan kal khawmte lawmna thu sawiin, Kut chu chhawkhlei par humhalhna tur leh tourism tihhmasawnna tura buatsaih a nih thu a sawi a. Lawngtlai DCF Pu PC Lalchhandama'n Chokhlei Kut buatsaih a nih dan a sawi a. LADC CEM i/c Pu H. Chhuanawma, CYLA General Secretary Pu LH Ramdingliana te pawhin thu an sawi a. LADC-a Revenue EM Pu C. Lallungmuana'n lawm thu a sawi.

Chokhlei Kut hi Larsap chuan darkhuang vua a, thalfang kapin a hawng a. Hawnna hun hman zawh hian department leh mimalin an thil siam chhuah an phona dawrte (stall) chu Khual zahawm leh mi pawimawh dangte nen an fang kual nghal a. Larsap hi Kut Organising Committee leh Sangau Joint Action Committee te'n chawimawina lai puan an lo pe a. Amah Larsap hian Sentetfiang VCP chu lawm thu sawina thilpek a hlan bawk.

Chokhlei Kut hi ni hnih awh tur niin, March ni 9 chawhnu hian khar a ni dawn a. Hornbill Festival rock contest winner Ronnie Lalrinmawia bakah, Lawngtlai District-a zaithiam lar tak takte an zai a. Cultural Club hrang hrangin hnam lam hmuhnawm tak tak an entir a. Tunlai lam hmuhnawm tak tak entir a ni bawk.



CHOKHLEI KUT VAWI KHATNAKut-ah hian stall eng emaw zat buatsaih a ni a. Department leh mimal te'n an thil siam leh thar chhuahte pho chhuakin, an hralh nghal a. He'ngah hian mipuite'n an hriat duh angte an zawt fiah thei nghal a. Vety Dept chuan ran entirna (animal health camp) an hawng bawk a ni.

Vawiin hian chawhnu lamah cultural programme hman zui niin, naktuk lam hian rock concert, photo exhibition, Chokhlei Idol thlan, Chokhlei King & Queen thlan te pawh buatsaih a ni leh dawn a. Zingkarah ruahmanna fel tak hnuaiah Phawngpui National Park tlawh theihna hun ruahman a ni bawk. Kut hi LADC-a elected member te, sawrkar official te, NGO hrang hrang hruaitute leh mipui thahnem takin an chhim a ni.-DIPR
Read more »
Tweet Share Share Share Share Share

March 06, 2018
March ni 8-9, 2018-a Lawngtlai District Sentetfiang khuaa Chokhlei Kut (Rhododendron Festival) hman tur atana inbuatsaihna hrang hrang chu vawiin khan Lawngtlai DC Conference Hall-ah Lawngtlai Bawrhsap Dr Arun T., IAS hovin thlir ho a ni. 


LAWNGTLAIAH CHOKHLEI KUT 2018He hunah hian Kut Organising Committee-in sub-committee hrang hrang a dinte leh mawhphurhna neitute’n hma an lak dan ngaihthlak ho a ni a. Kut atana inbuatsaihna chu tluang takin a kal chho mek zel tih tarlan niin, thil tul dang te pawh ngaihtuah ho nghal a ni a. A hmanna tur hmunhma lo buatsaih leh dawrte lo sak te chu Sangau BDO leh Sub-Hqtrs YLA kuta a awm angin, anni hian hma an la chho mek a. Stall-a inpho tur department leh mimal lo buaipui chu LADC Art & Culture Dept kut niin, anni hian a kalte atanga zaithiam Chokhlei Idol thlan te, hnam lam entir tur leh tualchhuak infiamna lo ruahman te an hma tel nghal dawn a. 


Lungzarhtuma sele thlalak leh Phawngpui tlang leh nungchate thlalak entirsiak (photo exhibition) leh Kut laia Phawngpui tlang tlawh theih dan tur chu Chhimtuipui Wildlife Division te’n an ruahman ang a; rock concert chu CYLA-in MZI te nen buaipuiin, hunbi indawta hnam thuam lo danglam chhoh dan entir turin LWA lam beisei an ni bawk. Chokhlei King & Queen thlan chu Lawngtlai Photographers’ Association (LPA) kutah a awm dawn a, anni hi official photographer atan ruat nghal an ni.-DIPR
Read more »
Subscribe to: Posts (Atom)

Contact Form

Name

Email *

Message *

TOM © 2025. All Rights Reserved.
Published by Songate G

Ads Section

Powered by Blogger.