TIMES OF MIZORAM

AIZAWL, March 3: It’s not a common sight to see a ranking official entertaining the crowd on any occasion. A junior IPS officer Shasank Jaiswal, currently serving as SP of Mamit district in western Mizoram, literally rocked it when he enthralled the crowd with a popular Mizo song during Chapchar Kut festival at the district headquarters on Friday. Revellers of the festival swung to the beats when Jaiswal beautifully rendered the 1990s’ hit ‘Di Chambawihpuii’, originally sung by popular Mizo singer C Lalrinmawia, and 2017’s hit ‘Sarah, I Zunzam A Ni’ making the festival more lively.  

Video clip of the IPS officer rocking the crowd became an instant hit when it was uploaded in social media. “We never knew our SP had such a good voice and could sing a Mizo song in such perfection,” said a resident of Mamit. In a society like Mizoram where many non-locals, especially people from the plains who are called as ‘Vais’, find it difficult to mingle with the crowd, the friendly and downto-earth gesture of the IPS officer may build better relations with the people in the border district where communal issues occasionally flare up. Jaiswal was posted as SP of Mamit district in August 2018, after he was transferred from New Delhi. 

Chapchar Kut 2019: Zoram chhung hmundangte rualin vawiin khan Mamit GSA Playground ah Chapchar Kut Organising Committee 2019 Mamit District, ruahmanna in mizote kut ngaihhlut leh ropui ber Chapchar Kut chu hman niin Pu H. Lalzirliana, 3-Mamit bialtu MLA chuan Kut Pa niin Chapchar kut a hmanpui. Kut thlengtu hi Pu Jacob Lalawmpuia Addl DC, Mamit a ni thung a ni.

Kut Pa Pu H. Lalzirliana chuan kut hmang tura kalkhawm zawng zawngte kut chibai a buka, Mizote kut ngaihhlut leh ropui ber ang hiala kan ngaih chapchar kut mahni khua ngeia hmang theia a awm chu lawmawm hle a, chutih ruala mahni tual ngei-a kutpa ni a Chapchar kut a hmang chu a lawm leh zual thu a sawi.

Mizo Kristian leh Tribal nih chu thil inhmeh tak a nih thu sawiin Mizoten mahni nihna leh kan thil tharchhuahte kan in hlut sak thiam chu kan hnam changkanna tur leh dinchhuahna tur a ni a ti. Khawvelah hnam bo engemaw zat an awm tawh laia mizo nuai 11 awrh mai mizo nih nuam ti em em a, kan awm chu kan Pathian avang a nih thu a sawiin, Khawvel hnam changkang chanchin kan sawiin khawthlang ram tiin kan sawi thin a, Keini chuan tlawngthlang tih chuan nuihzat deuh turah kan ngai thin, hemi tibo tur leh Mamit District Aspirational District atanga khaichhuak turin kan Sawrkar Department hrang hrang aiawhte leh mipuite kan pawimawh thu a sawi. Mizo tak sia, mahni hnam zia leh nunzia zahpui lova Kut hlim taka hmang turin Kut hmangtu zawng zawngte duhsakna a hlan a ni.

Kut thlengtu Pu Jacob Lalawmpuia, Addl DC chuan Chapchar Kut 2019 hmang tura kalkhawm mipuite chungah lawmthu a sawia a biktakin Kut Pa Pu H. Lalzirliana Kut Pa ni tura sawmna a tihlawhtling chu lawmawm a tih thu a sawi, Chapchar kut hlawhtlinna tura tha leh zung sengtu Organising Committee, YMA branch hrang hrang leh MHIP leh midang zawng zawngte chungah lawmthu a sawi a ni.

Chapchar Kut 2019 hmanna hunah hian Pu K Eley Rosanga, Chairman Chapchar Organising Committee chuan thusawina a nei a, Mamit Khawpui chhunga YMA Branch hrang hrang leh MCO Mamit te atangin hnamlam entir a ni a, Chhimveng Branch YMA te chuan Costume Parade entirin Mizo infiamna hrang hrangte entir a ni bawk a, MHIP Branch hrang hrang ten Parlam an entir bawk a ni, Mamit District chhunga Group YMA atangin Lallen Branch YMA te’n hnamlam an entir bawk. Mimal zaithiam tak tak te’n zaiin mipui an awi a ni.

Chapchar Kut Organising Committee 2019 huaihawt hian Chapchar Kut Miss thlanna neih leh a ni bawk ang. ~DIPR

MAMIT CHANCHINTHAR: Vawiin khan Mamit District Swachhagrahi Meeting chu I&PR Conference Hall Mamit-ah neih a ni a, Pu Vanlalngaihsaka IAS District  Bawrhsap, Mamit District chuan he hun hi khuallian niin a hmanpui.

Pu Vanlalngaihsaka chuan faina chu mahni inchhung atanga tan tur anih thu leh chu chuan faina kawnga khawtlang anga hma kan lakna ah rah a chhuah dawn a ni a ti. Faina chu PHE Department kutken chauh tur nilovin mitin te'n kan tihtur leh hma kan lakna tur a ni a ti bawk. Mamit District-in faina kawnga hma kan lakna leh lawmman hial kan laktawhna chu nasa zawka chhunzawm turin kalkhawmte a chah a ni.

He hun khualzahawm nia hmanpuitu Pu Lalrammawia, SE, PHED Rural Watsan Circle chuan thusawiin Swachh Bharat Mission tihhlawhtlin nan chuan kan nunphung leh khawsak zia kan thlak danglam a ngai a ni tiin fai duhna hian kan thinlung leh nunah hmun pawimawh tak chang rawh se tiin kalkhawmte a sawm ve bawk a ni.

Vawiin Metting hi Pu Lalzawmliana Sr EE PHED Mamit Watsan Division chuan a kaihruaia, Pu K. Eley Rosanga President Sub Hqrs YMA leh Pi Laltharzeli, Ambassador SBM(G) Mamit District te'n thusawina an nei a, Pu Peter Lalmuanzova, Co-Ordinator SBM (G) chuan Swachhagrahi Duty leh Responsibility chungchang sawifiahna a nei bawk.

Vawiin meeting ah hian Mamit District chhunga Swachhagrahi Village Committe te an tel tha hle a. Kalkhawmte atang hian Swachhagrahi Appointment Certificate hlan nghal an ni. ~ DIPR

Nizan khan Siamliana Hall Mamit-ah Mamit Discussion Forum (WhatsApp Group) te chuan Mamit khawpui chhunga mi hmingtha bik Pu H. Lalzirliana 3-Mamit( A/C) MLA, Dr. Joseph C. Lalremruata Associate Professor, Govt Mamit College, R. Lalruatfeli MZU Topper (Edn) te chawimawina hun an hmang.

Chawimawi takte atanga thusawi ngaihthlak niin, Pu H. Lalzirliana 3-Mamit (A/C) MLA chuan Mamit mipui amah thlang tlingtute chungah lawmthu a sawi a, thil tha ti-a midangte tana malsawmna ni turin thlan bik an awm lova, tu tan pawh thil tih theih a ni a ti. Mamit Discussion Forum te'n chawimawina chang hria-a midangte tana an luanchhuahna chu fakawm a tih thu a sawi. Mamit Constituency chhungah MLA atana thlan tlin anih ve takah chuan Mamit District-in hmasawnna hmel leh rahbi thar a rah theihna turin a theihtawp a chhuah dawn thu a sawi a, Mamit khawpui chhungah Social Welfare hnuai atangin Tribal Girl Hostel sa tura ruahmanna siam a ni tawh a ni a ti.  Hmasawnna hmel lanna tur kawng tam tak bawhzui chhoh mek a nih thu a sawi bawk.

Kan bial kan district hmasawnna turin mitinte'n ngaihtuahna kan sen a tul thu sawiin Mamit District mipuite chu hmasawnna kawng zawh turin thawhpuiah a sawm a ni.

Dr Joseph Lalremruata, Associate Professor pawhin Political Science atanga Doctorate degree inziak tling tura a kawng zawhte sawi zauna neiin Mamit khawpui leh kan district pawhin hmasawnna kawng kan zawh theihna tura a hmasa ber chu zirna kan hlamchhiah lova, kan tu leh fate tana tan kan lak thar sauh sauh a tul thu a sawi bawk a ni.

He hun hi Pu H. Vanlalhruaia, Vice Chairman Org Committee chuan a kaihruai a. Mamit Discussion Forum aiawhin Pu H. Lianzela Deputy Secretary, Govt of Mizoram,  DF Adviser chuan thusawiin Mamit Discussion Forum(WhatsApp Group ) chu Group tangkai tak leh Mamit khawpuiin hmasawnna  rahbi a rah theih nana ngaihtuahna sengtute an nih thu sawiin group satliah a nih loh thu a sawi a. Group member te'n chawimawi phu an tih an thlanchhuah bikte chawimawina chu a dawngtute tan pawh thil hlu tak nia a hriat thu a sawi. Pu C. Lalramdinzela President MJA pawhin Mamit chhulchhuak MLA an nei chu midangte ai pawhin Mamit mipuite'n beiseina an neih san thu a sawi a, Khawtlang leh ram hmasawnna turin khawtlang hruaitute an pawimawh thu leh MLA, Sawrkar Officials leh khawtlang hruaitute thawhhona tha tak hnuaiah ram hmasawnna tur ruhrel din a pawimawh thu a sawi bawk.

He hunah hian Mamit Discussion Forum group members te bakah khawtlang hruaitu, sawmbikte leh Chawimawina dawngtu chhung leh khatte an tel a ni.

Mamit Discussion Forum(WhatsApp Group) te hi ni 6.11.2016-ah din tan niin members mipa 45 leh Hmeichhia 4 an awm mek a, Group members thawhkhawm atang hian kum 2017 September thla khan thalai hna zawng mekte tan free coaching class buatsaih a ni a, District Hospital leh Home hrang hrangah tanpuina pek an ni tawh bawk. Hei bakah hian Damlo harsa zualte tan a tul dan azirin tanpuina thawhkhawm thin a ni bawk a ni. ~ DIPR

MAMIT CHANCHINTHAR: An DC sawn chhuah phutin nimin khan Mamit mipuiin kawng an zawh a, buaina leh harsatna thleng a awm lo.

Kawngzawh tan hmaa hun hman kaihruaitu Mamit Sub-Headquarters YMA Vice President Pu K. Lalthanzama chuan Mamit DC Bhupesh Chaudhary-a chu Mizo mipui zah lo leh tham lo takah puhin rang taka Mamit District chhuahsan tura an duh thu leh hma lam hun atan Mamit District-in amahah beiseina sang tak an neih ngam tawh loh thu a sawi. Pawl hrang hrang hruaitu leh khawtlang hruaitute pawhin an DC chu rang taka sawn chhuak tura sawrkar an phut thu an sawi a. Mamit Central Block Congress Committee President Pu PC Lalthanzuala pawhin Mamit DC khawsazia chu mipuiin an tuar zo tawh lo a, DC sawn chhuah a nih theihna tur hian bialtu MLA Pu John Rotluangliana pawhin theih tawp a chhuah thu a sawi.

Kawngzawh tawpnaa thusawitu Central YMA President Pu Vanlalruata chuan vawiina Mamit mipui hun hman dan chuan DC sawn chhuah a tul tawhzia a tilang a, a hlawhtlin hma chuan beih chhunzawm zel a ni ang, ti a. Mipuiin hetiang taka an duh loh DC hi rang takin sawrkarin sawn chhuak rawh se, a ti bawk.

Mamit mipui hian Charkawn atanga DC Complex thleng kawng an zawh a, resolution panga - Mizoram sawrkar leh All NGO, Mizoram te duh dan kalha Tripura-a awm Bru-te Electoral Roll-a a ruka rala thun luih a tum hi kan duh lo, tih te, Mizoram MLA General Election 2018 lo awm turah hian Mizoram pawnah Bru-ten engti kawng mahin vote an thlak kan rem ti lo; Mizo mipuite leh tlawmngai pawlte hmusit leh diriam taka tawng khuma, man atana vau thintu DC hi kan duh lo; Pu Bhupesh Chaudhary Deputy Commissioner, Mamit kaihhruaina hnuaiah MLA Election felfai leh thianghlim a awm theih kan ring lo tih leh Pu Bhupesh Chaudhary, Mamit DC hi sawrkar-in September ni 10, 2018 hma ngeiin Mamit atangin sawn chhuak rawh se, tih te an pass a ni. - (AIR Corr)

Chanchinthar ToMZ: Mizoram sawrkar chuan mipui tan harsatna a thlen loh nan Aizawl, Lunglei, Serchhip, Champhai leh Mamitahte IPC Section 144 puangin zanin atangin heng districtahte hian Magistrate leh Policete duty tura tirhchhuah nghal an ni ang.

Home Minister leh Acting Chief Minister ni bawk Pu R. Lalzirliana hovin a chenna inah Lump Sum Higher Secondary School 9-te thil nawr chungchang leh law and order lama a thil nghawng te ngaihtuahin School Education Department, Home Department leh Finance Department hotute an thukhawm a. Finance Minister Pu Lalsawta leha School Education Minister Pu H. Rohluna te an tel.

Thutkhawmah hian thil awm dan ngun taka ngaihtuah a nih hnu in heng private school pakua ten Ad-hoc Grant in Aid a hlankai an phut chu tun sawrkar sum dinhmun en in tihsak theih a niloh thu a sawi a. Sawrkar atanga puihna Lump Sum Grant dawng mekte tan an sum dawn zat hi tipung turin a hma atang tawh khan hma lo lak tawh niin, sawrkarah file a kal mek thu sawi a ni bawk.

Home Minister chuan nu leh pa ten kan fate tan a a tha thei ang ber kan duh ang chiah hian sawrkar pawhin mipui tan a tha thei ang ber a tlin chinah chuan tih a duh thin a ti a. Chutihrual chuan sum neihin a tlin tawk ang zela rualkhai taka hmalak a ngaih thin avangin private school ten Ad Hoc Grant in Aid a hlankai an dilna chu tihhlawhtlin sak duh hle mahse a theihloh a ni, a ti bawk.

Committee hian thil phut nawr a zirna tibuai zawnga zirna in hial khar a ni chu pawi an tih thu leh, zirna leh zirlaite hma ngai tan chuan hetiang zawnga chet te, mipui chetvelna tibuai zawnga inkalpawhna kawng dan te chu thalo a ti a. 

Hemi avang hian mipui tan harsatna a thlen loh nan Aizawl, Lunglei, Serchhip, Champhai leh Mamit ah te IPC Section 144 puan nghal niin, zanin atangin heng district ah te hian Magistrate leh Police te duty tura tirhchhuah nghal an ni ang.

~DDK

Nimin khan District Fisheries Development Office leh National Fisheries Development Board tangkawp buatsaihin Nalzawl leh Darlak khua-a sangha khawitute tan BNRGSK Hall Nalzawlah Sangha leh a chi tam zawk tharchhuah a nih theihna tur training nikhat awh neih a ni. Pu Ramtinchawma, VCP Nalzawl leh Nalzawl sangha khawi hlawhtling chu khuallian a tana hman a ni.

Training kaihruaitu Pu Lalthanzuala, District Fisheries Development Officer chuan Nalzawl leh Darlak khua atanga training tur kalkhawmte chungah lawmthu sawiin training-na hun tura duanlawk anga 16-19 April-a Mamit DFDO Office a ruahman chu remchan zawkna a vang leh kokim zawka Sangha khawitute an tel theihna turin Nalzawl khuaah neih a nih thu a sawi a, Anmahni hmun ngeia training neih a ni chuan Sangha khawitute tan hlawk zawka an training a beisei thu a sawi a ni.

DFDO chuan Mamit District chu Sangha khawina hmun atana hmun tha a nih angin  sangha dil  siam tute chu an sangha dil enkawl kawngah leh a chaw peka vilzui kawngah te mithiam zawkte rawn thin turin a sawm a. Sawrkar atanga sangha chi kan dawn thin te a chang chuan a tlai kum deuh te a awm a awm thin a vangin dawn ringawt nghak lova mahni a in ngaihtuah nachang hre turin a chah bawk a ni.

Pu Ramtinchawma, Sangha khawitu hlawhtling chuan a vawikhatna a atana an mahni hmun ngei kalchilha training buatsaih saktu Fisheries Department te chungah lawmthu a sawi a, sangha khawi chu eizawnna tlak tak a nih thu sawiin amah ngei pawhin mithiamte thu ngaichanga a sangha te a enkawl thin thu a sawi a ni.

Pu Vanlalchuailova Assistant Development Officer(AFO) chuan sangha tam zawka kan thar chhuah theihna tur leh a chi a kan intodelhna tur atan zirtirna a nei a ni.

Training-ah hian Nalzawl leh Darlak khuaa Sangha khawitu mi 50 an tel a ni. -DIPR

Vawiin khan DC Conference Hall, Mamitah Chapchar Kut 2018 hman dan tur relin Mamit District Chapchar Kut Organising Committee chu an Chairman Pi Lalbiaksangi, District Bawrhsap hovin an thu khawm.

Meeting chuan kumin Chapchar Kut hi GSA Playground Mamit-ah, Zing dar 11 atanga hman tan nise tiin a rel a. Kut thlengtu atan Mamit District Bawrhsap chu ruat nghal a ni. 

Kumin Chapchar Kut lawmnaah hian Mizo hnam lam hrang hrang, Cheraw, Tlang lam, Chai, Chheih lam leh Par lam-te neih nise, hei bakah hian Mizo hnam infiamna hrang hrang Kalchhet inkalsiak, Insuknawr, Insaihruipawh, Inkawibah bakah Pawnto hmanga inelna neih nise tih a ni bawk.

Chapchar Kut lawmnaah hian mipui zawng zawng sawm nise tih a ni a, heta kal turte chu Mizo hnam ziarang lang thei tura inchei vek nise tih a ni. Miss Chapchar Kut leh Kut naupang thlan nise tih a ni bawk.

Vawiin Meeting-ah hian hlawhtling taka Chapchar Kut hman a nih theih nan mawhphurhna leh chanvo hrang hrang inpek nghal a ni.

Meeting-ah hian Addl.DC Mamit, EE, PHED, P&E & PWD, DFO, DIPRO, Sub Hqrs YMA, Sub Hqrs MUP, Sub Hqrs MHIP, MZP Hqrs, MZI Hqrs bakah MCO Hqrs atangin an tel a ni. - DIPR Mizoram

Vawiin khan D.C Conference Hall, Mamitah Final Electoral Roll, 2018 Mamit District chu Pu H. Lianzela, Addl D.C/ Electoral Registration Officer Mamit District chuan tlangzarhna a nei.

Pu H. Lianzela Addl D.C chuan Election Commission of India duhdan anga 1.1.2018 tehfunga neiin Final Electoral Roll, 2018 chu election officials ten uluk tak leh a hun taka  tarchhuah a nih theihna tura buatsaih a nih thu a sawi a, buaipuitu elections officials te chungah lawmthu a sawi a ni.

Pu M.H James Election Officer chuan Final Electoral Roll, 2018 chungchang sawi zauna a nei bawk.

Final Electoral Roll, 2018 tarchhuah takah hian Mamit District chhungah vote nei mipa 32615 leh hmeichhia 31550 an vaiin mi 64165 an awm mek a ni. Vote nei punna hi voters 1486 @ 2.37% a ni.

Mamit District chhunga constituency pathum atanga vote nei punna hi 1-Hachhek Constituency atangin 1.84% a ni a, 2-Dampa Constituency atanga vote punna hi 2.69% niin 3-Mamit  Constituency ah hian vote nei punna hi 2.66% a ni bawk.

1-Hachhek Constituency ah hian voters tamna ber hi Kanhmun niin voters 1134 an awm a, a tlemna ber hi Sotapa niin voters 119 an awm a ni. 2- Dampa Constituency huam chhunga vote tamna ber hi W.Phaileng Dinthar Veng-I niin voters 945 an awm mek a, a tlemna ber Zopui khuaah hian vote nei mi 46 an awm mek bawk a ni. 3-Mamit Constituency atangin Mamit Hmarvengah  voters 1151 awmin a tamna ber a ni a, Dilzawlah hian vote nei mi 161 awmin a tlemna ber a ni thung a ni.

Vawiin Final Electoral Roll, 2018 tlangzarh tak Hard copy leh soft copy hi Political Party, Congress, MNF leh BJP te hnenah hlan nghal an ni.

Final Electoral Roll, 2018 tlangzarhna hunah hian election officials bakah tlawmngai pawl aiawh Sub Hqrs YMA, MHIP, MUP leh Political party aiawh pathumte an tel a ni. -DIPR

Vawiin khan World Health Organisation, Govt.of India leh Chief Medical Office, Mamit buatsaihin CMO Conference Hall, Mamitah District Measles-Rubella vaccination Workshop, nikhat awh neih a ni a. Pu H.Lianzela Addl.DC, Mamit District chuan Workshop hawnna hi a nei.

Pu H.Lianzela, Addl.DC chuan Sawrkar laipuiin hriselna kawnga hma a lakna Sentut (Measles) leh Rubella (Nau piansualna thlentu) laka fihlim tura beihpui a thlakna kawngah Health Department a thawktute mai ni lovin Education Department a thawktute nena hmalak a ngaih dawn thu a sawi a. Kan hriselna kan vawn uluk loh avangin natna tam tak hi chu kan tawrh phah a awm fo thin a ni a ti. He beihpuithlak chhunga tih takzet leh uluk taka thawk turin thawktute a sawm a ni.

Dr.Ayanava Basu, Visiting Surveillance Medical Officer, World Health Organisation chuan a lem nen zirtirna a pe a ni.

Sawrkar laipuiin Sentut (Measles) leh Rubella (Nau piansualna thlentu) laka kan fihlim theih nana hma a lak hi ruahman lawk ang chuan Kumthar January Ni 18 atanga tan tur a ni a. He hmalakna hnuaiah hian naupang thla 9 atang kum 15 la pum lo zawng he hridanna hian a huam dawn a ni.

Workshop hi Dr.Zothankhuma, CMO Mamit chuan kaihruaiin Mamit District chhunga Medical Officer, Health Worker-te leh SSA Mission a thawktute an tel a. Medical Officer-te hian anmahni Block theuhah Training an pe leh ang.-DIPR

Mizoram Sawrkar hmalakna hnuaia Sanitation Task Force ten District khawpui fai ber intihsiakna  abuatsaihah Mamit District in  lawmman pakhatna  a lak lawmna chu vawiin khan Mangkhawngdai Field, Mamit-ah khawtlang huap ruai nen ropui taka lawmna neih a ni a. Pu Vanlalngaihsaka, District Bawrhsap, Champhai Ex D.C Mamit chuan a hmanpui

District khawpui fai inelna lawmman pakhatna lawmna hun hi hun hniha then a ni a, chawhma hun hi Pu H. Lianzela, Addl D.C Organising Committee Chairman chuan kaihruaiin faina chu pawnlam landan mai piahlamah thinlung lama a intan a ngai a ni a ti, Mamit District-in District fai ber lawmman pakhatna kan lak chu faina kawnga hma kan sawn leh zelna atana rahtha a chhuah beiseiin a lawmna hun pawh huam zau zawka buatsaih a nih thu a tarlang  a ni.

Pi Lalbiaksangi District Bawrhsap, Mamit chuan Mamit District- in District khawpui fai ber lawmman a lak theihna atana pawimawh ber chu Pathian vang a ni a ti, adawt lehah chuan khawtlang hruaitu, tlawmngai pawlte leh mipui tanrualna a ni a ti bawk. Mamit District chuan Award chhuanawm tak tak a dawng chho mek zel a, a lawmmawm hle a ni a ti, faina kawnga hmasawn zel turin tha thlah miah lova bei zel turin kalkhawmte a sawm bawk a ni.

He hunah hian Mamit District Bawrhsap hna lo thawk tawhte sawm an nih anga rawn tel Pu Vanlalngaihsaka, IAS District Bawrhsap, Champhai pawhin thusawina neiin Mamit khawpuiin  District khawpui fai ber inelna-a pakhatna  dinhmun an hauh theihna tura khawtlang tanrualna chu fakawm a tih thu leh a lawmpui thu a sawi a, faina chu vawng nung a, chhawm nung rengtu ni turin a chah bawk a ni.

District khawpui fai ber lawmman lawmna hunah hian thusawitu dang Pu P.C Lalthlengliana Joint V.C Chairman chuan faina leh thianghlimna chhawm nung zel turin Mamit khawpui chuan hma a lak zel dawn thu a sawi a, Pu Zatluanga Sailo President Sub Hqrs YMA pawhin faina kan neih chu chhawm nun zel tum a nih thu a sawi bawk.

Faina kawng-a Mamit khawpui in hma a sawn zel theihnan hian  Village council paruk te tan vengfai inelna Sikpui Competition buatsaih a ni a, lawmman hi sem nghal a ni,  pakhatna hi Bazar veng niin pahnihna hi Luangpawl an ni a, lawmman pathumna hi Venghlun ten an la a ni.

Vawiin District khawpui fai lawmman pakhatna lawmna hunah hian kalkhawmte chuan faina kawnga thutiam tharna Swachhata Pledge sawirualna an nei bawk a ni.

He hunah hian Mamit khawpui chhunga Sawrkar Department hrang hrang, khawtlang hruaitu, Tlawmngai pawl te bakah khaw mipui thahnem tak telin, chawhnu hunah hian Mamit District chhunga zaithiam, fiamthu thiam te nen hun hlimawm tak hman a ni a,  kalkhawm zawng zawngte tan hian tlailamah ruai ropui taka thehzui a ni.-DIPR

CYMA leh PHED buatsaih rampum huap faina (sanitation)  in elna lawmman pakhatna an lak leh YMA Rising Day lawmna ni 29.11.2017 khan  khawthlang huapin ruai nen ropui taka lawm a ni. Pu H. Lianzela, Addl D.C Mamit chuan khuallian niin a hmanpui.

Khuallian chuan thusawiin Mizoram pum huap District khawpui fai intihsiakna a Mamit khawpuiin lawmman pakhatna kan dawn hnu maiah, khawfai ber lawmman pakhatna Chhippui khuain an dawng chu Mamit District tana thil chhinchhiah tlak tak a ni a ti. Khuallian chuan faina chu kum hnih khat thil atan mai nilo khawvel awm chhung a ngaih pawimawh hlawh zel tur a ni tiin faina mai baka khawchhung cheimawina kawngah pawh theihtawp chhuaha khawtlang hruaitu leh tlawmngai pawl mai ni loin khawtlang huap leh naupangte ang pawhin pen chhuah a ngaih thu a sawi, faina chuan hriselna mai bakah hmasawnna, changkanna leh hlimna a keng tel a ni a ti.

Chhippui khua hi pawnlama inthiarna awm lohna khua Open Defication Free (ODF) ah kum 2016 khan puan a lo ni tawh a ni.  An khaw hmun remchang lai laiah  hnangtah bawlhlawh bawm dah vek a ni.

Chhippui khua  hi kum 1800 a din niin  mizo History-a lal hmingthang tak tak te leh pasaltha hmingthang  Khuangcher leh Taitesena te pawh he khuaah hian an lo cheng tawh a ni. -DIPR Mizoram

Vawiin khan LAD Conference Hall, Mamit-ah Deputy Commissioner, Mamit District leh DRDA, MzSRLM Cell tangkawpin an buatsaih Skill Development Training For Women, nikhat awh buatsaih a ni a. Pi Lalbiaksangi, District Bawrhsap chuan khuallian niin he hun hi a hmanpui.

Khuallian chuan hmeichhiate'n inchhung sekrek khawih paha sum an lakluh ve dan tur a ngaihtuah reng thin thu sawiin hetiang hun buatsaih a nih theihna tura thawhpuitute chungah lawmthu a sawi a. Training tura kalkhawm hmeichhiate chu uluk tak leh thiam ngei tura zir a, hriatthiam loh an neihte pawh zawt hreh lo tura chahin Training hlawkpui ngei turin duhsakna a hlan.

Vawiin Training-ah hian Sahbawn siam, Mombati siam leh Pickle siamte zirtir an ni a. PMEGP Unit of Mizoram KVI Board leh KVK, Mamit (Lengpui) ten zirtirna an pe a ni.

Training hi Pu R. Vanlalsawta, PD, DRDA, Mamit-in kaihruaiin Training tur hian Mamit khawpui chhung bakah District chhung khaw hrang hrang W.Phaileng, Kawrthah, Damparengpui, Dampui, Tuidam, Phuldungsei, Pukzing, Pukzing Vengthar leh Saithah atangin an kalkhawm a ni.-DIPR

Vawiin khan DC Conference Hall, Mamit-ah District Bawrhsap kaihhruainain Swachh Survekshan Sensitization Workshop neih a ni a. Pu Vanlalhmachhuana, DUDO, Mamit District chuan Powerpoint presentation hmangin Swachh Survekshan, 2017 chungchang hrilhhriatna leh zirtirna a pe a ni.

District Bawrhsap chuan Swachh Survekshan in a tum ber chu faina chungchanga khua leh tuite'n nasa zawka tha an thawh theihna tura hmalakna a nih thu sawiin chenna hmun thianghlim leh chenna nuam zawka siam chu a thil tum ber a nih thu a sawi.

Workshop-ah hian Swachh Survekshan hmalakna kalmek tihhlawhtlin dan tur duan nghal niin mawhphurhna hrang hrang inpek a ni bawk.

Vawiin Workshop-ah hian Mamit khawpui chhunga tlawmngaipawl leh khawtlang hruaitute, Sorkar Department hrang hranga Head of Department te, zirna In hrang hranga Headmaster leh Principal te bakah Bazar Association-te an tel a ni.-Dipr Mizoram

A vawi hnih nana Mamit District Football Association (MDFA) in a buatsaih DFA Cup 2017 chu Bawraiah khelh zawh a ni a, Kawrtethawveng chuan inelna thlengtu Bawrai hnehin nomawi an chawi. 

MDFA hnuaia team paruk inelna final-ah hian goal 10 ngawt a lut. Hun pangngaiah team pahnih hi 4-4 a an inhnehtawk hnuin extra time khelh a ni a, goal khat ve ve khungin 5-5 in an inhnehtawk leh. A tawpah champion tur zawn nan penalty pet a ni a, 4-2 in Kawrtethawveng an vannei ta a ni. MDFA Cup champion hian nakkum MFA Cup Mamit-in a thlen hunah district ai an awh nghal ang.

Vawiin khan D.C Conference Hall, Mamit-ah Pi Lalbiaksangi, District Election Officer/District Bawrhsap ni bawk hovin Mainstreaming of Electoral Literacy chungchang ngaihtuaha thutkhawm a ni.

Meeting-ah hian Pi Lalzikpuii, Election Officer chuan Election Commission of India duhdan leh thupek anga Electoral Literacy Club din tura tih an nihdan sawizauna neiin mipui ten election chungchanga kan thil hriat duh te, India khua leh tui dik tak te tan electoral Roll a in thun, pawimawhna kan hriat leh zual theihnan Electoral Literacy Club (ELC) chu Mamit District chhunga High School, thlan bik ah te leh Higher Secondary, College, DIET,  DC Office leh CMO office ah te din a ni a, Zirna in bakah hian Mipui vantlang ten chiang zawk leh zau zawka election chungchang kan hriat theihnan vengtina tlawmngai pawl thawhpuina hnuaia Electoral Literacy Club hi din ni se tih a ni bawk.

Vawiin meeting-in a din tak Electoral Literacy Club ah hian  member engemawzat awm tura tih niin meeting hian club tin Nodal Person tur School leh Office atang hian a ruat nghal bawk a ni.

Electoral Literacy Club te hian Election Commission Of India duhdan angin hmalak zel a ni anga, anmahni zirtir leh tur hian District Master Trainer tur mi pahnih ( 2) meeting-ah hian ruat nghal an ni.

Meetingah hian Election officials te, Heads of Offices sawmbikte leh Zirna In,  Tlawmngai Pawl  YMA leh MZP aiawh te an tel a ni. -Dipr Mizoram

Nimin khan Govt Mamit College, Grade B a hlankai a nih lawmna Govt Mamit College New Building-ah neih a ni a, Pu Benjamin, IDAS Commissioner & Secretary H&TE/LESD & E chuan khuallian niin a hmanpui. Pu Ramhmangaiha Ralte Joint Director, H &TE leh Pu Thanglura ASPD, RUSA ten an tawiawm bawk. 

He hun hmanpuitu khuallian Pu Benjamin chuan vawikhat endikna-ah B-Grade Accreditation hmu nghal thei Mizoram College tlemte zinga Mamit College hlankai a ni ve chu thil lawmawm leh ropui tak a ni tiin  thawktu leh Mamit mipuite chungah lawmthu a sawi a, Higher Technical Education tan pawha nichhinchhiah tlak tak a nih thu a sawi, khuallian chuan zoram dinchhuahna tur atana pawimawh hmasa ber chu zirna hi a ni a ti. 

Mamit college chu  Rastrya Uchchatar Siksha Abhyan(RUSA)  kaltlangin thuam chho zel a nia a, hei hian a tum ber chu zirlaiten quality education an neih a nih thu a sawi. Thawktu te chu neitu rilru pu chunga rinawm tak leh, Mamit collge chuan grade sang zawk hmu zel thei tura phurna leh chona nena thawk turin a chah bawk. 

Pu Z. Sangliana, Ex Governing Board President,  chuan Mamit College din a nih chhohdan leh tun dinhmun-ah India ram college te zingah pawh zahpuiawm loh khawpa dinhmun tha a hlankai a ni ta chu Pathian hruaina leh thawktute thahnem ngaihna vang a ni a ti. 

He hun hi Pu LDV Infimate Asso. Prof Govt Mamit college chuan kaihruaii a, Pu Thanglura ASPD, RUSA , leh Pu Vanlalbeiseia Ralte Alumni Asso. GMC ten thusawiina an nei bawk. 

Govt Mamit College hi kum 1983 a din  niin kum 2007 khan sawrkara hlankai a  ni a. Tun dinhmunah Department paruk awmin zirtirtu 25 leh thawktu dang 7 an awm mek a, an vaiin thawktu 32 an awm a ni, Zirlai naupang 110 ten zirna an hmachhawn mek bawk . 

Govt Mamit College hi nikum September thla khan tehfung hrang hrang hmanga teh leh zirchian a nih hnuaah National Assessment & Acreditation Council (NAAC) B Grade a hlankai a ni. 

He hunah hian Mamit khawpui chhunga Sawrkar Department hrang hrangte, College din tirh a nih atanga Governing Board member lo ni tawh te, Khawtlang hruaitu,  Tlawmngai pawl aiawh te leh thuthar thehdarhtute an tel a ni

Vawiin khan DC Conference Hall, Mamit-ah Pi Lalbiaksangi, District Bawrhsap hovin Mizoram Sanitation Task Force hmalakna hnuaia  khawpui fai thlanna-ah Mamit khawpui chu District fai bera thlan a nih bakah Mizoram chhung khawpui fai inelna bika lawmman pathumna-a lak lawmdan tur ngaihtuahin thutkhawm a ni.

Pi Lalbiaksangi District Bawrhsap chuan Mamit khawpui chu District fai ber a ni leh Mizoram pum huapa lawmman pathumna a la chu khawtlang hruaitu, tlawmngai pawl hrang hrang, NGO's hrang hrang, chhungkaw tin leh mimal tinte thahnem ngaihna leh thawhrimna a vang a ni a tiin lawmthu a sawi a, Mamit District chu India ram pumah ekin sa hnem ber lawmman pakhatna kan dawn thu sawiin karhnih chhungin BPL leh APL hnuaiah ekin 840 sak hman a nih thu a tarlang bawk. 

Vawiin meeting hian  Mamit khawpui chu District fai bera thlan a nih angin faina kawnga hma a sawn zel theihnan vengtin VC te chu quartely a inelna buatsaih thin tura ruahmanna  siam chhoh zel ni se tih a ni bawk.

Meeting-ah hian khawpui fai lawmman lak lawm hun tur ngaihtuah a ni a, thla thar ni 10 chu tinzawn niin Programme leh tul dangte lo rel a ngaihtuah tur Organising committee Addl.DC Pu H. Lianzela Chairman na hnuaia  meeting hian a din nghal a ni. 

Meeting-ah hian Heads Of offices, khawtlang hruaitu, tlawmngai pawl hrang hrang aiawh leh thuthar thehdarh tute an tel  a ni.

Vawiin khan Siamliana Hall, Mamit Charkawn-ah Agricultural Technology Management Agency (ATMA), Zawlnuam Block, Mamit District hmalaknain Mamit District chhunga Kuhva chingtute tan Training buatsaih a ni.

Kalkhawmte hi "IPM/IDM & Better Management Practices In Arecanut" tih thupui hmangin Pi Lalrinpuii, HEO, Tuidam Horticulture Division chuan zirtirna pein kalkhawmte atangin zawhna leh chhanna hun hman a ni bawk.

Training hi Pu Gregory Malsawmkima, Dy.Project Director, ATMA, Mamit District-in kaihruaiin Mamit District chhunga Kuhva chingtute an kal thahnem hle a ni.