Tweet Share Share Share Share Share

September 21, 2017
Lalrinmawia RalteMinister hlui Lal­rinmawia Ralte, Ha­chhek bialtu MLA chu Political Adviser to Chief Minister atan ruat a ni a; minister of state rank-ah dah a ni.
Political Adviser to CM atana ruatna noti­fication hi Political & Cabinet department-in September 19, Thawhlehni khan a tichhuak a, Lalrinmawia Ralte chu minister of state rank a nih dawn bakah, a mawhphurhna chu a ṭul ang zela siam rem tura tih a ni.
Thu dawn danin, Lalrinmawia Ralte hian  Political Adviser to CM a nih avang­in MLA hlawh bak a dang a la dawn lo a, thil dangah erawh chuan minister of state-in hamṭhatna hrang hrang an neihte chu a chang ve thei dawn a ni.
Read more »
Tweet Share Share Share Share Share

September 21, 2017
Aizawl South-III bialtu MLA, KS Thanga chu  minister of state atan a lak luh a ni. Governor Lt. Gen. Nirbhay Sharma-a'n Raj Bhavan conference hall-ah rinawmna thu tiamtirin a lalut. KS Thanga chuan, theihtawp chhuah a tum thu leh ram leh hnam, Zo hnahthlakte tan ṭangkai tak nih a tum thu a sawi. 
Minister atana KS Thanga lak luh inkhawm hi chief secretary Lalmal­sawma'n a kaihruai a; chief minister Lal Thanhawla, minister, MLA leh sorkar official eng emaw zat an tel.
MoS atana KS Thanga lak luh a nih hnuah nimin tlai khan Congress Bhavan-ah lawmthu sawina hun hman a ni a; a theihtawpa Pathian ráwn chunga ram leh hnam, Zo hnahthlakte tan ṭangkai tak nih a tum thu a sawi.
KS Thanga chuan, ram leh hnam rawngbawlna hna pawimawh tak chelh tura minister-a hlan kai a ni chu lawmawm a tih thu sawiin, "Pathian hnenah leh kan chief minister Lal Thanhawla hnenah lawmthu ka sawi a ni," a ti. 
KS Thanga hi kum 2008 khan a ṭum khatna atan Aizawl South-III constituency aṭangin MLA atana thlan tlin a ni a, Congress kaihhruai sorkarah parliamentary secretary hna a chelh. Kum 2013 inthlanah Aizawl South-III aṭang vekin MLA atana thlan a ni leh a, parliamentary secretary atana ruat leh a ni. KS Thanga leh parliamentary secretary dang parukte chuan August 30, 2017 khan parliamentary secretary aṭanga bànna an thehlut a ni.
Nimina minister of state atana lak luh tak KS Thanga nen hian Mizoram sorkarah cabinet minister pariat leh minister of state pahnih an awm a; sorkarna an siam tirah chuan cabinet minister pasarih leh minister of state pali an awm.
Tun sorkar term kal mekah hian minister of state zingah Lal Thanzara, Lalrinmawia Ralte leh Dr BD Chakma ten minister aṭanga bànna an lo thehlut tawh a, pawmsak vek an ni. Lal Thanzara bik hi MLA aṭang pawhin August 18, 2015-ah bànna a thehlut a, bye-election-ah MLA atana thlan tlin a nih hnuah, December 1, 2015 khan cabinet minister atana lak luh leh a ni.
Lalrinmawia Ralte hian February 15, 2017-ah bànna a thehlut a, a department enkawl Environment & Forest, Cooperation leh Labour Employment & Industrial Training department chu he thu ziah lai thleng hian Chief Minister-in a la enkawl. 
Dr BD Chakma chuan August 21, 2017 khan minister of state aṭangin bànna a thehlut ve leh a, a department chan Sericulture leh Fisheries department-te chu Chief Minister-in a hmui zui a ni. 
Read more »
Tweet Share Share Share Share Share

September 21, 2017 1
Nimin khan Lawngtlai College-ah sorkar laipuiin zirlaite tana scholarship dil dan ṭha a duan zirhona buatsaih a ni a, Lawngtlai district-a zirtirtu ṭhahnem tak an tel.

Mizoram Scholarship Board (MSB) secretary JH Zoremthanga'n kal khawmte chu hriat tur pawimawh hrang hrang a zirtir a; tribal scholarship dil hun chhung chu October 20, 2017 thleng hawn a nih tur thu sawiin, state chhung leh páwna zirlaite'n state portal thar hmanga a hun taka an dil vek theih nana hma la turin zirtirtute a chah.
Sorkar laipuiin kum 2015-a Digital India a puan aṭangin scholarship dilna pawh online-in National Scholarship Portal kaltlanga dil a ni a, Tribal Ministry-in state tin hnenah tribal scholarship dilna tur hian kumin aṭang chuan state portal hran hlak siam tura hriat­tirna a chhuah angin, Mizoram Scholarship Board chuan portal thar a siam ve a ni.
Portal thar scholarships.mizoram.gov.in-ah hian pre-matric leh post-matric tribal scholarship chu kumin 2017 aṭangin dil tawh tur a ni ang.

Read more »
Tweet Share Share Share Share Share

September 20, 2017
Subroto Cup Boys U17 khelh mekah Mizoram team chuan Inrinni tlaia Nepal an hneh hnuah Pathianni tlai khan Assam 2-0 in an hneh leh ta. Mizoram tan hian Joseph Lalvenhima leh Vanlalnghaka ten goal an khung.
Subroto Park, Delhi-a inkhelhah Mizoram tan Lunglei rawlthar Joseph Lalvenhima chuan minute 18-naah goal hmahruai thunin first half-ah goal dang a luh belh tawh lo, minute 54-naah Kolasib rawlthar Vanlalnghaka'n an goal hnihna a khung bawk.
Mizoram leh Assam hi nikum hmasa khan group match hnuhnung berah inhmachhawn tawhin hemi ṭum hian Mizoram tan quarterfinal lut turin chak ngei ngei a ngai. Amaherawhchu, team pahnihte goal thun lova an inhnehtawk avangin Assam an tlang.
Coach R. Lalmuankima kaihhruai Mizoram team hi Group F-ah Nepal, Gujarat leh Indonesia te nen an awmho a, nizan khan Gujarat nen inkhel lehin he thu buatsaih lai hian result kan hre hman lo - September 19-ah Indonesia an hmachhawn leh dawn bawk.

Read more »
Tweet Share Share Share Share Share

September 20, 2017
DJ Lalvenhimi a turu viau a, mahse tunah chuan a hun a tawp leh ta rih a, Zorinzuali Khiangtein a rawn thlak. Tun chart-ah hian Top 10-a vawi khat lannaa thleng sang nghal ber dang kan neih belh a, chu chu Feli Fanai a ni.


Pakhatnaa a zawna vawi hnih a awm hnuin DJ Lalvenhimi chu Zorinzuali Khiangte chuan a rawn nek chhuak a, Zorinzuali hian a hla ‘Lunglên a na’ hmangin Hontrade Ṭhazual Lengzemah pakhatna a luah. Zorini a zaithiamzia a rawn lang thar leh a, thla hnih chhungin hla pahnih hmangin pakhatna a rawn luah thei.
July thla khan 135 nena an sak ‘Ka ngaidam che’ hmangin pakhatna a rawn luah tawh a, chumi hnuah Ṭhazual Lengzem chart vawi thum tar chhuah a ni a, a vawi linaah pakhatna bawk a rawn luah leh. Zorini hian ‘A rem tawh lo’ a tih hnuah ‘Ka ngaidam che’ a ti a, tunah chuan a ngaidam chiang ta, a ngaiin a lung a leng a, ‘Lunglen a na’ a ti ta a ni ber mai. He hla hi August 7 aṭang khan a lang ṭan a, pasarihnaah bul a ṭan. Pasarihna aṭangin panganaah a rawn kai chho a, chumi hnuah pahnihnaah chhoin, pakhatna a rawn luah ta a ni.
DJ Lalvenhimi chu pahnihnaah a chhuk thla a, MPL Kick Off zana hit zeta rawn che, Feli Fanai hla thar ‘Pheichheh mawi i khai ang’ tih chu pathumnaah a rawn lang thar a, chart top 10-a vawi khat lannaa pathumnaa lang nghal thei hla hi pahnih a lo awm tawh a, Feli hla hi a pathumna chiah a ni. Kum 2014 April 21 khan DJI chu a hla ‘Liam mai rawh’ hmangin Ṭhazual Top 10-a a vawi khat lannaah pathumna a rawn luah nghal thei a, Kum 2015 March thla khan Essy chu ‘Hey’ hmangin pathumnaah a lang nghal bawk. He mite pahnih bulah hian Feli Fanai hi ‘Phei chheh mawi i khai ang’ tih hla hmangin a tel ve thei ta. Top 10 aṭangin Manuna hla ‘’Duhaisam’ chu a chhuak.
Hontrade Ṭhazual Lengzem
1 Zorinzuali Khiangte - Lunglen a na
2 DJ Lalvenhimi - Ka tan i chuai
3 Feli Fanai - Pheichheh mawi i khai ang aw
4 Thiamchantira - Kir an rel lo
5 Mathlenga - Di ngaih
6 F. Zomuanpuia - Ka thai mampui
7 Zorinzuali Khiangte feat 135 - Ka ngaidam che
8 Janet - I luah zo ngei e
9 Malsawmtluanga - Ka star number one
10 7th String - Mizoram


Read more »
Tweet Share Share Share Share Share

September 20, 2017
BJP, Mizoram Pradesh chuan nimin khan prime minister Narendra Modi pian champha vawi 67-na pualin, Aizawl City Park leh Lengpui Airport tifaiin an hnatlang.
BJP president Dr JV Hluna chuan, Prime Minister pian champha tak chu September 17 a nih thu sawiin, "Hemi ni hian India ram hmun hrang hrangah faina hnatlang leh mi dangte ṭanpuina puala hun hman a ni. Mizoramah chuan Pathianni a nih avangin kan theih ve loh thu ka hrilh a, vawiin hian hun kan hmang ta a ni," a ti.
BJP President sawi danin, Prime Minister pian champha pual hian Inrinni leh nimin khan Mizoram hmun hrang hrangah faina hnatlang neih a nih bakah, home hrang hrangah ṭanpuina an pe a ni.

Read more »
Tweet Share Share Share Share Share

September 20, 2017
Tuihna humhalh leh tihpunna turin CYMA leh PHE-in inremna an ziakCentral YMA leh PHE department chuan nimin khan PHE engineer-in-chief Lalmuanzova pisaah tuihna humhalh leh a awm sa tihpun kawnga thawk dun turin thawhhona thuthlung an ziak.
Lalmuanzova chuan, PHE leh CYMA-te'n kum 2012-a tuihna humhalh leh a awm sa tihpun kawnga thawh dunna thuthlung an ziah tawh chu a tâwp tawh avangin, kum li (2017-2021) atan thawh dunna ziah leh a nih thu a sawi a, "He thawh dunna hian Zoram hmun hrang hrangah rah duhawm a chhuah mek a ni," a ti.
CYMA president Lal­biakzuala chuan, hnam ringawt humhalh a, ram humhalh tel si loh chu a khingbai tih a sawi a, "Kan tuihna neih chhunte kan humhalh loh chuan a tuartu tur chu keimahni tho kan ni. Ṭhangtharte tana chhenfakawm ni ngei thei tura tuihna humhalh a pawimawh," a ti.
Thawh dunna thu­thlungah hian CYMA aiawhin president Lal­biakzuala leh PHE department aiawhin E-in-C Lalmuanzova ten hming an ziak a ni.
PHE leh CYMA hian September 2012 khan kum li chhung atan thawh dunna thuthlung an lo ziak tawh a, an thawh dunna hnuaiah hian YMA group leh branch hrang hrangte'n tuihna humhalh leh a awmsa tihpun kawngah inelna an nei ṭhin a, YMA General Conference-ah lawmman sem ṭhin a ni.



https://www.vanglaini.org
Read more »
Subscribe to: Posts (Atom)

Contact Form

Name

Email *

Message *

TOM © 2026. All Rights Reserved.
Published by Songate G
Powered by Blogger.