TIMES OF MIZORAM

Mizoram Information Commission leh Information & Public Relations Department tang kawp huaihawtin Right to Information (RTI) Week 2017 hawnna chu DC Conference Hall, Lawngtlaiah vawiin chawhma dar 11 khan buatsaih a ni a. Lawngtlai Bawrhsap Dr Arun T., IAS chu Khuallian a ni.

Khuallian chuan RTI Act pawimawhna leh a tangkaina sawiin, sawrkar inrelbawlna tha nei tura hmanraw pawimawh tak a ni, a ti a. Sawrkar Department-a SPIO/SAPIO te chuan zawhna zawttute tha taka lo dawngsawngin, an zawhnate kan ngai pawimawh tur a ni, a ti a. RTI chungchang leh nihphung chu hriat chian a tul thu sawiin, hriat chian loh chuan phurritah a chang thei a ni, a ti. Lang tlang sawrkar din nana dan tangkai tak a nih avangin RTI chu a hmangtu mipui leh sawrkar hna thawkte paw’n mahni hamthat nan hmang lo va, ram hmasawn nan hman a tul a ni, a ti a. Tun aia tangkai zawka hman tum turin kal khawmte chu a chah a. Thu a sawi zawh hian Khuallian chuan RTI Week 2017 puala RTI hoarding slogan writing competition-a Lawngtlai District winner Thomas Rosangzuala, Govt Lawngtlai College-a III Semester zirlai hnenah lawmman pawisa fai Rs 2,000/- leh citation a hlan nghal a ni.

Lawngtlaia RTI Week hawnna hun hi Lawngtlai DIPRO Pu C.Lalhruaitluanga, MIS chuan kaihruaiin, kal khawmte lawmna thu a sawi a. Kum 2011 atanga RTI Week hman tan a nih dan leh a tangkaina te a sawi bawk. Lawngtlai Treasury Officer Dr K. Lalnghinglova, MFAS chuan powerpoint presentation hmangin RTI Act 2005 leh Mizoram RTI Rules 2010 chungchang hriat tur pawimawhte a zirtir a. Hemi hnu hian zawhna leh chhanna hun leh, sawi hona hun hlawhtling tak hman zui nghal a ni.

RTI Week 2017 hi October ni 5-12, 2017 chhung hian hman a ni dawn a. He Week hi mi tinin RTI tangkaizia an hriat thar nan leh hman dan an thiam theih nana inzirtirna hun atana ruahman a ni. Vawiina Lawngtlaia a hawnna hunah hian sawrkar department hrang hranga SPIO leh SAPIO te, VC leh tlawmngai pawl ai awh te, chanchinbu mi leh zirlai naupangte bakah, RTI ngaihventu mi eng emaw zat an tel.

1                    LPG Distributor awmna khua :

Right To Information Week, 2017 chu India ram pumah 5-12 Oct, 2017 chhunga hman a nih angin Vawiin khan I&PR Conference Hall, Mamit-ah pawh hman a ni a. Pu H. Lianzela Addl.DC, DC charge la mektu chuan khuallian niin a hmanpui.

He hun hmanpuitu khuallian Pu H. Lianzela Addl DC chuan ram inrelbawlna leh khawtlang nunah sawi kan nei loh pawhin a kal thei a ni thei, amaherawhchu kan ngawihrengna in kan ram a tihchhiat ai chuan kan tawngchhuah a tul thin a ni a ti. Khawvel changkang zelin a kentel Social Media hmangin hre hmasa nih in chuhin thil a finfiahna fumfe nei lovin kan tarlang chuai chuaia, thudik a nih leh nih loh pawh thliar hrang hlei thei lovin kan hriatna tihbuaiin a awm chho mek a ni tiin heng ang lakah hian ngaihtuahna fim taka hmanga ram inrelbawlna kalphung te zirchianga ngaihven turin kalkhawmte a sawm a ni.

SPIO leh SAPIO te pawh  danin min phut angin hna kan thawk em tih in enfiah ila, midangte tana malsawmna ni turin an hna rinawm taka thawk turin  a chah bawk a ni. Pu H. Lianzela Addl DC chuan Mizoram Information Commission chuan tun aia nasa zawka hma a sawn theihnan District Capital ah te office din theih ni ta se,  lehkha lut ang angte pending awm lova chinfel zung zung a nih a beisei thu a sawi.

He hunah hian Pu P.C Lalthanzuala President MJA, Mamit chuan Keynote Address a pe a, Pu Vanlalhmachhuana, SDC Mamit chuan a lem nen RTI chungchang zirtirna neiin, YMA, MHIP leh Chairman Joint VC atanga  ruat bik te'n  RTI chungchang thusawi tawi ngaihthlak a nih bakah , kalkhawmte atangin Extempore Speech sawi tura koh an ni  bawk.

RTI Week 2017  pual hian College zirlaite tana Hoarding Slogan inziahziaka Mamit District aiawha lawmman latu Laldampuia, III Semester Govt Zawlnuam College hnenah khuallian hian lawmman citation leh pawisa fai hlanna a nei bawk a ni. 

RTI Week puala inkhawm hi Pu Paul Rokima, DIPRO, Mamit chuan kaihruaiin inlawmna thu a sawi a, Pu H.D Lalpekmawia SDO(S) chuan lawmthu sawiin hun a ti tawp a ni.  He hunah hian Mamit khawpui chhunga Heads of offices, SPIO/SAPIO, vengtin VC,MHIP, YMA, MUP Office bearer chin, President Sub Hqrs YMA, District VC, MHIP, Political party aiawh leh thuthar thehdarhtute an tel a ni.

WRITTEN BY PAUL ROKIMA MIS, DIPRO MAMIT

Vawiin chawhma khan Kahrawt  Community  Hall, Champhaiah Agriculture Department chuan  NLUP 3rd & 4th Phase beneficiary-te hnenah tanpuina an dawn tur 2nd  installment a sem a, he hunah hian bialtu MLA Pu TT Zothansanga chu khuallian a ni. 

Pu TT Zothansanga chuan Agriculture Department  hmalaknaa NLUP hnuaia  3rd  & 4th Phase Second  Installment sem a ni chu lawmawm a ti a. NLUP chu sawrkar flagship programme anih thu leh a dawngturte pawh fimkhur taka NGO-te nena baseline survey neia thlanchhuah an ni a, tumah duhsak bik an awm lo, a ti a. A hlawhtlin leh tlin loh enzuina monitoring pawh mumal taka kalpui anih thu sawiin a titha duh lo mi engemawzat chu hrem an ni tawh a ni, a ti a. NLUP chu kalpui zel tur anih thu sawiin tih tak zeta hnathawkte , rahbi tleu leh tangte chhawmdawl zel nan NEDP (New Economic Development Policy) siam a ni, a ti bawk. Champhai North bialtu MLA chuan Aizawl- Champhai kawngpui chu kumin March ni 31 atang khan BRTF hnen atangin Mizoram PWD kutah  hlan a ni, a ti a; kumin ruahtui tla nasa avanga siamna hun a awm loh mai bakah lirthei lian engemaw zatin an zawh ve reng vangin a chhiat phah thu a sawi a. Siamtha turin sawrkarin theihtawp a chhuah thu sawiin Keifang Quarry atanga lung lain kawng tluanin siam tha tur camp-te siam a ni a, YMA Conference hma ngeia thawmthat tura chak taka hmalak mek a ni a ti. Aizawl- Champhai kawngpui Double lane-a siamna tur pawh DPR peihfel vek tawh chu sawrkar laipuiah thehluh a ni a, an pawm ve leh hna tan nghal anih tur thu a sawi bawk. Sawrkar hnalak chungchangah dik taka kalpui anih thu tarlangin a tling leh chhawrtlakte chauh lak anih theih nan advertisement felfai taka siam a ni tiin MPSC kaihhruaina hnuaiah hnalak dik taka kalpui thin a ni a ti bawk. NLUP dawngtute chu tanpuina andawn hmang tangkaia hlawhtlinna chang theuh thei tura tan la zel turin a fuih nghal a ni.

NLUP semna inkhawm hi Pi Zosangzuali Pachuau, Project Director, DRDA Champhai in a kaihruai a. Pu James Vanlalluaia, District Agriculture Officer (DAO), Champhaiin report a pe a, Pu B. Lalhmuchhuaka, SDAO-in lawmthu sawina hun a hmang bawk a ni.

Environment, Forest and Climate Change Department in a enkawl Dampa Tiger Reserve chu tunhnaia Indian leh British zirmite zirbingna (Research Study) neih atanga a lan danin Southeast Asia pumpuiah Kelral (Clouded leopard) a bitna ber (population density sang ber) a ni tih hmuhchhuah a ni.

He zirbingnain a tarlan danin Dampa ah hian Kelral tamlam (population density) chu 5.14 per 100 sqkm a ni a. Sanghar (Marbled cat) tamlam pawh 5.03 per 100 sq.km a ni bawk. Hei hi Southeast Asia pumpuia Kelral population  sang ber a record neih mek 3.46 per 100 sqkm ai pawhin a sang hle a ni. Sanghar Marbled Cat bikah chuan he zirbingna leh figure-te hi Asia  khawmualpuia population estimate rintlak hmasa bera ngaih ni bawk.

He zirbingna hi Dampa Tiger Reserve Core Area hmar chhaklam sq.km 80 huam chhungah an nei ber a. Camera trap thahnem tak leh hmanraw dangte hmangin he zirbingna hi neih a ni a. Camera trap hmang hian Kelral thla vawi 84 lak a ni a, Marbled Cat pawh vawi 36 lai thlalak sak an ni. He zirbingna hian Kelral leh Sanghar chikhat Marbled Cat mai bakah, ramsa dang chi hrang hrang 30 chuang Dampa Tiger Reserve-ah hian an awm tih hmuh chhuah a ni a. Heng zing ah hian sakei chi- Keite, Keisen (Asiatic golden cat) Marbled Cat leh Kelral (Clouded leopard) te bak ah Ursid chi hrang hrang Samang (Sun bear) leh Savawm

( Asiatic Black Bear) bakah, Chinghnia (dhole) leh Sihal (Golden jackal) te pawh tam tawk tak an awm tih tarlan a ni. Hei bakah hian Dampa Tiger Reserve chu tun aia nasa zawk a humhalh a pawimawh tih tarlan a ni a. Reserve bul vela Tlangram l oneih leh Oil Palm plantation-te pawh tihtlem a tul thu tarlan a ni bawk. Kelral hi Wildlife Protection Act 1972 hnuaia humhalhna sang ber, Schedule – I hnuaiah a awm mek a. Khawvel pumah pawh ramsa vang leh ngaihhlut a ni chho mek a ni. Kumin FIFA U-17 World Cup October ni 6 atanga ni 28 chhunga a India rama neih turah pawh Mascot a tana hman a ni nghe nghe a ni.

He zirbingna “Population and Activity Patterns of Clouded Leopard and Marbled Cats in Dampa Tiger Reserve, India’ tih hi December 2014 atang khan Prya Singh, National Centre for Biological Science, Bangalore-te, Researchers for Wildlife Conservation (RWC),Bangalore leh David W McDonald, Wildlife Conservation Research Unit, University of Oxford ten kalpuiin, Dampa Tiger Reserve huamchhunga  Kelral (Clouded Leopard) leh Sanghar chikhat (Marbled Cat) te chungchang an zir a ni.

Mizoram chhung District Capital hrang hrangte faina kawnga inelna a Lunglei khawpui in 2-na dinhmun a hauh lawmnan Lunglei DC Pi Lalzarmawii buatsaihin vawiin khan thingpui ruai Convention Centre-ah buatsaih a ni. He hun hi Lunglei DUDO Pu Andrew Lalhruaian a kaihruai a, Faina chung changa a kaihhnawih Sawrkar Deptt. hrang hrang aiawhte leh tlawmngai pawl hrang hrang aiawhte an tel a ni.

Lunglei DC Pi Lalzarmawii chuan thu sawiin Dist. hrang hrang Faina inelnaa Lunglei District-in 2na a chang pha chu a kaihhnawih sawrkar Dept. te chauh nilovin Lunglei district mipuite thawh rah a ni tiin lawmthu a sawi a, Lunglei Dist. chhunga VC 24 ten an huam chhung mipuite nen rim taka an thawhna chu fakawm tiin hun lokal leh zel turah pawh tun aia tan la a, inelna ah chauh ni lo, kumtluana fai tura rilru thar pu theuh turin Lunglei District mipuite a chah a ni.

Vawiin a District Fai 2 na lawmnaah hian Pu Andrew Lalhruaia DUDO chuan faina inelna atana hmalakna hrang hrang Power Point Presentation hmangin a sawifiah a, he inelna bik atan hian Lunglei District chhunga mipui hnatlang ten tha 30000 chuang zet an thawh tih sawiin VC hrang hrangte senso belhkhawm chu cheng 659400 zet a tling tih a tarlang bawk. Lungleiin District fai ber 2 na a nih lawmna ah hian sawrkar Dept. hrang hrang aiawh leh tlawmngai pawl aiawh ten thu an sawi a, Lunglei Dist chhunga VC hrang hrangte hnenah chawimawina thuziak hlan vek an ni bawk a ni.

Vawiin chawhnu dar 1:00Pm khan DC’s Conference Room-ah District Development Co-Ordination and Monitoring Committee (DCCMC/DISHA) neih a ni. Vawiin DISHA Meeting hi Pu C.L. Ruala Hon’ble MP (Lok Sabha) Chairman, DDCMC leh Pu Ronald Sapa Tlau Hon’ble MP (Rajya Sabha) Co-Chairman, DDCMC ten an  kaihruai a ni.

Vawiin DISHA Meeting-ah hian  1st leh 2nd Quarter (April-September,2017) chhunga Centrally Sponsored Scheme (CSS) khawih leh a kaihhnuai Department hrang hrang ten  Quarter hnih (April-Sept, 2017)  chhunga an hnathawh leh hmalakna te, leh an hmachhawp te huangzau taka thlir hova sawiho a ni.

Vawiin Meeting-ah hian  DRDA Department chuan he Quarter hnih chhung hian MGNREGS inhlawhna ni 38 an siam thu an tarlang a. Siaha-II,  IWMP Fund Rs.65,77,690/- chu Oct,2015 atang khan DWCDC a ala tan thu tarlan a ni bawk. DPC, SSA atangin Mid-Day Meal Fund pawh a hun taka an dawn tawh thu report dawn a ni a. District Science Seminar a Siaha District aiawh an thlachhuah Ziralai pahnih: Miranda Vytuchho leh Chinneihkim Khuangsaimi te chuan State Level Science Seminar-ah pakhat-na leh Pahnih-na lawmman an lak thu leh  Miranda Vytuchho chuan National Level-ah Mizoram State ai a awhtur thu  District Education Officer chuan a tarlang. EE,P&E pawhin Report pein, DEENDAYAL UPADHYAYA GRAM JOYTI YOJANA  hnuaiah Rural Electricity Distribution Backbone (REDB) atan Cheng nuai Rs.1751.46 hmanga chak taka hna thawh mek a nih thu atarlang bawk.

DAO atangin Pradhan Mantra Krishi Sinchayee Yojana (PMKSY) hi Mizoramah kum 2016, August ni 18 atanga hman tan a ni a, tunah hianSiaha District ah chuan heng project hrang hrang:- Restoration/Renovation of Small Tank leh Construction of Secondary Storage Structure, Construction of Water Harvesting Structure te hi zawh vek tawh a nih thu report ngaihthlak a ni.

PWD  atangin PMGSY hnuaia hnathawh zingah Siachangkawn-Vawmbuk Road Pavement Works leh  Kaochao-Saikao Road Pavement Works te chu zawhfel tawh a nih thu report dawn a ni a. A bak hnakal lai pawh 2017-2018 chhung hian zawhfel hman beisei a nih thu tarlan a ni.  Noaotlah- Chakhei Road, Pavement Works erawh Contract hi tihtawp tura Process mek a nih thu report a ni bawk.

DSWO chuan  Tarhlawh la (NSAP)  Beneficiaries te chuan DBT ai chuan tihdan hlui anga, a tangka faia an tar hlawhte chu pe zawk thin mai tura an duhzawk zia Department hnena an thlen thu a tarlang.

CMO Office chuan IMR –ah Siaha District chu Mizorama sang ber an la ni reng a, mahse hma an sawn zel a ni, tiin report an pe a. July –August chhung khan naute thi 7 an awm a, 2nd Quarter-a IMR hi 34 a nih thu an tarlang bawk. EE, PHED chuan  report pe in, Renewal & Augmentation of Greater Saiha WSS chungchangah report pe in, GSWSSA hi  17/3/2016 a Commissioned tawh a ni a, vawiin ni thlengin Diesel Engine hmanga tui hi Pump mek a ni. Contractor in 1600KVA Transformer a lo bun chu a that tawk loh avangin  Silchar-ah siamthat mek a ni a, a lo thlen thuai beisei a ni, a ti.

MP pahnih te hian Siaha District in Prime Minister Award for excellence in Public Administration lawmman an lak avangin Siaha District mipui leh Sawrkar official te an lawmpui thu an sawi

WRITTEN BY N. VABEIRATLUA MIS, DIPRO SIAHA