TIMES OF MIZORAM

Prime Minister Pu Narendra Modi-in kum 3 kal taa ‘Swachh Bharat Mission’ bul a tan hnuin nimin Gandhi Jayanti lawmna inkhawm Vigyan Bhavan, New Delhi-a neihah SBM hnuaia Category hrang hrang lawmman sem a ni a. Chung zinga Award pakhat ‘Maximum Increase in Toilet Coverage’ chu Mamit, Mizoram hnenah hlan a ni a; Pu H.Zasiama, Asst. Resident Commissioner, Mizoram House, New Delhi-in he lawmman hi state sorkar aiawhin a dawng a ni.

Vawiin khan Political Adviser to Chief Minister Pu Lalrinmawia Ralte chuan a Office a luah tan a. A Office awmna hi MacDonald Hill a Chief Minister Office Room No.8,9 & 9(A) a ni.

Political Adviser to Chief Minister  Pu Lalrinmawia Ralte Pisa luahna a tel, Deputy Speaker Pu R.Lalrinawma chuan, " Adviser to Chief Minister Office hi India Danpuiin a phalsak angin Mizoram Legislative Assembly - a Dan siam, " The Mizoram State Legislative members(Removal of Disqualification) (Ammendment) Act, 2006 (Act No.6 of 2006)" chuan Office of Profit-in a huam loh turin a dah him vek tawh a ni", a ti a. " MLA ni chunga luah theih thlap a ni a. Sawi buai theih a ni lo", tiin a sawi a ni.

Vawiin khan Horticulture Conference Hall-ah Horticulture Minister Pu P.C Lalthanliana chuan Aizawl District chhunga Dragonfruit chingtu chhungkaw 73 hnenah tanpuina Rs 8750 theuh a sem a. Hei hi India Constitution Article 275(1) hnuaia tribal-te dawmkanna tura tanpuina Ministry of Tribal Affairs kaltlanga Mizoram sawrkar Horticulture Department-in Dragonfruit chingtute chhawmdawl nana a ruahman a ni.

Horticulture Minister Pu P.C Lalthanliana chuan Mizoram chu India rama Dragonfruit uar hmasa ber a nih thu sawiin India ram khawi hmunah mah Dragonfruit hi chin tak tak ala nih loh avangin mi pawhin an hlut a ti a. Mizoramah awmze neia Dragonfruit chin kalpui  anih theih beiseiin sawrkarin thahnemngai taka hma a lak thu leh a hralh chhuahna (market) lamah pawh kawng a inhawn zel a beisei thu a sawi a. Pu P.C Lalthanliana chuan a thlawna sum leh pai a ken tel vang ringawta tui nilova rinawm taka lei rem rah theihna tura hmang turin a chah a .  Dragonfruit eizawnna ngelngheta hmang thei tura theihtawp chhuaha thawk turin tanpuina dawngtute chu Horticulture Minister chuan a fuih bawk a ni.

Dragonfruit hi kum 2013 khan Aizawl District-ah enchhinna atan chin tan a lo ni tawh a, Mizoram leilung sik leh sa a ngeihzia hmuhchhuah anih hnuin kum 2015-16 khan Horticulture Department chuan beihpui thlakin hma a la a . Kumin 2017 hian MIDH scheme leh Article 275(1) hmangin Mizoram District tinah Beneficiary thlanchhuah te chintir a ni.

Heng tanpuina dawngtute hian tin khat hmunah Dragonfruit kung 600 chingin he scheme hnuaiah hian an mamawh tur thil chi hrang hrang, Neem Kasto leitha, NPK leitha, Pruning Secateur , Sprayer, Plastic Crates bakah a ban phunna tur tanpuina sum an dawng dawn a ni. Dragonfruit chingtute tanpuina semna hi Divisional Horticulture Officer Pu Lalhmangaiha chuan kaihruaiin Pu Henry L. Varte, HEO, Horticulture Centre, Thiak hnen atangin Dragonfruit chin dan leh enkawl dan ngaihthlak a ni a. Pu R. Lalremliana Asst. Divisional Horticulture Officer chuan lawmthu sawina in hun a khar a ni.

Vawiin vek hian Reiek, Ailawng leh Khawrihnim khuaa NEDP 2016-2017 hnuaia Aieng chingtu chhungkaw 475 hnenah tanpuina (Cash Assistance) cheng 8640 theuh Bialtu MLA Pu P. Lalrobiaka chuan a sem bawk a ni.

WRITTEN BY CHRISTINA LALMUANZUALI MIS, IPRO

Vawiin khan DC Conference Hall kolasib ah site Allotment Advisory Board chu Chairman Pu R. Zarzosanga kaihhruaina hnuaiah an thukhawm.

Thutkhawmah hian dil na chi hrang hrang House pass Dilna,  Periodic patta dilna,  land lease dilna lut te chu ngaituah a sawiho a ni a, dilna hi a vaiin 203 a lut a verify that ngai leh dilna recommend loh   21 awmin a bak 182 chu recommend turin Committee chuan a rel a ni

Assistant Settlement Officer pi TT Beikhaizii hnen atanga thu dawn danin vc pass periodic patta a leh theih/tur tih chu puansual leh hriatsual niin District Council pass zawk chu periodic patta a leh theih a ni.

He thutkhawmah hian NGO hrang hrang hruaitute leh V/C hruaitute an tel tha hle a ni.

Nimin chawhnu khan Lok Sabha MP Pu C.L.Ruala kaihhruaina hnuaiah Lunglei District Level Committee on SAGY-Haulawng chu Haulawng Model Village-a hmalakna kal mek leh hmachhawpte sawiho turin Lunglei DC Conference Hall-ah an thukhawm a. Meeting-ah hian Nodal Officer, Saansad Adarsh Gram Yojana (SAGY)-Haulawng Lunglei DC, Pi Lalzarmawii, IAS, Lunglei District DRDA Project Director Pu K. Lalrohlua, Committee member official dang te bakah Haulawng khua atangin khawtlang hruaitu VC-te leh YMA hotute an tel a ni. 

Pu C.L. Ruala chuan Model Village hmasawnna hna kalpui tur hian sum a hranpa a dah a nih loh thu a sawi a. Model Village Haulawng khua ti hmasawn tura Department hrang hrang hmalakna kal mek chu Haulawng khua mipuiten phur taka an tha leh zung senga an lo tawiawm ve a tul a ni tiin Lok Sabha MP chuan Model Village scheme in a thil tum ber chu mipuite’n neitu rilru pu tlat chunga an khaw hmasawnna tura tan an lak hi a ni, a ti a. Haulawng Model Village chu khaw dang tana entawntlak tura siam turin kalkhawmte an theihtawp a tan la theuh turin a sawm a. Lunglei khua in khawpui fai inelna ah lawmman pahnihna an la chu a lawmpui thu sawiin Pu C.L. Ruala chuan mipui leh khawtlang in faina leh thianghlim kawngah an theih ang tawka hma kan lak zui zel a tul a ni, a ti bawk. 

Lunglei DC Pi Lalzarmawii pawhin thu sawiin Lunglei District in Model Village kan neih chhun Haulawng ti hmasawn zel turin Department hrang hrang ten mawhphurhna kan nei theuh a ni tiin Sawrkar official kalkhawmte chu tan la thar turin a chah a.  Nimin thutkhawmna ah hian Department hrang hrang hotute’n an hmalakna tlangpui te an  sawiho bakah Haulawng VC leh YMA aiawhten Haulawng khua hmasawnna tura hmalak tul an tih dangte an tarlang bawk a. 

Lok Sabha MP Pu C.L. Ruala hova Haulawng Model Village hawnna October ni 26, 2016 a neih a nih atangin Haulawng khua ah hian Sawrkar leh khawtlang mipuite tangkawpin nasa takin hma an la chho mek zel a. District Level SAGY meeting July ni 19, 2017-ah neih a nih bakah SAGY Awareness Campaign chu July thla vek khan neih a ni bawk a. Department hrang hrang hmasawnna hna kalpui mek a nih bakah mipui hirselna kawngah pawh chak taka hmalak chhoh niin September ni 29, 2017 khan Lunglei DRDA, Health & Family Welfare Department leh Lunglei Block BDO tangkawp chuan Haulawngah SAGY Free Medical Health Camp an buatsaih a. Doctor rual ten Free Clinic an hawn bakah zuk leh hmuam laka fihlim chungchang inzirtirna hun hman a ni bawk.

Vawiin hian Serchhip DC Conference Hall ah kum 2011 atanga Mizoram atanga hman tan tawh Right to Information Week, 2017 chu hman a ni a, Pu Chuauhnuna, MCS, Addl DC chu khuallian niin Right to Information Act chungchang zirhona neih a ni.

Khuallian Pu Chuauhnuna chuan, Right to Information Act tluka langtlang inrelbawlna min neih tir thei dan tha dang a awm chuang lova, he dan hmang tangkaia, thil tha tih nana hman uar deuh deuh a pawimawh a ni, a ti a. Sawrkar hnathawk, mipui sum hmangtute pawhin mipuite kuta thuneihna awm nasat ziate, kan Note sheet thlenga an bih ve vek theih tawh zia hre chunga hna kan thawh a tul a. Zep ruk leh thil thup a awm thei tawh lo a ni, a ti. Tun hnaiah hna pawimawh hrang hrang avangin Head of Offices te kan inko khawm deuh reng a, vawiinah pawh RTI Week hmang turin Office hrang hranga SPIO/SAPIO leh tlawmngaipawl te tha taka an tel theih avangin lawmthu a sawi bawk.

Khuallian hian RTI Week, 2017 puala College Student te tana RTI Hoarding Slogan Writing Competition a Serchhip District bika lawmman dawngtu Gospel Vanlalduhsaka, 5th Semester, B.A , Political Science Department, Government Serchhip College hnenah Citation leh pawisa fai a hlan nghal a ni.

He hunah hian Pu Beitlotha Nohro, MCS, SDC chuan RTI Act chungchang Power Point Presentation hmanga sawifiahna a nei a, chumi hnuah kalkhawm ten RTI chungchanga zawhna hrang hrang an neih te zawtin, an hriatchian duhte zawhna hun an hmang zui a. Sawihona hrang hrangte neih zui a ni bawk.

Vawiina Right to Information Week hmanna hi Pu K. Sailtuanga, MIS, DIPRO Serchhip chuan a kaihruai a, a tel tur hian District chhunga SPIO/SAPIO/DAA zawng zawngte leh tlawmngaipawl  aiawh te, chanchinbumite leh RTI lama tui mite sawm an ni.

Vawiin chawhma khan Synod Conference Hall-ah Mizoram Information Commission leh Information & Public Relations Department, RTI Nodal Department te tangkawpin an buatsaih Right To Information Week, 2017 chu RTI chungchanga mipui zirtirna leh kaihruaina atan,  Chief Minister Pu Lal Thanhawla'n a hawng a. Vawiin atanga October ni 12, 2017 thleng khian Mizoram chhunga District zawng zawngah RTI Week hi hman a ni dawn a ni.

Kum in RTI Week hawnna inkhawmah hian tunlai thiamna hmanga duan, RTI hmalakna a  thil thar, Mizoram RTI Online, Desktop Computer leh Mobile phone  te atanga internet hmanga RTI zawhna Sawrkara thehluh theihna chu Chief Minister Pu Lal Thanhawla'n RTI tangkai zawk leh ngampa zawka a mipui tam zawkin an hman tangkai theih nan  a hawng bawk a ni.

RTI  Hapta hawngtu, Chief Minister Pu Lal Thanhawla chuan RTI week chu Mizoram-ah kum 2011 atanga hman tan tawh ni mahse mipui tam zawkin RTI hman tangkai dan an thiam na tur leh hman a tul na te an hriat zau zel nan  la hman chhunzawm zel a ni a ti. Chief Minister chuan RTI hnuaia zawhna te chhan chu officer-te hnathawh kalphung pangai a ni a, mipui ten sawrkar hnathawk te hnachuangliam an siamsakna a ni lo tih an hriat a, zawhnate  zawh loh chhan nan phei chuan hmanloh hrim hrim tur a ni a ti. RTI hmanga thudik haichhuah chuan mimal intih hmingchhiatna lam a kawh loh thu leh thil tha duh vanga siamthat tumna leh  thil nihna dik tak  hailanna lam a kawk zawk  tih  a sawi a. " RTI Act hian sorkar Department te, Public Sector Organization, sorkar atanga tanpuina dawng institution te, corporation leh NGO te thlengin a huam avangin information chu an pe zung zung tur a ni" a ti a. A nih dan tur ang taka hman a nih chuan RTI chu thil tangkai, sawrkar leh a mi chhawrte thlenga nawr kalna hmanrua a nih thu  a sawi a. Mipuite'n an tana  thawk, sawrkar leh sawrkar hnathawk te taihmakna leh tan lak dan chin thleng te pawh an hriatchian ve theihna hmanruaah RTI chu hman theih a ni a ti. " Heng avang te hian mipui ten RTI hi hmang uar deuh deuh se kan duh a, State Public Information Officer(SPIO) te pawn Act in a khap chin bak chu ihe lovin mipui hre duh te hnenah chuan an hriat duh chu pe zung zung turin kan beisei", a ti a.

Chief Minister chuan sawrkar tan chuan RTI chu huphurh a hneh in thlawp awm tak a ni zawk tih sawiin RTI chu mipui te hnena sawrkar hnathawhna chanchin chiang leh zawka hmuhtir leh bihchian tir na hmanraw tangkai tak  a ni a ti a. Hrechiang lova selna tawngkam neih nghal mai ai chuan RTI tarmit atanga bihchian hmasat phawt chu a finthlak zawk tur leh kan vaia tana hlawkpui tur zawk a ni a ti.  RTI chu mi zawng zawng tan a nih avangin zirlaite tan pawh an answer sheet an hriatchian duh a nih phawt chuan RTI hmangin an hre thei tih a sawi a. " People friendly government,  transparent government, tin; sawrkar deliver thei siam tumin hma kan la mek a ni a. Chutah chuan RTI hi kan hmanraw pawimawh ber tur pakhat, kan sawrkar siam tum anga kalfuh lohna awm thei te pawh khalh ngilna tur  hmanrua a ni tel a.  Sawrkar tha siamna tur pawimawh hmasa ber chu Sum leh pai hi a ni a, kawng erawh a bo tur a ni lo. A dawtah chuan hun a ni a, hun kan hmangdik tur a ni a, kan thil tih tur te pawh hunbi tuk chhungin kan ti ngei ngei tur a ni a. A pathumnaah chuan supervision a ni a, vil peih, hrilh taihmak a ngai a. Kan tih tur te hi kan ti em, mipui kan hmang tangkai em tih te kan ngaihtuahfo a ngai a ni", a ti.

MIC hmalakna tlangpui, tarlanna hun hmangtu, Chief Information Commissioner Pu Lalduhthlana Ralte chuan Mizoramah  RTI hmang tangkai tu, hman dan tur dik a hmang leh a hmanna tura hmang te beisei ai daih a an la tam loh thu a sawi a. RTI hman tlem chhan chu RTI hmelhriatlohna ai mahin a tangkaina la hriatchian tawk loh vangah a ngaih thu a sawi a. Duhthusam leh hriat duh ang pekloh vanga vuivaina thlenna kawngah Mizoram a RTI chungchanga thuneitu sangber, MIC, zualko vawihnihna tur( Second Appeal thlenna) ni bawk chuan India ramah case khawih lai a nei tlem ber a ti a. RTI chu mipui nawlpui ten, huphurh lo zawka an hman theihna turin online kaltlanga RTI zawhna sawrkar a thlenna tur MIC leh ICT Department te tangkawpin an buatsaih tih a sawi a ni.

Vawiin RTI Week, 2017  hawnna a Chief Minister Pu Lal Thanhawla'n a tlangzarh tak, RTI Online chungchang sawifiahna hun chu Pu Issac Zothanpuia, Project Manager Mizoram State e-Governance Society, ICT chuan a hmang a. Computer Desktop hmangin RTI zawhna sawrkar hnena thlen duh te chuan internet browser-ah rti.mizoram.gov.in tih chhu lutin dilna an thehlut thei a, dilna fee pawh online kaltlang hian a pek theih nghal a. Mobile hmang tu te chuan an internet kaltlangin Google Playstore-ah Mizoram RTI online  app  download in install leh phawt a RTI zawhna thehluhna atana hman theih a ni thung. rti.mizoram.gov.in  hi tunah hian hman theih tawh niin Secretariat a DAA, SPIO, SAPIO, MIC biak pawhna tur dahluh tawh a ni a, directorate, district, office hrang hrang, NGO leh a dang te pawh dah luh mek zel a ni.

Inaugural Function of RTI Week, 2017 ah hian  I&PR Minister Pu Lal Thanzara, MIC Nodal Minister  pawh a tel a. He hunah hian Secretary te, Head of Department te, DAA, SPIO leh SAPIO, NGO hotute, zirlai hruaitute, AMC hotute leh sawrkar mipawimawh te teI tha hle a. I&PR Director Pi Lalnithangi'n Programme a kaihruai a. Function-ah hian RTI Roadside Hoarding Slogan Writing Competion, kawng sira RTI auhla inphuahsiaka Mizoram puma pakhatna,"RTI I zalenna, I chakna, I dikna, I chanvo" tihphuahtu  Malsawmkima, 3rd Sem  BA, Govt.Kolasib College leh Aizawl District chhunga pakhatna, Lalchhuanthanga, 1st Sem BA, Govt. Aizawl West College te hnenah lawmman leh chawimawina thuziak hlan a ni a. MIC Secretary Pu Vanlalngena'n lawmthu sawiin hun a khar a ni.