TIMES OF MIZORAM

C Ngunlianchunga chuan, tun hnaia MSU hruaitute chunga thil thleng anga sawi thlenna hmun Chawngte chu a bial chhung kaihhnawih a nih ve avangin sawiho hi ṭha a tih thu a sawi a, "Kan Chief Minister pawh ka ráwn a, ṭha min tihpui angin hetiang hian boruak ṭha a awm theih nan sawiho turin kan insáwm khawm a ni," a ti.

Thil reng reng finfiah hmasak loh chuan ûm zui vak loh ṭha a tih thu sawiin Ngunlianchunga chuan, "Finfiah hmasa phawt zel ila. Chawngte MSU hruaitute an fel lo, ṭha lo ka ti miah lo a, mahse, an hmakhua ringawt ngaia mi dang ngaihtuah loa thil tih a awm thei. MSU hruaitute'n false report (report dik lo) in danwg ve thei a, bawh nghal rup zel loin finfiah phawt ṭhin a ṭha," a ti a; Chawngte-ah sorkar official-te leh pastor-te an awm a, an thu ngaihchàn ṭhin ṭha a tih thu a sawi.

C Ngunlianchunga chuan, zaidam taka rorel a, hmalak ṭhin a ṭha tih sawiin, "Fimkhur tlân a ngai hle... Duhthawh viau bik pawh a awm theih. Mi zualkona zawng zawng thutaka ngaih nghal loh a, finfiah hmasak a ṭha a, fimkhur a ngai," a ti. MSU-in thil phût an neih vanga Chakma House-a mikhual thleng lo tura an tih chuan damlote tan harsatna a thlen tih sawiin, "Hetiang renga awm hi ṭha lo a, insiamrem a ngai a ni," a ti a; MSU leh Chakma NGO-te chu inrem dan kawng ngaihtuah turin a sawm a ni.

Minister chuan, Chakma táwngpáwng huat inzirtir a ṭha lo tih a sawi rualin, "Foreigner-te erawh kan haw vek. A awm nghet tawhte chu ṭhiana siam thiam a, lungrual taka chênho thiam a ṭha. Inlungrualna aṭangin ram nuam kan siam thei dawn a ni," a ti.

Tuichawng bialtu MLA Dr BD Chakma chuan, Chawngte-a thil thleng anga sawi chu a zin lai a nih thu sawiin, minister C Ngunlianchunga nen an bial chhunga thleng a nih avangin hmalak dun a rawt tih a sawi a, "Hetiang hian ruahmanna kan siam a ni. Thil thleng tawhte tireh tura hmalak hi kan tih tur a ni," a ti a; fimkhur tlân a ngaih thu leh inremna awm tura ngaihtuahho ṭha an tih thu a sawi.

Dr BD Chakma chuan, "Mualpho tur chu hrem tur a ni a, chanchin dik tak hi hriat tum a ṭha a; police emaw, government official-te atangin emaw a hriat theih," a ti a; Chakma House-a mikhual thlen phal loh tih chu damloin an tuar tih sawiin, MSU chu mikhual thleng lo tura an tihna sût turin a ngen. BD Chakma chuan, Aizawl, Chawngte, Lunglei, a khawi emaw berah kum khatah vawi 2/1 tal friendly discussion awm ṭhin se a duh thu a sawi bawk.

MSU president RB Lalmalsawma chuan, meeting-a tel Chakma NGO-te chu M

RB Lalmalsawma chuan, Chawngte leh Chakma awmna khaw danga intihbuaina leh mi insual ang chi chu an ngai thutak ngai lo tih sawiin, "Zirlai meuh kut an thlak erawh hi chu ná kan ti hle. Thiamthu sawia Central lama min hêk ṭhin hian rilru a tina ṭhin," a ti a; Chakma kutah Mizote'n nunna an lo chán tawh ṭhin tih sawiin, Mizote'n Chakma-te chu Mizoramah an awm a nih chuan ṭha takin an awm ve tura a ngaih thu a sawi bawk.

Meeting Resolution

1.September 26-28, 2017-a Chawngtea HSS Sports laia Chakma ṭhalai ṭhenkhatte'n an tihbuaina nghawng kal zela buaina chhuak hi ṭha kan ti lo a, kan dem hle a ni.

2.Hetiang thil hi tun hnuah thleng tawh lo se, a awm leh palh a nih pawhin social media-ah a punlun zawnga thehdarh a nih loh nan chak taka hmalak tlan ni rawh se.

3.He thil thlenga a mawhphurtu leh kut thawhtute hi thuneitu lamin darkar 24 chhungin lo chhui chhuak sela, dan angin hremna pe ngei rawh se.

4.Kut tuartute dinhmun hi thuneitu lamin lo zir chiang se la, chhawmdawlna pek ngai an awm a nih chuan a ṭul anga chhawmdawlna pek ni rawh se.

5.Bangladesh aṭanga dan loa foreigner lo lutte dap chhuah kawngah hmalakho ṭhin ni rawh se.

6.MSU leh Aizawl City College Joint Students Union-te'n Chakma House, Aizawla mikhual thlen an phalsak loh chu hawn leh phalsak nghal ni se.

Vawiin khan Siamliana Hall, Mamit Charkawn-ah Agricultural Technology Management Agency (ATMA), Zawlnuam Block, Mamit District hmalaknain Mamit District chhunga Kuhva chingtute tan Training buatsaih a ni.

Kalkhawmte hi "IPM/IDM & Better Management Practices In Arecanut" tih thupui hmangin Pi Lalrinpuii, HEO, Tuidam Horticulture Division chuan zirtirna pein kalkhawmte atangin zawhna leh chhanna hun hman a ni bawk.

Training hi Pu Gregory Malsawmkima, Dy.Project Director, ATMA, Mamit District-in kaihruaiin Mamit District chhunga Kuhva chingtute an kal thahnem hle a ni.

Vawiin chawhma dar 10:30Am khan DRDA Conference Hall, Siaha-ah District Rural Development Agency (DRDA) te buatsaihin High School Naupangten “Mission Antyodaya Gram Samridhi Evam Swachhata Pakhwada” hnuaiah “Extempore Speech Competition-2017” neih a ni.

Vawiin Extempore Speech Competition neihnaah hian Siaha khawpui chhung School pariat  atanga Zirlai naupang thlanchhuah ten intihsiakna hi an nei a. Vawiin intihsiakna a lawmman dawngtute chu :-

1st Prize - Lalmuanchhungi, Class-IX, Southern English Comprehensive Academy.

2nd Prize - Chinneihkimi, Class-X, Hill Gate School.

3rd Prize - Jacob Lalsiamthara, Class-X, Don Bosco School te an ni.

Heng lawmman dawngtute hian an mimal leh an School angin lawmman an dawng a. Pakhatna hian Rs. 3,000 + Citation leh a School in Rs. 10,000/- an dawng a, Pahnihna in Rs. 2,000 + Citation leh a School in Rs. 7,000/- an dawng a, pathumna in Rs 1,000 + Citation leh a School in Rs. 5,000/- an dawng ve bawk a ni.

WRITTEN BY N. VABEIRATLUA MIS, DIPRO SIAHA

Mizoram sawrkar, Office Memorundum Dated 29th September, 2017 thuchhuakin, sawrkar pisa leh zirna in zawng zawngte Cleanliness Week, 2017 lai, 6th October, 2017 chawhnu (Afternoon) a faina lama mipui vantlang zirtirna thiltih (Cleaning Works/ Social Works) nei tura thuchhuah angin Serchhip khawpuia sawrkar pisa engemawzat ten vantlang hmun tifaiin vawiin chawhnu hian an hnatlang.

District Information and Public Relations Office in an hriat theih chinah Serchhip khawpuiah hian District Urban Development & Poverty Alleviation Officer Pi Vanthangpuii hovin DUDO thawktute AOC atangin Chawhmeh Bazar Building thleng, kawngpuia bawlhhlawh awm ang angte phiatin an hnathlang a. Deputy Commissioner Office thawktute pawhin SDO Sadaar Pu R. Vanrengpuia leh Election Officer Pu Abraham B. Khithey hovin Chawhmeh Bazar Building Ground Floor chhehvel kawngpui leh Bazar pengthuam te a bawlhhlawh awm ang te an thian fai a. District Local Administrative Office thawktute pawhin New Serchhip IOC Venga DC Office pengthuam leh a panna kawngte an phiat fau bawk.

Tin, District Information and Public Relations Officer Pu K. Saitluanga hovin DIPRO Office a thawktute New Serchhip College Peng atanga Kudam (Go-Down) kawn thlenga kalin bawlhhlawh awm ang angte chharin an thianfai a. Kudam kawn leh a chhehvel te pawh an thian fai nghal bawk.

Vawiin hian Department dang engemawzat te pawhin anmahni remchan danin Social Works hi an hmang nia hriat a ni bawk.

Vawiin  chawhma  khan Champhai  District Information & Public Relations Officer (DIPRO) thar Dr.Lallawmkima, MIS chuan Mizoram Journalist Association (MJA), Champhai District member-te chu a Pisa-ah  lenga sawmin inkawm hona an nei.

DIPRO Champhai Pisa-a inkawmhonaah  thu sawiin Dr. Lallawmkima chuan chanchinbumi kalkhawmte chu sawrkar hmalakna  leh schemes hrang hrangte zau zawka puanzar aniha mipui ten an hriat  zel theih nan thawhpuiah a sawm a. Awn lam bik nei lo tur leh dikna tan chhana, rinawm leh taima taka  an rawngbawlsak mipuite tana ke pen zel turin a fuih a. I&PR department leh chanchinbumite chu inngheng tlat an nih avangin thawhhona tha tak a awm zel a ngai a ni, a ti bawk. Chanchinbumite  harsatna leh  ruahmanna an siam a hnena an thlente  chu lo enzui saka tan lak pui zel a tum thu a sawi bawk.

Champhai District  MJA President Pu C.Lalhnunpuia pawhin thu sawiin chanchinbumite chu fourth estate  an nih angin zalenna zau tak pek an ni, a ti a. Amaherawhchu zalenna an neih chu dik taka hman thiam a ngaih thu a sawi a.  Mipui sawrkar (Democracy) ah chanchinbumi ten hna pawimawh tak an thawh thu sawiin mipuite rawngbawl sak kawngah pawh inpawhtlang taka thawhpuiah DIPRO leh a staff-te chu a sawm nghal bawk a ni. Sawrkarin Champhai District mi leh sa ngei DIPRO thar a ruat chu lawmawm an tiin Champhai District hmasawn zel nana theihtawp chhuaha thawhpuiah a sawm nghal a ni.

He hunah hian Pu C. Lalrinsanga, Gen. Secretary, MJA Champhai District-in  member-te inhmelhriattirna a nei a. Member ten an duh ang zawngte sawiin inkawmhona hun hlimawm tak neih a ni.

MJA Champhai District hi December ni 31,1988 khan  Champhai Journalist Association (CHJA) tia din niin kum 2006 khan Mizoram Journalist Association (MJA) ah inchhung lutin MJA Champhai District tih an lo ni ta a. Tun dinhmunah  Champhai District-ah   MJA enkawl chanchinbu 5 tih chhuah niin, Cable TV 2 a awm bawk a. MJA Champhai  District-ah hian member 13 an awm mek a ni.

Vawiin khan Govt. J. Buana College Annual week closing cum Magazine release na hun Saikuti Hall a neih chu Pu Pc Lalthanliana, Minister, Social welfare etc. in a hmanpui. 

He hun hi FN Lalhruaitluanga, Vice President, J.Buana College SU in a kaihhruai a, Khuallian Pu Pc Lalthanliana chuan thusawiin zirlai te tan college week hman hi a tha a, rilru leh taksa tan mai bakah zirlai te kan in hmelhriat leh in pawh leh zual nan a thil tha tak a ni, a ti a. College zirlai kan nih lai chuan engkim ni thei ah kan in ngai thin a, mahse a tam zawk hi chu kan ni thei lo thin a ti. Zirlai nih chuan tum mumal fel tak nei chung a kan zir a ngai a, hlawhchham chang awm mahse kan hlawhchhamna chu rahbi tuk nan hmang theuh ila, hlawhtlinna kailawn a lo ni thin a ni a ti. Nuamsa taka lehkha zir hi hlawhtlinna a ni lo a, i tum lo ang u a ti bawk. Retheihna leh harsatna karah pawh tumruhna hian hlawhtlinna min pe thin ani a ti a. Zirlai te chu kan ram tana thil tha tur ngaihtuah ran chunga kan ram politics kalphung ngaihtuahna fim tak nen thlir turin a chah bawk.

He hunah hian Prof. J.Zorema, Principal, J Buana College pawhin thusawiin College Week tluang taka neih a ni a, kan zavaia kan thawhho na leh in pekna vang a hlawhtling a ni a ti. Mizoram college 23 zingah a thangduang ber pawl kan ni ve ta a,college building, equipments, student perfomance academic leh extension activities hrang hrang ah hma kan sawn in a chhuanawm ber pawl kan ni tawh a, hengte hi Sokar hmalakna avangte, RUSA leh LGC fund kan hmuh avangte leh apawimawh ber ah chuan thawktute teaching leh non teaching staff thawh hona leh ziralte thuawihna avangte hetiang dinhmun a ding thei kan ni a, hei aia hmasawn leh zel turin tan la thar zel turin a chah bawk a ni. 

He Week closing kharna ah hian J Buana College Magazine 'Leitlang Dingdi' 16th Annual Magazine 2016-2017 chu Pu Pc Lalthanliana, Minister in tlangzarh a ni. Jerry Lalbiakngheta, 3rd Semester leh H.Laldinliani, 5th Semester te chu College Mr leh Miss 2017 atan thlan an ni bawk.

Department of Personnel & Administrative Reforms (General Service Wing) thuchhuah, dt.29.9.2017 chuan Mizoram Public Service Commission (MPSC) Member Rev. Zosangliana Colney chu MPSC Chairman mawhphurhna chelh turin October ni 2, 2017 atang khan ruat a ni tih a tarlang.