Tweet Share Share Share Share Share

October 09, 2017
Vawiin chawhma khan Hnam Chhantu Pawl buatsaih ‘Autumn Fair 2017’ chu I&PR Minister Pu Lal Thanzara’n Assembly Annexe Basement-ah a hawng a. He hunah hian I&PR Minister Pu Lal Thanzara chu Khuallian niin Commerce & Industry Department Director, Pu J. Hmingthanmawia chu Khualzahawm a ni.


Khuallian Pu Lal Thanzara chuan hnam zia rang  hrang hrang humhalh leh phochhuahna kawngah Hnam Chhantu Pawl chuan hna tha tak an thawk a ni tiin  thil siam dan hrang hrang midang an zirtir atang hian thalaite tan eizawnna kawng an siam sak a ni, a ti a. State dangin kan hnam min hriat theihna awlsam ber pakhat chu kan kutchhuak leh thil siam chhuah atang  hian a ni tiin keimahni ngei pawhin kan hlut thiam a pawimawh a ni, a ti a. Fair-a tel mahni kutchhuak pholangtu te chu chhuanawm a tih thu a sawi a. An thil siam chhuahte chu mipui tan pawh a hlu a ni, a ti a. Handloom hmanga thil siamte hi awlsam taka ram pawna thawnchhuah theih an ni, a ti a. Mizoramah puantahtu kan pung nasa a, inelna pawh a sang hle a ni tiin design nalh leh kutchhuak mam tha neih a pawimawh a ni, a ti a. Kan puantahte neitu dik tak kan nih theihna atana pawimawh Geographical Identification (GI) neihna kawngah hma lak mek a ni, a ti a. NEDP hnuaiah pawh handloom chu ngaih pawimawh a ni tiin Mizoram Handloom Research and Council chu Thenzawlah din tum mek a ni, a ti a.  Pi pute hun laia Mizo kutchhuak rimawi hmanruate  thalai ten an hmelhriat theih nan tan la turin Hnam Chhantu Pawl chu a fuih a. Mahni hnam zia humhalh leh chawi nunna chang hria chu hnam fing an ni tiin thalai ten hemi kawngah hian tan an lak a tul a ni, a ti.

Hnam Chhantu Pawl hi March Ni 3, 1994 khan din a ni a. He pawl tum ber pakhat chu Mizo kutchhuak thil siamte tihlara, ram dangten an lo hmelhriat theih nana hmalak a ni. Autumn Fair 2017 stall hrang hranga thil phochhuahte chu- mizo puan ,handmade soap, cane furniture, bengbeh leh tlereuh bakah painting leh photo exhibition a awm a. Puan tahlai entheihin ruahmanna siam a ni bawk.

Fair hawnna programme-ah hian Hnam Chhantu Pawl President Pu R. Ramhmangaiha chuan kalkhawmte lawmna thu a sawi a. Programme zawhah hian Minister chuan stall hrang hrang a tlawh kual nghal a. Fair hi Assembly Annexe Basement-ah October Ni 9-13, 2017 chhunga neih tur niin hemi hunah hian mipui tlawh theih tura siam a ni.

Source: DIPR Mizoram
Read more »
Tweet Share Share Share Share Share

October 09, 2017
Vawiin khan Convention Centre Hall, Lunglei ah UD&PA Department buatsaih Cleanliness Week 2017 kharna hun hman a ni. Pu Joseph Lalhimpuia, MLA  chuan khuallian niin a hmanpui.


Pu Joseph Lalhimpuia chuan thusawiin thil reng reng chu a awmna tur loa a awm hian bawlhhlawh leh bal a ni thin a, a awmna tur taka a awm hian a mawiin a lo nalh thin a ni, a ti. Sorkar leh NGO hmalakna avang chauh a fai niloin, chhungril atanga fai duhna rilru kan nei tur a ni tiin kalkhawmte chu faina kawnga thahnemngai taka hma la zui zel turin a fuih a. Fai hi kan mawhphurhna kan tih tur a ni a, faina kawng ah hna kan thawk thei lo a nih pawhin a ti baltu nih i tum lo ang a ti a. Dan hmanga faina tak tak kan neih theih nan sorkar in hma a la mek thu a sawi bawk. Lunglei khawpui hi miin min hriat theihna turin faina hi kan khawpui trademark anih theih na turin mitin te faina kawng ah hmasawn i tum theuh ang u, a ti bawk.

Joseph Lalhimpuia, MLAPu Andrew Lalhruaia, DUDO, Lunglei in report pe in Lunglei District a fai theih nan a an hmalakna hrang hrangte tarlang in, Lunglei khawpui chhungah Faina chungchang Banner pawh 100 chuang tar anih thu sawiin Lunglei Disrtict  in District Hqrs. zinga faiber pahnihna lawmman an dawn leh Hnahthial in Sub division Town faiber pahnihna an dawn te talang in, heng te hi district mipui, VC, YMA, Lunglei District Cleanlisness Committee leh District Sanitation Task Force te thawhhona that vang a nih thu a sawi.

Cleanliness Week hman chhung hian inelna hrang hrang buatsaih a ni a, Extempore Speech ah LH Lalnunsiama, J Buana College chu pakhatna niin Zonunmawia, Mizoram Polytechnic Lunglei chu pahnihna niin Lalremruata, Lunglei Govt. College chu pathumna a ni. Faina Slogan in ziahsiak ah Remmuana chongthu chu "Ram hmasawnna tluantling nei turin i fai ang u" tih hmang in Pakhatna lawmman a dawng a,Vanlalfakzuali chu pahnihna niin Lalhlimpuia Pachuau chu pathumna a ni. Lunglei khawpui chhunga Office fai ber inelna ah EE, PWD, Building Division chu pakhatna niin Jt. Director, Account & Treasuries chu pahnihna niin EE, PHE Watsan Division chu pathumna an ni. School Fai inelna High school leh a chunglam ah Govt. High School, Theiriat chu pakhatna niin Govt. High school, Bazar veng chu pathumna niin Nursing School, Salem veng chu pathumnna an ni. Elementary School zirlai naupang 50 hnuailam nei te zingah Govt. Darphawka Memorial Middle school, Theiriat chu pakhatna niin Govt. Middle school, Zohnuai chu pahnihna niin Govt. Primary school, College veng chu pathumna an ni. Elementary school zirlai naupang 50 chunglam nei te zingah Govt. Middle school-II, Rahsiveng chu pakhatna niin Govt. Primary school-I, Pukpui chu pahnihna niin Govt. Model Primary school, Lunglawn chu pathumna an ni. Lunglei khawpui chhunga veng fai ber inelna ah Sethlun, Lunglei chu pakhatna niin Zotlang, Lunglei chu pahnihna, pathumna ah Zohnuai, Lunglei an ni. Veng Fai special Award chu Venglai, Ramthar leh Chanmari te hnenah hlan an ni bawk. Pu Eddie Zonunkima, Social Development Specialist, UD&PA dept, Lunglei chuan lawmthu sawina neiin week hi khar a ni.
Read more »
Tweet Share Share Share Share Share

October 09, 2017
Thazual Award 2017 chu kar kalta Zirtawpni zan khan Chanmari YMA Hall-ah sem a ni a, Zonet Zawlbuk leh Zonet HD-ah live-a pekchhuah a ni.

Zonet leh MDM ṭangkawpten an buatsaih Thazual Award 2017-ah hian category hrang hranga Award hi MDM member-te'n an thlanchhuah a ni. Award te hi Mizo zinga mi chhuanawm tak tak, C. Laldinpuia, S. Malsawmtluanga, Hannah Khiangte, T. Zorampela, Robin Lalremruata, Rody H. Vanlalhriatpui, Tea Bawihtlung, C. Vanlalvuana, Lucy Sailo leh Zonuni Fanai-te chuan an hlan a ni. 

Thazual Award 2017-ah hian One In Christ, C. Sanga leh Feli Fanai-te'n Award pahnih ṭheuh an hum haw a, Hlimhlimi, Sawmtea, Cindy Lalthanpuii, Kimkima leh Daduhi-te'n Award hi an dawng bawk. 

Adama leh Lancy-i ten Award sem programme hi hneh takin an kaihruai a, zaithiam zaite pawh an zai mai piah lamah, an che vel pawh a hmuhnawm hle. Zaithiamte hian an mahni ṭawiawmtu lamthiam tak tak an nei a, show ropui tak mipuite min hlui a ni. 

DJ Lalvenhi-i'n hot takin bul a rawn ṭan a, Tommy L Pachuau chuan zai chawlhsan mai ala tum lo tih rawn tilangin, a rawn chepui hle bawk. Cindy Lalramhlimawmi perform a hmuhnawm a, Amtea a che turu leh hle. Zorinzuali Khiangte pawhin lamthiamte rawn hruaichhuakin, dangdai leh hmuhnawm takin an che a, mit leh beng an titlai hle. 

Zorin-a'n MDM member famte pualin hlamawi a sa bawk. Mipuite hmuhchak leh beisei ang ngeiin Feli Fanai-i'n mak leh danglam takin hnu a rawn khar a, entu mipui a barakhaih chiang hle. Feli hi mipui ṭhutna lam aṭangin dance crew-te'n rawn zawn chhuakin, stage-ah an perform ho nghal a, Mizo Dance Camp (MDC)-te'n talent an neih ṭhat zia an pholang chiang hle. 

GOSPEL

Mipa lamah Sawmte chu Best Male Artist atan thlan a ni. Award dawng thei tura chhawpchuah zingah hian Amtea, Andrew Laltlankima, David Vanlalpeka leh TBC Zaithanpuia te an tel a, Mizoten zaithiam kan neih zingah chuan a ṭha ber ber te an ni. Sawmte hian Thazual Award bakah hian Lelte Award (2016 & 2017) leh 

Vulmawi Award (2016)-ah Gospel Male Artist Award hi alo dawng tawh bawk.

Gospel bikah hian Best Female Artist atan Armed Veng South nula, H. Vanlalhlimpuii chu thlan a ni a, Award a dawn lai hian Hlimhlim-i hi lawm avangin a biangah mittui a luang. Praise On 2016 aṭanga Mizo mipuiten kan hriat lar Tlangnuam nula Cindy Lalthanpuii chu Best New Artist atan thlan a ni a, tunlai zaithiam zinga hmabak nei eng ber zinga mi a ni. 

Cindy hian kuminah official music video pakhat a tihchuak tawh a, a hla 'A mawi ber Medley' hi Synod Choir conductor pawh ni tawh Mavauna lehlin a ni. Cindy hian Pachhunga University College-ah B.Com a zir mek a, exam zawh lamah music video thar tihchhuah theih a inbeisei.

One In Christ-te'n Best Duo/Group leh Best Music Video an la a, an tan kum ṭha a nih thu kan sawi tawh. Tunah hian member thar an nei a, music video thar pawh an tichhuak leh thuaiin a rinawm. One In Christ-te hian 'Ka Pa Lalram' video mawi leh hmuihnawm dangdai tak hmangin Best Music video Award hi an dawng a ni. 

LENGZEM

Thazual Award 2017 sem zawh takah khan lengzem hla satu hmeichhia zingah Feli Fanai chuan Award pahnih dawngin, mipa lamah C.Sanga chuan Award pahnih a hawn bawk. 

Mizo mipa zaithiam chhuai thei lo C. Sanga pawhin Award a dawn vangin Zonet leh MDM-te chungah lawmthu a sawi a, a bik takin Best Duo/Group Award andawn theih nana a zaipui, Daduhi leh music video siamsaktu chungah lawmthu a sawi bawk. 

Kum naupangte ni chunga Zoram dengchhuak thei, Kimkima chu Best New Artist atan thlan a ni. Kimkima hi 'Ka bialnu ni rawh' tih leh 'Hriat ngai loh Lanu zun' tih hla hmangtein mipuite min awi tawh a, hla thar pawh a tichhuak leh thuaiin a rinawm. 

Feli Fanai hian kuimah music video pahnih a tichhuak tawh a, heng a hla te hi Thazual Top char-ah pawh an thleng sang hle. A hla 'Theih chang se' tih hmangin Thazual chart-ah pahnih a hauh a, hemi hnu hian 'Pheichheh mawi I khai ang' tih hmangin pakhatna a hauh leh bawk. 'Pheichheh mawi I khai ang' tih hla hmang hian Hontrade Thazual Top 10-ah pawh ṭum eng emaw zat pakhatna a lo hauh tawh a ni. A music video hi a danglamna piah lamah, a ṭhat tel bawk avangin Best Music Video atan thlan a ni hi a mak hran lo.

Feli chuan, "Award pahnih ka dawng hi ka awih lo lek lek zawk. Zonet chhungkua leh MDM-te chungah ka lawm em em a, ka lawm zia hi sawi fiah vak ngaihna pawh ka hre lo" tiin award a dawn avanga a lawmthu a sawi. Hetih rual hian zai lama amah kaihhruaitu leh, bulṭanpuitu a pa-in a boral san hma lutuk chu pawi a tih thu sawiin, Award a dawn te chu hmuhpui ve se a duh thu a sawi. Award a dawn hi apa tan a hlan thu a sawi bawk.

Source: Vanglaini
Read more »
Tweet Share Share Share Share Share

October 09, 2017
Mizoram Boxing Association chuan Elite Men national Boxing Championship-a state aiawh tur thlanna chu Inrinni khan Ramhlun Boxing Hall-ah a nei a, boxer pariat thlan chhuah an ni.

October 24-30 chhungin Visakapatnam-ah championship khelh tur a ni a, feh chhuak tur boxer pariat zinga pali - NT Lalbiakkima, Zonuntluanga, Anthony Lalduhawma leh Johnkenty Vanhlimpuiate hi LPS Pro Fight champion lai an ni. November 7-ah Pro Fight ṭan a ni leh dawn a, champion lai leh boxer dangte tan inbuatsaihna tha tak a ni nghal ang.

Mizo team hi AIBA Star 1 coach pahnih C. Vanlalchhuanga leh R. Lalchhuanawma'n an hruai dawn a, Ring Official turin Vulṭhavunga a kal bawk ang.

Read more »
Tweet Share Share Share Share Share

October 09, 2017
Asian Taekwondo Union leh Taekwondo Federation of India te ṭangkawp chuan October 2-6 khan nakkum Asian Games a Taekwondo inelna thar tur zirna ATU New Poomsae Education a buatsaih a, New Delhi-a neih he hunah hian Mizoram aiawha tel Dominic Rozamliana Khiangte chuan ṭha taka zirna zovin Outstanding & Exemplary Performance Award hlan a ni. Tuikual North tlangval Dominic Rozamliana hi MATA Mission Team Leader niin World Taekwondo Federation 2nd Degree Black Belt a ni. 

Asian Games 2018 leh Olympic 2020-ah te Taekwondo Poomsae inelna telh a ni tawh dawn a, he huna inlan thei tur hian ram hrang hrangah kalphung inhrilh hriatna neih a ni.

New Poomsae Education-ah hian India ram state hrang hrang aṭangin Poomsae thiam bik 130 an kalkhawm a. Poomsae thar hi National Taekwondo Championship, November 2017 a lo awm turah inelna atan hman nghal a ni ang. 
Read more »
Tweet Share Share Share Share Share

October 09, 2017
Union Minister of State for Home Affairs Minister Kiren Rijiju chuan sorkar laipuiin Chakma-Hajong refugee-te chu citizenship pek tumna a neih loh thu a sawi.

Minister Rijiju hian Ningani khan Arunachal Pradesh, Tawang-a BJP State Executive Meeting a hmanpuinaah he thu hi sawiin, "Chakma leh Hajong-te hi khua leh tui nihna pek sorkar laipuiin a tum lo" a ti. Rijiju chuan sorkar laipuiin Chakma-Hajong refugee-te Indian Citizenship pek a tum anga tarlan chu thu belhchian dawl lo niin a sawi a, media lama tarlan ṭhenkhat chu thu belhchian dawl lo a ni, a ti. Tibetan rehabilitation issue chungchang pawh sawiin Arunachal mipui tam takin Tibetan Rehabilitation Policy 2014 chu hrechiang loa an dodal ngawt thu a sawi bawk. 

Arunachal-ah hian opposition party - People’s Party of Arunachal leh Congress party-te chuan August 12-a state cabinet-in Tibetan Rehabilitation Policy 2014 a pass chu nasa takin an dodal a ni. Hemi chungchang hi Rijiju chuan sawiin, Tibetan-te hian citizenship neih an tumloh thu leh sorkar laipui lam pawhin an ram luah chhung bikah an hamṭhatna tur a ruahman sak mai a ni, a ti bawk. 

Hetih lai hian Arunachal Pradesh Chief Minister Pema Khandu chuan Chakma-Hajong refugee chungchanga harsatna an tawh mek chhanah Congress sorkar a puh a, refugee-te khawi ngam leh uchuak taka duhsakah a puh. BJP sorkar chuan an buaina tawh mek chinfel hna chu an ngaih pawimawh thu sawiin, hma lak zel a nih tur thu a sawi. Supreme Court thupek bawhzuia refugee zinga citizenshp pek dil, mi 2,000 te pawh an dilna hnawlsak a nih thu a sawi. Khandu chuan citizenship pek chungchang hi sorkar laipui thuneihna ni mah se state sorkar chuan ILP tel lo chuan heng refugee te pawh hi state chhungah luh an phal loh tur thu a sawi bawk. 

CM chuan Tibetan refugee chungchang pawh sawiin refugee dang nen sawipawlh chi an nih loh thu a sawi a, Tibetan te hian citizenship an dil loh thu a sawi ve bawk. An mamawhte petu chu sorkar laipui a nih thu leh state hrang hranga Tibetan inkulh te hi Tibetan Rehabilitation Policy (TRP) hnuaiah vek an awm thu a sawi. Arunachal-ah hian Tibetan Refugee 7,000 vel an awm a, kum tina an tlem telh telh thu a sawi. Tibetan tamtak te chu ram changkang zawkah hna leh awmna pek an nih avanga an insawn tawh thu a sawi bawk. 
Read more »
Tweet Share Share Share Share Share

October 09, 2017
Mizorama tui in tura siam (packaged drinking water) - Zo Aqua, Brook, Amawii leh Koinonia-te kutchhuak chu Food Safety & Standards Act, 2006 bituk ang an tling phak loh vanga hralh chhuah khapna chu hlih a la ni lo.

Health Services joint director (Food & Drugs Administration) Lalsawma Pachuau sawi danin, packaged drinking water siamtute hi an tui 

siam hralh chhuak lo tura hriattir an nih hnuah endik turin a sample an la tawh a, Guwahati-a Assam Public Health Laboratory-ah endik atan thawn ni mah se, laboratory-a thawktute'n Puja chawlh an hman avangin a result an la dawng lo.

Lalsawma Pachuau chuan, Mizoram pawn aṭanga lak luh packaged drinking water-te pawh endik atan a sample lak tawh a nih thu leh result nghah mek a nih thu a sawi.
Read more »
Subscribe to: Posts (Atom)

Contact Form

Name

Email *

Message *

TOM © 2026. All Rights Reserved.
Published by Songate G
Powered by Blogger.