TIMES OF MIZORAM

Champhai Zotlanga YMA General Conference chu October 19, Ningani zan khan a ṭiak a; a tawp zana vantlang inkhawmah Central YMA president Lalbiakzuala chuan, ram dang aṭanga Mizorama dan loa lut Chakma-te chungchangah a him chin aṭanga pâwr taka insehruh ringawt loin, a saseh takah hap a ngai tawh tih a sawi.

CYMA President chuan, Mizoram chhim lam leh khawtlang lamah nasa takin Chakma-te an pung tih sawiin, "Tute emaw ngaihtuah chian loh vangin kum 46 liam ta khan mikhualte tan Chakma Autonomous District Council (CADC) a piang nawlh a, tun thlengin kan buai phah ta a ni," a ti. Mizote tan khawtualah, a him chin aṭanga pâwr viau ringawt lo a, a saseh lai taka hap chat a ṭul tawh thu sawiin, "CYMA-in fím takin ruahmanna a siam ang a, hma kan la ang. Bangladesh aṭanga dan loa lo lutte hi duat an ṭul lo a, min tibuaitu, mikhual cham reite an ni," a ti.

Bru-te chungchangah Lalbiakzuala chuan, Bru, Mizoram electoral roll 1995-a hming chuang leh an thlahte chu Mizoramah let tura auh an nih reng laiin, mi pamham leh duhâm ṭhenkhatte vangin an lêt duh loh thu a sawi a, "Lo kîr duh lo na nâ nâ chu lo kîr lo rawh se. He tam hian kan mamawh lo, kan ti a ni," a ti a; Bru chungchang chu politics-a hamṭhatna atana hmang lo tur leh an vote tel loa ram kal siam turin political party leh politician-te a ngen.

YMA thupui 'Ṭanpui ngaite ṭanpui' tih chu YMA member-te'n an vawn nun reng a ṭul thu sawiin CYMA President chuan, YMA chu chanhai riangvaite puitu, lusûnte hnemtu a nih zel theih nana ṭan la turin YMA member-te a chah a, "Mite'n YMA hi pawl hlauhawm leh ṭihbaiawm ni lo, mahni inphat a, mi dangte tana thawktu pawl a nihzia an hriat zel theih nan hmalak a pawimawh hle," a ti.

Mizoram Synod chuan thuchhuah siamin, an kohhran mite zingah India hnam puanzar (national flag) hâl an awm chu pawi an tih thu an tarlang. An kohhran mite chu ram tana rinawm taka awm tur leh sorkar hruaitute zah a, mawhphurhna ṭha taka hlen turin an ngen a ni.

Mizoram Synod chuan, national flag hâl chu India danpui zahlohna lian tak a nih thu tarlangin, "India ram khua leh tui kan nih avangin hnam puanzar hi a hluin kan zah tur a ni a. Kan kohhran mite chu khua leh tui ṭha ni tur a ni, tia inzirtir reng kan ni," an ti.

Synod thuchhuah chuan, khua leh tui ṭha ni tura kohhran mite an inzirtir reng laia sorkar pawi khawihna lian tak, hnam puanzar hâl a ni chu an dem tak zet thu a tarlang a; tun hnuah thleng tawh lo sen an duh thu a tarlang bawk.

Vanlalmuanpuia Khiangte (Mp-a) chuan August 22, 2017 khan Aizawl Bazar lun lai takah mitdel kutdawh a zaipui a, he a thil ṭha tih hian social media a luah hneh hle a nih kha. Mitam takin an ngaihven a, Mizo Idol star ṭhin hian a thlawna music video siam saktu pawh a hmu nghal a ni. Thla rei vak lo hnuah a music video "Ka hmaah Luiral khawmawi" tih chu youtube lamah en theiha dah chhuah a ni ta. 

A music video hi Johny Ngurthansanga (RAW Digital) leh Mawitea Hauchhum (RDS Shots)-te'n an siam sak a ni a, recording sensote hi Gemini Enterprise-te'n an tumsak a ni. Recording hi Bluewave-ah tih a ni. A buaipuitute chuan, "He hla hi Lalpa'n a ropui nan a ṭul angin hmang se, mi chanhai zawkte tan malsawmna lo ni mawlh rawh se" tiin, he hla mi midangten malsawmna an chan theih nan an hlan. 

Mp-a hi 2011 khan Mizo Idol-ah top 20-ah a lo tling tawh a, kum 2016 khan LPS Youth Icon-ah top 20 a lo inhlangkai tawh bawk. Mp-a hian tun hma pawhin khawlaia kutdawlhte chu a lo zaipui fo tawh a ni. Ni danga a lo tih ṭhin tawh angin Mp-a hian Bazarpui lunlaiah mitdel kutdawh, Ramthachunga (Chungchung-a) chu a zaipui a, he a thil tih avang hian amah ngei pawhin thilpek eng emaw zat a dawng let a ni. Scooty leh Mobile phone-te a dawn bakah, sum leh pai petu eng emaw zat an awm bawk. Hei mai hi a ni lo a, zaia sawmtu pawh a ngah phah hle a, Zoram hmun hrang hrangah a fehchhuak mawlh mawlh a ni ber. Tunah hian Delhi leh Tahan lam aṭang pawhin sawmna a dawng a ni. 

He hla hi Youtube-ah Raw Digital Channel-ah upload a ni a, he ta tanga sum fai lutte hi kum tawpah mi chanhai zawkten Chrismas hlim taka an hmanna ve theihna tur atana luanchhuah nan hman a ni ang.

Coordination Committee on Traffic Management-in Aizawl khawpui tâwt lutuk tihziaawmna atana lirthei nei zawng zawngte motor dahna garage nei vek tura hun a pekah ni 38 a la awm. Aizawla local council-te chu an huam chhung ṭheuhah lirthei nei leh garage an neih dan enfiah tura tih an ni.

Coordination Committee on Traffic Management-in Aizawla lirthei nei zawng zawngte garage nei vek tura a tihna bawhzuitu Working Group Committee kaihruaitu Lalbiakzama, Home depart­ment-a additional secretary chuan, Aizawl khawpui chhunga local council tinte chu an huam chhung ṭheuhah lirthei neite chhinchhiah a, garage nei leh nei lo enfiah tura ngenna pek vek an ni tawh tih a sawi.

Lalbiakzama chuan, an ngen angin Aizawla veng 

ṭhenkhatah chuan garage nei leh nei lo enfiah ṭan a ni tawh a, garage neih theihna hun tiam thlen hmain thla khat chuang a la awm avangin tuna garage la nei lote pawhin a hun takah an neih hman an beisei thu a sawi a, "Lirthei neitute tana garage nei vek tura hriattirnaah sorkarin a thu a sût a nih loh chuan khauh taka kenkawh a ni dawn," a ti.

Lalbiakzama chuan, lirthei nei, garage nei si lote hrem dan tur tihfel a la ni lo tih a sawi a; Committee member ṭhenkhatin garage neite chu sticker siamsak an rawt laiin, ṭhenkhatin garage nei lote sticker pek zawk an rawt thu te, hmalak zui dan tur chu hun tiam ral hma ngeia tihfel hman an beisei thute a sawi bawk.

Home minister R Lalzir­liana kaihhruai, Coordination Committe on Traffic Manage­ment chuan Aizawl khawpui tâwt tihziaawmna atan Ai­zawla lirthei nei zawng zawng chu October 1, 2016 aṭang­a chhiara ni 420 chhung, No­vem­ber 30, 2017 thleng garage neih nan hun an pe a ni.

Coordination Committe on Traffic Management thutlukna angin, October thla chhung hian Aizawlah sorkar motor leh mimal motor zawng zawngte intlân chhâwk mek a ni bawk.

Kumin October thlaa Presbyterian kohhrana inkhawmpui lian ber dawttu, Presbytery Inkhawmpuia Presbytery 36-s Statistician-te report-a a lan danin, kum khat kal ta chhung khan Presbyterian Kohhranah mi 3,069 an thi a; Presbytery tina mitthi zingah hmeichhia aiin mipa an tam zawk vek.

Presbytery 36-a kum khat chhunga mi 3,089-te hi mipa 1,993 leh hmeichhia 1,076 an ni a; Presbytery tinah mipa thi an tam zawk vek a, mipa leh hmeichhia thi zat inhnaihna ber chu Chhimtawp Presbytery niin, mipa 14 leh hmeichhia 13 an thi a ni.

Hetihlai hian, kumina KTP Rorel Inkhawma report-a KṬP member thi zat tarlanah pawh, hmeichhia aiin mipa thi an tam zawk hle. Kum 2016 chhung khan KTP member thi zat chu mi 466 an ni a, chu'ng zinga 417 chu mipa niin, 49 chu hmeichhia an ni. KṬP member thi zawng zawng aṭanga mipa thi zat hi 89.48% a tling.

Kum hmasa lamah KṬP member thi zingah, hmeichhia aiin mipa an tam zawk hle nia thu dawn a ni.

Second round intihsiakna hi ṭhuanghniha kalpui a ni dawn a, mimalin an inel phawt a, chu mi hnuah group-in an inel leh dawn a ni. Contestant-te hi October 18 leh 19 zanah an inlan leh dawn a, group-in an inel ve thung dawn a ni. Fiamthu Fest hi The Grand Hotel-ah neih a ni a, zan dar aṭangin Zonet Rimawi-ah live-a pekchhuah ṭhin a ni.

Hmarchhak miten eizawnna kawng leh skill development lama hma an sawnna theihna tur atan, Non-Governmental Organization (NGO) pawl thar North East Career Club (NECC) din a ni. 

North East Career Club hian a tum ber chu hna hrang hrang thawh tur mite hrilh hriatte, midangte eizawnna tur kawng kawhhmuh te, institution lar zawk te nen inthlunzawm te a ni. Ṭhalai tam takte tana hna zawn sak chu an tum bulpui ber a ni a, kawng hrang hranga hmantlak ni thei tura mi dangte zirtir mai bakah, ṭhalai hna nei lo tana kawng hawn sak chu an tum ber a ni. 

Heng bakah hian he pawl hian school leh industry thlunzawm te, ṭhalai tana eizawnna kawng kawh hmuh thei program siam te, eizawnna kawnga midangte kawhhmuh kawnga sorkar ṭanpui leh school, college leh University-a career club din a career guidance program siamte a ni. Sorkar leh private agency-te nena thawhhona ṭha tak neih a tum bawk.

NECC hian North East chhung hmun hrang hrang Assam, Arunachal Pradesh, Manipur, Meghalaya, Mizoram, Nagaland, Tripura leh Assam-ahte an hnathawh hi kalpui an tum a ni. NECC hian Guwahati-ah head office an nei ang a, hmarchhak state hrang hrangah branch hawn an tum bawk a ni.

He pawlah hian tu pawh an thil tum lama tui mite chu member an ni thei dawn a, he pawl dintute hian zirlai, zirtirtu leh nu leh pa te mai bakah eng hnathawk pawh helama tuite chu member ni tur hian an sawm.

NECC hian kar liamta khan international company- Spearson India Education Service Pvt. Ltd. Bangalore-te nen thawhhona thuthlung MoU an sign tawh a ni.

He pawl hi Ministry of Youth Affairs Govt of India hnuaia Rajiv Gandhi National Institute, Assam Don Bosco University, Guwahati, Mental Health Institutes Mind India, Guwahati-te, Teacher Education Colleges ṭhenkhat - Modern Institute of Teacher Education, Kohima, Mount Mary College of Teacher Education, Chumukedima leh North East a college, school leh university hrang hrangte nen an thawkho dawn bawk a ni.