TIMES OF MIZORAM

Vawiin chawhnu khan Art & Culture Minister Pu R. Romawia chuan Pachhunga University College Seminar Hall-ah ‘Certificate Course in Mizo Cultural Studies and Performing Arts’ a hawng a. Department of Mizo, Pachhunga University College (PUC) leh Art & Culture Department buatsaih a ni. 

Art &Culture Minister Pu R. Romawia chuan course hawn chu hnam anga than lenna atan thil pawimawh em em a ni, a ti a. Course hmang chuan hmasawnna hrang hrang kan hnam pawhin kan neih ngei a beisei thu a sawi a. ‘Certificate Course in Mizo Cultural Studies and Performing Arts’ chu a bik takin thangtharte tan a pawimawh lehzual a ni tiin kan hnam tobul leh hnamzia bakah hnam lam, hnam hla leh a dangte zirna tura buatsaih a ni, a ti a. Cultural Studies a nih angin British-in min awp lai atanga Zawlbuk culture bakah tunlai kan hnam dinhmun thlengin zir chian a tul a ni, a ti a. Tunlai khawvel danglam zelah hian kan hnam hla leh lam pawh kan ti danglam chho hret hret a, heng kan tihdanglamna ah hian kan hnamzia kan tihlan zel a tul a ni, a ti a. Kan hnamzia vawn nun zel hi kan tihtur a ni tiin kalhawmte chu a chah bawk a ni. 

PUC Principal Dr. Tawnenga pawhin thu sawiin Institution dang laka kan danglam theihna chu kan hnam nun chawi lar leh zirchian hi a ni, a ti a. Kan hnamzia leh hnam lamte kan humhalh a pawimawh a ni, a ti a. Course thar  inzirtirna-ah Mizo tawng hman a nih tur thu a tarlang a. Course thar hawn chungchangah thu sawiin a bul tanna chauh anih thu a sawi a. Hun lo kal zel turah pawh Culture Centre thlengin kan neih a beisei thu a sawi  a ni. 

Art & Culture Director, Pu R. Hmingthanzuala chuan thusawiin kan ram leh hnam dinchhuahna kawngah Mizo kan nih hriat reng a ngai a ni, a ti a. Mizo nihna chu zahpui lova chhuang zawk turin kalkhawmte chu a fuih a. Hnam tlawmngai kan nihna leh aia upa zah thin kan nihna hi vawn nun zel a pawimawh a ni, a ti a. Kan hnamah kan chian a ngaih thu a sawi bawk a ni. 

 ‘Certificate Course in Mizo Cultural Studies and Performing Arts’ hian thil tum hrang hrang a nei a, chungte chu:

1)    Thangtharte hnena Mizo nunphung (Culture) vawrh lar

2)    Mizo zai leh lam inzirtir

3)    Mizo zai leh lam vawrhlar leh tihhmasawn

4)    Pipute nunphung zirchian a, a chhawmnun tlak chhawm nun

5)    Mizo hmanrua leh bungrua (material culture) humhalh leh zirchian-te a ni 

Course zir tur hian seat 40 siam niin Credit system leh Grade Point System-a kalpui tur a ni.

He course thar hi Part A leh B-a then niin Part A-ah hian Culture lam zir a ni anga, Part B-ah hian Performing Arts zir a ni thung dawn a ni. Course zir hun chhung hi thla ruk niin theory paper pali (4) leh practical paper pahnih (2) a awm a. Theory paper hi PUC Mizo Department faculty ten an zirtir ang a , practical hi Art & Culture Deaprtment instructor ten an zirtir dawn a ni. 

 Course hawnna hi Course Coordinator leh Asst Professor ni bawk , Dr. Zoramdinthara chuan a kaihruai a. Dr. Lalzama, Mizo Dept HOD chuan kalkhawmte lawmna thu a sawi a.  Asst Coordinator Pu H. Laldinmawia chuan Course chungchang report a pe a. Art & Culture Department leh Pachhunga University College ten ‘Thawhhona Thuthlung’ an ziak a. PUC aiawhin Principal Dr. Tawnenga’n a ziak a, Mizo Dept. aiawhin HOD Dr. Lalzama’n a ziak a, Art & Culture Department aiawhin Director Pu R. Hmingthanzuala’n a ziak bawk a. Asst. Professor Pi Enid H. Lalrammuani chuan lawmthu sawina in hun a khar a. Sunflower Electronics, Chanmari ten PUC zirlai pathum hnena scholarship an pek chu Minister hian a hlan nghal a ni.

Pu C.Lalthanmawia, Superintendent of Police, Traffic, Aizawl City chuan Mizoram State Sorkar Notification No.B.12021/10/04-TRP Dt.22.8.2008 leh Section 115 & 117 of Motor Vehicles Act, 1988 in thuneihna a pek angin mipui vantlang leh lirthei hmangtute him nan leh hnathawktu ten tha taka hna an thawh theih nan a hnuaia tarlan hmun leh hunah te hian lirthei tlan dan tur thupek a chhuah. 

SIPMIU (NERCCDIP), Aizawl ten Lower Zarkawt kal tlang Chanmari leh Israel Point inkar kawngpui siamthat hna (Re-Patching) chu ni 18.10.2017 (Nilaini) zan atanga an thawh dawn avangin helai kawngpuiah hian lirthei eng chi mah tlan tlang phal a nilo. Tin, hnathawhna huam chhungah hnathawk tibuai theiin kawngpui sirah lirthei eng chi mah din/dah phal a nilo. Hnathawh hun chhung/ darkar hi zantin dar 9:00pm atanga zing dar 5:00am thleng a ni ang. 

Thupek hian chhiatrupna thil kangmei leh emergency kaihnawiha duty leh Dan leh Thupek pawimawh bika duty te chetvelna a huam lo ang. He thupek hian hnathawh tan ni 18.10.2017 (nilaini) zan atangin hna zawh a nih hma chu a huam ang.

Vawiin chawhma dar 11 khan Agriculture Conference Hall Serchhipah District Level Oil Palm Growers’ Meet 2017 neih a ni a, Pu J. Lalzamliana, MAS, Director of Agriculture (CH) chuan khuallian niin a hmanpui. 

Pu. J Lalzamliana chuan thusawiin, Serchhip Districta Oil Palm chingtute behchhan ber 3F Agrotech Pvt. Ltd an inhnukdawk ta mai chu pawi a tih thu sawiin, Oil Palm chingtute harsatna chu sawrkarin ngaihthah lovin Godrej Agrovet Ltd. Bukvannei, Kolasib lam an biak sak tih a sawi a, an huam chhunga awm ni lo mahse Serchhip District chhunga Oil Palm te chu 1kg cheng 5.50 in an lei sak theih tur thu a sawi a ni. Amaherawhchu Oil Palm rah tha leh hrisel tak chauh an lei sak theih tur thu sawiin loneitute pawhin sawrkar hmalak sakna te hre rengin inthlahdah lova hma la chhunzawm zel turin a chah a ni. 

Hun hmasa lamah Oil Palm rahte chu hmun leh hmuna lei sak an nih thin laiin chutiang reng chuan a kal theih dawn lova, sawrkar lamin a lak khawmna hmun tur a siamah loneituen lakhawmin, chuta tang chuan a hlawmin Bukvannei lamah phurh thlak sak an ni ang a, a phurh man erawh hi chu NEDP sum atangin sawrkarin a pek sak dawn ani a ti a. Oil Palm rah Godrej Agrovet Ltd ten 1kg cheng 5.50 a an leisakna chu sawrkarin 1kg ah cheng 1 zel an belhchhah sak tur thu a sawi bawk a, sawrkarin duhsak taka hma a laksakna hre rengin hlawhtling ngei tur tan la turin a chah a ni. Oil Palm chin hi India policy pawimawh tak pakhat ani tih leh India ramin hriak ei chi kan intodelhlohna phuhruk na tura hmalakna pawimawh tak ani tih hre rengin taima taka hna thawk turin kalkhawmte a chah a ni. 

Pu Lalringliana, SMS (SS) Serchhip District chuan report pe in Agriculture Department Serchhip chuan kum 2013 atanga 2017 chhungin Oil Palm rah 95818 kg chu Rs. 481734.25-a an hralh tawh thu a sawi a, 3F Agrotech Pvt. Ltd te hian Rs. 357753.00 an la bat sak thu a sawi bawk. Serchhip District chhunga khaw 11 atangin loneitu 581 ten Oil Palm an chinga, an zingah hian Buangpui leh Hriangtlang khua atanga loneitu 21 te tih loh chuan Oil Palm rah hralh tur an nei tawh a, heng Oil Palm te hi lakkhawmna hmun tur hi khaw hrang hrangah hmun 26 ah siam niin heng hmun atang hian Bukvannei lamah hralh tura phurh liam ani thin dawn a ni a ti. 

He hunah hian Pu Lalruatkima, Sr. Development Officer, Godrej Agrovet Ltd. Pawhin thu sawiin sawrkar hma lakna in an huam chhung ami ni lo, Oil Palm lei tura ruahmanna awmah loneituten an duhkhawp lei tur thar chhuak ngei se a duh thu a sawi a, anmahni lamah chuan harsatna engmah a awm a rin loh thu a sawi bawk. 

He hun hi Pu James Lalsiamliana, MAS, District Agriculture Officer, Serchhip chuan a kaihruai a,  Pu C. Lalthlamuana, Deputy Director chuan he hun hi a hmanpui a. Chawhnu lamah zawhna leh chhanna hun hman niin, Pu Lalchhuanawma Siakeng, Chairman, District Oil Palm Zonal Committee chuan lawmthu sawiin a khar a ni.  He hunah hian district chhunga Oil Palm chingtute an kal tha hle a ni.

Vawiin chawhma khan I&PR Director Pi Lalnithangi chuan Mizo film thar ‘Thuchah Hnuhnung’  I&PR Auditorium-ah a tlangzarh.

I&PR Director Pi Lalnithangi chuan film hmuhnawm tak siam a ni chu lawmawm a tih thu a sawi a. Film reng reng kan en chuan mihring chanchin hi a tam zawk a ni, a ti a.  Mizote chu talent nei tha tak kan ni tih film chuan a pholang nasa hle a ni, a ti a. Film industry lamah hma kan sawn nasa a ni, a ti a. Mizoram Film Development Society (MFDS) nena thawhhona tha neih a ni chu lawmawm tiin inpawh taka thawkho zel turin a sawm bawk a ni.

I&PR Joint Director leh Film Development Nodal Officer Pi Lallianpuii chuan film tlangzarh a ni chu hlawhtlinna pawimawh tak pakhat a ni tiin kumin 2017-ah hian hmasawnna nasa tak kan hmu chho a, film release a tam hle a ni, a ti a. Documentary leh artiste training neih tawh chu tangkai taka hman a ni, a ti a. Film siamtu Pu KC Zoherliana chuan feature film hmuhnawm tak a siam a ni, a ti a. Hmasawnna tur kan la nei a, tan lak zel a ngai a ni tiin kalkhawmte chu a fuih a. Film lam hmasawnna atana hmachhawp leh ruahmanna ti hlawhtling turin insiam rem thiam a ngaih thu a sawi a ni. 

Programme tan hma hian film show neih phawt a ni a. MFDS Vice President Pu Lalawmpuii Khiangte chuan tlangzarhna hun hi a kaihruai a. Film Director leh Producer, Pu KC Zoherliana chuan film siam dan tlangpui a tarlang a. He hunah hian film changtute leh MFDS bakah I&PR thawkte an tel a ni.   

Vawiin khan DC Conference Hall, Mamit-ah Pi Lalbiaksangi, District Bawrhsap hovin Mizoram Sanitation Task Force hmalakna hnuaia  khawpui fai thlanna-ah Mamit khawpui chu District fai bera thlan a nih bakah Mizoram chhung khawpui fai inelna bika lawmman pathumna-a lak lawmdan tur ngaihtuahin thutkhawm a ni.

Pi Lalbiaksangi District Bawrhsap chuan Mamit khawpui chu District fai ber a ni leh Mizoram pum huapa lawmman pathumna a la chu khawtlang hruaitu, tlawmngai pawl hrang hrang, NGO's hrang hrang, chhungkaw tin leh mimal tinte thahnem ngaihna leh thawhrimna a vang a ni a tiin lawmthu a sawi a, Mamit District chu India ram pumah ekin sa hnem ber lawmman pakhatna kan dawn thu sawiin karhnih chhungin BPL leh APL hnuaiah ekin 840 sak hman a nih thu a tarlang bawk. 

Vawiin meeting hian  Mamit khawpui chu District fai bera thlan a nih angin faina kawnga hma a sawn zel theihnan vengtin VC te chu quartely a inelna buatsaih thin tura ruahmanna  siam chhoh zel ni se tih a ni bawk.

Meeting-ah hian khawpui fai lawmman lak lawm hun tur ngaihtuah a ni a, thla thar ni 10 chu tinzawn niin Programme leh tul dangte lo rel a ngaihtuah tur Organising committee Addl.DC Pu H. Lianzela Chairman na hnuaia  meeting hian a din nghal a ni. 

Meeting-ah hian Heads Of offices, khawtlang hruaitu, tlawmngai pawl hrang hrang aiawh leh thuthar thehdarh tute an tel  a ni.

Govt Lawngtlai College-a Rashtriya Uchchatar Shiksha Abhiyan (RUSA) hnuaia hma lakna peng khat atan vawiin khan Central YLA Hall, L-III-ah Lawngtlaia college leh higher secondary sikul zirlaite tan an hma hun atana kawng kawhhmuhna (career guidance and counselling programme) buatsaih a ni.

He huna Khuallian, Lawngtlai Bawrhsap Dr Arun T., IAS chuan tun lai hunah mawl taka lehkha zir tawp chu thil finthlak tak a ni tawh lo tih sawiin, zirlaite’n lehkha kan zir lai atangin kan nih tum kan chian hmasak a pawimawh a ni, a ti a. Kawng zawh tur tam tak awm zingah, mahni tui zawng leh thiam zawng thlan thiam a pawimawh tih sawiin, an nih tum an chian theih nan leh kawng dik an zawh theih nan zirlaite kaihruaia kawng kawhhmuh turin career guidance programme chu buatsaih fo a tul a ni, a ti a. Zirlaite chu an tuma chiang tur leh, tumruhna nen hlawhtlin ngei ngei tuma bei turin a fuih  nghal bawk.

Khual zahawm Assam Rifles, Lunglei-a Commandant Col. BB Pun, YSM, SM pawhin Mizo thalaite zing atangin sipai lumum mai ni lo, officer-ah tam tak lut tura a duh thu sawiin, chumi atana Mizo thalaite kaihhruai leh puih an inhuam reng thu a sawi a. Zirlaite chu an mamawhnaah inthlahrung lova anmahni pan thin turin a chah a ni.

Vawiina career guidance programme-ah hian Government Lawngtlai College Principal leh faculty-te leh zirlate bakah, Lawngtlai khawpui chhunga Higher Secondary sikul zirtirtu leh zirlai eng emaw zat an tel a. Lawngtlai Sub-Deputy Commissioner Dr Manesia Khaimeichho MCS chuan Civil Service leh sawrkar hna danga lut tura exam hrang hmachhawn dan sawiin, Assam Rifles-a Captain Sahid Yunas chuan sipaia luh theih dan kawng hrang hrang a sawi bawk.

Superintendent of Police, Lunglei District, Lunglei chuan Section 115 of Motor Vehicle Act, 1988 (Act No.50 of 1988) leh Government of Mizoram Notification No.B.12012/10/04 Dt 25/9/2007 ten thuneihna a pek ang in a hnuaia tarlan ang hian thupek a siam a.

Notification No PCL-27/2015/1783 dt 20/10/2017 hmanga Pukpui-Mausen kawng lirthei kal theih hun siam chu zin mite leh kuthnathawktute tana harsatna tlem thei ang ber ngaihtuahin a hnuaia tarlan ang hian siam danglam a ni e.

1.       Kawngpui khar hun – 9:00 AM atangin 5: 00 PM

2.       Kawngpui hawn hun – 5:00 PM atangin 9: 00 AM

3.       Public/Private Carrier leh mimal motor reng reng zing lam dar 9:00 AM hma lamah leh tlai lam 5:00PM hnu lamah chauh kal tura hriattir an ni e.

4.         Motor te, Sumo chin hnuailam Aizawl atanga rawn kal leh Lunglei to Aizawl tlan te chu Haulawng to Dawn road ah tlan vek tur a ni.

5.       He thupek hian dan leh thupek kengkawhtute leh kawng siamtute a huam lovang.

 He thupek hi kawng tha zawk kan neih theih na tur atan a ruahman a nih avangin mipuite zawm hram tura ngen leh hriattir kan ni e. He thupek zawm lo te chu MV Act dan hmang a hrem an ni ang.

He notification hi Dt 24.10.2017 (Tuesday) atanga hman tan tur a ni ang.