TIMES OF MIZORAM

USA aṭanga rawn kal, University of Minnesota leh Mississippi Watershed Management Organization (MWMO) mithiamte chu, nimin khan Chite luiah kalin a dinhmun leh awm dante an zir chiang.

University of Minnesota leh MWMO mithiamte hian Chite lui dung thui tak zawhin, lui zir chianna atana hmanraw hrang hrang an kente hmangin Chite lui an endik a; luiin har­satna hrang hrang a tawh mekte chu chhinchhiah a ni. 

USA mithiamte hian lui an endikna aṭang hian Chite lui chhanchhuahna tura hmalakna kal mekah rawtna an neihte chu Aizawl DC hoin Save Chite Lui Coordination Committee hruaitute nen an la sawiho ang.

University of Minnesota leh MWMO mithiamte hi Save Chite Lui Coordination Committee hruaitu te, Mizoram University zirtirtute leh research scholar te, PHE, Irrigation & Water Resources leh Soil & Water Conservation department hotute'n an ṭawiawm a ni. 

MNF president Zoramthanga chuan, an sorkar hunah an sorkar hmasaka link road kan laihte chhunzawmin, an lai thlúr sung dawn niin a sawi a, "Kan sorkar aṭanga kum 5 hnuah chuan chhung tin kum khat sum lak luh pawh nuai 5-10 a ni deuh vek ang," a ti.

Nimina Aizawl East-I Block MNF-in Zemabawk YMA Hall-a lawm luh inkhawm an buatsaihah Zoramthanga chuan, "Congress hi bûkin a awm a, a tling zo ta lo a, a hun a tawp hnai ta. Delhi lamah an tla sisep tawh a, India ram state 29 awmah inthlan thar apiangin an tla zel a, Punjab-ah chauh an sorkar ṭâwk a, kan hmaa state inthlang turah pawh an tla zel ang," a ti a; Congress party tan India ramah sorkar ngaihna a awm tawh lo niin a sawi.

Zoramthanga chuan, Mizoram pumah kawng a chhe em em vek nia sawiin, "Mipui sum thawhkhawma hnatlang thâa kawng siamtute chu Congress President chuan 'Elhsên hnatlang' a ti hi keini chuan mak kan ti hle," a ti a; kum 10 Congress sorkar chhunga an thil tihte avangin Zoram mipuiin Congress-a luh aiin MNF-a luh an chíng thar tawh niin a sawi.

MNF President chuan, an sorkar hunah chuan link road an lai thlûr seng sung dawn nia sawiin, "SEDP hmangin chhung tinte'n eizawnna ngêlnghet, chhe thei tawh lo tur an neihna turin chhung tinin cheng nuai 3 aia tlem lo an mamawh vek ang tih kan hria a, hma kan la dawn a ni," a ti. Thlai hralhnaah harsatna a awm dawn lo a, sumah harsatna a awm dawn lo nia sawiin, "Kan budget hi chu a chî atan chauh kan hmang ang. Kan sorkar aṭanga kum 5 hnuah chuan chhung tin kum khat sum lak luh pawh nuai 5-10 a ni deuh vek ang," a ti bawk.

MNF thuchhuah chuan, nimina lawm luhna inkhawmah hian MNF President-in an party zawm thar mi 1,132 a lawm lut niin a tarlang. 

Chief minister Lal Thanhawla chuan, kum 2018 inthlanah chaka sorkarna an chang leh a nih chuan NLUP an kalpui chhunzawm zel dawn thu a sawi a; cheng khat pawh a eiru lo niin a sawi bawk.

Lal Thanhawla hian nimin khan Thenzawl a tlawh a, Thenzawl bak­ah, Buangpui leh Neihloh khuaa V/C leh Congress party hruaitute nen Thenzawl Venghluna R Lalremsiama inah an inkâwm a ni.

Chief Minister chuan, NLUP chu khawvel pumin ṭha an ti niin a sawi a, "Prime minister Narendra Modi pawhin ṭha a ti a, Mizorama opposition party hrang hrangte'n titawp turin PM hnenah an ngen a, tihtawp a hnêkin min phurpui zawk a ni. Sorkar thar kan neih leh hunah pawh NLUP kan chhunzawm mai bakah, a tiphuisui turin NEDP ruahman a ni," a ti.

CM Lal Thanhawla chuan, cheng khat pawh a eiru lo nia sawiin, MLA travelling allowance (TA) kum tin cheng nuai hnih awm pawh vawi khat mah a la la lo niin a sawi a; kum 2018-a Assembly inthlanah Congress party chu an sorkar leh dawn nia sawiin, "Keimahni kan intichhia a nih loh chuan party dang min tichhe theitu an awm lo," a ti.

Lal Thanhawla chuan, Aizawl Municipal Corporation inthlana an chak loh chhan te, V/C inthlana an chak vek loh chhante chu an party chhungkuaah kawhmawh báwl, candidate chang lo leh vui ṭhinte vang a nih thu a sawi.

CM Lal Thanhawla chuan, politics-ah thu hlui a awm lo niin a sawia; MPC leh MNF party chu an sorkar chhunga ram leh hnam tana rotling siam leh thawh sawi tur nei lo niin a sawi bawk. 

Vawiin chawhma khan Chief Minister Pu Lal Thanhawla chuan Bawngkawn Brigade vengah Government J.Thankima College(GJTC) Central Campus a hawng a; GJTC  Silver Jubilee lawmna inkhawm a hmanpui nghal a ni.

GJTC Central Campus hawnna leh Silver Jubilee inkhawmah thu sawiin Chief Minister Pu Lal Thanhawla chuan  Government  J.Thankima College in kum 25 hmel a hmu thei ta chu lawmawm a tih thu a sawi a. Mihring kum nena tehkhin pawhin in puitlin hun a nih tawh angin  GJTC chuan puitlin zia ti lang tawhin hlawhtlin na tam tak a nei tawh a ni a ti a. Hmunhma tha tak an neih chu cheibawl thiam tur leh campus chhung pawh ramngaw hmun nuam a siam turin a chah a ni.

Chief Minister Pu Lal Thanhawla chuan thangthar lehkhathiam rawn chhuak chho mek zel te chuan Mizoram dinhmun pawimawh tak, a awmna  lai remchanna, nakin lawka Gateway for Trade and Commerce with South & South East Asian Countries ni mai tur chu chiang taka an hriat a ngai a. Chumi lam hawia an thiamna te lo tat hriam a, lo inpuahchah lawk tur  leh chhawr tangkai thei tura an rilru puthmang leh sutthlek zawng te pawh an her rem a ngai a ti a. Mithiam lo pungchho zelah  tuna  Mizoram chhunga eizawnna awmchhun anga lang sawrkar hna chu innghahna tlak a ni dawn lo a, a ni lo tan tawh reng a ni ti a. Thalai mithiam rual ten mahni eizawnna insiamchawp, ‘Self- Employment’ lam an hawi a ngaih tawh thu leh sawrkar pawh in Self-Employment huanga hma la te chu NEDP hnuaia Entrepreneurship Development Scheme kaltlangin a thawhpui zel tur thu a sawi a. Ram hmasawn zel, state economy thang chho  zelah entrepreneur te chu sawrkar innghahna tur leh sawrkar hmalakna a taka kalpuitu tur te an ni a ti.

Saptawng zah leh Vai tawng hmuhsit chu thanmawh bawk a ni a, thangthar rual, Mizoram innghahna te chuan India ram chhunga pawimawh em em Hindi leh khawihmun pawha pawimawh  Saptawng thiam an tum a ngai a ti a. Sawrkar hnathawk lian zingah a ziak thiam fu si ram tana tawng a ngaih huna Saptawng emaw  Vai tawng pawh insawi fiah hleithei lo an awm fo chu thil mawi lo tak a ni a ti. Ziak leh chhiar thiam mai a tawk lova; chhawrtlak thiamna nei chunga degree neih a ngai tawh a ni a ti a. Chief Minister chuan Mizo thalai te tan hriselna ngaih pawimawh chu thil tul hmasa a nih thu sawiin hriselna nei tur chuan  chhunglam leh pawnlam in uluk leh mahni inthunun a pawimawh a ti. Nu leh pa thuawih, aia upa zah thiam leh Zonunmawi  ngaihpawimawh chu hlawhtlinna bul a nih thu sawiin Thalai ten chu chu an ti  em tih inzawt thin se a duh thu a sawi a.” Mizo tawng mawi tak kan neih mek, Duhlian tawng, zo hnathlak zawng zawng ten an hriatthiam hi  tihchhiat zel a nih loh nan kan vawnhim a ngai a. Thangthar ten tawngdik hman intih hmuh se ka duh a. He Duhlian tawng hi Pathian in Zofate kan in phuarkhawm  leh tanrual nana min pek a ni a. Kan thenawm hnamdang te hi chuan an nei ve lova, khaw inthenawmte pawh saptawng emaw Vaitawng ten an inbiak a ngai hial a. Kan vannei hle a ni. Chuvangin Mizotawng dik hman hi kan intihhmuh leh kan dah pawimawh a ngai a ni”, a ti.

GJTC  Silver  Jubilee lawmna inkhawm hi chhawng hnih a neih a ni a. Hun hmasa zawk hi Khuallian hova hman niin a hnu hnung zawk hi College bil deuh a programme siam nen hman a ni. GJTC   Principal Dr. C.Lalremruata leh Donor Family aiawh ten thusawina hun an hmanga. He hunah hian GJTC  Silver Jubilee puala Souvenir pawh Chief Minister in a tlangzarh nghal a ni. Pu Lalhmachhuana, Asso. Professor in report pekna hun  hmangin GJTC  din chhoh a nih dan leh ram chungchanga harsatna an paltlang dan te a tarlang. Government  J.Thankima College(GJTC) hi Kum 1992 khan din a ni a. Tunah hian Zirtirtu 29 an awm mek a; kum inah zirlai 593 an nei mek a. Bawngkawn Brigade ramchhunga Government J.Thankima College(GJTC) Campus zau zawng hi Square Metre 8519/- niin Central Campus hi NLCPR sum Rs.85.77Lakh hmanga sak a ni a. College building an neih mek te chu RUSA tanpuina sum hmanga thawm that a ni.

Chief minister Lal Thanhawla chuan, kum 2018 inthlanah chaka sorkarna an chang leh a nih chuan NLUP an kalpui chhunzawm zel dawn thu a sawi a; cheng khat pawh a eiru lo niin a sawi bawk.

Lal Thanhawla hian nimin khan Thenzawl a tlawh a, Thenzawl bak­ah, Buangpui leh Neihloh khuaa V/C leh Congress party hruaitute nen Thenzawl Venghluna R Lalremsiama inah an inkâwm a ni.

Chief Minister chuan, NLUP chu khawvel pumin ṭha an ti niin a sawi a, "Prime minister Narendra Modi pawhin ṭha a ti a, Mizorama opposition party hrang hrangte'n titawp turin PM hnenah an ngen a, tihtawp a hnêkin min phurpui zawk a ni. Sorkar thar kan neih leh hunah pawh NLUP kan chhunzawm mai bakah, a tiphuisui turin NEDP ruahman a ni," a ti.

CM Lal Thanhawla chuan, cheng khat pawh a eiru lo nia sawiin, MLA travelling allowance (TA) kum tin cheng nuai hnih awm pawh vawi khat mah a la la lo niin a sawi a; kum 2018-a Assembly inthlanah Congress party chu an sorkar leh dawn nia sawiin, "Keimahni kan intichhia a nih loh chuan party dang min tichhe theitu an awm lo," a ti.

Lal Thanhawla chuan, Aizawl Municipal Corporation inthlana an chak loh chhan te, V/C inthlana an chak vek loh chhante chu an party chhungkuaah kawhmawh báwl, candidate chang lo leh vui ṭhinte vang a nih thu a sawi.

CM Lal Thanhawla chuan, politics-ah thu hlui a awm lo niin a sawia; MPC leh MNF party chu an sorkar chhunga ram leh hnam tana rotling siam leh thawh sawi tur nei lo niin a sawi bawk. 

Vawiin khan Equal Opportunity Cell, Government J Buana College buatsaihin an College Hall-ah Awareness Campaign on Gender Sensitization neih a ni a. He hunah hian Pi Julie Lalrinzami, Chief Judicial Magistrate, Lunglei District-in zirtirna a pe a ni. 

Pi Julie Lalrinzami chuan  ‘Inchhungkhur, Khawtlang, politics leh inneihna ah te mipa leh hmeichhiate dinhmun a intluktlang em’ tih thupui hmangin zirtirna a pe a. Dan leh hrai chungchang pawh sawiin Lunglei CJM chuan Dan in hmeichhiate dikna leh chanvo a humhalh dan hrang hrang kalkhawmte a zirtir a. Khawvel changkang chho zelah hmeichhiate dinhmun a tha chho zela, amaherawhchu hmabak tam tak kan la nei a ni tiin Pi Julie Lalrinzami chuan hemi kawnga sawrkar hmalakna hrang hrang a tarlang bawk. 

Awareness Campaign on Gender Sensitization inkhawm hi Dr. B. Lalrinchhani, Government J Buana College- in kaihruaiin Professor J. Zorema, Principal, J Buana College-in kalkhawmte lawmna leh thupui hawnna hun a hmang a. University Grants Commission-in Awareness Campaign hrang hrang neih tur a bituk angin vawiin programme pawh hi buatsaih a nih thu a tarlang bawk.

Election Commisson (EC) chuan nimin khan thuchhuah siamin Gujarat Assembly election chu phase hnihah neih a ni dawn tih an puang. Election hi December 9 leh 14 ah neih a ni anga, December 18-ah vote hi chhiar a nih dawn thu an tarlang. 

Gujarat inthlanah hian Verified paper Audit Trails (VVPATs) leh Electronic Voting Machine (EVM) hman a ni dawn tih election commissioner AK Joti chuan a sawi. Inthlan awm turah hian candidate tin te'n cheng nuai 28 ṭheuh hman an phal thu CEC chuan a sawi bawk. 

Gujarat Assembly inthlanna neih tur hian ngaihven a hlawh hle a, mi tamtakin inthlan hun hi an puang mai dawna an ngaih laiin EC lam hian an puang mai lo a, Himachal Pradesh election hun tur an puan hnu pawh khan an la puan loh avangin sawisel a hlawh nasa hle a ni. Finance Minister hlui P. Chidamparam phei chuan Himachal inthlan hun tur an puan laia Gujarat inthlan hun tur an puang mai loh avangin na takin EC hi a lo sawisel tawh a ni.