TIMES OF MIZORAM

Aizawl FC-in vawiin tlai dar 3:00 hian Bethlehem Vengthlang FC an hmachhawn dawn a, AFC coach Paulo Meneses chuan match tina an khelh ṭhat a ṭul thu a sawi.

I League club champion hian MPL6-ah bul an ṭan ṭha tawk lo a, match hmasa paliah chak an neih loh bakah match hnih chak zawn vawi khat chiah an la nei. Portuguese coach Meneses-a hote hian an match hnuhnung berah Chanmari FC 3-1 in an hneh a, Bethlehem Vengthlang nena an inkhelh hunah pawh hian chak tura rinkai zawk an ni.

Aizawl FC coach Paulo Meneses chuan, "I League club kan ni a, Aizawl FC kan nih avangin match khat chauh khelh ṭhat hi a thiang ve lo. Player-te hnenah match tina khel ṭha vek turin ka hrilh a, chuvangin eng team pawh tum dawn ila kan inbuatsaih dan a ngai reng tur a ni," tiin Vanglaini a hrilh.

Tun hnaia I League club chet ṭhat chhanah Romanian midfielder Andrei Ionescu chu player pawimawh a ni a, Dutch club PSV aṭanga zir chhuak hian Ṭhuamluaia Mualah a goal hmasa ber a khung hnuin Lammualah Chanmari FC lamah a khung lehnghal. Romanian club ṭha FC Steaua Bucharest tan pawha khel tawh midfielder Andrei hi BVT tlarhnung tan a hnawksak dawn a, hetihlai hian Bethlehem Vengthlang coach Chawngthansanga chuan, "Player ṭha tak a ni tih chu kan hria, mimalin kan veng bik dawn lo," tiin a hranpaa game plan an siam loh thu a sawi ve bawk.

Aizawl FC chak lohna lai sawiin BVT coach Chawnga chuan, "Aizawl FC tlarhnung hi a phui bik lo a, match tina an buaina a ni. Hei vang hian huaisen taka kan nawr ngam a ṭul dawn a, khelmual chhungah kan inpumkhatna kan lantir a ṭul ang," tiin a sawi. BVT hian Aizawl FC hi phase 1-ah 2-0 in an hneh tawh a, tun ṭumah hian forward thar PC Zosangliana an nei thar bawk.

Portuguese coach Meneses pawhin, "Tlarhnung siam ṭha turin hma kan la nasa a, amaherawhchu practice-na tur duh ang kan neih theih loh avangin hma erawh kan sawn chak thei lo. Ni khat training-na hun kan nei a, danglamna a awm hman ka beisei," tiin an chak lohna lai siam ṭha tura hma an lak thu a sawi.

BVT hian point 12 an hmu tawh a, Aizawl FC nena an inthlauhna hi point khat chauh a ni. Chutihrualin team pahnihin an hriat tel ṭul erawh table mawngphaha awm Chanmari West pawhin point 8 an nei tawh a, semifinal thlen tum tan point hloh a thiang tawh lo.

Kolasib nula zaithiam Garce Lalchhanhimi chuan Hontrade Thazual faknaah pakhatna a hauh leh ta a, kar hmasa he dinhmun hi a lo luah tawh bawk a ni.

Grace-i hian "Rawngbawl tura chhandam" tih hla hmangin a ber nihna hi a hauh a, top chart-ah a hming kan hmu zui zelin a rinawm. Mizo Idol star hi a zaithiam mai bakah, a awm mil tur hla thlan a thiam avangin mipuite ngainat  hlawh a ni. Pahnihnah hian Durtlang nula Judith Lalremruati a awm ve thung a, "Ka lungawi e" tih hla hmang hian kar hmasa lam khan pathumna a lo ni tawh. Judith-i hian chart tihchhuah tharah hian hma rawn sawnin, pahnihnaah a rawn cho a, pakhatna a luah thei a ngem tih chu hunin a la hril dawn a ni. Judith-i hi Salvation Army Officer training turin a inbuatsaih mek a, nakkum lak khi chuan training tur hian a lut tawhin a rinawm. 

Tun ṭum chart-ah hian top 3-ah mipa an lang ve ta a, David Vanlalpeka chu pathumna-ah a rawn inhlangkai. David-a hian thiam tak maiin, "Lalpa'n a sawm a che" tih hla a sa a, he hla hmang hian hun eng emaw chen chu chart-ah a hming kan hmu tawh a ni. Kar hmasa lama parukna, One in Christ-te chu pali-naah an awm a, Ṭhazual Award an dawn hnuah hma an rawn sawn. One in Christ-te hian Ṭhazual Award sem zawh takah khan award pahnih an dawng a, "Ka Lalpa Lalram' tih chu 'Best Music Video" atan thlan a ni. 

Hetihrual hian "Best New Artist" atana thlan Cindy Lalthanpuii chu pahnihna aṭangin pangana-ah a chhuk ve thung. "Best Male Artist" Sawmte pawh top 10-ah lang lehin, pariatna ṭangin parukna-ah a chho a ni. 

Tun ṭumah hian hmelthar kan hmu a, "Hruitu Isua" tih thiam taka satu Dr. Zoa leh R.Lalrinmawii, "Krawsah khan" tih satute chu top 10-ah an rawn inhlangkai a ni. TBC Zaithanpuia leh Mizo Idol aṭanga kan hmelhriat Thawhlehnaniropuia-te pawh chart-ah hian an hming a la lang ve bawk. 

HONTRADE THAZUAL Fakna 23.10.2017

1. Grace Lalchhanhimi - Rawngbawl tura chhandam

2. Judith - Ka lungawi e 

3. David Vanlalpeka - Lalpa'n a sawm a che

4. One in Christ - Ka Lalpa Lalram

5. Cindy Lalthanpuii - A mawi ber

6. Sawmtea - Hlimin ka zai 

7. R.Lalrinmawii - Krawsah khan

8. Thawhlehnaniropuia - Min hruai zel ang che

9. Dr. Zoa - Hruaitu Isua

10. TBC Zaithanpuia - Min ngaidam rawh

Delhi Mizo Welfare hnuaia Kut committee hmalaknain Delhi Mizo Kut hman a ni a, kar kalta Inrinni khan a ṭiak. 

Kut hi October thla inrinni vawi thum - 7, 14 leh 21 khan hman a ni a, October 21 khan a kharna neih a ni. Kut buatsaih chhan hi Mizo culture leh Kristianna chawinunna atan leh, Delhi-a mizo awmte an inpumkhatna atana buatsaih a ni. 

Delhi mizo kut-ah hian pawl pali - Seki, Phenglawng, Khuang leh Darkhuang-ahte an inṭen a, outdoor leh indoor inelna hrang hrang an nei a ni. 

A kharna hi October 21 khan Air India Community Hall, Vasant Vihar-ah neih a ni. He kut hi Pu Vanlalhuma (IFS) chuan a hmanpui a, kut pa chu Pu Lalrikhuma Sailo niin, ani hian Delhi Mizo Zirlai pawl (DMZP) Magazine a tlangzarh nghal a ni. Kut chhim tur hian Mizo zaithiam Feli Fanai pawh a kal a ni. 

Vawiin chawhma khan Lunglei DC Pi Lalzarmawii, IAS chuan Saikuti Hall, Venglai a tlawh a, building chei thar leh thuamthat hna kalpui dan turte a en. Lunglei DC hi Additional DC Pu Benjamin Lalzama, SDO(S) Pu H. Lalrinpuia, DIPRO Pi C.Lalremruati, Lunglei MJA President Pu Lianchama Chhangte leh Pu Ngurthansanga Sailo, Finance Secretary, YMA Sub-Hqrs, Lunglei ten an tawiawm a. Building chhung, pawn lam leh a chheh vel te chu chipchiar taka fangin hmalak tul an tih hrang hrang te an sawiho.

Sawrkarin Saikuti Hall hi nasa taka thuam that a tum a, sum pawh pawm (approve) tawh niin tun dinhmunah Finance Department atangin Expenditure sanction nghah mek a ni a, thuamthat hna hi kalpui thuai turin ruahmanna siam a ni. Saikuti Hall thuamthatna tura sum pawm tawh hi a zavaiin Rs. 1,18,15,000/- niin inchung siam that leh RCC Roof Treatment te; lirthei hunna leh kawtzawl thawmthat hna te; Steel gate, kawngka, tukverh leh rolling shutter siam that te; Inchhung soundproof - Fibre Board Lining hna te; Pawn lam leh inchhung Rawng hnawih hna te; Auditorium thuthleng siamthat leh carpet thar phah  bakah Electrification thar leh Sound system tha zawka thawm that hna te thawh tum a ni.

Saikuti Hall building chhungah hian Art And Culture Department hnuaia  District Library leh Musuem bakah  Indoor Shooting Range leh Lunglei District Snooker and Billiards Association Room a awm bawk a ni.  

Yamaha Fiamthu Fest chu a neih chho mek zel a ni a, nizan khan top 20 intihsiak result puan niin, mi 15-te chu intihsiakna hmachhawn zui zel turin an tling. 

Top 20 inelna hi mimal leh group-a kalpui a ni a, a pahnih result hi khaikhawm niin, heta ṭang hian top 15 thlan a ni. Top 15-a tlingte hian nizan khan inelna hi an hmachhawn leh nghal a, contestan-te an cheṭha tlang hle. An zinga aṭang hian a tiṭha zual mi 10-te'n inelna an hmachhawn zui thei dawn a, chuta ṭang chuan top 5 thlan chhuah leh an ni ang. November 14-ah final hi neih tura ruahman a ni. 

Top 15-a tlingte

C. Lalhmangaihzuala Kanghmun

H. Kapkima Sports Complexṭ

Malsawmdawngzuala Zemabawk

Laldawmliana Saitual

Lalnunsanga Falkland

A. Lalhlimmawia Lawngtlai/Thingkah

Hrangkapchhunga Zemabawk

Lalngaihsaka ITI Mualpui

V.L Dinsanga New Serchhip North

Lalhmingmawia Ṭuahzawl

Zoremsiama Central Jail Veng

Lalnunmawia Khiangte Ratu

Lalrinfela Fanai Darlawng

C. Lalmalsawmzela Bawngkawn

Lalduhawma Ramhlun Vengthar 

All Mizoram Village Council Association (AMVCA) hruaitute chuan nimin khan Aizawl Press Club-ah thuthar thehdarhtute an kâwm a, tun aia an dinhmun siamṭha turin sorkar an phût.

AMVCA president Lalremsangi Fanai chuan, India ram puma thingtlang lama local self government chak leh hmasawnna thlen a nih theih nan Consititution tidanglamin, 73rd Amendment Act, 1992 siam a nih thu a sawi a, "He Amendment Act hian thingtlang lam rorelna kawnga thuneihna leh mawhphurhna sang a rawn pe a. Mizoramah chuan vawiin thlengin thingtlang lama rorelna kalphung thar hi mipui kutah pek a la ni lo," a ti.

Lalremsangi Fanai chuan, September 30, 2011 khan Mizoram State Finance Comission din a nih thu dawiin, "Commission hian autonomous district council, municipal council, local council leh village council-te sum lak luhna tur leh hmasawnna tura chanvo tur ruahmanna ṭha tak a siam a ni," a ti a; ruahmanna thar chu kum 2015-2016 chhunga hman tur ni mah se, V/C-te dinhmun chu a la ngai reng niin a sawi.

AMVCA President sawi danin, State Finance Comission-in V/C-te thuneihna leh chanvo tura rawtna a siamah chuan, annual state own revenue aṭanga 15% chu local body - ADC, AMC leh V/C-te chanvo tur a ni a; V/C-te tana sum ruahman chu kum 2017-18 atan cheng nuai 1410.10 a ni. Mahse, V/C-te chuan cheng nuai 680 chauh an hmu.

V/C-te tana sum ruahman cheng nuai 680 aṭangin ADC huam chhunga V/C-te sum dawn belhkhawm chu cheng nuai 500 a ni a, a bak cheng nuai 180 chu district paruka V/C-te chan a ni.

13th. Finance Commission aṭangin Mizoram V/C-te'n cheng vbc. 214.51 an dawng a, mahse, 14th. FC-ah chuan Mizorama district paruka V/C-te chu sum pek an ni tawh lo a, ADC huam chhunga V/C-te erawh pek an ni thung.

AMVCA hruaitute chuan, 14th FC aṭangin fund dang a awm theih leh theih loh an zir chian thu sawiin, "Mizoram sorkar kan dawr a, Chief Minister leh Finance Minister-te pawhin theihtawp an chhuah niin kan hria. Ministry of Finance-in June 6, 2017 khan hmarchhak state chhunga 14th. FC-in sum thingtlang lam tana a pek ve lohte a hranpain Rural Local Bodies Grants pek a tum thu kan dawng a, a ngahhlelhawm hle," an ti.

Thla khatah V/C president-in Rs. 1,000, vice president-in Rs. 800, member leh secretary-in Rs. 600 leh tlangauin Rs. 450 lawmman atan an dawng mek tih sawiin AMVCA hruaitute chuan, "Election chuh ve hrepa thlan chhuahte lawmman atan a beitham lutuk. Chhiah petu mipui zahawm takte'n min hrethiam se, V/C lawmman hi sorkar hian rang taka en a, tunlai pawisa hlutna anga tisang turin kan ngen a ni," an ti a; state dangin an hman mek anga V/C lawm­man siam thuai turin sorkar an ngen a ni.

Bilkhawthlir khelmuala October 20, 2017-a ṭan Mizoram UPC kohhran hmeichhe inkhawmpui lian, LAD General Conference vawi 23-na chu October 22 zan khan a ṭiak. Inkhawmpuiah hian LAD president Lalronungi kaihhruaiin rorel a ni a, palai 820 an tel.

LAD hian ruihhlo ngaite puala de-addiction centre siam te, mihring hmanga sumdawnna laka kohhran mipuite an him theih nana hmalak te, Mizoram UPC fahrah chawmna Bethani Children Home sakna atan member pakhatah Rs. 20 ṭheuh khawnte an tel a; kum 2018 LAD General Conference neihna atan Mamit thlangin, kum 2018 budget atan Rs. 22,36,500 an pawm.