TIMES OF MIZORAM

Nimin khan Govt Mamit College, Grade B a hlankai a nih lawmna Govt Mamit College New Building-ah neih a ni a, Pu Benjamin, IDAS Commissioner & Secretary H&TE/LESD & E chuan khuallian niin a hmanpui. Pu Ramhmangaiha Ralte Joint Director, H &TE leh Pu Thanglura ASPD, RUSA ten an tawiawm bawk. 

He hun hmanpuitu khuallian Pu Benjamin chuan vawikhat endikna-ah B-Grade Accreditation hmu nghal thei Mizoram College tlemte zinga Mamit College hlankai a ni ve chu thil lawmawm leh ropui tak a ni tiin  thawktu leh Mamit mipuite chungah lawmthu a sawi a, Higher Technical Education tan pawha nichhinchhiah tlak tak a nih thu a sawi, khuallian chuan zoram dinchhuahna tur atana pawimawh hmasa ber chu zirna hi a ni a ti. 

Mamit college chu  Rastrya Uchchatar Siksha Abhyan(RUSA)  kaltlangin thuam chho zel a nia a, hei hian a tum ber chu zirlaiten quality education an neih a nih thu a sawi. Thawktu te chu neitu rilru pu chunga rinawm tak leh, Mamit collge chuan grade sang zawk hmu zel thei tura phurna leh chona nena thawk turin a chah bawk. 

Pu Z. Sangliana, Ex Governing Board President,  chuan Mamit College din a nih chhohdan leh tun dinhmun-ah India ram college te zingah pawh zahpuiawm loh khawpa dinhmun tha a hlankai a ni ta chu Pathian hruaina leh thawktute thahnem ngaihna vang a ni a ti. 

He hun hi Pu LDV Infimate Asso. Prof Govt Mamit college chuan kaihruaii a, Pu Thanglura ASPD, RUSA , leh Pu Vanlalbeiseia Ralte Alumni Asso. GMC ten thusawiina an nei bawk. 

Govt Mamit College hi kum 1983 a din  niin kum 2007 khan sawrkara hlankai a  ni a. Tun dinhmunah Department paruk awmin zirtirtu 25 leh thawktu dang 7 an awm mek a, an vaiin thawktu 32 an awm a ni, Zirlai naupang 110 ten zirna an hmachhawn mek bawk . 

Govt Mamit College hi nikum September thla khan tehfung hrang hrang hmanga teh leh zirchian a nih hnuaah National Assessment & Acreditation Council (NAAC) B Grade a hlankai a ni. 

He hunah hian Mamit khawpui chhunga Sawrkar Department hrang hrangte, College din tirh a nih atanga Governing Board member lo ni tawh te, Khawtlang hruaitu,  Tlawmngai pawl aiawh te leh thuthar thehdarhtute an tel a ni

Principal, Sainik School, Chhingchhip chuan kum 2018-19 Academic Session atana Admission Notice thar chu nimin ni 26.10.2017 khan a tichhuak a. A hnuaia mi ang hian Mizoram State atanga admission ti duhte hriattir an ni :

1. Class : VI

2. No. of Vacancy : 60

3. Kum zat : Mipa naupang 02 July 2006 - 01 July 2008 inkara piang

4. Selection procedure : Written Examination, Interview & Medical Examination 

Hrechiang duhte tan a heng telephone nos. leh email ah te zawhfiah theih a ni :

0-8413017299 (Principal), 0-7085508084 (Adm Officer), 0-7630010072()S-Main Office)

email : sainikschoolchhingchhip@gmail.com

Tourism department bul tumin November ni 23-25 chhung hian Winter Festival chu Turial Airfield hmun-ah hman a ni dawn a. A bul tumtu Tourism department leh sorkar department hrang hrang hotu ten vawiin khan Tourism Secretary Pu V. Lalremthanga hovin a office ah inbuatsaihna kalpui dan tur sawi ho a ni a. Festival programme kimchang duang turin Programme Sub-Committee din a ni. 

Tourism department chuan kum tina kut a buatsaih thin dan kalphung thlakin kum khata festival pahnih, Anthurium festival leh Thalfavang Kut a buatsaih thin aiah kut vawi khat buatsaih turin a inher rem a. Central sorkar atanga kut buatsaihna tur sum a hmuh zatve chu kumin Chapchar Kut lawm nan a lo thawh tawh a ni. Winter Festival hi mitin mila intihhlimna item chi hrang hrang te, sports leh ei leh in, zai leh rimawi te nen buatsaih tum a ni a. A remchan dan angin ram pawn lam atanga zaithiam te pawh he kutah hian lo tel turin sawm tum a ni.

Vawiin khan Chief Minister Pu Lal Thanhawla chuan Sesih khuaah Khuallian niin Khuado Kut a hmanpui a. Chief Minister hi bialtu MLA Pu T.Sangkunga leh Chief Minister nupui Pi Lal Riliani ten an zui a. Khuado Kut hi Zohnahthlak zinga Zomi-ho ten Buhseng zawhah hlim takin an hmang thin a ni.

Khuado Kut Khuallian Chief Minister chuan Buhseng kut Zohnahthlak hnam peng hrang hrang ten, a hming a inang vek kher lo a nih pawhin, kan nei vek hrim hrim hi chhulkhatkual vek kan nih zia ti chiangtu a ni a ti a. Impumkhat leh tanrual chu Mizo hnam dinchhuahna tur leh hnamdangte hmaa min chawisang tu tur a ni a ti. Chief Minister chuan Mizoram phei chu Kumpinu Sawrkar policy tha lo tak, Awpbet la thendarh rawh, tih hmanga India ram chhung leh pawna thendarh Zohnahthlak zawng zawngten an 'Jerusalem' angah an ngai a. "Mizoram chhunga cheng te phei chu Inpui nghaktu kan nih angin  nu leh pa nih kan tling lo a nih pawhin nu leh pa chan chang kan ni tih kan hriat reng a pawimawh", a ti. 

Chief Minister Pu Lal Thanhawla chuan, "Hnambil, a Chi ang zawnga tawng hrang kan neih te vawn nun zel a pawimawh hle a. Kan tawng leh hnambil thil kan humhalhna hian kan inpumkhatna leh chhulkhat kual kan nihna hi a tichhe tur erawh a ni lo a, inlak hran nan kan hmang tur pawh a ni lo. Tin, kan hnam thil te hi tunlai thiamna in a nuaibo kan phal tur a ni lova. Kan hnam bil tawng te chhawmnun zel kan tum ang; Amaherawh chu Duhlian tawng hi kan inpumkhata, kan lo chak zual zel na tur leh Hnamdang te hriata chawisan kan nih theihna tura Pathian in min pek, min phuarkhawmtu a ni a. Kan chhehvel hnamdang ten an nei ve lo", a ti a. "Kut hrang hrang Zohnahthlak ten kan neih te hi kan inhlutsak tawn theuh angai a. Chu chu hnam anga kan inpumkhat deuh deuh na tur thil pawimawh tak a ni", a ti. 

Chief Minister chuan Mizoram chhunga awm te phei chu inthendarh leh inla hrang tham kan ni loh thu sawiin hnamdang te tan khin tham kan nih loh thu a sawi a. Intelkhawm leh inpumkhat chu Mizo hnam chakna tur a ni a ti a. Ram leilung fate chuan an mihringpui te chungah chauh ni lo ramngaw leh nungchate hnenah pawh Chanchintha an hrilh a ngai tih a sawi a. Mizoram hmabak a en thu sawiin nasa zawka inpuahchah a hun thu a sawi a. ZCS dilna kaihhnawih thilah Chief Minister chuan Scheduled Tribe a thun theihna chu Central Sawrkar thuneihna a nih thu a sawi a ni. 

Bialtu MLA Pu T.Sangkunga chuan Zohnathlak hrang hrang ten hmandan in ang tlangpui in Kut hrang hrang kan hmang thin a. "Zohnahthlak hnam peng hrang te chhulkhat kual unau vek kan nihnaah chiangin kan lo inpumkhatna ti nghet zual zel tu atan kan kut neih hrang hrang te hi kan in chhim tawn a kan hman tlan pui zel a pawimawh hle a ni", a ti. 

Zomi Khuado Pawi 2017 hi Zomi Cultural Society of Mizoram (ZCS) in an huaihawt a,  Champhai District chhung hmun hrang hrang atangin an rawn chhim a, Champhai Bawrhsap Pu Vanlalngaihsaka, Champhai SP Pu BK Yadav leh Official thahnem takin   an rawn chhim bawk  a ni. He Kut ah hian bialtu MLA Pu T. Sangkunga chu Kut thlengtu a ni a, Sub-Headquater Champhai, Ngaizawl, Leisenzo, ZSU Headquarters, Sesih, Hnahlan, Murlen, Zokhawthar, Ngur, Vapar, Aizawl leh Hrianghmun atangin ZCS aiawh te leh Zaithiam ten hun an hmang a. Khuallian bakah ZCS President Pu Nang Sian Mung leh Pu T. Thang, President ZCS Champhai ten thusawina hun an hmang a. Zomi te thilphut ziahna, Memorandum Chief Minister Pu Lal Thanhawla hnenah an hlan a. Kut chhimtu zawng zawng ten tlaiah Kut Ruai an kilho a ni.

Vawiin chawhnu dar 1:00 khan Pu Chuauhnuna, MCS, Addl. Deputy Commissioner hovin Election Commission of India in ruahmanna a siam anga zirlai naupangte tana National Quiz neih dan tur chungchang sawi ho a ni. 

Pu Chuauhnuna chuan zirlai naupang kum 14 – 17 te hi nakin lawka vote nei mai turte an ni a, anmahni an lo inbuatsaih lawk nan leh inthlanna kaihhnawiha hriatna an lo neih belhna tur atan Election Commission of India chuan he Quiz hi neih tura ruahmanna a siam a ni, a ti a, zirlai naupang kum 14-17 inkar, Class IX –XII zirlai te inelna tur anih thu a sawi bawk. 

He inelna hi chhawng thumah then niin, he inelnaa tel tur hi mahni school ah theuh, school aiawh tur mi 2 an thlang chhuak anga, school tin aiawhte chuan ni 16 November, 2017 ah hian DC Conference Hall, Serchhipah inelna an nei leh dawn a ni. He inelna buatsaih dan tur leh hma latu tur pawh ruat fel nghal niin, a tul anga hma la tura beisei an ni nghal bawk a ni. 

District huapa ti thate hian ni 20-25 November, 2017 chhunga State Levela inelna neih hunah District aiawhin an tel anga, an mamawhte chu District Election Office in a ngaihtuah sak dawn a ni. 

Vawiina meeting hian Pu Abraham Beirazi Khithie, MCS, Election Officer, Pu VL Remliana,Project Director, DRDA bakah District Education Officer aiawh leh MZP aiawhte an tel a ni.

Mizoram pum huap Karate hmanga inelna ni thum chhung awh Rahsi veng Indoor Stadium, Lungleia neih chu nimin khan zawh fel niin kharna hun hman a ni. Kharna inkhawm hi Pu Saihnuna Sailo President AMKA Lunglei in a kaihruai a, khuallian Pu R. Thanga, District & Session Judge, Lunglei chuan thu sawiin  naupang infiam miten taksa hriselna kan ngaih pawimawh a ngai hle a, puitling zawkte pawh hemi kawngah hian a kaihruaitu kan ni thei a ni tiin  AMKA te chu  inthununna nei tha tak an ni a, hei hi vawng nung zel tura tan lak a pawimawh hle a ni a ti bawk. 

Kharna inkhawmah hian Championship Organising Board Secretary Sensei R. Malsawmtluanga chuan inelna neih chhunga inrelbawlna kawng hrang hrang sawiin a thlengtu Rahsiveng khawtlangte chungah lawmthu a sawi a, AMKA General Hqrs. President Shihan C. Dosavunga pawhin infiammite fuihna thu a sawi bawk.

Tun tum AMKA Inter District Championship neih zawh takah hian Champhai, Lunglei leh Aizawl atangin player 143 telin Official 15 ten an vil a, a pumpui thuah Aizawl District ten Gold Medal 26 lain Champion an ni a, Champhai district in Gold Medal 15 lain pahnihna dinhmun an hauh a ni