TIMES OF MIZORAM

Q. Engtin nge Avora Records a lo pian dan? Engtika din nge? Band members?
Kum 2012 atang khan Mama leh Khos-a te thian dun chuan hla ziakin Mama studio-ah an record ve nawk nawk thin a. An thian hnai te an sawm belh ve zel bawk a. Kum 2013 nipui lai vel khan official takin Avora Records chu a lo ding ta a ni.
Member te chu Stephen Rualzakhuma Hnamte (Vocalist), Lalremruata Renthlei (Guitarist), Lalkhawsiama Hmar (Guitarist), H. Lalchhuankima (Bass), Lalsangzuala (Drums) leh Vanlalmuanpuia Ralte (Producer & Manager) te kan ni.

Q. Music play ho turin eng hian nge ‘inspire’ che u?
Kan naupan lai atang hian band neih hi chu kan dream a ni vekin ka hria — keini ho hi chu. Kan music duhzawng a in an loh changte pawh a awm ve thin a; mahse, kan inkawmngeih em avang hian kan in ‘man’ ni berin kan hria.

Q. Avora Records hi eng nge a awmzia?
‘Avora’ hi chu Vanlalmuanpuia pa, R. Lalrosanga (Marova) — February ni 14, 2008-a min boral san ta hriatreng na’n a hming chawia kan phuah a ni.
Pa Marova hming atanga ‘Avora’ alo pian chhuah dan hi chu chhiartute ngaihtuah zui atan kan dah mai ang!

Q. Music in play ho hmasak ber atangin engtiang chiahin nge in music a ‘evolve’?
Kan indin tirh kha chuan indie rock leh punk lam kan awn deuh a; mahse, competition te kan han play chhoh tak tak atang khan jazz leh pop rawngkai lam hi kan khawih hnem ta zawk.

Q. Band anga in ‘biggest challenge’ chu eng hi nge ni ang? Chu chona chu engtiang chiahin nge in hmachhawn?
Kan hriat vek angin Mizoram music industry hi a la lianlo ve em a. A bik takin band tan hian dinchhuah a harsa lehzual niin kan hria. Keini aia band thiam leh hmasa te paw’n an harsatna tawh lian ber chu band a kal zel na’na hlawkna hmuhchhuah hi a ni.
Tin, midang in an la play loh music thar chhawpchhuah kan tum avang hian, keimahni paw’n tan kan la nasa em em a ni. Khawvel a changkan ve zel angin Mizoram pawnah ‘opportunity’ pawh a tam chho ve zel a. Kan theih anga tam zin chhuah a hming chher ve zel kan tum a ni.

Q. Tu nge in hla te phuah? In hla tam zawk hian ‘theme’ emaw, ‘topics’ emaw, eng nge a tum ber? In lyrics te hi in tawnhriat (experience) behchhana remkhawm a ni em?
Band kan nih angin hla pakhat hi mimal phuah a tih tawp theihloh a. Kan zavai hian kan part theuh kan compose a, jam room-ah kan luhpui a, a tul angin kan insiam that sak leh thin. Hla tin hian awmze hran theuh an neih avangin theme leh topic khat umzui bik kan nei lemlo.

Aw, tawnhriat behchhana kan phuah anni tlangpui.

Q. Engtik lai pawhin music hi digital platform a nih tawh chuan zalen taka kal pawh phalsak (freely accessible) a ni thin. Hemi chungchangah eng nge in ngaihdan?
Independent artist kan la nih hrih avang hian, kan music te hi a free a ngaihthlak theiha a awm hi kan tan chuan harsatna a awm hrih lo. Artist te tan, kan art a free a chhawpchhuah reng hi kan support chuanglo a. Kan phu tawk ang lawmman hmuh let hi chu a ngai ngei ngei kan ti.

Q. Rock band tan tunlai electronic dance music (EDM) khawvela survive turin eng nge pawimawh ber nia in hriat?
Keini chuan eng genre pawh kan respect em em a. Music ngaihthlakloh bik em em kan nei hranlo. Eng music-ah pawh inzirna tur a awm vek tih hi kan hmuhdan a ni a. Survive tur chuan khawvel music ruala ‘evolve’ ve zel a ngai kan ti.

Q. Band music business-ah hian ‘internet’ hi eng nge in ngaihdan?
Internet hi publicity leh marketing atan a pawimawh kan ti em em a. Kan in nghahna ber a ni.

Q. Lyrics or music?
50/50

Q. In band hian khawi lam kawng nge in pan dawn? Hmingthanna leh hausakna in zawng em?
Kan theih tawp kan chhuah ang a, hmingthanna leh hausakna hi chu Pathian kutah kan dah.

Q. Engtin nge in music hi insawifiah?
Keimahni chuan kan music hi kan sawifiah thiam chiahlo a. Amaherawhchu, music critic kan tawn tawh te chuan Jazz-Pop Fusion band min ti thin.

Q. Eng competition-ah te nge in tel tawh? Eng-tikah? 
MZU Vibrio Beat Contest 2017 leh Sennheiser Top 50 Season 3 ah te kan tel tawh a. Pathian zarah pakhatna kan ni ve ve a ni.

Q. Mizo live band platform bikah hian eng hi nge kan hmasawnna tur nia in hriat? 
Mizoramah hian music tui tak tak kan tam a, kan tanrual a kan in support tawn a ngai em em a. Organiser leh band te pawh inhriatthiamna nena kan thawh ho hi a pawimawh.

Q. In hmalamah ruahmanna?
Tunah chuan album tihchhuah hi kan ngaih pawimawh ber a ni hrih.

Q. Any last words?
YouTube, Facebook leh Instagram ah ‘Avora Records’ tihin min rawn zawng tawp ula, kan inkawm dawn nia.

Source: Zalen

October ni 21-28 chhung khan Sri Lanka khawpui Colombo-ah zaipawl khawmpui lian Asia Pacific Choir Games and Grand Prix of Nations a awm a, Asia leh Pacific huap zaipawl intihsiakah Mizo Cardinal Choir te chuan lawmman sang ber Gold Diploma pahnih an dawng.

He zaipawl khawmpuia zaipawl intihsiakah hian category hrang hrang a awm a, October ni 26 khan Mizo Cardinal Choir te hi Vocal Ensemble category intihsiakah an tel a, chutah chuan Gold Diploma an dawng a ni.

October ni 27-ah khan category hrang hranga gold diploma dawng chinte chu an inel leh a, chutah pawh chuan Mizo zaipawl Mizo Cardinal Choir hian gold diploma an dawng leh.

Category hrang hranga a sang berte inelna ‘champions competition’-ah hian gold diploma an dawn bakah champions competition-a a tha falte chu October ni 27 zan khan an inel leh a, hei hi Grand Prix an tih chu a ni. A tawp zan October ni 28 zanah result puan a ni leh a, hetah hian Mizo Cardinal Choir te chuan gold dawng lehin, champion ah puan an ni. Zaipawl intihsiakna sangah a lo berah gold diploma pahnih Mizo Cardinal Choir te’n Mizoram an rawn thlen dawn tih a chian hnuah, ropui leh zualin Gold pathum an rawn hawn thei ta zawk anih chu.

Mizo Cardinal Choir te hian Colombo khawpuiah hian lawm an hlawh hle a, an telna category-a an intihsiak hma hian hmun hrang hrangah an lo zaitir tawh.

October ni 21 leh 22 zanah khan Sri Lanka prime minister chenna ina Gala Concert-ah an zai a, zan hmasa hi programme awm sa niin, a tuk zan programme-ah tel lo mah se an zai nawntir leh hial. Ni 24 khan Nelumpokuna Mahinda Rajapaksha Theatre-ah Frienship Concert-ah an zai leh bawk.

Zaipawl dang chu an telna tur category-a intihsiak a awm dawnah Colombo-ah hian an kal mai a, Mizo Cardinal Choir te pawh an tel tumna, October ni 26-a intihsiaka tel tura kal ve mai tur an nih laiin a huaihawttute’n a hmaa an zai tur thu hrilhin thleng hma turin an hrilh a, a awmzia pawh hre lovin thuawih takin an thawkchhuak ve ta mawp mai a ni. A huaihawttute hian youtube lamah Mizo Cardinal Choir zai an lo hmuhin thil danga zaitir an tum a lo ni a, an intihsiak hmain programme pawimawh pathumah an zai ta a ni.

Ram hrang hrang 17 atangin zaipawl 77 an tel a, chu’ng zinga a sang ber thleng thei Mizo Cardinal Choir zarah Mizoram zaipawlin zaipawl lamah bung thar a kai a, zaipawl lama tuite tan chanchin lawmawm a tling ang. Khawvel zaipawl larte pawh hetiang atanga hriat hlawh an ni fo a, Shillong Chamber Choir pawh hi khawvel huap intihsiaka gold diploma lo dawng tawh an ni.

Mizo Cardinal Choir hi Mizo zaipawl dangte nen an zai dan a dang daih tia sawi ngam a ni a, sap hla an sak phei chuan an hmel hmu lova ngaithlate tan sap zaipawl emaw tih tur an ni. Mizoram pawnah zai tura sawmna an hmu awl lo a, mahse professional an nih loh avangin, hna hrang hrang thawk an nih avangin an sawmna dawnte hi an tihlawhtling thei lo fo zawk. Aizawl veng hrang hranga mi an ni a, an tan hla zir leh zin a harsa thin chungin hmun hrang hrangah an zai tawh a, Mizoram pawnah pawh an lo zai tawh thin. Kohhran emaw pawl ngelnghet emaw ta an nih ve loh avangin harsatna pawh an tawk a, harsatna karah khawvel ram dang mit hmuhah Zofate an tihmingtha ta a ni.

Mizo Cardinal Choir member-te chuan an phu loh dinhmuna an din thu leh Pathian malsawmna liau liau a nih thu an sawi a, Mizoram nena sik leh sa lama inang lo zet mai Colombo khawpuiah harsatna an tawh thu, hritlang leh aw chhangin a tihbuai thu, tawngtai bak tih theih nei lova an awm thu te an sawi. An tana lo tawngtai thinte leh anmahni lo tantute chunga an lawm thu an sawi.

Pu Zoramthanga leh Pu Hawla enkawlna hnuaiah kum sawmthum vel lai kan lo awm chho ta a, thatna leh tangkaina mual chu tam tak nei mah sela kawng tam takah chuan ram leh hnam namen lovin an tichhia tih theih a ni a.

Anni pahnihin ram leh hnam min han kaihhruai danah hian Zofate min huapzo lo mai an ni lo va, an mahni party mi leh sa tangkaipui pui pawh an huap zo lo tih tur an ni a, Congress party-ah pawh hian party tana tangkai pui pui Congress ruhkawl kan tihho zingah pawh hian an sawrkarnain a thlen phak ve mang loh tam tak an awm a ni.

MNF party pawh hi heng kawngah hian chhuanawm lo ve tak an ni a, an vangvat kaipuite ngei pawh an huapzo lo tih luai luai an ni a. An party mi leh sate ngei pawh hi an than dan inkhungrual lo tak a ni.

An kalphung tam tak han thlir phei chuan anmahni pawh an inhmangaih lovin mahni hma pawh an sial thiam hlawl lo a nih hi tih tur an ni a. Hetiang ngaihtheiha an awmna chu an han sawrkara sawrkar leh duh tawh lo tur ang maiin an nung a. Inthlan dawn hnaihah lal loh hlauin ram hmangaihtu bera lan an tum a, an khawsak ziain a tlin tawh ngang si lo va, dik chauh chuan an ni pahnih hi mipui tam tak hian kan duh leh tha kan tih ngawih ngawih avanga vote kan ni lo va, an ni party pahnihah lo chuan, kan vote-in awmzia nei dawna kan hriat loh avanga vote tawn mai mai kan ni a. TLAWMNGAI PAWL HRUAITU PAKHAT CHUAN KAN POLITICIAN-TE HI AN THIH VEK HMA LOH CHUAN MIZORAM CHUAN ENGMAH KAN ANG LO VANG A TI HIAL A NI.

Hei hi mipui tam takin an ni pahnih min kaihhruai dan hi an hmuhdan a ni a, Bible-ah chuan sum tam tak aia hmingthatna thlan tur a nih zawkzia min hrilh a, tu zawk pawh hian he thu hi dah lianin, dah pawimawh berah nei chu ni sela finrawl chhuaha lal theih dan tur ngaihtuaha an mahni thatna leh duhamnain mipui a hip zo lo tih hre renga mipui vote lak dan tur hi ngaihtuaha phi ruai tur an ni lo va, tunah chuan mipui tam takin Pu Hawla an duh vang ni lovin NLUP an duh vanga vote mai an ni, a sawrkar hmasa lamah pawh khan amah duh vang ber pawh ni lovin, remna leh muanna kan duh vang maia vote kan ni a, khangah pawh khan ram leh hnam hmakhua a ngaih vang ni lova lalthutthleng duh luat vanga mipui min bum mai maitu a ni tih tuman an hai lo. Hetiang chunga lalthutthleng luahtu nih hi thil hlu lo tak a ni. Mahni mawng hlim mai nihna a ni.

Pu Zoramthanga hi mihring mihrinna kawngah chuan mi tha tawp a ni a. Mahsela, mi vanduai tak a ni kan ti thei awm e. Tuirial project chungchangah namen lovin a unauhote avangin a hming a chhia a, Minister-te avangin kawng tam takah hmingchhiatna khum lo thei lo dinhmunah dah a ni a. A mihring zia hrim hrimah ram roreltu zia ni lovin rawngbawltu zia keng tlat mi a ni a, chutiang tan chuan thawhpuite leh mipui control turin a chak lo em em a, chu chuan ram a kaihhruaina kawngah harsatna lian tak a siam a ni.

Pu Hawla tam takin an hmuh dan hi dik hle pawhin ka hria a, amah pawhin a insawi danin a lehkha zir lai pawha amah leh chhungkaw tana hmathlir thui tak neia taima taka lehkha zir a nih lohzia amah ngeiin T.V-a an kawmnaah khan a sawiin B.A Result an nghah lai pawh khan result tha kha a ngaihlu lo tih a tarlang a, khatiang kha a nihphnug a nih avangin Central Congress party-te finchhuahpuia a hmalakna avangin Mizo Union rapbet thei mai leh, hetiang khawpa party-a a invawrh theihna zawng zawng pawh hi Central Congress party thluak a hman vang tih loh theih a ni lo. Hetiang avang hian ram leh hnam tan beiseina sang tak neihna chi a ni lo hrim hrim a ni.

Pu Hawla hi a fakawmna kawngah chuan fakawm tak, politician zawng zawnga Leadership nei tha ber ti ila kan sawi sual awm lo ve, kan hmaihthelh miah loh tur chu kan C.M neih tawh zawng zawnga insiam that tum ber kan ti thei awm e. A sawrkar hmasa lamah kha chuan sawrkar thar an lawm dan an party mi leh sa pakhatin a sawi a, old monk leh nuthlawi mawng a lar em em mai a, tun sawrkar tharah chuan kan lawm dan a dang hle mai a, Kristian ruih mai a ti a, ka awih zawng tak a ni. A hmalakna kawng tam takah Minister te leh party mi leh sate tha takin awm thei sela a duh hlein a lang a. Hetiang hian a nih tur ang kawng tam takah kan nihtir thei lo a ni.

Anni pahnih hi ram leh hnam tana an hnawk ka tih em em na chu dan lekkawhna kawnga an chak lo em em mai hi a ni. Hetiang avang hian sawrkar school tam tak chu a awngrawp zo tawh kan tithei awm e. Tunah phei chuan political party-in thuneihna zawng zawng pum hmawmin zirtirtu transfer chungchangah pawh an hma vek a nih tawh hi tih tur a ni a. Hetiang hmalakna avang hian Primary school phei chuan naupang pawh an nei tawh mang lo va, an dawngdah rahchhuah chu naupangteah langin Primary school tam tak chu luhna tlak lohvah ngaih mek a ni a.

Zirtirtu hlawhah mipuiin kan chhawrbawk mang si lohvin sum tam tak a kal ralin, school naupang leh school tuam hlawm nan kum tin mai vaibelchhe tel kal ral hum hum reng mai leh khawsak harsa zawk tan leh mi tam tak primary school-ah Mizo tawng leh chhiar thiam kal phawt sela titu tam takin sum tam tak sen phah a, Private school-a luh phah a ngai hi thil pawi tak a ni. Heng kawngah hian kan CM pahnih chak lohna kan tawrh lian tak chu a ni.

Private school hi awm lo phei sela kan ram hi engang fakauin kan awm ang maw tih tur kan ni a, an khawlohnate kan tawrh hi namen lo tak a ni.

Pu Hawla chak loh em emna chu ama tan pawh hma thlir thui tak nei mi a ni lo hrim hrim a, mihring chuan tlin tawk lohna kan nei theuh a, CM ber a nih miau thin avangin ram leh hnamin kan tawrh phah em em lo thei lo a ni.

Tunah pawh hian a sawrkarin a hmalak tumna lian tak mai chu motor nei tan garage neih a ni a, chu chu khawpui tawt lutuk tihthawl nana a hmalak tumna a ni ber a, hei ngawt pawh hian ram leh hnam kaihruai turin a fit tawk lo hle tih a tichiang hle a ni. Pu Thenphunga te Pu Laldenga te chuan hmathlir an nei thui hle mai a, chung kawngah chuan Pu Thena hmalakna Luangmual ram cheibawl a tumnate chu a tuipui pha lovin Pu Laldengan kawngpui a zauh hlawih hlawih a, chumai ni lovin khawpui tawt tur avang pawha Assam Rifle Aizawl khawpui chhunga an awm reng maite an la hnawk dawn chauh tih hriain namen lovin a nawr chak a. Hengte hi chhunzawm nachang reng reng a hre lo.

MNF sawrkar pawh khan Aizawl khawpui veng hrang hrangah motor parkna tur ruahman na tha tak a siam kha a ni a, kha pawh kha chhunzawm tum chu ni sela tunah hian Aizawl khawpui tawt lutuk hi kan ziaawm hle tur a ni a, mahse; chhunzawm nachang reng reng a hre lo.

Tun a hmalak an tumna chu motor nei zawng zawng garage neih tir min tum chu a ni a.Pu Hawla zia ah hian hetiang kawng a khawpui tawt lutuk tihthawl hi a mizia nen inmil tawk ren rawn tak a ni. Khawpui chhung kan tawt hun ber chu garage chhunga tang a kan tlanchhuah sung sung hun leh khawpui chhehvel leh thingtlang khaw hrang hrang atanga an lo fuankhawm hun hi a ni, hetiang avang hian zing dar 8 atanga zan dar 6 thleng garage-ah motor min dahtir vek dawn a nih loh chuan an beisei angin garage neihin awmzia a awm dawn lo.

Thil buaithlak em em mai chu Aizawl khawpuiah chuan kan hmunhmain a zir loh avanga kawngpui a kal thlur seng sung ve thei lo, kawngpui an a awm vek duh mah ila 2% pawhin kawngpui an kan chang pha lo. Engti kawng maha garage nei thei lo tur hi tam tak kan ni, kawngpui an a awmho pawh hian lirthei pahnih pathumte neih a lo ni a, chumai ni lovin inluah motor kawl pahnih pathum kawl te anlo ni bawk si a, kawngpui an a dawra kan hman zawng zawngte hi garage-ah hmang vek mah ila kan inkhung seng chuang lo ang tih tur a ni a, hetiang avang hian thenkhatin Pu Hawla sawrkar tih awm tawk chauh a ni ti mah sela phu tawk ren rawn tak a ni.

Vawiin khan Hotel Regency Conference Hall-ah ni hnih awh 12TH Annual Conference of the Association of Radiation Oncologists of India, North East Chapter (AROICON NE) chu Health Minister Pu Lalthanzara’n a hmanpui a. Mizoram State Cancer Institute (MSCI) buatsaih a ni.

Health Minister Pu Lal Thanzara chuan 12th AROICON NE Aizawl-a neih a ni chu lawmawm tiin, conference hrang hrang neih tawh thin pawh a hlawkthlak thin hle a ni, a ti a. Hun lo kal turah pawh hetiang conference chu doctor ten an hman tangkai bakah an thiamna tibelhchhahtu a nih a, mipuiten an thiamna chu an chhawr zel a beisei thu a sawi a.

Mizoramah cancer vei an tam viau a, chung zingah chuan thin cancer, pumpui cancer, chuap cancer, hrawk cancer te hi a lar pawl a ni tiin conference chu cancer dona kawnga hmalakna tha tak a ni, a ti a. Kum 2010 khan Mizoram State Cancer Institute (MSCI) din a ni tiin, Ministry of Health & Family Welfare tanpuina zarah khum 100 awm theihna tur Comprehensive Cancer Care Centre-a hlangkai tura hma lak mek a ni, a ti a. Khawl thar Linear Accelerator (LINAC) leh CT Scanner bakah khawl dang pawh lei tum anih thu a sawi a. MSCI tih changtlun lehzual nan Japan International Cooperation Agency (JICA) nen thawhho tum mek anih thu a tarlang bawk a. Health Minister chuan cancer natna enkawl leh zirchianna ah hma kan sawn viau chung hian cancer dona kawngah kan hmabak a la ko hle a, kan taksa hrisel leh fimkhur zawka kan vawn hian natna dona kawngah min pui thei a ni tiin, tun hma ngaihtuah chuan cancer natna thlen dan leh enkawlna chungchangah mipui pawh kan bengvar tawh zawk a ni, a ti a. Hemi kawnga tan latu NGO pahnih Cancer Society of Mizoram leh Mizoram Cancer Care Foundation chu chhuanawm a tih thu a tarlang a. Kalkhawmte hnenah chuan conference hian thawhhona tha zawk a thlen ngei a beisei thu sawiin an hnathawh zelna turah duhsakna a hlan nghal bawk a ni.

Mizoram State Cancer Institute, Aizawl-ah hian chemotherapy leh radiotherapy enkawlna kalpui mek niin khum 100 awm theihna tur bakah cancer hemna khawl changtlung lehzual bun turin hma lak mek a ni. Conference-ah hian India ram hmarchhak state hrang hrang bakah India ram hmun dang atangin Cancer enkawltu doctor ten Cancer natna chungchang inrawnkhawmna leh sawihona an nei a ni.

Director MSCI Dr. Zoramthanga chuan kalkhawmte lawmna thu a sawi a. President AROI-NE Chapter Dr. NK Kalita chuan thu sawina hun a nei a. Director, H&ME Dr. T. Lalhmangaihi atangin thusawi ngaihthlak niin Conference Organising Secretary Dr. K. Lalfakzuala’n lawmthu sawina in hun a khar a. Conference hi nimin khan tan niin vawiin tlai thleng a awh dawn a ni.

Sri Lanka khawpui Colombo-a neih mek, Asia Pacific Choir Games and Grand Prix of Nations-a tel, Mizo Cardinal Choir-te chu an che ṭha hle a, Gold Diploma an dawng dawn tih a chiang tawh a, intihsiakna dang an la hmachhawn dawn bawk.

Asia leh Pacific huap he zaipawl khawmpui hi October 21 khan ṭan a ni a, vawiin hian a ṭiak ang. Zaipawl intihsiakah hian category hrang hrang a awm a, Mizo Cardinal Choir-te hi Vocal Ensemble category-ah telin, Ningani khan intihsiak hi an hmachhawn a ni. He tah hian Gold Diploma hi an dawng dawn a ni.

 Result hi puan nghal a ni lo a, lawmman dawng turte erawh hriattir lawk an ni. 

Hmun hrang hrang aṭanga kal zaipawlte hi category hrang hrangah an inlan a, Mizoram aṭanga tel Mizo Cardinal Choir-te hi nimin khan category dangah an tel leh a, result kan hre hman lo. 

Mizo Cardinal Choir-te hian Colombo khawpuiah hian lawm an hlawh hle a, intihsiakna an hmachhawn hma hian hmun eng emaw zatah an lo zai tawh a ni.

October 21 leh 22 zan khan Sri Lanka prime minister chenna-ina Gala Concert-ah an zai a, zan hmasa hi programme awm sa niin, a tuk zan programme-ah pawh sawm nawn leh an ni. Ni 24 khan Nelumpokuna Mahinda Rajapaksha Theatre-ah Frienship Concert-ah an zai leh bawk.

Asia Pacific Choir Games-ah hian ram hrang hrang 17 aṭangin zaipawl 77 an tel a, India ram aṭang pawhin zaipawl pariat an tel a ni. Mizoram bakah hian hmarchhak aṭangin Ao Naga Choir (Nagaland) pawh an tel a, anni hian an telnaah silver medal an dawng ve bawk. Naga Choir-ah hian Mizo pathum an tel ve nghe nghe.

He zaipawl khawmpui hi intihsiakna ringawt ni lovin hnam hrang hrangte inpawhtawnna tura buatsaih a ni a, zaipawlte pawhin mahni hnam thuam an inbel hlawm a ni.

 Mizo Cardinal Choir te chuan hmun hrang hranga Zofate zingah lo ṭana lo ṭawngṭaipui ṭhintute chungah lawmthu an sawi a ni.

Asia Pacific Choir Games and Grand Prix of Nations hi INTERKULTUR (Germany)-te'n an buatsaih a ni a, kum 1988 aṭang khan an lo kalṭanpui tawh a ni. Tun ṭumah hian Colombo Cultural Hub Trust, Sri Lanka Tourism Promotion Bureau leh Sri Lanka global tea brand Dilmah-te thawhpuiin an buatsaih a, ni riat chhung a awh a ni.

Arunachal Pradesh sorkarin tourism chawisan nana kum tina a buatsaih ṭhin, 'Tawang Festival'-ah Miss Mizoram Rody H. Vanlalhriatpui chu a tel. Festival hi Ningani khan ṭan a ni a, Rody hi Fashion Show-ah nizan khan a inlan a, lawm a hlawh hle a ni. 

Tawang Festival-ah hian hmarchhak tihmingṭhatu mi ṭhenkhat sawm an ni a, sawm zingah hian Rody pawh hi a tel a ni. Ani bakah hian Nagaland aṭanga Femina Miss India-a tel, Kaheli Chophy pawh a inlan a ni. Fashion Show bik hian ngaihhlut a hlawh hle a, Rody leh Chophy bakah hian, Femina Miss India-a Arunachal aiawha tel Licha Thosum pawh a inlan a, tualchhung mi eng emaw zat an inlan ve bawk. Model-te hian Arunachal-a hnam hrang hrangte thuam an inbel a, show hmuhnawm tak a tling a ni. 

Chief Minister Pema Khandu chuan Ningani khan Festival hi a hawng a, ni li chhung a awh dawn a ni. Festival chhim tur hian North Eastern Council (NEC) Secretary Ram Muivah bakah, sorkar mi pawimawh eng emaw zat an tel a ni. Ram chhung hmun hrang hrang aṭangin mi ṭhehnem tak an fuan khawm a, ram pawn aṭang pawhin chhimtu eng emaw zat an awm a ni. 

Festival hman chhung hian dawr hrang hrang hawn a ni a, Mizorama Anthurium Festival kan hman dante nen pwh a inzul viau a ni awm e. Tourism tih hmasawn chu an tum ber a ni a, hetih rual hian hnam hrang hrangte culture leh tradition pho lanna leh tih larna a ni tel bawk. 

Horticulture, agriculture, forest leh textile department-te'n festival chhimtute tan thil chi hrang hrang an pho chhuak a, traditional games pawh buatsaih niin, street carnival show a awm bawk. Arunachal sorkar chuan festival a buatsaih ṭhin vanga hian kumtin khualzin a let dawna an pun thu a tarlang. 

Miss Rody-i chuan hmarchhaka festival lar leh ngaihlut hlawh taka a tel thei chu lawmawm a tih thu a sawi. Naktuk lam hian rawn haw leh a tum thu a sawi bawk.