Tweet Share Share Share Share Share

October 30, 2017
'Hrairiangte'Kan ramin a buaipui em em pakhat nautihtlak (abortion) chungchanga Inspirational Video 'Hrairiangte' tih Lalmalsawma Hrahsel (Tomtea Hrahsel) buatsaih chu tlangzarh a ni ta. 

He video buatsaihtu Tomtea Hrahsel chuan, kan ramah nau tihtlak a tam thu leh a rilru a tihnat ṭhin thu a sawi a, video clip chu nau tihtlak thatlohzia leh a pawizia mite zirtir nana siam a nih thu a sawi. Video hi Bs Pictures kutchhuak niin, Miss Bunny (A-hmangaihi) leh Timothy Vangchhia te an chang a ni. A duh a piang tana en theih turin youtube-ah dah a ni. 

Lalmalsawma Hrahsel hi Kelkang hla kan tih mai, 'Harhna Ropui' tih phuahtu Lalnunpuia Hrahsel fapa a ni a, Gov't. Mizo Higher Secondary School-ah class -12 a zir mek a ni. 

Read more »
Tweet Share Share Share Share Share

October 30, 2017
Aruanchal Pradesh-a zirlai pawl All Arunachal Pradesh Students Union (AAPSU) chuan Arunachal Pradesh Public Service Commission (APPSC) hnuia hnalak turah Chamka candidate mi pali an awm chu pawi an tih thu sawiin, prelims exam zui an remti tawh lo tih an sawi. 

APPSC prelims exam hi November 26-a neih tura rauhman a ni a, mahse candidate zingah Chakma an tel avangin exam hi kaltlangpui lo turin AAPSU chuan hma an la ta a ni. AAPSU president Hawa Bagang chuan Scheduled Tribe category-a chakma telh an ni chu pawi an tih thu sawiin, Chakma leh Hajong-te chu ST an nih loh thu a sawi. Chakma-te enrolment list-a ST categaory-a dah an ni chu an hrethiam lo tak zet tih a sawi a, an exam luih tawh lohna turin hma an la dawn tih a sawi.

ST category aṭanga mi paliten preliminary exam an paltlang bakah hian, Chakma candidate dang mi pathumte chuan gerenal category aṭangin preliminary exam hi an patlang bawk a, Namsai leh Changlang district-a chengte an ni. Hei hi zirlai pawlte hian an hriatthiam loh thu leh, thuneitute chu Chakma candidate-te chungchang ngaihtuah ṭha leh tura an phut thu an sawi a ni. 

APPSC chairman Tajom Talohon chuan Chakma-te chungchang hi ngaihtuah ṭhat leh a nih tur thu sawiin, AAPSU-te ngenna angin Chakma-Hajong te chungchang hi bawhzui a ni dawn a, nakin zela ṭhang leh thar lo awm turte hmakhua ngaichang chunga hma lak a nih tur thu a sawi. APPSC chairman  chuan he thilah hian officer ṭhenkhat zingah Chakma duhsak an awm niin a sawi a, hei pawh hi chhuichian a nih tur thu a sawi bawk. 

AAPSU chuan officer zinga Chakma duhsaktu chu suspend ngei an phut tih an sawi a, ram leh hnam ngawng thei thil a nih vangin tun hnuah chuan thleng tawh lo se an duh thu an sawi bawk. Chakma leh Hajong hnamte chu engti kawng mahin khua leh tuiah an pawm thei dawn lo tih sawiin, an state hminga eng thil mah an tih an remti ngai dawn lo tih an sawi bawk. 

AAPSU president Hawa Bagang chuan Chakma-Hajong chungchang chu Supreme Court-in a ngaihtuah mek tih sawiin, hetih laia Chakma-te hnena ST status lo petu officer chu zawnchhuah ngei an tum tih sawiin, a chunga hremna lek kawh tura thuneitute an phut thu a sawi. Hetih rual hian APPSC chairman Tajom Taloh chuan AAPSU-te ngenna aṭanga thil dik lo titu zawng chhuak turin hma lak a nih tur thu a saiw chu lawmawm a tih thu sawiin, Deparment-in tihsual a neihte zawnchhuah vat chu thil pawimawh a ni, a ti. Mizorama Chakma awmte pawhin ST category aṭangin APPSC exam hi an hmachhawn thei lo tih sawiin, General category aṭang chauhin an exam thei a ni, a ti bawk. 

AAPSU-te hian Chakma chungchangah hian Chief Minister Pema Khandu hnenah memorandum an thehlut nghal a, ni sairh chhunga APPSC prelims exam list aṭanga Chakma candidate-te paih tur leh, scrutiny committee officer zinga thil dik lo titu zawng chhuak thuai tura an phut thu an thlen a ni. 
Read more »
Tweet Share Share Share Share Share

October 30, 2017
Mizo National Youth Front (MNYF) chuan 'Vangpui Fehchhuah' beihpui a thlakna kal zelah Inrinni zing khan Sairangah inkhawm an buatsaih a, thusawitu MLA K Sangṭhuama chuan Pathian leh mipui zara MNF kan sawrkar a nih chuan corruption awm lohna sorkar an din tur thu a sawi.MLA tumah hi i corrupt tih an ngai lo tih sawiin K Sangṭhuama chuan, "Kum 10 dawn MLA an nih chhunga in leh lo ropui tak tak an din aṭangin kan hrethiam vek a ni. Mi  rethei khai chhuah hi MNF-in kan tum a ni, kan ramah in ropui tak tak sain kawng ṭha tak tak siam mah ila, a chhunga cheng mipuite kan ril a ṭam tlat chuan awmzia a awm lo. Mihring develop kan tum a, retheihna um bo kan tum dawn a ni," a ti.

K Sangṭhuama chuan kawng ṭha a awm loh chuan kan inkalpawh hleithei lo a, nun a nuam lo a, khawsak a harsa ṭhin tih sawiin, "MNF kan sorkar laia km 2000 chuang kawngpui inkalpawhna kan laih kha, vawiin thlengin thawh zawm a awm lo va, a ṭhing ṭhup a ni," a ti a, sorkarna an chan chuan an kawng siam tawhte siam chhunzawmin, a ṭha thei ang bera black top vek an tum thu thu a sawi.

Thusawitu dang, MNF ṭhalai vice president Lalremruata Chhangte chuan, "Mi retheite kan VIP an ni titu Pu Hawla chu a helicopter ṭumna tur sam faiin an VIP te kan hnatlang a, an nawmchenna hmanruaah min hmang a ni," a ti.
Read more »
Tweet Share Share Share Share Share

October 30, 2017
Dr. JV HlunaMizoram BJP president Dr. JV Hluna chuan BJP lian zel tur an hlauh avangin, mi ṭhenkhatin BJP chu Kristianna nena inrem lo ang hialah an chhuah ṭhin thu a sawi.

Biakthuama in, Durtlanga unit thar an dinnaah Dr. JV Hluna chuan, "Mi ṭhenkhatten BJP lian zel tur hlauin BJP chu Kristianna nena inrem lo ang hialin an chhuah a ni. Mah se, BJP kaihhruai sorkar India rama a din hnuah kristian tihduhdahna a tlem sawt hle a, Gujarat-a kristiante tihduhdah vak an nih ṭuma sorkarna changtu chu Congress party a ni," a ti.

BJP President chuan kum 2018 MLA inthlan lo awm turah Congress party chuan hmasawnna hna an thawhṭhat lohzia an inhriat chian thu sawiin, "Chuvangin sum hmanga inlei tlin an tum a, department hrang hrang aṭangin a theih ang ang sum an ṭham khawm mek a ni," a ti a, an party chuan sum ni loin, hmasawnna an zawrh dawn thu a sawi.

BJP thuchhuah tarlan danin, BJP President hian mithar 40 a lawm luh bakah, unit pahnih a din nghal a ni.

Read more »
Tweet Share Share Share Share Share

October 30, 2017
Delhi Mizo Zirlai Pawl (DMZP) huaihawtin Inrinni chawhnu khan ram dang mi, dan loa lo lutte duh lohna lantir hun 'Nation-Wide Demonstration Againts Illegal Immigration in India' chu Vasant Vihar, Delhi-a Mizoram House tualah hman a ni. Inrinni vek khan NGO Co-ordination Committee bultumin Aizawlah Nation-Wide Demonstration Againts Illegal Immigration in India pual hian hun hman a ni. 

Delhi-a hun hmannaah hian Rajya Sabha MP Ronald Sapa Tlau, Central YMA president Vanlalruata, MSU president RB Lalmalsawma, Jawaharlal Nehru Univer­sity-a professor Joy Pachuau, Supreme Court-a senior advocate Upamanyu Hazarika leh Adviser to Arunachal Pradesh Students' Union Romjir Rakshap-te'n thu an sawi.

Inkhawmah hian resolution pasarih passed a nih bakah, sorkar laipui leh state sorkar chu hnam leh hnam, chi leh chi inkara thil ṭha lo zawk a thlen hmaa an mawh­phurhna hria a, hma la turin an ngen.

Aizawla inkhawm buatsaihah Central YMA general secretary Lalhmachhuana chuan, sorkar laipui pawhin a buaipui em avangin, dan loa ram dang mi lo lut ru ṭhinte thawn let an nih theih nan leh dan hmanga an chungchang ngaihtuah a nih theih nan dan ṭha tak tak a awm tih sawiin, "Heti chung hian ram a la him tawk lo hle. Hmarchhak state phei chu a him lo zual a, Bangladesh leh khaw chhak lam aṭanga lo lut ru, inbenbel tum eng emawzat an awm," a ti.

Lalhmachhuana chuan kum 1901 chhiar­puiah Bangladesh aṭanga Mizorama Chakma lo lut chu 198 chauh an ni a, kum 2011 chhiarpuiah chuan mi 97,000 chuang an awm tih sawiin, "Heng mite hi dan anga lo lut an nih vek ka ring lo. Mizorama cham rei tawh an nih pawhin 'ram dang mi chu ram dang mi an ni' tih hi Central YMA ngaihdan a ni," a ti a, ram dang mi, dan loa lo lut rute hi dap chhuaha thawn let a nih theih nan November 23, 2009 khan sorkar laipui chuan hma la turin state sorkar a hriattir vek tawh tih a sawi.

Thusawitu dang, MZP president Ram­dinliana Renthlei chuan ram dangin an rama ram dang mi, dan loa lut rute chu an haw hle tih sawiin, "Hetiang hian Mizote pawh kal ve a ṭul tawh a ni. Pi leh pute ram sah zauh sa humhim turin ṭhalaiten ṭan lak a tul tawh. Chakma-te'n Mizote dik lo taka an hek ṭhinna chu MZP-in a en liam mai dawn lo a, an duh dan kan hlawhtlintir dawn lo. Ram leh hnam him nana ṭangrual turin Mizo mipuite kan sawm a ni," a ti.

Central YMA president hlui Lalbiakzuala pawhin thu sawiin, "Ram dang mi duh lohna lantirna hmuna kal an tlem hi inen chian a ṭul. Social media-a pawr tak taka ṭawng, a saseha zum zuk leh tlat ṭhinte hi insiam ṭha se ka duh. YMA Conference-a pass, 'Dan loa din, CADC chu dan anga ṭhiah a nih theih nan hma lak ni rawh se' tih hi kum 46 kal ta khan tuna ṭhalaite hi awm sela chuan CADC hi a pian ka ring lo," a ti a, CYMA-in CADC ṭhiah a nih theih nana hma a lakna turah LADC leh MADC a tel loh thu a sawi. 

Delhi-a an resolution pass-te :

qIllegal migration hi India ram leh a bikin Northeast state hrang hrang Mizoram, Assam, Arunachal Pradesh, leh Tripura-ah te harsatna lian tak thlentu leh hnam hrang hrang inkara inhriatthiam lohna leh tharum thawhna hial thlentu a ni. Dan loa ram pawn aṭanga India ram a rawn lut tam tak hi mumal taka thuneitu lamin khuahkhirh a, chinfel dan zawn vat a nih loh chuan buaina lian zawk thleng thei reng a nih avangin, India sorkar leh state sorkar-te chinfel dan tur a rang lama ngaihtuah a, hma la turin kan phut. 

qIndia sorkarin ramdang aṭanga Northeast state hrang hranga dan lova rawn lut ṭhin leh heng hmun a harsatna awmte zirchiang tura Investigation Team - central sorkar, state sorkar leh Civil Society Organization hrang hrangte aiawh awmna din a, hma a lak kan phut. Chu chuan illegal migration chungchanga harsatna awm a bul ṭhut aṭanga hrethiam a, chinfel anih theih nan awmze thui tak a neih kan beisei. 

qBorder area khaw hrang hrang a Birth & Death Registration mumal taka kalpui a, India khua leh tui ni lo ram dang mi thun tel an nih lohna turin state sorkar a thuneituten, village, sub-division leh district level monitoring mechanism mumal tak a awm theihna tura hmaan lak kan phut. Hei hian dik lo taka ramdang mi India khua leh tuia ziahluh ṭhin a ven theih kan beisei.

qBorder area-a security enkawl tura India sokarin a dah Border Security Force (BSF)-te hian an mawhphurhna an hlen ṭha tawk lo niin kan hria a, illegal migration titawp tura BSF-te’n mumal zawka hma an lak a, a ṭul a nih chuan central sorkar lam pawhin security personnel leh check post a dah belh kan phut. 

qDan ang taka India citizenship neite tumah kan target lo. Chutih rual erawh chuan, ramri depa community hrang hrang awmten ram pawn lam aṭanga dan loa rawn lutte dapchhuah leh kan ram chhunga an inbenbel a, ram leilung fate ram leh chanvo an chhuhsak lohna tura hma min lak pui turin kan ngen.

qThe Citizenship (Amendment) Bill, 2016 hi hnam tenau leh minority community-te tana him lo niin kan hria. India khua leh tui nih theihna tur atana sakhuana tehfung (Religious Criteria) hman tumna awm hi India Danpui Article 14-na in a sawi, mi zawng zawng dan hmaa intluktlanna (Fundamental Right to Equality and Prohibition of Discrimination on The Basis of Religion, race, caste, etc.) bawhchhiatna lian tak niin kan hria.

qA tawp berah chuan heng harsatnate hi hnam hrang hrang inkarah mumal taka sawihona kal tlanga chinfel theih a nih kan ring. Chutiang tur chuan rilru inhawng taka sorkar thuneitute kaihruaina hnuaia inbiakna neih anih theih nan he buaina ina a nghawng (stakeholders) zawng zawngte dawhkan kilho turin Delhi Mizo Zirlai Pawl chuan a sawm a ni. 

Source: Vanglaini
Read more »
Tweet Share Share Share Share Share

October 29, 2017
F. SangluraQ. Live music a chawlh thuap deuh lai paw’n i la active ngar ngar a, engvangin nge music hi i chawlhsan theih loh?
Ka tui a, chutih rualin record neih ka duh a, Mizo rimawi hi a chi hrang hrang awm se ka duh vang a ni.

Q. Track awm zawng zawngte hi Live recording vek niin ka lo hria, a dik em? A hautak em?
Aw, ni e, live vek ni e. A hautak khawp mai. Reuben (Drums) leh Benja (Guitar)pawh an hah khawp mai.

Q. I album thar ber title hi engvanga hei kher thlang/hmang nge i nih? Cover-art hi a va ‘rock’ lo ve?
“Inlar Leh La” tia title ka hman chhan chu, hei hi ka thianpa Engineer pakhat story atanga hla lo chhuak a ni. Chubakah, la pa te group hriatrengna’n hian a inhmehin ka hria a. He album hi cover-a inziak ang kha ka pa F. Lalngura te thianza ho (1942-1945) band hriatreng na’n a ka siam a ni.

Q. Album-a hla te, i album hmasa te nena i hla phuah dan (writing process) hi a inthlak danglam niin i hria em? A inthlak dang-lam/danglam loh chhan eng nge?
Aw, ka thlak hret. Ka rilruah hian mihring nun sawina lam hawi hi a tam ber. Ka rilrua lang a ni ber reng.

Q. Tuna i album thar ber recording atan hian hun i seng hnem em? Engtik hun chhung nge recording i tih?
Ngaihtuahna hman zawng zawng nen chuan, kum khat chuang a ni.

Q. Album track zinga pakhat — Jenny — tih hi i nupui i phuahchhan a ni em? I nupui tana i hla phuah hi engvanga i album-a telh nge i nih?
(Hahaha…) Ni e. Ka nupui duhtak Jennifer Zohmingliani ka phuahna a ni. Hei chu kan inneih hma, Hnahthial a lo zin a, haw ta chungchang thu a ni. Album a ka telh chhan chu kan nunhlui te hriatrengnan a ni.

Q. Tun tumah hian i album hmasaa musician te chhawr loa, engtianga IIIrd Sovereign member pahnihte thawhho pui daih nge i nih?
Band te chu ka nei ve a; mahse, music ngai lo deuh a chhuak thei em tiin kan thawk dun a ni. An music play hi ka duhzawng leh ka ngaihsan an ni a. An ni pawh an phur em em, a nuam pawh an tiin ka hria.
Musician te hi an thiam dan a dang a, taste hrang hi ka duh a, hei hian Mizo music a ti changtlung dawn in ka hria. 3rd Sovereign-a Benja leh Reuben te hian ka duh leh an duh zawng a inang em em a ni.

Q. Tun tuma i musician hman te nen in la perform ho hmel si loh a, heivang hian harsatna in tawk em?
Kan in-man tawp! Duhzawng a inang kher mai. He album tan hian an theihtawpin rilru zawng zawng an seng a. Harsatna engmah awm lo, duh thuhmun, tum inang kan ni.

Q. Engtin nge recording hi in process?
Ka hla te hi kan perh chhin a, chu chu kan duh zawng sawi hoin arrangement an lo siam a, kei chuan chutiang lam hawi chu ka duh ka ti a, ka sawi apiang hi an thiam zawng a lo ni em em zel zu nia.

Q. I album hmasa te aiin tuna i album thar turah hian eng ang takin nge danglamna leh hmasawnna a awm nia i hriat?
Hmasawnna chu hman hman a ka lo suangtuah — Metal leh Soft Rock — te kha tunah chuan a chhuak a, “my dream come true” ka ti tawp. A danglamna em em chu kan duh zawng ti chhuak tur hian hun kan ui lo — Time is money — kan ti em em lo a ni.

Q. I ‘last’ album tur a ni thei tawh mai ang em? Engnge i future plan?
Nilo, nilo lutuk! Tunah hian a dang ka buaipui leh der tawh. (ha ha)

Q. Tun tuma i album-ah i music kalphung hi i rawn thlak danglam hlak niin a lang a, hei hi enge a chhan?
Aaa… ka sawi ang khan hmana ka tum thin, a tak chang thei lo kha tun tumah chuan Reuben leh Benja te vang hian a tak a lo chang ta. Thu chu tusa a lo chang ta, tih ang deuh a ni.

Q. I album track-ah hian social/political message lam hawi a awm tlat mai a. Hei hi min hrilhfiah thei em – i dahna chhan emaw?
Remna hi ka ngaihlu a. Mizoram ralmuanna hi a chhia ang tih ka hlau a. Remna kan neih hi Mizo ta a ni ti in kan chham ve a ni.

Q. He album hi engang takin nge i chhuan?
He album ka chhuanna em em chu music play tu te hi an thiamin an rimawi hi — Europe lam te hi ang ruih mai a. Ka zai lam ai mah chuan 3rd Sovereign ho music lo thiam zia hi he album-ah hian a lang chiang a ni.

Q. Khawiah nge i album hi kan lei theih ang?
He Album hi a ngaihven duh tan chuan Aizawl Bazar Bungkawn “Altrafast” dawrah a awm e.

Q. Engtin nge i buatsaih chhoh dan?
September 2015 atang khan ni in ka hria. Ka beidawng zing khawp. Recording hi Vortex Studio-ah ka ti a, zai tura ka kal hian hlawhchhama haw hi ka nei nual. Mahse, ka thawhpuite hi an fel em a, hei hi a lo ni ta.

Q. Promotional video lam te kan va hmu lo ve?
E… nia! Album promote na’n chuan pahnih khat chu siam ve ang. Mahse, tunlai hi MZI leh MDM an ti hi ka tel lo ve ve si a, khawiah mah TV-ah chhuak ve thei lo anga!

Source: Zalen
Read more »
Subscribe to: Posts (Atom)

Contact Form

Name

Email *

Message *

TOM © 2026. All Rights Reserved.
Published by Songate G
Powered by Blogger.