TIMES OF MIZORAM

Persons with Disabilities (PwD) commissioner atan Social Welfare department director ni ṭhin, Dr. Lalnunthara dah a ni. Hemi chungchang­ah hian Differently Abled Society (DAS) chuan thuchhuah siamin, PwD commi­ssioner atana Dr Lalnunthara dah a ni chu lawmawm an tih thu an tarlang.

Thu dawn danin, PwD commissioner atana ruat tâk Dr. Lalnunthara hi Social Welfare director ṭhin a ni a, superanuation pension-a a chhuah a hun hmain SWD director a nihna aṭangin pension-in a chhuak a; kumin October thla tir lam khan PwD commissioner hna a chelh ṭan a ni.

PwD Commissioner ruat chung changa DAS thuchhuah chuan, Mizoram sorkarin PwD commissioner a dah tak avangin Mizorama rualbanlote an lawm hle tih a tarlang a, "Hun rei fé zualkona tur mumal leh kan chungchang sawipui tur kan neih tawh loh hnuah mi thiam leh rualbanlote tana mi ṭhahnemngai Dr. Lalnunthara min thlan chhuahsak hi kan lawm a, hmasawnna tam tak kan hmuh ngei kan beisei," a ti.

DAS chuan, Dr. Lalnunthara’n a hna chelh lai, Social Welfare director nihna kalsana PwD commissioner hna a pawm avangin a mimal chungah an lawm thu leh, a inpekna chu Pathianin a malsawm lêt ngei ang an ring thu an sawi a; Dr Lalnunthara chu SWD director a nih lai pawha rualbanlote leh rualbanlote pawl tana ṭhahnemngai taka thawk ṭhin a nih thu an sawi bawk.

Mizoram Governor Lt. Gen. Nirbhay Sharma (Retd.) PVSM, UYSM, AVSM, VSM chuan tunhnaia Bulgaria khawpui, Sofia-a International Boxing Championship, Senior & Youth Women kg 81+ category-a champion Lalfakmawii Ralte leh Mizoram Boxing Association (MIZBA) hruaitute chu vawiin chawhma khan a pisaah a kawm a. Lalfakmawii Ralte hlawhtlinna a lawmpui thu a lo hrilh a ni. 

Governor chuan Mizo hmechhiate chu an taima in, khawtlang tana inghahna an nih thu a sawi a. Lalfakmawii’n hlawhtlinna a chan chu duhtawk mai lovin, a aia sang zawk thlen tum tur leh thalaite entawn tlak ni turin a chah a ni. Governor chuan boxing a ngainat thu leh a thatlaia a khelh ve thin thu sawiin, tlangrama boxer-te chu an chawrchhuahna in a zir avangin, an tuar a chhelin, an zuanzang bik a ni, a ti a. Mizote hian kan theihna kan hrechiang tawk lova, kan thlen phak tur ang kan thleng lo thin a ni, a ti. Lawmpuina thilpek chu hlanin, Mizo boxer-te tana theihtawp chhuahpui a inhuam thu leh an chanchin duhawm lampang hriat chhunzawm a beisei thu a sawi bawk. 

MIZBA hruaitute chuan Governor-in hetiang hriatpuina leh lawmpuina a pe chu lawmawm an tih thu sawiin, infiammite tana phurna leh hmasawn duhna petu a ni, an ti a. Kum 2012-a International Boxing Federation (AIBA)-in Indian Amateur Boxing Federation (IABF) a de-recognise hnuin harsatna hrang hrang tawk mahse, Boxing Federation of India (BFI) chauh recognise a nih hnuin Mizoram chu boxing lama India tana thawh hlawk ber a nih thu an sawi a ni. 

MIZBA aiawhin President Dr. Zorammawia, Sr. Vice President Pu F. Lalninga leh General Secretary Dr. Lalrozama, IAS te an tel a. Lalfakmawii Ralte hi a nu leh a pu te’n an tawiawm bawk a ni.

Vawiin chawhnu khan Sports & Youth Services Department buatsaihin Sports Minister Pu Zodintluanga pisaah 3rd International Boxing Championship Senior & Youth Women, Sofia, Bulgaria-a neih zawh taka gold medal dawngtu Lalfakmawii Ralte chawimawina neih a ni. 

Pu Zodintluanga chuan Mizo infiammite sports discipline hrang hrangah inchherchhuak chho mekin India ram mi maktaduai tam tak zingah ram aiawh thei leh medal hial hawn thei kan nei hi a lawmawmin an chhuanawm takzet a ni, a ti a. India ram pum pui inelnaa lawmman lak phak harsatzia kan hria a, chumi piah lamah khawvel huapa gold lak phak phei chu tih namai a ni lova, Mizoram leh India tihmingtha tura Lalfakmawii'n International level boxing-ah Gold Medal a hawn thei hi kan chhuang tak zet a ni, Sports Minister chuan a ti. Infiammite tan sawrkar chuan a tih theih apiang tlanchhe lovin a ti zel dawn tih sawiin Pu Zodintluanga chuan sawrkar hian infiammi te tan incentive mumal takin a siam a; regional, national, international leh olympic ang tea thliar fel sain medal hawn theite leh world level-a tel pha hrim hrim tan pawh lawmman a bithliah sa vek a ni, a ti. Infiammite fuihin sawrkar leh anmahni enkawltu Association-te tih theih piah lamah hlawhtling tur chuan infiammite an pawimawh ber, a ti a. Mi dangte aia tumruh leh taima, mi dangin an peih tawhloh hnu pawha tilui zelte an hlawhtling thin Pu Zodintluanga chuan a ti. 

Lalfakmawii Ralte hian kum 2013-2014 National School Games ah Gold a la a, North East Games 2014 leh 2016 ah Gold bawk la in 1st Elite Women National Championship 2016 ah Gold Medal a la bawk. 3rd International Boxing Championship Senior & Youth Women, Sofia, Bulgaria-a khel thei tur December, 2016 khan camp an nei tan a, Dublin, Ireland-ah pawh a bik taka training neih pui an ni a. Lalfakmawii Ralte hi 81+kg category ah khelin champion thei tur hian Russian boxer 3-2 a hnehin Ukraine mi 5-0 in  a hneh bawk. 

Lalfakmawii Ralte chawimawina puala inkhawm buatsaih hi Sports Secretary Pu H.L.Rochungnunga'n a kaihruaiin, Mizoram Boxing Association aiawhin Vice President Pu F.Lalnienga'n thu a sawi a. Sports Department hian Lalfakmawii Ralte hnenah Sports Kit an hlan bawk a ni.

Vawiin chawhnu khan Chief Minister Pu Lal Thanhawla chuan  ram 17 atanga zaipawl 77 fuankhawmna leh Zaipawlte intihsiakna, Asia Pacific Choir Games and Grand Prix of Nations, October ni 21 leh  ni 28 inkara Colombo, Sri Lanka a neih zawh taka Gold Diploma pathum dawng a, Champion of the Champions nihna hauh chunga rawn hlawhtling haw, Mizo Cardinal Choir member te chu Chief Minister Office-ah kawm in thingpui a inpui a. He hunah hian Chief Minister chuan Mizo Cardinal Choir member te chu an hlawhtlinnaah a lawmpui tih lo hrilh in an hmalaknaah te an hlawhtlin leh zual nan a fuih. 

Chief Minister Pu Lal Thanhawla chuan thalaite tan khawvel thar sawrkarin a buatsaih mek zel a, hlawhtlinna kawng tam takah hmuh tur a awm tawh thu sawiin Mizo hnam ti hmingtha thei tura hmalakna te leh Mizo thalai ten pawnlam boruak sang zawk an tem chhoh zel theihna turin a tul leh remchangah chuan sawrkar pawh a tel zel dawn tih a sawi a. Exposure neih tam chu Mizo thalai te mamawh leh an theihna te peipungtu tur a ni a ti a. Mizo Cardinal Choir ten sawrkar anga puihna  tam thamlo tak, nasa taka an peipung chu ropui a tih thu leh an hlawhtlinna chu khawvel huap a nih mai bakah midangte hmaa Zofate min ti hmingthatu a ni a ti a, an hlawhtlinna chu Mizo mipuite hlawhtlinna a ni a ti.

Superintendent of Police, Traffic, Aizawl City chuan vawiin khan Aizawl khawpui chhunga kawng pawimawh Chaltlang leh Bawngkawn inkar kawngpui chhuat chu Mizoram State Guest House chhakah a min avangin mipui him nan leh chhiatna nasa zawk a thlenloh nan lirthei tlan dan tur thupek thar a hnuai a mi ang hian a siam a ni : 

Lirthei ke pali nei (LMV) leh a chunglam (City Bus huam in) helai kawngpui ah hian tlantlang phal a ni rih lo. Lirthei 407 leh a aia lian te City Bus huamin Chanmari to Bawngkawn via Ramhlun road-ah tlan tur. LMV Chanmari atanga Bawngkawn lam pan tur te chu Chanmari to Bawngkawn via Ramhlun road emaw via Chaltlang MBSE Office, Ramhlun North-ah a tlan theih ang. Tin, Transport Department Office bul atangin Office hun chhungin LMV Sumo/Bolero chin hnuailam tan chhuk zawngin a tlan theih bawk ang. 

Motor lian ke 10 nei chin chunglam Bawngkawn lam kal tur te chu Ngaizel-ah tlanin World Bank Road-ah Falkland Veng tlan tlangin Thuampui atangin Bawngkawn-ah kal tur a ni. Bawngkawn leh Chanmari inkarah lirthei tlan tibuai thei turin kawngpui sirah lirthei eng chi mah dah/park phal a nilo. 

He thupek hi ni 30.10.2017 (Monday) atanga thuleh awm hma chu hman tur a ni. He thupek zawmlo te chu MV Act hmanga hrem an ni ang. 

Hei hian chhiatrupna thil kangmei leh emergency kaihhnawiha duty leh Dan leh Thupek pawimawh bika Duty-te chetvelna a huam lo ang.