- Emezchhakchhuak
Mipui an zi nuai nuai a, hmanhmawh em em in an in pel zut zut a..tun ang thalva ek char laiin khawilam ruahpui van awn mah sur tura awm silo. Chhun lai tak a ni a, van lah chu a pawl mawiin hmangaih biahthu a inhlan na nikhua em em mai leh ta nghal a. Mipui lah chu mawngvawmba ang mai in an phe suau suau tawh mai. Ka bula putar thusawi atang chuan mipakhat a sakhming Isua an tih, mitmeng pawl ram mai,khabe hmul sei tak nei, sam enkawl uluk vak biklo chuan Jeriko khua hi a rawn kal pel thuak dawn a ni awm e. Chu pa hmuh tum chuan a khaw nawt in an phe suau suau ta mai hi alo ni a, nunau tello in patling ringawt pawh sangthum chuang an ni. Chu pa teh reng chu tunge anih hmuh ve tumin ka kalna apianga min zuitu ka sakawr nen chuan chhun pachangah kan inkhalh chhuak ve ta a.
Beisei loh takin kan khaw eiru hausa, chhiahkhawn lama taima em em mai, khawlaia ring tak taka tawng lung lung thin, vitamin tha a ei ngai biklo tih hriat tak zakaia ka hmuh teh tlat chu! Ani hian engvanga Isua hmuh tum nge maw anih le, amah lah chu a tawi nasa mai si a. mipui karah ka hmu leh zauh zauh thin. Zakaia hi hmangaihna la na mi tak a ni a, a tleirawl laia a hmangaihber in a boral san, a tuar lutuk kha a taksa in a zo lo a, a thang theilo ta niin an sawi. Chhiahkhawn ho chu a huho in an kal ani ang, a thian te ho nen Isua hmuh chian theihna tur zawngin an vei kual sek hlawm a. Mipui ho titi pawh a in anglo hle mai a thenin politics an sawi laiin a thenin JLTP Acts(Jeriko Liquor total prohibition) siam ve theih nise heng puipun nikhua a zu rui thin ho hi an tlem deuh ang an lo ti mek bawk a, Isuan uaiin a tihpun an awilohzia lo sawi tawk lah bo lo, kei pawn ka awi chiahlo na a, an titi a tang chuan Isua chu hmuh chian ve ka chak ta hle mai.
Ka va kal hnaih leh deuh chuan Zakaia chu a thian te zing atang chuan alo kal sawn tawh a, Mipui tam lai hi chuh in chhiahkhawn alo tum leh ta em niang? a ni hi a eiru nasa thei mai si a tia ngaihtuah chunga ka hawi kual lai chuan kan chung zawn theipui kung atang chuan kutchang tum lauh lauh hian a thian te chu lawn ve tur hian alo signal a. kutchang tum bawka lawn ve an tumloh zia a thian ten an hrilh hnu chuan tih fuh in ti takin theipui kungah chuan thuthmun a rem tha sauh sauh mai a. Isua an tih chu alo thleng har tawh ngei mai ti rilru ni awm tak hian a tukkhum an hiat thuak thuak thuak a, hla taka a pi thi tur ngaihtuah niawm tak hian a en ngai a en leh vung vung mai thin bawk a. Theipui rah chu kamram atan tiin a lo a, a ei zauh zauh bawk a. Mipui chu “ alo thleng e” tiin an khek chel chul a, a tlan bo hman hlau niawm takin hmanhmawh baklengin an bial tuau tuau bawk a, a thenin an fate an koki chhuan a, hnung lam ami te an zuang zawr zawr bawk a, a thenin ‘a thianghlim e,a thianghlim e’ an tih laiin, eitur lo pe tawk lah bo lo, Nazareth Isua a kal mek a ni.
Isua chu kan zawn a rawn thlen chuan ngaiteh a ding a, van lam a en a, a kut chu Theipui kunglam ah chuan a phar a, aw ring tak in “ Zakai lo chhuk rawh, vawiin ah hian i in ah ka thleng dawn a ni” a ti a. Zakaia hmel ah chuan danglamna nasa tak mai a awm a, chutiang mipuiin an hmuh chak, an bawr huai huai in a hming ngei a ko a, i in ah ka thleng a ti chu mak ati tawp theilo tih a hriat reng. A mah mai pawh niloin mipui tam tak chuan mak kan ti hle mai, misual khawtlang pawhin eiruk hrat kan tih in ah ka thleng dawn ati chu mi zawng zawng mai chuan Isua chu an dem hle a ni. Zakaia chuan sawi tur a haihchham hle maia, thawk an la kawk a “ ka..ka..ka in ah maw” tiin Isua chu a chhang thei hrama. Isua chuan chiang kek kawka melh chung chuan ‘aw i in ah, i in ngeiah ka thleng tur ani’ an ti chu Zakaia lawm lutuk chuan Lalpa chhang per panga leh sangha pahnih ka buatsaih ang, i tan pakhat , ka tan pakhat, i zirtirte tan pakhat theuhin a ti a. Hmanhmawh lutuk in theipui kung a tang chuan zuanthlak an tum ngawt a, Isua chuan ‘Nang zakai Jeriko khua ami, tih tak meuhin, tih tak meuhin ka hrilh a che, i zuanthlak tumna kha hmunthianghlim a ni, i chapal phelh la, chhuk pangai in rawn chhuk rawh” ati a, chu ve leh Zakaia chu inthlahrun hmel takin a rawn chhuk ta zal zal a.
Mipui mak ti chu an ee dual mai! Isua sawi ang chuan Zakaia in ah zanriah kil turin an in zuilut ta a ( mihring fapa hi chhiahkhawn te in ah Lal angin a lut ang tih zawlnei sawi kha alo thlen theih nan). An in zui phei lai chuan zakaia thik tih hriat tak ten a hnunglam atangin an lo au el a, a thenin “misual te ina thleng turin a luh tak saw” an ti a. A then chuan “hei maw Juda te Lal chu! ka ringlo reng ani” an ti bawk a, zawhna leh deuh sawhna in mipui chu an phun mur mur a, Isua leh zakaia te chuan mipui thusawi chu hre awm ang pawn an awmlo.
Kei chuan enge an thukhawchang hriat tum chuan ka zui lut ve ta zel a. Zakaia in chhung kan han lut chu(h) a ropui in a man a tam dawn ngei mai. Ani hi a hausa an tih hi dawt anih loh tawp hi, hausa chunglam zawk ani ka ti rilru neuh neuh a. Kawngkhar luh rual chuan veng tu pali panga hi ka va hmu nghala..an ni chuan taima takin lut leh chhuak te chu an lo en dik zel a. Kil khatah hian putar sam tuak vu tawh pa upa lam hi ka va hmu a, chu pa chuan a bula kal tur chuan mi hui tlat ni hian ka hmu zuia, ka va kal hnaih chuan chu pa chu a lungngai ani tih ka va hre thei nghal mai a. Chu putar chuan zakaia chanchin tlem a zawng tiang hian milo hrilh a..
“ Zakaia hi vawiin a chhiahkhawn hun tur a ni a, engngemaw a hriat tehreng ni, vawikhatmah a la thulh ngailo a sin. Vawiin chu a thian te nen Isua hmu turin an kala, hei alo hruai haw ngawt pek hi. A chhiahkhawn hi kan chhungkaw bel ber a ni a..saw en mah teh Isua bulah ka chhiahkhawn ka sim anga, diklo taka ka tih te chu a leh li in ka rul ang a tih mek saw..eng thlarau sualin nge maw pawl ni” alo ti a.
Ka va hawiphei nak chuan Zakaia chuan a hma ai maha thahnemngai in ban vai meuh in Isua bulah a sual alo sim mek a, kei rilrua rethei engthawl silo hian kan awilo mai mai pek a. Zakai ti ti duh suh, Laiking pawnpui tah tur ang maiin i sim thei tak tak chuanglo ang tih ka va tum lai chuan chhangper panga leh sangha pahnih chu an rawn chawi lut ta mai si a, ka va kil zui ve ta mai a.
Zakaia chuan Isua hmuh a tum nasat thu te, theipui kunga a lawn dawna a buaizia leh a thian te a sawm a an lokal ve duh takloh thu chu Isua chu a hrilh ta vek a. Isua chuan engmahin a chhanglo! Zakaia chuan a aia uar mahin a sum zatve pachhiate a pek tur thu an sawi zui leh a. chutah zet chuan dar chanve lai mai chulai hmun chu a reh ta vek a. Isua chuan muang ban cherh chawrh tak hian “Vawiin ah he in ah hian chhandamna a thleng ta, ani pawh hi Abrahama fapa ani si a’ a ti a. Zakaia chu Halleluiii..ahh tum in an ang deuh zuau zuau a, mahse a zam deuh niin a lang.
Isua chuan zanriah atana an buatsaih chhangper panga leh sangha pahnih chu a la a, vanlam en in mal a sawm a, a leh liin a tipung ta a! Chutah chuan van in hawng ka hmu a, van a tanga aw lo chhuak chuan “ tui nung lui’ a rawn ti a. Mak ti taka ka en reng lai chuan an in tur Uaiin chu an lo tlak deuh titih der tawh alo ni a, tlem chu ka chan tur atan an dah bawk a. Zakaia chuan a chhiahhlawh pakhat chu ko in Jerusalem Map chu a lak tira, dawhkan ah chuan pharh in Isua chu an hrilhfiah vel a. Jerusalem i kal dawn chuan a kawng hnai lam ka hrilh ang che tiin a map atang chuan pumpelh te chu a kawk ang zung zung a. A mah hi pa tawng duh ve tak a ni reng a. Ka sakawr hi i hawh anga, chhungte leh thiante tamtak chumi khua ah chuan ka nei a i va zawng chhuak anga i va thleng dawn nia te chu ala ti tak deuh deuh a.
Isua chu a puar tih a irh ak ak dan atang chuan a lang reng mai. Zakaia lamah chuan thuchah sawi tum melh hian a va melh a, Zakai nupui panga i nei tawh ava ti a, zakaia chuan a ngaihna a hriatloh hmel khawp mai, kei erawh chuan Isua leh Samari mi tui chhunchhuah bula an inbiakna ka lo hriat tawh avangin enge a sawi tum chu ka hre nghal mai a.
Zakaia chuan riak turin an sawm ngial na a, chhun pelh tum mai anih vangin Isua chuan kal angaih thu in a chhang a. Zakaia chuan ka pu ilo kal chang apiangin i rawn thleng ziah dawn nia, ka sual te ka sim vek tawh e a ti a, chutih lai chuan putar pakhat kha kilkhatah hmai hup a tap char char hian ka hmu bawk a.
Isua kal tuma a thawh uai lai chuan, zakaia chuan an zap thu leh rih a. Ngawi teh chaw te hi fun la, thuilo deuh thleng ka chhiahhlawh ten an va thlah dawn che nia, i kal na tur ala thui si a, kawng laka suamhmang te i tawk hlauh anih chuan, an vaw hrep che anga, thi lek lek in an kal san mai ang che, va fimkhur hle ang che a ti a. Chutia an in biak lai hun chu arkhuan hmasak hun vel ani tawh reng a. Isua nen chuan ni danga in tawng leh thin turin an in mangtha ta a ni.
Chutia Isua akal hnu chuan, enge chanchin, thu kal lam leh haw lam hriat tum in thenawm khawveng an rawn lutkhawm tuk tuk a. Chutia Zakaia in a zanriah a kil ta mai chu mak an tih thu an rawn sawi thliai thliai bawk a. Zakaia chuan phur tak hian Lal Isua nen an intawh dan chu hahipin leh a beng vei lam sik ngar ngar chung hian alo sawi mek bawk a. A thinlungah Lal anih dan te chu sawi nuam a ti em em lai chu a ni.
Thenawm khawveng lokal khawm te chuan he mi hi zakaia, chhiahkhawn hotu kha anilo em ni? Engtin nge nunthar alo neih tak tiin an in zawt luih luih a, zakaia erawh chu a thil tih sual tawh rulh let tumin alo hman hlel bawk a, chung zingah chuan veng hmawr hmeithai uaiin man a bat ringawt pawh tam tak a tel nghe nghe a ni. A theih ang tawk tawkin Isua chanchin chu midang te a hrilh chhawng ve zel bawk a.
Chutia zakaia in a an phut mur mur lai chuan zanlai ar pawh a rawn khuang ta al al hlawm a, hemi hun hi Peter an Isua vawithum a phatna tur hun chiah kha ani tih hre lawk ang maiin mipui chu an tin ta sang sang a. Tin, Zakaia chu a nupui leh a fate nen pawh mu ho lo chuan a mahin room hrang ah a mu bik a, a chhan chu a vawiin hun tawn te chhuikir a duh a ni.
Muthmun ah chuan engtin nge ka hlepruk tawh te ka rulh ang aw? Isua kha engtin awm ta zel maw ? A dam han hauh phawt ila kan inhmu leh zel ang chu maw tih te a ngaihtuah a, chutia thil tam tak ngunthluk taka a ngaihtuah lai chuan zingtian bawh ar a rawn pau a, zingtian lenkawl rawn engin a nupui duhtak chuan thingpui nen kaihthawh tumin a rawn lut chiah a, chu mi ni a theipui kung lawn ni leh Isua a hmuh ni chuan chhinkhat pawh a chhinglo tih an hriatthiampui der silo.. Hlepruk hrat, misual ti a an hriat, tha duh hauhlo leh huaikawm bawl lui tlat, hmangaihna pianpui neilo ..thenawm khawveng zawng zawngin an huat, an in a leng atan pawha an duhloh, pa a zawnga pa tawi ber mai, lu mum ve satliah, chhiahkhawn leh hlepruk lama thangchhuah Zakaia ngei mai chu, a hausak dan en chuan zakaia nilo in Nuaikaia ni tur awm a ni! Hemi ni hian Zakaia in ah hian chhandamna alo thleng ta
Miin Lal Isua hmuh a duh a, amah lam atanga atheih na sang ber, Lal Isua hmu tuma a theihna zawwng zawng nena zawng tu hnenah chuan Isua hi a inpuang thin, a kal pel ngailo.
Post a Comment