By: Ar EL Khawlhring

.

Chhum dum chhah zet zet chu a inhawrkhawm but but a. Ruah mal chu hraw zet zet hian a tla tan fuap fuap bawk. Khua ţha chu nise unau hmelhai hun vel a ni a, khawchhia nen, current awm lo nen, boruak chu a ipik churh mai.
.
Pu Rochuha-te chhungkua hi mi khawsa thei tak mai an ni a, an chhungkua hi panga an ni. Fapa pakhat leh fanu pakhat an nei a, pu Rochuha nu tar tawh tak hian la dampuiin, pu Rochuha nupui chu pi Chhingmuani a ni. Tunah tak hian amah chhungpuipa ber chu chhungkaw pawipang avanga Karimganj lama a thang mek lai a ni a, nikhat lek thang tura insawi si kha nithum lai a cham ta reng mai.
.
Hetihlai hian an fapa Richarda, tlangval sek zet mai leh lian zet, mahse ruih sual nei fo mai chu inchhungah a âng leh tun tun tawh a. Nitin a rui phei chu a ni lo, mahse a ruih chhun hi chuan buaina hi a siam ziah thunga. Khawlaia a awm chuan mi tibuaiin a insualpui a, vengdang tlangval an veng a lokal tihbuai hi a hrat lehzual thin. Amah hi a sa a tha a, a chak roh em avang leh an milen avang hian miin khin enah an en lo a ni ber mai, a vawk lal len anih ber chu.
.
Tuntumah pawh hian chaw eikham hlim atang khan inchhungah buaina a siam leh tan a, inchhung thilte chu a tichhe leh neih nuaih a, a ri bur bur bawk a. A pa a awm bawk si lova, tihngaihna hre lovin an mangang hle a ni.
.
Chutia a thinrim a inhrosak hnu chuan inthiar turin common toilet lam chu a pan a, kawngkhar a khar tauh sawk rual chiah chuan current a thi ta hmiah mai le! A chaklohna ber, nizan mai atanga a hlauh tak tlat thlahrang chuan rawn tibuai dawn ta ngei hian a hria a, mahse inthiar em lova han chhuah leh chu a tlawmla riau mai bawk si. Tichuan thimtham hnuaiah phurlo zetin comode lam chu a pan leh ta ţuah ţuah a.
A han ngaihtuah chian chuan he an in thar hi a hrâng deuh niin a ring hial a. Nithum chauh an la luah lut a, nizan maiah lah a private bathrooma a inbual laiin current a rawn thim a, inverter line la fit fel loh a lo ni bawk nen, phuan deuh niaih nuaih a bathroom atanga chhuah a tum chuan bathroom kawngka chu pawn lamah a lo inkalh hmiah tawh bawk. A chhungte bulah a han ang chiam dawn na a, a nu leh a farnu lah chuan a room lama an kal loh thu an lo sawiin an lo inhriatpui nasa mai si, a pi, pitar zet, bengchhet tawh lehnghal kum 90 tling dawn tawh zet, tiang hawl a kal tawk tawk tawh chuan a lo kalh ringawt chu a rinawm chiah bawk silo, mawhpuh tur hre lovin a âng a âng ta ringawt mai kha ania. Zan lama a muhil theilo lah khan dar 1 rik dawn hnaiah inchhunga ri kual deuh thlep thlep kha a hre zui a. A room lam pana rawn kal nia a hriat phei kha chuan fiah chu sawi loh, a inlukhup ta hmak anih kha.
.
Chutiang ngaihtuah reng reng a inthiar zawh chuan hmanhmawh taka chhuah an tum chu pawn lamah kawngka a lo inkalh leh ta tlat mai le! A han sâwi ngial pawh chuan a inhawn theih tlat loh takah chuan a chhungte a han au a, tumah lah chuan an rawn chhang bawk silo. Tunah tak hi chuan hlauh lam ai mah chuan thinrim lamah a la zawk a. Inchhung thil a tih chhiat avang khan a chhungte thinrimin pawn lam atangin an kalh khum ni ngeiin a ring a, a inhrosa kuk kuk a, tihngaihna a hre chuang der silo. A rei hnuah phei chuan a ngaihtuahna hmasa kha a rilruah lo lut lehin hlauhna chuan a rawn man ţan leh ta. Chutah kawngka kalhna chu tharuma nawrchhiat a tum ta a. A dar a kawngka theihtawpa sut a han tum chiah tihah chuah kawngka chu a lo inhawng thut a, amah chuan kawngka chu sut ţhelhin chhuatah a hlawm nawk a, a pi inthiar tur kawngka bula lo awm chu su thawi thuakin a pi pawh chu a tlu ţhelh a. Kawngka rawn sut hawn a tum lai tak khan a pi inthiar turin kawngka pawn lam atanga kalhna chu a lo hawng chiah a, a sut ţhelh chu lo niin. Hlau bawk si, nuihza deuh, thinrim bawk si chuan a per lut nghawng nghawng a. Va mawhpuh a tum ber a nu leh a nau lah hmuh tur an lo awm miah lo lehnghal.
.
Hemi zan lah hian current a awm thei silo, ruah a sur nasa si, peihlo zet chuan a room thim zetah chuan mu in a let a let a. A rui a lo reh tawh bawk nen, dar sawmpahnih a rikte chuan a la meng kar mai.
Dar 1 a rawn ri leh ta. Thawm ri deuh a hriat chuan a beng a tun hru tawh, fiah tuma thawh lah chu a ngam ngang si lova. Chutah a thauvah hlauhnain a rawn man zui a, kil khatah chuan sek takin a awm khur ta dur dur a, mahse chumi zan chuan thil danglam engmah a thleng zui ta lo. Mahse zing a han tho, a chhuak tur erawh chu a room pawn lam a lo inkalh ve thung ta. A zâm viau nachungin khaw ên hnu a ni bawk a, a hlauhna chu a ziaawm deuhin a nau Christy chu a ko vak vak a, nakinah chuan a nau chuan a rawn hawnsak ta a.
.
Tukţhuan an kil laite chuan a nu leh a nau chu vin deuh khur khur chung chuan Richarda chuan thil awmzia chu sawiin a han zawt bawk a. Anni lah chuan zantir lam a mu an nih thu leh a room inchung lama an chhoh miah loh thu an sawi ve leh thlap mai bawk si a, mak chu an ti tlâng ta hle mai. Christy chuan a thiltawn a han sawi ve thung a. A pa a zin avangin a nu nen riak dunin bathrooma a luh laiin pawn lama kawngka lo inkalhin, a nu a au vak vak a, a nuin a hawnsak thu a sawi ve chiah bawk. He rau ninhlei tak hian rikrâp zawnga che lutuk lovin kawngkhar pawn lam kalh zâwngin, a chimawm zawng hlirin a che tlat mai.
.
Mahse chutia room tin deuhthaw maia che ta chu ngaihthatna chi rual a niin an hre ta lova. Chuvangin pi Chhingi chuan an ţhenawm mai a kohhran upa chu ţawngţai tura sawm mai chu a rilruk ta a. Hlauthawng leh thinphu dep depa awm ai chuan tiin midang pawh chuan an lo remti hle mai. 
.
Chhun reh lai tak chuan pi Chhingmuani chuan upa Rova chu midang hriat loh tura kovin an harsatnate chu a va hrilh ta a. Pu Rova pawh chuan an manganna chu lo hriatthiampuiin urhsun takin pi Chhingi te inah chuan ţawngţaina hun chu a hmang ta a. Tichuan lawmthute an inhrilh zawh hnu chuan upa Rova chuan a hawsan ta a ni.
.
Zan lamah chuan Christy leh a nu chu ngaihtha takin, thlamuang takin an mu ta a. Dar 12 velah Richarda leng haw chuan choka lamah eitur a dap ruk ruk a. Chutihlai chuan kawl a rawn phe zuai a, current a thim leh ta hmak mai le! Khawpui ri ring zetin a rawn chhunzawm bawk a, Richarda chu a phu chiang ngei mai. Emergency light tih ên tuma thimthama kalsawn mai a'n tum chiah chu engemawni hian rawn kal pêl fua in a hria a, a hmaia a rawn hrut fuh thuak takah chuan a ţe ţhawt a. A hlau lutuk chuan indap chawp tak meuh meuhin a room lamah, inchung chhohna kailawnah chuan a inham chho ţawk ţawk a, a phone tih ên nachang pawh a hre tawh lo.
.
Fur lai anih vang nge ni, line chhia a tamin current a thim chhen mai bawk si a, in thar an luah hnuah current pangngai takin an la la nei lo reng reng a, inverter fit tura an koh lah a la rawn kal thei bawk silo, hei hian zan lamah an buaina a belhchhah hle a ni.
.
Room a luh hnu chuan a inngaihtuah chiang a, vawiin maiah upa Rova'n ţawngţaina hun a rawn hmang tawh a, chuvang chuan tun ami a thiltawn kha chu a ngaihtuahnaah puh mai a han tum deuh a, mahse a ngaihtuahna ringawt a nilo tih chu a hmaia a rawn tawh thawi fua atang khan a hrechiang hle bawk si a. 
.
Chutihlai chuan choka zawn veleh chuan ri deuh thlep thlep a hre leh ta. Richarda chu a tiril a khur deuh ţan a. Mahse, amah pa chak leh tuma ngamloh nia a inngaihtuah chhuah lehna, a inngaihdan avang erawh chuan inti paukhauh lui vein, hlau ru hle mahse fiah duhna rilru a pu ve ta a.
.
Thâwk pawh thaw ţha ngam mang lo chung chuan inhnuai lama chuan thawm dim thei ang berin a han pen thla ta a. Choka lan theihna lai atanga a han bihthlak chuan a beisei ruk ang ngeiin thil var vo mai, che deuh leih leih chu a zuk hmu ta chiah mai bawk. A beisei lawk mah nise a vawihnih nana a han hmu ţha leh chu a phu leh nasa ngei mai.
'Enge ni na vei, mipa ka ni lawm ni?' tia chhukthlak luih tuma a han insiamrem chiah tihah chuan chu thil vâr piah chiah atang chuan mit de ţhiang rial mai hian a lo melh kar mai le!! Chutah zet chuan zuk fiah chu sawi loh, hlauhlawpa tlanchhe chungin a room a khar bur a, a chhungah a kalh hmak a, chutih rual chiah chuan current a rawn êng ve chiah ta bawk a. Thinphu dup dup chung chuan chutia current a lo ên leh takah chuan a rilru han tihuaisen leh deuh a, current êngah tal fiah zui leh ngei tumin room kawngkhar chu a han hawng dawn a, pawn lamah a lo inkalh leh ta tlat mai le!! Upa Rova ţawngtaina chu chhânin a awm ta lo anih hmel hle mai.
.
.
Private detective Lungngailova kawngka chu kik hmasak pawh awm lovin a rawn inhawng rawp a, tlangval lian leh saţha zet mai hi mitmeng chiai leh buai niaih chung hian a rawn pawk lut nawlh a. Detective Lungngailova chuan ţhutna lo kawhhmuhin awm hahdam turin a han ti a.
.
Detective Lungngailova hian a hming a pu zo hle a. A thiltihah a hlawhtling emaw hlawhchham emaw, hlim hmel hi a pu thei reng a. A hmaah thil harsat hmel tak pawh rawn chhawpchhuakin rawn inherchhuak mahse lungngai hmel a pu ngai lo. A thil chhuiah hlawhchham sawi tur a neih mang ngailoh avang hian police detective pawhin an pawlah an sawm lut a. A pianah chuan police ni turin a tling lo chiang sa tih a lang reng mai, feet 5 pawh a tling ţhaţhum dawn em ni aw tih theih tur chang chang chauh a ni. Chutia sawmna a nasat em avang chuan police lam chu a zawm ve ta a. Mahse pu han neih a, mi thuhnuaia kun hi a lo tithei ţhak lo chu niin. Chutah ama chhui duhdantêa a kal fo ţhin bawk avangin an pu nen chuan an inhmu thiam lo fo ta mai a, kumkhat pawh police detective ni tluantling ta lovin a bang leh ta nge nge a. Tihian a duh dan takin, tu thuhnuaiah mah awm lovin amahin a kal hrang leh ta a ni.
.
Chu tlangval phiar fut mai Richarda chuan an chhungkua a thil thleng chanchin a sawi mawlh mawlh lai chuan mit chhing duar duarin a lo ngaithla a, zawhna chhete te a lo zawt leh zauh bawk ţhin.
.
Chutia Richarda'n thil thlen dan kimchang a han sawi zawh chuan detective Lunga chuan, "Tlangval, min lo va hawsan la, tlaiah thil awmdan enfiah turin ka lo kal ange," a ti ta a.
.
Tlai dar 4 a rik chuan detective Lunga chuan enlenna nen bathroom chhung leh pawnte, kailawn inchung lam chhohnate, a vawn ban nen, thil var Richarda'n a hmuhna laite, choka leh common bathroom inpawhna zawng zawngte chu chik takin a en a, chutihlai chuan an biak pawhin a chhang lo reng reng. Makti leh hrethiam lo takin a che vel chu an lo en ve tawp mai a ni.
Chutah a thil hmuh duh chu a zo fel rih aniang, rawn din chhuah pah chuan, "Zanriah eitui ule, zan lamah ka lokal leh dawn nia, sin tur kawmawl pan deuh min lo chhawpsak bawk ula," a ti a, kal a tum ta mai. Richarda chuan, " Hriat belh leh hmuhchhuah i nei em?" a lo ti a. Lungngailova chuan, "Ka nei maithei," ti chauhvin a chhang a. Chaw ei ve nghal tur chuan sawm hle mahse a ţan tlat avangin an chelh lui ta lova.
.
Zanlai dar 12 a rik chuan Lungngailova chu a tawmna tur bika siamchawp, choka lanchian theihnaah chuan a tawm kak tawh. Richardate nufa ho pawh mu tura a tih angin an mu diak tawh a. Richarda chuan puih ve inhuam viau mahse thil a tih khawloh palh a hlauh zawk avangin mu turin a ti ta zawk kha ania. Amah chauha thil chhût neuh neuh paha chu zanlai mikhual lo nghah chu a duh zawk a ni.
.
Lunga chu mutthluk hlau tak chung chuan a inngaihtuah neuh neuh a. He rau, he thlahrang hian he inchhungah hian tute nge a tihbuai nasat zual bik? A nau Christy leh a pi room lamah chuan a che hauh lova. Chuti anih chuan he inchhunga thâwmna deuh ho leh a sual deuh ho chungah hian a ţuan deuh bik tihna em ni ang le!? Pa ber pu Rochuha lah ţhenawmte kâ atanga a hriatdan khan pa vîn zet mai, tuma nel theih loh, a hnathawktute a vin nasat theih em avanga thawktu tur pawh hmu zo mang lo thin a lo ni bawk si. Chutah, mi inren zet, hnathawkte ei leh in a tichhiat lutuk avanga rei pawh thawk peih lova an bansan zel thute thlengin a hre bawk nen.
Chutia a ngaihtuah nauh nauh lai chuan thâwm rawn awm det det chu a hre ve ta a.
Hemi zan pawh hian 132kv line a chhe leh ta nge ni, current a thim leh vek a. Chutia thawm rawn chhuahna lam chu a thlir reng a, a tir chuan engmah a hmu lo. Mahse a hnu deuhah chuan rawn var phei vau vau hi a hmu ta a, chu thil var che chu tawp detin a hnuah a chesawn leh ta a. Chutah Richarda sawi, mit de rual mai khan a thlir reng tih a hmu phut a, mahse a bo lehnghal a. A torch light ken chu a han dap thut thut a, mahse a dap fuh thei hauh lo mai, thawm neih nasat lutuk a hlauh bawk si avang chuan a dap zui chiam ngam lova. Chu thil var a hmuh tawh loh hnu chuan a awmna atanga chhuakin a mutna tura an siamah chuan a mu ve ta daih a.
.
Zan lam chanchin hriat chakin pi Chhingmuanite nufa ho chuan a mutna bulah chuan an lo bawr ţiau a. Sana a han en chuan zing dar 6 chauh a lo la ri mai. A thawh chhuah fel hma hma chuan Richarda insum zo lo, hre chak lutuk tawh chuan zan lama thil hmuh a neih leh neih loh a lo zawt chhen a. Han zik ţalh ţalh pah chuan, "Hmuh chu nei e, mahse chiang takin ka la sawi thei lo. A mal te te in room hranah zawhna zawh ţheuh che u ka duh ang," a ti ta a. Chu veleh mak tih hmel zet hian an in en hrek hrek a.
.
Tichuan thingpuite an han in zawh hnu chuan inchung zawlah chhovin a mal te te chuan an nufa thum chuan zawhna zawtin a kawm kual vek a, ani chuan a lehkhabu-ah chuan uluk deuh hian a lo chhinchhiah thlap thlap thung a.
.
Chutia zawhnate a duhtawk hnu chuan inhnuai lamah chhuk lehin pi ber a awmna a han zawt a. Pi Chhingi chian, "A roomah a mu aniang, ani zawng, a chakvak tawh lova, room lamah a tawm chawt reng mai. Biak rinte hi a ngai tawh khawp a, i be hleithei tawh kher lovang," a lo ti mai a. Lungngailova chuan, "Chuti chu chhun lamah ka lo be mai dawn nia. Tin, vawiin chu in hi chhuahsan vek ula ka duh a ni," a ti ta mai le! Chu thu an han hriat chuan an mengphawk tlang khawp mai. An rilru tur awm chu hrethiamin Lunga chuan, "Engmah hlauthawng suh u. Thil bo hlauhawm leh thil pawi thei âwm zawng zawng kha chu in dah bo vek dawn nia in duh chuan. He in a thil thlen dan hi mahni chauh a ka fiah a ngai a ni. Ţhenawm velah hian in duh leh min lo nghak ang a, chawhnu dar 2 ah chuan ka zo hman vek ang, in buaina hi chinfel in duh anih chuan hei hi tihmakmawh a ni," a ti ta tlat mai si a. Ngaihthat vak hmel loh tak chung chuan an remti ve ta hram a. Chutah Lunga bawk chuan, "Ka phei phawt anga, dar 10-ah ka lo kir leh ang. Chutah chuan ka tihtur chu ka rawn ţan dawn nia. E taka, pa ber hi khawnge a awm reng reng a?" a han tizui a.
Pi Chhingi chuan, "Karimganj lamah, hei a thang rei ta zek lehnghal," a lo ti a.
.
"Engti tura kal nge a nih reng reng le, a va ţul awm ve? Helamah lah buaina in tawk mek chu a ni bawk sia" a han tih chuan pi Chhingi chuan, "Ni e mawle, he kan in satu Murmu-a hian sak zawh dawn ruaiah min hawsan a. Phone lahin a rawn kir duh bawk silo, amah Murmua kher khan a la fello lai hi rawn chhunzawm se a duh sia. Hei in kan luah luh ni-ah smah zawng turin a kal ta daih anih hi," a lo ti a. 
Chu thu chuan detective Lungngailova beng chu a verh hle. Chutah, "Murmu-a number chu min lo pe thei angem ka pi?" a han ti a. Pi Chhingi makti hmel a hmuh chuan, "A, kan pute sawn in sak ve an duh sia, mistiri chu awm nual mahse hei, in mistiri kutchhuak hi a dak thlarh thlarh si a. Rawih ve atan a itawm ka ti deuh mawle, bakah, ka han ko ve anga, hna a awm dawnte chuan ihe lovin a lo kir mial maithei asin," a han ti zaih a.
Chu veleh pi Chhingi chuan, "A ni dawn teh tak e a, hei a kutchhuak zawng a mawi khawp asin. Chuvang ania kan pa paw'n a zuk zawn leh ngat nachhan," tih pah chuan Murmua number chu a pe ta a.
.
.
Parawl tih takah Lungngailova chuan artui a kang leh mai, a hma zingkara dal ţhing a la awm nual bawk nen. Mahse a ţhianpa, a mei a ni ber mai, Khenga tia a koh mai ţhin chuan chaw rawn kilpui a tum ve tlat avang chuan buhfai no hnih a thlak a, a tawk leh der mai.
Khenga chuan a va thangna chanchinte chu a han zawt a. Lungngailova chuan a thiltihlai chu a tâwp a la thlen chiah loh avang chuan a kilh kelhin a hrilh duh rih lova.

Chaw hmin hun nghah pah chuan Lunga chuan Murmua number chu hmetchhuakin a han dial ta nghal a. A beisei loh deuhin Murmua chuan phone chu a lo la nghal a, chutah minute 10 vel lai inbiain nui hak hak chungin phone chu a dah ta a.
"Enge nita a? Vai ţawngte chuan i rak pawlh ang nawk nawk a?" Khenga'n a lo tih chuan Lungngailova chuan, "Ka thil chhui lai meka thil ţangkai lutuk mawle, nakinah fiah takin ka la hrilh vek ang che. Chawhnu lamah chuan a hmawr ka bawk thei tawh ang, i lokal ve dawn nia i duhleh," tih pahin a ipteah chuan screw driver leh plier a khung lut zui nghal a. Khenga chuan mak a ti angreng hle mai, a thil chhui lai pawh chu nihnih awrh, nihnih pawh tling lo a chhui chauh a ni si a. Mahse a ţhianpa hi chu a zui ve nasa in a hnathawh dan, mawlmang awm taka lang si hian mi chhuichhuah theih loh leh a ngaihna an hriat tawh loh thilah pawh a hlawhtlin hnem tawhzia a hmu a, a hriatchian em avangin a ţhianpa detective Lungngailova hi a ngaisangin hlawhchham theiah pawh a ruat tawh lo, a ring bur a ni ber mai.
.
Tukţhuan eikham dar 10 chiah chiahah chuan pi Chhingite inah chuan detective Lungngailova chu lungngailo tih hriat zet hian a pen lut thauh thauh a. Pi Chhingite nufa thum erawh ngaihthat hmel fahran lo chung leh ringhlel mitmeng la pai chung si hian pawn lamah an pen chhuak ve thung a. Lunga chuan pi Chhingite chhungkaw mitmeng chu hrethiam takin, "Ka rei lovang, varandaah hian in duh leh min lo nghak mai rawh u," tih pah chuan chhung lamah kawngka a kalh zui nghal a.
.
Dar 11 a rik chuan kawngka chu chhung lam atanga rawn inhawngin detective Lungngailova chu a rawn nui chhuak var var a. Zawhna mitmeng nena an lo en ţhap lai chuan Lungngailova chuan, "Tun aţanga darkar hnih a liam leh chuan he rau, thlahrang hi a rawn inlar nawn leh ngai tawh lovang," a ti ta a. Mak ti takin an in en he haw hlawm a, amaherawhchu tumah chuan zawhna an zawt chuang lo.
.
Detective specialist Lungngailova chuan a phone phawrhin a ţhianpa Khenga chu a be ta a. Rei pawh rial lovin Khenga chu polythene a thil khai chung chuan a lo thleng a, hriatthiamloh hmel tak chuan a rawn hawi haw haw bawk a. Chutia an lo en ţhap lai chuan Lungngailova chuan, "Hei hi ka ţhianpa anih hi, ani hian kawng tinrengah min pui ţhin a, a tello hi chuan engmah ka ni ngailo. Kawng engkima ka rin ngam, ka kut leh ke anih hi," a tih takah chuan tha takin an lo dawngsawng ta hlawm a.
.
Chutah Lungngailova vek chuan, "Lokal r'u le," tih pah chuan common toilet lam chu a pan a, hrethiam lo zet chuan an zui ve diah diah a. Chutah a chhunga luh pah chuan, "Ţhianpa, i thil khai kha pakhat rawn la rawh le," a ti ta a. Khenga chuan hrethiam miah lo mahse thil awmze nei tho niin a ring tlat a. Chutah polythene chhunga agarbati(vai hal rimtui, thosi hlauh) pakhat chu rawn phawrh chhuakin a hal ta a. Anni chuan an lo en ţhap a, an hmelah chuan a ngaihna an hriatloh hmel takzet zet a ni. Chutih nakalai chuan, "Tawlh hnung r'u," a han ti thut lehnghal a. Hlauthawnnaa la khat ru ţun an nih avang chuan phut zuk pahin an tawlh hnung dawrh a. Chutah Lungngailova chu hriat theih siloh hian a phun deuh bul bul a. Anni lah an lo hawi ka hau ringawt a.
Chutah Lungngailova chuan chhuatah agarbati chu dahin a pen chhuak a, kawngka chu kharin pawn lamah chuan a kalh nghal thlap bawk a.
.
Chutiang chuan pi Chhingite bathroomah ti lehin, Richarda room leh bathroomah chuan a han ti leh a, a zawh veleh chuan a kalh leh thlap zel bawk a, chutah chuan a thiltih lai chu a zo fel ta a.
.
Mak ti meng â ho chunga an lo en lai chuan Lungngailova chuan, "Kan zo ta e, ţhianpa i haw ang hmiang," a ti ta thut mai a. A tu mai pawh chu an meng hru vek mai. Chutah pi Chhingi chu harhchhuak hmasa berin, "Chuti ringawt tur maw?" a ti hman dek dek a, Lungngailova chuan, "Ka pi, thlahrang chu vawikhatmah a lokal leh ngai tawh lovang, ka tiam a che u. Agarbati ka halna room zawng zawng kha tun atanga minute 15-ah in hawng vek dawn nia. Thil danglam a awm erawh chuan min lo ko leh mai ula, hei hna dang hmanhmawhthlak ka nei tlat mai," tih pah chuan engmah sawi leh hma chuan a chhuak ta daih a. Pi Chhingite nufaza chuan sawi tur pawh hre lovin an thlir liam ringawt bawk a.
.
.
Detective Lungngailova in an han thlen chuan nghakhlel zetin Khenga chuan, "Thianpa, i awmdan chu a va mak tehthut ve, enge thil awmdan chu, min hrilh thei tawh lawm ni?" a han ti a.
Chutah Lungngailova chuan, "Anih leh le, i hre chak tawh bawk a, ngun takin lo ngaithla ang che," a ti ta a.
.
"Thianpa, thil awmdan chu hetiang hi a ni e. Thilmak lutuk hi a lo awm vak tak tak hleinem, a nihna kan hriatchian loh vangte, kan dawihzep avanga kan fiahloh vang mai maite hi a lo ni zawk ţhin.
Richarda'n thil awmdan min rawn hrilh tirh khan thlahrang leh hlauhawm lam chu anih ka ring lo nghal hmak. Thlahrang tih vel hi a awm ka ringlo ni lovin Kristian ramah hi chuan engemaw deuh thihna ang chite kan tawng anih loh chuan tunlai angah thla a hrang zuiin ka ring miah lo.
Khatiang thlahrang tih vel avanga tlangval sek phiar tliang dum uih vut vut a rawn khur dur dur ka hmuh khan mi huaisen a nilo tih ka hre nghal hmiah. Tharumah min hneh mahse ka vau zam theiin ka ring tawp.
Kha chhungkua a ka luh hma khan an ţhenawm in thum velah ka lut kual hman a an chhungkua chanchin hriatchian duh vangin. Chuta min hrilh inang vek chu mi chapo chhungkua an ni tih hi a ni. Pa ber 1st class contractor eiru nasa tak a ni tih min hrilh a. Tin an hnathawktute ngei pawh hrâwk tuar tuar reng mai, midang pawisawi hlau miah lo leh ţhenawmte nêk ran chi anih thute min hrilh bawk a. An chhungte thi tawh emaw, thihdan danglam deuh a thi an awm em tih ka zawh chuan chutiang an hriatloh thuin min chhang vek bawk a. Chutah chiah chuan a ni, an inchhungah thil hlauhawm, thil thleng danglam a awm miah lovang tih ka rinngheh lehzualna chu.
.
Min koh angin tlai lamah an inchhungte chu ka en fiah ta a. Darkar chanve chhungin thil nihna diktak chu ka hrechhuak vek hman, chhanna pawh ka pe nghal thei, mahse ka pe duh hrih lo mai a ni.
An bathroom kawngkhar kalna kha i hmuh ang khan plastic vek a ni a (A lem ami ang hian). Tih tawlh awlsam zet a ni. Ka han en chîk deuh khan kha a kalhna, a va hawlhtu zawk kha, a kua va inhawlh luhna ai khan tlemin a invuah sang hretin chhuk zawng hretin a invuah tih ka hmu mai a. En mai chuan a hriat theih mangloh. Mahse enlenna nena ka han enchian phei chuan a chiang lehzual tlat a ni. Bathroom chhunglam ka han en chîk leh thung chuan a kalna invuah chu a ngil thlap lawi si.
Tihpalh a ni thei ang tih thu-ah bathroom dangte leh Richarda room pawh ka en vek a, a kalhna pawnlam chu a hawlhtu zawk chu chhete tak taka sang hret zelin chhuk zawng hretin a awm zel a, a va hawlhkalhna kua erawh chhete a hniamin chunglam a hawi hret zel. A chhunglam kalhna erawh ngil takin a awm vek thung.
Ka ngaihtuah chhunzawm ta a, pa thâwm na deuh chu inthiar turin emaw, inbual turin lut ta se, dim vak lova kawngka a khar bur chuan kha plastic kalhna, a hawlhtu zawk kha a kuaah tawlh lutin a inkalh thlap mai dawn a ni.
Anih ngatinge pitarte kha a luh ve in a inkalh ngai miah loh, e...a thawm a na lo em alawm, dimtein a khar mai a, thinrim titauin a khar ve ngai hleinem.
.
Ka ngaihtuah chhunzawm zel a, 'Anih leh an mistiri chhawr chu a va thiam awm lo ve....' Ni love, a thiam lutuk zawk a ni. Mahse thiltum a nei a ni tih ka chiang mai. Mistiri fiamthu duh tak a ni ngei ang. Anih loh vek chuan thiltum dang a nei a ni, tihluih a ni chiang em alawm. Christy room kawngkhar leh a pi room kawngkhar chu pawnlam leh chhunglam invuah dan a dik chiah ve ve. Chutah chuan ngaihdan chu ka nei deuh na in ka chiang ngam ta rih chiah lova.
.
Ka ngaihdan kha a dik a ni tih hi chunglam chhanna dawng miah lo mah ila ka thinlung hian darkar chanve chhung lek khan a nemnghet thlap.
.
Chhuatte, vawnbante kha enlenna hmanga ka bih der ngial lai kha chuan ka nui chhuak lo chauh, ka insum theilo teuh lutuk.
.

Richarda'n thil ri vel a hriat leh thil var deuh vo a hmuh thu min hrilh pawh kha ngaihdan chu ka nei sa nain chian ve hrim hrim ka duh avangin ka riahchilh ta kha ania. Thimtham zinga ka lo chân lai khan hlauhna chhete mah ka neilo hrim hrim. Ka rindan takah chuan zawhte vârin thil engemaw a chhaih kual anih ka ring a. Mahse a hun a lo thlen khan ka ngaihtuah kim lohzia ka hrechhuak chauh.
Kha pitar sam var vo tawh kha Richarda hlauh kha a ni ang tih ka lo ring miah lo. A chhan chu inthiar duh pawh nise a roomah inthiarna an siamsak lovang tih ka lo ring phalo reng reng. Tin, êng (light) engemaw tal pawh an pe lote kha alawm mak, an ngaihsak lohzia a langchiang khawp mai. Thimthama a inthiar tur rawn indap phei dan dan, rawn pen ri thlep thlep ka hmuh khan ka va ţanpui lo chauh a ni. Mit de ţhiang rual awmna zawn kha zingah khan ka en a, puan an phahah khan zawhte bawhna niawm takin hmul a lo tla niaih a, ka zawt chiang a, zawhte chu an lo nei ve ngei a ni awm e, engtin nge maw zawhte hial an vulh ve theih zawk ni, engpawh nise, ka ring sual love," a ti ta a.
.
Chutah Khenga chuan, "Anih leh zan thima Richarda khawihtu, rawn pel fuatu a awm, tihte kha," a han tih chuan, "Ho lutuk mawle, dawihzep vang anih kha. Khami min hrilh khan khalai zawn vel kha ka en a, hrui inzam, phelh leh tawh ka hmu alawm. Hei fur lai anih i hria a, a nu puan zar ro theilo kha hruizamah khan an zar a, kha kha a tawk fuh palh anih kha. Richarda'n zinga a thawh hmain hrui thlun kha an phelh leh vek tawh alawm, a hnawk an tia," Lungngailova chuan a lo ti mai a. Khenga chuan thil awmzia a han hriatchian chuan a nui kur kur a.
.
Anih leh tinge chhunah khan inchhung atanga i chhuah tir vek kher a pitar kha i chhuah tir ve loh?" Khenga chuan a ti leh a.
"Ka ipte kha en ta che, plierte kha i hmu em, hmanraw dangte kha? Room kawngka kalnate kha ka siam ţha alawm mawle, tunah chuan a hrâng thei tawh lo hrim hrim," tih pah chuan a nui hawk hawk a. Chutah, "Hetiang eiruk hmang leh mi chapote chu dim vak ka tum bik hleinem. Ka siamţha lai an hmuhte chuan ho an ti ngei dawn sia, pawisa min pe ţha duh nang.
Pitar thung kha chu, kan ţawng an hriat phak lohna turah ka kalpui a. Chithlum (Sweet) pek pahin ring takin, 'Ka pi, zan a zung tura i kalin i aw i thian kharh kharh ţhin tawh dawn ania aw,' ka ti a, 'Awle,' a ti ve mai," a ti a. Za deuh chuan an nui dun ta hawk hawk a.
.
Chutah Lungngailova chuan sawi zawm lehin, "Mistiri Murmua kha chu thil chian nan ka be ve deuh chauh anih kha. Rindan ka neih lawk deuh avangin fimkhur taka biain hlauhawm a awm loh thu ka hrilh a. Khatia kawngka kalhna tawlh theia a siam nachhan ka zawh chuan a chhan diktak chu phuba a ni ber mai. In neitupa, pu Rochuha khan a hlawh tur pe kim lovin sangthum vel lai a lo pe kim duh lova. Chubakah a lo ankhum nasa thin bawk nen, ani Murmua thinrimin a theih ve tawka phuba la ve in khati khan an buai nan a lo vuahsak a ni awm e. An in sak zawh dawna kawngkhar vuah chauh anih hlawm avangin a room luahtu turte milin kawngkhar a lo vuah sak zel a ni awm e. Chutah Murmua chu chanchin, thlahrang nia an ngaih dante ka hrilh chiang a, an buai nasat dante ka han hrilh phei chuan, a tum leh ruahman aia kha thil khan hna a lo thawh that thu sawiin a nui nasa ngang mai. Chutah, a puin Karimganja a zawn mek thu ka han hrilh chuan Murmu chuan, 'Min jong rawh se, keimah kerelaah awm daih lawm,' a ti a, a nui nasa khawp mai," Lungngailova chuan a ti ta a.
.
"E taka thianpa, agarbati vel kha?" Khenga'n a han tih chuan Lungngailova chuan, "Kha chu maw, mak an tih nana an hmuha intih rapthlakna anih kha, lehkhachhia pawh hal la a thawh dan a inang deuh reng ang chu, agarbati kha chuan ekin chhung thosi-te pawh a um chhuak deuh mahna" tih pah chuan a nui sung a.
.
"Anih leh i thu chham vel kha,"
.
Lungngailova chuan nuih uar uar pah chuan, "Kha zet chu ka nui chhuak lo kha a mak ka ti zawk. Aw Lalpa chaw leh thil tinreng tih naupang ţawngtaina hla kha ka sawisa vel mai mai alawm," a ti ta a. Chu veleh insum thei lovin, Khenga thingpui rawn chhawp pet baw nuaih khawp chuan an nui ta kiah kiah a.
.
An nuihza zualpui a reh hnu chuan Khenga chuan, "Mahse i chhui chhuah dante an zawt ngei awm che sia," a han tih chuan Lungngailova chuan, "Kha vang tak khan alawm dawtsawi champion ka bulah ka kal tir che, i sawi mam thiam dawn tih ka hrechiang a, ka hming chhalin ka lungngai love," a tih lai chuan Khenga chuan a lo ner khum nasa mai a.
.
Chutah thutak hret zawkin Lungngailova chuan, "Thianpa, hrâng kan tih tam tak hi chu kan dawihzep vang, kan fiah ngam loh vang a ni duh khawp mai. Han fiah ngam chiah ila thil ho tak a lo ni duh khawp ania. An dawihzep azarah sum thahnem tak zaninah va lam tur i neih ngei ka ring. Hmeithai zing zu zawng i in thei ngei dawn e.
E, taka, THLAHRANG leh HMANGAIHNA (Nula/tlangval kara hmangaihna) hi a inanna i hria em? Kei chu ka hria asin, awm chu a awm ve ve a, mahse ka la hmu lo ve ve," a ti ta a.
.
****Detective Lungngailova is bae****
.
MIN CHHIARSAK AVANGIN KA LAWM E.

Post a Comment

Powered by Blogger.