“A tawk, a ninawm, engkim a tawp ka ti a ni lawm ni? min kalsan rawh, ka hmu peih lo che; ka hne hluah hluah che” thinrim taka titu ka bialnu Teteii chu ka melh tlawk tlawk ringawt a! a chetdan teh thut chuan min tihamhaih a, a mak tih bak in ka sawithiam lo.
“Duati, ti nge tiang hian I awm thut a? mawh? “
“Duat pawh min ti tawh suh, I duat ka ni tawh lo; ka lak atang hian hla takah kalbo la ka lawm a kim a ni mai”
“Kalbo tur chuan min duh tak tak amaw? A chhan ka hriat phawt tul I ti ve lo mi?”
“A chhan maw? ka hmangaihna che kha a dai tawh, nilo, ka lo hmangaih ngai lo che a ni zawk e, midang ka nei a ni”Awihlo hmel zetin ka melh a, ka so bulh bulh a ni mai; tumruh leh luhlul zetin a ding khawng lah a, min then chu a tum chiang khawp mai.
“Ka hmangaih em che vangin awmdan tawk ka lo thiam lo tihna em ni? min hrilh la, ka insiamtha ang, inthen ka duh lo, duat”
Min rawn en a, chiang takin, a mitmeng chu ka chhiar thiam lo; a danglam thut a! hmuhsit hmel zet hian min melh a, tawrh har ka ti kher mai.
“Kan inthen hi angai a ni; engangpawhin min chelh tum mahla, kei hi ka kal lui tho tho ang”
Chutiang em ema min then duhtu na na na chu engvang tehchaiin nge ka chelhzui hram bik ang le? ka chapona leh inrintawkna a rawn fawn hlup hlup a; mipa ka ni, ka bialnu zawkin kalbo tur leh tibuai tawh lo tura min ngenna chu ka tih hlawhtlinsak ngei tur a ni. Ka inhumruh a, a tawp nan a hmel chu ka va melh leh a, “Ok, inthen I duh tiraw? Kan inthen e, engkim a tawp e, ka kal ang, ka tibuai leh tawh lovang che, hlim reng ang che” ka ti a, kan pahniha zungbun kan lei, silver, a chhunglama kan hming kan chhut hnan ve ve chu ka phawi a, a kut ka la a, a ni pawh chuan a lo la bun tho a, ka phawi sak a, ka paih a, ngawi rengin ka kalsan ta a.
WHY?!!
Ralkhata ui bauh thawm leh perhpawng chiri thawm bak thawm dang hriat tur chu ka room-a sana chek ri chauh chu a ni. Dar 1 a ri hnai tawh a, zan dang ang chu nise tuitakin mumang bo thak khawpin ka muhil mek awm si a. Mahse, ka harh tawlh tawlh a, ka ngaihtuahna chu a rawn fim tial tial bawk a, ka thinlung lah chu tawrhhlelhawm takin a kher ngut ngut a! ka thu chhuak ta hlawl a, ka phone k’n hmet eng a, data ka on a, ka rilru lakpen nan online ka tum a ni. Ka inbox chu a lo ruak hiai a! a message zawng zawngte chu a bul a tanga chhiar that leh vek tumin ka han en dawn a, a lo bo vek!! Ni e, ka a/c ah lutin kan inbiakna pawh a lo delete vek tih ka hre mai, a wall-ah ka han lut a.
“Ka zalen ta” tih thu hi a lo post a! min run takzet a ni. A a/c-ah luh ka tum a, a password a lo thlak tawh bawk, a che rang hle mai, vawiin maiah kan inthen a, kan sulhnute chu nawhreh nghal a duh ta vek mai a ni maw?! keipawh chuan thinrim zetin ka password ka thlak ve nghal a; a pic min tagged zawng zawngte kha a lo remove vek bawk a! min block lo chu a mak zawk!
Ka whatsapp message a lo thleng zut zut a, ka clear pawp pawp ringawt, group notification hnem lutuk avangin ka ning a, data ka off leh a, ka va zung a, ka zun zawhah khumah ka thu a; cigarette ka tan a, laptop ka chawi phei a; a screen-a a hmel lo lang, a nui hmel chu hmuh hrehawm ka tih vangin ka khup leh thawk a! ka thaw hawk a..engkim chu a diklo, ka hrehawm a ni.
Zawhna chhansen loh ka kawl tun a, ti nge? Min then a duh? Engvanga midang nei ta nge a nih? Engvanga min hua nge a nih? Chung zawng zawng chhanna chu ka zawng a, ka thiamlohna leh ka tlin lohna te ka han chhut let a, inthenna chhuanlam tlingah ka pawm thei hlawl bawk si lo. Ni e, ka thikthu chhiat vanga mipa pakhat ka hnek tum te, ka ex post pakhat ka comment sak ve tum te, zu in a phal loh laia ka inruk tum te, vawikhat ka fight ve tum te, a awm ve nual thei ang chu..mahse, chungte chu a hunlai khan min then nan a hmang lova, a titau satliah ringawt anih kha..tun ataka a rawn tharthawh leh chu ka ring si lo. Midang a nei ang khan a insawi a, awih har ka ti! Kan inngaihzawn kum 1 chhung khan vawikhatmah a la pelhe ngai lova; thik tur pawh ka hre ve ngailo a nih thin kha..tu nge keiaia a thlan zawk leh ka thinlung nat tur zia pawh hrereng chunga a thlan zawk chu? Min tihnat hreh ngawih ngawih thin khan engvangin nge min tihnat chu a duh tak em em? Engmah ka hre lo.
Ka hmuh hmasak ber ni chuan MZU Bus-ah kan chuang dun a, ear phone ka vuah a, zai ka ngaithla a, ka bula a lo thut pawh chuan, ka lo en lem lo; a rim erawh ka hria. Gate kan thlen chuan ka ear phone ka hlip a, ka va melh zawk a, ka phu deuh zawk a! Bolywood star Katrina Kaif nen kan lo chuang dun tih ka hre lo chu pawi ka ti hle..nia, Katrina Kaif hi vai film star-ah chuan hmeltha ka ti ber a, ka bula thu nen hian danglamna an neih awm ka hre vak lo, asam chu a dum hlap a, a kawi deuh bawk a; a chalsam chu a chal sir veilamah bengzeh phak si loh hian a tla hiang a, a hmuiah chuan lipstick sendang dal raih mai hi a hnawih vein ka hria; a mit chu a line dum ve lem lo a, a mitmeng chu a fiah hle, a mitmu chu a dum a, a mithmul sei leh er tan chu mascara hmanga a tih khawng ve fur pawh ka hre ve lo.
Kekawr buang loose lam deuh hi a ha a, a kekawr tlang chu a thlep a, chapal dum simple deuh, a kethiah ngo leh a kezungtang sei sal mai pholangtu tha tak a bun a, a kawr chu a dum a, thui mawl te a ni. a bag chu a dum bawk a, a lian lem lo, a ngawng var haiah chuan gold sin zet hi locket tellovin a awrh ve a, chu lo chu tlereuh a inbel ka hmu lo. Chutiang taka ka enchik chu mak inti maithei, nia keipawn mak ka ti, ka en vung vung ringawt! Hmalam a en a, a phone chu a zuk bih leh zauh zauh bawk a. Bus chu a ding a, a lo hawi thut a, makti hmel deuh hlek hian min melh a, a nui deuh bawk a. Ka lo nui ve ringawt.
“Katrina Kaif nen kan rawn thudun a, a nuamlo lem lo” ka thianpa tawng duh zet Zira chu ka hrilh a, gate bul atang chauha amah ka lo en kha pawi ka ti a, ka ui hnuhnawh kher mai.
“Eng Department nge a?”
“Ka hre bik lo, ka be lo a”
“Nepa”
Class lak laite chuan ka mitthla-ah kha nula kha a cham a, ka hmuh leh huna biak dan turte ka lo suangtuah a, ka chibai anga, a kut ka hiat zauh ang..naaa, mahse, thing a ti palh ang, polite takin over silovin a Department awmna ka zawt anga; a hming leh veng, chuan a number..
“Alex” ka phu zawk a, Sir Matana chuan a tarmit phen atang chuan min lo melh kawr a! ka thiante chuan min lo thlir deuh thup a!
“Vawithum ka ko tawh che, I beng a ngawn thut kan hre silo a, nangmaha nui vur vur lo khan kan ram politics I hmuh dan han sawi ve ta che” a ti dam thlup a. Ka zak viau! Kha hmeichhia vang vek kha lawm.
“Kan ram Politics hi a tenawm ka ti a, kan politiciante hian mahni mawnghlim tawk lekin an khel ve a, an thiam ziktluak si lo a, an damchhungin ser an insiam sak thin niin ka hria; mifing leh mithiam tak tak te chuan khelhna tlakah an ngailo a nih hmel; a sir atanga lo thlir mai hi an duhtawk viau, a basic a dik tawk tawh loh vangin a ler atanga tih dik tum hi a sawt lem lo, mipui sukthlek zawng ngaihven hmasa miah lova mahni tanghma hai tumte avang paw’n kan ram politics hi a tenawm, mi zawng zawng tihlawm tum niawm taka khelte ho avang paw’n a ngil thei tak tak tawh lo; kan ram Politics hi Politiciante avanga tenawm leh bawlhhlawh a nih avangin leh mipuite chanvo tamtak a awm bawk avang pawhin kan pawimawh theuh mai, hmm..ka sawi thiam tawh lo e a” ka ti a. sir chu a nui ruh ruh a, a sawi chhunzawm ta a.
“Zir hnap, saw I hmu em? Kaif-I chu a nih saw”
“OMG..a va cute vee”
“Heii, I mit mu kha a pawng zurh zurh a nia, ka ta tur a nih saw”
“Ka chuhpui hma chein midang hian an lo perh tawh zawk ang tih ka hlauhpui che”
“Ni dawn tak, a luck awm sia, a nei tha ngawt ang” ka down ru hle. A thiante nen chuan an nui har har a, a nuiri te chu ngaihthlak a nuam ka ti, keihi hmangaihnaah ka tlalut ve dawn ta em maw ni le..
A bus chuanna apiangah ka chuang ve ang ka ti rilru a, bus a rawn ding tan a, a thiannu nen an lut a, rang zetin ka lut ve nghal. Mahse, a thiannu nen an thu dun ta tlat..an ep chiahah kan thu ve a, ka va hawi phei a, a lo hawi phei ve chiah a, kan innuih dun ta sak a! a va nuam tak..Temple-ah kan chhuksan ta a, a tuk nghakhlel reng rengin zan hun chu ka hmang a. Mahse, ka hmu leh ta lawk lo, a hnu ni thumna-ah daih ka hmu ta a. Gate bul Restaurant-ah a ni. A bula thutna awl awmah chuan ka va inhnawh ve vat a.
“Ka va’n hmu ngai lo che” k’n ti satliah a; mi zeilo tawpkhawk chu ka ni bik lova.
“Nia, nangpawh, hehe” a ha var rual thah chu..sahdah leh tuibur a hmuam ngai lovang tih ka ring thlap.
“Ih, eng nge in Department?”
“Commerce, nang?”
“Pol.Science, khawi vengah nge in awm?”
“Ramhlunah ”
“Keini chu Tuikual (s) a nia, Alex ka nia, engtin nge ka koh ve dawn che” ka rilru chuan Kaif-I a rawn ti a, ka nui deuh a.
“Tete min ti mai rawh; in vengah chuan thian ka nei asin” a ti a, an hming a sawi a, ka hre ve lem lo. A bula awm chu a nawm rualin ka lo insangmar leh teuh thin a, a huhang chu tawrh a har ve khawp mai.
“I number min pek phal chuan ka lawm ngawt ang” mi thil ka dil tuma ka la zah ber a ni hial ang.
“I number sawi la, ka lo miscall ang che”
A bultanna a tan chuan a chhe lutuk bik love. Zan tangin ka bia a, Fb-ah ka add nghal bawk, whatsapp –ah ka be char char thung. Mahse, over ka hlau a, kan inkawm tui lai takin ka mangtha thut! Hmeichhe dang nen an danglamna pakhat chu- ama chanchin a sawi ve miah lo. Hmeichhe thenkhat hi chu zawh pawh ngai lovin an sawi zung zung a, an ex te avanga an rilru nat zia te leh mipa an rin theih tawh loh ziate, mahse, kan han inberei a, min ring leh tho sia!! An mak thei ngawt mai.
In haw lo na na na chu kan inkawm chho ve zel a, kar a liam leh meuh chuan an inah ka leng ngam der tawh. An in chu a fai kher mai; unau pathum zinga a milai a ni a, apa Doctor a ni a, anu chuan engmah a thawk lo; a u chuan nupui a nei tawh a, ani pawh Lecturer a ni, a nau mipa erawh college a la kal a. An felin an zau em em a, an inah pawh ka tlangnel nghal hle.
“Bawiha, tho teh, I putea te inah va kal teh” ka nuin min sawi nawk nawk avang chuan ka harh hlawl a, nizan khan Teteii nena kan sulhnu ka fan lai khan ka hriat loh Karin ka lo muhil a nih dawn hi, phak chuapin ka tho a, darthlalangah ka in en thuak thuak a, hmai pawh phih lovin ka putea te inah chuan ka inkhalh phei a; ka tlan laite chuan, “Phatsan ka ni” tih thu hian min hnawh ut ut reng a. A chhan ka hriat siloh thil chuan engtik thleng nge ka thinlung a tihnat dawn ka hre lo..khuarei hi engtianga rei nge anih chu ka hriat ve angai dawn ta..
MIN KHAWIH SUH..
Peihlo tawkin class kal turin ka insiam a, ka phur lo kher mai. A hma kha chuan Teteii hian bus chuan dun a duh thin vangin bike ka keng ngai lo; kan intawn hmasakber tuma busa ka chuanna chhan kha chu ka bike chhiat lai a nih vang a ni a, khata tang khan bike hi ka hawlchhuak khat tawh hle. Ka bialnu khan mi tamtak zinga busa thut duna, kut insuih rialte kha nuam a tih thin vang a ni.
“Thenawmpa chu min rawn nek leh hle mai a” ka pa chuan a ti chuar chuar a! tukthuan kan ei lai a ni a. Ka pa hi Contractor a ni a, ka nu chu Primary School zirtirtu a ni, kan unau zingah ka naupangber a, kan upaber hmeichhia chuan pasal a nei tawh a, a nau chiah mipa paw’n nupui a nei ve tawh, ka u chiah mipa nen kan la tlangval a, ani erawh Evangelist Team zuiin inah a awm khat hle, kan chhungkaw black sheep a ni thin a, a piangthar a, tihian rawngbawlin a chhuak ve nghal a ni, ka nu leh pate chu an lawm khawp mai.
“A mak ngawt mai, Pu Hluna chu, sawtiang em em a han innek te chu, Kohhran Upa meuh si” ka u mipa nupui nei tawh khan a rawn ti ve a. Kan monu Usawmi hi ka u hmeichhia nen ka ngainat dan a danglamin ka hre lo; a fel tawp a ni mai. Fa pahnih an nei tawh a, kan chhungkaw tihlimtu ber te an ni.
“Piangthar hek lo le, a pawisa thawhtam vang chauha upa ni thei anih saw” ka pa chuan a ti leh a. Kan thenawmpa Pu Hluna hian nikkum atang tawkin kan kawmthlang huan chu a rawn nek hret hret tawh a, ka pa hi pa inhmuamup lem lo, ni ve huau huau, kohhranah pawh pavalai pawla committee member ni pha ve tawk a ni a, kum 63 a ni ve tawh a, nelawm ve tak, engemaw change zu lem ve thei mai a ni roh a! ka nu erawh Kohhran leh khawtlangah a phusa pawl a ni thung; nihna pawh a nei nual mai.
“Sawi ve la, tite chuan min rawn laksak vek mai anga sin”
“Nia ka sawi ve tawh ang, thenawmte nen ramri chungchanga buai hi ka duhloh ber leh zahthlak tawpa ka ngaih a ni a, mahse, a ni em em tawh lo”
“Tukkin chu I va ngawichawi ve, Teteii nen in inhau leh tawh ami?” U swami chuan kam ka thuah lai chuan a rawn ti a, ka nui ringawt a, ani hi engkim ka hrilh thinna ber a ni. Mahse, tunah chuan ka la hrilh duh lo.
MZu Park-ah Zira ten en kan thu a, kan piah lawkah Teteii leh ka thik em em thin, Ruata an thu bawk a, en loh hi har ka ti, Zira chu nizan lamah engkim ka hrilh tawh a, ani pawh chuan mak a ti ve hle.
“Bro, Teteii nen sawn in ni tawh na nge?” Kevin-a chuan ati sap a. Ka lo bu nghut ringawt. Ka thiante hian Teteii vanga ka danglam nasat zia an hria a, kan inthen pawh chu min tawrhpui ve khawpin ka ring. Thil hriatchhuah ka nei thut!
Kar hmasa Thawhlehni khan helai hmunah hian kan thudun a, chumini chuan a ngui riau a! a chhan ka zawh lahin ka lu a na a, a ti mai a, nachhawkna ka eitir a.
“Alex, inthen ta ila, engtin nge I awm ang” tih min zawt anih kha..
“I hria lawm” ka ti ringawt a. Engmah kan sawidun leh ta lo. Khamini atang khan amahah danglamna engemaw tak zawng a thleng a ni, tun hnuah ka ngaihbel thiam chauh! Kan inbiak laklawh laite hian a dah thut zel a, tin, zingtin a morning wish pawh ka dawng lo zeuh zeuh! Zanah nise min mutthilh san chang a awm thin. Chuan, kan inthen hma zanah khan, “Alex, kan thunun theih loh thil hi a awm ve thin tiraw?” a rawn ti a, nidangah chutiang thu a sawi ngailo, ngaihtha lo ru deuhin, “A awm a lawm, entirnan, thihna ang chi te” ka ti a. Tichuan, a tukah khan tikhan min then ringawt mai a ni. Engmah a awmzia ka hre lo. Min hrilh ngam loh thil engemaw a tawk anih ka ring ta thut a, ka tho vut a, an awmna lam chu ka pan ta a.
“Tete, in be lawk ang” ka ti thawr a! a kut chu ka zuk vuan a.
Ka kut chu a thingthla dawrh a! rum zet hian min melh a, “Min khawih suh, nang nen inbiak nan hun ka nei lo; kalbo rawh” a ti hrawk a! min thlir tute avang chuan ka zak ngawih ngawih; Zira a lo kal a, “Bro, a ho lutuk, hetiang hmeichhe lelo lutuk hi chu hnungchhawn hmak tur, an hlauhawm” a ti fak fak a, min kuah phei a, Zira nen hi chuan thlavang inhauh sak hi kan tina dun thin khawp mai. Ka kun chal a, ka rilru natna chu ka hmelah lanchhuahtir loh hram ka tum ve a, Teteii leh Ruata chu an kalchhuak a, Ruata hian a bame thin a, kan ni tih hrereng chung pawn a bame ngar ngar thin. Ka hriat loh Karin a thinlung chu a lo hneh tawh a ni mahna..keichu luahlan leh hnawl ka ni, ka va tlawm em..
Kan inngaihzawn nia ka hlim zia kha ka ngaihtuah kir leh a, khatia kan inkawm tak hnu khan keipawn hneh ngei tumin ka zir ve nasa a; a tuizawng leh a hlimpui thilte kha hriat tumin ka phili buai ve thin a sin aw..sas ka nei nual tawh a, nungchang tha leh fel em em tia sawi ka ni ngai bik lo; mipa sang tha ve tawk tak, thau lo, cher lutuk silo ka ni a, ka ngo a, ngo hlung nih ka hlauh vangin nisaah ka inpho fo! Ka sam hi a kawng ngai lo hrim hrim bawk, mahse, buk satliah ringawt chu a ni bik lo; ka nu ka chhun a, ka hnar ngul a sang a, ka mitmeng chu tlemin a bui deuh a, mit tlangkawm ka nei vak lo; hmul ka ngah lova, ka hmuihmul leh khabe hmul pawh mite angin a to tam ve ngai lo, ka hmui chu a chhah lek lek a, ka khabe hi a phir roh a! min tilang tuai vek ni hian ka hria a, ka thinrim ru thin. Mahse, hmeichhe hoin mawi an lo ti phian a!
Ka sas te hian min then hmasa ngai lo; min then an duh anga ka hriat chuan ka then zel thin, pride ka ngah a, kawp nih te, bum nihte hi ka hlau thin. Ka sas te hi sex hmanpui ka tum ziah thin a, Teteii tih lohah chuan ka hlawhtling vek bawk; mahse, insawitheih nan ka hmang ve ngai lo a, ka ngaihnep phah hek lo, vawikhat erawh ka sas leh ka thian pakhat in sex an lo hmang tih ka hriat chuan, chu hmeichhia chu ka ngainep tih ka hrilh ve..ka thiamloh a awmin ka hre bik lo.
“Tete, inngaihzawn ka duh, thian nih ringawt hi ka duhkhawp lo; ka ngaina che a, ka duh che” ka thianpa te ina ka lenpui ni chuan ka ti ta hmiah a.
“Ka awih lo”
“Ka hmel hi en la, ka thutak em hi”
“Ka lo inngaihtuah ang aw”
“Naa, eng nge inngaihtuah kher a ngaih? Hmeichhe mawl I nilo tih ka hria, ka duh che tih chu I hre daih tawh ang, tunah hian chhanna chu min pe mai la” ka hmanhmawh tawh tlat!
“Ih, englo..heiii tikhan min lo melh kur lo la, ka zak a lawm” a nui sen sen a, a hmeltha lutuk chuan min ti a lo chauh!
“Anih min duh em? Aw nge Ah?”
“Aw”
“Tikhan kan ni tihna, ka bialnu I ni tawh, keipawh I bialpa” a zah vanga a hmai sen tan tan te chuan a rilru thianghlim zia leh duhawm zia a pholang chiang hle. Ka va fawp a, a hmui nem tak chu fawh a nuam takzet, zeilo deuhin min lo chhanglet ve a.
“Tumah I la fawp lo mi?”
“Pakhat chu ka fawp ve tawh”
Khamini atang khan ka nun hi a danglam a, ka hlimna chu a luan in a luang a ni ber; ka duhthusam hmeichhia chu ka tan a famkim lutuk a, ka hlauthawng hial zawk. Zu in zeuh zeuh ka ching ve a, rui chhe khawp chuan ka in ngai bik lo, mahse, ka bialnu thar chuan zu rim nam chunga kawm a duh hauh lo; zankhat chu ka rui phur ka leng vei ngawt a! a chhungte mut hnuah “Haw rawh, harhfim lo ka kawm ngai lo” a ti ta mai a! namnul ka tum rawk a, a thinrim teh asin, keipawn ruih laia in zuam ngawt hi ka duh ngai bik lo a, chutatang chuan zu ka in khat ta pharh mai; mahse, ka inlo chu ka ti ngam lo. Ka nu pawh a lawm ve hle.
Engkim kha a nuam a, khawvel kha a parvul thin. Ani nen kha chuan harsatna chinfel theih loh a awm ngai lova; min pui turin ka bulah a ding thin, chutiang bawkin keipawn ka phatsan ngailo; kan inngaihzawn hria a piangte chuan kan inneih loh an ring ngai lo; kei aiin kum khatin a naupang a, mahse, a puitling zawk. A thikthu a chhia a, ani aiin ka thikthu a la chhe zawk; mahse, rinhlelhna chu finfiah lovin thutlukna siam nan kan hmang ngailo; in hnial rap rap chang chu a awm fo; mahse, tuemaw zawk kan inbengdaih chuan kan nuih dun hun a lo thleng leh thuai thin. Kan inah pawh vawi hnih chaw a rawn ei tawh a, ka chhungte leh a chhungte atangin dodalna kan tawk ngai lo.
Vawitam afala kan awmdun hnuah vawikhat chu ka insumzo lo a, ahma chuan amah hi a inlahrang vat thin. Chumini erawh chuan ani pawh a danglam ve deuh a, ahmui soft em em ka fawh dek dek lai chuan min tham tawn tawn a, chet a hun tih ka hai bik lo; a thawmhnaw ka phelh a, karei!! A nalh zia chu aww..a hnute bial kerh mai, mum tang mai chu dim tein ka hrual sak ne ne a; a thaw ham ham a, a awm bawr chu k’n fawp dan dan a, ka samah a kek nget nget mai. A kekawr phelh ka tum chuan min dang ta tlat a! keilah ka puakkeh lek lek tawh si, kan innawr ngat ngat a, a mitmeng tisa chakna vanga de sawr sawr kha thinrimnain a rawn thlak a, a chak ta kher mai.
“Alex , I tilui anih chuan, kan inthen ang, ka inngaisang thei tawh ngai lo bawk ang” a ti tham chhal a. Kan innawrna lamah ka lo hah ve tawh bawk nen, inthen ka duh loh bur bawk sia, ka inlahrang ta a. Ka ui asin aww..a thleng teuh hman asin le..
”Alex, eng nge I ngaihtuah? Bawiha, khtiang kha chuan awm lo teh, hmeichhe pakhat vanga..a aia tha pawh I hmu lutuk” Zira chuan ka dara rawn ben thak thak pahin a ti sur sur a. Ni e, amah aia hmeltha chu ka la hmu pawh a ni thei, amah aia hmangaih leh amah anga hmangaih erawh ka tawn ka va ring tawh lo em..ka engkima engkim ni thin kha ka lakah a biru ta si a!
Karhnih a ral a, ka tawrhna chu a la intan dawn chauh! Ka chhungte pawn an hre tawh a, ka nu phei chu a mangang hman hle. Min fuih a, Teteii chetdan chu mak an ti ve hle. Hmeichhia hi tupawhnise ka ngaihven peih thlawt lova; min lo betu te pawh ka reply peih lo; kan inthen tih chu ka la awih thei chuang lova, a lo let leh dawn tih hi ka ring bur a, ka nghak a, ngaidama lo pawm leh turin ka inpeih reng a ni.
“Awii! Amak ee, ti nge tihian a awm le?” ka hnunga hmeichhe pahnih thute chuan an ti ru sar sar a, keimah min ti emaw ka ti a, ka va lehhawi a, mahse, hmundang an lo thlir daih a! an thlirna lam ka va en nak chuan, ka thil hmuh chuan min barakhaih kher mai. Kawngka bulah chuan a ding a, kawrfual dum chhing fahran a ha a, a sam chu a tikir chuat mai a; chumai a nilo, a sam dum hlap kha a buang thur mai a! a mit lah chu namen lo hian a hnawih dum huam a! a hmui lah a tai sen hlar bawk. A bawp mawi leh nalh zet, ka lo chul fo thin, mam hen kha mipa dangte hmuh theih turin sang taka hlimin a awm ta..ka mittui a hnam sawk thei hial a nih chu!
Ka insum thei ngang lova, ka va pan a, “Tete” a lo hawi a, ka rim hriat chu a dik lo emaw ka ti hial; zu rim nam ham ham chu ka hmaa ding hi a ni ngei si a maw?!!
“Eng nge thleng a?”
“I buaina tur a awm lo e” a aw chu a chang kher mai, ka hnar ka hmu lian leh ta.
“Alex, tunlai Teteii awmdan hi a mak ka ti khawp mai; in inthen a tang khan a danglam vek tawh” Teteii thiannu ber Faki chuan a rawn ti a.
“Nia, keipawn mak ka ti, min thentu zawk kha a ni sia, Ruata nen khan an ni emaw ka tia” ka hriatchak ber leh hre tura ka zawh hreh ngawih ngawih si kha a ni.
“Ni nang, Ruata chuan a la bame reng a, mahse, a chhang duh chuang lo, runluih nan che a kawp vel mai mai aniang, nizanah chuan, “Thiannu, dam hi nuam ka ti tawh lo” a rawn ti ringawt a! ka zawh chian dawn lah khan a ngawi leh tlat bawk si, nangman be teh”
“Min biak duh loh chu thuhran, zak takin min siam zel a lawm”
“Eng harsatna nge a neih ang le..a chhungte atang chuan a nih ka ring vak lo”
“Nia, lo hriat tum rawh aw”
Ka hriat ve siloh eng buaina nge a tawh ang le?
A VIRGIN A LAWM
“Bawiha, Hruaii te inah kan awm, lo phei ve la; thil hrilh tur che pawimawh lutuk ka nei a” Zira a ni. Guitar chu ka dah a, zana ka chhhuah lohna pawh arei ta e, zantin hian guitar kuahin zawi te tein ka zai anga, a chang leh movie ka en tlaivar anga, games ka khelh tlaivar chang pawh a tam tawh. Ka taksa pawh a tlahniam chak kher mai, engmah ka eitui bawk silo; ka nu leh Usawmi mang ka ti ang thin khawp mai. Mahse, mipa ka nia, min phatsana min hnawltu ngai reng renga hun hman chu chintawk ka neihtir angai tih ka hria, ka inpeih hun ka nghah chuan ka dam ngai dawn lo tih pawh ka hria, ka chetchhuah ve angai a ni.
“Eng nge min hrilh tur chu?” hlauthawng ru deuh hian ka ti a.
“Bawiha, a thawng dawn che tih ka sawi lawk ang, Teteii kha call girl anih kha!! “ ka mitsulh a! awmngaihna ka hre mang lo; ka mualpho ka hlau a, ka kun tlawk tlawk ringawt, mahse, awih har ka tihna leh ka awih thona chu a insual a, Zira chu ka melh a, a thutak ropui si!
“A va mak ve, a la virgin asin”
“I ti ami?”
“Ti lo”
“A virgin I ring ve tawp tihna a ni maw?”
“A ni kha a virgin loh chuan tumah hi an virgin lovang” a thlavang ka la hauhsak tawk tawk chu a ni sia!
“I awih nana he video hmuhtir kher che hi ka duh bik lo sin le” tih pahin a phone a rawn lekchhuak a, a screen-ah chuan hmeichhe nalh lutuk leh pa upa lampang hi an lo infawp ngawih ngawih a; hmeichhe hnute chu chu pa chuan a sawk tawn tawn a, a hnuah hmeichhia chu kekawrte nen chauh a mu ta a, ka mittui chu engtik laiin nge a far ka hre hman lo, phone chu a zuk far huh a, chupa dulkiar luahpa chuan a bawhbet a, a thim ta daih a!
“Ti nge a tawp daih a?” ka ti tham tuak a.
“Ka hre bik lo; khalai thleng bak kha a ni lo, a lar tawh rap mawle, Tettei chu class pawh a rawn kal ngam tawh kher lovang”
“Mahse, sex an hman lai tak a lan chuan loh kha”
Nep tih hmel zet hian min melh a, “An intih loh I ring anih chuan, I thu thu le” a ti hmak a.
“Bakah call girl anihna ka la hmu thiam ve lo”
“Hetiang khawp hian animaw I lo hmangaih le” beidawn hmel zet hian min ti ta a. Ka nui lui a, “Bawiha, tunah chuan ka tha tawh lawm, engahmah ka ngai tawh lo”
“I mittui kha…”
Lukham ka hmer ngawt ngawt a, ka en a, ka ennawn leh thin a. Ka hmeichhia kha putarin a khalh vuai ta a maw?! na tiin ka rum nghat nghat a, bang ka hnek chawrh chawrh a, na hi ka ti a ni. Min then avanga ka thinlung na pawh a la dam theih loh laiin min tlakbuaktu thildang chuan min delhrit lutuk tlat a ni. Thawk lak ngaihna ka hre thlawt lo; hetiang hmeichhia a lo nih vang hian em ni kalbo tura min lo duh? A hlawhtling e, hmeichhia, a zahawmna tihbawrhbana awm tawhin, dawt hmanga thianghlimber anga lem min chan khum avang hian mi bawlhhlawh chu ka kalsan hlen tawh ang. Hriatchhuah chang ka neih apaingin mi tenawm leh mi hur tiin ka hretel tawh ang a. Ka tawrhna pawh thinrimna nen anih tawh dawn vangin a dam har lo zawk ang, ka hmangaihna thinlung kha a ni chuan a hnawl a, a hliam a, kehchhe hial khawpa siamtu hmeichha khan he ka thinlung kehchhe mek tawh pawh hi neih a phu tawh lo a, engtikahmah ka hmeichhia ka nihtir leh tawh ngai lovang.
Zak hmel pu hauh lova class a rawn la kal ngamte chu hmuhsitna nen ka lo thlir a, ka rilru let chu a ruk tak chuan ka lawm zawk, ahma kha chuan beiseina tlem ka la nei a, engkim tha leh tur angin ka suangtuah lui tlat a! ka duhthusam pawh a la ngai reng thin. Tunah erawh ka duhthusam te chu phuba lak duhna in a rawn thlak tawh a, vawi sang sawm pawh lo let duhin thingthi pawn ngaihdam min dil mah se, ka pawm thiang tawh lo, a virgin loh vang a ni lo a, mahse, mipa chitin chitang kawp lawr thintu chuan min phu tawh lo a lawm..ka huaisen sawt hian ka hria. Mite chuan an melh hrek hrek a, Ruata paw’n a bame zui tawh lo chiang ang le..Ka bialnu hlui a lo ni kher kher pawh chu pawi ka ti, ka zak em em a ni.
“Hot reuh hle mai” a darah ka beng a, ka nui sawng bawk a. Min rawn melh kawk a; ka kalsawn nghal daih. Bialnu thar ka nei ve ta! A hming chu Zuali a ni, kan junior a ni a, Teteii aia a nalh lohna ka hre hauh lo, an danglamna erawh- Teteii angin min thunun turin a chak tawk ve lo a ni mai.
Nitin kan inzui a, Teteii pawh a video vanga a danglamna hmuh tur awm miah lohin confi takin class a rawn kal ve zel a, ka la runluih zeuh zeuh duhna chu ka hrethiam lo fo! Ka hmuhsit lutuk vang a nih ka ring ber. A incheina uchuak deuh deuhte chu ngaiah ka nei tawh a, ka hmu peih vak lo. Faki atangin a nu leh pate mangan zia ka hria a, nia, an mangang ang, ka ring nghet tlat; mahse, tih theih ka nei lo, ka ngaihtuah buai peih lo bawk. Rui deuh phet phuta ka hmuh chang lah a tam, kan inbe ngai lova, mahse, kan pahniha kan awmdunna ah chuan mi mit kan la thin, khalehchen kan lo inzui tawh vang kha a ni mahna, Zuali pawh engkim ka hrilh vek tawh a, a thik ngai lem lo chuan ka hria, thik tlak pawh va ni suh.
“Alex, I piancham ka lawmpui che” ka piancham a la theihnghilh lo chu mak ka ti deuh a. A nui sang a, a taksa chu cher deuh tawh mah se, a hmel hi chu a tha ve chiang a lawm.
“Ka lawm e” ka ti satliah a, Zuali lo kal phei lai chu ka va melh daih a.
“Duat, vawiin chu engtin nge kan lawm ang? Ka b’day a ni sia” Zuali rawn thu mek chu ka en a. Ka b’day a ni tih a hre tho a, ,mahse, Teteii runluih ka duh a ni.
“Ka hre nang, I duh duh danin ni mai” tih pahin Teteii ding reng chu han en chho a. Teteii kuta thil fun chu a la a, a lek kual vel a, a ner sawng sawng a, a runluih ve tho tih ka hria. Teteii chu hmel danglam chuang lovin a ding reng a, “Alexa hi pek ka lo tum a, a piancham lawmpui nan”
“Ka remti em tih min zawt hmasa ta che” chhang thiam hi ka lo ti khawp a!
“Anih I phal chuan ka lawm ngawt ang”
“Beisei nei thilpek te hi a ni mai angem?”
“Ni lo e, nikkum khan pek ka lo intiam tawh a” a ni dawn tak e.
“I thilpek hi kan mamawh lem lo a, hehe, la let mai ta che, keiman ka bialpa chu thilpek ka pe dawn a, chu chu a tawk kan ti”
“Ka lo lei ve tawh sia, khawngaihin min dawn sak hram u la”
“Ok, kan lawm e” tih pahin thil fun chu a bula Dust-bin-ah chuan a thlak ta daih a! Teteii mittui khap per sawk chu ka han hmu hman, a kalsawn ta nghal a. Zuali chu zep loh chuan nasa ka tiru hle. Dustbin atang chuan ka va lachhuak a, a tum hmak a, “Ka tan liau liau a a lei ania, dawnsak aphu a ni” ka ti sap a,a chhungah eng nge awm ka hria, ka awh ber a ni lo; mahse, a thutiama ding nghet thini kha vawiinah pawh a la ding nghet tho a nih dawn hi.
Zuali nen chuan sex kan hmang dun fo a, hrehawm ka tih ruk deuh chu- Teteii nen ka compare thin chu a ni, chutianga ka tih chuan Tetei buk chu a rit zawk ziah a! a chetdan tenawm takte ka ngaihtuah chhuah leh a tul phah fo thin, khang thilte khan Zuali chu a hum thin a, Teteii chu a kang zawkah a tang leh thin. Zuali chu Teteii ang khan awm se ka ti thin, min duh huam huam te chu ka ning thin a, Teteii kha chu angaihawm tawk leka inthunun kha a thiam thin a, Zuali chuan a rinhlelh zawng hmeichhia chu a ankhum hreh lo fo a! Teteii erawh kha chuan fiahna a zawng thin; Zuali chuan ama chanchin leh a chhungkaw chanchin sawi nuam a ti a, fakna a beisei thin, Teteii chuan a ma chanchin a sawi ngai lem lo a, mahse, alaka ka zawhna te chu felfai takin a chhang thin, a sawi tamber chu ka sawi duhzawng leh ngaihthlak nuam ka tih zawng a ni thin.
Zanah chuan Zuali chetdan avang khan pawi ka tih thu ka va hrilh ve a, “Engkim a tha vek e, hmangaihtu tha tak a nih ngei ka beisei” a rawn ti a.
“Ka b’day I lo la hriat vang paw’n ka lawm e”
“Ka hriatrengna hi a tha lawm, hehe”
Ka be zui chak tlat a, “I chhungte an dam em?” “Aw, nang?”
“An dam e, chuan I hna I la thawk zel a mi?”
“Eng hna maw?”
“Call Girl”
A reh ta vang vang a. A sana min leisak chu ka bun a, a man a tlawm lovang tih ka ring. Ka bike chiankuan loh vangin Bus kan nghak a, Teteii a lo kal a, ka bana sana chu a rawn melh reng a, a nui sak a.
“Teteii intih saw nizanah kan thenawmte inah pa pakhat nen an riak dun” Tuai pakhat hian a ti deuh lawng lawng a! Zuali chuan min rawn melh zauh a, “Awii a riahpuipa lah kha a upat tawh hmel sia, mak ka ti tawp”
Ka tho vut a, Zunin bula Teteii lo ding chu ka pan a, ka sana bunlai chu ka phelh bawk a, “Kha, nei leh rawh, tenawm taka I thawhchhuah hmanga ka piancham min lawmpuina thilpek hi ka pawm thei lo, ka tan a bawlhhlawh tlat” ka ti nghal bawrh bawrh a, Faki bak thian kawm tur pawh a nei tawh lo; vawiin chu Faki a rawn kal lo a niang.
A mitmenga tawrhna lo lang chu ka hmuh hmaih bik lo; mahse, henu hian anilawm ni na taka min hliam a, zak taka min siamtu kha..a thilpek ka la pawm duh chu ka inhua, ka inngainep bawk.
“Alex, kha sana lei nan khan pawisa ka khawl ve asin’
“Sex hmanga I thawhchhuah ani tih chu min hrilh lo mai rawh, kha la rawh” tih pahin a kutah ka va hmehbel lui a, min en ngawt ngawt ringawt! Midang awm ve te chu an awmna a hla deuh a, kan thusawi chu an hre phak lovang.
“Awle, reilote I bun avang pawh khan ka lawm e’ a nui leh sang a. Ka kut chu ten hmel zetin ka lasawn a, “Min be tawh lo la atha ang, ka bialnu hlui I ni tih pawh hi mite hian hrereng lo se ka duh, nang ang mi tenawm hi chuan ka hmangaihna I phu lo a ni e, nih phawt le, thiannu” ka tawngkam dengkhawng leh na tak chu pangngai takin a la dawngsawng thei tho zu nia! He nu hi a…
“I pite Rami ngaihzawng neih thu kha I hre tawh em?” ka nuin a tih chuan, ka phu zawk a, mak ka ti hle. Ka putea nupui hi hmeichhe fel leh inngaitlawm thei tak a ni a; a mizia ka ngaihtuahin ngaihzawng nei tur chuan ka ring pha lo.
“Taxi driver nen an lo inngaizawng reng a lawm, tenawm lutuk, I putea hian a duat lutuk a, awm chin tawk a hre lo a niang” a ti leh hlawih hlawih a. Mi pawmlai mutpui thin ka bialnu hlui ka lo hrechhuak daih thung!
“A virgin kal ve hmiah hmiah mawle” Ruata chu a tawng ring angreng sia, kan va hawi thup a, Teteii lo kal phei mek chu ani chuan a lo nuih sawng a, Ruata meuh pawn a hmusit ve ta! A phutawk a ni, khawngaih ka tum pawn min tih natna ka hrechhuak lehzel a, a harsa ka ti a ni. Mahse, mi zinga diriam taka elsen chu ka duh ve lem lo. A hmai chu a dang bai a, a mitkhur tla duk pawh chu a langsar hle, a taksa thenkhat chu a duk thluah a, a chawn no nalh takte kha an thu chel tawh a, ria chum bat thin kha a cher kuam a, eitha hmu lo hi a nih duh hmel; a che nasa lutuk thin a nimahna le..
KA PITEII
“Alex, nang chuan min dem ve miah suh aw, I putea hian a zirlo hmasa zawk atin ni” ka piteii chu makti zetin ka en reng ringawt a. Putea hi 1st class officer a ni a, an khawsak a harsa lem lo; piteii hi Thingtlang khua a ni a, nu hmeltha leh hlim thei tak a ni thin, ka putea a zahthiamna leh a inngaihtlawmna chu ka ngainat phah hle a, a fate a enkawl danah pawh sawisel tur awmin ka hre lo. Mahse, hei tunah rin phak loh lutukin ngaihzawng a nei ta tlat a! ka putea lahin a uksak miah lo! An nupa nun chu mak ka ti viau.
“Pite, amak chu ka ti khawp mai, tak tak a nih ka lo ring lo zawk a”
“I putea hian ngaihzawng neiin min fawrsan reng lose tiang hi a thleng lovang”
“Ka putea chu I chiang a maw? I rinthu te hi a lo ni ange”
“Kha..chhiar rawh, a bialnu lo thawn a nih kha” tih pahin a phone min pe a, k’n en nak chuan, ka putea bialnu chuan a lo vau thin a nih chu! Kan khawvel bawlhhlawh zia hi chu aww..
“I pasal hi ka ta a nih hi, vawikhatmah nupa nun hmanpui pawh lo tum ve tawh suh, chuan, chhuak vat la, I fate pawh kha I hruai nghal dawn nia” tih te..a tam mai, ka mur sung sung thei hial.
“Ka putea I hrilh em?”
“Hrilh e, a nui ringawt, ani pawn bialnu a nei tih hi a zep hleinem”
“Ta deuh deuh chuan, engtik atang khan nge “
“Thla 3 vel chu a liam tawh ang, ka tuar rei tawh asin, Alex, ka fate avang chauh hian ka la awm hram hram a ni, kan mutdun lohna pawh a rei tawh lutuk” mittui tling piau chuangin a ti a, ka khawngaih kher mai.
“A bialnu hi I chhanglet ve ngailo mi?”
“A tir chuan chhang ve e, mahse, awmzia anei lo, I putea zurui in kut min thlak phah hrep tawh lehnghal, ka tlawm ve khawp asin” a tap lo chauh a ni.
Ka putea bialnu number chu ka la a, engemaw ti deuha hauh ka rilruk a ni. Ka putea chu mitha leh nelawm tak, zu pawh polite tawk leka in thin, thilphal deuh a nia, ka tihtauh changa ka tlan tauhna ber a ni thin. Mahse, ngaihzawng a neih hnu khan ka ngaihbel vang nge a inlahrang ta riau niin ka hre hnuhnawh a; kan inhmu khat deuh bawk nen. Putea mahnise zilh ve hlak chu ka chak khawp mai.
“Heii” kaputea bialnu chu ka va text a, min reply duh thak lo. Ka call a, a ring quit thak thak, tih mualpho ka duh vangin engemaw tak chu tih ka tum a ni.
“I putea lah rui reng ringawt, khua hi a var hlawl lo” ka nu mangang tak chuan a ti hlak hlak a, unau pahnih chiah an nih vangin ka putea chu a ngaihtuah hle tih ka hria.
“Nu, putea pawn bialnu a lo nei reng alawm”
“Ka awih lo lutuk”
“Dawt ka sawi lo, piteiin a fiahna nen min pe thlap; chuvang a lawm piteii pawn bialpa a neih”
“I piteii chhuanlam mai mai a nih chu” a ti talh a. Inhnial ka peih loh vangin ka ngawi ta a.
“Alex, ka ngaih a tha lo, ka la period lova” Zuali message chuan ka thin phu a tiring hle.
“Damdawi I ei ziah ani lawm ni?”
“Lawma te ina kan tih tum khan ka ei lo a” khai aw!
“Va zialo ve, I rai lovang, I damdawi ei thin vang khan I period hun a insawn dawn a niang”
“Rai tai la engtin nge niang?” heihi hmeichhiate zawhna a ni fo! Ka ning..
“Ka hre lo le, nupui neih chu ka la ngam lova”
“Nawmchen nan chauh ani maw min lo ngaihzawn? Ka ring ve em em che a” hei pawh hi an sawi ve ziah!
“Chutiang zawngin ngai suh, ka la naupang em a lawm, I rai lovang”
Mipa te pawh hi kan mak ve ngawt mai! Kan tihsual rah chu a hunlaia nuam hle pawh tlanchhiatsan kan tum fo thin, Zuali hi ka hmangaih lova, ka tan chuan toys chikhat a ni, min zarbuai chhen vang leh Teteii laka ka rilru hliam, pawisak nei tawh lovin ka chhan ve mai mai kha a nia, mahse, sex hmanga inzawmna hi chu hmangaihna tello pawn a lo daihrei ve tlat thin a. A rai a nih chuan ka nei duh der silo, ka rilru a buai ve ta khawp mai. Teteii nen khan lo chesualin, lo rai ve tase, lawm takin ka nei ngei awm sia! Keimah leh keimah chu nep ka inti a, Zuali chu a zahawm pawh ka ti..ka thinlung na damdawi atana ka hman chuan min phuar tan ta tih ka hre mai, chinfel vat angai dawn ani, mipa taka hmachhawn chu ka duh, mahse, rai ta se…ka chhe vek a ni mai.
“Pite, khanu kha message thawn la; inhmuh I duh thu hrilh rawh”
“Min hmu duh awm lo e mai”
“Ka pasal chu then turin ka inpeih tawh a, chumi hma chuan hmuh chea thil pawimawh tak sawipui che ka duh a, min puih theih ka beisei a ni, khawngaihin inhmu ang “ tiin ka type sak a, ka thawn ta a.
“Awle, a hmun tur ka rawn hrilh leh ang che” a rawn ti a.
Sunday chhun a ni a, ka piteii chuan min lo sawm a, ka nu chuan a lo melh kha kha a, engmah chu a sawi lem lo; kan inphur chhuak ta a, ka putea bialnu hmun sawi lam chu kan pan ta a. Zuali’n min lo call chhen a, ka be hman hrih lo, sual chu ka intiru ve reng mai. Waiting shed –ah a lo thu a, min hnungchhawn zawngin. Ka piteii chuan a aw a thian karh a, a lo hawi ta a. Ka hlauhthawn ang ngeiin AMAH ani tlat!! Ka alh pup ni hian ka hria a, ka lo hlauhthawn ruk leh ani ang tih ka hlauh em em si, fiah thuai ka duh vanga piteii hmang tangkaia hmu tura ka kal ve nachhan hmeichhia, ka putea bialnu chu tudang nilovin Teteii a ni. Ka piteii pawh a mengphawk kher mai, min rawn melh a, awmngaihna ka hre mang lo.
“Alexa hi a rawn kal tel ve ka lo beisei hauh lo asin” pangngai takin a ti leh thluam a. Henu hi ti nge mi mak leh hriatthiam harsa tak a lo nih chu le..
“A pawi chuanglo; a lo kal ta sa sa , nakinah a la hre dawn tho bawk a; thu ula, I sawi duh chu min han hrilh t ache” a ti leh a. Ka piteii chu a ang phuau ringawt! Chu thil chuan a shock ve lutuk tih a lang reng.
“Tete, hetiang em ema I lo tenawm hi ka ring lo asin, I lo rapthlak kher mai, mi hurnu” ka thinrim lai hian ngawih ka duh fo thin a, mahse, insum buai chu tulin ka hre tawh lo a ni.
“Nia, lemchan ka thiam ve tho tiraw? Ka hlawhtling em em lehnghal, I putea chu nang aiin a zei zawk asin”
Ka tuar thei thlawt lo, ka beng ta thuai a! hmeichhia kut ka thlak vawikhatna a la ni. Ka pitei chu a sirah a lo ding khur char char a, Teteii chu a nui a, min rawn en a, ka bialnu Teteii kha chu hmuh tur a awm tawh lo; mak ka tih zia chu ka thup seng lo a ni ber.
“Ka lawm e, ben chu ka phu ve reng a lawm, mak I ti lutuk tih pawh ka hria, mahse, hetiang hmeichhia hi ka ni”
“Ka putea hi I nei dawn chuang lo tih hria la, tuna tang chuan ani ngaihzawn leh a nupui vau hi I lo bansan tawh dawn nia, tenawmnu”
“Lungngai suh, ani hi ka nei thei dawn lo anih paw’n amah aia hausa putar tamtak ka la nei tho a lawm”
“Lalhmingmawi” ka ti tuar a. Ka tah hi a chhuak zawk. Ka luak te lam a chhuak bawk. Ka piteii chu ka kai dawr dawr a, ka haw pui leh ta a.Ngawi rengin kan inphur dun mawp mawp a, ka zak ngawih ngawih a ni, ka piteii chu zahawm ka ti a, ani lah inthlahrun hmel em emin a la kimki zawk za mah a.
“Alex, ka period leh a, ka lawm zia chu”
“Ok, I period tawh bawk a, tunah chuan inthen tawh mai ang, kan ti leh awm sia, a buaithlak”
“Eng a?! “
“Min hrethiam rawh, mipa tha tak I tawng dawn nia, tunah chuan ka thei tawh lo; ka rilru a buai, min ngaidam ang che”
“Ka hmangaih che sin, in then ka duh lo”
Ka phone ka off a, zu in turin ka chhuak ta a. Teteii chuan a rualin mi pathum thinlung a hliam ta, amah vanga Zuali ka tina chu pawi ka ti a, mahse, ka thiamlohna chin pawh a awm ve, Zuali chu ka hne tawh tlat! Kan awmdun tawh chuan sex kan hmang zel si a, engtikah emaw chuan a la rai anga, ka chebuai ang tih ka hlau a ni, tunah chuan ka rilru hi ruak vek se, lungkham neilova mutthilh ka chak a ni.
“Pute, I lo tenawm kher mai, ka bialnu hlui ber kher maw I lo ngaihzawn le?” ka rui kher mai, ka ding ngil hlei thei lova; ka putea chu ka sawi nawk nawk a, a ngawi reng a, a inthiamlo ve deuh a niang chu..
“Sawtiang hmeichhe tenawm lutuk saw ka piteii aiin I thlang amaw? Nang lo pawh hi a kawp tun ang tih I hre lo a mi?”
Ka putea te sofa-ah ka chatthla ta ringawt mai. Ka harh chuan ka lu na ngut ngut chu ka hre hmasa ber a, thil thleng chu ka theihnghilh tep a, mahse, ka putea hmel ka hmuh chuan ka hrechhuak leh a, mumalin ka awm theilo, ka buai ani tawp. Ka rilru pawh a na em em lo, ka thinrim viau lah ka hre hek lo. Mahse, ka pangngai hlawl lo, harhfima hmachhawn ka ngam lova, nilengin zu ka in leh a, ka haw a, ka chhungte chuan maktih hmel takin min lo en hrek hrek a, room-ah ka chho a, Teteii thil min leisak tawh zawng zawng chu ka khawm a, chhuatah ka dahkhawm a, ka halral ta vek a! ka mittui hi ka hriat loh laiin a lo luang ve chhen lehnghal, hmeichhe pakhat vangin ka kehchhe zo ta vek mai.
KAL BO RAWH..
“Alex, I harh em? Min hria em?” tia min au vak vaktu a vang chuan ka meng diar diar a, Katrina Kaif a lo ding a, min lo nuih sen sen a, a rim chu a tui chek a, a kut nel thep chuan ka chal chu a rawn dek a, ka dam huai huai ni hian ka hria a. Mahse, Katrina Kaif chu a hla tial tial a, ka lo ban tawk tawk a, hmeichhe pakhat hi Katrina kaif aiah chuan a lo ding ta zawk a, chunu ka hmuh chuan ka ner sawk a, lehlam ka hawisan ta daih a!
“Alex, harh rawh, khawngaihin” chu aw chu vawitam tak ka lo ngaithla tawh thin a, ka beng bulah thaw ham ham chungin, “Ka hmangaih che” tiin a lo tawng tawh thin.Ka ngaithla ning ngai lova, hmanah kha chuan..ni e, hmanah kha chuan. Tunah chuan a engkim chu ka hua a ni, ka haw takzet tawh.
“Kalb o rawh, nang hmeichhe tenawm hi”
Tap ri ka hre ta a. vawikhat chu ka bulah a lo tap tawh a, zu ka ruih vangin. Tuna a tah nachhan erawh ka hre lo, hriat pawh ka duh lo.
“Vawikhat chauh min ngaithla ta che”
“Bumhmang leh phatsantu, kal bo rawh ka tih che kha; ka hmu peih lo che, I aw hriat ringawt pawh hian ka khua a tisik hluah hluah, hmuh leh che ka duh tawh lo, I thi tawh, ka nun atangin I thi tawh, chhuak rawh” tiin ka au tuar tuar a! ka nu a rawn tlan lut a, hmeichhia chu tap chungin a tawlhkir a, a hmai a hup a, mittui tam tak nen..sawng mittui aia tam saw ka lo seng ve tawh asin; a mittui chu ka tan engmah a ni lo, eng thilmahin ka thinlung chu a tinem thei tawh lovang.
“Alex, ka hmangaih che, mangtha aw”
“Zawngi, ka hmangaih ve lo che, ka tan engmah I nilo” a nui a, min en reng chungin ka room chu a chhuahsan ta a.
“Engvanga khanu kha rawn luhtir nge maw in nih le?”
“Min ngen nasa sia”
Zanlaiah rui chungin ka thinlung na hrikthlak nan, ka inkhalh chhuak a, speed sang lutuk chu ka thunun zo ta lova, ko pang ka su ta bur a! a thim ta vek mai, ka harh leh chuan ka roomah ka lo awm a, hmeichhia kha a lo awm ve bawk, chu chu ka hriatchhun a ni.
Ka ken a ngut ngut chu ka zuk melh a, an lo tuam bur a, ka lu lah chu an tuam chhah luk bawk a. Zanah chuan nachhawkna in min chiu a, ka muhil dawn siar siar tihin ka room kawngka chu a rawn inhawng a, hmeichhe ruangam a lo lang a, ka lo melh reng a, a lo hnai zel a, a hmel a lo lang a.
“Kal bo rawh ka tih kha, ka be duh lo che”
A ngawi reng a, ka mutchhuak lutuk chu ka chechang peih thlawt lova, ka muhil ta a, ka tuihal lutukin min kaiharh a, ka khum bula tui chu k’n ban a, ka in khawlh khawlh a, ka zun chhuah zia ka hre nghal, harsa ti takin ka inbengkang a, ka chhungten min riahpui an tum pawn ka duh lo a, intipa ve tak ka nih vangin midang puihna tel lova chet chu ka tum tlat a. Ka luhai lutuk chu ka pai chawn chawn a, ka kawngah chuan kut nem leh nel thep hian a rawn dawm a! ka ding khawng zawt ringawt!
“Min thlah rawh, I kut tenawm hi dahthla vat rawh” ka ti tuar a!
Mahse, ka tlu dawn zel si, toilet-ah chuan min kuah lut a, engmah a sawi lo.
Khumah min mut leh a, ka thinlunga ka huat ngawih ngawih khan min tihahdam tho si! engmah hi ka hrethiam lo.
“Haw rawh, khawngaih takin ka ngen a che, min khawngaih la, ka hmaah hian lo inlan tawh lo hram rawh”
“Reilote ka thusawi min ngaihthlak sak thei angem?”
“Thei lo, I dawt phuahchawp ka ngaithla duh lo, ka duhthusam chu I hmel hmuh tawh loh hi a ni” ka ti ta thlawt a! a kun a, nui chungin a rawn dak chhuak leh a, a mita mittui tling khat vek chungin, “Awle, I duhthusam chu ka ti hlawhtling ang, I duhthusam tih hlawhtlin hi ka duhthusam a ni e” ka inrin hmain ka chalah a rawn fawp zauh a, a hmui chu a la nem reng asin..a chhuak ta a. Ka muhil thei tawh silo a, khua chu var har ka ti ngei mai.
Ka tukverha atanga ni eng lo lut chuan min rawn chhun a, chunglam ka melh reng a, engmh ka ngaihtuah lem lo.
Ka nu chu hmanhmawh zetin ka room-ah a rawn lut a, “Bawiha, Teteii a thi!” a rawn ti ta a.
TETEII
“Ka thiltihte hi ka hmangaih vang chea ti ka ni tih I hriat hun chuan, nang chauh tal chuan min dem lo ang che aw..
Nang ka tawn a tang che khan ka duhthusam ka hmu ta tiin beiseina tamtak nen ka nitin hun ka hmang liam thin. Ka laka I dawhtheihna zozaite, min duatna te, hriatthiamna tamtakte..engkim kha englaimahin ka theihnghilh ngai lova, ka theihnghilh phal hek lo, ka hriatrengna thinlungah hian I hming chu hawrawppuiin a inziak a, eng thilmah hian a nawhreh ka phal ngai lovang. Ka tana I thatna zawng zawngte kha kei chuan natna tawrhhlelhawm tak hmangin ka thungrul che a, ka kawng thlan chu I tana tha tur emaw tiin harsa takin ka zawh a, mahse, ka kawng thlan chu a lo dik tawk lova, ka thiltih pawi zia ka hriatchhuah khan ka lo tlai tawh si a! tuna ka kawng thlan erawh a dik tawh ngei ka beisei a ni, duhthlan tur dang ka nei tawh lo bawk a, I duhthusam tihlawhtling tura ka kawng awmchhun ka zawh a vang hian ka inchhir lova; I duhthusam a hlawhtlin tak a vangin ka lawm em em zawk asin.
Zankhat chu ka cousin Mapuii hian a piancham lawm turin min rawn sawm a, nang pawn I hriat kha ( “Ka cousin b’day kan lawm dawn a, kal ve I phal em?” a rawn ti a, ka ni pasal damlo ka awmpui lai a ni a, “Aw kal rawh, haw tlai lo la” ka va ti anih kha..) Mapuii chuan min lo sawm a, an ina kal ta lo chuan, a thiante in kan pan ta a, kan va thlen chuan, mi sawm bawr vel an lo awm a; zu an rui hle hlawm a, kei erawh chuan farkhat mah ka in lo, mahse, ka thlansa tih daih nan theitui ka in ve, min ngaihtuah ka hlauh vangin engmah ka rawn hrilh ta lo che a ni, Mapuii chuan inchungah min hruai a, room pakhatah min luhpui a, chutah chuan mipakhat a lo awm a, Mapuii chuan ka phone hman min dil a, pawnah a chhuak a, a rawn let ta lo, chu mipa lo awm ve chu a bialpa emaw ka ti a, mahse, a lo ni lova, chupa chu tudang ni lovin I putea a ni!
Min bia a, keipawn nel takin ka bia, mahse, khatia room-a min khunghrang ringawt kha mak ka ti a, a chhan ka zawt nghe nghe, Mapuii a lo kal huna zawt turin min ti ringawt a! ka luhai chiai chiai chu hrehawm ka tiru hle mai, a hnuah phei chuan ka pai ta chawn chawn a, room atanga chhuah ka tum a, pawnlamah kawngka chu a lo inkalh tlat mai. Ka hrethiam tan ta a, mahse, ka che thei tawh lo, ka zawi vek a, I putea chuan khumah min mut a, ka thawmhnaw a phelh a, a tawng a, mahse, eng nge a sawi ka hre tawh lo. Tichuan, nang ka hmangaihber tan pawh kan inneih zan atan a ka khek leh ka vawnhim, nangpawn I khawih chhiat phal loh ka zahawmna leh thianghlimna chu I putea chuan a tichhe ta vek a!
Chumai a la nilo, mipahnih an lo lut leh a, min pawngsual leh ta a! ka tap lova, ka thinlung erawh chhun angin a na a ni, I hming ka lam a, I awm si lo. Ka ngai lutuk che asin, nang chu awmla khang mi tenawmte kha I that duh hial ang tiraw? Chumizan chuan Mapuii chuan min vau a, min pawngsual lai kha an lo coverd vek tih sawiin min hmuh tir nghe nghe, ka sawi chhuak a nih chuan, a darh nghal tur thu min hrilh a, mumal lo takin ka zan hun ka hmang liam a. Engmah ka ngaihtuah thei lo, thih ka chak tih chauh lo chu..vawitam hrui hrual ka valh a, mahse, I hmel ka hmu a, ka thulh leh thin. Ka chhungte hrilh ka duh, mahse, an rilru na lutuk tur leh kha video avang khan ka ngawi leh thin. Mapuii chu a ruka khatiang tih ching kha a lo ni a, khang mi hur ho khan pawisa an pe a, anin hmeichhe khawngaihthlak takte chu a black mail ta thin a. Phuba lak ka tumna avang chauhin dam ka thlang leh ta zawk a ni.
A hmasaberah I chungchang ka ngaihtuah a, I tan ka thianghlim tawh loh vangin, I nupui ka ni ngam dawn tawh lo a, tin, ka thianghlimna min chhuhsaktu chu I putea ngei ani tih hi hre lomahla ka thinlungah a thi tawh ngai dawn lo; I hriat phei chuan I na anga, I zak anga, ka laka inthlahrung taka I awm kha ka hmu duh lo; kan innei thei dawn chuang lo nia ka hriatna chuan pawngsual aimah khan min tina zawk asin. Then dan che ka thiam lo a, chhuanlam ka hre hek lo; ka then tawp ringwt mai che anih kha.. khamini khan e..tap lo tur leh inchhir lo tura ka inthunun nasat zia kha hria la chuan min khawngaih ka ring thin. I kalbo hnu khan ka hmelmate hrem dan tur chu ka ngaihtuah a.
Call Girl ka nih angai ta kha pawi ka ti, mahse, ka natna chuan pawisak min neih tir thei tawh silo; putar nena kan video kha keima tih a ni, khapa kha an vengah chuan palar tak, kohhran Upa ni lai ngat anih kha, tichuan a darh ta a, a nupui leh fanauten an chhuahsan a, kohhrana a nihna pawh hlihsak a nit ta bawk. Pakhat ve thung chu ka theih ang tawkin ka tilawm a, lehkhabu leh film hmangin ka inzir a, rapthlak tak ka ni. Ka angchhunga ka dah ngheh hnuah a Bank Account number hriat ka tum a, a pass-book ka dil a, ka hneh tawh tlat avangin min pe mai zel a, pawisa ka lakchhuahsak vek a, a Account pakhat, a nupui tana a siam erawh ka khawihsak lo. Ka pawisa lakchhuah chu chhawmdawlna inah ka pe vek a, a office lama a eiruk dan thil te ka zawt thin a, ahmaa saruaka ka din tawh chuan a sawi zung zung zel a, zankhat chu kawng siamna tur a lo lakpen dan chungchang ka sawipui a, Video in ka coverd thlap a, zu a rui tawh bawk nen, ka zawtchhuak ta dap a, Journalist pakhat hnenah chu video chu ka thawn ta a, hmanni maia zoram pumpuia lar chhuak, eiruk thubuai vanga a hna atanga ban leh thubuai nei mek kha chu putar chu a ni.
Mapui pawh call girl anga min hriat tawh avangin kan inzui tam a, remchang ka zawng reng a, thingtlang nula pakhat a bum leh tih ka hriat chuan a hlawhtlin hma ngeia chet lak ka tum ta a, thingtlang nula intura a pawlh damdawi chu ka ruksak a, a in turah ka pawlh ve ta thung a, thingtlang nula chu ka haw tir a, min ngei viau nghe nghe, mahse, atana tha tur a ni si a. Mapuii chu room-ah ka hruai ve ta thung a, ka phelhruak a, ka suasam ta a, ka sama ka inhliah tlat vangin tuman tu nge ka nih an hre lo, mapuii erawh chiang takin a lang a, Tichuan Video chu ka tidarh nghal a, a lar hle nghe nghe, Kohhranah zaipawl tlar hmaa ding thin kha tunah chuan zah avangin pawn a chhuak ngam ta lo, pawngsual ka nih zana video kha release-ah min vau nasa a, ka hlau lo nasa, relese se ka duh zawk hial! A chhan chu tupawn mi hurl eh bawlhhlawh anga min hriat tawh avangin. A tirah kha chuan zahna leh hlauhna khan min thunun a, ka chhungte leh nang ka ngaihtuahna khan ke min pentir thei ngailo; tunah erawh zalen takin phuba ka la thei tawh a, mahse, ka hlim phah ngai reng reng lo.
A tawp berah I putea kha ka ngaihtuah ta a, harsa leh khirh tak a ni. Video hmanga tih mualpho chu ka ngam ngang lo; a chhan chu I zak lutuk tur kha ka ngaingam thlawt lo a ni. Kawng awmchhun nia ka hriat ka zawt ta ngawt a! ka ngaizawng der ta ngawt mai a ni. I piteii fel zei kha ka hria, a pasal chetdan tenawm tak hi engtikah emaw a la hriat dawn avangin a hriat hmain chhuahsan se ka duh a, tin maw, ka sawi hmaih hauh loh tur chu..tu hnen atang bera ka kai nge ka hre lo a..natna tihdam theih loh HIV + ka nei mek a ni! natna ka nei tih ka hriat zan chuan ka thiltihah ka inchhir hman hial a! mahse, “Ka hmangaihber ka nei thei tawh dawn chuang lo, ka thiltih tur hi ka ti zo anga, tichuan ka thi mai ang” tiin ka infuih thar a. Nangmah vang in ka chak leh thin, I piteii leh afate khan I putea natna kha an kai ve ka hlau em em a, nupa nun hmanpui lo turin I putea pawh ka vau thin, ka thikthu chhiat vang emaw a ti a, ka thu pawh a zawm tha kher asin. I piteii te kha chu natna hlauhawm tak lakah an him hram ka beisei a ni.
Iputea anih miau vangin midang anga na tak leh mualpho taka hliam kha harsa ka ti a, tihtawp dan tur ka hre bawk si lo. Min neih a duh thin a, ka thei der silo. Ka duhber chu ipiteii te kha chhuak se, keipawn ka kalsan ve ang ka ti a, mahse, ipiteii kha a luhlul ve ta hrat a ni. Engkim chu ka sawi zo ta.
Nasa takin min hua a, min ten tih pawh ka hria, ka tenawm a ni, ka bawlhhlawh a ni. Ih maw, Zuali nen hlim taka in nui dun lai thla te kha a rukin ka lo la thin a, ka chauh apiangin ka en thin, I thilpek te pawh roh takin ka la vawng a, ka nu leh pate thinlung ka tina a, mahse, engkim ka hrilh tawh e, min khawngaih avanga hriatthiamna mitmeng nena min entu ka nu leh pate mitmeng avang khan thlamuang takin ka kal thei a ni. Keimah vangin I na a, I kehchhe vek tih ka hriat khan lawm taka ka nuih I ring bik em ni? I nat apiangin ka lo na ve a, I nuih rual khan hmangaihna vangin ka lo nuihpui ve thin che asin, hlim taka I awm a, hmeichhe tha tak I tawn chuan keichu khawlaiah pawh thisawn mahila..ka hlim asin, min huatna thinlung I pai theih nan Teteii kha ka dahbo a, rilru let a min kalsan hmak theih nan rapthlak takin ka khawsa lui a, heng zawng zawng bul leh innghahna chu nang ka hmangaihna chauh che hi a ni asin.
I b’day erawh kha chuan ka insumzo thlawt lova, ka pawisa lo khawl hmangin I thilpek tur kha ka lei a, reilote chhung I lo bun ve pawh kha zana tuitaka min mutthilh tirtu a la ni fan asin, I chanchin hi ka ngaihven awl lova, eng nge I tih thin a? tu nge I hmuh thin tih te hi ka hre vek zel; keimah vanga I tawrhna I paltlang hunah chuan keihi I thinlung atangin min nuaibo tawh anga, mithar in thinlung thar an pe che anga, tichuan hlim takin hringnun hi I hmang leh thei ang tih hi ka beiseina a ni. Nang aiin I tawrhchhuah hun kha ka lo nghakhlel zawk asin.
Mahse, I taksain hliam na tak a tuar tih ka hriat khan pawisak nei zo tawh lovin, ka rawn kal a, I nu kha ka ngen ngawih ngawih a, min luhtir a nih kha..khawih chea, duat taka enkawl che kha ka va chak em..mahse, itan bawlhhlawh ka ni tawh a, I mutthilh laite khan I biang ka chul a, mittui nen nang ka deh leh theih ringawt che avang khan ka nui a sin. Ka engkima engkim I ni a, ka damchhungin hmangaih pakhat ka nei a, ka thih thleng pawhin ka hmangaih tih I lo hre dawn nia, hrilhfiah che ka tum a, a sawt tawh dawn chuanglo tih leh I natna belhchhah tu a ni dawn tih ka lo hre lova, khatia I lo remti lo kha ka lawm leh hnuhnawh zawk a, keichuan demna pakhatmah ka neilo che a, ka tan mipa tha ber I la ni reng a, min hmangaihtu I ni tih pawh hi lawm takin ka thihpui e.
Alex, ka ngai che, I room atanga ka chhuah hnu khan kan In ka pan a, ka tihtur chu ka thlangfel tawh, I lehkha tur ka ziah lai hian ka tap miah lo a nia aw..ka hlim lutuk asin, ka hmangaih ber hmu hmana ka kal tur hi..ka tan khawvel hi chenna tlak a ni tawh lova, chen pawh ka duh tawh lo. Ka awm ve avang khan I natna ka thlen fo dawn si a. Ka hmangaihber, ka thianghlimna hlan theilo chea tihchhiat ka nih vangin pawi ka ti a, min ngaidam ang che aw..hmm..khua a var tep tawh e, I lehkha tur ka ziak ringawt pawh hi ka bula awm angah ka ngai che a, ziah zawh a va har em..ka kal ange..dam reng la, hmangaih tlak loh leh bawlhhlawh hmeichhia hi ka taksa aliam rualin I thinlung atang pawh khan lo phumbo ve nghal ang che aw..Alex, fa te I la nei anga..i fate chu ka va’n pawm ve chak tak..anpa anga mi duhawm leh hmangaihna ngah nise ka duhsak e..ka ngai che..mangtha vawng vawng aw..ka hmangaih che, ka hmangaih che..Alex, ka hmangaih lutuk che hi ka kehchhe zo ta..i putea kha ka ngaidam e..ka sawi nawn leh duh..DUAT, ka hmangaih che aw..,”
Hmeichhe rethei tak, thinlung kehchhia, hmangaihna vanga a hmangaih tana in hlan ral thak ngam mi huaisen, hmangaihna vanga mittui nena hringnun hmang liam tu hmeichhia kha..a awm ta lo, nia, a kal tawh.
“Ka duhthusam chu I hmel hmuh tawh loh a ni, kal bo rawh” titu a hmangaihber thu zawmin kir leh tawh ngai lo turin a kalbo ta maw??!! a hmangaihber vanga a mize letling thawka inlar thin, nui lui chunga a hmangaih tana hlimna dilsak thin, a hmangaih tana tawrhna kawng thlangtu, Alexa tana a nunna hlantu..Teteii kha..keipawh hian ka hmangaih asin, ka hmangaih takzet asin. Ka duhthusam emaw a tih kha ka duhthusamloh ber ani tih a hrethiam lo em ni? ti nge kal? Ti nge min hnutchhiah nawn leh tak?
Thlanlunga hming inziak chu vawi engzat nge ka chhiar chhuah tawh..ka hre seng lo. Kum engzat nge liam tawh..ka hre lo.
Ka putea pawh AIDS vanga a thih hnuah leh, Zuali leh Zira ten fa pathum an neih tawh hnuah leh, ka u in fa pahnih a neih tawh hnuah pawh ti nge kei hi ka la dam reng bik le? ti nge mahnia thlanmual lam pana , thlanlung be tura ka la kal fo le?
“Hun reilote kha min dil leh ta che, mawh.min dil leh rawh, khawngaihtakin”tia phun sep sepin thlanlung chu ka chul a,.
“A fair miah lo aw…Tete”
Post a Comment