UDPA minister Zodintluanga chuan, Aizawl chu India rama Smart City atana thlan zingah a tel thu leh, Smart City atana thlan a nih avangin sorkar laipui aṭangin Aizawl cheina tur cheng vbc. hmuh a nih dawn thu a sawi.
Nimina Serchhip Auditorium hawnnaa khualzahawm Zodintluanga chuan, sorkar laipuia Ministry of Urban Development-in India rama khawpui 100 chu Smart City atana proposal siam turin a thlang tih sawiin, "Khawpui hrang hrangte hian mahni khawpui milin proposal an siam a, Aizawl tan pawh UDPA department-in proposal an siam a ni. Vawiina khawpui 30 thlan Smart City atana thlan chhuah zingah a tel ve ta a, Smart City atan Aizawl khawpui chei nan cheng vbc. 500 dawn a ni dawn ta a ni," a ti.
Smart City zingah Aizawl a tel theih nan UDPA department-a thawkte an thawhrim thu sawiin UDPA Minister chuan, "Aizawl proposal hi theihtawpin consultant-te nen UDPA officer-te'n an buaipui a, a hmasa pawh khan decimal point chauhin kan tling lo a ni," a ti a; tun ṭuma an hlawhtlinna chu officer-te thawhrim rah a nih thu a sawi.
Minister Zodintluanga chuan, Serchhipah District Urban Development Officer dah thuai a nih tur thu a sawi a; Serchhip khawpuia in nei lo chhungkaw 350 tan in sak a nih tawh thu leh, Housing for All hnuaiah chhungkaw 1,011 chu batch hmasa ber atan pawh a nih tawh thu a sawi bawk.
#Vanglaini
Post a Comment