Mi zawng zawng hian hrisel leh damrei kan duh vek awm e. Kawla nichhuak chhiara mahni hna theuh thawk tur a kan feh chhuah chhan pawh hi hrisel leh damrei kan duh vang chu a ni ber. Hrisel that hi han duh thin teh mah ila, a kawnghmang kan hriat thin loh vang emaw kan zawm peih loh vangin kan lo damlo leh mai thin ani. Heng mihringte duhthusam, hriselna leh damreina nei thei tur hian thei ei tam leh tui in tam hian awmzia a nei em em a ni. Mihring chanchin kan hriat hmasakber ah pawh chhia leh tha hriatna thei leh nunna thing nen a rawn intan a nih kha.
Awle, chutiang taka mihringte tana theiin hlutna a neih si chuan Mizoramah pawh thei kan nei tam ve em em tih hriat a tha. Heng thei duh duh huna kan hmuh theih mai serthlum, limbu, sisu, lakhuihthei, balhla, theihai, lamkhuang ang te hian kan nunah hlutna alo nei nasa anih chu. Thei ei tam hi taksa tan a tha em em a, ei tam thang chuan a thatzia hriain an hlut hle reng a ni. Thei hian thlum a ngah em em a, chu chu taksa tan chakna a ni a. Tin, theite hian vitamin leh mineral an ngah em em bawk a ni. A bikin theiah hian vitamin ‘C’ a tam em em a, chu chu kan taksain natna a do theihna tichak tu a niin a tangkai em em a ni. Chuvangin vitamin ‘C’ awmna kan ei tam chuan natnain kan taksa a ngam thei lo thin a ni. Hei bakah hian theite hian B complex a nei ve a, chubakah calcium leh potassium kan ruh tana thil tha tak a pai bawk a ni. Natna benvawn tak tak te, thei hmanga enkawl theih te an awm nual a chungte chu:- ruhseh, ashma, thin tha lo, kawngna benvawn, hritlang reh thei lo, cancer leh chaw ei dan dik lo avanga natnate, entirnan, BP sang, lung tha lo, kalna, vun duk te. A hman dan:
1. Kan thei ei te chu an thar tha tur ani. Thei dah rei tawh chu a chakna zaa sawmnga (50%) a bo thei thin.
2. Theitui tharlam sawr chawp zel hi duhthusam a ni.
3. Theitui hi in khawlh khawlh lovin a tep a tep thin tur a ni, tichuan kaa chil nen a inpawlh hman a paitawih a awl bik a ni.
4. Thei chu a ei emaw a in emaw a tha ve ve a, mahse tam tham deuh ei duh chuan a tui sawra in a awlsam zawk avangin damlo tan a tha lehzual a ni.
Thei ei tam emaw a tui in tam luat hi a awm har hle. Thei man a to vang zawkin ei tam a har mai a ni. Nakina damdawi a insen leh teuh ai chuan thei tam laia thei mana insen hi a hlu zawk tih mi tam takin an hre tawh a ni. Natna benvawn entir nan cancer te enkawl nan chuan ni tin theitui litre 3-5 vel in a tha. Serthlum hi thei hrisel tak mai a ni a, kan taksa tana pawimawh vitamin chi hrang hrang, vitamin A,B leh C te a pai teuh a ni. Tin, calcium te, phosphorous te, carotene te a pai teuh bawk a ni. Kan hriat theuh angina vitamin A chu mit tan a tha a, B chu taksa than nan a pawimawh a, vitamin C chu natna laka inven nan a pawimawh ani. Chuvangin serthlum thar lai na na chuan ei tam tum theuh ila a tha hle ang.
Tin, kan hriat \heuh tur thil pakhat chu thil chhum hmin kan ei nasa lutuk hi a ni. Thil chhum hmin lutuk hian vitamin tha, kan taksa mamawh a thah theih avangin kan fimkhur tur a ni. Chawhmeh kan chhum pawhin hmin lutuka chhum ai chuan hmin phelh phawlh a chhum hian chakna a pai tam zawk a ni. Thei leh thlai hringte hian enzyme amah leh amah inpaitawih theihna an nei a, heng enzyme te hi chhum hlum an awl em em a ni. Chuvangin hnim hring, thlai hring leh theite hi i ei uar ang u.
Post a Comment