Pathian ka lungpui hnenah chuan,
“Engah nge mi theihnghilh le?
Engah nge dotu hnehchhiahna avanga lungngaia ka van ruai thin le?” ka ti ang.
Ka ruha khaidaih awm ang maiin mi dotute chuan mi sawichhe thin a;
“Khawiahnge i Pathian le” mi lo ti chamchi a.
Aw ka nunna, engahnge i kun reng?
Engahnge ka chhungah hian i buai reng ni?
Pathian beisei rawh; amahah chu ka la fak dawn si a,
ka hmel tidamtu leh ka Pathian chu…
(Sam 42 :9-11) Pathian beisei han tih hi amahah in nghat tih te, amah ring tihte hi a ni vek a, tunlai khawvelah hian Pathian a beiseina nghah a, rin hi ngam loh a awl ta hle mai. Pathian chauh ringa beisei hi a tawk zo dawn lo va rinna leh hlauhna hi mi tam tak in kan nei ta niin a hriat a ni. Amaherawh chu Pathian hi a pangngai reng a, hman a mi te tan a beisei tur awm ang leh dinhmun harsatna chi hrang hrang tawk ten Pathian an beisei a an lo hlawhtling ang khan vawiin ah pawh hian Pathianah hian beisei tur a la awm a ni tih hi he Kumthar thuchahah hian sawi ka tum chu a ni a.
Beiseina hi mihringte nun hruaitu leh mihringte nun innghahna a ni ti ila kan sawi sual lo ang. Kan nitin awmdan awmze neih tirtu leh kan khawsakna phung mi siam sak tu bulpui ber chu kan beiseina hi a ni. Chu beiseina chu khawvela kan beisei kan nghah chang te; milian leh mi ropuia beiseina kan nghah chang te; sorkar leh tute emaw kan nghah chang te hian a lo hlawhchham thin a, chutah chuan kan lungawi lova kan buai thin a, kan phunnawi a; kan beidawng thin a ni. Amaherawhchu Pathian chu a thutiamah a dingnghet a, a rinawm a, a tih tur chu a ti zel a ni. Chuvangin Pathian beisei rawh tih hi tunlai khawvel dinhmun harsa takah hian thu pawimawh ber angah a ngaih theih ang.
Mi thenkhat chuan sualna leh harsatna kan tawh hian Pathian atanga hla taka awm angah kan in ngai a, Pathian mit hmuha kan tih loh tur kan tih chang te hian Pathian lakah kan inthlahrung thin a. Pathian han beisei leh ngam tur ni pawhin kan in hre lo hial thin a ni. Amaherawhchu, Pathian thu chuan harsatna tawk te, misual te, dinhmun chhia te, Pathian mit hmuha tling tawh lo a inngai te tan beiseina hi siam a ni zawk a ni tih hi i hre thar leh ang u.
He kum tharah hian natna avanga he kum thar chuangchhuak ve hram ni a inngai; kum thar lo awm tur pawh lungngaihna nena hmuak mek engemawzat kan awmin ka ring. damloh harsatna tinreng leh damlohna khirh ber ber a kan ngaihah te pawh hi Pathianah hian beisei tur a awm a ni.Kan Lal Isua hun lai khan damlohna harsa ber nia an sawi thin chu phar natna hi a ni. tihdam theih loh a ni a; chhungte zingah pawh awm thei lovin daipawnah a hranin an khung hrang hial thin a ni. Chutiang ang beiseina nei lo harsatna tawk lian ber zinga mi pharte pawh kha Lal Isua hnenah beiseina neiin an lo kal thin a, chung pharte chu Lal Isuan a lo tidam a ni tih kan Bible-ah hian chiang takin kan hmu a ni. A hun laia khawvelin tih ngaihna an hriat loh harsatna chu kan Lal Isuan a hneh a. Hlim tak leh Pathian chawimawitute zingah khan phar tihdamna changtute hi an tel ve a ni. Chuvangin, vawiinah hian eng natna dinhmun khirh takah emaw i ding a ni mai thei e, Pathian beisei rawh. Amahah chuan beisei tur a awm a ni. A hnenah tawngtai la, a hnenah innghat la, amah chu ring rawh. Pathianin tihngaihna a hriat loh khawpa harsa hi a awm lo ve. Chuvangin pathian beisei rawh.
Sam ziaktuin “Aw ka nunna, engahnge i kun reng? Engahnge ka chhungah hian i buai reng ni? Pathian beisei rawh;” a tih ang khan Pathian beiseina thar nen he kum thar hi i hmang ang u.
Mahni sualna avanga lungngai tam tak kan awm a, misualte avanga lungngaite kan awm a ni thei. kan Lal Isua he khawvela a lo kal chhan bulpui ber chu, chung misual; sualna avanga lungngai, mahni tihngaihna in hre tawh lo, mahni inchhandam thei tawh lo, mahni intidam thei tawh lo te ti dama chhandam tur leh anmahni rawn siamtha leh turin he khawvelah hian a lo kal a ni. Chuvangin eng sualna avang pawhin mi a lo lungngaiin a lo mangang a ni thei e. Nimahsela, vawiin niah hian chung sualna avanga lungngai leh mangangte tan chuan Lal Isuaah hian beisei tur a awm a ni.
Nitin mi sang tam tak chung sual te avanga lungngaia Lal Isua hnena lo kal a, amah rawn beisei a, damna chang a nun thar chang hi kum thin, thla tin, nitin hian an la pung zel a ni. Chuvangin, nang khan i sualna avang leh nangma nuna i beidawnna avang khan Pathianah beisei tur a awm ta lo a ni lo ve. Mite ang bawkin Pathianah beiseina neiin amah chu ring la, amah chu bel la, vawiin niah hian i tan pawh beisei tur a la awm a ni.
Kan Lal Isua hun lai khan hmeichhe sual lar tak mai a hming pawha an koh loh hmeichhe sual an tih hial tawh pakhat chu Lal Isua hnenah a lo kal a. A hun lai mite lakah chuan a beidawng hle a, Lal Isua hnena a lo kal tum pawh khan amah beituten an hual thup ti ila a sual lovang. Amaherawhchu, a rawn belh tak Lal Isua khan chu hmeichhia chu a lo ti dam a, a lo chhandamin a lo ngaidam a; chanchin mawi tak a lo pe thar ta a ni. Vawiin niah pawh hian chung sual avanga lungngaiten Lal Isua an belh a, an lo dam pui a, an lo hlim pui a, an lo thlamuan pui ang chiah chuan Isua Krista chu niminah nen vawiinah nen a pangngaiin a awm reng a ni. Chuvangin misualin, mi lungngaiin; thinlung tih tak zeta Lal Isua a belh a, Lal Isua a pan a, amahah chuan beiseina a neih chuan vawiin hi a damna ni a ni thei a. Tun darkar hi sual avanga lungngaite tan thlamuanna a ni nghal thei a ni. Chuvangin eng sual pawhin min ti buaiin a tibuai a ni thei e. Pathian beisei rawh, Chhandamtu chu beisei rawh. A hmelah hian damna a awm a, sualna avanga lungngai te tan Pathian beiseina kawng a in hawng a ni. Chuvangin he kum tharah hian beidawng lovin chu Pathian chu beiseiin kum a thar ang hian chu beiseina eng min petu Lalpa chu i bel ang u. A ni chuan min tithlawn dawn lova, min ti zak dawn lova, min chhandam dawn a ni.
Tin, A dang leh chu sual avanga lungngai ringawt pawh ni lo, amaha beiseina nei tawh lova tlan bo hial tawh ni a inngai te tan pawh hian beisei tur hi a la awm cheu a ni. Bible-ah hian tehkhin thu lar tak amah kan Lal Isua ngeiin a sawi chu a awm a, Fapa tlanbo tehkhin thu kan hmu a. Hei pawh hi a pa laka a chanvo zawng zawng chu a la a, a tlanbo tawh a. Ama mihring ngaihtuahnaah chuan lo kir leh mahsela a pa hnenah chuan chanvo engmah nei tawh lovah a in ngai a ni. Amaherawhchu, a rilru beidawng takin a va tlanbona hmunah chuan a awm a, ei tur a nei lova, thian a nei lova, tanpuitu a nei hek lo. Chutih lai chuan a pa hnena kir leh turin ngaihtuahna a siam a. Tichuan, a pa hnena a lo kir leh chuan a pain a lo dawnsawn dan Bible-a kan han en hian a tlanbo hmaa a chanvo aia ropui zawk he fapa tlanbo hian a pa angchhungah hian a chang leh thei a ni. Chuvangin Pathian hnen atanga kan tlanboin, Pathian kan chhuahsanin kum hlui lo kal tawh te kum tluanin Pathian duh loh zawng tiin beidawng tak leh riltam tuihalin tunah hian kan awm a ni mai thei e. Mahse Pathian hnenah kir leh rawh, amahah chuan beisei tur a awm a ni. Sual avanga lungngai beidawng tawh te an lo kir a, chumi te chu Lapan a lo dawngsawng dawn a ni tih tehkhin thu amah Lal Isua ngeiin a sawi hi a rintlak a ni.
Dik tak chuan tuna kan Kohhran hruaitu pawimawh tak tak kan tih te leh rawngbawltu ropui tak tak kan tih te hi chumi sual avanga lungngai tawh; mahse Chhandamtun a lo tih dam tawh; chu damna changa rawngbawl tura lo penchhuak leh ta te an ni vek zawk a ni. Mifel chhamdam khawvelah hian tumah an awm lova, misual chhandam awmkhawm kan ni zawk a ni. Chuvangin tumah inthlahrung lovin chu Pathiana beiseina awm chu he kumtharah hian i bel ang u, i pan ang u. Amah chu vawiin niah hian kan beiseina, innghah nan i hmang thar leh ang u, anin min ti thlawn dawn silova. Kan sual leh kan bawhchhiatna te chu hriat renga awm tawh lovin, a ser nen lam hian Lalpa chuan min ti dam thei a ni. Chuvangin i tan pawh ka tan pawh vawiinah hian beisei tur a la awm a ni.
He khawvelah hian ropuina kan um thin a, malsawmna tam tak dawn tumin a thim a var pawh thlu lovin; a dik leh dik lo pawh sawi thei lovin kan tlan bawrh bawrh emaw tih turin khawvel hi a awm a ni. Pathian thu hi ngun taka kan han chhiar a, hun kal tawh zawng zawng te kan han zir hian Pathiana beiseina neitu te leh amah beltu te hi a ni ding chang thin zawk chu! Dik lo tak leh fel lo taka ti a, mahni theih ang tawk tawka in haivur tuma titu te hi a tawpah chuan beidawnna tlangah hian an mualpho fo thin a ni.
Vawiin niah hian hausakna te, ropuina te kan um dawn anih pawhin amah Pathian hnenah hian ropuina pek theihna te, hausakna pek theihna te, malsawmna pek theihna te hi a awm zawk a ni. Amah beltute chu an mualpho dawn lo a ni.
Hebrai sal tang pathum Daniala te, Henania te, Misaela te, Azaria te chanchin kan chhiar a. Daniala Bung khat-ah hian thil mak deuh mai awm chu Lal khawnbawl ni turin i ti mai ang (a tawi zawngin) Interview a awm dawn a, chumi atan chuan in chawm thau lawkna, in tih fin lawkna (tunlai tawng chuan training ang pawhin a sawi theih ang) hun pawimawh tak kal tlang tur an nei a ni. Chutah chuan an lo fin theina tur te, an hmelte a lo mawi theihna tur tein ei leh in tur tuihnai tinreng chu chhawp leh pek an ni a. Nimahsela, Daniala leh a thiante chuan chu chu an duh lo. Lalpa duh loh zawnga in tih hmelthat emaw in tih hmel mawi emaw, in tih fin emaw chu anni chuan thain an ring lova, chumi chu tih loh an tum tlat a ni. an mahni enkawltu chuan a hlauthawng hle a, reiloteah an hmel te a lo chhe bikin an lo cher bik ang a, chutih hunah chuan lal hmaa thlen turin thlen tlak loh hial an lo nih chuan ama chungah hotute chu an hlauhawm dawn a ni, a ti a. Amaherawhchu, Daniala te chuan, ni sawm min fiah rawh, chutah chuan kan Pathian beisei kan neiha hian min ti thalo ta anih chuan i mi pek a piang kan ei ang e, an ti a ni. Chuti chuan fiah ni a lo thleng a, an han fiah ta a. Mak tak maiin an beisei Pathiana chu a lo fail ve ngai si loh avangin midangte aiin an hmel te chu a lo thain a lo mawi ta zawk a ni.
Vawiin niah hian helai thu hi a pawimawh em em a ni. Pathian kan beisei a, amaha kan innghah a, amah kan rin hian kan mualpho dawn emaw i ti lovang u. Kan mamawh zawng zawng awmna chu amah Pathian hi a ni zawk a, amah kan theihnghilha kan vahbo chuan khawvelah hian unaute u beidawnna mai lo chu seng tur kan nei dawn hlek lo. Chuvangin tun hunah pawh hian ropuina um a, chutianga theih tawpa ziana lamah te, ei leh inah te, khawsakna thilah te, in leh loah te kan tlan anih pawhin a pawimawh ber chu – chung zawng zawng neitu Lalpaah chuan beiseina nei a, amah chu belh a, ama mithmuha dik lo leh thil tha lo zawng zawngte kalsan a, chu Pathian hnenah chuan in tukluh hi ropuina kan um, kan chan theihna tur, malsawmna kan um kan hmuh theihna tur chu a ni tih tun hunah hian i lo ngaihtuah thar leh ang u. He kum tharah hian chutiang rilru pu chuan Lapa hi belin bul i tan ang u.
Tunlai khawvela kan rilrua lian ber pakhat chu hausakna sum leh pai te hi a ni. Hausak kan tum avangin tunlai khawvelah hian thil dik lo tih te hi malsawmna dawnna emaw kan ti ta hial a. Pathian ai mahin tute zarzo thei nih emaw te hi malsawmna hnar ni zawk hiala ngaih te pawh a lo hun ta emaw tih mai turin chutianga ngaite pawh chu kan awm a ni mai thei e. Mahse Pathian thu hi han en ilangin Pathian zar chauh zo tumte hi an mualpho bik love. Thuthlung Hlui huna kan hmuh mi ropui tak mai Abrahama kha an va kalna ramah khanin a unaupa fapa Lota kha hmun danga an awm hlanin ralin an lo bei a, ral lakah an lo la a; an lo tlanbo pui a. Chumi thu a hriat chuan Abrahama chuan chung ral te chu bei turin a sipaihote (ti ve mai ang) nen chuan chu ral do tur chuan an kal a, Pathian khawngaihna an chang a, hnehna ropui tak mai changin rallak sum tam tak nen an lo haw a ni. Chutih laia Salem lal chuan a lo lawmin a lo chawimawi nasa hle mai a, chung thil an rawn lak zawng zawngte pawh chu an va hneh a, an va laksak a nih avangin Abrahama te chanvo liau liau tur chu a ni ngawt mai. Chuvangin Salem lal pawhin duhamna tel lovin nei vek mai rawh a ti a ni. Mahse Abrahama chuan chu chu a duh em? Duh lo. A thil kha a duh lo a ni lova, a neih dan tur kha a duh lo a ni. A duh lohna chhan bulpui ber a sawiah chuan thil mawi tak a sawi chu ‘Abrahama hi nangma tih hausak emaw hi min an la ti dah ang e, Abrahama hi keima tih hausak a ni te i la ti dah ang e’. Chu chu Abrahaman a duh loh chhan a ni.
Tute emaw avanga malsawmna dawng a, hausaah min min ngai dah ang e. Chuvangin engmah hi ka la dawn lo, tlangvalho eitur pe la a tawk e. Chuvangin ka hausakna te, ka malsawmna, ka nihlawhna te zawng zawng hi Pathian hnen atang chauhin a ni kei chu ka duh ni, chuvangin tute hming lam tel ngai emaw, tute avang tih tel ngai emaw hian hausak ka duh lo ve, tiin sum leh pai leh ral lak sum tam tak chu Abrahama chuan a lo hnawl ta a ni. Vawiin niah hian he kum thar hun lawmawm tak maiah hian hausak tumin kan tlan a ni thei e, Amaherawhchu, Pathian beisei rawh, amahah chuan chung zawng zawng chu a awm zawk a ni.
“Aw ka nunna engahnge i kun reng, engahnge ka chhungah hian i buai ni. Thil pakhat pawimawh bik a awm a, chutah chuan i nun hmang zo rawh. Chu chu enge ni? Pathian beisei rawh, amah chu ka la fak dawn si a. Ka hmel ti damtu leh ka Pathian chu” tiin a lo sawi ta a ni.
Chuvangin he kum thar hi Pathian chauha beiseina nghah kumah i hmang ang u. Misual harsatna tawk tawhte pawhin, dam lote pawhin, hausak tumte pawhin, ropui tumte pawhin chu Pathianah chuan kan mamawh zawng zawng hi a awm a ni tih hriain he kum tharah hian amah i bel ang u, amah i ring ang u. Amahah chauh hian beiseina i nei ang u. Chu chu Pathianin kan tan pawh min duhsak ber a ni a, amah chu engkim hnar engkim bulpui a ni, engkim awmna a ni tih hi he kum tharah hian i hre thar leh ang u.
Pathianin a thu thianghlim mal min sawm sak rawh se, Amen
Post a Comment